Chapter 50

[English text for this chapter is available]

sukalovāca |
tasyāstu vacanaṃ śrutvā gobhilo vākyamabravīt |
bhavatī śaptukāmāsi kasmānme kāraṇaṃ vada || 1 ||
[Analyze grammar]

kena doṣeṇa liptosmi yasmāttvaṃ śaptumudyatā |
gobhilo nāma daityosmi paulastyasya bhaṭaḥ śubhe || 2 ||
[Analyze grammar]

daityācāreṇa vartāmi jāne vidyāmanuttamām |
vedaśāstrārthavettāsmi kalāsu nipuṇaḥ punaḥ || 3 ||
[Analyze grammar]

evaṃ sarvaṃ vijānāmi daityācāraṃ śṛṇuṣva me |
parasvaṃ paradārāṃśca balādbhuṃjāmi nānyathā || 4 ||
[Analyze grammar]

vayaṃ daityāḥ samākarṇya daityācāreṇa sāṃpratam |
varttāmo jñānibhāvena satyaṃ satyaṃ vadāmyaham || 5 ||
[Analyze grammar]

brāhmaṇānāṃ hi cchidrāṇi vipaśyāmo dine dine |
teṣāṃ hi tapaso nāśaṃ vighnaiḥ kurmo na saṃśayaḥ || 6 ||
[Analyze grammar]

chidraṃ prāpya vayaṃ devi nāśayāmo na saṃśayaḥ |
brāhmaṇāñchrūyatāṃ bhadre devayajñaṃ varānane || 7 ||
[Analyze grammar]

nāśayāmo vayaṃ yajñāndharmayajñaṃ na saṃśayaḥ |
subrāhmaṇānparityajya devaṃ nārāyaṇaṃ prabhum || 8 ||
[Analyze grammar]

pativratāṃ mahābhāgāṃ sumatiṃ bhartṛtatparām |
dūreṇāpi parityajya tiṣṭhāmo nātra saṃśayaḥ || 9 ||
[Analyze grammar]

tejo devi suviprasya hareścaiva mahātmanaḥ |
nāryāḥ pativratāyāśca soḍhuṃ daityāśca na kṣamāḥ || 10 ||
[Analyze grammar]

pativratābhayenāpi viṣṇoḥ subrāhmaṇasya ca |
naśyaṃti dānavāḥ sarve dūraṃ rākṣasapuṃgavāḥ || 11 ||
[Analyze grammar]

ahaṃ dānavadharmeṇa vicarāmi mahītalam |
kasmāttvaṃ śaptukāmāsi mama doṣo vicāryatām || 12 ||
[Analyze grammar]

padmāvatyuvāca |
mama dharmaḥ sukāyaśca tvayaiva parināśitaḥ |
ahaṃ pativratā sādhvī patikāmā tapasvinī || 13 ||
[Analyze grammar]

svamārge saṃsthitā pāpa māyayā parināśitā |
tasmāttvāmapyahaṃ duṣṭa ādhakṣyāmi na saṃśayaḥ || 14 ||
[Analyze grammar]

gobhila uvāca |
dharmameva pravakṣyāmi bhavatī yadi manyate |
agnicidbrāhmaṇasyāpi śrūyatāṃ nṛpanaṃdinī || 15 ||
[Analyze grammar]

juhvandevaṃ dvikālaṃ yo na tyajedagnimaṃdiram |
sa cāgnihotrī bhavati yajatyeva dinedine || 16 ||
[Analyze grammar]

anyaccaivaṃ pravakṣyāmi bhṛtyadharmaṃ varānane |
manasā karmaṇā vācā viśuddho yo'pi nityaśaḥ || 17 ||
[Analyze grammar]

nityamādeśakārī yaḥ paścāttiṣṭhati cāgrataḥ |
sa bhṛtyaḥ kathyate devi puṇyabhāgī na saṃśayaḥ || 18 ||
[Analyze grammar]

yaḥ putro guṇavāñjñātā pitaraṃ pālayecchubhaḥ |
mātaraṃ ca viśeṣeṇa manasā kāya karmabhiḥ || 19 ||
[Analyze grammar]

tasya bhāgīrathī snānamahanyahani jāyate |
anyathā kurute yo hi sa pāpīyānna saṃśayaḥ || 20 ||
[Analyze grammar]

anyaccaivaṃ pravakṣyāmi pativratamanuttamam |
vācā sumanasā caiva karmaṇā śṛṇu bhāmini || 21 ||
[Analyze grammar]

śuśrūṣāṃ kurute yā hi bhartuścaiva dina dine |
tuṣṭe bharttari yā prītā na tyajetkrodhanaṃ punaḥ || 22 ||
[Analyze grammar]

tasya doṣaṃ na gṛhṇāti tāḍitā tuṣyate punaḥ |
bharttuḥ karmasu sarveṣu puratastiṣṭhate sadā || 23 ||
[Analyze grammar]

sā cāpi kathyate nārī pativrataparāyaṇā |
patitopi pitāputrairbahudoṣasamanvitaḥ || 24 ||
[Analyze grammar]

kasmādapi ca na tyājyaḥ kuṣṭhitaḥ krudhito'pi vā |
evaṃ putrāḥ śuśrūṣaṃti pitaraṃ mātaraṃ kila || 25 ||
[Analyze grammar]

te yāṃti paramaṃ lokaṃ tadviṣṇoḥ paramaṃ padam |
evaṃ hi svāminaṃ ye vai upācaraṃti bhṛtyakāḥ || 26 ||
[Analyze grammar]

patyurlokaṃ prayāṃtyete prasādātsvāminastadā |
agniṃ naiva tyajedvipro brahmalokaṃ prayāti saḥ || 27 ||
[Analyze grammar]

agnityāgakaro vipro vṛṣalīpatirucyate |
svāmidrohī bhavedbhṛtyaḥ svāmityāgānna saṃśayaḥ || 28 ||
[Analyze grammar]

agniṃ ca pitaraṃ caiva na tyajetsvāminaṃ śubhe |
sadā vipraḥ suto bhṛtyaḥ satyaṃ satyaṃ vadāmyaham || 29 ||
[Analyze grammar]

parityajya pragacchaṃti te yāṃti narakārṇavam |
patitaṃ vyādhitaṃ devi vikalaṃ kuṣṭhinaṃ tathā || 30 ||
[Analyze grammar]

sarvakarmavihīnaṃ ca gatavittādisaṃcayam |
bhartāraṃ na tyajennārī yadi śreya ihecchati || 31 ||
[Analyze grammar]

tyaktvā kāṃtaṃ vrajennārī anyatkāryamihecchati |
sā matā puṃścalī loke sarvadharmabahiṣkṛtā || 32 ||
[Analyze grammar]

gate bhartari yā grāmaṃ bhogaṃ śṛṃgārameva ca |
laulyācca kurute nārī puṃścalī vadate janaḥ || 33 ||
[Analyze grammar]

evaṃ dharmaṃ vijānāmi vedaśāstraiśca saṃmatam |
dānavā rākṣasāḥ pretā dhātrā sṛṣṭā yadāditaḥ || 34 ||
[Analyze grammar]

tatreha kāraṇaṃ sarvaṃ pravakṣyāmi na saṃśayaḥ |
brāhmaṇā dānavāścaiva piśācāścaiva rākṣasāḥ || 35 ||
[Analyze grammar]

dharmārthaṃ sakalaṃ proktamadhītaṃ taistu suṃdari |
viṃdaṃti sakalaṃ sarve ācaraṃti na dānavāḥ || 36 ||
[Analyze grammar]

vidhihīnaṃ prakurvaṃti dānavā jñānavarjitāḥ |
anyāyena vrajaṃtyete mānavā vidhivarjitāḥ || 37 ||
[Analyze grammar]

teṣāṃ śāsanahetvarthaṃ kṛtā etepi nānyathā |
vidhihīnaṃ prakurvaṃti ye hi dharmaṃ narādhamāḥ || 38 ||
[Analyze grammar]

tānvayaṃ śāsayāmo vai daṃḍena mahatā kila |
bhavatyā dāruṇaṃ karma kṛtameva sunirghṛṇam || 39 ||
[Analyze grammar]

gārhasthyaṃ ca parityajya atrāyātā kimarthataḥ |
vadasyevaṃ mukhenāpi ahaṃ hi patidevatā || 40 ||
[Analyze grammar]

karmaṇā nāsti taddṛṣṭaṃ patidaivatyameva te |
bhartāraṃ taṃ parityajya kimarthaṃ tvamihāgatā || 41 ||
[Analyze grammar]

śṛṃgāraṃ bhūṣaṇaṃ veṣaṃ kṛtvā tiṣṭhasi nirghṛṇā |
kimarthaṃ hi kṛtaṃ pāpe kasyahetorvadasva me || 42 ||
[Analyze grammar]

niḥśaṃkā varttase cāpi pramattā girikānane |
mayā tvaṃ sādhitā pāpā daṃḍena mahatā śṛṇu || 43 ||
[Analyze grammar]

adharmacāriṇī duṣṭā patiṃ tyaktvā samāgatā |
kvāste tatpatidevatvaṃ darśaya tvaṃ mamāgrataḥ || 44 ||
[Analyze grammar]

bhavatī puṃścalī nāma yayā tyaktaḥ svakaḥ patiḥ |
pṛthakchayyā yadā nārī tadā sā puṃścalī matā || 45 ||
[Analyze grammar]

yojanānāṃ śataikasya sontareṇa pravarttate |
kvāsti te patidaivatyaṃ puṃścalyācāracāriṇī || 46 ||
[Analyze grammar]

nirlajje nirghṛṇe duṣṭe kiṃ me vadasi saṃmukhī |
tapasaḥ kvāsti te bhāvaḥ kva tejobalameva ca || 47 ||
[Analyze grammar]

darśayasva mamādyaiva balavīryaparākramam |
padmāvatyuvāca |
snehenāpi samānītā śrūyatāmasurādhama || 48 ||
[Analyze grammar]

bharturgehādahaṃ pitrā kvāste tatra ca pātakam |
naiva kāmānna lobhācca na mohānna ca matsarāt || 49 ||
[Analyze grammar]

āgatāhaṃ patiṃ tyaktvā patibhāvena saṃsthitā |
bhartṛrūpacchalenāpi tvayaiva parivaṃcitā || 50 ||
[Analyze grammar]

bhavaṃtaṃ māthuraṃ jñātvā gatāhaṃ sammukhaṃ tava |
māyāvinaṃ yadā jāne tvāmevaṃ dānavādhama || 51 ||
[Analyze grammar]

ekena huṃkṛtenaiva bhasmībhūtaṃ karomyaham |
gobhila uvāca |
cakṣurhīnā na paśyaṃti mānavāḥ śṛṇu sāṃpratam || 52 ||
[Analyze grammar]

dharmanetravihīnā tvaṃ kathaṃ jānāsi māmiha |
yadā te bhāva utpannaḥ piturgehaṃ prati śṛṇu || 53 ||
[Analyze grammar]

patidhyānaṃ parityajya muktā dhyānena tvaṃ tadā |
jñānanetraṃ tadā naṣṭaṃ sphuṭaṃ ca hṛdaye tava || 54 ||
[Analyze grammar]

kathaṃ māṃ tvaṃ vijānāsi jñānacakṣurhatā bhuvi |
kasyā mātā pitā bhrātā kasyāḥ svajanabāṃdhavāḥ || 55 ||
[Analyze grammar]

sarvasthāne patirhyeko bhāryāyāstu na saṃśayaḥ |
ityuktvā hi prahasyaiva gobhilo dānavādhamaḥ || 56 ||
[Analyze grammar]

na bhayaṃ vidyate te'dya mamāpi śṛṇu puṃścali |
kiṃ bhavettava śāpena vṛthaiva parikaṃpase || 57 ||
[Analyze grammar]

mamagehaṃ samāśritya bhuṃkṣva bhogānmano'nugān |
padmāvatyuvāca |
gaccha pāpasamācāra kiṃ tvaṃ vadasi nirghṛṇaḥ || 58 ||
[Analyze grammar]

satībhāvena saṃsthāsmi pativrataparāyaṇā |
dhakṣyāmi tvāṃ mahāpāpa yadyevaṃ tu vadiṣyasi || 59 ||
[Analyze grammar]

evamuktvā tathaikāṃte niṣasāda mahītale |
duḥkhena mahatāviṣṭāṃ tāmuvāca sa gobhilaḥ || 60 ||
[Analyze grammar]

tavodare mayā nyastaṃ svavīryaṃ sukṛtaṃ śubhe |
tasmādutpatsyate putrastrailokyakṣobhakārakaḥ || 61 ||
[Analyze grammar]

evamuktvā jagāmātha gobhilo dānavastadā |
gate tasmindurācāre dānave pāpacāriṇī || 62 ||
[Analyze grammar]

duḥkhena mahatāviṣṭā nṛpakanyā ruroda ha || 63 ||
[Analyze grammar]

iti śrīpadmapurāṇe bhūmikhaṃḍe venopākhyāne sukalācaritre |
paṃcāśattamo'dhyāyaḥ || 50 ||
[Analyze grammar]