Chapter 19

[English text for this chapter is available]

sūta uvāca |
somaśarmā mahāprājñaḥ sumanayā saha sattamaḥ |
kapilāsaṃgame puṇye revātīre supuṇyade || 1 ||
[Analyze grammar]

snātvā tatra sa medhāvī tarpayitvā surānpitṝn |
tapastepe suśāṃtātmā japannārāyaṇaṃ śivam || 2 ||
[Analyze grammar]

dvādaśākṣaramaṃtreṇa dhyānayukto mahāmanāḥ |
tasyaiva devadevasya vāsudevasya suvrataḥ || 3 ||
[Analyze grammar]

āsane śayane yāne svapne paśyati keśavam |
sadaiva niścalo bhūtvā kāmakrodhavivarjitaḥ || 4 ||
[Analyze grammar]

sā ca sādhvī mahābhāgā pativrataparāyaṇā |
sumanā kāṃtamevāpi śuśrūṣati taponvitam || 5 ||
[Analyze grammar]

dhyāyamānasya tasyāpi vighnaiḥ saṃdarśitaṃ bhayam |
sarpā viṣolbaṇāḥ kṛṣṇāstatra yāṃti mahātmanaḥ || 6 ||
[Analyze grammar]

pārśve te tapyamānasya tasya te somaśarmaṇaḥ |
siṃhavyāghragajā dṛṣṭā bhayamevaṃ pracakrire || 7 ||
[Analyze grammar]

vetālā rākṣasā bhūtāḥ kūṣmāṃḍāḥ pretabhairavāḥ |
bhayaṃ vidarśayaṃtyete dāruṇaṃ prāṇanāśanam || 8 ||
[Analyze grammar]

nānāvidhā mahābhīmāḥ siṃhāstatra samāgatāḥ |
daṃṣṭrākarālavaktrāśca jagarjuścātibhairavam || 9 ||
[Analyze grammar]

viṣṇordhyānātsa dharmātmā na cacāla mahāmatiḥ |
mahāvighnaiḥ susaṃrūḍhaiścālito munipuṃgavaḥ || 10 ||
[Analyze grammar]

evaṃ na calate dhyānātsomaśarmā dvijottamaḥ |
jhaṃjhāvātaiśca śītena mahāvṛṣṭyā supīḍitaḥ || 11 ||
[Analyze grammar]

bhaṃbhārāvamahābhīmaḥ siṃhastatra samāgataḥ |
taṃ dṛṣṭvā bhayavitrastaḥ sasmāra nṛhariṃ dvijaḥ || 12 ||
[Analyze grammar]

iṃdranīlapratīkāśaṃ pītavastraṃ mahaujasam |
śaṃkhacakradharaṃ devaṃ gadāpaṃkajadhāriṇam || 13 ||
[Analyze grammar]

mahāmauktikahāreṇa iṃduvarṇānukāriṇā |
kaustubhenāpi ratnena dyotamānaṃ janārdanam || 14 ||
[Analyze grammar]

śrīvatsāṃkena divyena hṛdayaṃ yasya rājate |
sarvābharaṇaśobhāṃgaṃ śatapatranibhekṣaṇam || 15 ||
[Analyze grammar]

susmitāsyaṃ suprasannaṃ ratnadāmābhiśobhitam |
bhrājamānaṃ hṛṣīkeśaṃ dhyānaṃ tena kṛtaṃ dhruvam || 16 ||
[Analyze grammar]

tvameva śaraṇaṃ kṛṣṇa śaraṇāgatavatsala |
namostu devadevāya kiṃ me bhayaṃ kariṣyati || 17 ||
[Analyze grammar]

yasyodare trayo lokāḥ sapta cānye mahātmanaḥ |
śaraṇaṃ tasya praviṣṭosmi kvāste bhayaṃ mamaiva hi || 18 ||
[Analyze grammar]

yasmādbhayāḥ pravartaṃte kṛtyādika mahābalāḥ |
sarvabhayaprahartāraṃ tamasmi śaraṇaṃ gataḥ || 19 ||
[Analyze grammar]

pātakānāṃ tu sarveṣāṃ dānavānāṃ mahābhayam |
rakṣako viṣṇubhaktānāṃ tamasmi śaraṇaṃ gataḥ || 20 ||
[Analyze grammar]

vṛṃdārakāṇāṃ sarveṣāṃ dānavānāṃ mahātmanām |
yo gatiḥ kṛṣṇabhaktānāṃ tamasmi śaraṇaṃ gataḥ || 21 ||
[Analyze grammar]

abhayo bhayanāśāya pāpanāśāya jñānavān |
ekaśceṃdrasvarūpeṇa tamasmi śaraṇaṃ gataḥ || 22 ||
[Analyze grammar]

vyādhīnāṃ nāśakāyaiva ya auṣadhasvarūpavān |
nirāmayo nirānaṃdastamasmi śaraṇaṃgataḥ || 23 ||
[Analyze grammar]

acalaścālayellokānapāpo jñānameva ca |
tamasmi śaraṇaṃ prāpto bhayaṃ kiṃ me kariṣyati || 24 ||
[Analyze grammar]

sādhūnāṃ cāpi sarveṣāṃ pālako yo hyanāmayaḥ |
pāti viśvaṃ ca viśvātmā tamasmi śaraṇaṃgataḥ || 25 ||
[Analyze grammar]

yo me mṛgeṃdrarūpeṇa bhayaṃ darśayategrataḥ |
tamahaṃ śaraṇaṃ prāpto narasiṃhaṃ namāmyaham || 26 ||
[Analyze grammar]

madamatto mahākāyo vanahastī samāgataḥ |
gajalīlāgatiṃ devaṃ śaraṇāgatavatsalam || 27 ||
[Analyze grammar]

gajāsyaṃ jñānasaṃpannaṃ sapāśāṃkuśadhāriṇam |
kālāsyaṃ gajatuṃḍaṃ ca śaraṇaṃ sugatosmyaham || 28 ||
[Analyze grammar]

hiraṇyākṣaprahartāraṃ vārāhaṃ śaraṇaṃgataḥ |
vāmanaṃ taṃ prapannosmi śaraṇāgatavatsalam || 29 ||
[Analyze grammar]

hrasvāstu vāmanāḥ kubjāḥ pretāḥ kūṣmāṃḍakādayaḥ |
mṛtyurūpadharāḥ sarve darśayaṃti bhayaṃ mama || 30 ||
[Analyze grammar]

amṛtaṃ taṃ prapannosmi kiṃ bhayaṃ me kariṣyati |
brahmaṇyo brahmado brahmā brahmajñānamayo hariḥ || 31 ||
[Analyze grammar]

śaraṇaṃ taṃ prapannosmi bhayaṃ kiṃ me kariṣyati |
abhayo yo hi jagato bhītighno bhītidāyakaḥ || 32 ||
[Analyze grammar]

bhayarūpaṃ prapannosmi bhayaṃ kiṃ me kariṣyati |
tārakaḥ sarvalokānāṃ nāśakaḥ sarvapāpinām || 33 ||
[Analyze grammar]

tamahaṃ śaraṇaṃ prāpto dharmarūpaṃ janārdanam |
surāraṇaṃ yo hi raṇe vapurddhārayate'dbhutam || 34 ||
[Analyze grammar]

śaraṇaṃ tasya gaṃtāsmi sadāgatirayaṃ mama |
jhaṃjhāvāto mahācaṃḍo vapurdūyati me bhṛśam || 35 ||
[Analyze grammar]

śaraṇaṃ taṃ prapannosmi sadāgatirayaṃ mama |
atiśītaṃ cātivarṣā ātapastāpadāyakaḥ || 36 ||
[Analyze grammar]

eṣāṃ rūpeṇa yo devastasyāhaṃ śaraṇaṃ gataḥ |
kālarūpā amī prāptā bhayadā mama cālakāḥ || 37 ||
[Analyze grammar]

eṣāṃ śaraṇaṃ prapannosmi hareḥ svarūpiṇāṃ sadā || 38 ||
[Analyze grammar]

yaṃ sarvadevaṃ parameśvaraṃ hi niṣkevalaṃ jñānamayaṃ pradīpam |
vadaṃti nārāyaṇamādisiddhaṃ siddheśvaraṃ taṃ śaraṇaṃ prapadye || 39 ||
[Analyze grammar]

iti dhyāyanstuvannityaṃ keśavaṃ kleśanāśanam |
bhaktyā tena samānītastadātmahṛdaye hariḥ || 40 ||
[Analyze grammar]

udyamaṃ vikramaṃ tasya sa dṛṣṭvā somaśarmaṇaḥ |
āvirbhūya hṛṣīkeśastamuvāca prahṛṣṭavān || 41 ||
[Analyze grammar]

somaśarmanmahāprājña śrūyatāṃ bhāryayā saha |
vāsudevosmi vipreṃdra varaṃ yācaya suvrata || 42 ||
[Analyze grammar]

tenokto hi sa viprendra unmīlya nayanadvayam |
dṛṣṭvā viśveśvaraṃ devaṃ ghanaśyāmaṃ mahodayam || 43 ||
[Analyze grammar]

sarvābharaṇaśobhāṃgaṃ sarvāyudhasamanvitam |
divyalakṣaṇasaṃpannaṃ puṃḍarīkanibhekṣaṇam || 44 ||
[Analyze grammar]

pītena vāsasā yuktaṃ rājamānaṃ sureśvaram |
vainateyasamārūḍhaṃ śaṃkhacakragadādharam || 45 ||
[Analyze grammar]

brahmādīnāṃ sudhātāraṃ jagatosya mahāyaśāḥ |
viśvasyāsya sadātītaṃ rūpātītaṃ jagadgurum || 46 ||
[Analyze grammar]

harṣeṇa mahatāviṣṭo daṃḍavatpraṇipatya tam |
śriyāyuktaṃ bhāsamānaṃ sūryakoṭisamaprabham || 47 ||
[Analyze grammar]

baddhāṃjalipuṭobhūtvā tayā sumanayā saha |
jayajayetyuvācainaṃ jayamādhavamānada || 48 ||
[Analyze grammar]

jaya yogīśa yogīndra jaya nāgāṃgaśāyana |
yajñāṃga jaya yajñeśa jaya śāśvatasarvaga || 49 ||
[Analyze grammar]

jaya sarveśvarānaṃta yajñarūpa namo'stu te |
jaya jñānavatāṃ śreṣṭha jaya tvaṃ jñānanāyaka || 50 ||
[Analyze grammar]

jaya sarvadasarvajña jaya tvaṃ sarvabhāvana |
jaya jīvasvarūpeśa mahājīva namostute || 51 ||
[Analyze grammar]

jaya prajñādaprajñāṃga jaya prāṇapradāyaka |
jaya pāpaghna puṇyeśa jaya puṇyapate hare || 52 ||
[Analyze grammar]

jaya jñānasvarūpeśa jñānagamyāya te namaḥ |
jaya padmapalāśākṣa padmanābhāya te namaḥ || 53 ||
[Analyze grammar]

jaya goviṃdagopāla jaya śaṃkhadharāmala |
jaya cakradharāvyakta vyaktarūpāya te namaḥ || 54 ||
[Analyze grammar]

jaya vikramaśobhāṃga jaya vikramanāyaka |
jaya lakṣmīvilāsāṃga namo vedamayāya te || 55 ||
[Analyze grammar]

jaya vikramaśobhāṃga jaya udyamadāyaka |
jaya udyamakālāya udyamāya namonamaḥ || 56 ||
[Analyze grammar]

jaya udyamaśaktāya udyamatrayadhāraka |
yuddhodyamapravṛttāya tasmai dharmāya te namaḥ || 57 ||
[Analyze grammar]

namo hiraṇyaretāya tasmai te jāyate namaḥ |
atitejaḥsvarūpāya sarvatejomayāya ca || 58 ||
[Analyze grammar]

daityatejovināśāya pāpatejoharāya ca |
gobrāhmaṇahitārthāya namostu paramātmane || 59 ||
[Analyze grammar]

namostu hutabhoktre ca namo havyavahāya te |
namaḥ kavyavahāyaiva svadhārūpāya te namaḥ || 60 ||
[Analyze grammar]

svāhārūpāya yajñāya pāvanāya namonamaḥ |
namaste śārṅgahastāya haraye pāpahāriṇe || 61 ||
[Analyze grammar]

sadasaccodanāyaiva namo vijñānaśāline |
namo vedasvarūpāya pāvanāya namonamaḥ || 62 ||
[Analyze grammar]

namostu harikeśāya sarvakleśaharāya te |
keśavāya parāyaiva namaste viśvadhāriṇe || 63 ||
[Analyze grammar]

namaḥ kṛpākarāyaiva namo harṣamayāya te |
anaṃtāya namo nityaṃ śuddhāya kleśanāśine || 64 ||
[Analyze grammar]

ānaṃdāya namo nityaṃ śuddhāya kevalāya te |
rudrairnamitapādāya viraṃcinamitāya te || 65 ||
[Analyze grammar]

surāsureṃdranamita pādapadmāya te namaḥ |
namonamaḥ pareśāya ajitāyāmṛtātmane || 66 ||
[Analyze grammar]

kṣīrasāgaravāsāya namaḥ padmāpriyāya te |
oṃkārāya ca śuddhāya acalāya namonamaḥ || 67 ||
[Analyze grammar]

vyāpine vyāpakāyaiva sarvavyasanahāriṇe |
namonamo varāhāya mahākūrmāya te namaḥ || 68 ||
[Analyze grammar]

namo vāmanarūpāya nṛsiṃhāya mahātmane |
namo rāmāya divyāya sarvakṣatravadhāya ca || 69 ||
[Analyze grammar]

sarvajñānāya matsyāya namo rāmāya te namaḥ |
namaḥ kṛṣṇāya buddhāya namo mlecchapraṇāśine || 70 ||
[Analyze grammar]

namaḥ kapilaviprāya hayagrīvāya te namaḥ |
namo vyāsasvarūpāya namaḥ sarvamayāya te || 71 ||
[Analyze grammar]

evaṃ stutvā hṛṣīkeśaṃ tamuvāca janārdanam |
guṇānāṃ tu paraṃ pāraṃ brahmā vetti na pāvana || 72 ||
[Analyze grammar]

na caiva stotuṃ sarvajñastathā rudra saḥhasradṛk |
vaktuṃ ko hi samarthastu kīdṛśī me matirvibho || 73 ||
[Analyze grammar]

nirguṇaṃ saguṇaṃ stotraṃ mayaiva tava keśava |
kṣamaśabdāpaśabdaṃ me tava dāsosmi suvrata || 74 ||
[Analyze grammar]

janmajanmani lokeśa dayāṃ me kuru pāvana || 75 ||
[Analyze grammar]

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe |
eṃdre sumanopākhyāne ekonaviṃśo'dhyāyaḥ || 19 ||
[Analyze grammar]