Chapter 16

[English text for this chapter is available]

bhīṣma uvāca |
yadetatkathitaṃ brahmaṃstīrthamāhātmyamuttamam |
kamalasyābhipātena tīrthaṃ jātaṃ dharātale || 1 ||
[Analyze grammar]

tatrasthena bhagavatā viṣṇunā śaṃkareṇa ca |
yatkṛtaṃ muniśārdūla tatsarvaṃ parikīrttaya || 2 ||
[Analyze grammar]

kathaṃ yajño hi devena vibhunā tatra kāritaḥ |
ke sadasyā ṛtvijaśca brāhmaṇāḥ ke samāgatāḥ || 3 ||
[Analyze grammar]

ke bhāgāstasya yajñasya kiṃ dravyaṃ kā cadakṣiṇā |
kā vedī kiṃ pramāṇaṃ ca kṛtaṃ tatra viraṃcinā || 4 ||
[Analyze grammar]

yo yājyaḥ sarvadevānāṃ vedaiḥ sarvatra paṭhyate |
kaṃ ca kāmamabhidhyāyanvedhā yajñaṃ cakāra ha || 5 ||
[Analyze grammar]

yathāsau devadeveśo hyajaraścāmaraśca ha |
tathā caivākṣayaḥ svargastasya devasya dṛśyate || 6 ||
[Analyze grammar]

anyeṣāṃ caiva devānāṃ dattaḥ svargo mahātmanā |
agnihotrārthamutpannā vedā oṣadhayastathā || 7 ||
[Analyze grammar]

ye cānye paśavo bhūmau sarve te yajñakāraṇāt |
sṛṣṭā bhagavatānena ityeṣā vaidikī śrutiḥ || 8 ||
[Analyze grammar]

tadatra kautukaṃ mahyaṃ śrutvedaṃ tava bhāṣitam |
yaṃ kāmamadhikṛtyaikaṃ yatphalaṃ yāṃ ca bhāvanāṃ || 9 ||
[Analyze grammar]

kṛtaścānena vai yajñaḥ sarvaṃ śaṃsitumarhasi |
śatarūpā ca yā nārī sāvitrī sā tvihocyate || 10 ||
[Analyze grammar]

bhāryā sā brahmaṇaḥ proktāḥ ṛṣīṇāṃ jananī ca sā |
pulastyādyānmunīnsapta dakṣādyāṃstu prajāpatīn || 11 ||
[Analyze grammar]

svāyaṃbhuvādīṃśca manūnsāvitrī samajījanat |
dharmapatnīṃ tu tāṃ brahmā putriṇīṃ brahmaṇaḥ priyaḥ || 12 ||
[Analyze grammar]

pativratāṃ mahābhāgāṃ suvratāṃ cāruhāsinīṃ |
kathaṃ satīṃ parityajya bhāryāmanyāmaviṃdata || 13 ||
[Analyze grammar]

kiṃ nāmnī kiṃ samācārā kasya sā tanayā vibhoḥ |
kva sā dṛṣṭā hi devena kena cāsya pradarśitā || 14 ||
[Analyze grammar]

kiṃ rūpā sā tu deveśī dṛṣṭā cittavimohinī |
yāṃ tu dṛṣṭvā sa deveśaḥ kāmasya vaśameyivān || 15 ||
[Analyze grammar]

varṇato rūpataścaiva sāvitryāstvadhikā mune |
yā mohitavatī devaṃ sarvalokeśvaraṃ vibhum || 16 ||
[Analyze grammar]

yathā gṛhītavāndevo nārīṃ tāṃ lokasuṃdarīṃ |
yathā pravṛtto yajñosau tathā sarvaṃ prakīrtaya || 17 ||
[Analyze grammar]

tāṃ dṛṣṭvā brahmaṇaḥ pārśve sāvitrī kiṃ cakāra ha |
sāvitryāṃ tu tadā brahmā kāṃ tu vṛttimavarttata || 18 ||
[Analyze grammar]

sannidhau kāni vākyāni sāvitrī brahmaṇā tadā |
uktāpyuktavatī bhūyaḥ sarvaṃ śaṃsitumarhasi || 19 ||
[Analyze grammar]

kiṃ kṛtaṃ tatra yuṣmābhiḥ kopo vātha kṣamāpi vā |
yatkṛtaṃ tatra yaddṛṣṭaṃ yattavoktaṃ mayā tviha || 20 ||
[Analyze grammar]

vistareṇeha sarvāṇi karmāṇi parameṣṭhinaḥ |
śrotumicchāmyaśeṣeṇa vidheryajñavidhiṃ paraṃ || 21 ||
[Analyze grammar]

karmaṇāmānupūrvyaṃ ca prāraṃbho hotrameva ca |
hoturbhakṣo yathā'cāpi prathamā kasya kāritā || 22 ||
[Analyze grammar]

kathaṃ ca bhagavānviṣṇuḥ sāhāyyaṃ kena kīdṛśaṃ |
amarairvā kṛtaṃ yacca tadbhavānvaktumarhati || 23 ||
[Analyze grammar]

devalokaṃ parityajya kathaṃ martyamupāgataḥ |
gārhapatyaṃ ca vidhinā anvāhāryaṃ ca dakṣiṇam || 24 ||
[Analyze grammar]

agnimāhavanīyaṃ ca vedīṃ caiva tathā sruvam |
prokṣaṇīyaṃ srucaṃ caiva āvabhṛthyaṃ tathaiva ca || 25 ||
[Analyze grammar]

agnīṃstrīṃśca yathā cakre havyabhāgavahānhi vai |
havyādāṃśca surāṃścakre kavyādāṃśca pitṝnapi || 26 ||
[Analyze grammar]

bhāgārthaṃ yajñavidhinā ye yajñā yajñakarmaṇi |
yūpānsamitkuśaṃ somaṃ pavitraṃ paridhīnapi || 27 ||
[Analyze grammar]

yajñiyāni ca dravyāṇi yathā brahmā cakāra ha |
vibabhrāja purā yaśca pārameṣṭhyena karmaṇā || 28 ||
[Analyze grammar]

kṣaṇā nimeṣāḥ kāṣṭhāśca kalāstraikālyameva ca |
muhūrtāstithayo māsā dinaṃ saṃvatsarastathā || 29 ||
[Analyze grammar]

ṛtavaḥ kālayogāśca pramāṇaṃ trividhaṃ purā |
āyuḥ kṣetrāṇyapacayaṃ lakṣaṇaṃ rūpasauṣṭhavam || 30 ||
[Analyze grammar]

trayo varṇāstrayo lokāstraividyaṃ pāvakāstrayaḥ |
traikālyaṃ trīṇi karmāṇi trayo varṇāstrayo guṇāḥ || 31 ||
[Analyze grammar]

sṛṣṭā lokāḥ parāḥ sraṣṭrā ye cānyenalpacetasā |
yā gatirdharmayuktānāṃ yā gatiḥ pāpakarmaṇāṃ || 32 ||
[Analyze grammar]

cāturvarṇyasya prabhavaścāturvarṇyasya rakṣitā |
caturvidyasya yo vettā caturāśramasaṃśrayaḥ || 33 ||
[Analyze grammar]

yaḥ paraṃ śrūyate jyotiryaḥ paraṃ śrūyate tapaḥ |
yaḥ paraṃ parataḥ prāha paraṃ yaḥ paramātmavān || 34 ||
[Analyze grammar]

seturyo lokasetūnāṃ medhyo yo medhyakarmaṇām |
vedyo yo vedaviduṣāṃ yaḥ prabhuḥ prabhavātmanām || 35 ||
[Analyze grammar]

asubhūtaśca bhūtānāmagnibhūtognivarcasām |
manuṣyāṇāṃ manobhūtastapobhūtastapasvinām || 36 ||
[Analyze grammar]

vinayo nayavṛttīnāṃ tejastejasvināmapi |
ityetatsarvamakhilānsṛjanlokapitāmahaḥ || 37 ||
[Analyze grammar]

yajñādgatiṃ kāmanvaicchatkathaṃ yajñe matiḥ kṛtā |
eṣa me saṃśayo brahmanneṣa me saṃśayaḥ paraḥ || 38 ||
[Analyze grammar]

āścaryaḥ paramo brahmā devairdaityaiśca paṭhyate |
karmaṇāścaryabhūtopi tattvataḥ sa ihocyate || 39 ||
[Analyze grammar]

pulastya uvāca |
praśnabhāro mahāneṣa tvayokto brahmaṇaśca yaḥ |
yathāśakti tu vakṣyāmi śrūyatāṃ tatparaṃ yaśaḥ || 40 ||
[Analyze grammar]

sahasrāsyaṃ sahasrākṣaṃ sahasracaraṇaṃ ca yam |
sahasraśravaṇaṃ caiva sahasrakaramavyayam || 41 ||
[Analyze grammar]

sahasrajihvaṃ sāhasraṃ sahasraparamaṃ prabhuṃ |
sahasradaṃ sahasrādiṃ sahasrabhujamavyayam || 42 ||
[Analyze grammar]

havanaṃ savanaṃ caiva havyaṃ hotārameva ca |
pātrāṇi ca pavitrāṇi vedīṃ dīkṣāṃ caruṃ sruvam || 43 ||
[Analyze grammar]

sruksomamavabhṛccaiva prokṣaṇīṃ dakṣiṇā dhanam |
addhvaryuṃ sāmagaṃ vipraṃ sadasyānsadanaṃ sadaḥ || 44 ||
[Analyze grammar]

yūpaṃ samitkuśaṃ darvī camasolūkhalāni ca |
prāgvaṃśaṃ yajñabhūmiṃ ca hotāraṃ bandhanaṃ ca yat || 45 ||
[Analyze grammar]

hrasvānyatipramāṇāni pramāṇasthāvarāṇi ca |
prāyaścittāni vājāśca sthaṃḍilāni kuśāstathā || 46 ||
[Analyze grammar]

maṃtraṃ yajñaṃ ca havanaṃ vahnibhāgaṃ bhavaṃ ca yaṃ |
agrebhujaṃ homabhujaṃ śubhārciṣamudāyudhaṃ || 47 ||
[Analyze grammar]

āhurvedavido viprā yo yajñaḥ śāśvataḥ prabhuḥ |
yāṃ pṛcchasi mahārāja puṇyāṃ divyāmimāṃ kathāṃ || 48 ||
[Analyze grammar]

yadarthaṃ bhagavānbrahmā bhūmau yajñamathākarot |
hitārthaṃ suramartyānāṃ lokānāṃ prabhavāya ca || 49 ||
[Analyze grammar]

brahmātha kapilaścaiva parameṣṭhī tathaiva ca |
devāḥ saptarṣayaścaiva tryaṃbakaśca mahāyaśāḥ || 50 ||
[Analyze grammar]

sanatkumāraśca mahānubhāvo manurmahātmā bhagavānprajāpatiḥ |
purāṇadevotha tathā pracakre pradīptavaiśvānaratulyatejāḥ || 51 ||
[Analyze grammar]

purā kamalajātasya svapatastasya koṭare |
puṣkare yatra saṃbhūtā devā ṛṣigaṇāstathā || 52 ||
[Analyze grammar]

eṣa pauṣkarako nāma prādurbhāvo mahātmanaḥ |
purāṇaṃ kathyate yatra vedasmṛtisusaṃhitaṃ || 53 ||
[Analyze grammar]

varāhastu śrutimukhaḥ prādurbhūto viriṃcinaḥ |
sahāyārthaṃ suraśreṣṭho vārāhaṃ rūpamāsthitaḥ || 54 ||
[Analyze grammar]

vistīrṇaṃ puṣkare kṛtvā tīrthaṃ kokāmukhaṃ hi tat |
vedapādo yūpadaṃṣṭraḥ kratuhastaścitīmukhaḥ || 55 ||
[Analyze grammar]

agnijihvo darbharomā brahmaśīrṣo mahātapāḥ |
ahorātrekṣaṇo divyo vedāṃgaḥ śrutibhūṣaṇaḥ || 56 ||
[Analyze grammar]

ājyanāsaḥ sruvatuṃḍaḥ sāmaghoṣasvano mahān |
satyadharmamayaḥ śrīmānkarmavikramasatkṛtaḥ || 57 ||
[Analyze grammar]

prāyaścittanakho dhīraḥ paśujānurmakhākṛtiḥ |
udgātrāṃtro homaliṃgo phalabījamahauṣadhiḥ || 58 ||
[Analyze grammar]

vāyvaṃtarātmā maṃtrāsthirāpasphiksomaśoṇitaḥ |
vedaskaṃdho havirgaṃdho havyakavyātivegavān || 59 ||
[Analyze grammar]

prāgvaṃśakāyo dyutimānnānādīkṣābhirarcitaḥ |
dakṣiṇāhṛdayo yogī mahāsatramayo mahān || 60 ||
[Analyze grammar]

upākarmeṣṭiruciraḥ pravargyāvartabhūṣaṇaḥ |
chāyāpatnīsahāyo vai maṇiśṛṃgamivocchritaḥ || 61 ||
[Analyze grammar]

sarvalokahitātmā yo daṃṣṭrayābhyujjahāragām |
tataḥ svasthānamānīya pṛthivīṃ pṛthivīdharaḥ || 62 ||
[Analyze grammar]

tato jagāma nirvāṇaṃ pṛthivīdhāraṇāddhariḥ |
evamādivarāheṇa dhṛtvā brahmahitārthinā || 63 ||
[Analyze grammar]

uddhṛtā puṣkare pṛthvī sāgarāṃbugatā purā |
vṛtaḥ śamadamābhyāṃ yo divye kokāmukhe sthitaḥ || 64 ||
[Analyze grammar]

ādityairvasubhiḥ sādhyairmarudbhirdaivataiḥ saha |
rudrairviśvasahāyaiśca yakṣarākṣasakinnaraiḥ || 65 ||
[Analyze grammar]

digbhirvidigbhiḥ pṛthivī nadībhiḥ saha sāgaraiḥ |
carācaraguruḥ śrīmānbrahmā brahmavidāṃvaraḥ || 66 ||
[Analyze grammar]

uvāca vacanaṃ kokāmukhaṃ tīrthaṃ tvayā vibho |
pālanīyaṃ sadā gopyaṃ rakṣā kāryā makhe tviha || 67 ||
[Analyze grammar]

evaṃ kariṣye bhagavaṃstadā brahmāṇamuktavān |
uvāca taṃ punarbrahmā viṣṇuṃ devaṃ puraḥ sthitam || 68 ||
[Analyze grammar]

tvaṃ hi me paramo devastvaṃ hi me paramo guruḥ |
tvaṃ hi me paramaṃ dhāma śakrādīnāṃ surottama || 69 ||
[Analyze grammar]

utphullāmalapadmākṣa śatrupakṣa kṣayāvaha |
yathā yajñena me dhvaṃso dānavaiśca vidhīyate || 70 ||
[Analyze grammar]

tathā tvayā vidhātavyaṃ praṇatasya namostu te |
viṣṇuruvāca |
bhayaṃ tyajasva deveśa kṣayaṃ neṣyāmi dānavān || 71 ||
[Analyze grammar]

ye cānte vighnakartāro yātudhānāstathā'surāḥ |
ghātayiṣyāmyahaṃ sarvānsvasti tiṣṭha pitāmaha || 72 ||
[Analyze grammar]

evamuktvā sthitastatra sāhāyyena kṛtakṣaṇaḥ |
pravavuśca śivā vātāḥ prasannāśca diśo daśa || 73 ||
[Analyze grammar]

suprabhāṇi ca jyotīṃṣi caṃdraṃ cakruḥ pradakṣiṇam |
na vigrahaṃ grahāścakruḥ praseduścāpi siṃdhavaḥ || 74 ||
[Analyze grammar]

nīrajaskā bhūmirāsītsakalā hlādadāstvapaḥ |
jagmuḥ svamārgaṃ sarito nāpi cukṣubhurarṇavāḥ || 75 ||
[Analyze grammar]

āsanśubhānīṃdriyāṇi narāṇāmaṃtarātmanām |
maharṣayo vītaśokā vedānuccairavācayan || 76 ||
[Analyze grammar]

yajñe tasminhaviḥ pāke śivā āsaṃśca pāvakāḥ |
pravṛttadharmasadvṛttā lokā muditamānasāḥ || 77 ||
[Analyze grammar]

viṣṇoḥ satyapratijñasya śrutvārinidhanā giraḥ |
tato devāḥ samāyātā dānavā rākṣasaissaha || 78 ||
[Analyze grammar]

bhūtapretapiśācāśca sarve tatrāgatāḥ kramāt |
gaṃdharvāpsarasaścaiva nāgā vidyādharāgaṇāḥ || 79 ||
[Analyze grammar]

vānaspatyāścauṣadhayo yaccehedyacca nehati |
brahmādeśānmārutena ānītāḥ sarvato diśaḥ || 80 ||
[Analyze grammar]

yajñaparvatamāsādya dakṣiṇāmabhitodiśam |
surā uttarataḥ sarve maryādāparvate sthitāḥ || 81 ||
[Analyze grammar]

gaṃdharvāpsarasaścaiva munayo vedapāragāḥ |
paścimāṃ diśamāsthāya sthitāstatra mahākratau || 82 ||
[Analyze grammar]

sarve devanikāyāśca dānavāścāsurāgaṇāḥ |
amarṣaṃ pṛṣṭhataḥ kṛtvā suprītāste parasparam || 83 ||
[Analyze grammar]

ṛṣīnparyacaransarve śuśrūṣanbrāhmaṇāṃstathā |
ṛṣayo brahmarṣayaśca dvijā devarṣayastathā || 84 ||
[Analyze grammar]

rājarṣayo mukhyatamāssamāyātāḥ samaṃtataḥ |
katamaśca suropyatra kratau yājyo bhaviṣyati || 85 ||
[Analyze grammar]

paśavaḥ pakṣiṇaścaiva tatra yātā didṛkṣavaḥ |
brāhmaṇā bhoktukāmāśca sarve varṇānupūrvaśaḥ || 86 ||
[Analyze grammar]

svayaṃ ca varuṇo ratnaṃ dakṣaścānnaṃ svayaṃ dadau |
āgatyavaruṇolokātpakvaṃcānnaṃsvatopacat || 87 ||
[Analyze grammar]

vāyurbhakṣavikārāṃśca rasapācī divākaraḥ |
annapācanakṛtsomo matidātā bṛhaspatiḥ || 88 ||
[Analyze grammar]

dhanadānaṃ dhanādhyakṣo vastrāṇi vividhāni ca |
sarasvatī nadādhyakṣo gaṃgādevī sanarmadā || 89 ||
[Analyze grammar]

yāścānyāḥ saritaḥ puṇyāḥ kūpāścaiva jalāśayāḥ |
palvalāni taṭākāni kuṃḍāni vividhāni ca || 90 ||
[Analyze grammar]

prasravāṇi ca mukhyāni devakhātānyanekaśaḥ |
jalāśayāni sarvāṇi samudrāḥ saptasaṃkhyakāḥ || 91 ||
[Analyze grammar]

lavaṇekṣusurāsarpirdadhidugdhajalaiḥ samam |
saptalokāḥ sapātālāḥ saptadvīpāḥ sapattanāḥ || 92 ||
[Analyze grammar]

vṛkṣā vallyaḥ satṛṇāni śākāni ca phalāni ca |
pṛthivīvāyurākāśamāpojyotiśca paṃcamam || 93 ||
[Analyze grammar]

savigrahāṇi bhūtāni dharmaśāstrāṇi yāni ca |
vedabhāṣyāṇi sūtrāṇi brahmaṇā nirmitaṃ ca yat || 94 ||
[Analyze grammar]

amūrtaṃ mūrtamatyantaṃ mūrtadṛśyaṃ tathākhilam |
evaṃ kṛte tathāsmiṃstu yajñe paitāmahe tadā || 95 ||
[Analyze grammar]

devānāṃ saṃnidhau tatra ṛṣibhiśca samāgame |
brahmaṇo dakṣiṇe pārśve sthito viṣṇuḥ sanātanaḥ || 96 ||
[Analyze grammar]

vāmapārśve sthito rudraḥ pinākī varadaḥ prabhuḥ |
ṛtvijāṃ cāpi varaṇaṃ kṛtaṃ tatra mahātmanā || 97 ||
[Analyze grammar]

bhṛgurhotāvṛtastatra pulastyodhvaryyusattamaḥ |
tatrodgātā marīcistu brahmā vai nāradaḥ kṛtaḥ || 98 ||
[Analyze grammar]

sanatkumārādayo ye sadasyāstatra te bhavan |
prajāpatayo dakṣādyā varṇā brāhmaṇapūrvakāḥ || 99 ||
[Analyze grammar]

brahmaṇaśca samīpe tu kṛtā ṛtvigvikalpanā |
vastrairābharaṇairyuktāḥ kṛtā vaiśravaṇena te || 100 ||
[Analyze grammar]

aṃgulīyaiḥ sakaṭakairmakuṭairbhūṣitā dvijāḥ |
catvāro dvau daśānye ca ta ṣoḍaśartvijaḥ || 101 ||
[Analyze grammar]

brahmaṇā pūjitāḥ sarve praṇipātapuraḥsaram |
anugrāhyo bhavadbhistu sarvairasminkratāviha || 102 ||
[Analyze grammar]

patnī mamaiṣā sāvitrī yūyaṃ me śaraṇaṃdvijāḥ |
viśvakarmāṇamāhūya brahmaṇaḥ śīrṣamuṃḍanaṃ || 103 ||
[Analyze grammar]

yajñe tu vihitaṃ tasya kāritaṃ dvijasattamaiḥ |
ātaseyāni vastrāṇi daṃpatyarthe tathā dvijaiḥ || 104 ||
[Analyze grammar]

brahmaghoṣeṇa te viprā nādayānāstriviṣṭapam |
pālayaṃto jagaccedaṃ kṣatriyāḥ sāyudhāḥ sthitāḥ || 105 ||
[Analyze grammar]

bhakṣyaprakārānvividhinvaiśyāstatra pracakrire |
rasabāhulyayuktaṃ ca bhakṣyaṃ bhojyaṃ kṛtaṃ tataḥ || 106 ||
[Analyze grammar]

aśrutaṃ prāgadṛṣṭaṃ ca dṛṣṭvā tuṣṭaḥ prajāpatiḥ |
prāgvāṭeti dadau nāma vaiśyānāṃ sṛṣṭikṛdvibhuḥ || 107 ||
[Analyze grammar]

dvijānāṃ pādaśuśrūṣā śūdraiḥ kāryā sadā tviha |
pādaprakṣālanaṃ bhojyamucchiṣṭasya pramārjanaṃ || 108 ||
[Analyze grammar]

tepi cakrustadā tatra tebhyo bhūyaḥ pitāmahaḥ |
śūśrūṣārthaṃ mayā yūyaṃ turīye tu pade kṛtāḥ || 109 ||
[Analyze grammar]

dvijānāṃ kṣatrabandhūnāṃ bandhūnāṃ ca bhavadvidhaiḥ |
tribhyaśśuśrūṣaṇā kāryetyuktvā brahmā tathā'karot || 110 ||
[Analyze grammar]

dvārādhyakṣaṃ tathā śakraṃ varuṇaṃ rasadāyakam |
vittapradaṃ vaiśravaṇaṃ pavanaṃ gaṃdhadāyinam || 111 ||
[Analyze grammar]

udyotakāriṇaṃ sūryaṃ prabhutve mādhavaḥ sthitaḥ |
somaḥ somapradasteṣāṃ vāmapakṣa pathāśritaḥ || 112 ||
[Analyze grammar]

susatkṛtā ca patnī sā savitrī ca varāṃganā |
adhvaryuṇā samāhūtā ehi devi tvarānvitā || 113 ||
[Analyze grammar]

utthitāścāgnayaḥ sarve dīkṣākāla upāgataḥ |
vyagrā sā kāryakaraṇe strīsvabhāvena nāgatā || 114 ||
[Analyze grammar]

ihavai na kṛtaṃ kiṃciddvāre vai maṃḍanaṃ mayā |
bhittyāṃ vaicitrakarmāṇi svastikaṃ prāṃgaṇena tu || 115 ||
[Analyze grammar]

prakṣālanaṃ ca bhāṃḍānāṃ na kṛtaṃ kimapi tviha |
lakṣmīradyāpi nāyātā patnīnārāyaṇasya yā || 116 ||
[Analyze grammar]

agneḥ patnī tathā svāhā dhūmrorṇā tu yamasya tu |
vāruṇī vai tathā gaurī vāyorvai suprabhā tathā || 117 ||
[Analyze grammar]

ṛddhirvaiśravaṇī bhāryā śambhorgaurī jagatpriyā |
medhā śraddhā vibhūtiśca anasūyā dhṛtiḥ kṣamā || 119 ||
[Analyze grammar]

gaṃgā sarasvatī caiva nādyā yātāśca kanyakāḥ |
iṃdrāṇī caṃdrapatnī tu rohiṇī śaśinaḥ priyāḥ || 120 ||
[Analyze grammar]

aruṃdhatī vasiṣṭhasya saptarṣīṇāṃ ca yāḥ striyaḥ |
anasūyātripatnī ca tathānyāḥ pramadā iha || 121 ||
[Analyze grammar]

vadhvo duhitaraścaiva sakhyo bhaginikāstathā |
nādyāgatāstu tāḥ sarvā ahaṃ tāvatsthitā ciraṃ || 122 ||
[Analyze grammar]

nāhamekākinī yāsye yāvannāyāṃti tā striyaḥ |
brūhi gatvā viraṃciṃ tu tiṣṭha tāvanmuhūrtakam || 123 ||
[Analyze grammar]

sarvābhiḥ sahitā cāhamāgacchāmi tvarānvitā |
sarvaiḥ parivṛtaḥ śobhāṃ devaiḥ saha mahāmate || 124 ||
[Analyze grammar]

bhavānprāpnoti paramāṃ tathāhaṃ tu na saṃśayaḥ |
vadamānāṃ tathādhvaryustyaktvā brahmāṇamāgataḥ || 125 ||
[Analyze grammar]

sāvitrī vyākulā deva prasaktā gṛhakarmāṇi |
sakhyo nābhyāgatā yāvattāvannāgamanaṃ mama || 126 ||
[Analyze grammar]

evamuktosmi vai deva kālaścāpyativarttate |
yattedya rucitaṃ tāvattatkuruṣva pitāmaha || 127 ||
[Analyze grammar]

evamuktastadā brahmā kiṃcitkopasamanvitaḥ |
patnīṃ cānyāṃ madarthe vai śīghraṃ śakra ihānaya || 128 ||
[Analyze grammar]

yathā pravartate yajñaḥ kālahīno na jāyate |
tathā śīghraṃ vidhitsva tvaṃ nārīṃ kāṃcidupānaya || 129 ||
[Analyze grammar]

yāvadyajñasamāptirme varṇe tvāṃ mā kṛthā manaḥ |
bhūyopi tāṃ pramokṣyāmi samāptau tu kratoriha || 130 ||
[Analyze grammar]

evamuktastadā śakro gatvā sarvaṃ dharātalaṃ |
striyo dṛṣṭāśca yāstena sarvāḥ paraparigrahāḥ || 131 ||
[Analyze grammar]

ābhīrakanyā rūpāḍhyā sunāsā cārulocanā |
na devī na ca gaṃdharvī nāsurī na ca pannagī || 132 ||
[Analyze grammar]

na cāsti tādṛśī kanyā yādṛśī sā varāṃganā |
dadarśa tāṃ sucārvaṃgīṃ śriyaṃ devīmivāparām || 133 ||
[Analyze grammar]

saṃkṣipantīṃ manovṛtti vibhavaṃ rūpasaṃpadā |
yadyattu vastusauṃdaryādviśiṣṭaṃ labhyate kvacit || 134 ||
[Analyze grammar]

tattaccharīrasaṃlagnaṃ tanvaṃgyā dadṛśe varam |
tāṃ dṛṣṭvā ciṃtayāmāsa yadyeṣā kanyakā bhavet || 135 ||
[Analyze grammar]

tanmattaḥ kṛtapuṇyonyo na devo bhuvi vidyate |
yoṣidratnamidaṃ seyaṃ sadbhāgyāyāṃ pitāmahaḥ || 136 ||
[Analyze grammar]

sarāgo yadi vā syāttu saphalastveṣa me śramaḥ |
nīlābhra kanakāṃbhoja vidrumābhāṃ dadarśa tāṃ || 137 ||
[Analyze grammar]

tviṣaṃ saṃbibhratīmaṃgaiḥ keśagaṃḍe kṣaṇādharaiḥ |
manmathāśokavṛkṣasya prodbhinnāṃ kalikāmiva || 138 ||
[Analyze grammar]

pradagdhahṛcchayenaiva netravahniśikhotkaraiḥ |
dhātrā kathaṃ hi sā sṛṣṭā pratirūpamapaśyatā || 139 ||
[Analyze grammar]

kalpitā cetsvayaṃ budhyā naipuṇyasya gatiḥ parā |
uttuṃgāgrāvimau sṛṣṭau yanme saṃpaśyataḥ sukhaṃ || 140 ||
[Analyze grammar]

payodharau nāticitraṃ kasya saṃjāyate hṛdi |
rāgopahatadehoyamadharo yadyapi sphuṭam || 141 ||
[Analyze grammar]

tathāpi sevamānasya nirvāṇaṃ saṃprayacchati |
vahadbhirapi kauṭilyamalakaiḥ sukhamarpyate || 142 ||
[Analyze grammar]

doṣopi guṇavadbhāti bhūrisauṃdaryamāśritaḥ |
netrayorbhūṣitāvaṃtā vākarṇābhyāśamāgatau || 143 ||
[Analyze grammar]

kāraṇādbhāvacaitanyaṃ pravadaṃti hi tadvidaḥ |
karṇayorbhūṣaṇe netre netrayoḥ śravaṇāvimau || 144 ||
[Analyze grammar]

kuṃḍalāṃjanayoratra nāvakāśosti kaścana |
na tadyuktaṃ kaṭākṣāṇāṃ yaddvidhākaraṇaṃ hṛdi || 145 ||
[Analyze grammar]

tavasaṃbaṃdhinoye'tra kathaṃ te duḥkhabhāginaḥ |
sarvasuṃdaratāmeti vikāraḥ prākṛtairguṇaiḥ || 146 ||
[Analyze grammar]

vṛddhe kṣaṇaśatānāṃ tu dṛṣṭameṣā mayā dhanam |
dhātrā kauśalyasīmeyaṃ rūpotpattau sudarśitā || 147 ||
[Analyze grammar]

karotyeṣā mano nṝṇāṃ sasnehaṃ kṛtivibhramaiḥ |
evaṃ vimṛśatastasya tadrūpāpahṛtatviṣaḥ || 148 ||
[Analyze grammar]

niraṃtarodgataiśchannamabhavatpulakairvapuḥ |
tāṃ vīkṣya navahemābhāṃ padmapatrāyatekṣaṇām || 149 ||
[Analyze grammar]

devānāmatha yakṣāṇāṃ gaṃdharvoragarakṣasām |
nānā dṛṣṭā mayā nāryo nedṛśī rūpasaṃpadā || 150 ||
[Analyze grammar]

trailokyāṃtargataṃ yadyadvastutattatpradhānataḥ |
samādāya vidhātrāsyāḥ kṛtā rūpasya saṃsthitiḥ || 151 ||
[Analyze grammar]

iṃdra uvāca |
kāsi kasya kutaśca tvamāgatā subhru kathyatām |
ekākinī kimarthaṃ ca vīthīmadhyeṣu tiṣṭhasi || 152 ||
[Analyze grammar]

yānyetānyaṃgasaṃsthāni bhūṣaṇāni bibharṣi ca |
naitāni tava bhūṣāyai tvameteṣāṃ hi bhūṣaṇam || 153 ||
[Analyze grammar]

na devī na ca gaṃdharvī nāsurī na ca pannagī |
kinnarī dṛṣṭapūrvā vā yādṛśī tvaṃ sulocane || 154 ||
[Analyze grammar]

uktā mayāpi bahuśaḥ kasmāddatse hi nottaram |
trapānvitā tu sā kanyā śakraṃ provāca vepatī || 155 ||
[Analyze grammar]

gopakanyā tvahaṃ vīra vikrīṇāmīha gorasam |
navanītamidaṃ śuddhaṃ dadhi cedaṃ vimaṃḍakam || 156 ||
[Analyze grammar]

dadhnā caivātra takreṇa rasenāpi paraṃtapa |
arthī yenāsi tadbrūhi pragṛhṇīṣva yathepsitam || 157 ||
[Analyze grammar]

evamuktastadā śakro gṛhītvā tāṃ kare dṛḍham |
anayattāṃ viśālākṣīṃ yatra brahmā vyavasthitaḥ || 158 ||
[Analyze grammar]

nīyamānā tu sā tena krośaṃtī pitṛmātarau |
hā tāta mātarhā bhrātarnayatyeṣa naro balāt || 159 ||
[Analyze grammar]

yadi vāsti mayā kāryaṃ pitaraṃ me prayācaya |
sa dāsyati hi māṃ nūnaṃ bhavataḥ satyamucyate || 160 ||
[Analyze grammar]

kā hi nābhilaṣetkanyā bhartāṃraṃ bhaktivatsalam |
nādeyamapi te kiṃcitpiturme dharmavatsala || 161 ||
[Analyze grammar]

prasādaye taṃ śirasā māṃ sa tuṣṭaḥ pradāsyati |
pituścittamavijñāya yadyātmānaṃ dadāmi te || 162 ||
[Analyze grammar]

dharmo hi vipulo naśyettena tvāṃ na prasādaye |
bhaviṣyāmi vaśe tubhyaṃ yadi tātaḥ pradāsyati || 163 ||
[Analyze grammar]

itthamābhāṣyamāṇastu tadā śakro'nayacca tām |
brahmaṇaḥ purataḥ sthāpya prāhāsyārthe mayā'bale || 164 ||
[Analyze grammar]

ānītāsi viśālākṣi mā śuco varavarṇini |
gopakanyāmasau dṛṣṭvā gauravarṇāṃ mahādyutim || 165 ||
[Analyze grammar]

kamalāmeva tāṃ mene puṃḍarīkanibhekṣaṇām |
taptakāṃcanasadbhitti sadṛśā pīnavakṣasam || 166 ||
[Analyze grammar]

mattebhahastavṛttoruṃ raktottuṃga nakhatviṣaṃ |
taṃ dṛṣṭvā'manyatātmānaṃ sāpi manmanathacaram || 167 ||
[Analyze grammar]

tatprāptihetu ka dhiyā gatacitteva lakṣyate |
prabhutvamātmano dāne gopakanyāpyamanyata || 168 ||
[Analyze grammar]

yadyeṣa māṃ surūpatvādicchatyādātumāgrahāt |
nāsti sīmaṃtinī kācinmatto dhanyatarā bhuvi || 169 ||
[Analyze grammar]

anenāhaṃ samānītā yaccakṣurgocaraṃ gatā |
asya tyāge bhavenmṛtyuratyāge jīvitaṃ sukham || 170 ||
[Analyze grammar]

bhaveyamapamānācca dhigrūpā duḥkhadāyinī |
dṛśyate cakṣuṣānena yāpi yoṣitprasādataḥ || 171 ||
[Analyze grammar]

sāpi dhanyā na saṃdehaḥ kiṃ punaryāṃ pariṣvajet |
jagadrūpamaśeṣaṃ hi pṛthaksaṃcāramāśritam || 172 ||
[Analyze grammar]

lāvaṇyaṃ tadihaikasthaṃ darśitaṃ viśvayoninā |
asyopamā smaraḥ sādhvī manmathasya tviṣopamā || 173 ||
[Analyze grammar]

tiraskṛtastu śokoyaṃ pitā mātā na kāraṇam |
yadi māṃ naiṣa ādatte svalpaṃ mayi na bhāṣate || 174 ||
[Analyze grammar]

asyānusmaraṇānmṛtyuḥ prabhaviṣyati śokajaḥ |
anāgasi ca patnyāṃ tu kṣipraṃ yāteyamīdṛśī || 175 ||
[Analyze grammar]

kucayormaṇiśobhāyai śuddhāmbuja samadyutiḥ |
mukhamasya prapaśyaṃtyā mano me dhyānamāgatam || 176 ||
[Analyze grammar]

asyāṃgasparśasaṃyogānna cettvaṃ bahu manyase |
spṛśannaṭasi tarhi na tvaṃ śarīraṃ vitathaṃ param || 177 ||
[Analyze grammar]

athavāsya na doṣosti yadṛcchācārako hyasi |
muṣitaḥ smara nūnaṃ tvaṃ saṃrakṣa svāṃ priyāṃ ratim || 178 ||
[Analyze grammar]

tvattopi dṛśyate yena rūpeṇāyaṃ smarādhikaḥ |
mamānena manoratna sarvasvaṃ ca hṛtaṃ dṛḍham || 179 ||
[Analyze grammar]

śobhā yā dṛśyate vaktre sā kutaḥ śaśalakṣmaṇi |
nopamā sakalaṃ kasya niṣkalaṃkena śasyate || 180 ||
[Analyze grammar]

samānabhāvatāṃ yāti paṃkajaṃ nāsya netrayoḥ |
kopamā jalaśaṃkhena prāptā śravaṇaśaṃṅkhayoḥ || 181 ||
[Analyze grammar]

vidrumopyadharasyāsya labhate nopamāṃ dhruvam |
ātmasthamamṛtaṃ hyeṣa saṃsravaṃśceṣṭate dhruvam || 182 ||
[Analyze grammar]

yadi kiṃcicchubhaṃ karma janmāṃtaraśataiḥ kṛtam |
tatprasādātpunarbhartā bhavatveṣa mamepsitaḥ || 183 ||
[Analyze grammar]

evaṃ ciṃtāparādhīnā yāvatsā gopakanyakā |
tāvadbrahmā hariṃ prāha yajñārthaṃ satvaraṃ vacaḥ || 184 ||
[Analyze grammar]

devī caiṣā mahābhāgā gāyatrī nāmataḥ prabho |
evamukte tadā viṣṇurbrahmāṇaṃ proktavānidam || 185 ||
[Analyze grammar]

tadenāmudvahasvādya mayā dattāṃ jagatprabho |
gāṃdharveṇa vivāhena vikalpaṃ mā kṛthāściram || 186 ||
[Analyze grammar]

amuṃ gṛhāṇa devādya asyāḥ pāṇimanākulam |
gāṃdherveṇa vivāhena upayeme pitāmahaḥ || 187 ||
[Analyze grammar]

tāmavāpya tadā brahmā jagādāddhvaryusattamam |
kṛtā patnī mayā hyeṣā sadane me niveśaya || 188 ||
[Analyze grammar]

mṛgaśṛṃgadharā bālā kṣaumavastrāvaguṃṭhitā |
patnīśālāṃ tadā nītā ṛtvigbhirvedapāragaiḥ || 189 ||
[Analyze grammar]

auduṃberaṇa daṃḍena prāvṛto mṛgacarmaṇā |
mahādhvare tadā brahmā dhāmnā svenaiva śobhate || 190 ||
[Analyze grammar]

prārabdhaṃ ca tato hotraṃ brāhmaṇairvedapāragaiḥ |
bhṛguṇā sahitaiḥ karma vedoktaṃ taiḥ kṛtaṃ tadā |
tathā yugasahasraṃ tu sa yajñaḥ puṣkare'bhavat || 191 ||
[Analyze grammar]