Chapter 65

[English text for this chapter is available]

vyāsa uvāca |
nāṃdīmukheṣu sarveṣu pūjayedyo gaṇādhipam |
tasya sarvo bhavedvaśyaḥ puṇyaṃ bhavati cākṣayam || 1 ||
[Analyze grammar]

gaṇānāṃ tveti maṃtreṇa sarvayajñaghaṭeṣu ca |
sarvasiddhimavāpnoti svargaṃ mokṣaṃ labhennaraḥ || 2 ||
[Analyze grammar]

mṛṇmaye pratimāyāṃ ca citre cātha dṛṣaṇmaye |
dvāradāruṇi pātre ca heraṃbaṃ lekhayedbudhaḥ || 3 ||
[Analyze grammar]

anyasminnapi deśe tu satataṃ dṛṣṭigocare |
sthāpayitvā tu heraṃbaṃ śaktyā yaḥ pūjayedbudhaḥ || 4 ||
[Analyze grammar]

tasya kāryāṇi siddhyaṃti dayitāni samaṃtataḥ |
na vighnaṃ jāyate kiṃcittrailokyaṃ vaśamānayet || 5 ||
[Analyze grammar]

vidyārthī labhate vidyāṃ vedaśāstrasamudbhavām |
anyāṃ ca śilpividyāṃ ca vijayāṃ svargadāyinīm || 6 ||
[Analyze grammar]

dhanārthī vipulaṃ vittaṃ kanyāṃ sādhvīṃ manoramām |
aiśvaryaṃ dharmasādhyaṃ ca tanayaṃ kulamokṣadam || 7 ||
[Analyze grammar]

na rogaiḥ pīḍyate kaścinna grahaiḥ pretayonibhiḥ |
śṛṃgibhirnāpi rakṣobhirvidyudbhirvanataskaraiḥ || 8 ||
[Analyze grammar]

na rājā kupyati gṛhe na ca mārī pravartate |
na daurbhikṣyaṃ na daurbalyaṃ pūjayitvā vināyakam || 9 ||
[Analyze grammar]

abhipretārthasiddhyarthaṃ pūjito yaḥ surairapi |
sarvavighnachide tasmai gaṇādhipataye namaḥ || 10 ||
[Analyze grammar]

maṃtraścāyaṃ oṃ namo gaṇapataye |
nārāyaṇapriyaiḥ puṣpairanyaiścāpi sugaṃdhibhiḥ |
modakaiḥ phalamūlaiśca dravyaiḥ kālodbhavaistathā || 11 ||
[Analyze grammar]

dadhidugdhaiḥ priyairvādyairapi dhūpasugaṃdhibhiḥ |
pūjayedgaṇapaṃ yastu sarvasiddhimavāpnuyāt || 12 ||
[Analyze grammar]

viśeṣāttasya liṃge tu yo dadāti vasupriyam |
pūjopakaraṇaṃ vastraṃ sarvaṃ lakṣaguṇaṃ bhavet || 13 ||
[Analyze grammar]

deśe ca bhārate varṣe vanitā pūrvasannidhau |
lauhityadakṣiṇe tīre liṃgarūpo vināyakaḥ || 14 ||
[Analyze grammar]

haragaurīsamādeśāddevānāṃ saṃmatena ca |
sthito lokapraśāṃtyarthaṃ sarvavighnavināśanāt || 15 ||
[Analyze grammar]

pūjayitvā tu taṃ devaṃ śaktito dravyasaṃcayaiḥ |
vināyakatvamāpnoti vedaśāstrārthapāragaḥ || 16 ||
[Analyze grammar]

sakṛtpradakṣiṇaṃ kṛtvā dṛṣṭvā spṛṣṭvā tu mānavaḥ |
akṣayaṃ labhate svargaṃ sadā devaiḥ prapūjyate || 17 ||
[Analyze grammar]

saṃsargiṇāṃ ca mlechānāṃ gatyarthaṃ sutapasvinām |
putrārthaṃ sarvalokānāṃ tatra śaṃbhurvināyakaḥ || 18 ||
[Analyze grammar]

kṛtvābhiṣekaṃ lauhitye spṛśedyastu gaṇādhipam |
saptajanmakṛtātpāpānmucyate nātra saṃśayaḥ || 19 ||
[Analyze grammar]

na vaidhavyaṃ na kārpaṇyaṃ na śokaṃ na tu matsaram |
vināyakaṃ samāsādya janmajanmani saṃlabhet || 20 ||
[Analyze grammar]

punaḥ siddhiḥ punarbhogyaṃ punaḥ kīrtiḥ punarbalam |
pūjayitvā tu gaṇapaṃ narasya nātra saṃśayaḥ || 21 ||
[Analyze grammar]

asya pūjāmakṛtvā ca sarvābhīṣṭaṃ vinaśyati |
tatra devāśca suprītā brahmaviṣṇuharādayaḥ || 22 ||
[Analyze grammar]

maghono gaṇapasyātha pūjāvirahitasya ca |
athāsurairmahāvīryairhiraṇyākṣamukhai raṇe || 23 ||
[Analyze grammar]

maghavā tu jito vīryāddhiraṇyākṣeṇa vai tadā |
tatassurāśca nirvīryā yāvadvarṣaśataṃ purā || 24 ||
[Analyze grammar]

daivāsure mahāyuddhe surāṇāṃ ca parājayaḥ |
tato devādhideve tu śive devairniveditam || 25 ||
[Analyze grammar]

bhagavannasurairno hi jitaṃ rājyaṃ gatā makhāḥ |
etasminnaṃtare śaṃbhurdevānvacanamabravīt || 26 ||
[Analyze grammar]

heraṃbāya varo datta umayā prītayā mayā |
pūjayā te parā siddhirdevādīnāṃ bhavatviti || 27 ||
[Analyze grammar]

avajānāti yo mohātpuruṣastu mahotsave |
na bhavettasya siddhiśca raṇe cāpi parājayaḥ || 28 ||
[Analyze grammar]

mahāmakhena yuṣmābhiḥ pūjā gaṇapateḥ kṛtā |
helayā na kṛtā mohāttasmātprāptaḥ parājayaḥ || 29 ||
[Analyze grammar]

śīghraṃ gacchata vai puṇyāṃ gaṇapasya mahātmanaḥ |
pūjāṃ kuruta dharmajñā jayastūrṇaṃ bhaviṣyati || 30 ||
[Analyze grammar]

tato haramukhācchrutvā vacaḥ kṣemaparaṃ hitam |
prahṛṣṭā vibudhāssarve gaṇapasya puraḥ sthitāḥ || 31 ||
[Analyze grammar]

devā ūcuḥ |
gaṇādhipa namastubhyaṃ sarvadevaikapālaka |
svargabhogaprada prītyā heraṃba tvāṃ natāḥ sma ha || 32 ||
[Analyze grammar]

jayadaṃ sarvayuddheṣu siddhidaṃ sarvakarmasu |
mahāmāyaṃ mahākāyaṃ heraṃba tvāṃ natāḥ sma ha || 33 ||
[Analyze grammar]

ekadaṃtaṃ mahāprājñaṃ laṃbatuṃḍaṃ vināyakam |
devaṃ maharṣidevānāṃmiṃdrasya ca natāḥ sma ha || 34 ||
[Analyze grammar]

yatte purārcanaṃ yajñe na kṛtaṃ tatkṣamasva naḥ |
surāṇāṃ ca giraḥ śrutvā gaṇapo vākyamabravīt || 35 ||
[Analyze grammar]

yuṣmābhirvriyatāṃ devā varo matto hi vāṃcchitaḥ |
tataḥ śakrādayaḥ sarve bṛhaspatipurogamāḥ || 36 ||
[Analyze grammar]

ūcurgaṇapatiṃ devā jayosmākaṃ bhavatviti |
devānāṃ vacanaṃ śrutvā gaṇeśo vākyamabravīt || 37 ||
[Analyze grammar]

bāḍhameva suraśreṣṭhā jayo vo bhavatu drutam |
tato devagaṇāssarve harṣanirbharamānasāḥ || 38 ||
[Analyze grammar]

gaṇeśaṃ pūjayāmāsurgaṃdhasāraistu maṇḍanaiḥ |
divyadhūpaiḥ suvastraiśca kusumairnandanodbhavaiḥ || 39 ||
[Analyze grammar]

pārijātādibhiḥ puṣpairanyairdevamanoharaiḥ |
pūjito gaṇapo devairuvāca surasattamān || 40 ||
[Analyze grammar]

gacchadhvaṃ vibudhā devaṃ viṣṇumadbhutasāhasam |
sa vidhāsyati vaḥ kāmaṃ vāṃcchitaṃ ca tataḥ surāḥ || 41 ||
[Analyze grammar]

svaṃsvaṃ rathaṃ samāruhya gatāste harimavyayam |
pītāṃbaraṃ namaskṛtya ūcurdevagaṇā mudā || 42 ||
[Analyze grammar]

harātmajaṃ tu saṃprāpya pūjayitvā gaṇādhipam |
āgatāstvatsakāśaṃ vai mahātmannadya keśava || 43 ||
[Analyze grammar]

etacchrutvā tu devānāṃ vacanaṃ hariravyayaḥ |
yathātathyamuvācedaṃ haniṣye daityapuṃgavān || 44 ||
[Analyze grammar]

śrutvā vāgamṛtaṃ devā nārāyaṇamukhāccyutam |
hṛṣṭāśca sumudāviṣṭā dravyairiṣṭaiḥ samarcayan || 45 ||
[Analyze grammar]

punarviṣṇuruvācedaṃ devāniṃdrapurogamān |
svaṃsvaṃ balaṃ samāhṛtya sajjī bhavata vijvarāḥ || 46 ||
[Analyze grammar]

hariṣye tāndurācārānbalaṃ caiva samaṃtataḥ |
astravṛṃdaṃ tu saṃgṛhya yūyaṃ tiṣṭhata nirbhayāḥ || 47 ||
[Analyze grammar]

mādhavasya vacaḥ śrutvā pragatāḥ surapuṃgavāḥ |
vimānāni samāruhya sarve divyāstradhāriṇaḥ || 48 ||
[Analyze grammar]

devānāṃ harṣavākyāni daityacāraiḥ śrutāni vai |
rājānaṃ kathayāmāsurhiraṇyākṣaṃ mahābalam || 49 ||
[Analyze grammar]

śrutvā daityapatistatra cukopāti mahābalaḥ |
sacivāṃstu samāhūya kruddho vacanamabravīt || 50 ||
[Analyze grammar]

adhuneṃdrādidevāśca nikhilāḥ krūrabuddhayaḥ |
mādhavaṃ ca parīpsantaḥ śaṃbhau sarvaṃ nyavedayan || 51 ||
[Analyze grammar]

kathaṃ jayaṃ ca lapsyāmo daityavṛṃdetidāruṇe |
tripurāriruvācedaṃ gaṇeśaṃ yajatāmarāḥ || 52 ||
[Analyze grammar]

pūjayitvā tu taṃ devaṃ jeṣyathāsuradānavān |
tato devagaṇairhṛṣṭaiḥ pūjito gaṇanāyakaḥ || 53 ||
[Analyze grammar]

gaṇādhipena tuṣṭena krūro datto varo mahān |
jeṣyathādyāsurānsarvāṃstato devā mudānvitāḥ || 54 ||
[Analyze grammar]

hariṃ nivedayāmāsurasmadvadhaparīpsavaḥ |
harerbāḍhamupaśrutya rathinaḥ śastrapāṇayaḥ || 55 ||
[Analyze grammar]

yuddhārthamadhitiṣṭhaṃti nirjarāstvabhayāmayi |
yasya yā śaktirastīha devāñjetuṃ vadatvalam || 56 ||
[Analyze grammar]

tato rājñovacaḥ śrutvā madhurvacanamabravīt |
jeṣyāmi ca hariṃ rājansahāyaṃ me niyojaya || 57 ||
[Analyze grammar]

jite nārāyaṇe devāḥ sabhayāstridaśā dhruvam |
tasmānnārāyaṇo'smākaṃ bhāgaḥ sarvapuraṃjayaḥ || 58 ||
[Analyze grammar]

tato dhuṃdhuśca suṃdaśca kālakeyo mahābalaḥ |
sahāyaśca madhostasya jeṣyāmo mādhavaṃ nṛpa || 59 ||
[Analyze grammar]

sarvadaityabale mukhyāścatvāro dṛḍhavikramāḥ |
kālamṛtyusamā vīrāḥ sarvāstravidhipāragāḥ || 60 ||
[Analyze grammar]

balastatrābravīdvākyaṃ yasminjaya upasthitaḥ |
taṃ ca jeṣyāmi jiṣṇuṃ ca pratijñā me dṛḍhā nṛpa || 61 ||
[Analyze grammar]

namuciśca muciścaiva bhrātarau baladarpitau |
ūcatustau nṛpaṃ hyāvāṃ jeṣyāvo vai balādbalau || 62 ||
[Analyze grammar]

jambhaścaivābravīdvākyamiṃdramiṃdrapurogamān |
jeṣyāmi nātra saṃdeho daityā bhavata vijvarāḥ || 63 ||
[Analyze grammar]

tripuraścābravīdvākyaṃ jeṣyāmi ca vināyakam |
tāvadūce'tha senānīrmayo devāṃtako balī || 64 ||
[Analyze grammar]

kuberaṃ pratirakṣobhiḥ sarvāṃścaiva hiraṇyakān |
etasminnaṃtare tatra nārado munisattamaḥ || 65 ||
[Analyze grammar]

gatvovāca hiraṇyākṣaṃ jiṣṇudūtohamāgataḥ |
rājyaṃ tyaja svavācā naḥ prāṇeṣu yadi te hitam || 66 ||
[Analyze grammar]

na cedyudhyasva māmadya na vā gaccha rasātalam |
tataḥ kopāduvācedaṃ nāradaṃ munisattamam || 67 ||
[Analyze grammar]

ahiṃsyastvaṃ brāhmāṇādya gaccha tūrṇaṃ mamāgrataḥ |
devānāṃ ca vipattiṃ ca kadanaṃ nidhanaṃ puraḥ || 68 ||
[Analyze grammar]

paśya vipra kṣaṇenāṃtaṃ prāptaṃ hariharādikam |
evamuktvā sa daityeṃdro balādhyakṣamuvāca ha || 69 ||
[Analyze grammar]

sajjīkṛtya balaṃ sarvānrathāṃścānayata drutam |
daityarājavacaḥ śrutvā balādhyakṣaḥ samaṃtataḥ || 70 ||
[Analyze grammar]

balānyāhūya sahasā saṃtrastāstūrṇamāgatāḥ |
koṭikoṭisahasrāṇi akṣauhiṇyo balāni ca || 71 ||
[Analyze grammar]

ekaikasya ca vīrasya vāhanāni mahāṃti ca |
syaṃdanāni vicitrāṇi gajoṣṭrāśvakharānapi || 72 ||
[Analyze grammar]

siṃhavyāghralulāyāṃśca samāruhya yayustadā |
vādyaiḥ sarvaiśca bhūyiṣṭhaiḥ siṃhanādairbhayānakaiḥ || 73 ||
[Analyze grammar]

diśastu pūrayāmāsussindhuvelācalā dharāḥ |
sarvalokāśca vitresuḥ samudrāśca cakaṃpire || 74 ||
[Analyze grammar]

devaduṃdubhayo neduḥ sarvadevaiḥ samīritāḥ |
vādyaiśca vividhairanyairvāyupūrṇairghanasvanaiḥ || 75 ||
[Analyze grammar]

sarvalokābhayatrastā ye ca trailokyavāsinaḥ |
bhraṣṭakāmāgatākāśaṃ ghoraṃ tīvraṃ mahāhavam || 76 ||
[Analyze grammar]

parighaiḥ pāśaśūlaiśca khaḍgayaṣṭiparaśvadhaiḥ |
śaraiśca niśitairghorairjaghnuranyonyamāhave || 77 ||
[Analyze grammar]

śastrāstrairbahudhāmuktairdiśaḥ sarvā niraṃtaram |
vigṛheṣu dharaṇyāṃ ca parvateṣu jaleṣu ca || 78 ||
[Analyze grammar]

devasthāne tathākāśe parvatāgreṣu sānuṣu |
gahvareṣu mahāraṇye tayoryuddhamavartata || 79 ||
[Analyze grammar]

puṣkalādi ghanānāṃ ca varṣadhārā jalaṃ yathā |
pataṃtyastrāṇi sainyeṣu śataśotha sahasraśaḥ || 80 ||
[Analyze grammar]

kecitpetuḥ pṛthivyāṃ tu śaraiḥ saṃbhinnavigrahāḥ |
śaktibhirmusalaiścānye chatraśūlaparaśvadhaiḥ || 81 ||
[Analyze grammar]

patitāḥ saṃmukhe śūrā yuddheṣu nyāyavartinaḥ |
gacchaṃti surasadmāni svāmyarthe ye tvabhīravaḥ || 82 ||
[Analyze grammar]

ye cānye kātarāḥ pāpā haṃtāro vimukhānraṇe |
anyāyairye ca yoddhāraste yānti yamamaṃdiraṃ || 83 ||
[Analyze grammar]

tridivasthā gajārohāḥ saindhavasthāstathāparān |
rathasthāṃśca rathārohāḥ padagāṃśca padātayaḥ || 84 ||
[Analyze grammar]

parasparaṃ vinighnaṃti śūrā yuddhābhikāṃkṣiṇaḥ |
muditāḥ satvasaṃpannā dharmiṣṭhā balasaṃvṛtāḥ || 85 ||
[Analyze grammar]

keṣāṃcidvāhavaśchinnā musalairbhinnamastakāḥ |
keśāśśirāṃsi vastrāṇi nipeturdharaṇītale || 86 ||
[Analyze grammar]

madhyacchinnāstathā bhinnāḥ petururvyāṃ mahābalāḥ |
khaḍgapātaistathā cograiśchrinnabhinnāḥ paraśvadhaiḥ || 87 ||
[Analyze grammar]

gāmeva patitā dhīrā divyālaṃkārabhūṣitāḥ |
pradīptobhūddharādeśo vīrairnāgairhayai rathaiḥ || 88 ||
[Analyze grammar]

vividhābharaṇairnaṣṭaiḥ patākābhiśca ketubhiḥ |
tato vasuṃdharā sarvā saśailavanakānanā || 89 ||
[Analyze grammar]

rudhiraughaplutā tatra vibudhāsurayoryudhi |
kravyādairbahubhistatra khādito dravyasaṃcayaḥ || 90 ||
[Analyze grammar]

lohitaṃ pracuraṃ pītaṃ rakṣobhiśca vṛkādibhiḥ |
anyairmahāgaṇaireva kṣatajaṃ pavanānvitam || 91 ||
[Analyze grammar]

khāditaṃ prītimadbhiśca pherugṛdhragaṇairmudā |
etasminnaṃtare sūriḥ surapūjyo bṛhaspatiḥ || 92 ||
[Analyze grammar]

mṛtasaṃjīvanīvidyāṃ surāṇāṃ saṃjajāpa ha |
viśalyakaraṇīṃ divyāṃ brahmavidyāṃ mahābalāṃ || 93 ||
[Analyze grammar]

tato dhanvaṃtarirvidvānsuravaidyo manojavaḥ |
auṣadhaistatprayogaiśca raṇe paryaṭate mudā || 94 ||
[Analyze grammar]

tatra devāśca jīvaṃti ye mṛtāśca mahāhave |
avraṇā balasaṃpannāḥ prayudhyaṃti bhṛśaṃ punaḥ || 95 ||
[Analyze grammar]

evaṃ śatasahasraṃ tu gaṇaṃ daityasya coddhatam |
patitaṃ puṇyayogācca śarairnirbhinnakaṃdharam || 96 ||
[Analyze grammar]

tatastu jayaśabdena naṃdaṃti siddhacāraṇāḥ |
ṛṣayaḥ khecarāścānye ye caivāpsarasāṃ gaṇāḥ || 97 ||
[Analyze grammar]

gītiṃ gāyaṃti gaṃdharvāḥ śaśaṃsuḥ paramarṣayaḥ |
atha kruddho mahātejā daityamukhyo mahābalaḥ || 98 ||
[Analyze grammar]

kālakeya iti khyātaḥ senānīrdaityapasya ca |
syandanastho mahāvīryo dhanurādāya tatra ca || 99 ||
[Analyze grammar]

jaghāna surasaṃghāṃstānnartayāmāsa bhūtale |
niraṃtaraśaraugheṇa cchāditaṃ gaganaṃ tadā || 100 ||
[Analyze grammar]

nipataṃti śarāḥ sainye koṭikoṭi sahasraśaḥ |
nipataṃti tato devāḥ saṃyugeṣvanivartinaḥ || 101 ||
[Analyze grammar]

rudhirodgāriṇassarve siddhagaṃdharvakinnarāḥ |
viśikhaiḥ pīḍitā devā nipeturdharaṇītale || 102 ||
[Analyze grammar]

keciccharaśatairbhinnāssahasrairayutaistathā |
petururvyāṃ mahāvīryā ye raṇe surapuṃgavāḥ || 103 ||
[Analyze grammar]

vyathitāścābhavansarve syaṃdanasthā divaukasaḥ |
śaraiḥ pravyathitāste tu sthātuṃ śaktā na saṃmukhe || 104 ||
[Analyze grammar]

tenāvagāhitaṃ sainyaṃ gajeneva sarovanam |
śaraistasyārditā devā vajrānalasamaprabhaiḥ || 105 ||
[Analyze grammar]

na śekuḥ samare sthātuṃ maghavaṃtaṃ yayustadā |
citraratha iti khyāto devaśśastrabhṛtāṃ varaḥ || 106 ||
[Analyze grammar]

yayau syaṃdanamāruhya yuddhaṃ prati dhanurdharaḥ |
abravīdvacanaṃ sopi senānyaṃ tu mahāsuram || 107 ||
[Analyze grammar]

yathā haṃsi mahāśūra surasenāṃ mudānvitaḥ |
sa tvaṃ praśaṃsanīyaśca śūrosi surasaṃmataḥ || 108 ||
[Analyze grammar]

hiraṇyākṣapriyaṃ karma kṛtaṃ yuddhe tvayādhunā |
idānīṃ mama bāṇaiśca gacchasva yamamaṃdiram || 109 ||
[Analyze grammar]

tataśca kālakeyastu smito vacanamabravīt |
puraiva vijito deva gaṇaḥ sarvaḥ pralīlayā || 110 ||
[Analyze grammar]

idānīṃ tu sthitaṃ yuddhe balaṃ sarvaṃ tu helayā |
yadi te nidhane prītirastīha surapuṃgava || 111 ||
[Analyze grammar]

ebhistvāṃ niśitairbāṇairnayāmi yamamaṃdiram |
ityuktvā paramakruddho bāṇamaṃtakasannibham || 112 ||
[Analyze grammar]

jaghāna samare vīrastribhiściccheda soṃbare |
punarbāṇāṃśca samare yojayitvā drutaṃ ruṣā || 113 ||
[Analyze grammar]

jaghāna pracurāndaityāṃstāṃścakartta sa lāghavāt |
tatonyonyaṃ śaraistīkṣṇaiḥ kālānalasamaprabhaiḥ || 114 ||
[Analyze grammar]

yuddhe dhanuṣmatāṃ śreṣṭhaściccheda bhuvi vegataḥ |
tadyuddhamabhavaddevadaityayordharmato bhṛśam || 115 ||
[Analyze grammar]

draṣṭukāmāgatāḥ pārśvamṛṣi devāḥ suroragāḥ |
evaṃ śatasahasrāṇi bāṇānāṃ vidhṛtāni ca || 116 ||
[Analyze grammar]

anyonyaṃ samare vīrau vijayāya virejatuḥ |
atha kruddho mahātejā gaṃdharvāṇāṃ patistadā || 117 ||
[Analyze grammar]

tribhirbibheda bāṇaiśca lalāṭe hṛdi paṃcabhiḥ |
saptabhirjaṭhare nābhau bastau tasya sa paṃcabhiḥ || 118 ||
[Analyze grammar]

śaraiḥ saṃpātito daityo mugdhaḥ kaśmalatāṃ gataḥ |
śithilīkṛtacāpaśca lebhe saṃjñāṃ cirādbalī || 119 ||
[Analyze grammar]

madhusaṃjñaṃ tribhirbāṇaissa bibheda surottamam |
cakartta dhanurastraiśca daityarājasya paśyataḥ || 120 ||
[Analyze grammar]

tato bāṇasahasraistu kālāṃtakasamaprabhaiḥ |
bibheda daityasiṃhaṃ tu surāṇāmuttamo balī || 121 ||
[Analyze grammar]

hatacetāḥ sa daityeṃdro bahuśoṇitasaṃsravaḥ |
vihvalo bahubāṇārtaḥ śūlaṃ jagrāha dānavaḥ || 122 ||
[Analyze grammar]

śūlahastasya tasyaiva caturbhisturagānśaraiḥ |
hatvā ca pātayāmāsa tribhiryaṃtārameva ca || 123 ||
[Analyze grammar]

jaghāna śūlamurvīṣṭhastato gaṃdharvasattamam |
vicakartta tribhirbāṇaiḥ śūlaṃ citraratho balī || 124 ||
[Analyze grammar]

śūlaṃ ca naṣṭakaṃ dṛṣṭvā hatabhogamivoragam |
gṛhītvā mudgaraṃ ghoraṃ pradudrāva suraṃ balī || 125 ||
[Analyze grammar]

sa mudgaraṃ samāyātaṃ daityasenādhipaṃ tadā |
vicakartta śiro dehādardhacaṃdreṇa saṃbhramāt || 126 ||
[Analyze grammar]

sa papāta mahīpṛṣṭhe saṃcacāla vasuṃdharā |
tato daityagaṇāḥ sarve vimukhā vipradudruvuḥ || 127 ||
[Analyze grammar]

iti śrīpādmapurāṇe prathame sṛṣṭikhaṃḍe kālakeyavadhonāma |
paṃcaṣaṣṭitamo'dhyāyaḥ || 65 ||
[Analyze grammar]