Chapter 40

[English text for this chapter is available]

vena uvāca |
nityadānaphalaṃ deva tvattaḥ pūrvaṃ mayā śrutam |
naimittikasya dānasya dattasyāpi hi yatphalam || 1 ||
[Analyze grammar]

tatphalaṃ me samācakṣva tvatprasādātprayatnataḥ |
mahātṛptiṃ na gacchāmi śrotuṃ śraddhā pravartate || 2 ||
[Analyze grammar]

viṣṇuruvāca |
naimittikaṃ pravakṣyāmi dānameva nṛpottama |
mahāparvaṇi saṃprāpte yena dānāni śraddhayā || 3 ||
[Analyze grammar]

satpātrebhyaḥ pradattāni tasya puṇyaphalaṃ śṛṇu |
gajaṃ rathaṃ pradatte yo hyaśvaṃ cāpi nṛpottama || 4 ||
[Analyze grammar]

sa ca bhṛtyaistu saṃyuktaḥ puṇyadeśe nṛpottamaḥ |
jāyate hi mahārāja matprasādānna saṃśayaḥ || 5 ||
[Analyze grammar]

rājā bhavati dharmātmā jñānavānbalavānsudhīḥ |
ajeyaḥ sarvabhūtānāṃ mahātejāḥ prajāyate || 6 ||
[Analyze grammar]

mahāparvaṇi saṃprāpte bhūmidānaṃ dadāti yaḥ |
godānaṃ vā mahārāja sarvabhogapatirbhavet || 7 ||
[Analyze grammar]

brāhmaṇāya supuṇyāya dānaṃ dadyātprayatnataḥ |
mahādānāni yo dadyāttīrthe parvaṇi pātravit || 8 ||
[Analyze grammar]

teṣāṃ cihnaṃ pravakṣyāmi bhūpatitvaṃ prajāyate |
tīrthe parvaṇi saṃprāpte guptadānaṃ dadāti yaḥ || 9 ||
[Analyze grammar]

nidhīnāmāśusaṃprāptirakṣarā parijāyate |
mahāparvaṇi saṃprāpte tīrtheṣu brāhmaṇāya ca || 10 ||
[Analyze grammar]

sucailaṃ ca mahādānaṃ kāṃcanena samanvitam |
puṇyaṃ phalaṃ pravakṣyāmi tasya dānasya bhūpate || 11 ||
[Analyze grammar]

jāyaṃte bahavaḥ putrāḥ suguṇā vedapāragāḥ |
āyuṣmaṃtaḥ prajāvaṃto yaśaḥ puṇyasamanvitāḥ || 12 ||
[Analyze grammar]

vipulāścaiva jāyaṃte sphītā lakṣmīrmahāmate |
saukhyaṃ ca labhate puṇyaṃ dharmavānparijāyate || 13 ||
[Analyze grammar]

mahāparvaṇi saṃprāpte tīrthe gatvā prayatnataḥ |
kapilāṃ kāṃcanīṃ dadyādbrāhmaṇāya mahātmane || 14 ||
[Analyze grammar]

tasya puṇyaṃ pravakṣyāmi dānasya ca mahāmate |
kapilādo mahārāja sarvasaukhyānprabhuṃjati || 15 ||
[Analyze grammar]

yāvadbrahmā prajīvetsa tāvattiṣṭhati tatra saḥ |
mahāparvaṇi saṃprāpte alaṃkṛtya ca gāṃ tadā || 16 ||
[Analyze grammar]

kāṃcanenāpi saṃyuktāṃ vastrālaṃkārabhūṣaṇaiḥ |
tasya dānasya rājeṃdra phalabhogaṃ vadāmyaham || 17 ||
[Analyze grammar]

vipulā jāyate lakṣmīrdānabhogasamākulā |
sarvavidyāpatirbhūtvā viṣṇubhakto bhavetkila || 18 ||
[Analyze grammar]

viṣṇuloke vasenmartyo yāvattiṣṭhati medinī |
tīrthaṃ gatvā tu yo dadyādbrāhmaṇāya vibhūṣaṇam || 19 ||
[Analyze grammar]

bhuktvā tu vipulānbhogānindreṇa krīḍate saha |
mahāparvaṇi saṃprāpte vastraṃ ca dvijapuṃgave || 20 ||
[Analyze grammar]

dattvānnaṃ bhūmisaṃyuktaṃ pātre śraddhāsamanvitaḥ |
modate sa tu vaikuṃṭhe viṣṇutulyaparākramaḥ || 21 ||
[Analyze grammar]

savastraṃ kāṃcanaṃ dattvā dvijāya pariśāṃtaye |
svecchayā agnisadṛśo vaikuṃṭhe sa vasetsukhī || 22 ||
[Analyze grammar]

suvarṇasya sukuṃbhaṃ ca ghṛtena paripūrayet |
pidhānaṃ raupyaṃ kartavyaṃ vastrahārairalaṃkṛtam || 23 ||
[Analyze grammar]

puṣpamālānvitaṃ kuryādbrahmasūtreṇa śobhitam |
pratiṣṭhitaṃ vedamaṃtraistaṃ saṃpūjya mahāmate || 24 ||
[Analyze grammar]

upacāraiḥ pavitraiśca ṣoḍaśaiḥ paripūjayet |
svalaṃkṛtya tato dadyādbrāhmaṇāya mahātmane || 25 ||
[Analyze grammar]

ṣoḍaśaiva tato gāvaḥ savastrāḥ kāṃsyadohanāḥ |
kuṃbhayuktāśca catvāro dakṣiṇāṃ ca sakāṃcanām || 26 ||
[Analyze grammar]

tathā dvādaśakā gāvo vastrālaṃkārabhūṣaṇāḥ |
pṛthagbhūtāya viprāya dātavyā nātra saṃśayaḥ || 27 ||
[Analyze grammar]

evamādīni dānāni anyāni nṛpanaṃdana |
tīrthakālaṃ susaṃprāpya viprāvasathameva ca || 28 ||
[Analyze grammar]

śraddhābhāvena dātavyaṃ bahupuṇyakaraṃ bhavet |
viṣṇuruvāca |
viṣṇumuddiśya yaddānaṃ kāmanāparikalpitam || 29 ||
[Analyze grammar]

tasya dānasya bhāvena bhāvanāparibhāvitaḥ |
tādṛkphalaṃ samaśnāti mānuṣo nātra saṃśayaḥ || 30 ||
[Analyze grammar]

abhyudayaṃ pravakṣyāmi yajñādiṣu pravartate |
tena dānena tasyāpi śraddhayā ca dvijottama || 31 ||
[Analyze grammar]

prajñāvṛddhiṃ samāpnoti na ca duḥkhaṃ praviṃdati |
bhogānbhunakti dharmātmā jīvamānastu sāṃpratam || 32 ||
[Analyze grammar]

aiṃdrāṃstu bhuṃkte bhogānsa dātā divyāṃ gatiṃ gataḥ |
svakulaṃ nayate svargaṃ kalpānāṃ ca sahasrakam || 33 ||
[Analyze grammar]

evamābhyudayaṃ proktaṃ prāptaṃ teṣu vadāmyaham |
kāyasya ca kṣayaṃ jñātvā jarayā paripīḍitaḥ || 34 ||
[Analyze grammar]

dānaṃ tena pradātavyamāśāṃ kasya na kārayet |
mṛte ca mayi me putrā anye svajanabāṃdhavāḥ || 35 ||
[Analyze grammar]

kathamete bhaviṣyaṃti māṃ vinā suhṛdo mama |
teṣāṃ mohātpramugdho vai na dadāti sa kiṃcana || 36 ||
[Analyze grammar]

mṛtyuṃ prayāti mohātmā rudaṃti mitrabāṃdhavāḥ |
duḥkhena pīḍitāḥ sarve māyāmohena pīḍitāḥ || 37 ||
[Analyze grammar]

saṃkalpayaṃti dānāni mokṣaṃ vai ciṃtayaṃti ca |
tasminmṛte mahārāja māyāmohe gate sati || 38 ||
[Analyze grammar]

vismaraṃti ca dānāni lobhātmāno dadaṃti na |
yo'sau mṛto mahārāja yamapaṃthaṃ suduḥkhitaḥ || 39 ||
[Analyze grammar]

tṛṣākṣudhāsamākrāṃto bahuduḥkhaiḥ prapīḍitaḥ |
tasmāddānaṃ pradātavyaṃ svayameva na saṃśayaḥ || 40 ||
[Analyze grammar]

kasya putrāśca pautrāśca kasya bhāryā nṛpottama |
saṃsāre nāsti kaḥ kasya tasmāddānaṃ pradīyate || 41 ||
[Analyze grammar]

jñānavatā pradātavyaṃ svayameva na saṃśayaḥ |
annaṃ pānaṃ ca tāṃbūlamudakaṃ kāṃcanaṃ tathā || 42 ||
[Analyze grammar]

yugmaṃ vastraṃ ca chatraṃ ca svayameva na saṃśayaḥ |
jalapātrāṇyanekāni sodakāni nṛpottama || 43 ||
[Analyze grammar]

vāhanāni vicitrāṇi yānānyeva mahāmate |
nānāgaṃdhānsakarpūraṃ yamapaṃtha sukhaprade || 44 ||
[Analyze grammar]

upānahau pradātavye yadīcchedvipulaṃ sukham |
etairdānairmahārāja yamapaṃthaṃ sukhena vai || 45 ||
[Analyze grammar]

prayāti mānavo rājanyamadūtairalaṃkṛtam || 46 ||
[Analyze grammar]

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe |
venopākhyāne catvāriṃśo'dhyāyaḥ || 40 ||
[Analyze grammar]