Chapter 22

[English text for this chapter is available]

bhīṣma uvāca |
bhūrlokotha bhuvarlokaḥ svarlokotha maharjanaḥ |
tapaḥ satyaṃ ca saptaite devalokāḥ prakīrttitāḥ || 1 ||
[Analyze grammar]

paryāyeṇa tu sarveṣāmādhipatyaṃ kathaṃ bhavet |
ihaloke śubhaṃ rūpamāyurārogyameva ca || 2 ||
[Analyze grammar]

lakṣmīśca vipulā brahmankathaṃ syātsurapūjita |
pulastya uvāca |
purā hutāśanaḥ sārddhaṃ mārutena mahītale || 3 ||
[Analyze grammar]

ādiṣṭaḥ puruhūtena vināśāya suradviṣām |
nirdagdheṣu tatastena dānaveṣu sahasraśaḥ || 4 ||
[Analyze grammar]

tārakaḥ kamalākṣaśca kāladaṃṣṭraḥ parāvasuḥ |
virocanastu saṃhrādaḥ prayātāste tadā vasan || 5 ||
[Analyze grammar]

aṃtaḥsamudramāviśya sanniveśamakurvata |
aśaktā iti tepyagnimārutābhyāmupekṣitāḥ || 6 ||
[Analyze grammar]

tataḥ prabhṛti vai devānmānuṣānsa bhujaṃgamān |
saṃpīḍya ca munīnsarvānpraviśaṃti punarjalam || 7 ||
[Analyze grammar]

evaṃ yugasahasrāṇi te vīrāḥ sapta paṃca ca |
jaladurgabalādrājanpīḍayaṃti jagattrayam || 8 ||
[Analyze grammar]

tataḥ punaratho vahnimārutāvamarādhipaḥ |
ādideśācirādaṃbu nidhireṣa viśoṣyatām || 9 ||
[Analyze grammar]

yasmādasmaddviṣāṃ caiṣa śaraṇaṃ varuṇālayaḥ |
tasmādbhavadbhyāmadyaiva śoṣameṣa praṇīyatām || 10 ||
[Analyze grammar]

tāvūcatustataḥ śakraṃ mayaśambarasūdanam |
adharma eṣa deveṃdra sāgarasya vināśanam || 11 ||
[Analyze grammar]

yasmājjīvanikāyasya mahataḥ saṃkṣayo bhavet |
tasmādupāyamanyaṃ tu samāśraya puraṃdara || 12 ||
[Analyze grammar]

yasya yojanamātrepi jīvakoṭi śatāni ca |
nivasaṃti suraśreṣṭha sa kathaṃ nāśamarhati || 13 ||
[Analyze grammar]

evamuktaḥ sureṃdrastu krodhasaṃraktalocanaḥ |
uvācedaṃ vaco roṣādamarāvagnimārutau || 14 ||
[Analyze grammar]

na dharmādharmasaṃyogaṃ prāpnuvaṃtyamarāḥ kvacit |
bhavaṃtau tu viśeṣeṇa mahātmānau ca tiṣṭhataḥ || 15 ||
[Analyze grammar]

mamājñā na kṛtā yasmānmārutena samaṃ tvayā |
muṃnivrataparo bhūtvā parigṛhya kalevaram || 16 ||
[Analyze grammar]

dharmārthaśāstrarahitāṃ yoniṃ prati vibhāvaso |
tasmādekena vapuṣā munirūpeṇa mānuṣe || 17 ||
[Analyze grammar]

mārutena samaṃ loke tava janma bhaviṣyati |
yadā tu mānuṣatvepi tvayā gaṃḍūṣaśoṣitaḥ || 18 ||
[Analyze grammar]

bhaviṣyatyudadhirvahne tadā devatvamāpsyasi |
itīṃdraśāpātpatitau tatkṣaṇāttau mahītale || 19 ||
[Analyze grammar]

avāptavaṃtau dehe ca kuṃbhājjanma tatobhavat |
mitrāvaruṇayorvīryādvasiṣṭhaścātmajobhavat || 20 ||
[Analyze grammar]

tatogastya ugratapā babhūva munisattamaḥ |
asmādbhrātuḥ sa vai bhrātā vasiṣṭhasyānujo muniḥ || 21 ||
[Analyze grammar]

bhīṣma uvāca |
kathaṃ ca mitrāvaruṇau pitarāvasya tau smṛtau |
janma kuṃbhādagastyasya yathābhūttadvadādhunā || 22 ||
[Analyze grammar]

pulastya uvāca |
purā purāṇapuruṣaḥ kadācidgaṃdhamādane |
bhūtvā dharmasuto viṣṇuścacāra vipulaṃ tapaḥ || 23 ||
[Analyze grammar]

tapasā cāsya bhītena vighnārthe preṣitāvubhau |
śakreṇa mādhavānaṃgāvapsarogaṇasaṃyutau || 24 ||
[Analyze grammar]

yadā ca gītavādyena bhāvahāvādinā hariḥ |
na kāmamādhavābhyāṃ ca mohaṃ netumaśakyata || 25 ||
[Analyze grammar]

tadā kāmamadhustrīṇāṃ viṣādamabhajadgaṇaḥ |
saṃkṣobhāyata tasteṣāmūrudeśānnarāgrajaḥ || 26 ||
[Analyze grammar]

nārīmutpādayāmāsa trailokyasyāpi mohinīm |
saṃmohitāstayā devāstau tu caiva surāvubhau || 27 ||
[Analyze grammar]

apsarāṇāṃ samakṣaṃ hi devānāmabravīddhariḥ |
urvaśīti ca nāmneyaṃ loke khyātiṃ gamiṣyati || 28 ||
[Analyze grammar]

tataḥ kāmayamānena mitreṇāhūyatorvaśī |
proktā māṃ ramayasveti bāḍhamityabravīcca sā || 29 ||
[Analyze grammar]

gacchaṃtī tu tataḥ sūryalokamiṃdīvarekṣaṇā |
varuṇena vṛtā paścādvacanaṃ tamabhāṣata || 30 ||
[Analyze grammar]

mitreṇāhaṃ vṛtā pūrvaṃ mama sūryaḥ patiḥ prabho |
uvāca varuṇaścittaṃ mayi saṃnyasya gamyatām || 31 ||
[Analyze grammar]

gatāyāṃ bāḍhamityuktvā mitraḥ śāpamadādatha |
adyaiva mānuṣe loke gaccha somasutātmajam || 32 ||
[Analyze grammar]

bhajasveti yato mithyā dharma eṣa tvayā kṛtaḥ |
jalakuṃbhe tato vīryaṃ mitreṇa varuṇena ca || 33 ||
[Analyze grammar]

prakṣiptamatha saṃjātau dvāveva munisattamau |
nimirnāma nṛpaḥ strībhiḥ purā dyūtamadīvyata || 34 ||
[Analyze grammar]

tadaṃtarebhyājagāma vasiṣṭho brahmasaṃbhavaḥ |
tasya pūjāmakurvāṇaṃ śaśāpa sa munirnṛpam || 35 ||
[Analyze grammar]

videhastvaṃ bhavasveti śaptastenāpyasau muniḥ |
anyonyaśāpādubhayorviśarīre tu tejasī || 36 ||
[Analyze grammar]

jagmatuśśāpanāśāya brahmāṇaṃ jagataḥ patim |
atha brahmasamādeśāllocaneṣvavasannimiḥ || 37 ||
[Analyze grammar]

nimeṣāḥ syuścalokānāṃ tadviśrāmāya pārthiva |
vasiṣṭhopyabhavattasmiñjalakuṃbhe ca pūrvavat || 38 ||
[Analyze grammar]

tato jātaścaturbāhuḥ sākṣasūtrakamaṃḍaluḥ |
agastya iti śāṃtātmā babhūva ṛṣisattamaḥ || 39 ||
[Analyze grammar]

malayasyaikadeśe tu vaikhānasa vidhānataḥ |
sabhāryaḥ saṃvṛto vipraistapaścakre suduṣkaram || 40 ||
[Analyze grammar]

tataḥ kālena mahatā tārakādinipīḍitam |
jagadvīkṣyasakopena pītavānvaruṇālayam || 41 ||
[Analyze grammar]

tatosya varadāssarve babhūvuḥ śaṃkarādayaḥ |
brahmāviṣṇuśca bhagavānvaradānāya jagmatuḥ || 42 ||
[Analyze grammar]

varaṃ vṛṇīśva bhadraṃ te yaścābhīṣṭotra vai mune |
agastya uvāca |
yāvadbrahmasahasrāṇāṃ paṃcaviṃśatikoṭayaḥ || 43 ||
[Analyze grammar]

vaimāniko bhaviṣyāmi dakṣiṇāṃbaravartmani |
madvimānodayātkuryādyaḥ kaścitpūjanaṃ mama || 44 ||
[Analyze grammar]

sa saptalokādhipatiḥ paryāyeṇa bhaviṣyati |
yastvāśramaṃ puṣkare tu mannāmnā parikīrtayet || 45 ||
[Analyze grammar]

sa caiva puṇyatāṃ yātu vara eṣa vṛto mayā |
śrāddhaṃ ye'tra kariṣyaṃti piṃḍapūrvaṃ tu bhaktitaḥ || 46 ||
[Analyze grammar]

teṣāṃ pitṛgaṇāssarve mayā saha divi sthitāḥ |
etatkālaṃ vasiṣyaṃti eṣa eva varo mama || 47 ||
[Analyze grammar]

evamastviti tepyuktvā jagmurdevā yathāgatam |
tasmādarghaḥ pradātavyo hyagastyāya sadā budhaiḥ || 48 ||
[Analyze grammar]

bhīṣma uvāca |
kathamarghapradānaṃ ca kartavyaṃ tasya vai muneḥ |
vidhānaṃ yadagastyasya pūjane tadvadasva me || 49 ||
[Analyze grammar]

pulastya uvāca |
pratyūṣa samaye vidvānkuryādasyodaye niśi |
snānaṃ śuklatilaistadvacchuklamālyāṃbaro gṛhī || 50 ||
[Analyze grammar]

sthāpayedavraṇaṃ kuṃbhaṃ mālyavastravibhūṣitam |
paṃcaratnasamāyuktaṃ ghṛtapātreṇasaṃyutam || 51 ||
[Analyze grammar]

aṃguṣṭhamātraṃ puruṣaṃ tathaiva suvarṇamadhyāyatabāhudaṃḍam |
caturbhujaṃ kuṃbhamukhe nidhāya dhānyāni saptācalasaṃyutāni || 52 ||
[Analyze grammar]

sakāṃsyapātrākṣataśuklayuktaṃ maṃtreṇa dadyāddvijapuṃgavāya |
utkṣipya kuṃbhoparidīrghabāhumananyacetā yamadiṅmukhastham || 53 ||
[Analyze grammar]

śvetāṃ ca dadyādyadiśaktirasti raupyaiḥ khurairhemamukhīṃ savatsāṃ |
dhenuṃ naraḥ kṣīravatīṃ praṇamya sragvastraghaṃṭābharāṇāṃ dvijāya || 54 ||
[Analyze grammar]

āsaptarātrādudaye nṛpāsya dātavyametatsakalaṃ nareṇa |
yāvatsamāssaptadaśātha vā syurathorddhvamapyatra vadaṃti kecit || 55 ||
[Analyze grammar]

kāśapuṣpapratīkāśa agnimārutasaṃbhava |
mitrāvaruṇayoḥ putra kuṃbhayone namostu te || 56 ||
[Analyze grammar]

pratyabdaṃ ca phalatyāgamevaṃ kurvannasīdati |
homaṃ kṛtvā tataḥ paścādvartayenmānavaḥ phalam || 57 ||
[Analyze grammar]

anenavidhinā yastu pumānarghaṃ nivedayet arghya |
imaṃ lokamavāpnoti rūpārogyaphalapradam || 58 ||
[Analyze grammar]

dvitīyena bhuvarlokaṃ svarlokaṃ ca tataḥ param |
saptaiva lokānāpnoti saptārghānyaḥ prayacchati || 59 ||
[Analyze grammar]

iti paṭhati śṛṇoti yo hi samyakcaritamagastyasamarcanaṃ ca paśyet |
matimapi ca dadāti sopi viṣṇorbhavanagataḥ paripūjyatemaraughaiḥ || 60 ||
[Analyze grammar]

bhīṣma uvāca |
saubhāgyārogyaphaladamamitrakṣayakārakam |
bhuktimuktipradaṃ yacca tanme brūhi mahāmate || 61 ||
[Analyze grammar]

pulastya uvāca |
yadumāyā purā deva uvācāṃdhakasūdanaḥ |
kathāsu saṃpravṛttāsu dharmyāsu lalitāsu ca || 62 ||
[Analyze grammar]

tadidānīṃ pravakṣyāmi bhuktimuktiphalapradam |
gauryuvāca |
dattaḥ śāpo hi sāvitryā mahyaṃ lakṣmyai sureśvara || 63 ||
[Analyze grammar]

yathā lakṣmīpradhānatvamahaṃ yāmi tathā vada |
śaṃkara uvāca |
śuṇuṣvāvahitā devi tathaivānyatsvayaṃkṛtam || 64 ||
[Analyze grammar]

narāṇāmatha nārīṇāmārādhanamanuttamam |
nabhasye vātha vaiśākhe puṇye mārgaśirasyatha || 65 ||
[Analyze grammar]

śuklapakṣe tṛtīyāyāṃ snātaḥ sa gaurasarṣapaiḥ |
gorocanaṃ sagomūtraṃ godugdhaṃ ca ghṛtaṃ tathā || 66 ||
[Analyze grammar]

dadhicaṃdanasaṃmiśraṃ lalāṭe tilakaṃ nyaset |
saubhāgyārogyakṛdyasmātsadā ca lalitāpriyam || 67 ||
[Analyze grammar]

pratipakṣaṃ tṛtīyāyāṃ pumānvāpi suvāsinī |
dhārayedraktavastrāṇi kusumāni sitāni ca || 68 ||
[Analyze grammar]

vidhavā śuklavastraṃ vai tvekameva hi dhārayet |
kumārī śukla sūkṣme ca paridadhyāttu vāsasī || 69 ||
[Analyze grammar]

devīṃ ca paṃcagavyena tataḥ kṣīreṇa kevalaṃ |
snāpayenmadhunā tadvatpuṣpagaṃdhodakena tu || 70 ||
[Analyze grammar]

pūjayecchuklapuṣpaistu phalairnānāvidhairapi |
dhānyalājādilavaṇaguḍakṣīraghṛtānvitaiḥ || 71 ||
[Analyze grammar]

śuklākṣatatilairarcā kāryā devi sadā tvayā |
pādayorarcanaṃ kuryātpratipakṣaṃ varānane || 72 ||
[Analyze grammar]

varadāyai namaḥ pādau tathā gulphau śriyai namaḥ |
aśokāyai namo jaṃghe pārvatyai jānunī tathā || 73 ||
[Analyze grammar]

ūrū māṃgalyakāriṇyai vāmadevyai tathā kaṭim |
padmodarāyai jaṭharaṃ namaḥ kaṃṭhe śriyai namaḥ || 74 ||
[Analyze grammar]

karau saubhāgyadāyinyai bāhū ca sumukhaśriyai |
mukhaṃ darpavināśinyai smaradāyai smitaṃ punaḥ || 75 ||
[Analyze grammar]

gauryai namastathānāsāmutpalāyai ca locane |
tuṣṭyai lalāṭamalakaṃ kātyāyanyai namaḥ śiraḥ || 76 ||
[Analyze grammar]

namo goryyai namaḥ puṣṭyai namaḥ kāṃtyai namaḥ śriyai |
raṃbhāyai lalitāyai ca vāmadevyai namo namaḥ || 77 ||
[Analyze grammar]

evaṃ saṃpūjya vidhivadagrataḥ padmamālikhet |
patraiḥ ṣoḍaśabhiryuktaṃ krameṇaiva sakarṇikam || 78 ||
[Analyze grammar]

pūrveṇa vinyasedgaurīmaparṇāṃ ca tataḥ param |
bhavānīṃ dakṣiṇe tadvadrudrāṇīṃ ca tataḥ param || 79 ||
[Analyze grammar]

vinyasetpaścime bhāge saumyāṃ madanavāsinīm |
vāyavye pāṭalāmugrāmuttareṇa tathā umām || 80 ||
[Analyze grammar]

sādhyāṃ pathyāṃ tathā saumyāṃ maṃgalāṃ kumadāṃ satīm |
bhadrāṃ ca madhye saṃsthāpya lalitāṃ karṇikopari || 81 ||
[Analyze grammar]

kusumairakṣatādbhirvā namaskāreṇa vinyaset |
gītamaṃgalaghoṣaṃ ca kārayitvā suvāsinīm || 82 ||
[Analyze grammar]

pūjayedraktavāsobhī raktamālyānulepanaiḥ |
siṃdūraṃ snānacūrṇaṃ ca tāsāṃ śirasi pātayet || 83 ||
[Analyze grammar]

siṃdūraṃ kuṃkumaṃ snānamatīveṣṭaṃ yatastataḥ |
tathopadeṣṭāramapi pūjayedyatnato gurum || 84 ||
[Analyze grammar]

na pūjyate gururyatra sarvāstatrāphalāḥ kriyāḥ |
japyaiśca pūjayedgaurīmutpalairasitaiḥ sadā || 85 ||
[Analyze grammar]

baṃdhujīvaiḥ priye pūjyā kārtike māsi yatnataḥ |
jātīpuṣpairmārgaśire pauṣe pītaiḥ kuraṃṭakaiḥ || 86 ||
[Analyze grammar]

kuṃdaiḥ kumudapuṣpaiśca devīṃ māghepi pūjayet |
siṃduvāreṇa jātyā vā phālgunepyarcayennaraḥ || 87 ||
[Analyze grammar]

caitre tu mallikāśokairvaiśākhe gaṃdhapāṭalaiḥ |
jyeṣṭhe kamalamaṃdārairāṣāḍhe ca jalāṃbujaiḥ || 88 ||
[Analyze grammar]

maṃdārairatha mālatyā śrāvaṇe pūjayetsadā |
gomūtraṃ gomayaṃ kṣīraṃ dadhisarpiḥ kuśodakam || 89 ||
[Analyze grammar]

bilvapatrārkakusumāṃbuja gośṛṃgavāri ca |
paṃcagavyaṃ ca bilvaṃ ca prāśayetkramaśaḥ sadā || 90 ||
[Analyze grammar]

etadbhādrapadādau tu prāśanaṃ samudāhṛtam |
pratipakṣaṃ ca mithunaṃ tṛtīyāyāṃ varānane || 91 ||
[Analyze grammar]

bhojayitvārcayedbhaktyā vastramālyānulepanaiḥ |
puṃsaḥ pītāṃbare dadyātstriyāḥ kauśeyavāsasī || 92 ||
[Analyze grammar]

niṣpāva jīralavaṇamikṣudaṃḍa guḍānvitam |
striyai dadyātphalaṃ puṃsaḥ suvarṇotpalasaṃyutam || 93 ||
[Analyze grammar]

yathā na devi devastvāṃ saṃparityajya gacchati |
tathā māmuddharāśeṣa duḥkhasaṃsārasāgarāt || 94 ||
[Analyze grammar]

kumudā vimalā naṃdā bhavānī vasudhā śivā |
lalitā kamalā gaurī satī rambhātha pārvatī || 95 ||
[Analyze grammar]

nabhasyādiṣu māseṣu prīyatāmityudīrayet |
vratāṃte śayanaṃ dadyātsuvarṇakamalānvitam || 96 ||
[Analyze grammar]

mithunāni caturviśaddvādaśātha samarcayet |
aṣṭāvaṣṭāthavā bhūyaścaturmāsetha vārcayet || 97 ||
[Analyze grammar]

pūrvaṃ datvātha gurave paścādanyānsamarcayet |
uktānantatṛtīyaiṣā sadānaṃtaphalapradā || 98 ||
[Analyze grammar]

sarvapāpaharā devī saubhāgyārogyavardhinī |
na cainaṃ vittaśāṭhyena kadācidapi laṃghayet || 99 ||
[Analyze grammar]

naro vā yadi vā nārī sopavāsavrataṃ caret |
garbhiṇī sūtikā naktaṃ kumārī vātha rogiṇī || 100 ||
[Analyze grammar]

yadā'śuddhā tadānyena kārayetprayatā svayam |
imāmanaṃtaphaladāṃ yastṛtīyāṃ samācaret || 101 ||
[Analyze grammar]

kalpakoṭiśataṃ sāgraṃ śivaloke mahīyate |
vittahīnopi kurvīta yāvadvarṣamupoṣaṇam || 102 ||
[Analyze grammar]

puṣpamaṃtravidhāne sopi tatphalamāpnuyāt |
nārī vā kurute yā tu ātmanaḥ śubhamicchatī || 103 ||
[Analyze grammar]

janmapauruṣamāpnoti gauryanugrahakāritam |
iti paṭhati śṛṇoti vā ya itthaṃ giritanayāvratamiṃdralokasaṃsthaḥ || 104 ||
[Analyze grammar]

matimapi ca dadāti yopi devairamaravadhūjanakinnaraiḥ sa pūjyaḥ |
anyāmapi pravakṣyāmi tṛtīyāṃ pāpanāśinīm || 105 ||
[Analyze grammar]

rasakalyāṇinīmetāṃ purākalpabhavā viduḥ |
māghemāsi tu saṃprāpya tṛtīyāṃ śuklapakṣataḥ || 106 ||
[Analyze grammar]

prātargaṃdhena payasā tilaiḥ snānaṃ samācaret |
snāpayenmadhunā devīṃ tathaivekṣurasena tu || 107 ||
[Analyze grammar]

gaṃdhodakena ca punaḥ pūjanaṃ kuṃkumena tu |
dakṣiṇāṃgāni saṃpūjya tato vāmāni pūjayet || 108 ||
[Analyze grammar]

lalitāyai padaṃ devyai vāmagulphau tatorcayet |
jaṃghe jānu tathā śāṃtyai tathaivoruṃ śriyai namaḥ || 109 ||
[Analyze grammar]

madālasāyai ca kaṭimamalāyai tathodaram |
stanau madanavāsinyai kumudāyai ca kaṃdharām || 110 ||
[Analyze grammar]

bhujaṃ bhujāgraṃ mādhavyai kamalāyai sukhasmite |
bhrūlalāṭaṃ ca rudrāṇyai śaṃkarāyai tathālakaṃ || 111 ||
[Analyze grammar]

madanāyai lalāṭaṃ tu mohanāyai punarbhruvau |
netre caṃdrārdhadhāriṇyai tuṣṭyai ca vadanaṃ punaḥ || 112 ||
[Analyze grammar]

utkaṃṭhinyai namaḥ kaṃṭhamamṛtāyai namastanum |
raṃbhāyai ca mahābāhū viśokāyai namaḥ karau || 113 ||
[Analyze grammar]

hṛdayaṃ manmathāhvāyai pāṭalāyai tathodaraṃ |
kaṭiṃ suratavāsinyai tathorū paṃkajaśriyai || 114 ||
[Analyze grammar]

jānujaṃghe namo gauryai gulphau śāṃtyai tathārcayet |
dharādharāyai pādau tu viśvakāyai namaḥ śiraḥ || 115 ||
[Analyze grammar]

namo bhavānyai kāminyai vāsudevyai jagacchriyai |
ānaṃdadāyai naṃdāyai subhadrāyai namonamaḥ || 116 ||
[Analyze grammar]

evaṃ saṃpūjya vidhivaddvijadāṃpatyamarcayet |
bhojayittvā tathānnena madhureṇa vimatsaraḥ || 117 ||
[Analyze grammar]

samodakaṃ vārikuṃbhaṃ śuklāṃbarayugadvayaṃ |
dattvā suvarṇakamalaṃ gaṃdhamālyairathārcayet || 118 ||
[Analyze grammar]

prīyatāmatra kumudā gṛhṇīyāllavaṇavratam |
anena vidhinā devīṃ māsimāsi sadārcayet || 119 ||
[Analyze grammar]

lavaṇaṃ varjayenmāghe phālgune ca guḍaṃ punaḥ |
navanītaṃ tathā caitre varjyaṃ madhu ca mādhave || 120 ||
[Analyze grammar]

pānīyaṃ jyeṣṭhamāse tu tathāṣāḍhe ca jīrakaṃ |
śrāvaṇe varjayetkṣīraṃ dadhi bhādrapade tathā || 121 ||
[Analyze grammar]

ghṛtamāśvayuje tadvadūrje varjyaṃ ca mākṣikaṃ |
dhānyākaṃ mārgaśīrṣe tu pauṣe varjyā ca śarkarā || 122 ||
[Analyze grammar]

vratāṃte karakaṃ pūrṇameteṣāṃ māsimāsi ca |
dadyādvikālavelāyāṃ bhakṣyapātreṇa saṃyutaṃ || 123 ||
[Analyze grammar]

laḍḍukāssevakāścaiva saṃyāvamatha pūrikā |
nārikā ghṛtapūrṇāśca piṣṭapūrṇā ca naṃdikī || 124 ||
[Analyze grammar]

kṣīraśākaṃ ca dadhyannaṃ piṃḍaśākaṃ tathaiva ca |
māghādau kramaśo dadyādetāni karakopari || 125 ||
[Analyze grammar]

kumudā mādhavī raṃbhā subhadrā ca śivā jayā |
lalitā kamalānaṃgā maṃgalā rati lālasā || 126 ||
[Analyze grammar]

kramānmāghādimāseṣu prīyatāmiti kīrtayet |
sarvatra paṃcagavyaṃ ca prāśanaṃ samudāhṛtaṃ || 127 ||
[Analyze grammar]

upavāsī bhavennityamaśaktau naktamiṣyate |
kuryādevamidaṃ nārī rasakalyāṇinī vrataṃ || 128 ||
[Analyze grammar]

punarmāghe ca saṃprāpte śarkarā kalaśopari |
kṛtvā tu kāṃcanīṃ gaurīṃ paṃcaratnasamanvitāṃ || 129 ||
[Analyze grammar]

svakīyāṃguṣṭhamātraṃ ca sākṣasūtrakamaṃḍaluṃ |
caturbhujāmiṃduyutāṃ sitanetrapaṭāvṛtāṃ || 130 ||
[Analyze grammar]

tadvadgomithunaṃ caiva suvarṇasya sitāṃbaraṃ |
savastraṃ bhājanaṃ dadyādbhavānī prīyatāmiti || 131 ||
[Analyze grammar]

anenavidhinā yastu rasakalyāṇinīvrataṃ |
kuryācca sarvapāpebhyastatkṣaṇādeva mucyate || 132 ||
[Analyze grammar]

bhavānāṃ ca sahasraṃ tu na duḥkhī jāyate kvacit |
agniṣṭomasahasreṇa yatphalaṃ tadavāpnuyāt || 133 ||
[Analyze grammar]

nārī vā kurute yā tu kumārī vā varānane |
vidhavā ca varākī vā sāpi tatphalabhāginī || 134 ||
[Analyze grammar]

saubhāgyārogyasaṃpannā gaurīloke mahīyate |
iti paṭhati ya itthaṃ yaḥ śṛṇoti prasaṃgāt |
sakalakaluṣamuktaḥ pārvatīlokameti || 135 ||
[Analyze grammar]

matimapi ca vidhatte yo narāṇāṃ priyārthaṃ |
vibudhapatijanānāṃ lokagaḥ syādamoghaḥ |
tathaivānyāṃ pravakṣyāmi tṛtīyāṃ pāpanāśinīm || 136 ||
[Analyze grammar]

nāmnā ca lokavikhyātāmagryānaṃdakarīmimāṃ |
yadā śuklatṛtīyāyāmaṣāḍharkṣaṃ bhavetkvacit || 137 ||
[Analyze grammar]

brahmarkṣaṃ vātha ca maghā hasto mūlamathāpi vā |
darbhagaṃdhodakaiḥ snānaṃ tadā samyaksamācaret || 138 ||
[Analyze grammar]

śuklamālyāṃbaradharaḥ śuklagaṃdhānulepanaḥ |
bhavānīmarcayedbhaktyā śuklapuṣpaiḥ sugaṃdhibhiḥ || 139 ||
[Analyze grammar]

mahādevaṃ ca sakalamupaviṣṭaṃ mahāsane |
vāsudevyai namaḥ pādau śaṃkarāyai namo hareḥ || 140 ||
[Analyze grammar]

jaṃgheśokavināśinyai mānadāyai namaḥ prabhoḥ |
raṃbhāyai pūjayedūrū śivāya ca pinākine || 141 ||
[Analyze grammar]

ānaṃdinyai kaṭiṃ devyāḥ śūlinaśśūlapāṇaye |
mādhavyai ca tathā nābhimatha śaṃbhorbhavāya vai || 142 ||
[Analyze grammar]

stanau cānaṃdakāriṇyai śaṃkarasyeṃdudhāriṇe |
utkaṃṭhinyai namaḥ kaṃṭhaṃ nīlakaṃṭhāya vai hareḥ || 143 ||
[Analyze grammar]

karāvutpaladhāriṇyai rudrāya jagataḥ prabho |
bāhū ca pariraṃbhiṇyai nṛtyaprītāya vai hareḥ || 144 ||
[Analyze grammar]

devyā mukhaṃ vilāsinyai vṛṣabhāya punarvibhoḥ |
smitaṃ ca smaraṇīyāyai viśvavaktrāya vai vibhoḥ || 145 ||
[Analyze grammar]

netre maṃdāravāsinyai viśvadhāmne triśūlinaḥ |
bhruvau nṛtyapriyāyai ca śaṃbhorvai pāśaśūline || 146 ||
[Analyze grammar]

devyā lalāṭamiṃdrāṇyai vṛṣavāhāya vai vibhoḥ |
svāhāyai makuṭaṃ devyā vibho gaṃgādharāya vai || 147 ||
[Analyze grammar]

viśvakāyau viśvabhujau viśvapādamukhau śivau |
prasannavaradau vaṃde pārvatīparameśvarau || 148 ||
[Analyze grammar]

evaṃ saṃpūjya vidhivadagrataḥ śivayoḥ punaḥ |
padmotpalāni rajasā nānāvarṇena kārayet || 149 ||
[Analyze grammar]

śaṃkhacakre sakaṭake svastikaṃ śubhakārakam |
yāvaṃtaḥ pāṃsavastatra rajasaḥ patitā bhuvi || 150 ||
[Analyze grammar]

tāvadvarṣasahasrāṇi śivaloke mahīyate |
catvāri ghṛtapātrāṇi sahiraṇyāni śaktitaḥ || 151 ||
[Analyze grammar]

datvā dvijāya karakamudakena samanvitam |
pratipakṣaṃ caturmāsaṃ yāvadetānnivedayet || 152 ||
[Analyze grammar]

tatastu caturo māsānpūrvavatkarakopari |
catvāri ghṛtapātrāṇi tilapātrāṇyaṃnaṃtaraṃ || 153 ||
[Analyze grammar]

gaṃdhodakaṃ puṣpavāri caṃdanaṃ kuṅkumodakaṃ |
apakvaṃ dadhidugdhaṃ ca gośṛṃgodakameva ca || 154 ||
[Analyze grammar]

abdodakaṃ tathā vārikuṣṭhacūrṇānvitaṃ punaḥ |
uśīrasalilaṃ caiva yavacūrṇodakaṃ punaḥ || 155 ||
[Analyze grammar]

tilodakaṃ ca saṃprāśyasvapenmārgaśirādiṣu |
māseṣu pakṣadvitayaṃ prāśanaṃ samudāhṛtam || 156 ||
[Analyze grammar]

sarvatraśuklapuṣpāṇipraśastānisadārcane |
dānakāle ca sarvatra maṃtrametamudīrayet || 157 ||
[Analyze grammar]

gaurī me prīyatāṃ nityamaghanāśāya maṃgalā |
saubhāgyāyāstu lalitā bhavānī sarvasiddhaye || 158 ||
[Analyze grammar]

saṃvatsarāṃte lavaṇaṃ guḍakuṃkumasaṃyutam |
caṃdanenayutaṃ kuṃbhaṃ sahasvarṇāṃbujena ca || 159 ||
[Analyze grammar]

umāyāḥ prītaye haimaṃ tadvidikṣuphalairyutam |
sāstarāvaraṇāṃ śayyāṃ saviśrāmāṃ nivedayet || 160 ||
[Analyze grammar]

sapatnīkāya viprāya gaurī me prīyatāmiti |
ātmānaṃdakarīṃ nāma prāpnuyātsaṃpadaṃ naraḥ || 161 ||
[Analyze grammar]

āyurānaṃdasaṃpanno na kvacicchokamāpnuyāt |
nārī vā kurute yā tu kumārī vidhavā tathā || 162 ||
[Analyze grammar]

sāpi tatphalamāpnoti devyanugrahalālitā |
pratipakṣamupoṣyaivaṃ maṃtrārcanavidhānataḥ || 163 ||
[Analyze grammar]

rudrāṇāṃ lokamāpnoti punarāvṛttidurlabham |
imāṃ yaḥ śṛṇuyānnityaṃ śrāvayedvāpi bhaktitaḥ || 164 ||
[Analyze grammar]

śakralokaṃ sa gatvā tu pūjyate kalpasaṃsthitaḥ |
śaṃkara uvāca |
evaṃvidhā bhavati cennārī vrataparāyaṇā || 165 ||
[Analyze grammar]

sāvitrī tu varākī sā tasyāḥ śāpastu kīdṛśaḥ |
na kācidgaṇanā cāsti yatastrailokyasuṃdarī || 166 ||
[Analyze grammar]

sā pūrvasyāpi vandyā ca lakṣmīrviṣṇupratigrahāt |
mayā pūrvaṃ tavārthāya dakṣayajñastu nāśitaḥ || 167 ||
[Analyze grammar]

lakṣmyarthaṃ viṣṇunā cāpi vāridhirmathitaḥ purā |
ājñākarau bhavatyośca mā kuruṣva bhayaṃ kvacit || 168 ||
[Analyze grammar]

sāvitryā mānanā kāryā kupitāyāḥ prasādanam |
mayā ca viṣṇunā caiva brahmaṇā mānamīpsunā || 169 ||
[Analyze grammar]

gamiṣye brahmasadanaṃ tvaṃ ca tiṣṭha varānane |
evamuktvā gato rudro gaurī tatra vyavasthitā || 170 ||
[Analyze grammar]

kṛtaṃ yugaṃ samagraṃ ca yajñe tasminhutāśanaḥ |
vahaṃstu havyaṃ devānāṃ prīṇayāno jagattrayam || 171 ||
[Analyze grammar]

bhojanaṃ dvijamukhyeṣu bhogānvidyādhare gaṇe |
kāmāvāptiṃ manuṣyeṣu sarvameva dadau prabhuḥ || 172 ||
[Analyze grammar]

rudreṇoktastadā viṣṇurdharmāṃste tvaṃ prakīrttaya |
gaurīdharmānsarasvatyā vrataṃ yatparikīrtitam || 173 ||
[Analyze grammar]

ityevamukte rudreṇa viṣṇuḥ provāca sādaram |
nāhaṃ dharmaṃ khyāpayiṣye svakīyaṃ śaṃkarādhunā || 174 ||
[Analyze grammar]

bhavānākhyātu māhātmyaṃ madīyaṃ surasattama |
tvayā vai kathitaṃ pūrvaṃ kṛte vai pāpasaṃkṣayaḥ || 175 ||
[Analyze grammar]

bhaviṣyati na saṃdeho bhavānpūto bhaviṣyati |
bhīṣma uvāca |
madhurā gīrbhavetkena vratena munisattama || 176 ||
[Analyze grammar]

tathaiva janasaubhāgyaṃ matirvidyāsu kauśalam |
abhedaścāpi dāṃpatye saṃgo baṃdhujanena ca || 177 ||
[Analyze grammar]

āyuśca vipulaṃ puṃsāṃ tanme kathaya sattama |
pulastya uvāca |
samyakpṛṣṭaṃ tvayā rājanśṛṇu sārasvataṃ vratam || 178 ||
[Analyze grammar]

yasya saṃkīrtanādeva devī tuṣyetsarasvatī |
yāvadbhaktaḥ stavaṃ kuryādetadvratamanuttamam || 179 ||
[Analyze grammar]

prāgvāsarādau saṃpūjya divyaṃ stavaṃ samārabhet |
athavā ravivāreṇa grahatārābalena ca || 180 ||
[Analyze grammar]

pāyasaṃ bhojayedviprānkuryādbrāhmaṇavācanam |
śuklavastrāṇi dattvā ca sahiraṇyāni śaktitaḥ || 181 ||
[Analyze grammar]

gāyatrīṃ pūjayedbhaktyā śuklamālyānulepanaiḥ |
yathā na devi bhagavānbrahmā lokapitāmahaḥ || 182 ||
[Analyze grammar]

tvāṃ parityajya tiṣṭhecca tathā bhava varapradā |
vedaśāstrāṇi dharmāṇi nṛtyagītādikaṃ ca yat || 183 ||
[Analyze grammar]

na vihīnaṃ tvayā devi tathā me saṃtu siddhayaḥ |
lakṣmīrmedhā dharā puṣṭirgaurī tuṣṭirjayā matiḥ || 184 ||
[Analyze grammar]

etābhiḥ pāhi cāṣṭābhimūrtibhirmāṃ sarasvati |
evaṃ saṃpūjya gāyatrīṃ vīṇākamaladhāriṇīm || 185 ||
[Analyze grammar]

śuklapuṣpākṣatairbhaktyā sakamaṃḍalu pustakām |
maunavratena bhuṃjīta sāyaṃprātaśca dharmavit || 186 ||
[Analyze grammar]

paṃcamyāṃ pratipakṣaṃ ca gāṃ ca viprāya śobhanām |
tathaiva taṃḍulaprasthaṃ ghṛtapātreṇa saṃyutam || 187 ||
[Analyze grammar]

kṣīraṃ dadyāddhiraṇyaṃ ca gāyatrī prīyatāmiti |
saṃdhyāyāṃ ca tathā maunametatkurvansamācaret || 188 ||
[Analyze grammar]

na rātryāṃ bhojanaṃ kuryādyāvanmāsāstrayodaśa |
samāpte tu vrate dadyādbhojanaṃ śuklataṃḍulaiḥ || 189 ||
[Analyze grammar]

divyāṃ vitānaṃ ghaṃṭāṃ ca sitanetrapaṭānvitām |
caṃdanaṃ vastrayugmaṃ ca dadhyannaṃ surasaṃ punaḥ || 190 ||
[Analyze grammar]

athopadeṣṭāramapi bhaktyā saṃpūjayedgurum |
vittaśāṭhyenarahito vastramālyānulepanaiḥ || 191 ||
[Analyze grammar]

anena vidhinā yastu kuryātsārasvataṃ vratam |
saubhāgyamatiyuktastu sūkṣmakaṃṭhaśca jāyate || 192 ||
[Analyze grammar]

sarasvatyāḥ prasādena brahmaloke mahīyate |
nārī vā kurute yā tu sāpi tatphalabhāginī || 193 ||
[Analyze grammar]

brahmaloke vasedrājanyāvatkalpāyuta trayam |
sārasvataṃ vrataṃ yastu śṛṇuyādapi vā paṭhet || 194 ||
[Analyze grammar]