Padma Purana [sanskrit]

462,305 words | ISBN-13: 9789385005305

The Padma-purana Book 1 Chapter 64 (Sanskrit text), including grammatical analysis, glossary and relevant print editions. The Padmapurana is a one of the largest of the eighteen Major Puranas containing roughly 50,000 metrical verses. Although popular for its inclusion of the Ramayana and large sections on pilgrimage guides this is also known for its dedication to both Shiva and Vishnu.

Chapter 64

< Previous

Next >

[English text for this chapter is available]

vyāsa uvāca |
punaranyatpravakṣyāmi stotraṃ gaṇādhipasya ca |
sarvasiddhikaraṃ pūtaṃ sarvābhīṣṭaphalapradaṃ || 1 ||
[Analyze grammar]

ekadaṃtaṃ mahākāyaṃ taptakāṃcanasannibham |
laṃbodaraṃ viśālākṣaṃ vaṃdehaṃ gaṇanāyakaṃ || 2 ||
[Analyze grammar]

muṃjakṛṣṇājinadharaṃ nāgayajñopavītakam |
bāleṃdukalikāmauliṃ vaṃdehaṃ gaṇanāyakaṃ || 3 ||
[Analyze grammar]

sarvavighnaharaṃ devaṃ sarvavighnavivarjitam |
mūṣakottamamāruhya devāsuramahāhave || 4 ||
[Analyze grammar]

yoddhukāmaṃ mahābāhuṃ vaṃdehaṃ gaṇanāyakam |
aṃbikāhṛdayānaṃdaṃ mātṛkāpariveṣṭitam || 5 ||
[Analyze grammar]

bhaktipriyaṃ madonmattaṃ vaṃdehaṃ gaṇanāyakam |
citraratnavicitrāṃgaṃ citramālāvibhūṣaṇam || 6 ||
[Analyze grammar]

kāmarūpadharaṃ devaṃ vaṃdehaṃ gaṇanāyakam |
gajavaktraṃ suraśreṣṭhaṃ cārukarṇavibhūṣitam || 7 ||
[Analyze grammar]

pāśāṃkuśadharaṃ devaṃ vaṃdehaṃ gaṇanāyakam |
yakṣakinnaragaṃdharvaiḥ siddhavidyādharaissadā || 8 ||
[Analyze grammar]

stūyamānaṃ mahādehaṃ vaṃdehaṃ gaṇanāyakam |
gaṇāṣṭakamidaṃ puṇyaṃ bhaktito yaḥ paṭhennaraḥ || 9 ||
[Analyze grammar]

sarvasiddhimavāpnoti rudraloke mahīyate |
na niḥsvatāṃ tathābhyeti saptajanmasu mānavaḥ || 10 ||
[Analyze grammar]

ya idaṃ paṭhate nityaṃ mahārājo bhavennaraḥ |
vaśyaṃ karoti trailokyaṃ paṭhanācchravaṇādapi |
stotraṃ paraṃ mahāpuṇyaṃ gaṇapasya mahātmanaḥ || 11 ||
[Analyze grammar]

iti śrīpādmapurāṇe prathame sṛṣṭikhaṃḍe gaṇapatistotraṃ nāma |
catuṣṣaṣṭitamo'dhyāyaḥ || 64 ||
[Analyze grammar]