Chapter 49

[English text for this chapter is available]

brāhmaṇyuvāca |
ekadā tu mahābhāga gatā sā parvatottame |
ramaṇīyaṃ vanaṃ dṛṣṭvā kadalīkhaṃḍamaṃḍitam || 1 ||
[Analyze grammar]

śālaistālaistamālaiśca nālikeraistathotkaṭaiḥ |
pūgīphalairmātuligairnāraṃgaiścārujaṃbukaiḥ || 2 ||
[Analyze grammar]

caṃpakaiḥ pāṭalaiḥ puṇyaiḥ puṣpitaiḥ kuṭakairvaṭaiḥ |
aśokabakulopetaṃ nānāvṛkṣairalaṃkṛtam || 3 ||
[Analyze grammar]

parvataṃ puṇyavaṃtaṃ taṃ puṣpitaiśca nagottamaiḥ |
sarvatra dṛśyate ramyo nānādhātusamākulaḥ || 4 ||
[Analyze grammar]

taḍāgaṃ sarvatobhadraṃ puṇyatoyena pūritam |
kamalaiḥ puṣpitaiścānyaiḥ sugaṃdhaiḥ kanakotpalaiḥ || 5 ||
[Analyze grammar]

śvetotpalairvibhāsaṃtaṃ raktotpalasupuṣpitaiḥ |
nīlotpalaiśca kahlārairhaṃsaiśca jalakukkuṭaiḥ || 6 ||
[Analyze grammar]

pakṣibhirjalajaiścānyairnānādhātusamākulaḥ |
taḍāgaṃ sarvataḥ śubhraṃ nānāpakṣigaṇairyutam || 7 ||
[Analyze grammar]

kokilānāṃ rutaiḥ puṇyaiḥ susvaraiḥ pariśobhitaḥ |
madhurāṇāṃ tathā śabdaiḥ sarvatra madhurāyate || 8 ||
[Analyze grammar]

ṣaṭpadānāṃ sunādena sarvatra pariśobhate |
evaṃvidhaṃ giriṃ ramyaṃ tadeva vanamuttamam || 9 ||
[Analyze grammar]

taḍāgaṃ sarvatobhadraṃ dadṛśe nṛpanaṃdinī |
vaidarbhī krīḍamānā sā sakhībhiḥ sahitā tadā || 10 ||
[Analyze grammar]

samālokya vanaṃ puṇyaṃ sarvatra kusumākulam |
cāpalyena prabhāveṇa strībhāvena ca līlayā || 11 ||
[Analyze grammar]

padmāvatī sarastīre sakhībhiḥ sahitā tadā |
jalakrīḍā samālīnā hasate gāyate punaḥ || 12 ||
[Analyze grammar]

ramamāṇā ca sā tasmiṃstasminsarasi bhāminī |
evaṃ vipra tadā sā tu sukhena parivartayet || 13 ||
[Analyze grammar]

viṣṇuruvāca |
gobhilo nāma vai daityo bhṛtyo vaiśravaṇasya ca |
divyenāpi vimānena sarvabhogapariplutaḥ || 14 ||
[Analyze grammar]

yāti cākāśamārgeṇa gobhilo daityasattamaḥ |
tena dṛṣṭā viśālākṣī vaidarbhī nirbhayā tadā || 15 ||
[Analyze grammar]

sarvayoṣidvarā sā hi ugrasenasya vai priyā |
rūpeṇāpratimā loke sarvāṃgeṣu virājate || 16 ||
[Analyze grammar]

ratirvai manmathasyāpi kiṃ vāpīyaṃ haripriyā |
kiṃ vāpi pārvatī devī śacī kiṃ vā bhaviṣyati || 17 ||
[Analyze grammar]

yādṛśī dṛśyate ceyaṃ nārīṇāṃ pravarottamā |
anyāpi īdṛśī nāsti dvitīyā kṣitimaṃḍale || 18 ||
[Analyze grammar]

nakṣatreṣu yathā caṃdraḥ saṃpūrṇo bhāti śobhanaḥ |
guṇarūpakalābhistu tathā bhāti varānanā || 19 ||
[Analyze grammar]

puṣkareṣu yathā haṃsastatheyaṃ cāruhāsinī |
aho rūpamahobhāva asyāstu paridṛśyate || 20 ||
[Analyze grammar]

kā kasya śobhanā bālā cāruvṛttapayodharā |
vyamṛśadgobhilo daityaḥ padmāvatīṃ varānanām || 21 ||
[Analyze grammar]

ciṃtayitvā kṣaṇaṃ vipra kā kasyāpi bhaviṣyati |
jñānena mahatā jñātvā vaidarbhīti na saṃśayaḥ || 22 ||
[Analyze grammar]

dayitā ugrasenasya pativrataparāyaṇā |
ātmabalena tiṣṭhaṃtī duṣprāpyā puruṣairapi || 23 ||
[Analyze grammar]

ugraseno mahāmūrkhaḥ preṣitā yena vai varā |
piturgehamiyaṃ bālā sa tu bhāgyena varjitaḥ || 24 ||
[Analyze grammar]

anayā vinā sa jīvecca kathaṃ kūṭamatiḥ sadā |
kiṃ vā napuṃsako rājā enāṃ yo hi parityajet || 25 ||
[Analyze grammar]

tāṃ dṛṣṭvā sa tu kāmātmā saṃjātastatkṣaṇādapi |
iyaṃ pativratā bālā duṣprāpyā puruṣairapi || 26 ||
[Analyze grammar]

kathaṃ bhokṣyāmyahaṃ gatvā kāmo māmati pīḍayet |
abhuktvaināṃ yadā yāsye tatsyānmṛtyurmamaiva hi || 27 ||
[Analyze grammar]

adyaiva hi na saṃdeho yataḥ kāmo mahābalaḥ |
iti ciṃtāparo bhūtvā gobhilo manasaikṣata || 28 ||
[Analyze grammar]

kṛtvā māyāmayaṃ rūpamugrasenasya bhūpateḥ |
yādṛśastūgrasenaśca sāṃgopāṃgo mahānṛpaḥ || 29 ||
[Analyze grammar]

gobhilastādṛśo bhūtvā gatyā ca svarabhāṣayā |
yathāvastro yathāveśo vayasā ca tathā punaḥ || 30 ||
[Analyze grammar]

divyamālyāṃbaradharo divyagaṃdhānulepanaḥ |
sarvābharaṇaśobhāṃgo yādṛśo māthureśvaraḥ || 31 ||
[Analyze grammar]

bhūtvātha tādṛśo daitya ugrasenamayastadā |
māyayā parayā yukto rūpalāvaṇyasaṃpadā || 32 ||
[Analyze grammar]

parvatāgre aśokasyacchāyāmāśritya saṃsthitaḥ |
śilātalastho duṣṭātmā vīṇādaṃḍena vīrakaḥ || 33 ||
[Analyze grammar]

susvaraṃ gāyamānastu gītaṃ viśvapramohanam |
tālamānakriyopetaṃ saptasvaravibhūṣitam || 34 ||
[Analyze grammar]

gītaṃ gāyati duṣṭātmā tasyā rūpeṇa mohitaḥ |
parvatāgre sthito vipra harṣeṇa mahatānvitaḥ || 35 ||
[Analyze grammar]

sakhīmadhyagatā sā tu padmāvatī varānanā |
śuśruve susvaraṃ gītaṃ tālamānalayānvitam || 36 ||
[Analyze grammar]

ko'yaṃ gāyati dharmātmā mahatsaukhyapradāyakam |
gītaṃ hi satkriyopetaṃ sarvabhāvasamanvitam || 37 ||
[Analyze grammar]

sakhībhiḥ sahitā gatvā autsukyena nṛpātmajā |
aśokacchāyāmāśritya vimale suśilātale || 38 ||
[Analyze grammar]

dadarśa bhūpaveṣeṇa gobhilaṃ dānavādhamam |
puṣpamālāṃbaradharaṃ divyagaṃdhānulepanam || 39 ||
[Analyze grammar]

sarvābharaṇaśobhāṃgaṃ padmāvatī pativratā |
mathureśaḥ samāyātaḥ kadā dharmaparāyaṇaḥ || 40 ||
[Analyze grammar]

mama nātho mahātmā vai rājyaṃ tyaktvā pradūrataḥ |
yāvaddhi ciṃtayetsā ca tāvatpāpena tena sā || 41 ||
[Analyze grammar]

samāhūtā turībhūya ehi tvaṃ hi priye mama |
cakitāśaṃkitāsācakathaṃbharttāsamāgataḥ || 42 ||
[Analyze grammar]

lajjitā duḥkhitā jātā adhaḥkṛtvā tato mukham |
ahaṃ pāpā durācārā niḥśaṃkā parivartitā || 43 ||
[Analyze grammar]

kopamevaṃ mahābhāgaḥ kariṣyati na saṃśayaḥ |
yāvaddhi ciṃtayetsā ca tāvattenāpi pāpinā || 44 ||
[Analyze grammar]

samāhūtā turībhūya ehyehi tvaṃ mama priye |
tvayā vinā kṛto devi prāṇāndhartuṃ varānane || 45 ||
[Analyze grammar]

na hi śaknomyahaṃ kāṃte jīvitaṃ priyameva ca |
tava snehena lubdhosmi tvāṃ tyaktvā notsahe bhṛśam || 46 ||
[Analyze grammar]

brāhmaṇyuvāca |
evamuktā gatāpaśyatsumukhaṃ lajjayānvitā |
samāliṃgya tato daityaḥ satīṃ padmāvatīṃ tadā || 47 ||
[Analyze grammar]

ekāṃtaṃ tu samānītā subhuktā icchayā tataḥ |
daityena gobhilenāpi satyaketoḥ sutā tadā || 48 ||
[Analyze grammar]

sukalovāca |
muṣkasthānesya saṃketaṃ nāviṃdata varānanā |
svavastraṃ sā parigṛhya śaṃkitā duḥkhitā hyabhūt || 49 ||
[Analyze grammar]

sā sakrodhā vacaḥ prāha gobhilaṃ dānavādhamam |
kastvaṃ pāpasamācāro nirghṛṇo dānavākṛtiḥ || 50 ||
[Analyze grammar]

śaptukāmā samudyuktā duḥkhenākulitekṣaṇā |
vepamānā tadā rājanduḥkhabhāreṇa pīḍitā || 51 ||
[Analyze grammar]

mama kāṃtacchalenaiva tvayāgatya durātmavan |
nāśitaṃ dharmamevāgryaṃ pātivratyamanuttamam || 52 ||
[Analyze grammar]

susvaraṃ ruditaṃ kṛtvā mama janma tvayā hṛtam |
paśya me balamatraiva śāpaṃ dāsye sudāruṇam || 53 ||
[Analyze grammar]

evaṃ saṃbhāṣamāṇā taṃ śaptukāmā tu gobhilam || 54 ||
[Analyze grammar]

iti śrīpadmapurāṇe bhūmikhaṃḍe venopākhyāne sukalācaritre |
ekonapaṃcāśattamo'dhyāyaḥ || 49 ||
[Analyze grammar]