Chapter 43

[English text for this chapter is available]

pulastya uvāca |
prādurāsītpratīhāraḥ śubhracīnāṃśukāṃbaraḥ |
sa jānubhyāṃ mahīṃ gatvā pihitāsyaśca pāṇinā || 1 ||
[Analyze grammar]

uvācānāvilaṃ vākyamalpākṣarapariṣkṛtam |
daityeṃdramarkavṛṃdābhaṃ bibhrataṃ bhāsvaraṃ vapuḥ || 2 ||
[Analyze grammar]

kālanemiḥ surānbaddhvā prādāya dvāri tiṣṭhati |
sa vijñāpayati stheyaṃ kva vaṃdini ca yaiḥ prabho || 3 ||
[Analyze grammar]

tanniśamyābravīddaityaḥ pratīhārasya bhāṣitam |
yatheṣṭhaṃ sthīyatāmebhirgṛhaṃ me bhuvanatrayaṃ || 4 ||
[Analyze grammar]

kevalaṃ vāsavaṃ tvekaṃ muṃḍayitvā vimucyatām |
sitavastraparicchannaṃ śunaḥpādena cihnitam || 5 ||
[Analyze grammar]

evaṃ kṛte tato devā dūyamānena cetasā |
jagmurjagadguruṃ draṣṭuṃ śaraṇaṃ kamalodbhavam || 6 ||
[Analyze grammar]

vinirviṇṇāstamāsādya śirobhirddharaṇīṃ gatāḥ |
tuṣṭuvuḥ suṣṭhu varṇāḍhyairvacobhiḥ kamalāsanam || 7 ||
[Analyze grammar]

devā ūcuḥ |
namastvoṃkārāṃkurādiprasūtyai viśvasthānānaṃtabhedasya pūrvam |
saṃbhūtasyānaṃtaraṃ satvamūle saṃhārecchoste namaḥ satvamūrtte || 8 ||
[Analyze grammar]

vyaktīnāṃ tvāmādibhūtaṃ mahimnā cāsmādasmānabhidhānādviciṃtya |
dyāvāpṛthvyorūrddhvalokāṃstathādhaścāṃḍādasmāttvaṃ vibhāgaṃ cakartha || 9 ||
[Analyze grammar]

vyaktaṃ meruryajjarāyustavābhūdevaṃ vidmastvatpraṇītovakāśaḥ |
vyaktaṃ devā jajñire yasya dehāddehasyāṃtaścāriṇo dehabhājaḥ || 10 ||
[Analyze grammar]

dyauste mūrddhā locane caṃdrasūryau vyālāḥ keśāḥ śrotraraṃdhre diśaste |
gātraṃ yajñaḥ siṃdhavaḥ saṃdhayo vai pādau bhūmistūdaraṃ te samudrāḥ || 11 ||
[Analyze grammar]

māyākāraḥ kāraṇaṃ tvaṃ prasiddho vedaiḥ śāṃto jyotirarkastvamuktaḥ |
vedārthena tvāṃ vivṛṇvaṃti buddhyā hṛtpadmāṃtaḥ saṃniviṣṭaṃ purāṇam || 12 ||
[Analyze grammar]

tvāṃ cātmānaṃ labdhayogā gṛṇaṃti sāṃkhyairyāḥ stāḥ saptasūkṣmāḥ praṇītāḥ |
tāsāṃ heturyāṣṭamī cāpi gītā tāsvaṃtastho jīvabhūtastvameva || 13 ||
[Analyze grammar]

dṛṣṭvā mūrttiṃ sthūlasūkṣmāṃcakāra ye vai bhāvāḥ kāraṇe keciduktāḥ |
saṃbhūtāste tvatta evādisarge bhūyastāstvāṃ vāsanāṃ tebhyupeyāḥ || 14 ||
[Analyze grammar]

tvatsaṃketastvaṃtarāyo nigūḍhaḥ kālo'meyo dhvastasaṃkhyāvikalpaḥ |
bhāvābhāvāvyaktisaṃhārahetuḥ so'naṃtastvaṃ tasya kartā nidhānam || 15 ||
[Analyze grammar]

sthūlassarvo'narthabhūtastatonyasso'rthassūkṣmo yo hi tebhyopigītaḥ |
sthūlā bhāvāścāvṛtā yaiśca teṣāṃ tebhyaḥ sthūlastvaṃ purāṇe praṇītaḥ || 16 ||
[Analyze grammar]

bhūtaṃbhūtaṃ bhūtimadbhūtabhāvaṃ bhāvebhāve bhāvitaṃ tvaṃ yunakṣi |
yuktaṃyuktaṃ vyaktibhāvānnirasya sthānesthāne vyaktivṛttiṃ karoṣi || 17 ||
[Analyze grammar]

itthaṃ devo vyaktibhājāṃ śaraṇyastrātā goptā bhāvito'naṃtamūrtiḥ |
viremuramarāstu tvā brahmāṇamiti kāraṇam || 18 ||
[Analyze grammar]

tasthurmanobhiriṣṭārthasaṃprāpti prārthanāstataḥ |
evaṃ stuto viriṃcistu prasādaṃ paramaṃ gataḥ || 19 ||
[Analyze grammar]

amarānvaradopyāha vāmahastena nirdiśan |
brahmovāca |
nārī vā bhartṛkā kasmāddhastasaṃtyaktabhūṣaṇā || 20 ||
[Analyze grammar]

na rājase kutaśśakrā mlānavaktrasaroruhaḥ |
hutāśanaviyuktopi dhūmena na virājase || 21 ||
[Analyze grammar]

tṛṇaughena praticchanno dagdhadāvaściroṣitaḥ |
yamāmayaśarīreṇa kliṣṭo nādya virājase || 22 ||
[Analyze grammar]

daṃḍenālaṃbaneneva kṛṣṭo yena padepade |
rajanīcaranātha tvaṃ kiṃ bhīta iva bhāṣase || 23 ||
[Analyze grammar]

rākṣaseṃndrakṛtādāne tvamarātikṣato yathā |
tanuste varuṇocchuṣkāparītasyeva vahninā || 24 ||
[Analyze grammar]

vimuktarudhiraṃ cātha padaṃ tvaṃ pravilokaya |
vāyo bhavānvicetaskaḥ khaḍgāgrairiva niṣkṛtaḥ || 25 ||
[Analyze grammar]

kiṃ tvaṃ natosi dhanada saṃtyajyeva kuberatāṃ |
rudrāstriśūlinaḥ saṃto'vidadhvaṃ bahuśūratāṃ || 26 ||
[Analyze grammar]

bhavatāṃ kena cākṣiptā tīvratā nastaducyatāṃ |
evamuktāḥ surāstena brahmaṇā brahmavartinā || 27 ||
[Analyze grammar]

vācāṃ pradhānabhūtatvātte mārutamacodayan |
atha śakramukhairdevaiḥ pavanaḥ praticoditaḥ || 28 ||
[Analyze grammar]

prāha devaṃ caturvaktraṃ bhavānvetti carācaraṃ |
purahūtamukhāḥ sabalā nimiṣā vijitāḥ prasabhaṃ kila daityaśataiḥ || 29 ||
[Analyze grammar]

kratavo vihitā bhavatā sthitaye jagatāṃ ca mahādbhutacitraguṇāḥ |
api yajñakṛtaḥ śrutakāmaphalā vihitā ṝṣayastata eva puraḥ || 30 ||
[Analyze grammar]

api nākamabhūtkila yajñabhujāṃ bhavato viniyogavaśātsatatam |
apahṛtyavimānagaṇaṃ sakṛto danujena mahākarabhūmisamaḥ || 31 ||
[Analyze grammar]

kṛtavānasi sarvaguṇātiśayaṃ yamaśeṣamahīdhararājatayā |
makhabhūṣitamaṃśumatāmavadhiṃ suradhāmagiriṃ gaganepi sadā || 32 ||
[Analyze grammar]

adhivāsavihāravidhānucito danujena pariṣkṛtaśṛṃgataṭaḥ |
pravilambitaratnaguhānivaho bahudaityasamāśrayatāṃ gamitaḥ || 33 ||
[Analyze grammar]

asurasya ca tasya bhayena gataṃ saviṣāda śarīranimittatayā |
upabhogyatayādhikṛtaṃ suciraṃ vimaladyutipūritadigvadanaṃ || 34 ||
[Analyze grammar]

bhavataiva vinirmitamādiyuge surahetisamūhavaraṃ kuliśaṃ |
ditijasya śarīramavāpyagataṃ śatadhā matibhedamivālpavidaḥ || 35 ||
[Analyze grammar]

bāṇaiśca yudhi viddhāṃgā dvāri dvāsthairnidarśitāḥ |
labdhapraveśāḥ kṛcchreṇa vayaṃ tasyāmaradviṣaḥ || 36 ||
[Analyze grammar]

sabhāyāmamarādeva prakṛṣyopaniveśitāḥ |
vetrahastairajalpaṃtastathopahasitāḥ paraiḥ || 37 ||
[Analyze grammar]

mahārthāḥ siddhasarvārthā bhavaṃtaḥ svalpabhāṣiṇaḥ |
śāstrayuktamatha brūta māmarā bahubhāṣiṇaḥ || 38 ||
[Analyze grammar]

sabheyaṃ daityasiṃhasya na śakrasya viśṛṃkhalā |
vadadbhiriti daityasya preṣyairvihasitā bahu || 39 ||
[Analyze grammar]

ṝtavo mūrtimaṃtaścāpyaharniśamupāsate |
kṛtāparādhaṃ satrāsaṃ na tyajaṃti kathaṃcana || 40 ||
[Analyze grammar]

taṃtrīlayanayopetaṃ siddhagaṃdharvakinnaraiḥ |
sarāgamupadhāviṣṭaṃ gīyate tasya veśmasu || 41 ||
[Analyze grammar]

kṛtākṛtopakaraṇairmitrādi gurulāghavaḥ |
śaraṇāgatasaṃtyāgī tyaktasatyapratiśrayaḥ || 42 ||
[Analyze grammar]

iti niśśeṣamathavā niśśeṣaṃ kena śakyate |
tasyāvinayamākhyātuṃ sraṣṭā tatra parāyaṇam || 43 ||
[Analyze grammar]

ityuktvā vyaramadvāyuḥ śanairdevaviceṣṭitaṃ |
surānuvāca bhagavāṃstataḥ smitamukhāṃbujaḥ || 44 ||
[Analyze grammar]

brahmovāca |
avadhyastārako daityaḥ sarvairapi surāsuraiḥ |
yasya vadhyassa nādyāpi jātastribhuvane pumān || 45 ||
[Analyze grammar]

mayā sa varadānena chaṃdayitvā nivāritaḥ |
tapasaḥ sāṃprataṃ rājā trailokyadahanātmakaḥ || 46 ||
[Analyze grammar]

sa tu vavre vadhaṃ daityaśśiśutaḥ saptavāsarāt |
sa tu saptadino bālaḥ śaṃkarādyo bhaviṣyati || 47 ||
[Analyze grammar]

tārakasya nihaṃtā sa bhāskarābho bhaviṣyati |
sāṃprataṃ cāpyapatnīkaḥ śaṃkaro bhagavānprabhuḥ || 48 ||
[Analyze grammar]

himācalasya duhitā yā ca devī bhaviṣyati |
tasyāḥ sakāśādyaḥ sūnuraraṇyāḥ pāvako yathā || 49 ||
[Analyze grammar]

janayiṣyati taṃ prāpya tārako na bhaviṣyati |
mayā'bhyupāyaḥ kathito yathaiṣa hi bhaviṣyati || 50 ||
[Analyze grammar]

śeṣaṃ cāpyasya vibhavaṃ vibhajadhvamanaṃtaraṃ |
stokakālaṃ pratīkṣadhvaṃ nirviśaṃkena cetasā || 51 ||
[Analyze grammar]

ityuktāstridaśāstena sākṣātkamalayoninā |
jagmuste praṇipatyeśaṃ yathāyogaṃ divaukasaḥ || 52 ||
[Analyze grammar]

tato yāteṣu deveṣu brahmā lokapitāmahaḥ |
niśāṃ sasmāra bhagavāṃstāṃ devīṃ pūrvasaṃbhavāṃ || 53 ||
[Analyze grammar]

tato bhagavatī rātrirupatasthe pitāmahaṃ |
tāṃ vivikte samālokya brahmovāca vibhāvarīm || 54 ||
[Analyze grammar]

brahmovāca |
vibhāvari mahatkāryaṃ devānāṃ samupasthitaṃ |
tatkartavyaṃ tvayā devi śṛṇu kāryasya niścayaṃ || 55 ||
[Analyze grammar]

tārakonāma daityeṃdraḥ suraśatruranirjitaḥ |
tasyā bhavāya bhagavānjanayiṣyati ceśvaraḥ || 56 ||
[Analyze grammar]

sutaṃ sa bhavitā tasya tārakasyāṃtakaḥ kila |
śaṃkarasyābhavatpatnī satī dakṣasutā tu yā || 57 ||
[Analyze grammar]

sā pituḥ kupitā devī kasmiṃścitkāraṇāṃtare |
bhavitrī himaśailasya duhitā lokabhāvinī || 58 ||
[Analyze grammar]

viraheṇa harastasyā matvā śūnyaṃ jagattrayaṃ |
sa tasya himaśailasya kaṃdare siddhasevite || 59 ||
[Analyze grammar]

pratīkṣamāṇastajjanma kiṃcitkālaṃ nivatsyati |
tayoḥ sutaptatapasorbhavitā yo mahānsutaḥ || 60 ||
[Analyze grammar]

bhaviṣyati sa daityasya tārakasya vināśakaḥ |
jātamātrā ca sā devī svalpasaṃjñeva bhāminī || 61 ||
[Analyze grammar]

virahotkaṃṭhitā gāḍhaṃ harasaṃgamalālasā |
tayoḥ sutaptatapasoḥ saṃyogaḥ syācchubhāvahaḥ || 62 ||
[Analyze grammar]

tatastābhyāṃ tu janitaḥ svalpo vākkalaho bhavet |
tatastu saṃśayo bhūyastārakasya ca dṛśyate || 63 ||
[Analyze grammar]

tayoḥ saṃyuktayostasmātsuratāsaktikāraṇe |
vighnaṃ tvayā vidhātavyaṃ yathā tābhyāṃ tathā śṛṇu || 64 ||
[Analyze grammar]

garbhasthamevatanmātuḥ svena rūpeṇa saṃjñayā |
tato vihasya śarvastāṃ viṣaṇṇo narmapūrvakaṃ || 65 ||
[Analyze grammar]

bhartsayiṣyati tāṃ devīṃ tataḥ sā kupitā satī |
prayāsyati tapaścartuṃ tataḥ sā tapasā yutā || 66 ||
[Analyze grammar]

janayiṣyati taṃ śarvādamitadyutimaṃḍalaṃ |
saṃbhaviṣyati haṃtāsau surārīṇāmasaṃśayam || 67 ||
[Analyze grammar]

tvayāpi dānavā devi haṃtavyā lokadurjayāḥ |
yāvatsureśvarī dehasaṃkrāṃtaguṇasaṃcayā || 68 ||
[Analyze grammar]

tatsaṃgamena tāvattvaṃ daityānhaṃtuṃ na śakyase |
evaṃ kṛte tapastaptvā tvayā sarvaṃ kariṣyati || 69 ||
[Analyze grammar]

samāptaniyamā devi yadā comā bhaviṣyati |
tadā svameva sā rūpaṃ śailajā pratipatsyate || 70 ||
[Analyze grammar]

tadā tvayāpi sahitā bhavānī sā bhaviṣyati |
rūpāṃśena tu saṃyuktā umāyāstvaṃ bhaviṣyasi || 71 ||
[Analyze grammar]

ekānaṃśeti lokastvāṃ varade pūjayiṣyati |
bhedairbahuvidhākāraiḥ sarvagāṃ kāmasādhinīm || 72 ||
[Analyze grammar]

oṃkāravaktrā gāyatrī tvamiti brahmavādibhiḥ |
ākrāṃtairūrjitākārā rājabhiśca mahābhujaiḥ || 73 ||
[Analyze grammar]

tvaṃ bhūriti viśāṃ mātā śūdraiśśaiveti pūjitā |
kṣāṃtirmunīnāmakṣobhyā dayā niyamināmapi || 74 ||
[Analyze grammar]

tvaṃ mahopāyasaṃdeho nītirnayavisarpiṇām |
paricittistvamarthānāṃ tvamīhā prāṇihṛcchayā || 75 ||
[Analyze grammar]

tvaṃ muktissarvabhūtānāṃ tvaṃ gatiḥ sarvadehinām |
ratistvaṃ ratacittānāṃ prītistvaṃ hṛdi dehinām || 76 ||
[Analyze grammar]

tvaṃ kīrtiḥ satyabhūtānāṃ tvaṃ śāṃtirduṣṭakarmaṇām |
tvaṃ bhrāṃtiḥ sarvabhūtānāṃ tvaṃ gatiḥ kratuyājinām || 77 ||
[Analyze grammar]

jaladhīnāṃ mahāvelā tvaṃ ca līlāvilāsinī |
priyakaṃṭhagrahānaṃdadāyinī tvaṃ vibhāvarī || 78 ||
[Analyze grammar]

ityanekavidhairdevī rūpairloke tvamarcitā |
ye tvāṃ stoṣyaṃti varade pūjayiṣyaṃti cāpi ye || 79 ||
[Analyze grammar]

te sarvakāmānāpsyaṃti niyatā nātra saṃśayaḥ |
ityuktā tu niśā devī tathetyuktvā kṛtāñjali || 80 ||
[Analyze grammar]

jagāma tvaritā tūrṇaṃ gṛhaṃ himagirermahat |
tatrāsīnāṃ mahāharmye ratnabhittisamāśrayām || 81 ||
[Analyze grammar]

dadarśa menāmāpāṇḍucchavivaktrasaroruhām |
kiṃcitkṣāmāṃ mukhodagrastanabhārāvanāmitām || 82 ||
[Analyze grammar]

mahauṣadhigaṇābaddha maṃtrarājaniṣevitām |
udūḍhakanakonnaddha jīvarakṣā manoramām || 83 ||
[Analyze grammar]

maṇidīpagaṇajyotirmahālokaprakāśite |
prakīrṇabahusiddhārthamanojñaparicārake || 84 ||
[Analyze grammar]

śuddhacīnāṃśukacchatra bhūśayyāstaraṇojjvale |
dhūpāmodamanoramye sajja sarvopayogike || 85 ||
[Analyze grammar]

tataḥ krameṇa divase gate dūraṃ vibhāvarī |
vijṛṃbhitasukhodarke tato menā mahāgṛhe || 86 ||
[Analyze grammar]

prasuptaprāyapuruṣe nidrābhūtopacārake |
sphuṭāloke śaśabhṛti bhrāntarātrivihaṃgame || 87 ||
[Analyze grammar]

rajanīcara saṃcārabhūtairāvṛta catvare |
gāḍhakaṃṭhagrahālagne śubhagoṣṭajane tataḥ || 88 ||
[Analyze grammar]

kiṃcidākulatāṃ prāpte menā netrāṃbujadvaye |
āviveśa mukhe rātriḥ sukhamadbhutasaṃgamā || 89 ||
[Analyze grammar]

unmādāya jaganmātuḥ krameṇa jaṭharāṃtare |
āviveśātulaṃ janma manyamānā kadā tu vai || 90 ||
[Analyze grammar]

araṃjayadgṛhaṃ devyā guhāraṇye vibhāvarī |
tato jagatyā nirvāṇaheturhimagiripriyā || 91 ||
[Analyze grammar]

brāhme muhūrte subhage prāsūyata guhāraṇiṃ |
tasyāṃ tu jāyamānāyāṃ jaṃtavaḥ sthāṇujaṃgamāḥ || 92 ||
[Analyze grammar]

abhavansukhinaḥ sarve sarvalokanivāsinaḥ |
nārakāṇāmapi tadā sukhaṃ svargasamaṃ mahat || 93 ||
[Analyze grammar]

abhavatkrūrasatvānāṃ cetaḥ śāṃtaṃ ca dehinām |
jyotiṣāmapi tejastu sutarāṃ cābhavattadā || 94 ||
[Analyze grammar]

vanāśritāścoṣadhayaḥ svādavaṃti phalāni ca |
gaṃdhavaṃti ca mālyāni vimalaṃ ca nabho'bhavat || 95 ||
[Analyze grammar]

mārutaśca sukhasparśo diśaśca sumanoharāḥ |
ṝtūdbhūtaphalāyoga paripākaguṇojjvalā || 96 ||
[Analyze grammar]

abhavatpṛthivī devī śālimālākulāpi ca |
tapāṃsi dīrghacīrṇāni munīnāṃ bhāvitātmanām || 97 ||
[Analyze grammar]

tasmingatāni sāphalyaṃ kāle nirmalacetasām |
vismṛtāni ca śāstrāṇi prādurbhāvaṃ prapedire || 98 ||
[Analyze grammar]

prabhāvastīrthamukhyānāṃ tadā puṇyatamastvabhūt |
aṃtarikṣe'marāścāsanvimāneṣu sahasraśaḥ || 99 ||
[Analyze grammar]

samaheṃdrajalādhīśa vāyu vahni purogamāḥ |
puṣpavṛṣṭiṃ pramumucustasmiṃstuhina bhūdhare || 100 ||
[Analyze grammar]

jagurgaṃdharvamukhyāśca nanṛtuścāpsarogaṇāḥ |
meruprabhṛtayaścāpi mūrtimaṃto mahācalāḥ || 101 ||
[Analyze grammar]

tasminmahotsave prāpte divyāḥ prasṛtapāṇayaḥ |
sāgarāssaritaścaiva samājagmuśca sarvaśaḥ || 102 ||
[Analyze grammar]

himaśailo'bhavalloke tadā sarvaiścarācaraiḥ |
saṃsevyaścādhigamyaśca sāśrayaścācalottamaḥ || 103 ||
[Analyze grammar]

anubhūyotsavaṃ devā jagmuḥ svānnilayāstadā |
devanāgeṃdragaṃdharvaśailalīlāvatī gaṇaiḥ || 104 ||
[Analyze grammar]

himaśailasutā devī tvahaṃpūrvikayā tataḥ |
krameṇa buddhimānītā vidyāñcānalasairbudhaiḥ || 105 ||
[Analyze grammar]

krameṇa rūpasaubhāgyaprabodhairbhuvanatraye |
saṃpūrṇalakṣaṇā jātā himālayasutā tathā || 106 ||
[Analyze grammar]

etasminnaṃtare śakro nāradaṃ devasaṃmatam |
devarṣimatha sasmāra kāryasādhanatatparaḥ || 107 ||
[Analyze grammar]

sa tu śakrasya vijñāya kāṃkṣitaṃ bhagavāṃstadā |
ājagāma mudā yukto maheṃdrasya niveśanam || 108 ||
[Analyze grammar]

taṃ tu dṛṣṭvā sahasrākṣaḥ samutthāya mahāsanāt |
yathārheṇa tu pādyena pūjayāmāsa vāsavaḥ || 109 ||
[Analyze grammar]

śakrapraṇihitāṃ pūjāṃ pratigṛhya yathāvidhi |
nāradaḥ kuśalaṃ devamapṛcchatpākaśāsanam || 110 ||
[Analyze grammar]

pṛṣṭe ca kuśale śakraḥ provāca vacanaṃ prabhuḥ |
iṃdra uvāca |
kuśalasyāṃkurastāvatsaṃvṛtto bhuvanatraye || 111 ||
[Analyze grammar]

tatphalodbhavasaṃpattau tvaṃ mayā vidito mune |
vetsyeva tatsamastaṃ tvaṃ tathāpi paricoditaḥ || 112 ||
[Analyze grammar]

nirvṛtiṃ paramāṃ yāti nivedyārthaṃ suhṛjjane |
tadyathāśailajā devī yogaṃ yāyātpinākinā || 113 ||
[Analyze grammar]

śīghraṃ tathodyamaḥ sarvairasmatpakṣairvidhīyatām |
avagamyārthamakhilaṃ tata āmaṃtrya nāradaḥ || 114 ||
[Analyze grammar]

śīghraṃ jagāma bhagavānhimaśailaniketanam |
tatra dvāre sa vipreṃdraścitravetralatākule || 115 ||
[Analyze grammar]

vaṃdito himaśailena nirgatena puro muniḥ |
saha praviśya bhavanaṃ bhuvo bhūṣaṇatāṃ gatam || 116 ||
[Analyze grammar]

nivedite svayaṃ haime himaśailena vistṛte |
mahāsane munivaro niṣasādātuladyutiḥ || 117 ||
[Analyze grammar]

yathārhamarghyaṃ pādyaṃ ca śailastasmai nyavedayet |
muniḥ sa pratijagrāha tamarghyaṃ vidhivattadā || 118 ||
[Analyze grammar]

gṛhītārghammuniśreṣṭhamapṛcchatślakṣṇayā girā |
kuśalaṃ tapasaḥ śailaḥ śanaiḥ phullānanāṃbujaḥ || 119 ||
[Analyze grammar]

munirapyadrirājānamapṛcchatkuśalaṃ tadā |
nārada uvāca |
aho dharmocitaste'sti saṃniveśo mahāgire || 120 ||
[Analyze grammar]

pṛthutvaṃ manasā tulyaṃ kaṃdarāṇāṃ tavānagha |
gurutvaṃ te guṇaughānāṃ sthāvarādatiricyate || 121 ||
[Analyze grammar]

prasannatā ca toyasya munibhyaścādhikā tava |
na lakṣayāmaḥ śailendra kutrāvinayitā sthitā || 122 ||
[Analyze grammar]

nānā tapobhirmunibhirjvalanārkasamaprabhaiḥ |
pāvanaiḥ pāvito nityaṃ tvaṃ kaṃdarasamāśrayaiḥ || 123 ||
[Analyze grammar]

avamatya vimānāni svargavāsavirāgiṇaḥ |
piturgṛhaivāsīnā devagaṃdharvakinnarāḥ || 124 ||
[Analyze grammar]

aho dhanyosi śailendra yasya te kaṃdaraṃ haraḥ |
adhyāste lokanātho hi rāmadhyānaparāyaṇaḥ || 125 ||
[Analyze grammar]

ityuktavati devarṣau nārade sādaraṃ girā |
himaśailasya mahiṣī menā munididṛkṣayā || 126 ||
[Analyze grammar]

anuyātā duhitrā tu svalpāliparicārikā |
lajjāpraṇayanamrāṅgī praviveśa niketanam || 127 ||
[Analyze grammar]

yatra sthito munivaraḥ śailena sahito vaśī |
taṃ dṛṣṭvā tejaso rāśiṃ muniṃ śailapriyā tadā || 128 ||
[Analyze grammar]

vavaṃde gūḍhavadanā pāṇipadmakṛtāñjali |
tāṃ vilokya mahābhāgāṃ devarṣiramitadyutiḥ || 129 ||
[Analyze grammar]

āśīrbhiramṛtodgārarūpābhistāṃ vyavarddhayat |
tato vismitacittā tu himavadgiriputrikā || 130 ||
[Analyze grammar]

ekṣiṣṭa nāradaṃ devī munimadbhutarūpiṇam |
ehi vatseti sāpyuktā ṝṣiṇā snigdhayā girā || 131 ||
[Analyze grammar]

kaṃṭhe gṛhītvā pitaramaṅke sā tu samāviśat |
uvāca mātā tāṃ devīmabhivaṃdaya putrike || 132 ||
[Analyze grammar]

bhagavaṃtaṃ tapodhanyaṃ patimāpsyasi saṃmatam |
ityuktā tu tato mātrā vastreṇa pihitānanā || 133 ||
[Analyze grammar]

kiṃcitkaṃpitamūrddhā tu vākyaṃ novāca kiṃcana |
tataḥ punaruvācedaṃ vākyaṃ mātā sutāṃ tadā || 134 ||
[Analyze grammar]

vatse vaṃdaya devarṣiṃ tato dāsyāmi te śubham |
ratnakrīḍanakaṃ ramyaṃ sthāpitaṃ yacciraṃ mayā || 135 ||
[Analyze grammar]

ityuktā sā tato vegādudgatya caraṇau tadā |
vavaṃde mūrdhni saṃdhāya pāṇipaṃkajakuḍmalam || 136 ||
[Analyze grammar]

kṛte tu vaṃdane tasyā mātā sakhimukhena tu |
codayāmāsa śanakaistasyāḥ saubhāgyadarśitām || 137 ||
[Analyze grammar]

śarīralakṣaṇānāṃ ca parijñānāya kautukāt |
strīsvabhāvātsvaduhituściṃtāṃ hṛdi samudvahan || 138 ||
[Analyze grammar]

jñātvā tadiṃgitaṃ śailo mahiṣyāhṛdayena tu |
anudīrṇākṛtirmene ramyametadupasthitam || 139 ||
[Analyze grammar]

coditaḥ śailamahiṣī sakhyā munivarastataḥ |
smitānano mahābhāgo vākyaṃ provāca nāradaḥ || 140 ||
[Analyze grammar]

na jāto'syāḥ patirbhadre lakṣaṇaiśca vivarjitaḥ |
uttānahastā satataṃ caraṇairvyabhicāribhiḥ || 141 ||
[Analyze grammar]

succhāyāsyā bhaviṣyeyaṃ kimanyadbahu bhāṣyate |
śrutvaitatsaṃbhramāviṣṭo dhvastadhairyo himācalaḥ || 142 ||
[Analyze grammar]

nāradaṃ pratyuvācātha sāśrukaṃṭho mahāgiriḥ |
himavānuvāca |
saṃsārasyātidoṣasya durvijñeyā gatiryataḥ || 143 ||
[Analyze grammar]

sṛṣṭyā cāvaśyabhāvinyā kenāpyatiśayātmanā |
kartrā praṇītā maryādā sthitā saṃsāriṇāmiyam || 144 ||
[Analyze grammar]

yo jāyate hi yadbījājjanituḥ sorthasādhakaḥ |
janitā cāpi jātasya na kaściditi ca sphuṭam || 145 ||
[Analyze grammar]

svakarmaṇaiva jāyaṃte vivadhā bhūtajātayaḥ |
aṃḍajohyaṃḍajājjātaḥ punarjāyeta mānavaḥ || 146 ||
[Analyze grammar]

mānuṣopi sarīsṛpyāṃ mānuṣatvena jāyate |
tatrāpi jātau śreṣṭhāyāṃ dharmasyotkarṣaṇena tu || 147 ||
[Analyze grammar]

aputrajanmanaḥ śeṣāḥ prāṇinaḥ samavasthitāḥ |
manujāstatra sutarāṃ nayena sahadharmiṇaḥ || 148 ||
[Analyze grammar]

krameṇāśramasaṃprāptirbrahmacārivratādanu |
tasya karturniyogena saṃsāro yena vardhitaḥ || 149 ||
[Analyze grammar]

saṃsārasya hi notpattiḥ sarve syuryadi nirgṛhāḥ |
kartrā tu śāstreṣu sadā sutalābhaḥ praśaṃsitaḥ || 150 ||
[Analyze grammar]

prāṇināṃ mohanārthāya narakatrāṇakāraṇāt |
striyā virahitā sṛṣṭirjaṃtūnāṃ nopapadyate || 151 ||
[Analyze grammar]

strījātistu prakṛtyaiva kṛpaṇā dainyabhāginī |
śāstrālocanasāmarthyāddūṣitaṃ tāsu kartṛṇā || 152 ||
[Analyze grammar]

tasyāṃ noparibhāvajñā bhavedeti ca vedhasā |
śāstreṣūktamasaṃdigdhaṃ bahuvāraṃ mahāphalaṃ || 153 ||
[Analyze grammar]

daśaputrasamā kanyā yāpi syācchīlavarjitā |
vākyametatphalabhraṣṭaṃ puṃsāṃ glānikaraṃ phalaṃ || 154 ||
[Analyze grammar]

kanyā hi kṛpaṇā śocyā piturduḥkhavivarddhinī |
yāpi syātpūrṇasarvārthā patiputrasamanvitā || 155 ||
[Analyze grammar]

kiṃ punardurbhagā hīnā patiputradhanādibhiḥ |
tvaṃ coktavānsutā yā me śarīre doṣasaṃgraham || 156 ||
[Analyze grammar]

aho muhyāmi śuṣyāmi glāmi sīdāmi nārada |
ayuktamapi vaktavyamaprāpyamapi sāṃpratam || 157 ||
[Analyze grammar]

anugrahāya me chindhi duḥkhaṃ kanyāśrayaṃ mune |
paricchinnepyasaṃdigdhe manaḥ paribhavāśrayāt || 158 ||
[Analyze grammar]

tṛṣṇā muṣṇāti niṣṇātaṃ phalalobhāśrayātpunaḥ |
strīṇāṃ hi paramaṃ janma kulānāmubhayātmanām || 159 ||
[Analyze grammar]

ihāmutra sukhāyoktaṃ satpatiprāptisaṃjñitam |
durlabhatvātsataḥ strīṇāṃ viguṇopi patiḥ kila || 160 ||
[Analyze grammar]

na prāpyate vinā puṇyaiḥ patirnāryāḥ kadācana |
yato nissādhano dharmaḥ pariṇāmotthitā ratiḥ || 161 ||
[Analyze grammar]

dhanaṃ jīvitaparyaṃtaṃ patyau nāryāḥ pratiṣṭhitam |
nirddhano durmukho mūrkhaḥ sarvalakṣaṇavarjitaḥ || 162 ||
[Analyze grammar]

daivataṃ paramaṃ nāryāḥ patiruktaḥ sadaiva hi |
tvayā devarṣiṇā proktaṃ na jāto'syāḥ patiḥ kila || 163 ||
[Analyze grammar]

etaddaurbhāgyamatulamasaṃkhyaṃ ca durudvaham |
carācare bhūtasarge ciṃtā sā vyāpinī mune || 164 ||
[Analyze grammar]

sa na jāta iti śrutvā mamedaṃ vyākulaṃ manaḥ |
manuṣyadevajātīnāṃ śubhāśubhanivedakam || 165 ||
[Analyze grammar]

lakṣaṇaṃ hastapādābhyāṃ lakṣaṇaṃ vihitaṃ kila |
seyamuttānahasteti tvayoktā munipuṃgava || 166 ||
[Analyze grammar]

uttānahastatā proktā yācatāmeva nityakā |
śubhodayānāṃ dhanyānāṃ na kadācitprayacchatām || 167 ||
[Analyze grammar]

succhāyayāsyāścaraṇau tvayoktau vyabhicāriṇau |
tatrāpi śreyasī hyāśā mune na pratibhāti naḥ || 168 ||
[Analyze grammar]

śarīralakṣaṇāścānye pṛthakphalanivedinaḥ |
ityuktvā virate śaile mahāduḥkhavicāriṇi || 169 ||
[Analyze grammar]

smitapūrvamuvācedaṃ nārado devapūjitaḥ |
nārada uvāca |
harṣasthāne ca mahati tvayā duḥkhaṃ nirucyate || 170 ||
[Analyze grammar]

aparicchinnavākyārtho mohaṃ yāsi mahāgire |
imāṃ śṛṇu giraṃ matto rahasyapariniṣṭhitām || 171 ||
[Analyze grammar]

samāhito mahāśaila mayoktasya vicāraṇām |
na jātosyāḥ patirdevyā yanmayoktaṃ himācala || 172 ||
[Analyze grammar]

sa na jāto mahādevo bhūtabhavyabhavodbhavaḥ |
śaraṇyaḥ śāśvataḥ śāstā śaṃkaraḥ parameśvaraḥ || 173 ||
[Analyze grammar]

brahmarudrendramunayo garbhajanmajarārditāḥ |
tasya te parameśasya sarve krīḍanakā gire || 174 ||
[Analyze grammar]

brahmāṃḍatastadicchātaḥ saṃbhūto bhuvanaprabhuḥ |
ātmano na vināśosti sthāvarāṃtepi bhūdhara || 175 ||
[Analyze grammar]

saṃsāre jāyamānasya mriyamāṇasya dehinaḥ |
naśyate deha evātra nātmano nāśa ucyate || 176 ||
[Analyze grammar]

brahmādisthāvarāṃto'yaṃ saṃsāro yaḥ prakīrtitaḥ |
sa janmamṛtyuduḥkhārto hyaniśaṃ parivartate || 177 ||
[Analyze grammar]

mahādevo'calaḥsthāṇurna jāto janako'jaraḥ |
bhaviṣyati patiḥ so'syā jagannātho nirāmayaḥ || 178 ||
[Analyze grammar]

yaduktaṃ ca mayā devī lakṣaṇairvarjitā tava |
śṛṇu tasyāpi vākyasya samyaktvena vicāraṇam || 179 ||
[Analyze grammar]

lakṣaṇaṃ daiviko hyaṃkaḥ śarīrāvayavāśrayaḥ |
sa cāyurdhanasaubhāgyapariṇāmaprakāśakaḥ || 180 ||
[Analyze grammar]

anaṃtasyāprameyasya saubhāgyasya tu bhūdhara |
naivāṃko lakṣaṇākāraḥ śarīre saṃvidhīyate || 181 ||
[Analyze grammar]

ato'syā lakṣaṇaṃ gātre śaila nāsti mahāmate |
yaccāhamuktavānasyā uttānakaratā sadā || 182 ||
[Analyze grammar]

uttāno varadaḥ pāṇireṣa devyāḥ sadaiva tu |
surāsuramunivrātavaradātrī bhaviṣyati || 183 ||
[Analyze grammar]

yacca proktaṃ mayā pādau succhāyau vyabhicāriṇau |
mattaḥ śṛṇu tvamasyāpi vyākhyoktiṃ śailasattama || 184 ||
[Analyze grammar]

caraṇau padmasaṃkāśau svacchāvasyā nakhojvalau |
surāsurāṇāṃ namatāṃ kirīṭamaṇikāṃtibhiḥ || 185 ||
[Analyze grammar]

vicitravarṇaiḥ paśyadbhiḥ succhāyau pratibiṃbitau |
eṣā bhāryā jagadbharturvṛṣāṃkasya mahīdhara || 186 ||
[Analyze grammar]

jananī sarvalokasya saṃbhūtābhūtabhāvinī |
śiveyaṃ pāvanāyaiva tvatkṣetre pāvanadyutiḥ || 187 ||
[Analyze grammar]

tadyathāśīghramevaiṣā yogaṃ yāyātpinākinaḥ |
tathā vidheyaṃ vidhivattvayā śaileṃdrasattama || 188 ||
[Analyze grammar]

astyatra hi mahatkāryaṃ devānāṃ himabhūdhara |
evaṃ śrutvā tu śaileṃdro nāradātsarvameva hi || 189 ||
[Analyze grammar]

svamātmānaṃ punarjātaṃ mene menāpatistadā |
uvāca cāpi saṃhṛṣṭo nāradaṃ tu himācalaḥ || 190 ||
[Analyze grammar]

dustarānnarakādghorāduddhṛtosmi tvayā vibho |
pātālādahamuddhṛtya saptalokādhipaḥ kṛtaḥ || 191 ||
[Analyze grammar]

himācalosmi vikhyātastvayā munivarādhunā |
himācalācchataguṇāṃ prāpitosmi samunnatiṃ || 192 ||
[Analyze grammar]

ānaṃdādeva cāhāri hṛdayaṃ me mahāmune |
nādhyavasyati kṛtyānāṃ vibhāgapravicāraṇam || 193 ||
[Analyze grammar]

bhavadvidhānāṃ niyatamamoghaṃ darśanaṃ mune |
bhavadbhireva hi proktaṃ nivāsāyātmarūpiṇām || 194 ||
[Analyze grammar]

munīnāṃ devatānāṃ ca svayaṃ kartāsmi kalmaṣam |
tathāpi vastunyekasminnājñā me saṃpradīyatām || 195 ||
[Analyze grammar]

ityuktavati śaileṃdre sa tadā harṣanirbharaḥ |
uvāca nārado vākyaṃ kṛtaṃ sarvamiti prabho || 196 ||
[Analyze grammar]

surakārye sa evārthastavāpi sumahattaraḥ |
ityuktvā nāradaḥ śīghraṃ jagāma tridivaṃ tataḥ || 197 ||
[Analyze grammar]

sa gatvā devabhavanaṃ maheṃdraṃ saṃdadarśa ha |
tatonurūpe sa munirupaviṣṭo mahāsane || 198 ||
[Analyze grammar]

pṛṣṭaḥ śakreṇa provāca girijāsaṃśrayāṃ kathām |
nārada uvāca |
yanmahyamuktaṃ kartavyaṃ tanmayā kṛtameva hi || 199 ||
[Analyze grammar]

kiṃtu paṃcaśarasyeṣu gocaratvamapekṣitam |
ityukto devarājastu muninā kāryadarśinā || 200 ||
[Analyze grammar]

cūtāṃkurāstraṃ sasmāra bhagavānpākaśāsanaḥ |
sasmṛtastu tadā kṣipraṃ sahasrākṣeṇa dhīmatā || 201 ||
[Analyze grammar]

upatasthe ratiyutaḥ savilāso jhaṣadhvajaḥ |
prādurbhūtaṃ ca taṃ dṛṣṭvā śakraḥ provāca manmatham || 202 ||
[Analyze grammar]

śakra uvāca |
upadeśena bahunā kiṃ tvāṃ prati ratipriya |
manobhavosi tena tvaṃ vetsi bhūtamanogatam || 203 ||
[Analyze grammar]

tadyathānukramaṃ tu tvaṃ kuru nākasadāṃ priyam |
śaṃkaraṃ yojaya kṣipraṃ giriputryā manobhava || 204 ||
[Analyze grammar]

saṃyukto madhunānena gaccha ratyā sahāyavān |
ityukto madanastena śakreṇa svārthasiddhaye || 205 ||
[Analyze grammar]

provāca paṃcabāṇotha vākyaṃ bhītaḥ śatakratum |
kāma uvāca |
anayā deva sāmagryā munidānavabhīmayā || 206 ||
[Analyze grammar]

duḥsādhyaśśaṃkaro devaḥ kiṃ na vetsi jagatprabho |
tasya devasya vettha tvaṃ kāraṇaṃ padamavyayam || 207 ||
[Analyze grammar]

prāyaḥ prasāde kopepi sarvaṃ hi mahatāṃ mahat |
sarvopabhogasāraṃ hi saudaryaṃ svargasaṃbhavam || 208 ||
[Analyze grammar]

viśeṣaṃ kāṃkṣatāṃ śakra sāmānyādbhraṃśanaṃ phalāt |
śrutvaitadvacanaṃ śakrastamuvācāmarairyutaḥ || 209 ||
[Analyze grammar]

śakra uvāca |
vayaṃ pramāṇaṃ te tatra ratikāṃta na saṃśayaḥ |
saṃdaṃśena vinā śaktirayaskārasya neṣyate || 210 ||
[Analyze grammar]

kasyacicca kvaciddṛṣṭaṃ sāmarthyaṃ na tu sarvataḥ |
ityuktaḥ prayayau kāmaḥ sakhāyaṃ madhumāśritaḥ || 211 ||
[Analyze grammar]

ratiyukto jagāmāśu prasthaṃ tuhinabhūbhṛtaḥ |
sa tu prāpyākarocciṃtāṃ kāryasyopāyapūrvikām || 212 ||
[Analyze grammar]

mahātmāno hi niṣkaṃpā manasteṣāṃ sudurjayam |
tadādāveva saṃkṣobhya netthaṃ tasya jayo bhavet || 213 ||
[Analyze grammar]

saṃsiddhiḥ prāyaśaścaiva pūrvaṃ saṃśodhya mānasam |
kathamevaṃvidhairbhāvairdveṣānugamanaṃ vinā || 214 ||
[Analyze grammar]

krodhaḥ krūratarātsaṃgādbhīṣaṇerṣyā mahāsakhī |
cāpalyānmūrdhni vidhvasta dhairyādhāramahābalā || 215 ||
[Analyze grammar]

tāmasya viniyokṣyāmi manaso vikṛtiṃ puraḥ |
pidhāya dhairyadvārāṇi saṃtoṣamapakṛṣya ca || 216 ||
[Analyze grammar]

avagaṃtuṃ hi māṃ tatra na kaścidiha paṃḍitaḥ |
vikalpamātrasaṃsthānaṃ virūpākṣamanobhavam || 217 ||
[Analyze grammar]

praviśyātha kriyāraṃbhī gaṃbhīrāvartadustaraḥ |
bhaviṣyāmi harasyāhaṃ tapaḥsthasya sthirātmanaḥ || 218 ||
[Analyze grammar]

iṃdriyagrāmamāvṛtya ramyasādhanasaṃvidhiḥ |
ciṃtayitveti madano bhūtabhartustadāśramam || 219 ||
[Analyze grammar]

jagāma jagatīsāraṃ saraladruma vedikam |
śāṃtasatvasamākīrṇamacalaṃ prāṇisaṃkulam || 220 ||
[Analyze grammar]

nānāpuṣpalatājālaṃ sānusaṃsthagaṇeśvaram |
nirvyagravṛṣabhodghuṣṭaṃ nīlaśādvalasānukam || 221 ||
[Analyze grammar]

tatrāpaśyattrinetrasya ramyaṃkaṃ ciddvitīyakam |
vīrakaṃ vīralokeśamīśānasadṛśadyutim || 222 ||
[Analyze grammar]

pakvaṃ kuṃkumakiṃjalkapuṃjapiṃgajaṭāsaṭam |
vetrapāṇitamavyagramugraṃ cābhadrabhūṣaṇam || 223 ||
[Analyze grammar]

tato nimīlitonnidra padmapatrāṃtalocanam |
prekṣamāṇamṛjusthānaṃ nāsāvaṃśāgragocaram || 224 ||
[Analyze grammar]

atīvaramyasiṃheṃdra carmalaṃbottarīyakam |
śravaṇāhiphaṇonmukta niśvāsānalapiṃgalaṃ || 225 ||
[Analyze grammar]

preṃkhatkapolaparyaṃta cuṃbilaṃbijaṭācayam |
kṛtavāsukiparyaṃta nābhimūlaniveśitam || 226 ||
[Analyze grammar]

brahmāṃjalisthanāsāgra nibaddhoragabhūṣaṇam |
dadarśa śaṃkaraṃ kāmaḥ kramaprāptāṃtikaḥ śanaiḥ || 227 ||
[Analyze grammar]

tato bhramarajhaṃkāramālaṃbya drumasānugam |
praviṣṭaḥ karṇaraṃdhreṇa bhavasya madano manaḥ || 228 ||
[Analyze grammar]

śaṃkarastamathākarṇya madhuraṃ madanāśrayam |
sasmāra dakṣatanayāṃ dayitāṃ raṃtumānasaḥ || 229 ||
[Analyze grammar]

tataḥ śivasya śanakaistirodhā yāti nirmalā |
samādhibhāvanā tasthau lakṣya pratyakṣarūpiṇī || 230 ||
[Analyze grammar]

tatastanmayatāṃ yātaḥ pratyūha pihitāśayaḥ |
viveśa vibudhādhīśo vikṛtiṃ madanātmikām || 231 ||
[Analyze grammar]

īṣatkrodhasamāviṣṭo dhairyamālaṃbya dhūrjaṭiḥ |
nirasyamadanaṃsthitvāyogamāyāsamāvṛtaḥ || 232 ||
[Analyze grammar]

sa tayā māyayāviṣṭo jajvāla madanastataḥ |
icchāśarīro durjñeyo doṣāvāso mahāśayaḥ || 233 ||
[Analyze grammar]

hṛdayānnirgataḥ sotha vāsanāvyasanātmakaḥ |
bahisthalaṃ samāsādya upatasthe jhaṣadhvajaḥ || 234 ||
[Analyze grammar]

anuyāto hi sāhyena mitreṇa madhunā saha |
sahakāratarordṛṣṭvā maṃdamārutanirdhutaṃ || 235 ||
[Analyze grammar]

stabakaṃ madano ramyaṃ haravakṣasi satvaraṃ |
mumoca mohanaṃ nāma mārgaṇaṃ makaradhvajaḥ || 236 ||
[Analyze grammar]

sa tasya hṛdaye śuddhe nāmaśālī mahāśaraḥ |
papāta paruṣaḥ prāṃśuḥ puṣpabāṇo vimohanaḥ || 237 ||
[Analyze grammar]

tataḥ karaṇasaṃdohe viddhe tu hṛdaye bhavaḥ |
babhūva bhūtapo kaṃpya dhairyopi madanonmukhaḥ || 238 ||
[Analyze grammar]

tataḥ prabhutvādbhāvānāmāveśaṃ svamapaśyata |
vākyaṃ bahu babhāṣetha pratyūhaprasavātmakaṃ || 239 ||
[Analyze grammar]

tataḥ kopānalodbhūta ghora huṃkārabhīṣaṇe |
babhūva vadane netraṃ tṛtīyamanalākulaṃ || 240 ||
[Analyze grammar]

rudrasya raudravapuṣo jagatsaṃhārabhairavam |
tadaṃtikasthe madane vyasphārayata dhūrjaṭiḥ || 241 ||
[Analyze grammar]

tannetravisphuliṃgena krośatāṃ nākavāsinām |
gamito bhasmatāṃ tūrṇaṃ kaṃdarpaḥ kāmadarpakaḥ || 242 ||
[Analyze grammar]

sa tu taṃ bhasmasātkṛtvā haranetrodbhavonalaḥ |
vyajṛṃbhata jagaddagdhuṃ jñātvā huṃkāraghasmaraṃ || 243 ||
[Analyze grammar]

tato bhavo jagaddhetorvyabhajajjātavedasam |
sahakāre madhau candre sumanaḥ ssvapareṣvapi || 244 ||
[Analyze grammar]

bhṛṃgeṣu kokilāsye ca vibhāgena smarānalaṃ |
sa bāhyābhyaṃtare viddho harotha smaramārgaṇaiḥ || 245 ||
[Analyze grammar]

bhāgeṣveteṣu saṃviṣṭaṃ vīkṣatī bahunāśanaṃ |
vibhaktaṃ lokasaṃkṣobhakaraṃ durvārajṛṃbhitaṃ || 246 ||
[Analyze grammar]

tatprāptisnehasaṃpūrṇakāmena hṛdaye kila |
jvalannaharniśaṃ bhīmo duḥkhasya vaśago'bhavat || 247 ||
[Analyze grammar]

vilokya harahuṃkāra jvālābhasmīkṛtaṃ smaraṃ |
vilalāpa ratiḥ krūraṃ baṃdhunā madhunā saha || 248 ||
[Analyze grammar]

tato vilapya bahuśo madhunā parisāṃtvitā |
jagāma śaraṇaṃ devamiṃdumaulitrilocanaṃ || 249 ||
[Analyze grammar]

bhṛṃgānuyātāṃ saṃgṛhya puṣpitāṃ sahakārajāṃ |
latāṃ patradrumacchannāṃ jātāṃ parabhṛtāṃ sakhīṃ || 250 ||
[Analyze grammar]

nibadhya tu jaṭājūṭaṃ kuṭilairalakai ratiḥ |
udvartya gātraṃ śubhreṇa hṛdyena smarabhasmanā || 251 ||
[Analyze grammar]

jānubhyāmavaniṃ gatvā provācenduvibhūṣaṇam |
ratiruvāca |
namaḥ śivāyāstu manomayāya jaganmayāyādbhutavartmane namaḥ || 252 ||
[Analyze grammar]

namaḥ śivāyāstu surārcitāya tubhyaṃ sadā bhaktakṛpāparāya |
namo bhavāyāstu bhavodbhavāya namostu te dhvastamanobhavāya || 253 ||
[Analyze grammar]

namostu māyāmadanāśrayāya namo nisargāmalabhūṣitāya |
namostvameyāya guṇāyanāya namostu siddhāya purātanāya || 254 ||
[Analyze grammar]

namaḥ śaraṇyāya namo guṇāya namostu te bhīmagaṇānugāya |
namostu nānābhuvanarddhikartre namostu bhaktābhimatapradāya || 255 ||
[Analyze grammar]

namotha karmaprasave namaḥ sadā anaṃtarūpāya sadaiva tubhyam |
asahyakopāya sadaiva tubhyaṃ śaśāṃkacihnāya namostu tubhyam || 256 ||
[Analyze grammar]

asīmalīlāparamastutāya vṛṣeṃdrayānāya purāṃtakāya |
namaḥ prasiddhāya mahauṣadhāya namostu nānāvidharūpakāya || 257 ||
[Analyze grammar]

namostu kālāya namaḥ kalāya namostu te kālakalātigāya |
carācarācāryavicāryavaryamācāryamutprekṣitabhūtasargaṃ || 258 ||
[Analyze grammar]

tvāmiṃdumauliśaraṇaṃ prapannā priyāptayehaṃ sahasā maheśaṃ |
prayaccha me kāmayaśaḥ samṛddhiṃ patiṃ vinā taṃ bhagavanna jīve || 259 ||
[Analyze grammar]

priyaḥ priyāyāḥ puruṣeśa nityastato paraḥ ko bhuvaneṣvihāsti |
prabhuḥ prabhāvī prabhavaḥ priyāṇāṃ pravīṇaparyāya parāparaṃ tapaḥ || 260 ||
[Analyze grammar]

tvameva nātho bhuvanasya goptāṃ dayālurunmūlitabhaktabhītiḥ |
itthaṃ stutaḥ śaṃkaraiṃdramaulirvṛṣākapirmanmathakāṃtayā tu || 261 ||
[Analyze grammar]

tutoṣa doṣākarakhaṃḍadhārī uvāca caināṃ madhuraṃ nirīkṣya |
śaṃkara uvāca |
bhaviṣyati ca kāmoyaṃ kāle kāṃte cirādatha || 262 ||
[Analyze grammar]

anaṃga iti lokeṣu sa vikhyātiṃ gamiṣyati |
ityuktā śirasā vaṃdya girīśaṃ kāmavallabhā || 263 ||
[Analyze grammar]

jagāmopavanaṃ cānyadratistuhina parvate |
ruroda cāpi bahuśo dīnā ramye sthale sthale || 264 ||
[Analyze grammar]

maraṇavyavasāyāpi nivṛttā ca śivājñayā |
atha nāradavākyena codito himabhūdharaḥ || 265 ||
[Analyze grammar]

kṛtābharaṇasaṃskārāṃ kṛtakautukamaṃgalāṃ |
svargapuṣpakṛtāpīḍāṃ śubhracīnāṃśukāṃbarām || 266 ||
[Analyze grammar]

sakhībhyāṃ saṃyutāṃ śailo gṛhītvā svasutāṃ tataḥ |
jagāma subhage yoge tadā saṃpūrṇamānasaḥ || 267 ||
[Analyze grammar]

sakānanānyupākramya vanānyupavanāni ca |
dadarśa rudatīṃ nārīmapratarkyāṃ mahaujasam || 268 ||
[Analyze grammar]

na rūpeṇedṛśī loke ramyeṣu vanasānuṣu |
kautukena parāmṛṣṭastāṃ dṛṣṭvā rudatīṃ giriḥ || 269 ||
[Analyze grammar]

upasṛpya tatastasyā nikaṭaṃ sopyapṛcchata |
himavānuvāca |
kāsi kasyāsi kalyāṇi kimarthaṃ cāpi rodiṣi || 270 ||
[Analyze grammar]

naitadalpamahaṃ manye kāraṇaṃ lokasuṃdari |
sā tasya vacanaṃ śrutvā uvāca madhunā saha || 271 ||
[Analyze grammar]

rudaṃtī śokavacanaṃ śvasaṃtī dainyavardhanaṃ |
ratiruvāca |
kāmasya dayitāṃ bhāryāṃ ratiṃ māṃ viddhi suvrata || 272 ||
[Analyze grammar]

girāvasmiṃśca bhagavāngiriśastapasi sthitaḥ |
tena pratyūharuṣṭena krodhādvisphārya locanaṃ || 273 ||
[Analyze grammar]

vimucyāgniśikhājvālāṃ kāmo bhasmāvaśeṣitaḥ |
ahaṃ tu śaraṇaṃ yātā taṃ devaṃ bhayavihvalā || 274 ||
[Analyze grammar]

stutavatyatha saṃtuṣṭastato māṃ giriśo'bravīt |
tuṣṭohaṃ kāmadayite kāmotpattirbhaviṣyati || 275 ||
[Analyze grammar]

tvatstutiṃ cāpyadhīyāno naro bhaktyā madāśrayaḥ |
lapsyate kāṃkṣitaṃ kāmaṃ nivartamaraṇādapi || 276 ||
[Analyze grammar]

pratīkṣamāṇā tadvākyamāśāveśavaśādahaṃ |
śarīraṃ parirakṣiṣye kiṃcitkālaṃ mahādyute || 277 ||
[Analyze grammar]

ityuktastu tayā ratyā śailaḥ saṃbhramabhīṣaṇaḥ |
pāṇāvādāya tanayāṃ gaṃtumaicchatsvakaṃ puraṃ || 278 ||
[Analyze grammar]

bhāvino'vaśyabhāvitvādbhavitrī bhūtabhāvinī |
lajjamānā sakhimukhairuvāca pitaraṃ giriṃ || 279 ||
[Analyze grammar]

śailaputryuvāca |
durbhagena śarīreṇa kiṃ mamānena kāraṇaṃ |
kathaṃ ca tāṃ daśāṃ prāptaśśaṅkaro me patirbhavet || 280 ||
[Analyze grammar]

tapobhiḥ prāpyatebhīṣṭaṃ nāsādhyaṃ tu tapasyataḥ |
durbhagatvaṃ vṛthā loke vihite sati sādhane || 281 ||
[Analyze grammar]

tapasi bhraṣṭasaṃdehā tataḥ svārthajigīṣayā |
evaṃ tapaḥ kariṣyehaṃ yāmītyuktavatīṃ sutām || 282 ||
[Analyze grammar]

uvāca vācā śaileṃdro gadgadasvaravarṇayā |
himavānuvāca |
umeti cāpalaṃ putri na kṣamaṃ tāvakaṃ vapuḥ || 283 ||
[Analyze grammar]

soḍhuṃ kleśānurūpasya tapasaḥ saumyadarśane |
bhāvīnyapi ca kāryāṇi padārthāni sadaiva tu || 284 ||
[Analyze grammar]

bhāvinorthā bhavaṃtyeva bahavo'nicchatopi hi |
tasmānna tapasā testi bāle kiṃcitprayojanam || 285 ||
[Analyze grammar]

bhavanaṃ caiva gacchāmi ciṃtayiṣyāmi tatra vai |
ityuktā tu yadā naiva gṛhamanveti śailajā || 286 ||
[Analyze grammar]

tatodriściṃtayāviṣṭaḥ svasutāṃ praśaśaṃsa ca |
tatoṃtarikṣe divyā ca vāgabhūdbhuvanatraye || 287 ||
[Analyze grammar]

umeti cāpalaṃ putri tvayoktā tanayā yataḥ |
umeti nāma tenāsyā bhuvaneṣu bhaviṣyati || 288 ||
[Analyze grammar]

siddhirmūrtimatī tveṣā sādhayiṣyati ciṃtitam |
iti śrutvā tu vacanaṃ sa tadākāśamaṃḍale || 289 ||
[Analyze grammar]

anujñāya sutāṃ śailo jagāmāśu svamaṃdiram |
pulastya uvāca |
śailajāpi yayau śailamagamyamapi daivataiḥ || 290 ||
[Analyze grammar]

sakhībhyāmanuyātā tu niyatā nagarājajā |
śṛṃgaṃ himavataḥ puṇyaṃ nānādhātuvibhūṣitam || 291 ||
[Analyze grammar]

divyapuṣpalatākīrṇaṃ bhramarodghuṣṭapādapam |
divyaprasravaṇopetaṃ manorathaśatojjvalam || 292 ||
[Analyze grammar]

nānāpakṣisamāyuktaṃ cakravākopaśobhitam |
jalajasthalajaiḥ puṇyaiḥ praphullairupaśobhitam || 293 ||
[Analyze grammar]

citrakaṃdarasaṃguhyaṃ divyagehasamanvitam |
vihaṃgasaṃghasaṃghuṣṭaṃ kalpapādapasaṃkaṭam || 294 ||
[Analyze grammar]

tatrāpaśyanmahāśākhaṃ śākhinaṃ haritacchadam |
sarvartukusumopetaṃ cakravākopaśobhitam || 295 ||
[Analyze grammar]

nānāpuṣpaśatākīrṇaṃ nānāvidhaphalānvitam |
tyaktaṃ sūryasya rucibhirbhinnasaṃhatapallavam || 296 ||
[Analyze grammar]

tatrāṃbarāṇi saṃtyajya bhūṣaṇāni ca śailajā |
saṃvītā valkalairdivyairdarbhanirmitamekhalā || 297 ||
[Analyze grammar]

triḥsnātā pāṭalāhārā babhūva śaradāṃ śatam |
śatamekena jīrṇena parṇenāvarttayattadā || 298 ||
[Analyze grammar]

nirāhārā śataṃ sābhūtsamānāṃ tapaso nidhiḥ |
tata udvejitāḥ sarve prāṇinastapasogninā || 299 ||
[Analyze grammar]

tataḥ sasmāra bhagavānmunīnsapta śatakratuḥ |
te samāgamya muditāḥ sarve samuditāstathā || 300 ||
[Analyze grammar]

pūjitāste maheṃdreṇa papracchustatprayojanam |
kimarthaṃ hi suraśreṣṭha saṃsmṛtāstu vayaṃ tvayā || 301 ||
[Analyze grammar]

śakraḥ provāca śṛṇvaṃtu bhagavaṃtaḥ prayojanam |
himācale tapo ghoraṃ tapyate bhūdharātmajā || 302 ||
[Analyze grammar]

tasyābhimatayogena bhavaṃtaḥ kartumarhatha |
tapaḥ samāpanaṃ devyā jagadarthe tvarānvitāḥ || 303 ||
[Analyze grammar]

tathetyuktvā tataḥ śailaṃ siddhasaṃghātasevitam |
ūcurāgamya munayastāmatho madhurākṣaram || 304 ||
[Analyze grammar]

putri kaste vyavasitaḥ kāmaḥ kamalalocane |
tānuvāca tato devī sādaraṃ gauravānmunīn || 305 ||
[Analyze grammar]

devyuvāca |
tapasyaṃto mahābhāgāḥ prohya maunaṃ bhavādṛśāṃ |
vaṃdanāya niyuktā dhīryācayatyavikalpitam || 306 ||
[Analyze grammar]

suprasannamukhā yūyaṃ gṛhītvāsanamāditaḥ |
upaviṣṭāḥ śramaṃ muktvā tataḥ prakṣyatha māmanu || 307 ||
[Analyze grammar]

ityuktāste tataścakrustatrāsanaparigraham |
sā ca tānvidhivatpūrvaṃ pūjayitvā vidhānataḥ || 308 ||
[Analyze grammar]

uvācādityasaṃkāśānmunīnsaptaṝṣīnśanaiḥ |
tyaktvā vratātmakaṃ maunaṃ natvā ca vidhivanmunīn || 309 ||
[Analyze grammar]

bhagavaṃtopi maunāṃte tasyāḥ saptarṣayopyatha |
gauravādhāratāṃ prāptāṃ papracchustāṃ punastathā || 310 ||
[Analyze grammar]

sāpi gauravagarbheṇa manasā cāruhāsinī |
munīnsarvāṃstathālokya provāca prohya vāgyamam || 311 ||
[Analyze grammar]

bhagavaṃto vijānītha prāṇināṃ manasepsitam |
śarīrādibhiratyarthaṃ kadarthyaṃ te hi dehinaḥ || 312 ||
[Analyze grammar]

kecittu nipuṇāstatra ghaṭaṃte vividhodyamaiḥ |
upāyairdurlabhānbhāvānprāpnuvaṃti hyataṃdritāḥ || 313 ||
[Analyze grammar]

apare tu paricchidya nānākārānupakramān |
dehāṃtarārthaṃ sāraṃbhamāśrayaṃti hi tadvratam || 314 ||
[Analyze grammar]

mamatvākāśasaṃbhūtakusumasragvibhūṣitam |
viṃdhyaśṛṃgaṃ spraṣṭukāmo hastaḥ prasarate muhuḥ || 315 ||
[Analyze grammar]

ahaṃ kila bhavaṃ devaṃ patiṃ prāptuṃ samudyatā |
prakṛtyaiva durārādhyaṃ tapasyaṃtaṃ ca saṃprati || 316 ||
[Analyze grammar]

surāsurairanirṇītaṃ paramārthakriyāśrayaṃ |
sāṃprataṃ cāpi nirdagdho madano vītarāgiṇā || 317 ||
[Analyze grammar]

kathamārādhayedīśaṃ mādṛśī tādṛśaṃ śivam |
ityuktā munayaste tu sthiratāṃ manasastataḥ || 318 ||
[Analyze grammar]

jñātumasyā vacaḥ procuḥ prakramātprakṛtārthakam |
munaya ūcuḥ |
dvividhantu sukhaṃ tāvatputri loke vibhāvyate || 319 ||
[Analyze grammar]

śarīrasyāsya saṃyogaścetasaścāpi nirvṛtiḥ |
prakṛtyā tu sa digvāsā bhīmo bhasmāsthibhūṣaṇaḥ || 320 ||
[Analyze grammar]

kapālī bhikṣuko nagno virūpākṣo'sthirakriyaḥ |
pramattonmattakākāro bībhatso kṛtasaṃgrahaḥ || 321 ||
[Analyze grammar]

patyā na tena cāstyartho mūrtānarthena kāṃkṣitaḥ |
yadi svasya śarīrasya sukhamicchasi śāśvatam || 322 ||
[Analyze grammar]

tatkathaṃ te mahādevādbhūtabhājo jugupsitāt |
sravannaravasāsāsthikapālakṛtabhūṣaṇāt || 323 ||
[Analyze grammar]

śvasadugrabhujaṃgendrakṛtabhūṣaṇabhūṣitāt |
śmaśānavāsino raudrapramathānugatādapi || 324 ||
[Analyze grammar]

surendramakuṭavrātanighṛṣṭacaraṇo'rihā |
harirasti jagaddhātā śrīkānto'nantamūrtimān || 325 ||
[Analyze grammar]

japyo yajñabhujāmasti tathendraḥ pākaśāsanaḥ |
devatānāṃ nidhiścāsti jvalanassarvakāmadhuk || 326 ||
[Analyze grammar]

vāyurasti jagaddhātā yaḥ prāṇassarvadehinām |
tathā vaiśravaṇo rājā sarvārthamahimā prabhuḥ || 327 ||
[Analyze grammar]

ebhya ekatamaṃ kasmānna tvaṃ saṃprāptumicchasi |
utānyasmādiha prāpyaṃ sukhaṃ te manase hitam || 328 ||
[Analyze grammar]

evametattathā putri prabhāvo lokasampadām |
asmindehe pare vāpi kalyāṇaprāptaye tava || 329 ||
[Analyze grammar]

piturevāsti te sarvaṃ surebhyo yanniveditam |
varasya prāptaye kleśassa cāpyatrāphalastaruḥ || 330 ||
[Analyze grammar]

prāyeṇa prārthito hyarthassamartho hyatidurlabhaḥ |
svasthānaviniyogitvātputri tatrāpi labhyate || 331 ||
[Analyze grammar]

ityuktavatsu kupitā munivaryeṣu śailajā |
uvāca krodharaktākṣī visphuraddaśanacchadā || 332 ||
[Analyze grammar]

devyuvāca |
asadgrahasya kā nītirvyasanasya kva yaṃtraṇā |
viparītārthaboddhāraḥ satpathe kena yojitāḥ || 333 ||
[Analyze grammar]

evaṃ māṃ vittha duṣprajñāmasthānāsadgrahapriyām |
na māṃ prativicārosti yadahaṃkāramāninī || 334 ||
[Analyze grammar]

prajāpatisamāḥ sarve bhavaṃtaḥ sarvadarśinaḥ |
na nūnaṃ vittha taṃ devaṃ śāśvataṃ jagataḥ prabhum || 335 ||
[Analyze grammar]

ajamīśānamavyaktamameyamahimodayam |
āstāṃ tatkarmasadbhāvaṃ saṃbodhaṃ tāvadāvṛtam || 336 ||
[Analyze grammar]

vidustaṃ na hari brahmamukhā api sureśvarāḥ |
yattasyavibhavaṃ svotthaṃ bhuvaneṣu vijṛṃbhitam || 337 ||
[Analyze grammar]

prakaṭaṃ sarvabhūtānāṃ tadapyatha na vittha kiṃ |
kasyaitadgaganaṃ mūrtiḥ kasyāgniḥ kasya mārutaḥ || 338 ||
[Analyze grammar]

kasya bhūḥ kasya varuṇaḥ kaścaṃdrārkavilocanaḥ |
kasyārcayaṃti lokeṣu liṃgaṃ bhaktyā surāsurāḥ || 339 ||
[Analyze grammar]

yacca brahmeśvarā devā viṣṇvindrādyā maharṣayaḥ |
prabhāvaṃ prabhavaṃ vāpi teṣāmapi na vittha kiṃ || 340 ||
[Analyze grammar]

aditeḥ kaśyapājjātā devā nārāyaṇādayaḥ |
marīceḥ kaśyapaḥ putro hyaditirdakṣaputrikā || 341 ||
[Analyze grammar]

marīciścāpi dakṣaśca putrau tau brahmaṇaḥ kila |
brahmā hiraṇmayādaṃḍādeva siddhavibhūtikaḥ || 342 ||
[Analyze grammar]

kasya prādurabhūddhyānātprākṛtaḥ prākṛtāṃśakaḥ |
atha nārāyaṇenaiva svakīyecchā samāśrayāt || 343 ||
[Analyze grammar]

tatpreritaḥ prayātveṣa janma nārāyaṇātmakam |
sāpi karmaṇa evoktā preraṇāvivaśātmanām || 344 ||
[Analyze grammar]

yathonmādādi duṣṭasya matireva hi sābhavet |
iṣṭāneva padārthānvai viparītānhi manyate || 345 ||
[Analyze grammar]

lokasya vyavahāreṣu dṛṣṭeṣu hasate sadā |
dharmādharmaphalaprāptau viṣṇumeva nibodhata || 346 ||
[Analyze grammar]

vidadhvamitthaṃ munayo'sakṛcca me giraṃ girīśaśrutibhūmisannidhau |
utkṛṣṭakedāra ivāvanītale subījamuṣṭiṃ suphalāya karṣakāḥ || 347 ||
[Analyze grammar]

te tāṃ śrutvā hi tāṃ ramyāṃ prakramātprakramakriyām |
vācaṃvācāṃ patiprakhyāḥ procuścasmitasuṃdarāḥ || 348 ||
[Analyze grammar]

munaya ūcuḥ |
jāte lokavidhāne tu satyaṃ tatkāryamuttamam |
prāyaḥ prāleyaśailasya śaṃkā tatkālarūpiṇaḥ || 349 ||
[Analyze grammar]

satyamutkaṃṭhitāḥ sarve ye ye kāryārthamudyatāḥ |
teṣāṃ tvaraṃte cetāṃsi kiṃtu nāmamahātmanām || 350 ||
[Analyze grammar]

lokayātrānugaṃtavyā viśeṣeṇa vivakṣitaiḥ |
yatastaddharmamedhaṃte tatprāmāṇyaṃ pare dhṛtāḥ || 351 ||
[Analyze grammar]

ityuktvā munayo jagmustvaritāstuhinācalam |
tatra te pūjitāstena himaśailena sādaram || 352 ||
[Analyze grammar]

ūcurmunivarāḥ prītāḥ svalpakaṃ tu tvarānvitāḥ |
munaya ūcuḥ |
devo duhitaraṃ sākṣātpinākī tava mārgate || 353 ||
[Analyze grammar]

tacchīghraṃ pāvayātmānamāhutyevānale hutam |
kāryaṃ hi tacca devānāṃ suciraṃ parivartate || 354 ||
[Analyze grammar]

jagaduddhāraṇāyaiṣa vidhātavyaḥ samudyamaḥ |
ityuktastu tadā śailo harṣāveśavaśānmunīn || 355 ||
[Analyze grammar]

asamarthobhavadvaktumuttaraṃ prārthayanniva |
tato menā munīnvaṃdya provāca snehaviklavā || 356 ||
[Analyze grammar]

duhitustānmunīṃścaiva vacanaṃ svayamarthavat |
menovāca |
yadarthaṃ duhiturjanma cecchaṃtyapi mahāphalaṃ || 357 ||
[Analyze grammar]

tadevopasthitaṃ sarvaṃ prakrameṇaiva sāṃpratam |
kulajanmavayorūpavibhutvaissahitopi yaḥ || 358 ||
[Analyze grammar]

varastasyāpi nāhūya sutā deyā hyayācataḥ |
digvāsā jaṭilaḥ śūlī dagdhakāmopi kāmadaḥ || 359 ||
[Analyze grammar]

sa tu matsutayā ghoraḥ kathaṃ nāma upāsyate |
munaya ūcuḥ |
aiśvaryamavagacchasva śaṃkarasya surāsurāḥ || 360 ||
[Analyze grammar]

ārādhyamānapādābja yugalāśca sunirvṛtāḥ |
yasyopayogi yadrūpaṃ tena tatprārthyate ciram || 361 ||
[Analyze grammar]

ghoraṃ tapasyate bālā tena rūpeṇa nirvṛtā |
yatsā vratāni divyāni nayiṣyati samāpanam || 362 ||
[Analyze grammar]

tadatrāvahitā tāvadasmāsveva bhaviṣyati |
ityuktvā giriṇā sārddhaṃ yayuryatrāsti śailajā || 363 ||
[Analyze grammar]

jitārkajvalanajvālā tapastejomayīhyumā |
proktā sā munibhiḥ snigdhaṃ māninyāha vacorthavat || 364 ||
[Analyze grammar]

nāhaṃ kṣudrātkilecchāmi ṝte śarvātpinākinaḥ |
sthitaṃ ca tāratamyena prāṇināṃ paramarddhidaṃ || 365 ||
[Analyze grammar]

dhīrataiśvaryakāryāṇi pramāṇamatulaṃ mahat |
yasmānna kiṃcidaparaṃ yacca yasmātpravartate || 366 ||
[Analyze grammar]

yasyaiśvaryamanādyaṃtaṃ tamahaṃ śaraṇaṃ gatā |
samaḥ savyavasāyaśca dīrgheṇa viparītakaḥ || 367 ||
[Analyze grammar]

evaṃ niśamya te vācaṃ devyā munivarāstadā |
ānaṃdāśruparītākṣāḥ sasvajustāṃ tapasvinīṃ || 368 ||
[Analyze grammar]

ūcuśca paramaprītāḥ śailajāṃ madhuraṃ vacaḥ |
ṝṣaya ūcuḥ |
atyadbhutamaho putri jñānamūrtirivāmalā || 369 ||
[Analyze grammar]

prasādayasi no bhāvaṃ bhavabhāvapratiśrayāt |
nanu vidmo vayaṃ tasya devasyaiśvaryamadbhutam || 370 ||
[Analyze grammar]

tvanniścayasya dṛḍhatāṃ vettuṃ vayamihāgatāḥ |
acirādeva tanvaṃgi kāmastveṣa bhaviṣyati || 371 ||
[Analyze grammar]

ādityassa prabho yāti ratnebhyaḥ kā dyutiḥ pṛthak |
ko'rtho varṇānsvakāṃstyaktvā tathā tvaṃ giriśaṃ vinā || 372 ||
[Analyze grammar]

yāmo nekābhyupāyena tamabhyarthayituṃ vayam |
asmākamapi caiṣorthaḥ sutarāṃ hṛdi vartate || 373 ||
[Analyze grammar]

atastvameva sā buddhiryato nītistvameva hi |
ato niḥsaṃśayaṃ kāryaṃ śaṃkaropi vidhāsyati || 374 ||
[Analyze grammar]

ityuktvā pūjitāssarve munayo girikanyayā |
prayayurgiriśaṃ draṣṭuṃ prasthaṃ himavato mahat || 375 ||
[Analyze grammar]

gaṃgāṃbhaḥ plāvitātmānaḥ piṃgābaddhajaṭāsaṭāḥ |
bhṛṃgānuyātapāṇistha maṃdārakusumasrajaḥ || 376 ||
[Analyze grammar]

saṃprāpya tu gireḥ prasthaṃ dadṛśuḥ śaṃkarāśramam |
praśāṃtāśeṣasatvaughaṃ paryastimitakānanam || 377 ||
[Analyze grammar]

niḥśabdakṣobhasalila prayātaṃ sarvato diśam |
tatrāpaśyaṃstatodvāri vīrakaṃ vetrapāṇinam || 378 ||
[Analyze grammar]

tamete munayaḥ pūjyā vinītāḥ kāryagauravāt |
ūcurmadhurabhāṣābhiste vācaṃ vāgmināṃ varāḥ || 379 ||
[Analyze grammar]

draṣṭuṃ vayamihāyātāḥ śaṃkaraṃ guṇanāyakaṃ |
trilocanaṃ vijānīhi surakāryapracoditāḥ || 380 ||
[Analyze grammar]

tvameva no gatistatra yathākālānatikramaḥ |
syātprārthanaiṣā prāyeṇa pratīhāramayī prabho || 381 ||
[Analyze grammar]

ityukto munibhiḥ sotha gauravāttānuvāca ha |
savanasyāparāṃ saṃdhyāṃ kartuṃ maṃdākinīṃ gataḥ || 382 ||
[Analyze grammar]

kṣaṇena bhāvitā viprāstato drakṣyatha śūlinam |
ityuktā munayastasthuryatnātkāryavicakṣaṇāḥ || 383 ||
[Analyze grammar]

gaṃbhīrāṃbudharaṃ prāvṛṭtṛṣitāścātakā yathā |
tathā kṣaṇena niṣpanna samācārakriyāvidhim || 384 ||
[Analyze grammar]

vīrāsanakṛtoddeśaṃ mṛgacarmaniyāmitam |
tato vinīto jānubhyāmavalaṃbya mahīṃ mudā || 385 ||
[Analyze grammar]

uvāca vīrako devaṃ praṇayaikasamāśrayam |
saṃprāptā munayaḥ sapta draṣṭuṃ tvāṃ dīptatejasaṃ || 386 ||
[Analyze grammar]

vibho samādiśa draṣṭuṃ tato dhyānamihārhasi |
ityukto dhūrjaṭistena vīrakeṇa mahātmanā || 387 ||
[Analyze grammar]

bhrūbhaṃgasaṃjñayā teṣāṃ praveśājñāṃ dadau tadā |
mūrddhakaṃpena tānsapta vīrakopi mahāmunīn || 388 ||
[Analyze grammar]

ājuhāva vidūrasthāndarśanāya pinākinaḥ |
tvarābaddhajaṭāste ca laṃbakṛṣṇānijāṃbarāḥ || 389 ||
[Analyze grammar]

viviśurvedikāṃ divyāṃ girīśasya vibhostataḥ |
baddhapāṇipuṭā kṣipta nākapuṣpottkarāstataḥ || 390 ||
[Analyze grammar]

pinākipādayugalaṃ vaṃdya nākanivāsinaḥ |
tataḥ snigdhekṣitāḥ saṃto munayaḥ śūlapāṇinā || 391 ||
[Analyze grammar]

girīśaṃ te tato dṛṣṭvā te samaṃ tuṣṭavurmudā || 392 ||
[Analyze grammar]

munaya ūcuḥ |
aho kṛtārthā vayameva sāṃprataṃ sureśvarairvaṃditapādapallavam |
vilokayāmo guṇagauravarddhibhiḥ samādiśeḥ kāryamaśeṣarakṣaṇam || 393 ||
[Analyze grammar]

tataḥ prahasya sarvajña uvāca munisattamān |
bhavatāṃ yaddhṛdigataṃ kāryaṃ tatkurutādhunā || 394 ||
[Analyze grammar]

ityuktā munayastūrṇaṃ yayuryatra ca śailajā |
babhāṣire vibhāgajñā girijāṃ girigahvare |
ramyaṃ priyamanohāri mārūpaṃ tapasādaha || 395 ||
[Analyze grammar]

prītaste śaṃkaraḥ pāṇimeṣa pratigrahīṣyati |
vayamarthitavaṃtaste pitaraṃ pūrvamāgatāḥ || 396 ||
[Analyze grammar]

pitrā saha gṛhaṃ gaccha vayaṃ yāmaḥ svamaṃdiraṃ |
ityuktā tapasaḥ satyaṃ phalamastīti ciṃtya sā || 397 ||
[Analyze grammar]

tvaramāṇā yayau veśma piturdivyaṃ suśobhitaṃ |
sā tatra rajanīṃ mene varṣāyutasamāṃ satī || 398 ||
[Analyze grammar]

haradarśanasaṃjāta samutkaṃṭhā himādrijā |
tato muhūrtte brāhme tu tasyāścakruḥ suhṛtkriyāṃ || 399 ||
[Analyze grammar]

nānāmaṃgalasaṃdohānyathāvatkramapūrvakam |
divyamaṃgalasaṃyogānmaṃdire bahumaṃgale || 400 ||
[Analyze grammar]

upāsata giriṃ mūrttā ṝtavaḥ sarvakāmikāḥ |
vāyavaḥ sukhadāścāsansaṃmārjanavidhau gireḥ || 401 ||
[Analyze grammar]

harmyeṣu śrīḥ svayaṃ devī kṛtanānā prasādhanā |
kāṃtiḥ sarveṣu bhāveṣu ṝddhiśca bharaṇākulā || 402 ||
[Analyze grammar]

ciṃtāmaṇiprabhṛtayo ratnāśśailaṃ samaṃtataḥ |
upatasthurlatāścāpi kalpakādyā mahādrumāḥ || 403 ||
[Analyze grammar]

oṣadhyo mūrtimatyaśca divyauṣadhisamanvitāḥ |
rasāśca dhātavaścaiva sarve śailasya kiṃkarāḥ || 404 ||
[Analyze grammar]

kiṃkarāstasya śailasya vyagrāścāśramavartinaḥ |
nadyaḥ samudrā nikhilāḥ sthāvaraṃ jaṃgamaṃ ca yat || 405 ||
[Analyze grammar]

te sarve himaśailasya mahimānamavarddhayan |
abhavanmunayo nāgā yakṣā gaṃdharvakinnarāḥ || 406 ||
[Analyze grammar]

śaṃkarasyāpi vibudhā gaṃdhamādanaparvate |
sajjamaṃḍanasaṃbhārāstasthurnirmala mūrttayaḥ || 407 ||
[Analyze grammar]

śarvasyātha jaṭājūṭe caṃdrakhaṃḍaṃ pitāmahaḥ |
babaṃdha praṇayodāra visphāritavilocanaḥ || 408 ||
[Analyze grammar]

kapālamālāṃ vipulāṃ cāmuṃḍā mūrdhni badhnatī |
uvāca giriśaṃ kālī putraṃ janaya śaṃkara || 409 ||
[Analyze grammar]

yo daityeṃdrakulaṃ hatvā māṃ raktaistarpayiṣyati |
śaurirvataṃsikāratnaṃ kaṃṭhābharaṇamujvalam || 410 ||
[Analyze grammar]

bhujaṃgābharaṇaṃ gṛhya sajjaśśaṃbhoḥ puro'bhavat |
śakro gajājinaṃ tasya vasābhyaktāgrapallavam || 411 ||
[Analyze grammar]

dadhre sarabhasaṃ svidyadvistīrṇa mukhapaṃkajam |
vāyavaśca vavustīkṣṇāstīkṣṇaṃ himagiriprabham || 412 ||
[Analyze grammar]

vṛṣaṃ vibhūṣayāmāsurharayānaṃ manojavam |
virejurnayanāntasthāḥ śaṃbhoḥ sūryānaleṃdavaḥ || 413 ||
[Analyze grammar]

svāṃ dyutiṃ lokanāthasya jagataḥ karmasākṣiṇaḥ |
citābhasmasamādhatta kapāle rajataprabham || 414 ||
[Analyze grammar]

manujāsthimayīṃ mālāṃ nibaṃbaṃdha ca pāṇinā |
pretādhipaḥ pure dūre sabhayaḥ samavartata || 415 ||
[Analyze grammar]

nānākāramahāratnabhūṣaṇaṃ dhanadāhṛtam |
vihāyodīptasarpeṃdra kaṭakena svapāṇinā || 416 ||
[Analyze grammar]

karṇottaṃsaṃ cakāreśo hyamalaṃ takṣakaṃ svayam |
niṣpannābharaṇaṃ caiva prasādhyeśaṃ prasādhanaiḥ || 417 ||
[Analyze grammar]

tatrāpyeṣā niyamato hyabhavanvyagramūrtayaḥ |
mumocābhinavānsarvaramyaśālirasauṣadhīn || 418 ||
[Analyze grammar]

vyagrā tu pṛthivī devī sarvabhāvātmanoramā |
gṛhītvā varuṇaḥ sākṣādratnāḍhyābharaṇāni ca || 419 ||
[Analyze grammar]

puṣpāṇi ca vicitrāṇi nānāratnamayāni tu |
tasthau sābharaṇo devaḥ sarvajñaḥ sarvadehinām || 420 ||
[Analyze grammar]

jvalanaścāpi divyāni haimānyābharaṇāni ca |
jātarūpapavitrāṇi prayataḥ samupasthitaḥ || 421 ||
[Analyze grammar]

vāyurvavau ca surabhiḥ sukhasaṃsparśano vibhum |
chatraṃ caṃdrakaroddāmaṃ hāsitaṃ ca śatakratuḥ || 422 ||
[Analyze grammar]

jagrāha muditaḥ śrīmānbāhubhirvajrabhūṣaṇaḥ |
jagurgaṃdharvamukhyāśca nanṛtuścāpsarogaṇāḥ || 423 ||
[Analyze grammar]

vādayaṃtotimadhuraṃ jagurgaṃdharvakinnarāḥ |
muhūrtādṛtavastatra jaguśca nanṛtuśca vai || 424 ||
[Analyze grammar]

capalāśca gaṇāstasthurloḍayaṃto himācalam |
upaviṣṭaḥ kramāddhātā viśvakṛdbhaganetrahā || 425 ||
[Analyze grammar]

cakāraudvāhikaṃ kṛtyaṃ patnyā saha yathoditam |
dattārghyo girirājena suravṛṃdairvinoditaḥ || 426 ||
[Analyze grammar]

avasattāṃ kṣapāṃ tatra patnyā saha purāṃtakaḥ |
tato gaṃdharvagītena nṛtyenāpsarasāmapi || 427 ||
[Analyze grammar]

stutibhirdevadaityānāṃ vibuddho vibudhādhipaḥ |
āmaṃtrya himaśaileṃdraṃ prabhāte jāyayā saha || 428 ||
[Analyze grammar]

jagāma maṃdaragiriṃ vāyuvegena śṛṃgiṇā |
tato gate bhagavati nīlalohite sahomayā ratimanubhūtabhūdharaḥ || 429 ||
[Analyze grammar]

sabāṃdhavo bhavati hi kasya no mano viśṛṃkhalaṃ jagati hi kanyakā pituḥ |
purodyāneṣu ramyeṣu vivikteṣu vaneṣu ca || 430 ||
[Analyze grammar]

suraktahṛdayo devyā vijahāra bhagākṣihā |
tato bahutithe kāle putranāmnā gireḥ sutā || 431 ||
[Analyze grammar]

sakhībhiḥ sahitā krīḍāṃ cakre kṛtrima putrakaiḥ |
kadācidgaṃdhatailena gātramabhyajya śailajā || 432 ||
[Analyze grammar]

cūrṇairudvartayāmāsa malenāpūritāṃ tanum |
tadudvarttanakaṃ gṛhya naraṃ cakre gajānanam || 433 ||
[Analyze grammar]

puruṣaṃ krīḍatī devī taccāpyakṣipadaṃbhasi |
jāhnavyā śivayā sakhyā tataḥ sobhūdbṛhattanuḥ || 434 ||
[Analyze grammar]

kāyenātiviśālena jagadāpūrayattadā |
putretyuvāca taṃ devī putretyūce ca jāhnavī || 435 ||
[Analyze grammar]

gāṃgeya iti devaistu pūjito'bhūdgajānanaḥ |
vināyakādhipatyaṃ ca dadāvasya pitāmahaḥ || 436 ||
[Analyze grammar]

punaḥ sā krīḍatī cakre taruṃ ca varavarṇinī |
manojñamaṃkuraṃ rūḍhamaśokasya śubhānanā || 437 ||
[Analyze grammar]

varddhayāmāsa taṃ cāpi kṛtasaṃskāramaṃgalam |
bṛhaspatimukhairviprairdivaspatipurohitaiḥ || 438 ||
[Analyze grammar]

tato devaiḥ samunibhiḥ proktā devī tvidaṃ vacaḥ |
adhunā darśite mārge maryādāṃ kartumarhasi || 439 ||
[Analyze grammar]

phalaṃ kiṃ bhavitā devi kalpitaistaruputrakaiḥ |
ityuktā harṣapūrṇāṃgī provācātiśubhāṃ giraṃ || 440 ||
[Analyze grammar]

ekaṃ nirudake grāme yaḥ kūpaṃ kārayedbudhaḥ |
biṃdaubiṃdau ca toyasya sa vasedvatsaraṃ divi || 441 ||
[Analyze grammar]

daśakūpasamāvāpī daśavāpīsamo hradaḥ |
daśahradasamā kanyā daśakanyāsamo drumaḥ || 442 ||
[Analyze grammar]

eṣā vai śubha maryādā niyatā lokabhāvinī |
ityuktāstu tato viprā bṛhaspatipurogamāḥ || 443 ||
[Analyze grammar]

jagmuḥ svamaṃdirāṇyeva bhavānīṃ vaṃdya mātaraṃ |
gateṣu teṣu devopi śaṃkaraḥ parvatātmajāṃ || 444 ||
[Analyze grammar]

pāṇinālambyamānena na svamāvāsamagacchata |
cittaprasādajananaṃ prāsādāṭṭālagopuraṃ || 445 ||
[Analyze grammar]

laṃbamauktikadāmānaṃ mālikākulavedikaṃ |
sunaddhakaladhautaṃ ca krīḍāgṛhamanogataṃ || 446 ||
[Analyze grammar]

prakīrṇakusumāmoda mattālikulakūjitam |
kinnarodgītasaṃgīta gṛhāṃtaritabhittikam || 447 ||
[Analyze grammar]

sugaṃdhidhūpasaṃghātaṃ manaḥprāpyamalakṣitaṃ |
krīḍāmayūranārībhirabhito rabhasārpitaṃ || 448 ||
[Analyze grammar]

haṃsasaṃghātasaṃdiṣṭa sphaṭikastabhaṃtoraṇaṃ |
anāvilamasaṃbhrāṃtyā bahuśaḥ kinnarākulaṃ || 449 ||
[Analyze grammar]

śukairyatrābhidṛśyaṃte padmarāgavinirmitāḥ |
bhittayo jātisaṃbhrāṃtyā pratibiṃbitamauktikāḥ || 450 ||
[Analyze grammar]

tatrākṣaiḥ priyayā devo vihartumupacakrame |
svacheṃdranīlabhūbhāge krīḍaṃtau yatra saṃsthitau || 451 ||
[Analyze grammar]

vapuḥ sahāyatāṃ prāptau vinodarasanirvṛtau |
evaṃ prakrīḍatostatra devīśaṃkarayostadā || 452 ||
[Analyze grammar]

prādurbhūto mahāśabdaḥ patitāṃbaragocaraḥ |
tacchrutvā kautukāddevī kimetaditi śaṃkaram || 453 ||
[Analyze grammar]

paryapṛcchatsuravaraṃ haraṃ vismitapūrvakaṃ |
uvāca devo naitatte dṛṣṭapūrvaṃ śucismite || 454 ||
[Analyze grammar]

ete gaṇeśāḥ krīḍaṃte śailesminmatpriyāḥ sadā |
tapasā brahmacaryeṇa nāmabhiḥ kṣetrasevanaiḥ || 455 ||
[Analyze grammar]

yairahaṃ toṣitaḥ pūrvaṃ ta ete manujottamāḥ |
matsamīpamanuprāptā mama hṛdyāḥ śubhānane || 456 ||
[Analyze grammar]

kāmarūpā mahotsāhā mahārūpaguṇānvitāḥ |
karmabhirvismayaṃ teṣāṃ prayāmi balaśālinām || 457 ||
[Analyze grammar]

sāmarasyāsya jagataḥ sṛṣṭisaṃharaṇakṣamāḥ |
brahmacandreṃdra gaṃdharvaissakinnaramahoragaiḥ || 458 ||
[Analyze grammar]

vivarjitopyahaṃ nityaṃ naibhirvirahito rame |
hṛdyā me cārusarvāṅgi ta ete krīḍitā girau || 459 ||
[Analyze grammar]

ityuktā tu tadā devī tyaktvā taṃ vismayākulā |
gavākṣāṃtaramāsādya prekṣate cakitānanā || 460 ||
[Analyze grammar]

yāvaṃtaste kṛśā dīrghā hrasvāḥ sthūlā mahodarāḥ |
vyāghrebhavadanāḥ kecitkecinmeṣājarūpiṇaḥ || 461 ||
[Analyze grammar]

anekaprāṇirūpāśca jvālāsyāḥ kṛṣṇapiṃgalāḥ |
saumyā bhīmāḥ smitamukhāḥ kṛṣṇapiṃgajaṭāssadā || 462 ||
[Analyze grammar]

nānāvihaṃgavadanā nānāvidhasurānanāḥ |
kauśeyacarmavasanā nagnāścānyo virūpiṇaḥ || 463 ||
[Analyze grammar]

gokarṇā gajakarṇāśca bahuvaktrekṣaṇodarāḥ |
bahupādā bahubhujā divyanānāstrapāṇayaḥ || 464 ||
[Analyze grammar]

anekakusumāpīḍā nānāvyākulabhīṣaṇāḥ |
kṛtanānāyudhadharā nānākavacabhūṣaṇāḥ || 465 ||
[Analyze grammar]

vicitravāhanārūḍhā divyarūpā viyaccarāḥ |
vīṇāvādyaravodghuṣṭā nānāsthānakanartakāḥ || 466 ||
[Analyze grammar]

gaṇeśāṃstāṃstathā dṛṣṭvā devī provāca śaṃkaram |
devyuvāca |
gaṇeśāḥ katisaṃkhyātāḥ kiṃnāmānaḥ kimātmakāḥ || 467 ||
[Analyze grammar]

ekaikaśo mama brūhi niṣṭhitā ye pṛthakpṛthak |
śaṃkara uvāca |
koṭikoṭiśca saṃkhyātā nānāvikhyātapauruṣāḥ || 468 ||
[Analyze grammar]

jagadāpūritaṃ sarvamebhirbhīmairmahābalaiḥ |
siddhakṣetreṣu rathyāsu jīrṇodyāneṣu veśmasu || 469 ||
[Analyze grammar]

dānavānāṃ śarīreṣu bāleṣūnmattakeṣu ca |
ete viśaṃti muditā nānāhāravihāriṇaḥ || 470 ||
[Analyze grammar]

ūṣmapāḥ phenapāścaiva dhūmapā madhupāyinaḥ |
medāhārārudhirapāssarvabhakṣā hyabhojanāḥ || 471 ||
[Analyze grammar]

devādāstāpasāhārā nānāvādyaratipriyāḥ |
na hi vaktumanaṃtatvācchakyante hi gaṇāḥ pṛthak || 472 ||
[Analyze grammar]

devyuvāca |
nāgatvaguttarāsaṃgaḥ śuddhāṃgo muṃjamekhalī |
manaḥśilena kalkena capalo raṃjitānanaḥ || 473 ||
[Analyze grammar]

bhṛṃgadaṣṭotpalānāṃ ca sragdāmā madhurākṛtiḥ |
pāṣāṇaśakalottāna kāṃsyatālapravartakaḥ || 474 ||
[Analyze grammar]

asau gaṇeśvaro deva kiṃnāmā kinnarānugaḥ |
ya eṣa gaṇagīteṣu dattakarṇo muhurmuhuḥ || 475 ||
[Analyze grammar]

śarva uvāca |
sa eṣa vīrako devi sadā me hṛdayapriyaḥ |
nānāścaryaguṇādhāro gaṇeśvara gaṇārcitaḥ || 476 ||
[Analyze grammar]

devyuvāca |
īdṛśasya sutasyāsti mamotkaṃṭhā purāṃtaka |
kadāhamīdṛśaṃ putraṃ drakṣyāmyānaṃdadāyakaṃ || 477 ||
[Analyze grammar]

śarva uvāca |
eṣa eva sutastestu nayanānaṃdakārakaḥ |
tvayā mātrā kṛtārtho hi vīrakopi sumadhyame || 478 ||
[Analyze grammar]

ityuktvā preṣayāmāsa vijayāṃ harṣaṇotsukāṃ |
vīrakānayanāyāśu duhitā bhūbhṛtaḥ sakhīṃ || 479 ||
[Analyze grammar]

sāvaruhya tvarāyuktā prāsādādaṃbaraspṛśaḥ |
gaṇapaṃ gaṇamadhyasthaṃ sūryakoṭipravartanam || 480 ||
[Analyze grammar]

vijayovāca |
ehi vīraka cāpalyāttvayā devī pratoṣitā |
tvāmāhvayati cetyuktastyaktvā pāṣāṇakhaṃḍakam || 481 ||
[Analyze grammar]

devyāḥ sapīpamāgacchadvijayānugataḥ śanaiḥ |
prāsādaśikharotphullaraktāṃbujanibha dyutiḥ || 482 ||
[Analyze grammar]

taṃ dṛṣṭvā prasthitānalpasvādukṣīrapayodharā |
girijovāca |
piba kṣīramidaṃ vatsa srutaṃ piba yathecchakam || 483 ||
[Analyze grammar]

uvāca devī sasnehaṃ girā madhuravarṇayā |
ehi sadyo hi jātosi me putrako devadevena dattodhunā vīraka || 484 ||
[Analyze grammar]

uktavatyaṃkaādhāya paryaṣvajattaṃ kapole cucuṃbāgarāṇnaṃdinī |
mūrdhnyupāghrāya saṃmārjya gātrāṇi cābhūṣayāmāsa divyaiḥ svayaṃbhūṣaṇaiḥ || 485 ||
[Analyze grammar]

kiṃkiṇīmekhalānūpuraiḥ sanmaṇiprotakeyūrahārairamūlyairguṇaiḥ |
komalaiḥ pallavaiścitritaścārubhirmaṃgalaiḥ kaṃkaṇairdivyamaṃtrodbhavaiḥ || 486 ||
[Analyze grammar]

tasya śuddhaistatobhūribhiścākaronmiśrasiddhārthakairaṅgarakṣāvidhiṃ |
evamādāya covāca kṛtvā srajaṃ mūrdhni gorocanāpatrabhaṃgojjvalaiḥ || 487 ||
[Analyze grammar]

vatsavatsādhunā krīḍa sārddhaṃ gaṇairapramatto vraja śvabhravarjaṃ śanaiḥ |
vyālamālākulāḥ śailasānudrumādaṃtibhirbhagnaśākhāḥ paraṃ bhaṃginaḥ || 488 ||
[Analyze grammar]

jāhnavīmaṃḍalakṣubdhatoyākulaṃ mā viśethā bahuvyāghrajuṣṭe vane |
vatsa saṃkhyeṣu durgeṣu yadvīraka putra bhāvāyatāṃ svacchacitto janaḥ || 489 ||
[Analyze grammar]

prārthitaṃ bhavyamāyātibhāvinyasau bhāvyatāṃ sopi nirvartyasarvairguṇaiḥ |
evamukto'nayā vīrako mātaraṃ sasmayannāha līlāvaśāviṣṭadhīḥ || 490 ||
[Analyze grammar]

eṣa mātrā svayaṃ me kṛtaḥ kaṃkaṇaḥ patrakaścitritaḥ pāṭalairbiṃdubhiḥ |
cārupuṣpairiyaṃ mālatībhiḥ kṛtāmālikā me śirasyāhitā komalā || 491 ||
[Analyze grammar]

toṣayāmīśvarīmityayaṃ satvaraṃ ciṃtayitvā vrajadbāhyataḥ krīḍanam |
svairgaṇaiḥ saṃyuto vīrako harṣito dakṣiṇātpaścimaṃ paścimāduttaram || 492 ||
[Analyze grammar]

uttarātpūrvamabhyetya sakhyāyutā prekṣate taṃ gavākṣāṃtarādvīrakaṃ |
śailaputrī bahiḥ krīḍitāraṃ jagatsnehataḥ putralubdhāyatassotra kaḥ || 493 ||
[Analyze grammar]

mohamāyāti yaḥ svalpavettā jaḍo māṃsaviṇmūtrasaṃghātadehodvahaḥ |
draṣṭumabhyaṃtaraṃ nākavāseśvareṣvindumaulipraviṣṭeṣu kakṣāṃtaram || 494 ||
[Analyze grammar]

vāhanānyevamārohamāṇāstato lokapālāstrapūgaṃ muhūrttāvadhi |
khaḍga eṣo vikhaḍgākaro nirmalaḥ kṛṃtakaḥ kasya kenāhṛto brūta naḥ || 495 ||
[Analyze grammar]

nobhaveddhastadaṃḍena kiṃ brūmahe bhīmamūrtyaṃ gaṇe nāsti kṛtyaṃ girau |
pāśa eṣosti tenātra ko badhyate mā vṛthā lokapālānugāstiṣṭhata || 496 ||
[Analyze grammar]

evamevaitadityabruvaṃste tadā vīkṣya devānugaṃ vīrakaṃ rakṣakaṃ |
prāha devī vane parvate nirjarādhyagniśālāmukhe bhūtale bhūtapāḥ || 497 ||
[Analyze grammar]

nirjharāṃbho nipāteṣu no majjatātpuṣpajālāvanaddheṣu dhāmasvapi |
proccanānādrikuṃjāvagāheṣvatho mārutāsphoṭasaṃrakṣaṇe kāmataḥ || 498 ||
[Analyze grammar]

kāṃcanottuṃga śṛṃgāvarohakṣitau haimareṇūtkarāsaṃgapiṃgadyutiḥ |
khecarāṇāṃ vane cāpi ramye babhau rūpasaṃpatprakārogaṇo vāsitum || 499 ||
[Analyze grammar]

maṃdarekaṃdare cāruvāpītaṭe kundamaṃdārapuṣpapravālāṃbuje |
siddhanārībhirāpītarūpāmṛtaṃ vistṛtairnetramātrairanunmeṣibhiḥ || 500 ||
[Analyze grammar]

vīrakaṃ śailaputrī nimeṣāṃtarādasmaratputragṛdhnurvinodārthinī |
sopi tādṛkkṣaṇāvāptapuṇyodayo yo hi janmāṃtare'syātmajatvaṃ tataḥ || 501 ||
[Analyze grammar]

krīḍatastasya tṛptiḥ kathaṃ jāyate yopi bhāvājyaga dvedhasā tejasā |
kalipataḥprekṣaṇaṃ divyagītakṣaṇaṃ nṛtyalolairgaṇaiśaiḥ pravṛtyakṣaṇaṃ || 502 ||
[Analyze grammar]

siṃhanādākule gaṃḍaśaile jvaladratnajāle bṛhatsālatālekṣaṇam |
phullanānā tamālālikālekṣaṇaṃ vṛkṣamūle vilolomarālekṣaṇam || 503 ||
[Analyze grammar]

svalpapaṃke jale paṃkajāṃkekṣaṇaṃ māturaṃke śubhe niṣkalaṃkekṣaṇam |
parikrīḍate bālalīlāvisārī gaṇeśādhipā devatānaṃdakārī || 504 ||
[Analyze grammar]

nikuṃjeṣu vidyādharodgītaśīlaḥ pinākīva līlāvilāsaiḥ salīlaḥ |
prakāśya bhuvanaṃ gobhistato dinakare gate || 505 ||
[Analyze grammar]

deśāṃtaraṃ tadā paścāddūrastho dharaṇīdharaḥ |
mitratvamasya sudṛḍhaṃ hṛdaye dyotayanniva || 506 ||
[Analyze grammar]

nityamārādhito vipraiḥ śrīmānvighanasaḥ sutaḥ |
nākarotsaviturmerurupakāraṃ patiṣyataḥ || 507 ||
[Analyze grammar]

janeṣveṣā vyavastheti śrūyate sravalito hyadhaḥ |
dinenānugato bhānuḥ svajanaṃ paripūrayan || 508 ||
[Analyze grammar]

saṃdhyābaddhāṃjalipuṭā munayobhimukhā ravim |
yāvadadyāsate śīghraṃ nivāryoṣṇābhibhāvitām || 509 ||
[Analyze grammar]

vyajṛṃbhatātha lokesminkramādvaibhāvaraṃ tamaḥ |
kuṭilasyeva hṛdaye kāluṣyaṃ dūṣayanmanaḥ || 510 ||
[Analyze grammar]

jvalatphaṇiphaṇāratnadīpodyotita bhittike |
śayane śaśasaṃghāta ratnavastrottaracchade || 511 ||
[Analyze grammar]

nānāratnadyutilasacchakracāpaviḍaṃbake |
ratnaiḥ kiṃkiṇijālena lasanmuktākalāpake || 512 ||
[Analyze grammar]

kamanīyacalallīlā vitānācchāditāṃbare |
maṃdare maṃndasaṃcāraṃ gate girisutāyutaḥ || 513 ||
[Analyze grammar]

tasthau girisutā bāhulatā militakaṃdharaḥ |
śaśimauliḥ sitajyotsnāsphārapūritagocaraḥ || 514 ||
[Analyze grammar]

girijāpyasitāpāṃgī nīlotpaladalacchaviḥ |
vibhāvaryā ca saṃpṛktā babhūvātīva gomayī || 515 ||
[Analyze grammar]

tāmuvāca tato devaḥ krīḍākelikalāyutām || 516 ||
[Analyze grammar]