Chapter 3

[English text for this chapter is available]

sūta uvāca |
prasthitastena mārgeṇa praviṣṭo gaganāṃtare |
sa dṛṣṭo devadevena sahasrākṣeṇa dhīmatā || 1 ||
[Analyze grammar]

udyamaṃ tasya vai jñātvā cakre vighnaṃ surādhirāṭ |
menikāṃtāmuvācedaṃ gaccha tvaṃ mama śāsanāt || 2 ||
[Analyze grammar]

samācarasvāsya śīghraṃ gatvā vighnaṃ sumadhyame |
asyaiva vipravaryasya putrasya śivaśarmaṇaḥ || 3 ||
[Analyze grammar]

tathā kuruṣva bhadraṃ te yathā nāyāti me gṛham |
evamākarṇya tadvākyaṃ menikā prasthitā tvarāt || 4 ||
[Analyze grammar]

sūta uvāca |
rūpaudāryaguṇopetā sarvālaṃkārabhūṣitā |
naṃdanasya vanasyāṃte dolāyāṃ samupasthitā || 5 ||
[Analyze grammar]

susvareṇa pragāyaṃtī gītaṃ vīṇāsvaropamam |
tena dṛṣṭā viśālākṣī caturā cārulocanā || 6 ||
[Analyze grammar]

vyavasāyaṃ tato jñātvā tasyā vighnamanuttamam |
iṃdreṇa preṣitā caiṣā na ca bhadrakarā bhavet || 7 ||
[Analyze grammar]

evaṃ jñātvā jagāmātha satvareṇa dvijottamaḥ |
tayā dṛṣṭastathā pṛṣṭaḥ kva yāsyasi mahāmate || 8 ||
[Analyze grammar]

viṣṇuśarmā tadovāca menikāṃ kāmacāriṇīm |
iṃdralokaṃ prayāsyāmi piturarthe tvarānvitaḥ || 9 ||
[Analyze grammar]

menikā viṣṇuśarmāṇaṃ pratyuvāca priyaṃ punaḥ |
kāmabāṇaiḥ prabhinnāhaṃ tvāmadya śaraṇaṃ gatā || 10 ||
[Analyze grammar]

rakṣasva dvijaśārdūla yadi dharmamihecchasi |
yāvaddhi tvaṃ mayā dṛṣṭaḥ kāmākulitacetasā || 11 ||
[Analyze grammar]

kāmānalena saṃdagdhā tāvadeva na saṃśayaḥ |
saṃbhrāṃtā kāmasaṃtaptā prasādasumukho bhava || 12 ||
[Analyze grammar]

viṣṇuśarmovāca |
caritraṃ devadevasya viditaṃ me varānane |
bhavatyāścaprajānāmināhaṃcaitādṛśaḥśubhe || 13 ||
[Analyze grammar]

bhavatyāstejasā rūpairanye muhyaṃti śobhane |
viśvāmitrādayo devi putrohaṃ śivaśarmaṇaḥ || 14 ||
[Analyze grammar]

yogasiddhiṃ gatasyāpi tapaḥ siddhasya cābale |
kāmādayo mahādoṣā ādāveva vinirjitāḥ || 15 ||
[Analyze grammar]

anyaṃ bhaja viśālākṣi iṃdralokaṃ vrajāmyaham |
evamuktvā jagāmātha tvarito dvijasattamaḥ || 16 ||
[Analyze grammar]

niṣphalā menakā jātā pṛṣṭā devena vajriṇā |
vibhīṣāṃ darśayāmāsa nānārūpāṃ punaḥ punaḥ || 17 ||
[Analyze grammar]

yathānalena saṃdagdhāstṛṇānāṃ saṃcayā dvijāḥ |
bhasmībhūtā bhavaṃtyeva tathā tāstā vibhīṣikāḥ || 18 ||
[Analyze grammar]

viprasya tejasā tasya pitṛbhaktasya sattamāḥ |
pralayaṃ gatāstu ghorāstā dāruṇā bhīṣikā dvijāḥ || 19 ||
[Analyze grammar]

sa vighnāndarśayāmāsa sahasrākṣaḥ punaḥ punaḥ |
tejasā'nāśayadvipraḥ svakīyena mahāyaśāḥ || 20 ||
[Analyze grammar]

evaṃ vighnānbahūṃstasya iṃdrasyāpi mahātmanaḥ |
nāśayāmāsa medhāvī tapasastejasāpi vā || 21 ||
[Analyze grammar]

naṣṭeṣu teṣu vighneṣu dāruṇeṣu mahatsu ca |
jñātvā tasya kṛtānvighnāndāruṇānbhīṣaṇākṛtīn || 22 ||
[Analyze grammar]

atha kruddho mahātejā viṣṇuśarmā dvijottamaḥ |
iṃdraṃ prati mahābhāgo rāgaraktāṃtalocanaḥ || 23 ||
[Analyze grammar]

iṃdra lokādahaṃ ceṃdraṃ pātayiṣyāmi nānyathā |
nijadharme ratasyādya yo vighnaṃ tu samācaret || 24 ||
[Analyze grammar]

tasya daṃḍaṃ pradāsyāmi yo vai hanyātsa hanyate |
evamanyaṃ kariṣyāmi devānāṃ pālakaṃ punaḥ || 25 ||
[Analyze grammar]

evaṃ samudyato vipra iṃdranāśāya sattamaḥ |
tāvadeva samāyāto deveṃdraḥ pākaśāsanaḥ || 26 ||
[Analyze grammar]

bho bho vipra mahāprājña tapasā niyamena ca |
damena satyaśaucābhyāṃ tvatsamo nāsti cāparaḥ || 27 ||
[Analyze grammar]

anayā pitṛbhaktyā te jitohaṃ daivataiḥ saha |
mamāparādhaṃ tvaṃ sarvaṃ kṣaṃtumarhasi sattama || 28 ||
[Analyze grammar]

varaṃ varaya bhadraṃ te durlabhaṃ ca dadāmyaham |
viṣṇuśarmā tadovāca devarājaṃ tathāgatam || 29 ||
[Analyze grammar]

vipratejo maheṃdredraṃ asahyaṃ devadaivataiḥ |
pitṛbhaktasya deveśa duḥsahaṃ sarvathā vibho || 30 ||
[Analyze grammar]

tejobhaṃgo na karttavyo brāhmaṇānāṃ mahātmanām |
putrapautraiḥ samastaistu brahmaviṣṇuharānpunaḥ || 31 ||
[Analyze grammar]

nāśayaṃte na saṃdeho yadi ruṣṭā dvijottamāḥ |
nāgacchedyadbhavānadya tadā rājyamanuttamam || 32 ||
[Analyze grammar]

ātmatapaḥ prabhāveṇa anyasmai tvaṃ mahātmane |
dātukāmastu saṃjāto roṣapūrṇena cakṣuṣā || 33 ||
[Analyze grammar]

bhavānadya samāyāto varaṃ dātumihecchasi |
amṛtaṃ dehi deveṃdra pitṛbhaktiṃ tathācalām || 34 ||
[Analyze grammar]

evaṃvidhaṃ varaṃ dehi yadi tuṣṭosi śatruhan |
evaṃ dadāmi puṇyaṃ te varaṃ cāmṛtasaṃyutam || 35 ||
[Analyze grammar]

evamābhāṣya taṃ vipramamṛtaṃ dattavānsvayam |
sakuṃbhaṃ dattavāṃstasmai prīyamāṇena cātmanā || 36 ||
[Analyze grammar]

acalā te bhavedvipra bhaktiḥ pitari sarvadā |
evamābhāṣya taṃ vipraṃ visṛjya ca sahasradṛk || 37 ||
[Analyze grammar]

prasannobhūcca taddṛṣṭvā vipratejaḥ suduḥsaham |
viṣṇuśarmā tato gatvā pitaraṃ vākyamabravīt || 38 ||
[Analyze grammar]

tāta iṃdrātsamānītamamṛtaṃ vyādhināśanam |
anenāpi mahābhāga nīrujo bhava sarvadā || 39 ||
[Analyze grammar]

amṛtena tvamadyaiva parāṃ tṛptimavāpnuhi |
etadvākyaṃ mahacchrutvā śivaśarmā sutasya hi || 40 ||
[Analyze grammar]

sutānsarvānsamāhūya prīyamāṇena cetasā |
pitṛbhaktāḥ sutā yūyaṃ madvākyaparipālakāḥ || 41 ||
[Analyze grammar]

varaṃ vṛṇudhvaṃ suprītāḥ putrakā durlabhaṃ bhuvi |
evamābhāṣitaṃ tasya śuśruvuḥ sarvasaṃmatāḥ || 42 ||
[Analyze grammar]

te sarve tu samālocya pitaraṃ pratyathābruvan |
asmākaṃ jīvatāmmātā gatā yā yamamaṃdiram || 43 ||
[Analyze grammar]

nīrujā bhavanāddevī prasādāttava suvratā |
bhavānpitā iyaṃ mātā janmajanmāṃtare pitaḥ || 44 ||
[Analyze grammar]

vayaṃ sutā bhavemeti sarve puṇyakṛtastathā |
śivaśarmovāca |
adyaivāpi mṛtā mātā bhavatāṃ putravatsalā || 45 ||
[Analyze grammar]

jīvamānā suhṛṣṭā sā eṣyate nātra saṃśayaḥ |
evamukte śubhe vākye ṛṣiṇā śivaśarmaṇā || 46 ||
[Analyze grammar]

teṣāṃ mātā samāyātā prahṛṣṭā vākyamabravīt |
etadarthaṃ samutpannaṃ suvīryaṃ tanayaṃ sutam || 47 ||
[Analyze grammar]

narāḥ satputramicchaṃti kulavaṃśaprabhāvakam |
striyo loke mahābhāgāḥ supuṇyāḥ puṇyavatsalāḥ || 48 ||
[Analyze grammar]

sutamicchaṃti sarvatra puṇyāṃgaṃ puṇyasādhakam |
kukṣiṃ yasyā gato garbhaḥ supuṇyaḥ parivarttate || 49 ||
[Analyze grammar]

puṇyānputrānprasūyeta sā nārī puṇyabhāginī |
kulācāraṃ kulādhāraṃ pitṛmātṛpratārakam || 50 ||
[Analyze grammar]

vinā puṇyaiḥ kathaṃ nārī saṃprāpnoti sutottamam |
na jāne kīdṛśaiḥ puṇyaireṣa bhartā supuṇyabhāk || 51 ||
[Analyze grammar]

saṃjāto dharmavīryopi dharmātmā dharmavatsalaḥ |
yasya vīryānmayā prāptā yūyaṃ putrāstatodhikāḥ || 52 ||
[Analyze grammar]

evaṃ puṇyaprabhāvoyaṃ bhavaṃtaḥ puṇyavatsalāḥ |
mama putrāstu saṃjātāḥ pitṛbhaktiparāyaṇāḥ || 53 ||
[Analyze grammar]

aho lokeṣu puṇyaiśca suputraḥ parilabhyate |
ekaikaśodhikāḥ paṃca mayā prāptā mahāśayāḥ || 54 ||
[Analyze grammar]

yajvānaḥ puṇyaśīlāśca tapastejaḥ parākramāḥ |
evaṃ saṃvardhitāste tu tayā mātrā punaḥ punaḥ || 55 ||
[Analyze grammar]

harṣeṇa mahatāviṣṭāḥ praṇemurmātaraṃ sutāḥ |
putrā ūcuḥ |
supuṇyaiḥ prāpyate mātā sanmātā supitā kila || 56 ||
[Analyze grammar]

bhavatī puṇyakṛnmātā no bhāgyaistu pravartitā |
yasyā garbhodaraṃ prāpya supuṇyaiśca pravarddhitāḥ || 57 ||
[Analyze grammar]

janmajanmani tvaṃ mātā pitā caiva bhaviṣyathaḥ |
pitovāca |
śṛṇudhvaṃ māmakāḥ putrāḥ suvaraṃ puṇyadāyakam || 58 ||
[Analyze grammar]

mayi tuṣṭe sutā bhogā nanu bhuṃjaṃtu cākṣayān |
putrā ūcuḥ |
yadi tāta prasannosi varaṃ dātumihecchasi || 59 ||
[Analyze grammar]

asmānpreṣaya golokaṃ vaiṣṇavaṃ dāhavarjitam |
pitovāca |
gacchadhvaṃ vaiṣṇavaṃ lokaṃ yūyaṃ vigatakalmaṣāḥ || 60 ||
[Analyze grammar]

matprasādāttapobhiśca pitṛbhaktyānayā svayā |
evamukte tu tenāpi suvākye ṛṣiṇā tataḥ || 61 ||
[Analyze grammar]

śaṃkhacakragadāpāṇirgaruḍārūḍha āgataḥ |
saputraṃ śivaśarmāṇamityuvāca punaḥ punaḥ || 62 ||
[Analyze grammar]

saputreṇa tvayādyaiva jito bhaktyāsmi vai dvija |
putraiḥ sārddhaṃ samāgaccha caturbhiḥ puṇyakāribhiḥ || 63 ||
[Analyze grammar]

anayā bhāryayā sārddhaṃ puṇyayā patikāmyayā |
śivaśarmovāca |
amī gacchaṃtu putrā me vaiṣṇavaṃ lokamuttamam || 64 ||
[Analyze grammar]

kaṃcitkālaṃ tu neṣyāmi bhūmau vai bhāryayā saha |
anenāpi suputreṇa aṃtyena somaśarmaṇā || 65 ||
[Analyze grammar]

evamukte śubhe vākye ṛṣiṇā satyabhāṣiṇā |
tānuvācātha deveśaḥ suputrāñchivaśarmaṇaḥ || 66 ||
[Analyze grammar]

gacchaṃtu mokṣadaṃ lokaṃ dāhapralayavarjitam |
evamukte tato viprāścatvāraḥ satyacetasaḥ || 67 ||
[Analyze grammar]

viṣṇurūpadharāḥ sarve babhūvustatkṣaṇādapi |
iṃdranīlasamāvarṇaiḥ śaṃkhacakragadādharāḥ || 68 ||
[Analyze grammar]

sarvābharaṇasaubhāgyā viṣṇurūpā mahaujasaḥ |
hārakaṃkaṇaśobhāḍhyā ratnamālābhiśobhitāḥ || 69 ||
[Analyze grammar]

sūryatejaḥpratīkāśāstejojvālābhirāvṛtāḥ |
praviṣṭā vaiṣṇavaṃ kāyaṃ paśyataḥ śivaśarmaṇaḥ || 70 ||
[Analyze grammar]

dīpaṃ dīpā yathā yāṃti tadvallīnā mahāmate |
gatāste vaiṣṇavaṃ dhāma pitṛbhaktyā dvijottamāḥ || 71 ||
[Analyze grammar]

prabhāvaṃ tu pravakṣyāmi susatyaṃ somaśarmaṇaḥ || 72 ||
[Analyze grammar]

iti śrīpadmapurāṇe bhūmikhaṃḍe śivaśarmopākhyāne tṛtīyo'dhyāyaḥ || 3 ||
[Analyze grammar]