Chapter 48

[English text for this chapter is available]

brāhmaṇyuvāca |
māthure viṣaye ramye mathurāyāṃ nṛpottamaḥ |
ugraseneti vikhyāto yādavaḥ paravīrahā || 1 ||
[Analyze grammar]

sarvadharmārthatattvajño vedajñaḥ śrutavānbalī |
dātā bhoktā guṇagrāhī sadguṇānvetti bhūpatiḥ || 2 ||
[Analyze grammar]

rājyaṃ cakāra medhāvī prajā dharmeṇa pālayet |
evaṃ sa ca mahātejā ugrasenaḥ pratāpavān || 3 ||
[Analyze grammar]

vaidarbhe viṣaye puṇye satyaketuḥ pratāpavān |
tasya kanyā mahābhāgā padmākṣī kamalānanā || 4 ||
[Analyze grammar]

nāmnā padmāvatī nāma satyadharmaparāyaṇā |
sā tu strīṇāṃ guṇairyuktā dvitīyeva samudrajā || 5 ||
[Analyze grammar]

vaidarbhī śuśubhe rājansvaguṇaiḥ satyakāraṇaiḥ |
māthura ugrasenastu upayeme sulocanām || 6 ||
[Analyze grammar]

tayā saha mahābhāga sukhaṃ reme pratāpavān |
atiprīto guṇaistasyāstayā saha sukhībhavet || 7 ||
[Analyze grammar]

tasyāḥ snehena prītyā ca saṃmugdho māthureśvaraḥ |
padmāvatī mahābhāgā tasya prāṇapriyābhavat || 8 ||
[Analyze grammar]

tayā vinā na bubhuje tayā saha prakrīḍayet |
tayā vinā na seveta paramaṃ sukhameva saḥ || 9 ||
[Analyze grammar]

evaṃ prītikarau jātau parasparamanuttamau |
snehavaṃtau dvijaśreṣṭha sukhasaṃprītidāyakau || 10 ||
[Analyze grammar]

satyaketuśca rājeṃdraḥ sasmāra sa padmāvatīm |
svasutāṃ tāṃ mahābhāgo mātā tasyāḥ suduḥkhitā || 11 ||
[Analyze grammar]

sa dūtānpreṣayāmāsa vaidarbho mathurāṃ prati |
ugrasenaṃ nṛvīreṃdraṃ sādareṇa dvijottama || 12 ||
[Analyze grammar]

ugrasenaṃ mahārājaṃ sa dūto vākyamabravīt |
vidarbhādhipatirvīro bhaktyā snehena naṃdayan || 13 ||
[Analyze grammar]

ātmanaḥ kuśalaṃ brūte bhavatāṃ paripṛcchati |
satyaketurmahārāja tvāmevaṃ paripṛṣṭavān || 14 ||
[Analyze grammar]

darśanāya preṣayasva sutāṃ padmāvatīṃ mama |
yadi tvaṃ manyase nātha prītisnehaṃ hitasya ca || 15 ||
[Analyze grammar]

preṣayasva mahābhāgāṃ priyāṃ prītikarāṃ tava |
autkaṇṭhyena mahārāja sa sotkaṃṭhena vartate || 16 ||
[Analyze grammar]

samākarṇya tato vākyamugraseno nṛpottamaḥ |
prītyā snehena tasyāpi satyaketormahātmanaḥ || 17 ||
[Analyze grammar]

dākṣiṇyena ca vipreṃdra preṣayāmāsa bhūpatiḥ |
padmāvatīṃ priyāṃ bhāryāmugrasenaḥ pratāpavān || 18 ||
[Analyze grammar]

preṣitānena rājeṃdra gatā padmāvatī svakam |
pūrvaṃ gṛhaṃ satī sā tu mahāharṣeṇa saṃkulā || 19 ||
[Analyze grammar]

pitṛpūrvaṃ kuṭuṃbaṃ tu dadṛśe cārumaṃgalā |
pituḥ pādau nanāmātha śirasā satyatatparā || 20 ||
[Analyze grammar]

āgatāyāṃ mahārājā padmāvatyāṃ dvijottama |
harṣeṇa mahatāviṣṭo vidarbhādhipatirnṛpaḥ || 21 ||
[Analyze grammar]

varddhitā dānamānaiśca vastrālaṃkārabhūṣaṇaiḥ |
padmāvatī sukhenāpi piturgehe pravartate || 22 ||
[Analyze grammar]

sakhībhiḥ sahitā sā tu niḥśaṃkā parivartate |
ramate sā tadā tatra yathāpūrvaṃ tathaiva ca || 23 ||
[Analyze grammar]

gṛhe vane taḍāgeṣu prāsāde ca tathaiva sā |
punarbāleva bhūtā sā nirlajjā saṃpravartate || 24 ||
[Analyze grammar]

niḥśaṃkā vartate vipra sakhībhiḥ saha sarvadā |
pativratā mahābhāgā harṣeṇa mahatānvitā || 25 ||
[Analyze grammar]

sukhaṃ tu pitṛgehasya durlabhaṃ śvaśure gṛhe |
evaṃ jñātvā tadā reme kadā īdṛgbhaviṣyati || 26 ||
[Analyze grammar]

anena mohabhāvena krīḍālubdhā varānanā |
sakhībhiḥ sahitā nityaṃ vaneṣūpavane tadā || 27 ||
[Analyze grammar]

iti śrīpadmapurāṇe bhūmikhaṃḍe venopākhyāne sukalācaritre'ṣṭacatvāriṃśo'dhyāyaḥ || 48 ||
[Analyze grammar]