Chapter 37

[English text for this chapter is available]

| ṛṣaya ūcuḥ |
evaṃ venasya caivāsītsṛṣṭireva mahātmanaḥ |
dharmācāraṃ parityajya kathaṃ pāpamatirbhavet || 1 ||
[Analyze grammar]

sūta uvāca |
jñānavijñānasaṃpannā munayastattvavedinaḥ |
śubhāśubhaṃ vadaṃtyevaṃ tanna syādiha cānyathā || 2 ||
[Analyze grammar]

tapyamānena tenāpi suśaṃkhena mahātmanā |
dattaḥ śāpaḥ kathaṃ viprā na yathāvacca jāyate || 3 ||
[Analyze grammar]

venasya pātakācāraṃ sarvameva vadāmyaham |
tasmiñchāsati dharmajñe prajāpāle mahātmani || 4 ||
[Analyze grammar]

puruṣaḥ kaścidāyātaśchadma liṃgadharastadā |
nagnarūpovamahākāyaḥvaśiromuṃḍo mahāprabhaḥ || 5 ||
[Analyze grammar]

mārjanīṃ śikhipatrāṇāṃ kakṣāyāṃ sa hi dhārayan |
gṛhītaṃ pānapātraṃ tu nālikeramayaṃ kare || 6 ||
[Analyze grammar]

paṭhamāno hyasacchāstraṃ vedadharmavidūṣakam |
yatra veno mahārājastatrāyātastvarānvitaḥ || 7 ||
[Analyze grammar]

sabhāyāṃ tasya venasya praviveśa sa pāpavān |
taṃ dṛṣṭvā samanuprāptaṃ venaḥ praśnaṃ tadākarot || 8 ||
[Analyze grammar]

bhavānko hi samāyāta īdṛgrūpadharo mama |
sabhāyāṃ vartamānasya puraḥ kasmātsamāgataḥ || 9 ||
[Analyze grammar]

ko veṣaḥ kiṃ nu te nāma ko dharmaḥ karma te vada |
ko vedaste ka ācāraḥ kiṃ tapaḥ kā prabhāvanā || 10 ||
[Analyze grammar]

kiṃ jñānaṃ kaḥ prabhāvaste kiṃ satyaṃ dharmalakṣaṇam |
tattvaṃ sarvaṃ samācakṣva mamāgre satyameva ca || 11 ||
[Analyze grammar]

śrutvā venasya tadvākyaṃ pāpo vākyamudāharat |
pātaka uvāca |
karoṣyevaṃ vṛthā rājyaṃ mahāmūḍho na saṃśayaḥ || 12 ||
[Analyze grammar]

ahaṃ dharmasya sarvasvamahaṃ pūjyatamosuraiḥ |
ahaṃ jñānamahaṃ satyamahaṃ dhātā sanātanaḥ || 13 ||
[Analyze grammar]

ahaṃ dharmaṃ ahaṃ mokṣaḥ sarvadevamayo hyaham |
brahmadehātsamudbhūtaḥ satyasaṃdho'smi nānyathā || 14 ||
[Analyze grammar]

jinarūpaṃ vijānīhi satyadharmakalevaram |
māmeva hi pradhāvaṃti yogino jñānatatparāḥ || 15 ||
[Analyze grammar]

vena uvāca |
tavaiva kīdṛśaṃ karma kiṃ te darśanameva ca |
kimācāro vadasvaihi ityuktaṃ tena bhūbhujā || 16 ||
[Analyze grammar]

pātaka uvāca |
arhaṃto devatā yatra nirgraṃtho dṛśyate guruḥ |
dayā caiva paro dharmastatra mokṣaḥ pradṛśyate || 17 ||
[Analyze grammar]

darśanesminna saṃdeha ācārānpravadāmyaham |
yajanaṃ yājanaṃ nāsti vedādhyayanameva ca || 18 ||
[Analyze grammar]

nāsti saṃdhyā tapo dānaṃ svadhāsvāhāvivarjitam |
havyakavyādikaṃ nāsti naiva yajñādikā kriyā || 19 ||
[Analyze grammar]

pitṝṇāṃ tarpaṇaṃ nāsti nātithirvaiśvadevikam |
kṣapaṇasya varā pūjā arhato dhyānamuttamam || 20 ||
[Analyze grammar]

ayaṃ dharmasamācāro jainamārge pradṛśyate |
etatte sarvamākhyātaṃ nijadharmasyalakṣaṇam || 21 ||
[Analyze grammar]

vena uvāca |
vedaprokto yathā dharmo yatra yajñādikāḥ kriyāḥ |
pitṝṇāṃ tarpaṇaṃ śrāddhaṃ vaiśvadevaṃ na dṛśyate || 22 ||
[Analyze grammar]

na dānaṃ tapa evāsti kvāste dharmasya lakṣaṇam |
vada satyaṃ mamāgre tu dayādharmaṃ ca kīdṛśam || 23 ||
[Analyze grammar]

pātaka uvāca |
paṃcatattvapravṛddhoyaṃ prāṇināṃ kāya eva ca |
ātmā vāyusvarūpoyaṃ teṣāṃ nāsti prasaṃgatā || 24 ||
[Analyze grammar]

yathā jaleṣu bhūtānāmapisaṃgamavehi tat |
jāyate budbudākāraṃ tadvadbhūtasamāgamaḥ || 25 ||
[Analyze grammar]

pṛthvībhāvo rajaḥsthastu cāpastatraiva saṃsthitāḥ |
jyotistatra pradṛśyeta suvāyurvartate triṣu || 26 ||
[Analyze grammar]

ākāśamāvṛṇotpaścādbudbudatvaṃ prajāyate |
apsumadhye prabhātyeva sutejo vartulaṃ varam || 27 ||
[Analyze grammar]

kṣaṇamātraṃ pradṛśyeta kṣaṇānnaiva ca dṛśyate |
tadvadbhūtasamāyogaḥ sarvatra paridṛśyate || 28 ||
[Analyze grammar]

aṃtakāle prayātyātmā paṃca paṃcasu yāṃti te |
mohamugdhāstato martyā vartaṃte ca parasparam || 29 ||
[Analyze grammar]

śrāddhaṃ kurvaṃti mohena kṣayāhe pitṛtarpaṇam |
kvāste mṛtaḥ samaśnāti kīdṛśo'sau nṛpottama || 30 ||
[Analyze grammar]

kiṃ jñānaṃ kīdṛśaṃ kāyaṃ kena dṛṣṭaṃ vadasva naḥ |
miṣṭānnaṃ bhojayitvā ca tṛptā yāṃti ca brāhmaṇāḥ || 31 ||
[Analyze grammar]

kasya śrāddhaṃ pradīyeta sā tu śraddhā nirarthikā |
anyadevaṃ pravakṣyāmi vedānāṃ karma dāruṇam || 32 ||
[Analyze grammar]

yadātithirgṛhe yāti mahokṣaṃ pacate dvijaḥ |
ajaṃ vā rājarājeṃdra atithiṃ paribhojayet || 33 ||
[Analyze grammar]

aśvamedhamakhe aśvaṃ gomedhe vṛṣameva ca |
naramedhe naraṃ rājanvājapeye tathā hyajān || 34 ||
[Analyze grammar]

rājasūye mahārāja prāṇināṃ ghātanaṃ bahu |
puṃḍarīke gajaṃ hanyādgajamedhe'tha kuṃjaram || 35 ||
[Analyze grammar]

sautrāmaṇyāṃ paśuṃ medhyaṃ meṣameva pradṛśyate |
nānārūpeṣu sarveṣu śrūyatāṃ nṛpanaṃdana || 36 ||
[Analyze grammar]

nānājātiviśeṣāṇāṃ paśūnāṃ ghātanaṃ smṛtam |
yaccāpi dīyate dānaṃ kiṃ taddānasya lakṣaṇam || 37 ||
[Analyze grammar]

jñeyaṃ tadannamucchiṣṭaṃ kriyate bhūribhojanam |
atyaṃtadoṣahīnāṃstānhiṃsaṃti yanmahāmakhe || 38 ||
[Analyze grammar]

tatra kiṃ dṛśyate dharmaḥ kiṃ phalaṃ tatra bhūpate |
paśūnāṃ māraṇaṃ yatra nirdiṣṭaṃ vedapaṃḍitaiḥ || 39 ||
[Analyze grammar]

tasmādvinaṣṭadharmaṃ ca na puṇyaṃ mokṣadāyakam |
dayāṃ vinā hi yo dharmaḥ sa dharmo viphalāyate || 40 ||
[Analyze grammar]

jīvānāṃ pālanaṃ yatra tatra dharmo na saṃśayaḥ |
svāhākāraḥ svadhākārastapaḥ satyaṃ nṛpottama || 41 ||
[Analyze grammar]

dayāhīnaṃ cāpalaṃ syānnāsti dharmastu tatra hi |
ete vedā na vedāḥ syurdayā yatra na vidyate || 42 ||
[Analyze grammar]

dayādānaparo nityaṃ jīvameva prarakṣayet |
cāṃḍālo'pyatha śūdro vā sa vai brāhmaṇa ucyate || 43 ||
[Analyze grammar]

brāhmaṇo nirdayo yo vai paśughātaparāyaṇaḥ |
sa vai sunirdayaḥ pāpī kaṭhinaḥ krūracetanaḥ || 44 ||
[Analyze grammar]

vaṃcakaiḥ kathito vedo yo vedo jñānavarjitaḥ |
yatra jñānaṃ bhavennityaṃ tatra vedaḥ pratiṣṭhati || 45 ||
[Analyze grammar]

dayāhīneṣu vedeṣu vipreṣu ca mahāmate |
nāsti satyaṃ kriyā tatra vedavipreṣu vai tadā || 46 ||
[Analyze grammar]

vedā na vedā rājeṃdra brāhmaṇāḥ satyavarjitāḥ |
dānasyāpi phalaṃ nāsti tasmāddānaṃ na dīyate || 47 ||
[Analyze grammar]

yathā śrāddhasya vai cihnaṃ tathā dānasya lakṣaṇam |
jinasyāpi ca yaddharmaṃ bhuktimuktipradāyakam || 48 ||
[Analyze grammar]

tavāgre'haṃ pravakṣyāmi bahupuṇyapradāyakam |
ādau dayā prakartavyā śāṃtabhūtena cetasā || 49 ||
[Analyze grammar]

ārādhayeddhṛdā devaṃ jinaṃ yena carācaram |
manasā śuddhabhāvena jinamekaṃ prapūjayet || 50 ||
[Analyze grammar]

namaskāraḥ prakartavyastasya devasya nānyathā |
mātāpitrostu vai pādau kadā naiva pravaṃdayet || 51 ||
[Analyze grammar]

anyeṣāmapi kā vārtā śrūyatāṃ rājasattama |
vena uvāca |
ete viprāśca ācāryā gaṃgādyāḥ saritastathā || 52 ||
[Analyze grammar]

vadaṃti puṇyatīrthāni bahupuṇyapradāni ca |
tatkiṃ vadasva satyaṃ me yadi dharmamihecchasi || 53 ||
[Analyze grammar]

pātaka uvāca |
ākāśādvai mahārāja meghā varṣaṃti vai jalam |
bhūmau hi parvateṣvevaṃ sarvatra patite jalam || 54 ||
[Analyze grammar]

sa āplāvya tatastiṣṭheddayāṃ sarvatra bhāvayet |
nadyaḥ pāpapravāhāstu tāsu tīrthaṃ śrutaṃ katham || 55 ||
[Analyze grammar]

jalāśayā mahārāja taḍāgāḥ sāgarāstathā |
pṛthivyādhārakāścaiva girayo aśmarāśayaḥ || 56 ||
[Analyze grammar]

nāstyeteṣu ca vai tīrthaṃ jalairjaladamuttamam |
snāne yadā mahatpuṇyaṃ kasmānmatsyeṣu vai nahi || 57 ||
[Analyze grammar]

dṛṣṭā snānena vai siddhirmīnāḥ śuddhyaṃti nānyathā |
yatra jinastatra tīrthaṃ tatra dharmaḥ sanātanaḥ || 58 ||
[Analyze grammar]

tapodānādikaṃ sarvaṃ puṇyaṃ tatra pratiṣṭhitam || 59 ||
[Analyze grammar]

eko jinaḥ sarvamayo nṛpeṃdra nāstyeva dharmaṃ paramaṃ hi tīrtham |
ayaṃ tu lābhaḥ paramastu tasmāddhyyāsva nityaṃ susukho bhaviṣyasi || 60 ||
[Analyze grammar]

viniṃdya dharmaṃ sakalaṃ savedaṃ dānaṃ sapuṇyaṃ parayajñarūpam |
pāpasvabhāvairbahubodhito nṛpastvaṃgasya putro bhuvi tena pāpinā || 61 ||
[Analyze grammar]

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe |
venopākhyāne saptatriṃśo'dhyāyaḥ || 37 ||
[Analyze grammar]