Chapter 15

[English text for this chapter is available]

bhīṣma uvāca |
kiṃ kṛtaṃ brahmaṇā brahmanpreṣya vārāṇasīpurīm |
janārdanena kiṃ karma śaṃkareṇa ca yanmune || 1 ||
[Analyze grammar]

kathaṃ yajñaḥ kṛtastena kasmiṃstīrthe vadasva me |
ke sadasyā ṛtvijaśca sarvāṃstānprabravīhi me || 2 ||
[Analyze grammar]

ke devāstarpitāstena etanme kautukaṃ mahat |
pulastya uvāca |
śrīnidhānaṃ puraṃ meroḥ śikhare ratnacitritam || 3 ||
[Analyze grammar]

anekāścaryanilayaṃbahupādapasaṃkulam |
vicitradhātubhiścitraṃ svacchasphaṭikanirmalam || 4 ||
[Analyze grammar]

latāvitānaśobhāḍhyaṃ śikhiśabdavināditam |
mṛgendraravavitrasta gajayūthasamākulam || 5 ||
[Analyze grammar]

nirjharāṃbuprapātottha śīkarāsāraśītalam |
vātāhatataruvrāta prasannāpānacitritam || 6 ||
[Analyze grammar]

mṛganābhivarāmoda vāsitāśeṣakānanam |
latāgṛharatiśrānta suptavidyādharādhvagam || 7 ||
[Analyze grammar]

pragītakinnaravrāta madhuradhvanināditam |
tasminnanekavinyāsa śobhitāśeṣabhūmikam || 8 ||
[Analyze grammar]

vairājaṃ nāma bhavanaṃ brahmaṇaḥ parameṣṭhinaḥ |
tatra divyāṃganodgīta madhuradhvani nāditā || 9 ||
[Analyze grammar]

pārijātatarūtpanna maṃjarīdāmamālinī |
ratnaraśmisamūhottha bahuvarṇavicitritā || 10 ||
[Analyze grammar]

vinyastastaṃbhakoṭistu nirmalādarśaśobhitā |
apsaronṛtyavinyāsa vilāsollāsalāsitā || 11 ||
[Analyze grammar]

bahvātodyasamutpannasamūhasvananāditā |
layatālayutāneka gītavāditra śobhitā || 12 ||
[Analyze grammar]

sabhā kāṃtimatī nāma devānāṃ śarmadāyikā |
ṛṣisaṃghasamāyuktā munivṛṃdaniṣevitā || 13 ||
[Analyze grammar]

dvijātisāmaśabdena nāditā''naṃdadāyinī |
tasyāṃ niviṣṭo deveśassaṃdhyāsaktaḥ pitāmahaḥ || 14 ||
[Analyze grammar]

dhyāyati sma paraṃ devaṃ yenedaṃ nirmitaṃ jagat |
dhyāyato buddhirutpannā kathaṃ yajñaṃ karomyaham || 15 ||
[Analyze grammar]

kasminsthāne mayā yajñaḥ kāryaḥ kutra dharātale |
kāśīprayāgastuṃgā ca naimiṣaṃ śṛṃkhalaṃ tathā || 16 ||
[Analyze grammar]

kāṃcī bhadrā devikā ca kurukṣetraṃ sarasvatī |
prabhāsādīni tīrthāni pṛthivyāmiha madhyataḥ || 17 ||
[Analyze grammar]

kṣetrāṇi puṇyatīrthāni saṃti yānīha sarvaśaḥ |
madādeśācca rudreṇa kṛtānyanyāni bhūtale || 18 ||
[Analyze grammar]

yathāhaṃ sarvadeveṣu ādidevo vyavasthitaḥ |
tathā caikaṃ paraṃ tīrthamādibhūtaṃ karomyaham || 19 ||
[Analyze grammar]

ahaṃ yatra samutpannaḥ padmaṃ tadviṣṇunābhijam |
puṣkaraṃ procyate tīrthamṛṣibhirvedapāṭhakaiḥ || 20 ||
[Analyze grammar]

evaṃ ciṃtayatastasya brahmaṇastu prajāpateḥ |
matireṣā samutpannā vrajāmyeṣa dharātale || 21 ||
[Analyze grammar]

prāksthānaṃ sa samāsādya praviṣṭastadvanottamam |
nānādrumalatākīrṇaṃ nānāpuṣpopaśobhitam || 22 ||
[Analyze grammar]

nānāpakṣiravākīrṇaṃ nānāmṛgagaṇākulam |
drumapuṣpabharāmodairvāsayadyatsurāsurān || 23 ||
[Analyze grammar]

buddhipūrvamiva nyastaiḥ puṣpairbhūṣitabhūtalam |
nānāgaṃdharasaiḥ pakvāpakvaiśca ṣaḍṛtūdbhavaiḥ || 24 ||
[Analyze grammar]

phalaiḥ suvarṇarūpāḍhyairghrāṇadṛṣṭimanoharaiḥ |
jīrṇaṃ patraṃ tṛṇaṃ yatra śuṣkakāṣṭhaphalāni ca || 25 ||
[Analyze grammar]

bahiḥ kṣipati jātāni mārutonugrahādiva |
nānāpuṣpasamūhānāṃ gaṃdhamādāya mārutaḥ || 26 ||
[Analyze grammar]

śītalo vāti khaṃ bhūmiṃ diśo yatrābhivāsayan |
haritasnigdha niśchidrairakīṭakavanotkaṭaiḥ || 27 ||
[Analyze grammar]

vṛkṣairanekasaṃjñairyadbhūṣitaṃ śikharānvitaiḥ |
arogairdarśanīyaiśca suvṛttaiḥ kaiścidujjvalaiḥ || 28 ||
[Analyze grammar]

kuṭuṃbamiva viprāṇāmṛtvigbhirbhāti sarvataḥ |
śobhaṃte dhātusaṃkāśairaṃkuraiḥ prāvṛtā drumāḥ || 29 ||
[Analyze grammar]

kulīnairiva niśchidraiḥ svaguṇaiḥ prāvṛtā narāḥ |
pavanāviddhaśikharaiḥ spṛśaṃtīva parasparam || 30 ||
[Analyze grammar]

ājighraṃtī vacā'nyonyaṃ puṣpaśākhāvataṃsakāḥ |
nāgavṛkṣāḥ kvacitpuṣpairdrumavānīrakesaraiḥ || 31 ||
[Analyze grammar]

nayanairiva śobhaṃte caṃcalaiḥ kṛṣṇatārakaiḥ |
puṣpasaṃpannaśikharāḥ karṇikāradrumāḥ kvacit || 32 ||
[Analyze grammar]

yugmayugmādvidhā ceha śobhanta iva daṃpatī |
supuṣpaprabhavāṭopaissiṃduvāra drupaṃktayaḥ || 33 ||
[Analyze grammar]

mūrtimatya ivābhāṃti pūjitā vanadevatāḥ |
kvacitkvacitkuṃdalatāḥ sapuṣpābharaṇojvalāḥ || 34 ||
[Analyze grammar]

dikṣu vṛkṣeṣu śobhaṃte bālacaṃdrā ivocchritāḥ |
sarjārjunāḥ kvacidbhānti vanoddeśeṣu puṣpitāḥ || 35 ||
[Analyze grammar]

dhautakauśeyavāsobhiḥ prāvṛtāḥ puruṣā iva |
atimuktakavallībhiḥ puṣpitābhistathā drumāḥ || 36 ||
[Analyze grammar]

upagūḍhā virājaṃte svanārībhiriva priyāḥ |
aparasparasaṃsaktaiḥ sālāśokāśca pallavaiḥ || 37 ||
[Analyze grammar]

hastairhastānspṛśaṃtīva suhṛdaścirasaṃgatāḥ |
phalapuṣpabharānamrāḥ panasāḥ saralārjunāḥ || 38 ||
[Analyze grammar]

anyonyamarcayaṃtīva puṣpaiścaiva phalaistathā |
mārutāvegasaṃśliṣṭaiḥ pādapāssālabāhubhiḥ || 39 ||
[Analyze grammar]

abhyāśamāgataṃ lokaṃ pratibhāvairivotthitāḥ |
puṣpāṇāmavarodhena suśobhārthaṃ niveśitāḥ || 40 ||
[Analyze grammar]

vasaṃtamahamāsādya puruṣānsparddhayaṃti hi |
puṣpaśobhābharanataiḥ śikharairvāyukaṃpitaiḥ || 41 ||
[Analyze grammar]

nṛtyaṃtīva narāḥ prītāḥ sragalaṃkṛtaśekharāḥ |
śṛṃgāgrapavanakṣiptāḥ puṣpāvaliyutā drumāḥ || 42 ||
[Analyze grammar]

savallīkāḥ pranṛtyaṃti mānavā iva sapriyāḥ |
svapuṣpanatavallībhiḥ pādapāḥ kvacidāvṛtāḥ || 43 ||
[Analyze grammar]

bhāṃti tārāgaṇaiścitraiḥ śaradīva nabhastalam |
drumāṇāmathavāgreṣu puṣpitā mālatī latāḥ || 44 ||
[Analyze grammar]

śekharāiva śobhaṃte racitā buddhipūrvakam |
haritāḥ kāṃcanacchāyāḥ phalitāḥ puṣpitā drumāḥ || 45 ||
[Analyze grammar]

sauhṛdaṃ darśayaṃtīva narāḥ sādhusamāgame |
puṣpakiṃjalkakapilā gatāḥ sarvadiśāsu ca || 46 ||
[Analyze grammar]

kadaṃbapuṣpasya jayaṃ ghoṣayaṃtīva ṣaṭpadāḥ |
kvacitpuṣpāsavakṣībāḥ saṃpataṃti tatastataḥ || 47 ||
[Analyze grammar]

puṃskokilagaṇāvṛkṣa gahaneṣviva sapriyāḥ |
śirīṣapuṣpasaṃkāśāḥ śukā mithunaśaḥ kvacit || 48 ||
[Analyze grammar]

kīrtayaṃti giraścitrāḥ pūjitā brāhmaṇā yathā |
sahacārisusaṃyuktā mayūrāścitrabarhiṇaḥ || 49 ||
[Analyze grammar]

vanāṃteṣvapi nṛtyaṃti śobhaṃta iva narttakāḥ |
kūjaṃtaḥpakṣisaṃghātā nānārutavirāviṇaḥ || 50 ||
[Analyze grammar]

kurvaṃti ramaṇīyaṃ vai ramaṇīyataraṃ vanam |
nānāmṛgagaṇākīrṇaṃ nityaṃ pramuditāṃḍajam || 51 ||
[Analyze grammar]

tadvanaṃ naṃdanasamaṃ manodṛṣṭivivarddhanam |
padmayonistu bhagavāṃstathā rūpaṃ vanottamam || 52 ||
[Analyze grammar]

dadarśādarśavaddṛṣṭyā saumyayāpā payanniva |
tā vṛkṣapaṃktayaḥ sarvā dṛṣṭvā devaṃ tathāgatam || 53 ||
[Analyze grammar]

nivedya brahmaṇe bhaktyā mumucuḥ puṣpasaṃpadaḥ |
puṣpapratigrahaṃ kṛtvā pādapānāṃ pitāmahaḥ || 54 ||
[Analyze grammar]

varaṃ vṛṇīdhvaṃ bhadraṃ vaḥ pādapānityuvāca saḥ |
evamuktā bhagavatā taravo niravagrahāḥ || 55 ||
[Analyze grammar]

ūcuḥ prāṃjalayaḥ sarve namaskṛtvā viriṃcanam |
varaṃ dadāsi ceddeva prapannajanavatsala || 56 ||
[Analyze grammar]

ihaiva bhagavannityaṃ vane saṃnihito bhava |
eṣa naḥ paramaḥ kāmaḥ pitāmaha namostu te || 57 ||
[Analyze grammar]

tvaṃ cedvasasi deveśa vanesminviśvabhāvana |
sarvātmanā prapannānāṃ vāṃchatāmuttamaṃ varam || 58 ||
[Analyze grammar]

varakoṭibhiranyābhiralaṃ no dīyatāṃ varam |
sannidhānena tīrthebhya idaṃ syātpravaraṃ mahat || 59 ||
[Analyze grammar]

brahmovāca |
uttamaṃ sarvakṣetrāṇāṃ puṇyametadbhaviṣyati |
nityaṃ puṣpaphalopetā nityasusthirayauvanāḥ || 60 ||
[Analyze grammar]

kāmagāḥ kāmarūpāśca kāmarūpaphalapradāḥ |
kāmasaṃdarśanāḥ puṃsāṃ tapaḥsiddhyujvalā nṛṇām || 61 ||
[Analyze grammar]

śriyā paramayā yuktā matprasādādbhaviṣyatha |
evaṃ sa varado brahmā anujagrāha pādapān || 62 ||
[Analyze grammar]

sthitvā varṣa sahasraṃ tu puṣkaraṃ prakṣipadbhuvi |
kṣitirnipatitā tena vyakaṃpata rasātalam || 63 ||
[Analyze grammar]

vivaśāstatyajurvelāṃ sāgarāḥ kṣubhitormayaḥ |
śakrāśani hatānīva vyāghra vyālā vṛtāni ca || 64 ||
[Analyze grammar]

śikharāṇyapyaśīryaṃta parvatānāṃ sahasraśaḥ |
devasiddhavimānāni gaṃdharvanagarāṇi ca || 65 ||
[Analyze grammar]

pracelurbabhramuḥ peturviviśuśca dharātalam |
kapotameghāḥ khātpetuḥ puṭasaṃghātadarśinaḥ || 66 ||
[Analyze grammar]

jyotirgaṇāṃśchādayaṃto babhūvustīvra bhāskarāḥ |
mahatā tasya śabdena mūkāṃdhabadhirīkṛtam || 67 ||
[Analyze grammar]

babhūva vyākulaṃ sarvaṃ trailokyaṃ sacarācaram |
surāsurāṇāṃ sarveṣāṃ śarīrāṇi manāṃsi ca || 68 ||
[Analyze grammar]

avaseduśca kimiti kimityetanna jajñire |
dhairyamālaṃbya sarve'tha brahmāṇaṃ cāpyalokayan || 69 ||
[Analyze grammar]

na ca te tamapaśyaṃta kutra brahmāgato hyabhūt |
kimarthaṃ kaṃpitā bhūmirnimittotpātadarśanam || 70 ||
[Analyze grammar]

tāvadviṣṇurgatastatra yatra devā vyavasthitāḥ |
praṇipatya idaṃ vākyamuktavaṃto divaukasaḥ || 71 ||
[Analyze grammar]

kimetadbhagavanbrūhi nimittotpātadarśanam |
trailokyaṃ kaṃpitaṃ yena saṃyuktaṃ kāladharmaṇā || 72 ||
[Analyze grammar]

jātakalpāvasānaṃ tu bhinnamaryādasāgaram |
catvāro diggajāḥ kiṃ tu babhūvuracalāścalāḥ || 73 ||
[Analyze grammar]

samāvṛtā dharā kasmātsaptasāgaravāriṇā |
utpattirnāsti śabdasya bhagavanniḥ prayojanā || 74 ||
[Analyze grammar]

yādṛśo vā smṛtaḥ śabdo na bhūto na bhaviṣyati |
trailokyamākulaṃ yena cakre raudreṇa codyatā || 75 ||
[Analyze grammar]

śubho'śubho vā śabdoreyaṃ trailokyasya divaukasām |
bhagavanyadi jānāsi kimetatkathayasva naḥ || 76 ||
[Analyze grammar]

evamukto'bravīdviṣṇuḥ parameṇānubhāvitaḥ |
mā bhaiṣṭa marutaḥ sarve śṛṇudhvaṃ cātra kāraṇam || 77 ||
[Analyze grammar]

niścayenānuvijñāya vakṣyāmyeṣa yathāvidham |
padmahasto hi bhagavānbrahmā lokapitāmahaḥ || 78 ||
[Analyze grammar]

bhūpradeśe puṇyarāśau yajñaṃ kartuṃ vyavasthitaḥ |
avarohe parvatānāṃ vane cātīvaśobhane || 79 ||
[Analyze grammar]

kamalaṃ tasya hastāttu patitaṃ dharaṇītale |
tasya śabdo mahāneṣa yena yūyaṃ prakaṃpitāḥ || 80 ||
[Analyze grammar]

tatrāsau taruvṛṃdena puṣpāmodābhinaṃditaḥ |
anugṛhyātha bhagavānvanaṃtatsamṛgāṃḍajam || 81 ||
[Analyze grammar]

jagato'nugrahārthāya vāsaṃ tatrānvarocayat |
puṣkaraṃ nāma tattīrthaṃ kṣetraṃ vṛṣabhameva ca || 82 ||
[Analyze grammar]

janitaṃ tadbhagavatā lokānāṃ hitakāriṇā |
brahmāṇaṃ tatra vai gatvā toṣayadhvaṃ mayā saha || 83 ||
[Analyze grammar]

ārādhyamāno bhagavānpradāsyati varānvarān |
ityuktvā bhagavānviṣṇuḥ saha tairdevadānavaiḥ || 84 ||
[Analyze grammar]

jagāma tadvanoddeśaṃ yatrāste sa tu kaṃjajaḥ |
prahṛṣṭāstuṣṭamanasaḥ kokilālāpalāpitāḥ || 85 ||
[Analyze grammar]

puṣpoccayojjvalaṃ śastaṃ viviśurbrahmaṇo vanam |
saṃprāptaṃ sarvadevaistu vanaṃ naṃdanasaṃmitam || 86 ||
[Analyze grammar]

padminīmṛgapuṣpāḍhyaṃ sudṛḍhaṃ śuśubhe tadā |
praviśyātha vanaṃ devāḥ sarvapuṣpopaśobhitam || 87 ||
[Analyze grammar]

iha devostīti devā babhramuśca didṛkṣavaḥ |
mṛgayaṃtastataste tu sarve devāḥ savāsavāḥ || 88 ||
[Analyze grammar]

adbhutasya vanasyāṃtaṃ na te dadṛśurāśugāḥ |
vicinvadbhistadā devaṃ daivairvāyurvilokitaḥ || 89 ||
[Analyze grammar]

sa tānuvāca brahmāṇaṃ na drakṣyatha tapo vinā |
tadā khinnā vicinvaṃtastasminparvatarodhasi || 90 ||
[Analyze grammar]

dakṣiṇe cottare caiva aṃtarāle punaḥ punaḥ |
vāyūktaṃ hṛdaye kṛtvā vāyustānabravītpunaḥ || 91 ||
[Analyze grammar]

trividho darśanopāyo viriṃcerasya sarvadā |
śraddhā jñānena tapasā yogena ca nigadyate || 92 ||
[Analyze grammar]

sakalaṃ niṣkalaṃ caiva devaṃ paśyaṃti yoginaḥ |
tapasvinastu sakalaṃ jñānino niṣkalaṃ param || 93 ||
[Analyze grammar]

samutpanne tu vijñāne maṃdaśraddho na paśyati |
bhaktyā paramayā kṣipraṃ brahma paśyaṃti yoginaḥ || 94 ||
[Analyze grammar]

draṣṭavyo nirvikāro'sau pradhānapuruṣeśvaraḥ |
karmaṇā manasā vācā nityayuktāḥ pitāmaham || 95 ||
[Analyze grammar]

tapaścarata bhadraṃ vo brahmārādhanatatparāḥ |
brāhmīṃ dīkṣāṃ prapannānāṃ bhaktānāṃ ca dvijanmanām || 96 ||
[Analyze grammar]

sarvakālaṃ sa jānāti dātavyaṃ darśanaṃ mayā |
vāyostu vacanaṃ śrutvā hitametadavetya ca || 97 ||
[Analyze grammar]

brahmecchāviṣṭamatayo vākpatiṃ ca tato'bruvan |
prajñānavibudhāsmākaṃ brāhmīṃ dīkṣāṃ vidhatsva naḥ || 98 ||
[Analyze grammar]

sa didīkṣayiṣuḥ kṣipramamarānbrahmadīkṣayā |
vedoktena vidhānena dīkṣayāmāsa tānguruḥ || 99 ||
[Analyze grammar]

vinītaveṣāḥ praṇatā aṃtevāsitvamāyayuḥ |
brahmaprasādaṃ saṃprāptāḥ pauṣkaraṃ jñānamīritam || 100 ||
[Analyze grammar]

yajñaṃ cakāra vidhinā dhiṣaṇodhvaryusattamaḥ |
padmaṃ kṛtvā mṛṇālāḍhyaṃ padmadīkṣāprayogataḥ || 101 ||
[Analyze grammar]

anujagrāha devāṃstānsurecchā prerito muniḥ |
tebhyo dadau vivekibhyaḥ sa vedoktāvadhānavit || 102 ||
[Analyze grammar]

dīkṣāṃ vai vismayaṃ tyaktvā bṛhaspatirudāradhīḥ |
ekamagniṃ ca saṃskṛtya mahātmā tridivaukasām || 103 ||
[Analyze grammar]

prādādāṃgirasastuṣṭo jāpyaṃ vedoditaṃ tu yat |
trisuparṇaṃ trimadhu ca pāvamānīṃ ca pāvanīm || 104 ||
[Analyze grammar]

sa hi jāpyādikaṃ sarvamaśikṣayadudāradhīḥ |
āpo hiṣṭheti yatsnānaṃ brāhmaṃ tatparipaṭhyate || 105 ||
[Analyze grammar]

pāpaghnaṃ duṣṭaśamanaṃ puṣṭiśrībalavarddhanam |
siddhidaṃ kīrtidaṃ caiva kalikalmaṣanāśanam || 106 ||
[Analyze grammar]

tasmātsarvaprayatnena brāhmasnānaṃ samācaret |
kurvaṃto maunino dāṃtā dīkṣitāḥ kṣapiteṃdriyāḥ || 107 ||
[Analyze grammar]

sarve kamaṃḍaluyutā muktakakṣākṣamālinaḥ |
daṃḍinaścīravastrāśca jaṭābhiratiśobhitāḥ || 108 ||
[Analyze grammar]

snānācārāsanaratāḥ prayatnadhyānadhāriṇaḥ |
mano brahmaṇi saṃyojya niyatāhārakāṃkṣiṇaḥ || 109 ||
[Analyze grammar]

atiṣṭhandarśanālāpasaṃgadhyānavivarjitāḥ |
evaṃ vratadharāḥ sarve trikālaṃ snānakāriṇaḥ || 110 ||
[Analyze grammar]

bhaktyā paramayā yuktā vidhinā parameṇa ca |
kālena mahatā dhyānāddevajñānamanogatāḥ || 111 ||
[Analyze grammar]

brahmadhyānāgninirdagdhā yadā śuddhaikamānasāḥ |
avirbabhūva bhagavānsarveṣāṃ dṛṣṭigocaraḥ || 112 ||
[Analyze grammar]

tejasāpyāyitāstasya babhūvurbhrāṃtacetasaḥ |
tatovalaṃbya te dhairyamiṣṭaṃ devaṃ yathāvidhi || 113 ||
[Analyze grammar]

ṣaḍaṃgavedayogena hṛṣṭacittāstu tatparāḥ |
śirogatairaṃjalibhiḥ śirobhiśca mahīṃ gatāḥ || 114 ||
[Analyze grammar]

tuṣṭuvuḥ sṛṣṭikarttāraṃ sthitikartāramīśvaram |
devā ūcuḥ |
brahmaṇe brahmadehāya brahmaṇyāyā'jitāya ca || 115 ||
[Analyze grammar]

namaskurmaḥ suniyatāḥ kratuvedapradāyine |
lokānukaṃpine deva sṛṣṭirūpāya vai namaḥ || 116 ||
[Analyze grammar]

bhaktānukaṃpinetyarthaṃ vedajāpyastutāya ca |
bahurūpasvarūpāya rūpāṇāṃ śatadhāriṇe || 117 ||
[Analyze grammar]

sāvitrīpataye deva gāyatrīpataye namaḥ |
padmāsanāya padmāya padmavaktrāya te namaḥ || 118 ||
[Analyze grammar]

varadāya varārhāya kūrmāya ca mṛgāya ca |
jaṭāmakuṭayuktāya sruvasrucanidhāriṇe || 119 ||
[Analyze grammar]

mṛgāṃkamṛgadharmāya dharmanetrāya te namaḥ |
viśvanāmne'tha viśvāya viśveśāya namonamaḥ || 120 ||
[Analyze grammar]

dharmanetratrāṇamasmādadhikaṃ kartumarhasi |
vāṅmanaḥkāyabhāvaistvāṃ prapannāssmaḥ pitāmaha || 121 ||
[Analyze grammar]

evaṃ stutastadā devairbrahmā brahmavidāṃ varaḥ |
pradāsyāmi smṛto bāḍhamamoghaṃ darśanaṃ hi vaḥ || 122 ||
[Analyze grammar]

bruvaṃtu vāṃchitaṃ putrāḥ pradāsyāmi varānvarān |
evamuktā bhagavatā devā vacanamabruvan || 123 ||
[Analyze grammar]

eṣa evādya bhagavansuparyāpto mahānvaraḥ |
janito naḥ suśabdoyaṃ kamalaṃ kṣipatā tvayā || 124 ||
[Analyze grammar]

kimarthaṃ kaṃpitā bhūmirlokāścākulitāḥ kṛtāḥ |
naitannirarthakaṃ deva ucyatāmatra kāraṇam || 125 ||
[Analyze grammar]

brahmovāca |
yuṣmaddhitārthametadvai padmaṃ vinihitaṃ mayā |
devatānāṃ ca rakṣārthaṃ śrūyatāmatra kāraṇam || 126 ||
[Analyze grammar]

asuro vajranābho'yaṃ bālajīvāpahārakaḥ |
avasthitastvavaṣṭabhya rasātalatalāśrayam || 127 ||
[Analyze grammar]

yuṣmadāgamanaṃ jñātvā tapasthānnihitāyudhān |
haṃtukāmo durācāraḥ seṃdrānapi divaukasaḥ || 128 ||
[Analyze grammar]

ghātaḥ kamalapātena mayā tasya vinirmitaḥ |
sa rājyaiśvaryadarpiṣṭastenāsau nihato mayā || 129 ||
[Analyze grammar]

loke'sminsamaye bhaktā brāhmaṇā vedapāragāḥ |
maiva te durgatiṃ yāṃtu labhaṃtāṃ sugatiṃ punaḥ || 130 ||
[Analyze grammar]

devānāṃ dānavānāṃ ca manuṣyoragarakṣasām |
bhūtagrāmasya sarvasya samosmi tridivaukasaḥ || 131 ||
[Analyze grammar]

yuṣmaddhitārthaṃ pāpo'sau mayā maṃtreṇa ghātitaḥ |
prāptaḥ puṇyakṛtānlokānkamalasyāsya darśanāt || 132 ||
[Analyze grammar]

yanmayā padmamuktaṃ tu tenedaṃ puṣkaraṃ bhuvi |
khyātaṃ bhaviṣyate tīrthaṃ pāvanaṃ puṇyadaṃ mahat || 133 ||
[Analyze grammar]

pṛthivyāṃ sarvajaṃtūnāṃ puṇyadaṃ paripaṭhyate |
kṛto hyanugraho devā bhaktānāṃ bhaktimicchatām || 134 ||
[Analyze grammar]

vanesminnityavāsena vṛkṣairabhyarthitena ca |
mahākālo vane'trāgādāgatasya mamānaghāḥ || 135 ||
[Analyze grammar]

tapasyatāṃ ca bhavatāṃ mahajjñānaṃ pradarśitam |
kurudhvaṃ hṛdaye devāḥ svārthaṃ caiva parārthakam || 136 ||
[Analyze grammar]

bhavadbhirdarśanīyaṃ tu nānārūpadharairbhuvi |
dviṣanvai jñāninaṃ vipraṃ pāpenaivārdito naraḥ || 137 ||
[Analyze grammar]

na vimucyeta pāpena janmakoṭiśatairapi |
vedāṃgapāragaṃ vipraṃ na hanyānna ca dūṣayet || 138 ||
[Analyze grammar]

ekasminnihate yasmātkoṭirbhavati ghātitā |
ekaṃ vedāṃtagaṃ vipraṃ bhojayecchraddhayānvitaḥ || 139 ||
[Analyze grammar]

tasya bhuktā bhavetkoṭirviprāṇāṃ nātra saṃśayaḥ |
yaḥ pātrapūraṇīṃ bhikṣāṃ yatīnāṃ tu prayacchati || 140 ||
[Analyze grammar]

vimuktaḥ sarvapāpebhyo nā'sau durgatimāpnuyāt |
yathāhaṃ sarvadevānāṃ jyeṣṭhaḥ śreṣṭhaḥ pitāmahaḥ || 141 ||
[Analyze grammar]

tathā jñānī sadā pūjyo nirmamo niḥ parigrahaḥ |
saṃsārabaṃdhamokṣārthaṃ brahmaguptamidaṃ vratam || 142 ||
[Analyze grammar]

mayā praṇītaṃ viprāṇāmapunarbhavakāraṇam |
agnihotramupādāya yastyajedajiteṃdriyaḥ || 143 ||
[Analyze grammar]

rauravaṃ sa prayātyāśu praṇīto yamakiṃkaraiḥ |
lokayātrāvitaṃḍaśca kṣudraṃ karma karoti yaḥ || 144 ||
[Analyze grammar]

sa rāgacittaḥ śṛṃgārī nārījana dhanapriyaḥ |
ekabhojī sumiṣṭāśī kṛṣivāṇijyasevakaḥ || 145 ||
[Analyze grammar]

avedo vedaniṃdī ca parabhāryāṃ ca sevate |
ityādidoṣaduṣṭo yastasya saṃbhāṣaṇādapi || 146 ||
[Analyze grammar]

naro narakagāmī syādyaśca sadvratadūṣakaḥ |
asaṃtuṣṭaṃ bhinnacittaṃ durmatiṃ pāpakāriṇam || 147 ||
[Analyze grammar]

na spṛśedaṃgasaṃgena spṛṣṭvā snānena śuddhyati |
evamuktvā sa bhagavānbrahmā tairamaraiḥ saha || 148 ||
[Analyze grammar]

kṣetraṃ niveśayāmāsa yathāvatkathayāmi te |
uttare caṃdranadyāstu prācī yāvatsarasvatī || 149 ||
[Analyze grammar]

pūrvaṃ tu naṃdanātkṛtsnaṃ yāvatkalpaṃ sapuṣkaram |
vedī hyeṣā kṛtā yajñe brahmaṇā lokakāriṇā || 150 ||
[Analyze grammar]

jyeṣṭhaṃ tu prathamaṃ jñeyaṃ tīrthaṃ trailokyapāvanam |
khyātaṃ tadbrahmadaivatyaṃ madhyamaṃ vaiṣṇavaṃ tathā || 151 ||
[Analyze grammar]

kaniṣṭhaṃ rudradaivatyaṃ brahmapūrvamakārayat |
ādyametatparaṃ kṣetraṃ guhyaṃ vedeṣu paṭhyate || 152 ||
[Analyze grammar]

araṇyaṃ puṣkarākhyaṃ tu brahmā sannihitaḥ prabhuḥ |
anugraho bhūmibhāge kṛto vai brahmaṇā svayam || 153 ||
[Analyze grammar]

anugrahārthaṃ viprāṇāṃ sarveṣāṃ bhūmicāriṇām |
suvarṇavajraparyaṃtā vedikāṃkā mahī kṛtā || 154 ||
[Analyze grammar]

vicitrakuṭṭimāratnaiḥ kāritā sarvaśobhanā |
ramate tatra bhagavānbrahmā lokapitāmahaḥ || 155 ||
[Analyze grammar]

viṣṇurudrau tathā devau vasavoppaścināvapi |
marutaśca maheṃdreṇa ramaṃte ca divaukasaḥ || 156 ||
[Analyze grammar]

etatte tathyamākhyātaṃ lokānugrahakāraṇam |
saṃhitānukrameṇātra maṃtraiśca vidhipūrvakam || 157 ||
[Analyze grammar]

vedānpaṭhaṃti ye viprā guruśuśrūṣaṇe ratāḥ |
vasaṃti brahmasāmīpye sarve tenānubhāvitāḥ || 158 ||
[Analyze grammar]

bhīṣma uvāca |
bhagavankena vidhinā araṇye puṣkare naraiḥ |
brahmalokamabhīpsadbhirvastavyaṃ kṣetravāsibhiḥ || 159 ||
[Analyze grammar]

kiṃ manuṣyairutastrībhiruta varṇāśramānvitaiḥ |
vasadbhiḥ kimanuṣṭheyametatsarvaṃ bravīhi me || 160 ||
[Analyze grammar]

pulastya uvāca |
naraiḥ strībhiśca vastavyaṃ varṇāśramanivāsibhiḥ |
svadharmācāraniratairdaṃbhamohavivarjitaiḥ || 161 ||
[Analyze grammar]

karmaṇā manasā vācā brahmabhaktairjiteṃdriyaiḥ |
anasūyubhirakṣudraiḥ sarvabhūtahite rataiḥ || 162 ||
[Analyze grammar]

bhīṣma uvāca |
kiṃ kurvāṇo naraḥ karma brahmabhaktastvihocyate |
kīdṛśā brahmabhaktāśca smṛtā nṝṇāṃ vadasva me || 163 ||
[Analyze grammar]

pulastya uvāca |
trividhā bhaktiruddiṣṭā manovākkāyasaṃbhavā |
laukikī vaidikī cāpi bhavedādhyātmikī tathā || 164 ||
[Analyze grammar]

dhyānadhāraṇayā buddhyā vedārthasmaraṇe hi yat |
brahmaprītikarī caiṣā mānasī bhaktirucyate || 165 ||
[Analyze grammar]

maṃtravedanamaskārairagniśrāddhādiciṃtanaiḥ |
jāpyaiścāvaśyakaiścaiva vācikī bhaktiriṣyate || 166 ||
[Analyze grammar]

vratopavāsaniyataiściteṃdriyanirodhibhiḥ |
bhūṣaṇairhemaratnāḍhyaistathā cāṃdrāyaṇādibhiḥ || 167 ||
[Analyze grammar]

brahmakṛcchropavāsaiśca tathācānyaiḥ śubhavrataiḥ |
kāyikībhaktirākhyātā trividhā tu dvijanmanām || 168 ||
[Analyze grammar]

goghṛtakṣīradadhibhiḥ ratnadīpakuśodakaiḥ |
gaṃdhairmālyaiśca vividhairdhātubhiścopapāditaiḥ || 169 ||
[Analyze grammar]

ghṛtagugguludhūpaiśca kṛṣṇāgarusugaṃdhibhiḥ |
bhūṣaṇairhemaratnāḍhyaiścitrābhiḥ sragbhireva ca || 170 ||
[Analyze grammar]

nṛtyavāditragītaiśca sarvaratnopahārakaiḥ |
bhakṣyabhojyānnapānaiśca yā pūjā kriyate naraiḥ || 171 ||
[Analyze grammar]

pitāmahaṃ samuddiśya bhaktissā laukikī matā |
vedamaṃtrahaviryogairbhaktiryā vaidikī matā || 172 ||
[Analyze grammar]

darśe vā paurṇamāsyāṃ vā kartavyamagnihotrakam |
praśastaṃ dakṣiṇādānaṃ puroḍāśaṃ carukriyā || 173 ||
[Analyze grammar]

iṣṭirdhṛtiḥ somapānāṃ yajñīyaṃ karma sarvaśaḥ |
ṛgyajuḥsāmajāpyāni saṃhitādhyayanāni ca || 174 ||
[Analyze grammar]

kriyaṃte vidhimuddiśya sā bhaktirvaidikīṣyate |
agni bhūmyanilākāśāṃbuniśākarabhāskaram || 175 ||
[Analyze grammar]

samuddiśya kṛtaṃ karma tatsarvaṃ brahmadaivatam |
ādhyātmikī tu dvividhā brahmabhaktiḥ sthitā nṛpa || 176 ||
[Analyze grammar]

saṃkhyākhyā yogajā cānyā vibhāgaṃ tatra me śṛṇu |
caturviṃśatitatvāni pradhānādīni saṃkhyayā || 177 ||
[Analyze grammar]

acetanāni bhogyāni puruṣaḥ paṃcaviṃśakaḥ |
cetanaḥ puruṣo bhoktā na kartā tasya karmaṇaḥ || 178 ||
[Analyze grammar]

ātmā nityo'vyayaścaiva adhiṣṭhātā prayojakaḥ |
avyaktaḥ puruṣo nityaḥ kāraṇaṃ ca pitāmahaḥ || 179 ||
[Analyze grammar]

tatvasargo bhāvasargo bhūtasargaśca tattvataḥ |
saṃkhyayā parisaṃkhyāya pradhānaṃ ca guṇātmakam || 180 ||
[Analyze grammar]

sādharmyamānamaiśvaryaṃ pradhānaṃ ca vidharmi ca |
kāraṇatvaṃ ca brahmatvaṃ kāmyatvamidamucyate || 181 ||
[Analyze grammar]

prayojyatvaṃ pradhānasya vaidharmyamidamucyate |
sarvatrakartṛsyadbrahmapuruṣasyāpyakartṛtā || 182 ||
[Analyze grammar]

cetanatvaṃ pradhāne ca sādharmyamidamucyate |
tatvāṃtaraṃ ca tatvānāṃ karmakāraṇameva ca || 183 ||
[Analyze grammar]

prayojanaṃ ca naiyojyamaiśvaryaṃ tatvasaṃkhyayā |
saṃkhyāstītyucyate prājñairviniścityārthaciṃtakaiḥ || 184 ||
[Analyze grammar]

iti tatvasya saṃbhāraṃ tatvasaṃkhyā ca tatvataḥ |
brahmatatvādhikaṃ cāpi śrutvā tatvaṃ vidurbudhāḥ || 185 ||
[Analyze grammar]

sāṃkhyakṛdbhaktireṣā ca sadbhirādhyātmikī kṛtā |
yogajāmapi bhaktānāṃ śṛṇu bhaktiṃ pitāmahe || 186 ||
[Analyze grammar]

prāṇāyāmaparo nityaṃ dhyānavānniyateṃdriyaḥ |
bhaikṣyabhakṣī vratī vāpi sarvapratyāhṛteṃdriyaḥ || 187 ||
[Analyze grammar]

dhāraṇaṃ hṛdaye kuryāddhyāyamānaḥ prajeśvaram |
hṛtpadmakarṇikāsīnaṃ raktavaktraṃ sulocanam || 188 ||
[Analyze grammar]

parito dyotitamukhaṃ brahmasūtrakaṭītaṭam |
caturvaktraṃ caturbāhuṃ varadābhayahastakam || 189 ||
[Analyze grammar]

yogajā mānasī siddhirbrahmabhaktiḥ parā smṛtā |
ya evaṃ bhaktimāndeve brahmabhaktaḥ sa ucyate || 190 ||
[Analyze grammar]

vṛttiṃ ca śṛṇu rājeṃdra yā smṛtā kṣetravāsinām |
svayaṃ devena viprāṇāṃ viṣṇvādīnāṃ samāgame || 191 ||
[Analyze grammar]

kathitā vistarātpūrvaṃ sarveṣāṃ tatra sannidhau |
nirmamā nirahaṃkārā niḥsaṃgā niṣparigrahāḥ || 192 ||
[Analyze grammar]

baṃdhuvarge ca niḥsnehāssamaloṣṭāśmakāṃcanāḥ |
bhūtānāṃ karmabhirnityairvividhairabhayapradāḥ || 193 ||
[Analyze grammar]

prāṇāyāmaparā nityaṃ paradhyānaparāyaṇāḥ |
yājinaḥ śucayo nityaṃ yatidharmaparāyaṇāḥ || 194 ||
[Analyze grammar]

sāṃkhyayogavidhijñāśca dharmajñāśchinnasaṃśayāḥ |
yajaṃte vidhinānena ye viprāḥ kṣetravāsinaḥ || 195 ||
[Analyze grammar]

araṇye pauṣkare teṣāṃ mṛtānāṃ satphalaṃ śṛṇu |
vrajaṃti te suduṣprāpaṃ brahmasāyujyamakṣayam || 196 ||
[Analyze grammar]

yatprāpya na punarjanma labhante mṛtyudāyakam |
punarāvartanaṃ hitvā brāhmīvidyāṃ samāsthitāḥ || 197 ||
[Analyze grammar]

punarāvṛttiranyeṣāṃ prapaṃcāśramavāsinām |
gārhasthyavidhimāśritya ṣaṭkarmanirataḥ sadā || 198 ||
[Analyze grammar]

juhoti vidhinā samyaṅmaṃtrairyajñe nimaṃtritaḥ |
adhikaṃ phalamāpnoti sarvaduḥkhavivarjitaḥ || 199 ||
[Analyze grammar]

sarvalokeṣu cāpyasya gatirna pratihanyate |
divyenaiśvaryayogena svārūḍhaḥ saparigrahaḥ || 200 ||
[Analyze grammar]

bālasūryaprakāśena vimānena suvarcasā |
vṛtaḥ strīṇāṃ sahasraistu svaṃcchadagamanālayaḥ || 201 ||
[Analyze grammar]

vicaratyanivāryeṇa sarvalokānyadṛcchayā |
spṛhaṇīyatamaḥ puṃsāṃ sarvadharmottamo dhanī || 202 ||
[Analyze grammar]

svargacyutaḥ prajāyeta kule mahati rūpavān |
dharmajño dharmabhaktaśca sarvavidyārthapāragaḥ || 203 ||
[Analyze grammar]

tathaiva brahmacaryeṇa guruśuśrūṣaṇena ca |
vedādhyayanasaṃyukto bhaikṣyavṛtirjitendriyaḥ || 204 ||
[Analyze grammar]

nityaṃ satyavrate yuktaḥ svadharmeṣvapramādavān |
sarvakāmasamṛddhena sarvakāmāvalaṃbinā || 205 ||
[Analyze grammar]

sūryeṇeva dvitīyena vimānenānivāritaḥ |
guhyakānāmabrahmākhya gaṇāḥ paramasaṃmatāḥ || 206 ||
[Analyze grammar]

aprameyabalaiśvaryā devadānavapūjitāḥ |
teṣāṃ sa samatā yāti tulyaiśvaryasamanvitaḥ || 207 ||
[Analyze grammar]

devadānavamartyeṣu bhavatyaniyatāyudhaḥ |
varṣakoṭisahasrāṇi varṣakoṭiśatāni ca || 208 ||
[Analyze grammar]

evamaiśvaryasaṃyukto viṣṇuloke mahīyate |
uṣitvā'sau vibhūtyaivaṃ yadā pracyavate punaḥ || 209 ||
[Analyze grammar]

viṣṇulokātsvakṛtyena svargasthāneṣu jāyate || 210 ||
[Analyze grammar]

puṣkarāraṇyamāsādya brahmacaryāśrame sthitaḥ |
abhyāsena tu vedānāṃ vasati mriyatepi vā || 211 ||
[Analyze grammar]

mṛto'sau yāti divyena vimānena svatejasā |
pūrṇacaṃdraprakāśena śaśivatpriyadarśanaḥ || 212 ||
[Analyze grammar]

rudralokaṃ samāsādya guhyakaiḥ saha modate |
aiśvaryaṃ mahadāpnoti sarvasya jagataḥ prabhuḥ || 213 ||
[Analyze grammar]

bhuktvā yugasahasrāṇi rudraloke mahīyate |
pracyutastu punastasmādrudralokātkrameṇa tu || 214 ||
[Analyze grammar]

nityaṃ pramuditastatra bhuktvā sukhamanāmayam |
dvijānāṃ sadane divye kule mahati jāyate || 215 ||
[Analyze grammar]

mānuṣeṣu sa dharmmātmā surūpo vākpatirbhavet |
spṛhaṇīyavapuḥ strīṇāmmahābhogapatirbalī || 216 ||
[Analyze grammar]

vānaprasthasamācārī grāmyauṣadhivivarjitaḥ |
sarvalokeṣu cāpyasya gatirna pratihanyate || 217 ||
[Analyze grammar]

śīrṇaparṇaphalāhāraḥ puṣpamūlāṃbubhojanaḥ |
kāpotenāśmakuṭṭena daṃtolūkhalikena ca || 218 ||
[Analyze grammar]

vṛtyupāyena jīveta cīravalkalavāsasā |
jaṭītriṣavaṇasnāyī tyaktadoṣastu daṃḍavān || 219 ||
[Analyze grammar]

kṛcchravrataparo yastu śvapaco yadi vā paraḥ |
jalaśāyī paṃcatapā varṣāsvabhrāvagāhakaḥ || 220 ||
[Analyze grammar]

kīṭakaṃṭakapāṣāṇabhūmyāṃ tu śayanaṃ tathā |
sthānavīrāsanarataḥ saṃvibhāgī dṛḍhavrataḥ || 221 ||
[Analyze grammar]

araṇyauṣadhibhoktā ca sarvabhūtābhayapradaḥ |
nityaṃ dharmārjanarato jitakrodho jiteṃdriyaḥ || 222 ||
[Analyze grammar]

brahmabhaktaḥ kṣetravāsī puṣkare vasate muniḥ |
sarvasaṃgaparityāgī svārāmo vigataspṛhaḥ || 223 ||
[Analyze grammar]

yaścātra vasate bhīṣma śṛṇu tasyāpi yā gatiḥ |
taruṇārkaprakāśena vedikāstaṃbhaśobhinā || 224 ||
[Analyze grammar]

brahmabhakto vimānena yāti kāmapracāriṇām |
virājamāno nabhasi dvitīya iva caṃdramāḥ || 225 ||
[Analyze grammar]

gītavāditranṛtyajñairgaṃdharvāpsarasāṃgaṇaiḥ |
apsarobhiḥ samāyukto varṣakoṭiśatānyasau || 226 ||
[Analyze grammar]

yasya kasyāpi devasya lokaṃ yātyanivāritaḥ |
brahmaṇo'nugraheṇaiva tatratatra virājate || 227 ||
[Analyze grammar]

brahmalokāccyutaścāpi viṣṇulokaṃ sa gacchati |
viṣṇulokātparibhraṣṭo rudralokaṃ sa gacchati || 228 ||
[Analyze grammar]

tasmādapi cyutaḥ sthānāddvīpeṣu sa hi jāyate |
svargeṣu ca tathānyeṣu bhogānbhuktvā yathepsitān || 229 ||
[Analyze grammar]

bhuktvaiśvaryaṃ tatasteṣu punarmartyeṣu jāyate |
rājā vā rājaputro vā jāyate dhanavānsukhī || 230 ||
[Analyze grammar]

surūpaḥ subhagaḥ kāṃtaḥ kīrtimānbhaktibhāvitaḥ |
brāhmaṇāḥ kṣatriyā vaiśyāḥ śūdrā vā kṣetravāsinaḥ || 231 ||
[Analyze grammar]

svadharmaniratā rājansuvṛttāścirajīvinaḥ |
sarvātmanā brahmabhaktā bhūtānugrahakāriṇaḥ || 232 ||
[Analyze grammar]

puṣkare tu mahākṣetre ye vasaṃti mumukṣavaḥ |
mṛtāste brahmabhavanaṃ vimānairyāṃti śobhanaiḥ || 233 ||
[Analyze grammar]

apsarogaṇasaṃghuṣṭaiḥ kāmagaiḥ kāmarūpibhiḥ |
athavā sarvadīptāgnau svaśarīraṃ juhoti yaḥ || 234 ||
[Analyze grammar]

brahmadhyāyī mahāsatvassa brahmabhavanaṃ vrajet |
brahmaloko'kṣayastasya śāśvato vibhavaiḥ saha || 235 ||
[Analyze grammar]

sarvalokottamo ramyo bhavatīṣṭārthasādhakaḥ |
puṣkare tu mahāpuṇye prāṇānye salile tyajan || 236 ||
[Analyze grammar]

teṣāmapyakṣayo bhīṣma brahmaloko mahātmanām |
sākṣātpaśyaṃti te devaṃ sarvaduḥkhavināśanam || 237 ||
[Analyze grammar]

sarvāmarayutaṃ devaṃ rudraviṣṇugaṇairyutam |
anāśake mṛtāśśūdrāḥ puṣkare tu vane narāḥ || 238 ||
[Analyze grammar]

haṃsayuktaistato yāṃti vimānairarkasaprabhaiḥ |
nānāratnasuvarṇāḍhyairdṛḍhairgaṃdhādhivāsitaiḥ || 239 ||
[Analyze grammar]

anaupamyaguṇairanyairapsarogītanāditaiḥ |
patākādhvajavinyastairnānāghaṇṭānināditaiḥ || 240 ||
[Analyze grammar]

bahvāścaryasamopetaiḥ krīḍāvijñānaśālibhiḥ |
suprabhairguṇasaṃpannairmayūravaravāhibhiḥ || 241 ||
[Analyze grammar]

brahmaloke narā dhīrā ramaṃte nāśake mṛtāḥ |
tatroṣitvā ciraṃ kālaṃ bhuktvā bhogānyathepsitān || 242 ||
[Analyze grammar]

dhanī vipnakule bhogī jāyate martyamāgataḥ |
kārīṣīṃ sādhayedyastu puṣkare tu vane naraḥ || 243 ||
[Analyze grammar]

sarvalokānparityajya brahmalokaṃ sa gacchati |
brahmaloke vasettāvadyāvatkalpakṣayo bhavet || 244 ||
[Analyze grammar]

naiva paśyati martyaṃ hi kliśyamānaṃ svakarmabhiḥ |
gatistasyā'pratihatā tiryagūrdhvamadhastathā || 245 ||
[Analyze grammar]

sa pūjyaḥ sarvalokeṣu yaśo vistārayanvaśī |
sadācāravidhiprajñaḥ sarvendriya manoharaḥ || 246 ||
[Analyze grammar]

nṛtyavāditragītajñaḥ subhagaḥ priyadarśanaḥ |
nityamamlānakusumo divyābharaṇabhūṣitaḥ || 247 ||
[Analyze grammar]

nīlotpaladalaśyāmo nīlakuṃcitamūrddhajaḥ |
ajaghanyāḥ sumadhyāśca sarvasaubhāgyapūritāḥ || 248 ||
[Analyze grammar]

sarvaiśvaryaguṇopetā yauvanenātigarvitāḥ |
striyaḥ sevaṃti tatrasthāḥ śayane ramayaṃti ca || 249 ||
[Analyze grammar]

vīṇāveṇuninādaiśca suptaḥ saṃpratibudhyate |
mahotsavasukhaṃ bhuṃkte duḥprāpyamakṛtātmabhiḥ || 250 ||
[Analyze grammar]

prasādāddevadevasya brahmaṇaḥ śubhakāriṇaḥ |
bhīṣma uvāca |
ācārāḥ paramā dharmāḥ kṣetradharmaparāyaṇāḥ || 251 ||
[Analyze grammar]

svadharmācāraniratā jitakrodhā jiteṃdriyāḥ |
brahmalokaṃ vrajaṃtīti naitaccitraṃ mataṃ mama || 252 ||
[Analyze grammar]

asaṃśayaṃ ca gacchaṃti lokānanyānapi dvijāḥ |
vinā padmopavāsena tathaiva niyamena ca || 253 ||
[Analyze grammar]

striyo mlechāśca śūdrāśca pakṣiṇaḥ paśavo mṛgāḥ |
mūkā jaḍāndhabadhirāstapo niyamavarjitāḥ || 254 ||
[Analyze grammar]

teṣāṃ vada gatiṃ vipra puṣkare ye tvavasthitāḥ |
pulastya uvāca |
striyo mlecchāśca śūdrāśca paśavaḥ pakṣiṇo mṛgāḥ || 255 ||
[Analyze grammar]

puṣkare tu mṛtā bhīṣma brahmalokaṃ vrajaṃti te |
śarīrairdivyarūpaistu vimānai ravisaprabhaiḥ || 256 ||
[Analyze grammar]

divyavyūhasamāyuktaiḥ suvarṇavaraketanaiḥ |
suvarṇavajrasopānamaṇistaṃbhavibhūṣitaiḥ || 257 ||
[Analyze grammar]

sarvakāmopabhogāḍhyaiḥ kāmagaiḥ kāmarūpibhiḥ |
nānārasāḍhyaṃ gacchaṃti strīsahasrasamākulāḥ || 258 ||
[Analyze grammar]

brahmalokaṃ mahātmāno lokānanyānyathepsitān |
brahmalokāccyutāścāpi kramāddvīpeṣu yāṃti te || 259 ||
[Analyze grammar]

kule mahati vistīrṇe dhanī bhavati sa dvijaḥ |
tiryagyoni gatā ye tu sarpakīṭapipīlikāḥ || 260 ||
[Analyze grammar]

sthalajā jalajāścaiva svedāṃḍodbhijjarāyujāḥ |
sakāmā vāpyakāmā vā puṣkare tu vane mṛtāḥ || 261 ||
[Analyze grammar]

sūryaprabhavimānasthā brahmalokaṃ prayāṃti te |
kalau yuge mahāghore prajāḥ pāpasamīritāḥ || 262 ||
[Analyze grammar]

nānyenāsminnupāyena dharmaḥ svargaśca labhyate |
vasaṃti puṣkare ye tu brahmārcanaratā narāḥ || 263 ||
[Analyze grammar]

kalau yuge kṛtārthāste kliśyaṃtyanye nirarthakāḥ |
rātrau karoti yatpāpaṃ naraḥ paṃcabhiriṃdriyaiḥ || 264 ||
[Analyze grammar]

karmaṇā manasā vācā kāmakrodhavaśānugāḥ |
prātaḥ sa jalamāsādya puṣkare tu pitāmaham || 265 ||
[Analyze grammar]

abhigamya śucirbhūttvā tasmātpāpātpramucyate |
udaye'rkasya cārabhya yāvaddarśanamūrdhvagam || 266 ||
[Analyze grammar]

mānasākhye prasaṃciṃtya brahmayoge haredagham |
dṛṣṭvā viriṃciṃ madhyāhne naraḥ pāpātpramucyate || 267 ||
[Analyze grammar]

madhyāhnāstamayāntaṃ yadiṃdriyaiḥ pāpamācaret |
pitāmahasya saṃdhyāyāṃ darśanādeva mucyate || 268 ||
[Analyze grammar]

śabdādīnviṣayānsarvānbhuṃjānopi sakāmataḥ |
yaḥ puṣkare brahmabhakto nivasettapasi sthitaḥ || 269 ||
[Analyze grammar]

puṣkarāraṇyamadhyastho miṣṭānnāsvādabhojanaḥ |
trikālamapi bhuṃjāno vāyubhakṣasamo mataḥ || 270 ||
[Analyze grammar]

vasaṃti puṣkare ye tu narāḥ sukṛtakarmiṇaḥ |
te labhaṃte mahābhogānkṣetrasyāsya prabhāvataḥ || 271 ||
[Analyze grammar]

yathā mahodadhestulyo na cānyo'sti jalāśayaḥ |
tathā vai puṣkarasyāpi samaṃ tīrthaṃ na vidyate || 272 ||
[Analyze grammar]

puṣkarāraṇyasadṛśaṃ tīrthaṃ nāstyadhikaṃ guṇaiḥ |
atha te'nyānpravakṣyāmi kṣetre ye'sminvyavasthitāḥ || 273 ||
[Analyze grammar]

viṣṇunā sahitāḥ sarva iṃdrādyāśca divaukasaḥ |
gajavaktraḥ kumāraśca revaṃtaḥ sadivākaraḥ || 274 ||
[Analyze grammar]

śivadūtī tathā devī kanyā kṣemaṃkarī sadā |
alaṃ tapobhirniyamaiḥ sukriyārcanakāriṇām || 275 ||
[Analyze grammar]

vratopavāsakarmāṇi kṛtvānyatra mahāṃtyapi |
jyeṣṭhe tu puṣkarāraṇye yastiṣṭhati nirudyamaḥ || 276 ||
[Analyze grammar]

labhate sarvakāmitvaṃ yo'traivāste dvijaḥ sadā |
pitāmahasamaṃ yāti sthānaṃ paramamavyayam || 277 ||
[Analyze grammar]

kṛte dvādaśabhirvarṣaistretāyāṃ hāyanena tu |
māsena dvāpare bhīṣma ahorātreṇa tatkalau || 278 ||
[Analyze grammar]

phalaṃ saṃprāpyate loke kṣetresmiṃstīrthavāsibhiḥ |
ityevaṃ devadevena puroktaṃ brahmaṇā mama || 279 ||
[Analyze grammar]

nātaḥ parataraṃ kiṃcitkṣetramastīha bhūtale |
tasmātsarvaprayatnenāraṇyametatsamāśrayet || 280 ||
[Analyze grammar]

gṛhastho brahmacārī ca vānaprastho'tha bhikṣukaḥ |
yathoktakāriṇaḥ sarve gacchaṃti paramāṃ gatim || 281 ||
[Analyze grammar]

ekasminnāśrame dharmaṃ yo'nutiṣṭhedyathāvidhi |
akāmadveṣasaṃyuktaḥ sa paratra mahīyate || 282 ||
[Analyze grammar]

catuṣpathāhi niḥśreṇī brahmaṇeha pratiṣṭhitā |
etāmāśritya niśreṇīṃ brahmaloke mahīyate || 283 ||
[Analyze grammar]

āyuṣo'pi caturbhāgaṃ brahmacāryanasūyakaḥ |
gurau vā guruputre vā vaseddharmārthakovidaḥ || 284 ||
[Analyze grammar]

karmātirekeṇa guroradhyetavyaṃ bubhūṣatā |
dakṣiṇānāṃ pradāpī syādāhūto gurumāśrayet || 285 ||
[Analyze grammar]

jaghanyaśāyī pūrvaṃ syādutthāyī guruveśmani |
yacca śiṣyeṇa karttavyaṃ kāryamāsevanādikam || 286 ||
[Analyze grammar]

kṛtamityeva tatsarvaṃ kṛtvā tiṣṭhettu pārśvataḥ |
kiṃkaraḥ sarvakārī ca sarvakarmasukovidaḥ || 287 ||
[Analyze grammar]

śucirdakṣo guṇopeto brūyādiṣṭamathottaram |
cakṣuṣā gurumavyagro nirīkṣeta jiteṃdriyaḥ || 288 ||
[Analyze grammar]

nā'bhuktavati cāśnīyādapītavati no pibet |
na tiṣṭhati tathāsīta na suptenaiva saṃviśet || 289 ||
[Analyze grammar]

uttānābhyāṃ ca pāṇibhyāṃ pādāvasya mṛdu spṛśet |
dakṣiṇaṃ dakṣiṇenaiva savyaṃ savyena pīḍayet || 290 ||
[Analyze grammar]

abhivādya guruṃ brūyādabhidhāṃ svāṃ bruvanniti |
idaṃ kariṣye bhagavannidaṃ cāpi mayā kṛtam || 291 ||
[Analyze grammar]

iti sarvaṃ ca vijñāpya nivedya gurave dhanam |
kuryātkṛtaṃ ca tatsarvamākhyeyaṃ gurave punaḥ || 292 ||
[Analyze grammar]

yāṃstu gaṃdhānrasānvāpi brahmacārī na sevate |
seveta tānsamāvṛtya iti dharmeṣu niścayaḥ || 293 ||
[Analyze grammar]

ye kecidvistareṇoktā niyamā brahmacāriṇaḥ |
tānsarvānanugṛhṇīyādbhaktaśśiṣyaśca vai guroḥ || 294 ||
[Analyze grammar]

sa eva gurave prītimupakṛtya yathābalam |
agrāmyeṣvāśrameṣveva śiṣyo varteta karmaṇā || 295 ||
[Analyze grammar]

vedavedau tathā vedānvedārthāṃśca tathā dvijaḥ |
bhikṣābhugapyadhaḥśāyī samadhītya gurormukhāt || 296 ||
[Analyze grammar]

vedavratopayogī ca caturthāṃśena yogataḥ |
gurave dakṣiṇāṃ datvā samāvartedyathāvidhi || 297 ||
[Analyze grammar]

dharmānvitairyuto dārairagnīnāvāhya pūjayet |
dvitīyamāyuṣo bhāgaṃ gṛhamedhī samācaret || 298 ||
[Analyze grammar]

gṛhasthavṛttayaḥ pūrvaṃ catasro munibhiḥ kṛtāḥ |
kusūladhānyā prathamā kuṃbhīdhānyā dvitīyakā || 299 ||
[Analyze grammar]

aśvastanī tṛtīyoktā kāpotyatha caturthikā |
tāsāṃ parāparā śreṣṭhā dharmato lokajittamā || 300 ||
[Analyze grammar]

ṣaṭkarmavarttakastvekastribhiranyaḥ prasarpate |
dvābhyāṃ caiva caturthastu dvijaḥ sa brahmaṇi sthitaḥ || 301 ||
[Analyze grammar]

gṛhamedhivratādanyanmahattīrthaṃ na cakṣate |
nātmārthe pācayedannaṃ na vṛthā ghātayetpaśum || 302 ||
[Analyze grammar]

prāṇī vā yadi vāprāṇī saṃskārādyajñamarhati |
na divā prasvapejjātu na pūrvāpararātrayoḥ || 303 ||
[Analyze grammar]

na bhuṃjītāṃtarākāle nānṛtaṃ tu vadediha |
na cāpyaśnanvasedvipro gṛhe kaścidapūjitaḥ || 304 ||
[Analyze grammar]

tathāsyātithayaḥ pūjyā havyakavyavahāḥ smṛtāḥ |
vedavidyāvratasnātā śrotriyā vedapāragāḥ || 305 ||
[Analyze grammar]

svakarmajīvinodāṃtāḥ kriyāvaṃtastapasvinaḥ |
teṣāṃ havyaṃ ca kavyaṃ cāpyarhaṇārthaṃ vidhīyate || 306 ||
[Analyze grammar]

naśvaraissaṃprayātasya svadharmāpagatasya ca |
apaviddhāgnihotrasya gurorvālīkakāriṇaḥ || 307 ||
[Analyze grammar]

asatyābhiniveśasya nādhikārosti karmaṇoḥ |
saṃvibhāgotra bhūtānāṃ sarveṣāmeva śiṣyate || 308 ||
[Analyze grammar]

tathaivāpacamānebhyaḥ pradeyaṃ gṛhamedhinā |
vighasāśī bhavennityaṃ nityaṃ cāmṛtabhojanaḥ || 309 ||
[Analyze grammar]

amṛtaṃ yajñaśeṣaṃ syādbhojanaṃ haviṣā samam |
saṃbhuktaśeṣaṃ yośnāti tamāhurvighasāśinam || 310 ||
[Analyze grammar]

svadāranirato dāṃto dakṣotyarthaṃ jiteṃdriyaḥ |
ṛtvikpurohitācāryamātulātithisaṃhataiḥ || 311 ||
[Analyze grammar]

vṛddhabālāturairvaidyairjñātisaṃbaṃdhi bāṃdhavaiḥ |
mātrā pitrā ca jāmātrā bhrātrā putreṇa bhāryayā || 312 ||
[Analyze grammar]

duhitrā dāsavargeṇa vivādaṃ na samācaret |
etānvimucya saṃvādānsarvapāpaiḥ pramucyate || 313 ||
[Analyze grammar]

etairjitaistu jayati sarvalokānna saṃśayaḥ |
ācāryo brahmalokeśaḥ prājāpatya prabhuḥ pitā || 314 ||
[Analyze grammar]

atithiḥ sarvalokeśa ṛtvigvedāśrayaḥ prabhuḥ |
jāmātāpsarasāṃloke jñātayo vaiśvadevikāḥ || 315 ||
[Analyze grammar]

saṃbaṃdhi bāṃdhavā dikṣu pṛthivyāṃ mātṛmātulau |
vṛddhabālāturāścaiva ākāśe prabhaviṣṇavaḥ || 316 ||
[Analyze grammar]

purodhā ṛṣilokeśaḥ saṃśritāssādhyalokapāḥ |
aśvilokapatirvaidyo bhrātā tu vasulokapaḥ || 317 ||
[Analyze grammar]

caṃdralokeśvarī bhāryā duhitāpsarasāṃ gṛhe |
bhrātā jyeṣṭhaḥ samaḥ pitrā bhāryā putra svakātanuḥ || 318 ||
[Analyze grammar]

kāyasthā dāsavargāśca duhitā kṛpaṇaṃ param |
tasmādetairadhikṣiptaḥ sahennityamasaṃjvaraḥ || 319 ||
[Analyze grammar]

gṛhadharmarato vidvāndharmaniṣṭho jitaklamaḥ |
nārabhedbahukāryāṇi dharmavānkiṃcidārabhet || 320 ||
[Analyze grammar]

gṛhasthavṛttayastisrastāsāṃ niśreyasaṃ paraṃ |
parasparaṃ tathaivāhuścāturāśramyameva ca || 321 ||
[Analyze grammar]

ye coktāni yamāsteṣāṃ sarvaṃ kāryaṃ bubhūṣuṇā |
kuṃbhadhānyairuṃcchaśilaiḥ kāpotīṃ vṛttimāśritaiḥ || 322 ||
[Analyze grammar]

yasmiṃścaite vasaṃtyarthāstadrāṣṭramabhivardhate |
pūrvāparāndaśaparānpunāti ca pitāmahān || 323 ||
[Analyze grammar]

gṛhasthavṛttimapyetāṃ vartayedyo gatavyathaḥ |
sa cakradharalokānāṃ samānāmprāpnuyādgatim || 324 ||
[Analyze grammar]

jiteṃdriyāṇāmathavā gatireṣā vidhīyate |
svargaloko gṛhasthānāṃ pratiṣṭhā niyatātmanāṃ || 325 ||
[Analyze grammar]

brahmaṇābhihatā śreṇī hyeṣā yasyāḥ pramucyate |
dvitīyāṃ kramaśaḥ prāpya svargaloke mahīyate || 326 ||
[Analyze grammar]

tṛtīyāmapi vakṣyāmi vānaprasthāśramaṃ śṛṇu |
gṛhasthastu yadā paśyedvalīpalitamātmanaḥ || 327 ||
[Analyze grammar]

apatyasyaiva cāpatyaṃ vanameva tadāśrayet |
gṛhasthavratakhinnānāṃ vānaprasthāśramaukasāṃ || 328 ||
[Analyze grammar]

śrūyatāṃ bhīṣma bhadraṃ te sarvalokāśrayātmanāṃ |
dīkṣāpūrvaṃ nivṛttānāṃ puṇyadeśanivāsināṃ || 329 ||
[Analyze grammar]

prajñābalayujāṃ puṃsāṃ satyaśaucakṣamāvatāṃ |
tṛtīyamāyuṣo bhāgaṃ vānaprasthāśrame vasan || 330 ||
[Analyze grammar]

tānevāgnīnparicaredyajamāno divaukasaḥ |
niyato niyatāhāro viṣṇubhaktiprasaktimān || 331 ||
[Analyze grammar]

tadāgnihotramātrāṇi yajñāṃgāni ca sarvaśaḥ |
akṛṣṭaṃ vai vrīhiyavaṃ nīvāraṃ vighasāni ca || 332 ||
[Analyze grammar]

grīṣme haviṣyaṃ prāyacchetsa māgheṣvapi paṃcasu |
vānaprasthāśramepyetāścatasro vṛttayaḥ smṛtāḥ || 333 ||
[Analyze grammar]

sadyaḥ prabhakṣakāḥ kecitkecinmāsikasaṃcayān |
vārṣikānsaṃcayānkecitkeciddvādaśavārṣikān || 334 ||
[Analyze grammar]

kurvantyatithipūjārthaṃ yajñatantrārthameva ca |
abhrāvakāśā varṣāsu hemaṃte jalasaṃśrayāḥ || 335 ||
[Analyze grammar]

grīṣme paṃcāgnitapasaḥ śaradyamṛtabhojanāḥ |
bhūmau viparivartaṃte tiṣṭhaṃti prapadairapi || 336 ||
[Analyze grammar]

sthānāsane ca vartante vasaneṣvapi saṃsthite |
daṃtolūkhalinaḥ kecidaśmakuṭṭāstathā pare || 337 ||
[Analyze grammar]

śuklapakṣe pibantyeke yavāgūṃ kvathitāṃ kvacit |
kṛṣṇapakṣe pibaṃtyeke bhuṃjate ca yathāgamam || 338 ||
[Analyze grammar]

mūlaireke phalaireke jalaireke dṛḍhavratāḥ |
varttayaṃti yathānyāyaṃ vaikhānasa dhṛtavratāḥ || 339 ||
[Analyze grammar]

etāścānyāśca vividhā dīkṣāsteṣāṃ manasvināṃ |
caturthaścaupaniṣado dharmaḥ sādhāraṇo mataḥ || 340 ||
[Analyze grammar]

vānaprastho gṛhasthaśca satatonyaḥ pravarttate |
tasminneva yuge tāta vipraiḥ sarvārthadarśibhiḥ || 341 ||
[Analyze grammar]

agastyaśca saptarṣayo madhucchaṃdo gaveṣaṇaḥ |
sāṃkṛtiḥ sadivo bhāṃḍiryavaprotho hyatharvaṇaḥ || 342 ||
[Analyze grammar]

ahovīryastathā kāmyaḥ sthāṇurmedhātithirbudhaḥ |
manovākaḥ śinīvākaḥ śūnyapālo kṛtavraṇaḥ || 343 ||
[Analyze grammar]

ete karmasu vidvāṃsastataḥ svargamupāgaman |
ete pratyakṣadharmāṇastathā yāyāvarāgaṇāḥ || 344 ||
[Analyze grammar]

ṛṣīṇāmugratapasāṃ dharmanaipuṇyadarśinām |
sureśvaraṃ samārādhya brāhmaṇā vanamāśritāḥ || 345 ||
[Analyze grammar]

apāsyoparatā māyāṃ brāhmaṇā vanamāśritāḥ |
anakṣatrāstathā dhṛṣyā dṛśyante proṣitā gaṇāḥ || 346 ||
[Analyze grammar]

jarayā tu paridyūnā vyādhinā paripīḍitāḥ |
caturthaṃ tvāśramaṃ śeṣaṃ vānaprasthāśramādyayuḥ || 347 ||
[Analyze grammar]

sadyaskārī sunirvāpya sarvavedasadakṣiṇām |
ātmayājī saumyamatirātmakrīḍātmasaṃśrayaḥ || 348 ||
[Analyze grammar]

ātmanyagniṃ samādhāya tyaktvāsarvaparigraham |
sadyaskaśca yajedyajñāniṣṭiṃ caiveha sarvadā || 349 ||
[Analyze grammar]

sadaiva yājināṃ yajñānātmanījyā pravarttate |
trīnevāgnīṃstyajetsamyagātmanyevātmanā kṣaṇāt || 350 ||
[Analyze grammar]

prāpnuyādyena vā yacca tatprāśnīyādakutsayan |
keśalomanakhānnyasyedvānaprasthāśrame rataḥ || 351 ||
[Analyze grammar]

āśramādāśramaṃ sadyaḥ pūto gacchati karmabhiḥ |
abhayaṃ sarvabhūtebhyo yo datvā pravrajeddvijaḥ || 352 ||
[Analyze grammar]

lokāstejomayāstasya pretya cānaṃtyamaśnute |
suśīlavṛtto vyapanītakalmaṣo na ceha nāmutra carantumīhate || 353 ||
[Analyze grammar]

aroṣamoho gatasaṃdhivigrahaḥ sa cedudāsīnavadātmaciṃtayā |
yameṣu caivānyagateṣu na vyathaḥ svaśāstraśūnyo hṛdinātmavibhramaḥ || 354 ||
[Analyze grammar]

bhavedyatheṣṭāgatirātmayājinī nissaṃśaye dharmapare jitendriye |
ataḥparaṃ śreṣṭhamatīvasadguṇairadhiṣṭhitaṃ trīnativartya cāśramān || 355 ||
[Analyze grammar]

caturthamuktaṃ paramāśramaṃ śṛṇu prakīrtyamānaṃ paramaṃ parāyaṇam |
prāpya saṃskārametābhyāmāśramābhyāṃ tataḥ param || 356 ||
[Analyze grammar]

yatkāryaṃ paramātmārthaṃ tattvamekamanāḥ śṛṇu |
kāṣāyaṃ dhārayitvā tu śreṇīsthāneṣu ca triṣu || 357 ||
[Analyze grammar]

yo vrajecca paraṃ sthānaṃ pārivrājyamanuttamam |
tadbhāvanena saṃnyasya vartanaṃ śrūyatāṃ tathā || 358 ||
[Analyze grammar]

eka eva careddharmaṃ sidhyarthamasahāyavān |
ekaścarati yaḥ paśyanna jahāti na hīyate || 359 ||
[Analyze grammar]

anagniraniketastu grāmaṃ bhikṣārthamāśrayet |
aśvastanavidhānaḥ syānmunirbhāvasamanvitaḥ || 360 ||
[Analyze grammar]

laghvāśī niyatāhāraḥ sakṛdannaṃ niṣevayet |
kapālaṃ vṛkṣamūlāni kucelamasahāyatā || 361 ||
[Analyze grammar]

upekṣā sarvabhūtānāmetāvadbhikṣu lakṣaṇam |
yasminvācaḥ praviśaṃti kūpe prāptā mṛtā iva || 362 ||
[Analyze grammar]

na vaktāraṃ punaryāṃti sa kaivalyāśrame vaset |
naiva paśyenna śṛṇuyādavācyaṃ jātu kasyacit || 363 ||
[Analyze grammar]

brāhmaṇānāṃ viśeṣeṇa naitadbhūyātkathaṃcana |
yadbrāhmaṇasyānukūlaṃ tadeva satataṃ vadet || 364 ||
[Analyze grammar]

tūṣṇīmāsīta niṃdāyāṃ kurvanbhaiṣajyamātmanaḥ |
yena pūrṇamivākāśaṃ bhavatyekena sarvadā || 365 ||
[Analyze grammar]

śūnyaṃ yena samākīrṇaṃ taṃ devā brāhmaṇaṃ viduḥ || 366 ||
[Analyze grammar]

yenakena cidāchinno yenakena cidāśitaḥ |
yatra kvacana śāyī ca taṃ devā brāhmaṇaṃ viduḥ || 367 ||
[Analyze grammar]

aheriva janādbhītaḥ suhṛdo narakādiva |
kṛpaṇādiva nārībhyastaṃ devā brāhmaṇaṃ viduḥ || 368 ||
[Analyze grammar]

na hṛṣyeta viṣīdeta mānito mānitastathā |
sarvabhūteṣvabhayadastaṃ devā brāhmaṇaṃ viduḥ || 369 ||
[Analyze grammar]

nābhinaṃdeta maraṇaṃ nābhinaṃdeta jīvitam |
kālameva nirīkṣeta nirdeśaṃ kṛṣako yathā || 370 ||
[Analyze grammar]

anabhyāhatacittaśca dāṃtaścāhatadhīstathā |
vimuktaḥ sarvapāpebhyo naro gacchettato divam || 371 ||
[Analyze grammar]

abhayaṃ sarvabhūtebhyo bhūtānāmabhayaṃ yataḥ |
tasya dehavimuktasya bhayaṃ nāsti kutaścana || 372 ||
[Analyze grammar]

yathā nāgapade'nyāni padāni padagāminām |
sarvāṇyevāvalīyaṃte tathā jñānāni cetasi || 373 ||
[Analyze grammar]

evaṃ sarvamahiṃsāyāṃ dharmo'rthaśca mahīyate |
mṛtaḥ sa nityaṃ bhavati yo hiṃsāṃ pratipadyate || 374 ||
[Analyze grammar]

ahiṃsakastataḥ samyagdhṛtimānniyateṃdriyaḥ |
śaraṇyassarvabhūtānāṃ gatimāpnotyanuttamām || 375 ||
[Analyze grammar]

evaṃ prajñānatṛptasya nirbhayasya manīṣiṇaḥ |
na mṛtyuradhikobhāvaḥ somṛtatvaṃ ca gacchati || 376 ||
[Analyze grammar]

vimuktaḥ sarvasaṃgebhyo munirākāśavatsthitaḥ |
viṣṇupriyakaraḥ śāṃtastaṃ devā brāhmaṇaṃ viduḥ || 377 ||
[Analyze grammar]

jīvitaṃ yasya dharmārthaṃ dharmoratyarthameva ca |
ahorātrādi puṇyārthaṃ taṃ devā brāhmaṇaṃ viduḥ || 378 ||
[Analyze grammar]

nivāritasamāraṃbhaṃ nirnamaskāramastutim |
akṣīṇaṃ kṣīṇakarmāṇaṃ taṃ devā brāhmaṇaṃ viduḥ || 379 ||
[Analyze grammar]

sarvāṇi bhūtāni sukhaṃ ramaṃte sarvāṇi duḥkhāni bhṛśaṃ bhavaṃti |
teṣāṃ bhavotpādanajātakhedaḥ kuryāttu karmāṇi ca śraddadhānaḥ || 380 ||
[Analyze grammar]

dānaṃ hi bhūtābhayadakṣiṇāyāḥ sarvāṇi dānānyadhitiṣṭhatīha |
tīkṣṇe tanuṃ yaḥ prathamaṃ juhoti sonaṃtamāpnotyabhayaṃ prajābhyaḥ || 381 ||
[Analyze grammar]

uttānamāsyena havirjuhoti anaṃtamāpnotyabhitaḥ pratiṣṭhām |
tasyāṃgasaṃgādabhiniṣkṛtaṃ ca vaiśvānaraṃ sarvamidaṃ prapede || 382 ||
[Analyze grammar]

prādeśamātraṃ hṛdabhisrutaṃ yattasminprāṇenātmayājī juhoti |
tasyāgnihotre hutamātmasaṃsthaṃ sarveṣu lokeṣu sadaiva teṣu || 383 ||
[Analyze grammar]

devaṃ vidhātuṃ trivṛtaṃ suvarṇaṃ ye vai vidustaṃ paramārthabhūtam |
te sarvabhūteṣu mahīyamānā devāḥ samarthā amṛtaṃ vrajaṃti || 384 ||
[Analyze grammar]

vedāṃśca vedyaṃ ca vidhiṃ ca kṛtsnamatho niruktaṃ paramārthatāṃ ca |
sarvaṃ śarīrātmani yaḥ praveda tasyābhisarve pracaraṃti nityam || 385 ||
[Analyze grammar]

bhūmāvasaktaṃ divi cāprameyaṃ hiraṇmayaṃ taṃ ca samaṃḍalāṃte |
pradakṣiṇaṃ dakṣiṇamaṃtarikṣe yo vedanāpyātmani dīptaraśmiḥ || 386 ||
[Analyze grammar]

āvartamānaṃ ca vivartamānaṃ ṣaṇnemi yaddvādaśāraṃ triparva |
yasyedamāsyaṃ paripāti viśvaṃ tatkālacakraṃ nihitaṃ guhāyām || 387 ||
[Analyze grammar]

yataḥ prasādaṃ jagataḥ śarīraṃ sarvāṃśca lokānadhigacchatīha |
tasminhi saṃtarpayatīha devānsa vai vimukto bhavatīha nityam || 388 ||
[Analyze grammar]

tejomayo nityamataḥ purāṇo loke bhavatyarthabhayādupaiti |
bhūtāni yasmānnabhayaṃ vrajaṃti bhūtebhyo yo no dvijate kadācit || 389 ||
[Analyze grammar]

agarhaṇīyo na ca garhatenyānsa vai vipraḥ pravaraṃ svātmanīkṣet |
vinītamohopyapanītakalmaṣo na ceha nāmutra ca yorthamṛcchati || 390 ||
[Analyze grammar]

aroṣamohaḥ samaloṣṭakāṃcanaḥ prahīṇaśoko gatasaṃdhivigrahaḥ |
apetaniṃdāstutirapriyāpriyaścarannudāsīnavadeva bhikṣuḥ || 391 ||
[Analyze grammar]