Chapter 44

[English text for this chapter is available]

śarva uvāca |
śarīre mama tanvaṃgi site bhāsyasitadyutiḥ |
bhujaṃgī vā sitā śubhre saṃśliṣṭā caṃdanetarau || 1 ||
[Analyze grammar]

caṃdrātapena saṃpṛktā rudhirāmbarasaṃvṛtā |
rajanī vā site pakṣe dṛṣṭidoṣaṃ dadāsi me || 2 ||
[Analyze grammar]

ityuktā girijā tena muktakaṃṭhā pinākinam |
uvāca koparaktākṣī bhrukuṭī vikṛtānanā || 3 ||
[Analyze grammar]

devyuvāca |
svakṛtena janaḥ sarvo jāḍyena paribhūyate |
avaśyamarthī prāpnoti khaṃḍanaṃ śaśimaṃḍana || 4 ||
[Analyze grammar]

tapobhirdīrghacaritairyā tvāṃ prārthitavatyahaṃ |
tasyā meni yatastveṣa hyavamānaḥ pade pade || 5 ||
[Analyze grammar]

naivāsmi kuṭilā śarva viṣamā na ca dhūrjaṭe |
saviṣastvaṃ jagatkhyāto vyaktadoṣākarāśrayaḥ || 6 ||
[Analyze grammar]

tvaṃ hi muṣṇāsi daśanānnetrahaṃtā bhagasya ca |
ādityastvāṃ vijānāti bhagavāndvādaśātmakaḥ || 7 ||
[Analyze grammar]

mūrdhni śūlaṃ janayasi svairdoṣairmāmadhikṣipan |
yastvaṃ māmātthakṛṣṇeti mahākālosi viśrutaḥ || 8 ||
[Analyze grammar]

yāsyāmyahaṃ parityaktumātmānaṃ tapasā girim |
jīvaṃtyā na mayā kṛtyaṃ dhūrtena paribhūtayā || 9 ||
[Analyze grammar]

kāpālikena kṣudreṇa śmaśāne nityavāsinā |
bhūtyā vilipta svāṃgena mātṛmadhyastha cāriṇā || 10 ||
[Analyze grammar]

niśamya tasyā vacanaṃ kopatīkṣṇākṣaraṃ haraḥ |
uvācāniṣṭasaṃbhrāṃtaḥ pracaleneṃdumaulinā || 11 ||
[Analyze grammar]

śarva uvāca |
agātmajāsi girije nāhaṃ niṃdāparastava |
cāṭūktibudhyā tu mayā kṛta unmādasaṃśrayaḥ || 12 ||
[Analyze grammar]

vikalpaḥ svasthacitte tu girije na mama kramāt |
yadyevaṃ kupitā bhīru tattavāhaṃ na vai punaḥ || 13 ||
[Analyze grammar]

narmavādī bhaviṣyāmi jahi kopaṃ śucismite |
śirasā praṇatenaiṣa racitaste mayāṃjali || 14 ||
[Analyze grammar]

ni hīno hyapamānena niṃdite naiti vikriyām |
asatāṃ tu satāṃ na syānmarmaspṛṣṭo naraḥ kila || 15 ||
[Analyze grammar]

anekaiścāṭubhirdevī devena pratibodhitā |
kopaṃ tīvraṃ na tatyāja satī marmaṇi ghaṭṭitā || 16 ||
[Analyze grammar]

avaṣṭabdhamathācchidya vāsaḥ śaṃkarapāṇinā |
viparyastālakāvegādgantumaicchacca śailajā || 17 ||
[Analyze grammar]

tasyā vrajaṃtyāḥ kopena punarāha purāṃtakaḥ |
satyaṃ sarvairavayavaistanoṣi sadṛśāṃ pituḥ || 18 ||
[Analyze grammar]

himācalasya śṛṃgasthameva jālākulaṃ manaḥ |
tathā duravagāhyebhyo gahano hi tavāśayaḥ || 19 ||
[Analyze grammar]

kāṭhinyamaśmasārebhyo vanebhyo bahulāṃ gatā |
kuṭilatvaṃ nimnagābhyo duḥsevyatvaṃ himādapi || 20 ||
[Analyze grammar]

saṃkrāṃtaṃ sarvamevaitattanvaṃgi himabhūdharāt |
ityuktā sā punaḥ prāha giriśaṃ śailakanyakā || 21 ||
[Analyze grammar]

kopakaṃpitamūrddhā sā prasphuraddaśanacchadā |
umovāca |
syātsarvaṃ doṣadānena niṃdāyāṃ guṇino balāt || 22 ||
[Analyze grammar]

tavāpi duṣṭasaṃparkātsaṃkrāṃtaṃ sarvameva hi |
vyālebhyonekajihvatvaṃ bhasmano'snehavṛttitā || 23 ||
[Analyze grammar]

hṛtkāluṣyaṃ śaśāṃkotthaṃ durbādhatvaṃ viṣādapi |
kiṃ cātra bahunoktena alaṃ vācāṃ śrameṇa te || 24 ||
[Analyze grammar]

śmaśānavāsānnirbhīstvaṃ nagnatvāttavanatrapā |
nirghṛṇatvaṃ kapālitvāddayā te vigatā ciram || 25 ||
[Analyze grammar]

ityuktvā maṃdirāttasmānnirjagāma himādrijā |
tasyāṃ vrajaṃtyāṃ deveśyāṃ gaṇaiḥ kilakilākṛtā || 26 ||
[Analyze grammar]

kva mātargacchasītyuktvā rudadbhirdhāvitaṃ punaḥ |
viṣṭabhya caraṇau devyā vīrako bāṣpagadgadaḥ || 27 ||
[Analyze grammar]

provāca mātaḥ kinnvetatkva yāsi kupitāturā |
ahaṃ tvāmanuyāsyāmi vrajaṃtīṃ snehavarjitām || 28 ||
[Analyze grammar]

nocetpatiṣye śikharādgirerasya tvayojjhitaḥ |
unnamyavadanaṃ devī dakṣiṇena tu pāṇinā || 29 ||
[Analyze grammar]

uvāca vīrakaṃ mātā tvaṃ śokaṃ putra mā kṛthāḥ |
śailāgrātpatituṃ naiva na ca gaṃtuṃ mayā saha || 30 ||
[Analyze grammar]

yuktaṃ te putra gacchāmi yena kāryeṇa tacchṛṇu |
kṛṣṇetyuktā hareṇāhaṃ staṃbhitāsmyavamānitā || 31 ||
[Analyze grammar]

sāhaṃ tapaḥ kariṣyāmi yena gaurītvamāpnuyām |
eṣa strīlaṃpaṭo devo yātāyāṃ mayyanaṃtaram || 32 ||
[Analyze grammar]

dvārarakṣā tvayā kāryā nityaṃ randhrānvavekṣaṇam |
yathā na kācitpraviśedyoṣittatra harāṃtikam || 33 ||
[Analyze grammar]

dṛṣṭvā parastriyaṃ cāpi vadethā mama putraka |
śīghrameva kariṣyāmi yathāyuktamanaṃtaram || 34 ||
[Analyze grammar]

evamastviti deveśīṃ vīrakovāca sāṃpratam |
māturājñāmṛtāhāra plāvitāṃgo gatajvaraḥ || 35 ||
[Analyze grammar]

jagāma rakṣāṃ sa draṣṭuṃ praṇipatya tu mātaram |
devī cāpaśyadāyāṃtīṃ sakhīṃ māturvibhūṣitām || 36 ||
[Analyze grammar]

kusumāmohinīṃ nāma tasya śailasya devatām |
sāpi dṛṣṭvā girisutāṃ snehaviklavamānasā || 37 ||
[Analyze grammar]

kva putri gacchasītyuccairāligyovāca devatā |
sā tasyāḥ sarvamācakhyau śaṃkarātkopakāraṇam || 38 ||
[Analyze grammar]

punaścovācagirijā devatāṃ mātṛsaṃmitām |
umovāca |
nityaṃ śailādhirājasya devatātvamaniṃdite || 39 ||
[Analyze grammar]

sarvataḥ sannidhānaṃ te manasātīva vatsalā |
atastu te pravakṣyāmi yadvidheyaṃ tvayāṃbike || 40 ||
[Analyze grammar]

anyastrīsaṃpraveśastu tvayā rakṣyaḥ prayatnataḥ |
sarahasye prayatnena niṣevyaḥ satataṃ girau || 41 ||
[Analyze grammar]

pinākinaḥ praviṣṭāyāṃ vaktavyaṃ me tvayānaghe |
tatohaṃ saṃvidhāsyāmi yatkṣamaṃ tadanaṃtaram || 42 ||
[Analyze grammar]

ityuktā tāṃ tathetyukttvā jagāma sā giriṃ śubhā |
umāpi piturudyānaṃ jagāmādrisutādbhutam || 43 ||
[Analyze grammar]

aṃtarikṣaṃ samāviśya meghamālāvilaprabham |
bhūṣaṇāni tato nyasya vṛkṣavalkaladhāriṇī || 44 ||
[Analyze grammar]

grīṣme paṃcāgnisaṃtaptā varṣāsu ca jaloṣitā |
vanyāhārā nirāhārā śuṣkasthaṃḍilaśāyinī || 45 ||
[Analyze grammar]

evaṃ sādhayatī tatra tapaḥ sā ca vyavasthitā |
jñātvā gatāṃ girisutāṃ daityastatrāṃtare balī || 46 ||
[Analyze grammar]

aṃdhakasya suto hṛṣṭaḥ piturvadhamanusmaran |
devānsarvānvijityājau bakabhrātā raṇotkaṭaḥ || 47 ||
[Analyze grammar]

āḍirnāmāṃtaraprekṣīsatataṃcaṃdramaulinaḥ |
ājagāmāmararipuḥ puraṃ tripuraghātinaḥ || 48 ||
[Analyze grammar]

sa tatrāgatya dadṛśe vīrakaṃ dvāryavasthitam |
viciṃtya sopi ca varaṃ dattaṃ kamalayoninā || 49 ||
[Analyze grammar]

hate kilāṃdhake daitye giriśenāsuradviṣā |
āḍiścakāra vipulaṃ tapaḥ paramadāruṇam || 50 ||
[Analyze grammar]

samāgatyābravīdbrahmā tapasā paritoṣitaḥ |
kimāḍe dānavaśreṣṭha tapasā prāptumicchasi || 51 ||
[Analyze grammar]

brahmāṇamāha daityastu nirmṛtyutvamahaṃ vṛṇe |
brahmovāca |
jātānāmiha saṃsāre vinā mṛtyuṃ na yujyate || 52 ||
[Analyze grammar]

yatastatopi daityeṃdra mṛtyuḥ prāpyaśśarīribhiḥ |
ityukto daityasiṃhastu provācāṃbujasaṃbhavam || 53 ||
[Analyze grammar]

rūpasyaparivarto me yadā syātpadmasaṃbhava |
tadā mṛtyurmama bhavedanyathā tvamarosmyaham || 54 ||
[Analyze grammar]

ityuktastu tadovāca tuṣṭaḥ kamalasaṃbhavaḥ |
yadā dvitīyo rūpasya vivarttaste bhaviṣyati || 55 ||
[Analyze grammar]

tadā te bhavitā mṛtyuranyathā na bhaviṣyati |
ityuktomaratāṃ mene daityasūnurmahābalaḥ || 56 ||
[Analyze grammar]

tasminkāle tvasaṃsmṛtya tadvadhopāyamātmanaḥ |
pratiharturdṛṣṭipathe vīrakasyābhavaṃstadā || 57 ||
[Analyze grammar]

bhujaṃgarūpī raṃdhreṇa praviveśa dṛśaḥpatham |
parihṛtya gaṇeśasya dānavo raudradurjayaḥ || 58 ||
[Analyze grammar]

alakṣito gaṇeśena praviśyātha parāṃ tanum |
bhujaṃgarūpaṃ saṃtyajya jagrāhātha mahāsuraḥ || 59 ||
[Analyze grammar]

umārūpaṃ ramayituṃ giriśaṃ mūḍhacetanaḥ |
kṛtvā māyāmayaṃ rūpamapratarkyaṃ manoharam || 60 ||
[Analyze grammar]

sarvairavayavaiḥ pūrṇaṃ sarvābhijñānabṛṃhitam |
kṛtvā bhagāṃtare daṃtaṃ daityo vajramayaṃ dṛḍham || 61 ||
[Analyze grammar]

tīkṣṇāgraṃ buddhimohena giriśaṃ haṃtumudyataḥ |
kṛtvomārūpasaṃsthānaṃ gato daityo harāṃtikam || 62 ||
[Analyze grammar]

pāpo ramyākṛtiścitra bhūṣaṇāṃbarasaṃyutaḥ |
taṃ dṛṣṭvā giriśastuṣṭastamāliṃgya mahāsuram || 63 ||
[Analyze grammar]

manyamāno girisutāṃ sarvairavayavāṃtaraiḥ |
apṛcchatsādhubhāvaṃ te giriputri na kṛtrimam || 64 ||
[Analyze grammar]

yā tvaṃ madāśayaṃ jñātvā prāpteha varavarṇinī |
tvayā virahitaṃ śūnyaṃ mama sthānaṃ jagattrayam || 65 ||
[Analyze grammar]

prāptā prasannavadane yuktamevaṃvidhaṃ tvayi |
ityukto dānaveṃdrastu taṃ babhāṣe smitaṃ śanaiḥ || 66 ||
[Analyze grammar]

sa cābudhyadabhijñānaiḥ prāha tripuraghātinam |
daitya uvāca |
yātāsmi tapasaḥ kāmādvaraṃ labdhuṃ himācalam || 67 ||
[Analyze grammar]

ratiśca tatra menābhūttataḥ prāptā tvadaṃtikam |
ityuktaḥ śaṃkaraḥ śaṃkāṃ citte prāpto vicārayan || 68 ||
[Analyze grammar]

hṛdayena samādhāya devaḥ prahasitānanaḥ |
kupitā kupitaṃ buddhvā prakṛtyā ca dṛḍhavratā || 69 ||
[Analyze grammar]

aprāptakāmā saṃprāptā kimetatsaṃvijānatī |
iti ciṃtya harastasyā abhijñānaṃ vicārayan || 70 ||
[Analyze grammar]

nāpaśyadvāmapārśve tu tadaṃkaṃ padmalakṣaṇam |
lomnāmāvartaracitaṃ tato devaḥ pinākadhṛk || 71 ||
[Analyze grammar]

buddhvā tāṃ dānavīṃ māyāmākāraṃ gūhayaṃstataḥ |
meḍhradaṃṣṭrāstramādāya dānavaṃ tamasādayat || 72 ||
[Analyze grammar]

na cābudhyata tadvṛttaṃ vīrako dvārarakṣakaḥ |
kusumāmodinaṃ dṛṣṭvā strīrūpaṃ dānaveśvaram || 73 ||
[Analyze grammar]

dūtena mārutenāśu bodhitā himaśailajā |
śrutvā vāyumukhāddevī krodharaktāvilekṣaṇā || 74 ||
[Analyze grammar]

apaśyadvīrakaṃ putraṃ hṛdayenaiva dūyatā |
devyuvāca |
mātaraṃ māṃ parityajya yasmāttvaṃ snehaviklavām || 75 ||
[Analyze grammar]

vihitāvasaraḥ strīṇāṃ śaṃkarasya rahovidhau |
tasmātte mānuṣe rūkṣā jaḍā hṛdayavarjitā || 76 ||
[Analyze grammar]

gaṇeśākārasadṛśī śilā mātā bhaviṣyati |
nimitta eṣa vikhyāto vīrakasya sutādarāt || 77 ||
[Analyze grammar]

saṃbhave prakrame caiva vicitrākhyā na saṃśayaḥ |
evamutsṛṣṭaśāpāyāṃ giriputryāmanaṃtaraṃ || 78 ||
[Analyze grammar]

nirjagāma mukhātkrodhaḥ siṃharūpī mahābalaḥ |
sa tu siṃhaḥ karālāsyaḥ saṭājaṭilakaṃdharaḥ || 79 ||
[Analyze grammar]

ūrdhvaprodbhūtalāṃgūlo daṃṣṭrotkaṭamukhāvaṭaḥ |
vyāditāsyo laṃbajihvaḥ kṣāmaḥ kukṣibalādiṣu || 80 ||
[Analyze grammar]

asyāsye vartituṃ devī vyavasthitavatī tadā |
jñātvā manogataṃ tasyā bhagavāṃścaturānanaḥ || 81 ||
[Analyze grammar]

ājagāmāśramapadaṃ saṃpadāmāśrayaṃ yataḥ |
āgamyovāca deveśo girijāṃ spaṣṭayā girā || 82 ||
[Analyze grammar]

brahmovāca |
kiṃ punaḥ prāptukāmāsi kimalabhyaṃ dadāmi te |
viramyatāmatikleśāttapasosmānmadājñayā || 83 ||
[Analyze grammar]

tacchrutvovācagirijā gurorgauravayaṃtritaṃ |
vākyaṃ vācāharodgīrṇavarṇanirgamavāṃchitaṃ || 84 ||
[Analyze grammar]

devyuvāca |
tapasā duṣkareṇāptaḥ patirvai śaṃkaro mayā |
samāṃ śyāmalavarṇeti bahuśaḥ proktavānrahaḥ || 85 ||
[Analyze grammar]

tasmādahaṃ kāṃcanābhavarṇā tannāmasaṃyutā |
bharturbhūtapateraṃgamekato nirviṣaṃ bhavet || 86 ||
[Analyze grammar]

tasyāstadbhāṣitaṃ śrutvā provāca jagadīśvaraḥ |
evaṃ bhava tvaṃ bhūyaśca bharturdehārddhacāriṇī || 87 ||
[Analyze grammar]

tatastatyājatāṃ kṛṣṇāṃ phullanīlotpalatvacaṃ |
tvakca sāpyabhavadbhīmā ghaṃṭāhastātrilocanā || 88 ||
[Analyze grammar]

nānābharaṇasaṃpūrṇā pītakauśeyadhāriṇī |
tāmabravīttato brahmā devīṃ nīlāṃbujatviṣaṃ || 89 ||
[Analyze grammar]

niśe bhūdharajā deha saṃparkā tvaṃ madājñayā |
saṃprāptā kṛtakṛtyatvamekānaṃśā puro hyasi || 90 ||
[Analyze grammar]

ya eṣa siṃhaḥ prodbhūto devyāḥ krodhādvarānane |
sa testu vāhanaṃ devi ketau cāstu mahābalaḥ || 91 ||
[Analyze grammar]

gaccha viṃdhyācalaṃ tatra surakāryaṃ kariṣyasi |
paṃcālo nāma yakṣoyaṃ yakṣalakṣapadānugaḥ || 92 ||
[Analyze grammar]

dattaste kiṃkaro devi mayā māyāśatairyutaḥ |
ityuktvā kauśikī devī viṃdhyaśailaṃ jagāma ha || 93 ||
[Analyze grammar]

umāpi prāptasaṃkalpā jagāma giriśāṃtikaṃ |
praviśaṃtīṃ tu tāṃ dvārādapahṛtya samāhitaḥ || 94 ||
[Analyze grammar]

rurodha vīrako devīṃ hemavetralatādharaḥ |
tāmuvāca ca kopena rūpe tu vyabhicāriṇīṃ || 95 ||
[Analyze grammar]

prayojanaṃ na tetrāsti gaccha yāvanna bhakṣyase |
devyārūpadharo daityo devaṃ vaṃcitumāgataḥ || 96 ||
[Analyze grammar]

praviṣṭo na ca dṛṣṭosau sa ca devena ghātitaḥ |
ghātite cāhamājñapto nīlakaṃṭhena kopinā || 97 ||
[Analyze grammar]

dvāre tvanavadhānaṃ te yasmātpaśyāmi vai tataḥ |
bhaviṣyasi na me dvāstho varṣapūgānanekaśaḥ || 98 ||
[Analyze grammar]

ataste nātra dāsyāmi praveśaṃ gamyatāṃ drutam |
ekāṃ muktvā girisutāṃ mātaraṃ snehavatsalām || 99 ||
[Analyze grammar]

praveśaṃ labhate nānyā nārī kamalalocane |
ityuktvā tu tadā devī ciṃtayāmāsa cetasā || 100 ||
[Analyze grammar]

nārī naiva sa daiteyo vāyurme yāmabhāṣata |
vṛthaiva vīrakaśśapto mayā krodhaparītayā || 101 ||
[Analyze grammar]

akāryaṃ kriyate mūḍhaiḥ prāyaḥ krodhasamanvitaiḥ |
krodhena naśyate kīrtiḥ krodho haṃti sthitāṃ śriyam || 102 ||
[Analyze grammar]

aparicchinnatatvārthā putraṃ śāpitavatyahaṃ |
viparītārthabuddhīnāṃ sulabho vipadāgamaḥ || 103 ||
[Analyze grammar]

saṃciṃtyaivamuvācedaṃ vīrakaṃ prati śailajā |
sajjalajjāvikāreṇa vadanenāmbujatviṣā || 104 ||
[Analyze grammar]

devyuvāca |
ahaṃ vīraka te mātā na testu manaso bhramaḥ |
śaṃkarasyāsmi dayitā sutā tuhinabhūbhṛtaḥ || 105 ||
[Analyze grammar]

mama gātracchavibhrāṃtyā mā śaṃkāṃ putra dhāraya |
tuṣṭena gauratā dattā mameyaṃ padmajanmanā || 106 ||
[Analyze grammar]

mayā śaptosyavidite vṛttāṃte daityanirmite |
jñātvā nārīpraveśaṃ tu śaṃkare rahasi sthite || 107 ||
[Analyze grammar]

nanivartayituṃ śakyaḥ śāpaḥ kiṃtu bravīmi te |
śīghrameṣyasi mānuṣyātsarvakāmasamanvitaḥ || 108 ||
[Analyze grammar]

śirasā tu tato vaṃdya mātaraṃ pūrṇamānasaḥ |
uvāca sādhvīṃ pūrṇendu dyutiṃ tuhinaśailajāṃ || 109 ||
[Analyze grammar]

vīraka uvāca |
natasurāsuramaulilasanmaṇipravarakāṃtikarālinakhāṅghrike |
nagasute śaraṇāgatavatsale navanamovanatārttivināśini || 110 ||
[Analyze grammar]

tapanamaṃḍalamaṃḍitakaṃdhare pṛthusuvarṇanagadyutihārike |
viṣamabhaṃgaviṣaṃgamabhīṣito girisute bhavatīmahamāśraye || 111 ||
[Analyze grammar]

jagatikāpraṇatābhimatā dadau jhaṭiti siddhimṛte bhavatīṃ yathā |
jagatikāṃ praṇamecchaśiśekharo bhuvanabhṛnmunayo bhavatīṃ yathā || 112 ||
[Analyze grammar]

vimalayogavinirmitadurjaye sutanutulyamaheśvaramaṃḍalī |
vidalitāṃdhakabāṃdhavasaṃhatiḥ suravaraiḥ prathamaṃ tvamabhiṣṭutā || 113 ||
[Analyze grammar]

sitasaṭāpaṭaloddhatakaṃdharābhavamahāmṛgarājarayasthitā |
vimalaśaktimukhānalapiṃgalā yatabhujaughanipiṣṭamahāsurā || 114 ||
[Analyze grammar]

nigaditā bhuvanairaticaṃḍikājananiśuṃbhaniśuṃbhaniṣūdinī |
praṇataciṃtitadā bhavadā navapraśamanaikaratistarasā bhuvi || 115 ||
[Analyze grammar]

viyativāyupathe jvalanākulevanitale tava devi ca yadvapuḥ |
tadajitepratime praṇamāmyahaṃ bhuvanabhāvinite bhavavallabhe || 116 ||
[Analyze grammar]

jaladhayo lalitoddhatavīcayo hutavaho dyutidagdhacarācaraḥ |
phaṇasahasrabhṛtaśca bhujaṃgamāstvamabhidhāsyasi māmabhayaṃkarā || 117 ||
[Analyze grammar]

bhagavati sthirabhaktajanāśraye pratigato bhavatīcaraṇāśrayaṃ |
karaṇajātamihāstu mamāśravaitavavilāsamukhānubhavāsyadam || 118 ||
[Analyze grammar]

suprasannā tato devī vīrakasyeti saṃstutā |
praviveśa śubhaṃbharturbhuvanaṃ bhūdharātmajā || 119 ||
[Analyze grammar]

dvāsthopi vīrako devānharadarśanakāṃkṣiṇaḥ |
vyasarjayatsvakāneva gṛhānādarapūrvakaṃ || 120 ||
[Analyze grammar]

nāstyatrāvasaro devā devyāḥ saha vṛṣākapiḥ |
nibhṛtaḥ krīḍatītyuktā yayuste ca yathāgataṃ || 121 ||
[Analyze grammar]

gate varṣasahasre tu devāstvaritamānasāḥ |
jvalanaṃ codayāmāsurjñātuṃ śaṃkaraceṣṭitaṃ || 122 ||
[Analyze grammar]

praviśya pakṣiraṃdhreṇa śukarūpī hutāśanaḥ |
dadarśa śayane sarvaṃ ratau girijayā saha || 123 ||
[Analyze grammar]

dadarśa taṃ ca deveśo hutāśaṃ śukarūpiṇaṃ |
tamuvāca mahādevaḥ kiṃcitkopasamanvitaḥ || 124 ||
[Analyze grammar]

śarva uvāca |
niṣiktamardhaṃ devyāṃ me vīryaṃ ca śukavigraha |
lajjayā viratiścāsya tvamardhaṃ piba pāvaka || 125 ||
[Analyze grammar]

yasmāttu tvatkṛte vighnaṃ tasmāttvayyupapadyate |
ityuktaḥ prāñjalirvahnirapibadvīryamāhitaṃ || 126 ||
[Analyze grammar]

tenāplutāstato devāstanmukhā ṛbhavo yataḥ |
vipāṭya jaṭharaṃ teṣāṃ vīryaṃ māheśvaraṃ tataḥ || 127 ||
[Analyze grammar]

niṣkrāṃtaṃ taptahemābhaṃ vitate śaṃkarāśrame |
tasminsaro mahajjātaṃ vimalaṃ bahuyojanaṃ || 128 ||
[Analyze grammar]

protphullahemakamalaṃ nānāvihaganāditam |
tacchrutvā tu saro devī jātaṃ hemamahāṃbujam || 129 ||
[Analyze grammar]

jagāma kautukāviṣṭā tatsaraḥ kanakāṃbujam |
tatra kṛtvā jalakrīḍāṃ tadabjakṛtaśekharā || 130 ||
[Analyze grammar]

upaviṣṭā tatastasya tīre devī sakhīvṛtā |
pātukāmā ca tattoyaṃ svādunirmalapaṃkajam || 131 ||
[Analyze grammar]

apaśyatkṛttikāstāssa ṣaḍarkadyutisannibhāḥ |
padmapatre tu tadvāri gṛhītvā prasthitā gṛham || 132 ||
[Analyze grammar]

harṣātsovāca pāsyāmi padmapatre sthitaṃ payaḥ |
tataḥstā ūcurakhilāḥ kṛttikā himaśailajām || 133 ||
[Analyze grammar]

kṛttikā ūcuḥ |
dāsyāmo dayite garbhe saṃbhūto yo bhaviṣyati |
sosmākamapi putraḥ syādasmattrātā ca vṛttimān || 134 ||
[Analyze grammar]

triṣu lokeṣu vikhyātaḥ sarveṣvapi śubhānane |
ityuktovāca girijā kathaṃ madgātrasaṃbhavaiḥ || 135 ||
[Analyze grammar]

sarvairavayavairyukto bhavatībhyaḥ suto bhavet |
tatastāṃ kṛttikā ūcurvidhāsyāmosya vai vayam || 136 ||
[Analyze grammar]

uttamānyuttamāṃgāni yadyevaṃ tu bhaviṣyati |
uktā vai śailajā prāha bhavatvevamaniṃditāḥ || 137 ||
[Analyze grammar]

tatastu harṣasaṃpūrṇā padmapatrasthitaṃ payaḥ |
tasyai dadustayā cāpi tatpītaṃ kramaśo jalam || 138 ||
[Analyze grammar]

pīte tu salile caiva tasminneva kṣaṇe varaḥ |
vipāṭya devyāśca tato dakṣiṇaṃ kukṣimudgataḥ || 139 ||
[Analyze grammar]

niścakrāmādbhuto bālo rogaśokavināśanaḥ |
prabhākarakaravrāta prakāraprakaraprabhuḥ || 140 ||
[Analyze grammar]

gṛhītanirmalodagra śaktiśūlāṃkuśonalaḥ |
dīpto mārayituṃ daityānutthitaḥ kanakacchaviḥ || 141 ||
[Analyze grammar]

etasmātkāraṇādeva kumāraścāpi sobhavat |
vāmaṃ vidārya niṣkrāṃtastato devyāḥ punaḥ śiśuḥ || 142 ||
[Analyze grammar]

skaṃdotha vadanādvahneḥ śubhrātṣaḍvadanorihā |
kṛttikāsalilādeva śākhābhiḥ saviśeṣataḥ || 143 ||
[Analyze grammar]

śākhāḥ śivāḥ samākhyātāḥ ṣaṭsuvaktreṣu vistṛtāḥ |
yatastato viśākhosau khyāto lokeṣu ṣaṇmukhaḥ || 144 ||
[Analyze grammar]

skaṃdo viśākhaḥ ṣaḍvaktraḥ kārtikeyaśca viśrutaḥ |
pakṣe caitrasya bahule paṃcadaśyāṃ mahābalau || 145 ||
[Analyze grammar]

saṃbhūtāvarkasadṛśau viśāle śarakānane |
site pakṣe tu paṃcamyāṃ tathaitau pāvakānalau || 146 ||
[Analyze grammar]

bālakābhyāṃ cakāraikaṃ saṃdhyāyāmeva bhūtaye |
tasyāmeva tataḥ ṣaṣṭhyāmabhiṣikto guhaḥ prabhuḥ || 147 ||
[Analyze grammar]

sarvairamarasaṃghātairbrahmopeṃdreṃdra bhāskaraiḥ |
gaṃdhamālyaiḥ śubhairdhūpaistathā krīḍanakairapi || 148 ||
[Analyze grammar]

chatraiścāmarajālaiśca bhūṣaṇaiśca vilepanaiḥ |
abhiṣikto vidhānena yathāvatṣaṇmukhaḥ prabhuḥ || 149 ||
[Analyze grammar]

sutāmasmai dadau śakro devaseneti viśrutām |
patnyarthaṃ devadeveśo dadau viṣṇurathāyudham || 150 ||
[Analyze grammar]

yakṣāṇāṃ daśalakṣāṇi dadāvasya dhanādhipaḥ |
dadau hutāśanastejo dadau vāyuśca vāhanam || 151 ||
[Analyze grammar]

dadau krīḍanakaṃ tvaṣṭā kukkuṭaṃ kāmarūpiṇam |
evaṃ surāstu te sarve parivāramanantakam || 152 ||
[Analyze grammar]

dadurmuditacetaskāḥ skaṃdāyādityavarcase |
jānubhyāmavanau sthitvā surasaṃghāstamastuvan || 153 ||
[Analyze grammar]

stotreṇānena varadaṃ ṣaṇmukhaṃ mukhyaśaḥ surāḥ |
devā ūcuḥ |
namaḥ kumārāya mahāprabhāya skaṃdāya cāskaṃditadānavāya || 154 ||
[Analyze grammar]

navārkabiṃbapratimaprabhāva namostu guhyāya guhāya tubhyam |
namostu te lokabhayāpahāya namostu te lokakṛpāparāya || 155 ||
[Analyze grammar]

namo viśālāmalalocanāya namo viśākhāya mahāvratāya |
namo namastestu raṇotkaṭāya namo mayūrojjvalavāhanāya || 156 ||
[Analyze grammar]

namostu keyūradharāya tubhyaṃ namo dhṛtodagrapatākine te |
namaḥ prabhāvapraṇatāya testu namo'stu ghaṃṭādharadhairyaśāline || 157 ||
[Analyze grammar]

kumāra uvāca |
kaṃ vaḥ kāmaṃ prayacchāmi bhavaṃto brūtanirvṛtāḥ |
yadyapya sādhyaṃ kṛtyaṃ no hṛdaye ciṃtitaṃ ciram || 158 ||
[Analyze grammar]

ityuktāstu surāstena procuḥ praṇatamaulayaḥ |
sarva eva mahātmānaṃ guhaṃ muditamānasāḥ || 159 ||
[Analyze grammar]

daityeṃdrastārako nāma sarvāmarakulāṃtakṛt |
balavāndurjayastīkṣṇo durācārotikopanaḥ || 160 ||
[Analyze grammar]

tameva jahi durdharṣaṃ daityaṃ sarvavināśanam |
upasthitaḥ kṛtyaśeṣo hyasmākaṃ ca bhayāvahaḥ || 161 ||
[Analyze grammar]

hiraṇyakaśipuścogro hyavadhyo devatāgaṇaiḥ |
yajñaghnaḥ pāpakarmā vai yena brahmāpi tāpitaḥ || 162 ||
[Analyze grammar]

etau harasva bhadraṃ te tāvakaṃ ca mahābalam |
evamuktastathetyuktvā sarvāmarapadānugaḥ || 163 ||
[Analyze grammar]

jagāma jagatāṃnāthastūyamānomareśvaraiḥ |
tārakasya vadhārthāya jagatāṃ kaṃṭakasya ca || 164 ||
[Analyze grammar]

tataśca preṣayāmāsa śakro gūḍhasamāśrayaḥ |
dūtaṃ dānavasiṃhasya paruṣākṣaravādinam || 165 ||
[Analyze grammar]

sa tu gatvābravīddaityamabhayo bhīmadarśanam |
dūta uvāca |
śakrastvāmāha deveśo daityaketuṃ divaspatiḥ || 166 ||
[Analyze grammar]

tārakāsura tacchaktyā ghaṭayasva yathecchayā |
yajjagajjvalanoddīptaṃ kilbiṣaṃ ca tvayā kṛtam || 167 ||
[Analyze grammar]

tasyāhaṃ sādakastedya rājāsmi bhuvanatraye |
śrutvaitadadbhutaṃ vākyaṃ kopasaṃraktalocanaḥ || 168 ||
[Analyze grammar]

uvāca dūtaṃ duṣṭātmā naṣṭaprāyavibhūtikaḥ |
tāraka uvāca |
dṛṣṭaṃ te pauruṣaṃ śakra śataśotha mahāraṇe || 169 ||
[Analyze grammar]

nistrapatvānna te śāṃtirvidyate śakra durmate |
evamukte gate dūte ciṃtayāmāsa dānavaḥ || 170 ||
[Analyze grammar]

nālabdhasaṃśrayaḥ śakro vaktumevamihārhati |
jātaḥ skaṃdodhunā śakrājjñāyate samupāśrayāt || 171 ||
[Analyze grammar]

nimittaughāṃstadā duṣṭānsopaśyannāśavedinaḥ |
pāṃsuvarṣamasṛkpātaṃ gaganādavanītale || 172 ||
[Analyze grammar]

vāmanetraprakaṃpaṃ ca vaktraśoṣaṃ manomayam |
svakānāṃ vaktrapadmānāṃ mlānatāṃ ca vyalokayat || 173 ||
[Analyze grammar]

duṣṭāṃśca prāṇino raudrānsopaśyadduṣṭavādinaḥ |
tadaciṃtyaiva ditijo nyastacittobhavatkṣaṇāt || 174 ||
[Analyze grammar]

yāvadgajaghaṭāghaṃṭā ghanatkāraravotkaṭām |
tadvatturaṃgasaṃghātaheṣotsāhavibhūṣitām || 175 ||
[Analyze grammar]

sainyaissenāntarodagra dhvajarājairvirājitām |
vimānaiścādbhutākāraiścalitāmalacāmaraiḥ || 176 ||
[Analyze grammar]

vibhūṣaṇapinaddhāṃ ca kinnarodgītanāditām |
nānā nākatarūtphulla kusumāpīḍadhāriṇīm || 177 ||
[Analyze grammar]

viśokāstraparisphāra carmanirmaladarśinīṃ |
vidyutpuṣṭadyutidharāṃ nānāvādyavināditām || 178 ||
[Analyze grammar]

senāṃ nākasadāṃ daityaḥ prāsādastho vyalokayat |
saciṃtayāmāsa tadā kiṃcidvibhrāṃtamānasaḥ || 179 ||
[Analyze grammar]

apūrvaḥ ko bhavedyoddhā yo mayā na vinirjitaḥ |
tataściṃtākulo daityaḥ śuśrāva kaṭukākṣaram |
siddhavaṃdibhirudghuṣṭamidaṃ hṛdayadāruṇam || 180 ||
[Analyze grammar]

jayātulaśaktidīdhitipaṃjarabhujadaṃḍapracaṃḍatara |
rabhasasuravadanakumudavikāsanavilāsanetra kumāravara || 181 ||
[Analyze grammar]

jaya ditijakulamahodadhi baḍavānala madhuramayūraratha suramakuṭa koṭi kuṃcita caraṇa nakhāṃkura mahāsena || 182 ||
[Analyze grammar]

jaya calitalalita cūḍākalāpanavavimalakamala |
daṃḍakāṃta daityeśavaṃśa duḥsaha dāvānala || 183 ||
[Analyze grammar]

jaya viśākhavibhojaya bālasaptavāsara bhuvanāliśokaśamana jaya sakalaloka ditisutadhuraṃdharanāśaka skaṃda || 184 ||
[Analyze grammar]

śrutvaitattārakaḥ sarvamudghuṣṭaṃ devavaṃdibhiḥ |
sasmāra brahmaṇo vākyaṃ vadhaṃ bālādupasthitaṃ || 185 ||
[Analyze grammar]

smṛtvā dharmaughavidhvaṃsī sadā vīrapadānugaḥ |
maṃdirānnirjagāmāśu śokagrastena cetasā || 186 ||
[Analyze grammar]

kālanemimukhā daityāḥ saṃtrastā bhrāṃtacetasaḥ |
sveṣvanīkeṣu ca tadā tvarā vismitacetasaḥ || 187 ||
[Analyze grammar]

hiraṇyakaśipuḥ prāha dānavānāṃ dhuraṃdharaḥ |
trapākaraṃ bhavenmahyaṃ bālasyāsya palāyanam || 188 ||
[Analyze grammar]

yadyahaṃ haṃtave yāmi sopi vai kamalāśritaḥ |
hatvāhaṃ bālakaṃ cainaṃ duḥsparśaḥ syāmakāraṇaṃ || 189 ||
[Analyze grammar]

yāta dhāvata gṛhṇīta yojayadhvaṃ varūthinīm |
kumāraṃ tārako dṛṣṭvā babhāṣe bhīṣaṇākṛtiḥ || 190 ||
[Analyze grammar]

kiṃ bāla yoddhukāmosi krīḍakaṃdukalīlayā |
yenātapo nisṛṣṭaste satsaṃgaravibhāṣaka || 191 ||
[Analyze grammar]

bālatvādatha te buddhirevaṃ svalpārthadarśinī |
kumāropi tamagrasthaṃ babhāṣe harṣavattamaṃ || 192 ||
[Analyze grammar]

śṛṇu tāraka śāstrārtha iha naiva nirūpyate |
śastrairarthā na dṛśyaṃte samare nirbharaṃ bhaye || 193 ||
[Analyze grammar]

śiśutvaṃ māvamaṃsthā me śiśuḥ kaṣṭo bhujaṃgamaḥ |
duṣprekṣo bhāskaro bālastathāhaṃ durjayaḥ śiśuḥ || 194 ||
[Analyze grammar]

alpākṣaro na maṃtraḥ kiṃ sasphuro daitya dṛśyate |
kumāre proktavatyevaṃ daityaścikṣepa mudgaraṃ || 195 ||
[Analyze grammar]

kumārastaṃ nirāsograṃ cakreṇāmoghavarcasā |
tataścikṣepa daityeṃdro bhiṃdipālamayomayaṃ || 196 ||
[Analyze grammar]

kareṇa taṃ ca jagrāha kārtikeyomarārihā |
gadāṃ mumoca daityāya samutthāya kharasvanām || 197 ||
[Analyze grammar]

tayā hatastato daityaścakampecalarāḍiva |
mene ca durjayaṃ daityastadābālaṃ suduḥsahaṃ || 198 ||
[Analyze grammar]

ciṃtayāmāsa buddhyā vai prāptaḥ kālo na saṃśayaḥ |
kaṃpitaṃ ca samālokya kālanemi purogamāḥ || 199 ||
[Analyze grammar]

sarve detyaiśvarā jaghnuḥ kumāraṃ raṇadāruṇaṃ |
sa taiḥ prahārairaspṛṣṭastathā klaiśairmahādyutiḥ || 200 ||
[Analyze grammar]

sa bālo balibhirvegairayudhyaddānavai raṇe |
raṇaśauṇḍāśca daityeṃdrā puḥnarjaghnuḥ śilīmukhaiḥ || 201 ||
[Analyze grammar]

kumāraṃ samare daityā balino devakaṃṭakāḥ |
kumārasya vyathā nābhūddaityāstranihatasya tu || 202 ||
[Analyze grammar]

prāṇāṃtakaraṇaṃ jātaṃ devānāṃ dānavā havaṃ |
devānnipīḍitāndṛṣṭvā kumāraḥ kopamāviśat || 203 ||
[Analyze grammar]

tatostrairdārayāmāsa dānāvānāmanīkinīm |
tairastrairniṣpratīkāraistāḍitāssurakaṃṭakāḥ || 204 ||
[Analyze grammar]

kālanemimukhāḥ sarve raṇe hyāsanparāṅmukhāḥ |
vidruteṣu ca daityeṣu prahateṣu samaṃtataḥ || 205 ||
[Analyze grammar]

kinnarodgāragītaiśca hāsyasanyastacetanaḥ |
jaghne kumāraṃ gadayā niṣṭaptakanakatviṣā || 206 ||
[Analyze grammar]

śarairmayūraṃ citraiśca cakāra vimukhaṃ raṇe |
dṛṣṭvā parāḍmukho devo muktaraktaṃ svavāhanam || 207 ||
[Analyze grammar]

jagrāha śaktiṃ vimalāṃ raṇe kanakabhūṣaṇām |
bāhunā hemakeyūra rucireṇa ṣaḍānanaḥ || 208 ||
[Analyze grammar]

tatobravīnmahāsenastārakaṃ dānavādhipam |
tiṣṭhatiṣṭha sudurbuddhe yamalokaṃ vilokaya || 209 ||
[Analyze grammar]

hato hyasi mayā śaktyā smara svaṃ daityaceṣṭitam |
ityuktvā tu tataḥ śaktiṃ mumoca ditijaṃ prati || 210 ||
[Analyze grammar]

sā kumārabhujotsṛṣṭā tatkeyūraravānugā |
bibheda daityahṛdayaṃ vajraśaileṃdrakarkaśam || 211 ||
[Analyze grammar]

gatāsuḥ sa papātorvyāṃ pralaye bhūdharo yathā |
vikīrṇamakuṭoṣṇīṣo visrastākhilabhūṣaṇaḥ || 212 ||
[Analyze grammar]

tasminvinihate daitye dānavānāṃ dhuraṃdhare |
nābhūtkaścittadā duḥkhī narakeṣvapi pāpakṛt || 213 ||
[Analyze grammar]

stuvaṃtaḥ ṣaṇmukhaṃ devāḥ prākrīḍannāgatasmitāḥ |
jagmuḥ svāneva bhuvanānnirasyāsaṃstathotsukāḥ || 214 ||
[Analyze grammar]

daduścāpi varaṃ sarve devāśca ṣaṇmukhaṃ prati |
tuṣṭāḥ saṃprāptasarvārthāssahasiddhaistapodhanaiḥ || 215 ||
[Analyze grammar]

devā ūcuḥ |
yaḥ paṭhetskaṃdasaṃbaṃdhāṃ kathāmetāṃ mahāmatiḥ |
śṛṇuyācchrāvayedvāpi sa bhavetkīrtimānnaraḥ || 216 ||
[Analyze grammar]

bahvāyuḥ subhagaḥ śrīmānkīrtimānśubhadarśanaḥ |
bhūtebhyo nirbhayaścāpi sarvaduḥkhavivarjitaḥ || 217 ||
[Analyze grammar]

saṃdhyāmupāsya yaḥ pūrvāṃ skaṃdasya caritaṃ paṭhet |
sa yuktaḥ kinnaraiḥ sarvairmahādhanapatirbhavet || 218 ||
[Analyze grammar]