Chapter 78

[English text for this chapter is available]

yayātiruvāca |
ekena gṛhyatāṃ putrā jarā me duḥkhadāyinī |
dhīreṇa bhavatāṃ madhye tāruṇyaṃ mama dīyatām || 1 ||
[Analyze grammar]

svakīyaṃ hi mahābhāgāḥ svarūpamidamuttamam |
saṃtaptaṃ mānasaṃ medya striyāṃ saktaṃ sucaṃcalam || 2 ||
[Analyze grammar]

bhājanasthā yathā āpa āvarttayati pāvakaḥ |
tathā me mānasaṃ putrāḥ kāmānalasucālitam || 3 ||
[Analyze grammar]

eko gṛhṇātu me putrā jarāṃ duḥkhapradāyinīm |
svakaṃ dadātu tāruṇyaṃ yathākāmaṃ carāmyaham || 4 ||
[Analyze grammar]

yo me jarāpasaraṇaṃ kariṣyati sutottamaḥ |
sa ca me bhokṣyate rājyaṃ dhanurvaṃśaṃ dhariṣyati || 5 ||
[Analyze grammar]

tasya saukhyaṃ susaṃpattirdhanaṃ dhānyaṃ bhaviṣyati |
vipulā saṃtatistasya yaśaḥ kīrtirbhaviṣyati || 6 ||
[Analyze grammar]

putrā ūcuḥ |
bhavāndharmaparo rājanprajāḥ satyena pālakaḥ |
kasmātte hīdṛśo bhāvo jātaḥ prakṛticāpalaḥ || 7 ||
[Analyze grammar]

rājovāca |
āgatā nartakāḥ pūrvaṃ puraṃ me hi pranartakāḥ |
tebhyo me kāmasaṃmohe jāto mohaśca īdṛśaḥ || 8 ||
[Analyze grammar]

jarayā vyāpitaḥ kāyo manmathāviṣṭamānasaḥ |
saṃbabhūva sutaśreṣṭhāḥ kāmenākulavyākulaḥ || 9 ||
[Analyze grammar]

kāciddṛṣṭā mayā nārī divyarūpā varānanā |
mayā saṃbhāṣitā putrāḥ kiṃcinnovāca me satī || 10 ||
[Analyze grammar]

viśālānāma tasyāśca sakhī cāruvicakṣaṇā |
sā māmāha śubhaṃ vākyaṃ mama saukhyapradāyakam || 11 ||
[Analyze grammar]

jarāhīno yadā syāstvaṃ tadā te supriyā bhavet |
evamaṃgīkṛtaṃ vākyaṃ tayoktaṃ gṛhamāgataḥ || 12 ||
[Analyze grammar]

mayā jarāpanodārthaṃ tadevaṃ samudāhṛtam |
evaṃ jñātvā prakartavyaṃ matsukhaṃ hi suputrakāḥ || 13 ||
[Analyze grammar]

tururuvāca |
śarīraṃ prāpyate putraiḥ piturmātuḥ prasādataḥ |
dharmaśca kriyate rājañśarīreṇa vipaścitā || 14 ||
[Analyze grammar]

pitroḥ śuśrūṣaṇaṃ kāryaṃ putraiścāpi viśeṣataḥ |
na ca yauvanadānasya kālo'yaṃ me narādhipa || 15 ||
[Analyze grammar]

prathame vayasi bhoktavyaṃ viṣayaṃ mānavairnṛpa |
idānīṃ tanna kāloyaṃ vartate tava sāṃpratam || 16 ||
[Analyze grammar]

jarāṃ tāta pradatvā vai putre tāta mahadgatām |
paścātsukhaṃ prabhoktavyaṃ na tu syāttava jīvitam || 17 ||
[Analyze grammar]

tasmādvākyaṃ mahārāja kariṣye naiva te punaḥ |
evamābhāṣata nṛpaṃ tururjyeṣṭhasutastadā || 18 ||
[Analyze grammar]

turorvākyaṃ tu tacchrutvā kruddho rājā babhūva saḥ |
turuṃ śaśāpa dharmātmā krodhenāruṇalocanaḥ || 19 ||
[Analyze grammar]

apadhvastastvayā'deśo mamāyaṃ pāpacetana |
tasmātpāpī bhava svatvaṃ sarvadharmabahiṣkṛtaḥ || 20 ||
[Analyze grammar]

śikhayā tvaṃ vihīnaśca vedaśāstravivarjitaḥ |
sarvācāravihīnastvaṃ bhaviṣyasi na saṃśayaḥ || 21 ||
[Analyze grammar]

brahmaghnastvaṃ devaduṣṭaḥ surāpaḥ satyavarjitaḥ |
caṃḍakarmaprakartā tvaṃ bhaviṣyasi narādhamaḥ || 22 ||
[Analyze grammar]

surālīnaḥ kṣudhī pāpī goghnaśca tvaṃ bhaviṣyasi |
duścarmā muktakacchaśca brahmadveṣṭā nirākṛtiḥ || 23 ||
[Analyze grammar]

paradārābhigāmī tvaṃ mahācaṃḍaḥ pralaṃpaṭaḥ |
sarvabhakṣaśca durmedhāḥ sadātvaṃ ca bhaviṣyasi || 24 ||
[Analyze grammar]

sagotrāṃ ramase nārīṃ sarvadharmapraṇāśakaḥ |
puṇyajñānavihīnātmā kuṣṭhavāṃśca bhaviṣyasi || 25 ||
[Analyze grammar]

tava putrāśca pautrāśca bhaviṣyaṃti na saṃśayaḥ |
īdṛśāḥ sarvapuṇyaghnā mlecchāḥ sukaluṣīkṛtāḥ || 26 ||
[Analyze grammar]

evaṃ turuṃ suśaptvaiva yaduṃ putramathābravīt |
jarāṃ vai dhārayasveha bhuṃkṣva rājyamakaṃṭakam || 27 ||
[Analyze grammar]

baddhāñjalipuṭo bhūtvā yadū rājānamabravīt |
yaduruvāca |
jarābhāraṃ na śaknomi voḍhuṃ tāta kṛpāṃ kuru || 28 ||
[Analyze grammar]

śītamadhvā kadannaṃ ca vayotītāśca yoṣitaḥ |
manasaḥ prātikūlyaṃ ca jarāyāḥ paṃcahetavaḥ || 29 ||
[Analyze grammar]

jarāduḥkhaṃ na śaknomi nave vayasi bhūpate |
kaḥ samartho hi vai dhartuṃ kṣamasva tvaṃ mamādhunā || 30 ||
[Analyze grammar]

yaduṃ kruddho mahārājaḥ śaśāpa dvijanaṃdana |
rājyārho na ca te vaṃśaḥ kadācidvai bhaviṣyati || 31 ||
[Analyze grammar]

balatejaḥ kṣamāhīnaḥ kṣātradharmavivarjitaḥ |
bhaviṣyati na saṃdeho macchāsanaparāṅmukhaḥ || 32 ||
[Analyze grammar]

yaduruvāca |
nirdoṣohaṃ mahārāja kasmācchaptastvayādhunā |
kṛpāṃ kuruṣva dīnasya prasādasumukho bhava || 33 ||
[Analyze grammar]

rājovāca |
mahādevaḥ kule te vai svāṃśenāpi hi putraka |
kariṣyati visṛṣṭiṃ ca tadā pūtaṃ kulaṃ tava || 34 ||
[Analyze grammar]

yaduruvāca |
ahaṃ putro mahārāja nirdoṣaḥ śāpitastvayā |
anugraho dīyatāṃ me yadi me varttate dayā || 35 ||
[Analyze grammar]

rājovāca |
yo bhavejjyeṣṭhaputrastu piturduḥkhāpahārakaḥ |
rājyadāyaṃ subhuṃkte ca bhāravoḍhā bhavetsa hi || 36 ||
[Analyze grammar]

tvayā dharmaṃ na pravṛttamabhāṣyosi na saṃśayaḥ |
bhavatā nāśitājñā me mahādaṃḍena ghātinaḥ || 37 ||
[Analyze grammar]

tasmādanugraho nāsti yatheṣṭaṃ ca tathā kuru |
yaduruvāca |
yasmānme nāśitaṃ rājyaṃ kulaṃ rūpaṃ tvayā nṛpa || 38 ||
[Analyze grammar]

tasmādduṣṭo bhaviṣyāmi tava vaṃśapatirnṛpa |
tava vaṃśe bhaviṣyaṃti nānābhedāstu kṣattriyāḥ || 39 ||
[Analyze grammar]

teṣāṃ grāmānsudeśāṃśca striyo ratnāni yāni vai |
bhokṣyaṃti ca na saṃdeho aticaṃḍā mahābalāḥ || 40 ||
[Analyze grammar]

mama vaṃśātsamutpannāsturuṣkā mleccharūpiṇaḥ |
tvayā ye nāśitāḥ sarve śaptāḥ śāpaiḥ sudāruṇaiḥ || 41 ||
[Analyze grammar]

evaṃ babhāṣe rājānaṃ yaduḥ kruddho nṛpottama |
atha kruddho mahārājaḥ punaścaivaṃ śaśāpa ha || 42 ||
[Analyze grammar]

matprajānāśakāḥ sarve vaṃśajāste śṛṇuṣva hi |
yāvaccaṃdraśca sūryaśca pṛthvī nakṣatratārakāḥ || 43 ||
[Analyze grammar]

tāvanmlecchāḥ prapakṣyaṃte kuṃbhīpāke carau rave |
kuruṃ dṛṣṭvā tato bālaṃ krīḍamānaṃ sulakṣaṇam || 44 ||
[Analyze grammar]

samāhvayati taṃ rājā na sutaṃ nṛpanaṃdanam |
śiśuṃ jñātvā parityaktaḥ sakurustena vai tadā || 45 ||
[Analyze grammar]

śarmiṣṭhāyāḥ sutaṃ puṇyaṃ taṃ pūruṃ jagadīśvaraḥ |
samāhūya babhāṣe ca jarā me gṛhyatāṃ punaḥ || 46 ||
[Analyze grammar]

bhuṃkṣva rājyaṃ mayā dattaṃ supuṇyaṃ hatakaṃṭakam |
pūruruvāca |
rājyaṃ deve na bhoktavyaṃ pitrā bhuktaṃ yathā tava || 47 ||
[Analyze grammar]

tvadādeśaṃ kariṣyāmi jarā me dīyatāṃ nṛpa |
tāruṇyena mamādyaiva bhūtvā suṃdararūpadṛk || 48 ||
[Analyze grammar]

bhuṃkṣva bhogānsukarmāṇi viṣayāsaktacetasā |
yāvadicchā mahābhāga viharasva tayā saha || 49 ||
[Analyze grammar]

yāvajjīvāmyahaṃ tāta jarāṃ tāvaddharāmyaham |
evamuktastu tenāpi pūruṇā jagatīpatiḥ || 50 ||
[Analyze grammar]

harṣeṇa mahatāviṣṭastaṃ putraṃ pratyuvāca saḥ |
yasmādvatsa mamājñā vai na hatā kṛtavāniha || 51 ||
[Analyze grammar]

tasmādahaṃ vidhāsyāmi bahusaukhyapradāyakam |
yasmājjarāgṛhītā me dattaṃ tāruṇyakaṃ svakam || 52 ||
[Analyze grammar]

tena rājyaṃ prabhuṃkṣva tvaṃ mayā dattaṃ mahāmate |
evamuktaḥ supūruśca tena rājñā mahīpate || 53 ||
[Analyze grammar]

tāruṇyaṃdattavānasmai jagrāhāsmājjarāṃ nṛpa |
tataḥ kṛte vinimaye vayasostātaputrayoḥ || 54 ||
[Analyze grammar]

tasmādvṛddhataraḥ pūruḥ sarvāṃgeṣu vyadṛśyata |
nūtanatvaṃ gato rājā yathā ṣoḍaśavārṣikaḥ || 55 ||
[Analyze grammar]

rūpeṇa mahatāviṣṭo dvitīya iva manmathaḥ |
dhanūrājyaṃ ca chatraṃ ca vyajanaṃ cāsanaṃ gajam || 56 ||
[Analyze grammar]

kośaṃ deśaṃ balaṃ sarvaṃ cāmaraṃ syaṃdanaṃ tathā |
dadau tasya mahārājaḥ pūroścaiva mahātmanaḥ || 57 ||
[Analyze grammar]

kāmāsaktaśca dharmātmā tāṃ nārīmanuciṃtayan |
tatsaraḥ sāgaraprakhyaṃkāmākhyaṃ nahuṣātmajaḥ || 58 ||
[Analyze grammar]

aśrubiṃdumatī yatra jagāma laghuvikramaḥ |
tāṃ dṛṣṭvā tu viśālākṣīṃ cārupīnapayodharām || 59 ||
[Analyze grammar]

viśālāṃ ca mahārājaḥ kaṃdarpākṛṣṭamānasaḥ |
rājovāca |
āgato'smi mahābhāge viśāle cārulocane || 60 ||
[Analyze grammar]

jarātyāgaḥkṛto bhadre tāruṇyena samanvitaḥ |
yuvā bhūtvā samāyāto bhavatveṣā mamādhunā || 61 ||
[Analyze grammar]

yaṃyaṃ hi vāṃchate caiṣā taṃtaṃ dadmi na saṃśayaḥ |
viśālovāca |
yadā bhavānsamāyāto jarāṃ duṣṭāṃ vihāya ca || 62 ||
[Analyze grammar]

doṣeṇaikenaliptosi bhavaṃtaṃ naiva manyate |
rājovāca |
mama doṣaṃ vadasva tvaṃ yadi jānāsi niścitam || 63 ||
[Analyze grammar]

taṃ tu doṣaṃ parityakṣyeguṇarūpaṃnasaṃśayaḥ || 64 ||
[Analyze grammar]

iti śrīpadmapurāṇebhūmikhaṃḍevenopākhyānemātāpitṛtīrthavarṇane yayāticarite'ṣṭasaptatitamo'dhyāyaḥ || 78 ||
[Analyze grammar]