Chapter 97

[English text for this chapter is available]

saptanavatitamo'dhyāyaḥ |
kuṃjala uvāca |
evamākarṇya tāṃ rājā muninā bhāṣitāṃ tadā |
dharmādharmagatiṃ sarvāṃ taṃ muniṃ samabhāṣata || 1 ||
[Analyze grammar]

subāhuruvāca |
sohaṃ dharmaṃ kariṣyāmi sohaṃ puṇyaṃ dvijottama |
vāsudevaṃ jagadyoniṃ yajiṣye nitarāṃ mune || 2 ||
[Analyze grammar]

homena tu japenaiva pūjayenmadhusūdanam |
yaṣṭvā yajñaṃ tapastaptvā viṣṇulokaṃ sa bhūpatiḥ || 3 ||
[Analyze grammar]

pūjitaḥ sarvakāmaiśca prāptavānsatvaraṃ mudā |
gate tasminmahāloke devadevaṃ na paśyati || 4 ||
[Analyze grammar]

kṣudhā jātā mahātīvrā tṛṣṇā cāti pravartate |
tayoścāpi mahāprājña jīvapīḍākarā bahu || 5 ||
[Analyze grammar]

rājāpi priyayā sārddhaṃ kṣudhātṛṣṇāprapīḍitaḥ |
na paśyati hṛṣīkeśaṃ duḥkhena mahatānvitaḥ || 6 ||
[Analyze grammar]

sūta uvāca |
evaṃ sa duḥkhito rājā priyayā saha sattama |
ākula vyākulo jātaḥ pīḍitaḥ kṣudhayā bhṛśam || 7 ||
[Analyze grammar]

itaścetaśca vegaiśca dhāvate vasudhādhipaḥ |
sarvābharaṇaśobhāṃgo vastracaṃdanabhūṣitaḥ || 8 ||
[Analyze grammar]

puṣpamālāpraśobhāṃgo hārakuṃḍalakaṃkaṇaiḥ |
ratnadīptipraśobhāṃgaḥ prayayau sa mahīpatiḥ || 9 ||
[Analyze grammar]

evaṃ duḥkhasamācāraḥ stūyamānaśca pāṭhakaiḥ |
duḥkhaśokasamāviṣṭaḥ svapriyāṃ vākyamabravīt || 10 ||
[Analyze grammar]

viṣṇulokamahaṃ prāptastvayā saha suśobhane |
ṛṣibhiḥ stūyamānopi vimānenāpi bhāmini || 11 ||
[Analyze grammar]

karmaṇā kena me ceyaṃ kṣudhātīva pravarddhate |
viṣṇulokaṃ ca saṃprāpya na dṛṣṭo madhusūdanaḥ || 12 ||
[Analyze grammar]

tatkiṃ hi kāraṇaṃ bhadre na bhunajmi mahatphalam |
karmaṇātha nijenāpi etadduḥkhaṃ pravarttate || 13 ||
[Analyze grammar]

saivaṃ śrutvā ca tadvākyaṃ rājānamidamabravīt || 14 ||
[Analyze grammar]

bhāryovāca |
satyamuktaṃ tvayā rājannāsti dharmasya vai phalam |
vedaśāstrapurāṇeṣu ye paṭhaṃti ca brāhmaṇāḥ || 15 ||
[Analyze grammar]

duḥkhaśokau vidhūyeha sarvadoṣaiḥ pramucyate |
nāmoccāreṇa devasya viṣṇoścaiva sucakriṇaḥ || 16 ||
[Analyze grammar]

puṇyātmāno mahābhāgā dhyāyamānā janārdanam |
tvayaivārādhito devaḥ śaṃkhacakragadādharaḥ || 17 ||
[Analyze grammar]

annādidānaṃ viprebhyo na pradattaṃ dvijoditam |
phalaṃ tasya prajānāmi na dṛṣṭo madhusūdanaḥ || 18 ||
[Analyze grammar]

kṣudhā me bādhate rājaṃstṛṣṇā caiva praśoṣayet |
kuṃjala uvāca |
evamuktastu priyayā rājā ciṃtākuleṃdriyaḥ || 19 ||
[Analyze grammar]

tato dṛṣṭvā mahāpuṇyamāśramaṃ śramanāśanam |
divyavṛkṣasamākīrṇaṃ taḍāgairupaśobhitam || 20 ||
[Analyze grammar]

vāpīkuṃḍataḍāgaiśca puṇyatoyaprapūritaiḥ |
haṃsakāraṃḍavākīrṇaṃ kahlārairupaśobhitam || 21 ||
[Analyze grammar]

āśramaḥ śobhate putra munibhistattvavedibhiḥ |
divyavṛkṣasamākīrṇaṃ mṛgavrātaiśca śobhitam || 22 ||
[Analyze grammar]

nānāpuṣpasamākīrṇaṃ hṛdyagaṃdhasamākulam |
dvijasiddhaiḥ samākīrṇamṛṣiśiṣyaiḥ samākulam || 23 ||
[Analyze grammar]

yogiyogeṃdra saṃghuṣṭaṃ devavṛṃdairalaṃkṛtam |
kadalīvanasaṃbādhaiḥ suphalaiḥ pariśobhitam || 24 ||
[Analyze grammar]

nānāvṛkṣasamākīrṇaṃ sarvakāmasamanvitam |
śrīkhaṃḍaiścārugaṃdhaiśca suphalaiḥ śobhitaṃ sadā || 25 ||
[Analyze grammar]

evaṃ puṇyaṃ samākīrṇaṃ brahmalakṣmasamāyutam |
sa subāhustato rājā tayā supriyayā saha || 26 ||
[Analyze grammar]

praviveśa mahāpuṇyaṃ tadvanaṃ sarvakāmadam |
bhāsamāno diśaḥ sarvā yatrāste sūryasaṃnibhaḥ || 27 ||
[Analyze grammar]

rājamāno mahādīptyā parayā sūryasaṃnibhaḥ |
yogāsanasamārūḍho yogapaṭṭena saṃvṛtaḥ || 28 ||
[Analyze grammar]

vāmadevaṛṣiśreṣṭho vaiṣṇavānāṃ varastathā |
dhyāyamāno hṛṣīkeśaṃ bhuktimuktipradāyakam || 29 ||
[Analyze grammar]

vāmadevaṃ mahātmānaṃ taṃ dṛṣṭvā munisattamam |
tvaraṃ gatvā praṇamyaiva sa rājā priyayā saha || 30 ||
[Analyze grammar]

vāmadevastato dṛṣṭvā praṇataṃ rājasattamam |
āśīrbhirabhinaṃdyaiva rājānaṃ priyayānvitam || 31 ||
[Analyze grammar]

upaveśyāsane puṇye subāhuṃ rājasattamam |
āsanādi tataḥ pādyairarghapūjādibhistathā || 32 ||
[Analyze grammar]

muninā pūjito bhūpaḥ priyayā saha cāgataḥ |
atha papraccha rājānaṃ mahābhāgavatottamam || 33 ||
[Analyze grammar]

vāmadeva uvāca |
tvāmahaṃ viṣṇudharmajñaṃ viṣṇubhaktaṃ narottamam |
jāne jñānena rājeṃdra divyena colabhūmipam || 34 ||
[Analyze grammar]

nirāmayaścāgatosi tārkṣyayā bhāryayā saha |
rājovāca |
nirāmayaścāgato'smi prāpto viṣṇoḥ paraṃ padam || 35 ||
[Analyze grammar]

mayā hi parayā bhaktyā devadevo janārdanaḥ |
ārādhito jagannātho bhaktiprītaḥ sureśvaram || 36 ||
[Analyze grammar]

kasmātpaśyāmyahaṃ tāta na devaṃ kamalāpatim |
kṣudhā me bādhate tāta tṛṣṇātīva sudāruṇā || 37 ||
[Analyze grammar]

tābhyāṃ śāṃtiṃ na gacchāva sukhaṃ viṃdāva naiva ca |
etanmekāraṇaṃ duḥkhaṃ saṃjātaṃ munisattama || 38 ||
[Analyze grammar]

tanme tvaṃ kāraṇaṃ brūhi prasādātsumukho bhava |
vāmadeva uvāca |
tvaṃ tu bhaktosi rājeṃdra śrīkṛṣṇasya sadaiva hi || 39 ||
[Analyze grammar]

ārādhitastvayā bhaktyā parayā madhusūdanaḥ |
bhaktyopacāraiḥ snānādyairgaṃdhapuṣpādibhistathā || 40 ||
[Analyze grammar]

na pūjito'tha naivedyaiḥ phalaiśca jagatāṃpatiḥ |
daśamīṃ prāpya rājeṃdra tvayaiva ca sadā kṛtam || 41 ||
[Analyze grammar]

ekabhaktaṃ na dattaṃ tu brāhmaṇāya subhojanam |
ekādaśīṃ tu saṃprāpya na kṛtaṃ bhojanaṃ tvayā || 42 ||
[Analyze grammar]

viṣṇumuddiśya viprāya na dattaṃ bhojanaṃ tvayā |
annaṃ cāmṛtarūpeṇa pṛthivyāṃ saṃsthitaṃ sadā || 43 ||
[Analyze grammar]

annadānaṃ viśeṣeṇa kadā dattaṃ na hi tvayā |
oṣadhyaśca mahārāja nānābhedāstu tāḥ śṛṇu || 44 ||
[Analyze grammar]

kaṭu tikta kaṣāyāśca madhurāmlāśca kṣārakāḥ |
hiṃgvādyopaskarāḥ sarve nānārūpāśca bhūpate || 45 ||
[Analyze grammar]

amṛtājjajñire sarvā oṣadhyaḥ puṣṭihetavaḥ |
annameva susaṃskṛtya auṣadhavyaṃjanānvitam || 46 ||
[Analyze grammar]

devebhyo viṣṇurūpebhya iti saṃkalpya dīyate |
pitṛbhyo viṣṇurūpebhyo haste ca brāhmaṇasya hi || 47 ||
[Analyze grammar]

atithibhyastato datvā parijanaṃ prabhojayet |
svayaṃ tu bhuṃjate paścāttadannamamṛtopamam || 48 ||
[Analyze grammar]

pretya duḥkhaṃ na caivāsti tasya saukhyaṃ tu bhūpate |
brāhmaṇāḥ pitaro devāḥ kṣatrarūpāśca bhūpate || 49 ||
[Analyze grammar]

yathā hi karṣakaḥ kaścitsukṛṣiṃ kurute sadā |
tadvanmartyaḥ kṛṣiṃ kuryātkṣetre viprāsyake nṛpa || 50 ||
[Analyze grammar]

svabhāvalāṃgalenāpi śraddhā śastreṇa bhedayet |
vṛṣabhau tu matau nityaṃ buddhiścaiva tapastathā || 51 ||
[Analyze grammar]

satyajñānānubhāvīśaḥ śuddhātmā tu pratodakaḥ |
vipranāmni mahākṣetre namaskārairvisarjayet || 52 ||
[Analyze grammar]

sphoṭayetkalmaṣaṃ nityaṃ kṛṣiko hi yathā nṛpa |
kṣetrasya udyame yukto viṣṇukāmaḥ prasādayet || 53 ||
[Analyze grammar]

tadvadvākyaiḥ śubhaiḥ puṇyairviprāṃścāpi prasādayet |
parvatīrthāptikālaśca ghanarūpobhivarṣaṇe || 54 ||
[Analyze grammar]

vaptukāmo bhavetkṣetrī tataḥ kṣetre pravāpayet |
tadvadbhūpaprasannāya viprāya paridīyate || 55 ||
[Analyze grammar]

kṣetrasya uptabījasya yathā kṣetrī prabhuṃjati |
phalameva mahārāja tathā dātā bhunakti ca || 56 ||
[Analyze grammar]

pretya cātraiva nityaṃ ca tṛpto bhavati nānyathā |
brāhmaṇāḥ pitaro devāḥ kṣetrarūpā na saṃśayaḥ || 57 ||
[Analyze grammar]

mānavānāṃ mahārāja vāpitāḥ pradadaṃti ca |
phalamevaṃ na saṃdeho yādṛśaṃ tādṛśaṃ dhruvam || 58 ||
[Analyze grammar]

kaṭukāddhi na jāyeta rājanmadhura eva ca |
tadvacca madhurākhyācca na jāyetkaṭukaḥ punaḥ || 59 ||
[Analyze grammar]

yādṛśaṃ vapate bījaṃ tādṛśaṃ phalamaśnute |
na vāpayati yaḥ kṣetraṃ na sa bhuṃjati tatphalam || 60 ||
[Analyze grammar]

tadvadviprāśca devāśca pitaraḥ kṣetrarūpiṇaḥ |
darśayaṃti phalaṃ rājandattasyāpi na saṃśayaḥ || 61 ||
[Analyze grammar]

yādṛśaṃ hi kṛtaṃ karma tvayaiva ca śubhāśubham |
tādṛśaṃ bhuṃkṣva vai rājannanyathā tanna jāyate || 62 ||
[Analyze grammar]

na purā devaviprebhyaḥ pitṛbhyaśca kadācana |
miṣṭānnapānamevāpi dattaṃ sumanasā tadā || 63 ||
[Analyze grammar]

subhojyairbhojanairmṛṣṭairmadhuraiścoṣyapeyakaiḥ |
subhakṣyairātmanā bhuktaṃ kasmai dattaṃ na ca tvayā || 64 ||
[Analyze grammar]

svaśarīraṃ tvayā puṣṭamannairamṛtasannibhaiḥ |
yasmātkṛtaṃ mahārāja tasmātkṣudhā pravartate || 65 ||
[Analyze grammar]

karmaiva kāraṇaṃ rājannarāṇāṃ sukhaduḥkhayoḥ |
janmamṛtyvormahābhāga bhuṃkṣva tatkarmaṇaḥ phalam || 66 ||
[Analyze grammar]

pūrvepi ca mahātmāno divaṃ prāptāḥ svakarmaṇā |
punaḥ prayātā bhūrlokaṃ karmaṇaḥ kṣayakālataḥ || 67 ||
[Analyze grammar]

nalo bhagīrathaścaiva viśvāmitro yudhiṣṭhiraḥ |
karmaṇaiva hi saṃprāptāḥ svargaṃ rājansvakālataḥ || 68 ||
[Analyze grammar]

diṣṭaṃ hi prāktanaṃ karma tena duḥkhaṃ sukhaṃ labhet |
tadullaṃghayituṃ rājankaḥ samarthopi hīśvaraḥ || 69 ||
[Analyze grammar]

atha tasmānnṛpaśreṣṭha svargatasyāpi te'bhavat |
kṣuttṛṣṇāsaṃbhavo vegastato duṣṭaṃ hi karma te || 70 ||
[Analyze grammar]

yadi te kṣutpratīkāro hyabhīṣṭo nṛpasattama |
tadgatvā bhuṃkṣva kāyaṃ svamānaṃdāraṇyasaṃsthitam || 71 ||
[Analyze grammar]

tava ceyaṃ mahārājñī kṣutkṣāmātīva dṛśyate |
subāhuruvāca |
kiyatkālamidaṃ karma kartavyaṃ priyayā saha || 72 ||
[Analyze grammar]

tanme brūhi mahābhāgānugraho dṛśyate kadā |
kasya dānena kiṃ puṇyaṃ dravyasya munisattama || 73 ||
[Analyze grammar]

tatprabrūhi mahāprājña yadi tuṣṭosi sāṃpratam |
vāmadeva uvāca |
annadānānmahāsaukhyamudakasya mahāmate || 74 ||
[Analyze grammar]

bhuṃjaṃti martyāḥ svargaṃ vai pīḍyaṃte naiva pātakaiḥ |
yadā dānaṃ na dattaṃ tu bhavedapi hi mānavaiḥ || 75 ||
[Analyze grammar]

mṛtyukālepi saṃprāpte dānaṃ sarve dadaṃti ca |
ādāveva pradātavyamannaṃ codakasaṃyutam || 76 ||
[Analyze grammar]

succhatropānahau dadyājjalapātraṃ suśobhanam |
bhūmiṃ sukāṃcanaṃ dhenumaṣṭau dānāni yo'rpayet || 77 ||
[Analyze grammar]

svarge na jāyate tasya kṣudhātṛṣṇādisaṃbhavaḥ |
kṣudhā na bādhate rājannannadānātsa tṛptimān || 78 ||
[Analyze grammar]

tṛṣṇā tīvrā nahi syādvai tṛpto bhavati sarvadā |
pādukāyāḥ pradānena cchatradānena bhūpate || 79 ||
[Analyze grammar]

chāyāmāpnoti dātā vai vāhanaṃ ca nṛpottama |
upānahapradānena anyadevaṃ vadāmyaham || 80 ||
[Analyze grammar]

bhūmidānānmahābhāga sarvakāmānavāpnuyāt |
godānena mahārāja rasaiḥ puṣṭo bhavetsadā || 81 ||
[Analyze grammar]

sarvānbhogānprabhuṃjānaḥ svargaloke vasennaraḥ |
tṛpto bhavati vai dātā godānena na saṃśayaḥ || 82 ||
[Analyze grammar]

nīrujaḥ sukhasaṃpannaḥ saṃtuṣṭastu dhanānvitaḥ |
kāṃcanena suvarṇastu jāyate nātra saṃśayaḥ || 83 ||
[Analyze grammar]

śrīmāṃśca rūpavāṃstyāgī ratnabhoktā bhavennaraḥ |
mṛtyukāle tu saṃprāpte tiladānaṃ prayacchati || 84 ||
[Analyze grammar]

sarvabhogapatirbhūtvā viṣṇulokaṃ prayāti saḥ |
evaṃ dānaviśeṣeṇa prāpyate paramaṃ sukham || 85 ||
[Analyze grammar]

godānaṃ bhūmidānaṃ tu annodake ca vai tvayā |
jīvamānena rājeṃdra na dattaṃ brāhmaṇāya vai || 86 ||
[Analyze grammar]

mṛtyukālepi no dattaṃ tasmātkṣudhā pravartate |
etatte kāraṇaṃ proktaṃ jātaṃ karmavaśānugam || 87 ||
[Analyze grammar]

yādṛśaṃ tu kṛtaṃ karma tādṛśaṃ paribhujyate |
subāhuruvāca |
kathaṃ kṣudhā praśāṃtiṃ me prayāti munisattama || 88 ||
[Analyze grammar]

anayā śoṣitaḥ kāyo hyatīva paridūyate |
kṣudhāṃ prati dvijaśreṣṭha prāyaścittaṃ vadasva nauḥ || 89 ||
[Analyze grammar]

karmaṇaścāsyaghorasya yathā śāṃtirbhavenmama |
vāmadeva uvāca |
prāyaścittaṃ na caivāsti ṛtebhogānnṛpottama || 90 ||
[Analyze grammar]

karmaṇosya phalaṃ sarvaṃ bhavānsvasthaḥ prabhokṣyati |
yatra te patitaḥ kāyaḥ priyāyāścaiva bhūpate || 91 ||
[Analyze grammar]

yuvābhyāṃ hi pragaṃtavyamitaścaiva na saṃśayaḥ |
ubhābhyāmapi bhoktavyaṃ kāyamakṣayameva tat || 92 ||
[Analyze grammar]

svaṃsvaṃ rājanna saṃdehastvayā vai priyayā saha |
rājovāca |
kiyatkālaṃ prabhoktavyaṃ mayaivaṃ priyayā saha || 93 ||
[Analyze grammar]

tadādiśa mahābhāga pramāṇaṃ tadvaco mama |
vāmadeva uvāca |
vāsudeva mahāstotraṃ mahāpātakanāśanam || 94 ||
[Analyze grammar]

yadā tvaṃ śroṣyase puṇyaṃ tadā mokṣaṃ prayāsyasi |
etatte sarvamākhyātaṃ gaccha rājanprabhuṃkṣvahi || 95 ||
[Analyze grammar]

evaṃ śrutvā tato rājā bhāryayā saha vai punaḥ |
svaśarīrasya vai māṃsaṃ bhakṣate priyayā saha || 96 ||
[Analyze grammar]

nityameva mahāprājña tadvatpūrṇaṃ bhavedvapuḥ |
nityaṃ prabhakṣate rājā rājñī tasya ca putraka || 97 ||
[Analyze grammar]

yathāyathā ca rājā ca bhakṣate ca kalevaram |
hasete vai sadā nāryau tayorbhāvaṃ vadāmyaham || 98 ||
[Analyze grammar]

prajñā sārddhaṃ mahāsādhvī caritraṃ tasya bhūpateḥ |
hāsyaṃ hi kurute nityaṃ tasya śraddhānapāyinī || 99 ||
[Analyze grammar]

prajñayā preryamāṇena na dattaṃ śraddhayānvitam |
brāhmaṇebhyaḥ susaṃkalpya annamuddiśya vaiṣṇave || 100 ||
[Analyze grammar]

evaṃ sa bhakṣate māṃsaṃ svasya kāyasya nityadā |
yoṣidapyātmakāyaṃ ca rasaiścāmṛtasannibhaiḥ || 101 ||
[Analyze grammar]

tato varṣaśatāṃte tu vāmadevaṃ mahāmunim |
smṛtvā sa garhayāmāsa ātmānaṃ prati suvrata || 102 ||
[Analyze grammar]

na dattaṃ pitṛdevebhyo brāhmaṇebhyaḥ kadā mayā |
na dattamatithibhyo hi vṛddhebhyaśca viśeṣataḥ || 103 ||
[Analyze grammar]

dīnebhyo hi na dattaṃ ca kṛpayā cāturāya ca |
evaṃ sa bhuṃkte svaṃ māṃsaṃ garhayansvīya karma ca || 104 ||
[Analyze grammar]

evaṃ svamāṃsaṃ bhuṃjānaṃ subāhuṃ priyayā saha |
hasete ca tadā dṛṣṭvā prajñā śraddhā ca dve striyau || 105 ||
[Analyze grammar]

tasya karmavipākasya śubhātmā hasate nṛpa |
mama saṃgaprasaṃgena na dattaṃ pāpacetana || 106 ||
[Analyze grammar]

prajñā ca vacanaistaistu rājānaṃ hasate punaḥ |
kvagatosau mahāmoho yena tvaṃ mohito nṛpa || 107 ||
[Analyze grammar]

lobhena mohayuktena tamogarte nipātyate |
tatrāpatitvā māmaiva patitaṃ duḥkhasaṃkaṭe || 108 ||
[Analyze grammar]

dānamārgaṃ parityajya lobhamārgaṃ gato nṛpa |
bhāryayā saha bhuṃkṣva tvaṃ vyāpitaḥ kṣudhayā bhṛśam || 109 ||
[Analyze grammar]

evaṃ taṃ hasate prajñā subāhuṃ priyayānvitam |
etaddhi kāraṇaṃ sarvaṃ tayorhāsasya putraka || 110 ||
[Analyze grammar]

bhakṣyamāṇasya bhūpasya dehaṃ svaṃ duḥkhite tadā |
ūcaturdehidehīti yācyamānaḥ sadaiva hi || 111 ||
[Analyze grammar]

kṣudhātṛṣṇāmahāprājña bhīmarūpe bhayānake |
payasā miśritaṃ bhakṣaṃ yācete nṛpatīśvaram || 112 ||
[Analyze grammar]

etatte sarvamākhyātaṃ yattvayā paripṛcchitam |
anyatkiṃ te pravakṣyāmi tadvadasva mahāmate || 113 ||
[Analyze grammar]

vijvala uvāca |
vāsudevābhidhānaṃ tatstotraṃ kathaya me pitaḥ |
yena mokṣaṃ vrajedrājā tadviṣṇoḥ paramaṃ padam || 114 ||
[Analyze grammar]

iti śrīpadmapurāṇe bhūmikhaṃḍe venopākhyāne gurutīrthamāhātmye |
cyavanacaritre saptanavatitamo'dhyāyaḥ || 97 ||
[Analyze grammar]