Chapter 69

[English text for this chapter is available]

mātaliruvāca |
atha dharmāḥ śivenoktāḥ śivadharmāgamottamāḥ |
jñeyā bahuvidhāste ca karmayogaprabhedataḥ || 1 ||
[Analyze grammar]

hiṃsādidoṣanirmuktāḥ kleśāyāsavivarjitāḥ |
sarvabhūtahitāḥ śuddhāḥ sūkṣmāyāsā mahatphalāḥ || 2 ||
[Analyze grammar]

anaṃtaśākhākalitāḥ śivamūlaikasaṃśritāḥ |
jñānadhyānasupuṣpāḍhyāḥ śivadharmāḥ sanātanāḥ || 3 ||
[Analyze grammar]

dhārayaṃti śivaṃ yasmāddhāryate śivabhāṣitaiḥ |
śivadharmāḥ smṛtāstasmātsaṃsārārṇavatārakāḥ || 4 ||
[Analyze grammar]

tathā'hi sā kṣamā satyaṃ hrīḥ śraddhendriyasaṃyamaḥ |
dānamijyātapodānaṃ daśakaṃ dharmasādhanam || 5 ||
[Analyze grammar]

atha vyastaiḥ samastairvā śivadharmairanuṣṭhitaiḥ |
śivaikarasya saṃprāptairgatirekaiva kalpitā || 6 ||
[Analyze grammar]

yathā bhūḥ sarvabhūtānāṃ sthānaṃ sādhāraṇaṃ smṛtam |
tattathā śivabhaktānāṃ tulyaṃ śivapuraṃsmṛtam || 7 ||
[Analyze grammar]

yatheha sarvabhūtānāṃ bhogāḥ sātiśayāḥ smṛtāḥ |
nānāpuṇyaviśeṣeṇa bhogāḥ śivapure tathā || 8 ||
[Analyze grammar]

śubhāśubhaphalaṃ cāpi bhujyate sarvadehibhiḥ |
śivadharmasya caikasya phalaṃ tatropabhujyate || 9 ||
[Analyze grammar]

yasya yādṛgbhavetpuṇyaṃ śraddhāpātraviśeṣataḥ |
bhogāḥ śivapure tasya jñeyāḥ sātiśayāḥ śubhāḥ || 10 ||
[Analyze grammar]

sthānaprāptiḥ paraṃ tulyā bhogāḥ śāṃtimayāḥ sthitāḥ |
kuryātpuṇyaṃ mahattasmānmahābhogajigīṣayā || 11 ||
[Analyze grammar]

sarvātiśayamevaikaṃ bhāvitaṃ ca surottamaiḥ |
ātmabhogādhipatyaṃ syācchivaḥ sarvajagatpatiḥ || 12 ||
[Analyze grammar]

kecittatraiva mucyaṃte jñānayogaratā narāḥ |
āvartaṃte punaścānye saṃsāre bhogatatparāḥ || 13 ||
[Analyze grammar]

tasmādvimuktimicchaṃstu bhogāsaktiṃ ca varjayet |
viraktaḥ śāṃtacittātmā śivajñānamavāpnuyāt || 14 ||
[Analyze grammar]

ye cāpīśānyahṛdayā yajaṃtīśaṃ prasaṃgataḥ |
teṣāmapi dadātīśaḥ sthānaṃ bhāvānurūpataḥ || 15 ||
[Analyze grammar]

tatrārcayaṃti ye rudraṃ sakṛducchinnakalmaṣāḥ |
teṣāṃ piśācalokeṣu bhogānīśaḥ prayacchati || 16 ||
[Analyze grammar]

saṃtaptā duḥkhabhāreṇa mriyaṃte sarvadehinaḥ |
annadaḥ puṇyadaḥ proktaḥ prāṇadaścāpi sarvadaḥ || 17 ||
[Analyze grammar]

tasmādannapradānena sarvadānaphalaṃ labhet |
trailokye yāni ratnāni bhogastrīvāhanāni ca || 18 ||
[Analyze grammar]

annadānapradaḥ sarvamihāmutra phalaṃ labhet |
yasyānnapānapuṣṭāṃgaḥ kurute puṇyasaṃcayam || 19 ||
[Analyze grammar]

annapradātustasyārdhaṃ kartuścārdhaṃ na saṃśayaḥ |
dharmārthakāmamokṣāṇāṃ dehaḥ paramasādhanam || 20 ||
[Analyze grammar]

sthitistasyānnapānābhyāmatastatsarvasādhanam |
annaṃ prajāpatiḥ sākṣādannaṃ viṣṇuḥ śivaḥ svayam || 21 ||
[Analyze grammar]

tasmādannasamaṃ dānaṃ na bhūtaṃ na bhaviṣyati |
trayāṇāmapi lokānāmudakaṃ jīvanaṃ smṛtam || 22 ||
[Analyze grammar]

pavitramudakaṃ divyaṃ śuddhaṃ sarvarasāyanam |
annapānāśva go vastra śayyā sūtrāsanāni ca || 23 ||
[Analyze grammar]

pretaloke praśastāni dānānyaṣṭau viśeṣataḥ |
evaṃ dānaviśeṣeṇa dharmarājapuraṃ naraḥ || 24 ||
[Analyze grammar]

yasmādyāti sukhenaiva tasmāddharmaṃ samācaret |
ye punaḥ krūrakarmāṇaḥ pāpādānavivarjitāḥ || 25 ||
[Analyze grammar]

bhuṃjate dāruṇaṃ duḥkhaṃ narake nṛpanaṃdana |
tathā sukhaṃ prabhuṃjaṃti dānakartāra eva tu || 26 ||
[Analyze grammar]

teṣāṃ tu saṃbhavetsaukhyaṃ karmayogaratātmanām |
aprameyaguṇairdivyairvimānaiḥ sarvakāmakaiḥ || 27 ||
[Analyze grammar]

asaṃkhyaistatpuraṃ vyāptaṃ prāṇināmupakārakaiḥ |
sahasrasomadivyaṃ vā sūryatejaḥ samaprabham || 28 ||
[Analyze grammar]

rudralokamiti proktamaśeṣaguṇasaṃyutam |
sarveṣāṃ śivabhaktānāṃ tatpuraṃ parikīrtitam || 29 ||
[Analyze grammar]

rudrakṣetre mṛtānāṃ ca jaṃgamasthāvarātmanām |
apyekadivasaṃ bhaktyā yaḥ pūjayati śaṃkaram || 30 ||
[Analyze grammar]

sopi yāti śivasthānaṃ kiṃ punarbahuśorcayan |
vaiṣṇavā viṣṇubhaktāśca viṣṇudhyānaparāyaṇāḥ || 31 ||
[Analyze grammar]

tepi gacchaṃti vaikuṃṭhe samīpaṃ devacakriṇaḥ |
brahmavādī ca dharmātmā brahmalokaṃ prayāti saḥ || 32 ||
[Analyze grammar]

puṇyakartā supuṇyena puṇyalokaṃ prayāti ca |
tasmādīśe sadā bhaktiṃ bhāvayedātmanātmani || 33 ||
[Analyze grammar]

harau vāpi mahārāja yuktātmā jñānavānsvayam |
tasmātsarvavicāreṇa bhāvadoṣavicārataḥ || 34 ||
[Analyze grammar]

evaṃ viṣṇuprabhāveṇa viśiṣṭenāpi karmaṇā |
naraḥ sthānamavāpyetadeśabhāvānurūpataḥ || 35 ||
[Analyze grammar]

ityetadaparaṃ proktaṃ śrīmacchivapuraṃ mahat |
dehināṃ karmaniṣṭhānāṃ punarāvarttakaṃ smṛtam || 36 ||
[Analyze grammar]

ūrdhvaṃ śivapurājjñeyaṃ vaiṣṇavaṃ lokamuttamam |
vaiṣṇavā mānavā yāṃti viṣṇudhyānaparāyaṇāḥ || 37 ||
[Analyze grammar]

brāhmaṇā brahmalokaṃ tu sadācārā narottamāḥ |
prayāṃti yajvinaḥ sarve purīṃ tāṃ tattvakovidāḥ || 38 ||
[Analyze grammar]

aiṃdraṃ lokaṃ tathā yāṃti kṣatriyā yuddhaśālinaḥ |
anye ca puṇyakarttāraḥ puṇyalokānprayāṃti te || 39 ||
[Analyze grammar]

iti śrīpadmapurāṇe bhūmikhaṃḍe venopākhyāne pitṛtīrthe yayāti |
carite ekonasaptatitamo'dhyāyaḥ || 69 ||
[Analyze grammar]