Chapter 1

[English text for this chapter is available]

svacchaṃ caṃdrāvadātaṃ karikaramakarakṣobhasaṃjātaphenaṃ |
brahmodbhūtiprasaktairvrataniyamaparaiḥ sevitaṃ vipramukhyaiḥ |
kārālaṃkṛtena tribhuvanaguruṇā brahmaṇā dṛṣṭipūtaṃ |
saṃbhogābhogaramyaṃ jalamaśubhaharaṃ pauṣkaraṃ vaḥ punātu || 1 ||
[Analyze grammar]

sūtamekāṃtamāsīnaṃ vyāsaśiṣyaṃ mahāmatiḥ |
lomaharṣaṇanāmā vā ugraśravasamāha tat || 2 ||
[Analyze grammar]

ṛṣīṇāmāśramāṃstāta gatvā dharmānsamāsataḥ |
pṛcchatāṃ vistarādbrūhi yanmattaḥ śrutavānasi || 3 ||
[Analyze grammar]

vedavyāsānmayā putra purāṇānyakhilāni ca |
tavākhyātāni prāptāni munibhyo vada vistarāt || 4 ||
[Analyze grammar]

prayāge munivaryaiśca yathāpṛṣṭaḥ svayaṃ prabhuḥ |
pṛṣṭena cānuśiṣṭāste munayo dharmakāṃkṣiṇaḥ || 5 ||
[Analyze grammar]

deśaṃ puṇyamabhīpsaṃto vibhunā ca hitaiṣiṇā |
sunābhaṃ divyarūpaṃ ca satyagaṃ śubhavikramaṃ || 6 ||
[Analyze grammar]

anaupamyamidaṃ cakraṃ vartamānamataṃdritāḥ |
pṛṣṭato yātaniyamātpadaṃ prāpsyatha yaddhitam || 7 ||
[Analyze grammar]

gacchato dharmacakrasya yatra nemirviśīryate |
puṇyaḥ sa deśo maṃtavya ityuvāca svayaṃ prabhuḥ || 8 ||
[Analyze grammar]

uktvā caivamṛṣīnsarvānadṛśyatvamagātpunaḥ |
gaṃgāvartasamāhāro nemiryatra vyaśīryata || 9 ||
[Analyze grammar]

ījire dīrghasatreṇa ṛṣayo naimiṣe tadā |
tatra gatvā tu tānbrūhi pṛcchato dharmasaṃśayān || 10 ||
[Analyze grammar]

ugraśravāstato gatvā jñānavinmunipuṃgavān |
abhigamyopasaṃgṛhya namaskṛtvā kṛtāṃjaliḥ || 11 ||
[Analyze grammar]

toṣayāmāsa medhāvī praṇipātena tānṛṣīn |
te cāpi satriṇaḥ prītāḥ sasadasyā mahātmane || 12 ||
[Analyze grammar]

tasmai sametya pūjāṃ ca yathāvatpratipedire |
ṛṣaya ūcuḥ |
kutastvamāgataḥ sūta kasmāddeśādihāgataḥ || 13 ||
[Analyze grammar]

kāraṇaṃ cāgame brūhi vṛṃdārakasamadyute |
sūta uvāca |
pitrāhaṃ tu samādiṣṭo vyāsaśiṣyeṇa dhīmatā || 14 ||
[Analyze grammar]

śuśrūṣasva munīngatvā yatte pṛcchaṃti tadvada |
vadaṃtu bhagavaṃto māṃ kathayāmi kathāṃ tu yāṃ || 15 ||
[Analyze grammar]

purāṇaṃ cetihāsaṃ vā dharmānatha pṛthagvidhān |
tāṃ giraṃ madhurāṃ tasya śuśruvurṛṣisattamāḥ || 16 ||
[Analyze grammar]

atha teṣāṃ purāṇasya śuśrūṣā samapadyata |
dṛṣṭvā tamativiśvastaṃ vidvāṃsaṃ laumaharṣaṇiṃ || 17 ||
[Analyze grammar]

tasminsatre kulapatissarvaśāstrāviśāradaḥ |
śaunako nāma medhāvī vijñānāraṇyake guruḥ || 18 ||
[Analyze grammar]

itthaṃ tadbhāvamālaṃbya dharmāñchuśrūṣurāha tam |
tvayā sūta mahābuddhe bhagavānbrahmavittamaḥ || 19 ||
[Analyze grammar]

itihāsapurāṇārthaṃ vyāsaḥ samyagupāsitaḥ |
dudohithamatiṃ tasya tvaṃ purāṇāśrayāṃ śubhāṃ || 20 ||
[Analyze grammar]

amīṣāṃ vipramukhyānāṃ purāṇaṃ prati samprati |
śuśrūṣā'ste mahābuddhe tachrāvayitumarhasi || 21 ||
[Analyze grammar]

sarve hīme mahātmāno nānāgotrāḥ samāgatāḥ |
svānsvānaṃśānpurāṇoktāñchṛṇvantu brahmavādinaḥ || 22 ||
[Analyze grammar]

saṃpūrṇe dīrghasatresmiṃstāṃstvaṃ śrāvaya vai munīn |
pādmaṃ purāṇaṃ sarveṣāṃ kathayasva mahāmate || 23 ||
[Analyze grammar]

kathaṃ padmaṃ samudbhūtaṃ brahma tatra kathaṃ nvabhūt |
prodbhūtena kathaṃ sṛṣṭiḥ kṛtā tāṃ tu tathā vada || 24 ||
[Analyze grammar]

evaṃ pṛṣṭastatastāṃstu pratyuvāca śubhāṃ giram |
sūkṣmaṃ ca nyāyasaṃyuktaṃ prābravīdraumaharṣaṇiḥ || 25 ||
[Analyze grammar]

prītosmyanugṛhītosmi bhavadbhiriha codanāt |
purāṇārthaṃ purāṇajñaiḥ sarvadharmaparāyaṇaiḥ || 26 ||
[Analyze grammar]

yathāśrutaṃ suvikhyātaṃ tatsarvaṃ kathayāmi vaḥ |
dharma eṣa tu sūtasya sadbhirdṛṣṭaḥ sanātanaḥ || 27 ||
[Analyze grammar]

devatānāmṛṣīṇāṃ ca rājñāṃ cāmitatejasām |
vaṃśānāṃ dhāraṇaṃ kāryaṃ stutīnāṃ ca mahātmanām || 28 ||
[Analyze grammar]

itihāsapurāṇeṣu dṛṣṭā ye brahmavādinaḥ |
na hi vedeṣvadhīkāraḥ kaścitsūtasya dṛśyate || 29 ||
[Analyze grammar]

vainyasya hi pṛthoryajñe varttamāne mahātmanaḥ |
māgadhaścaiva sūtaśca tamastautāṃ nareśvaram || 30 ||
[Analyze grammar]

tuṣṭenātha tayorddatto varo rājñā mahātmanā |
sūtāya sūtaviṣayo magadho māgadhāya ca || 31 ||
[Analyze grammar]

tatra sūtyāṃ samutpannaḥ sūto nāmeha jāyate |
aindre satre pravṛtte tu grahayukte bṛhaspatau || 32 ||
[Analyze grammar]

tameveṃdraṃ bārhaspatye tatra sūto vyajāyata |
śiṣyahastena yatpṛktamabhibhūtaṃ gurorhaviḥ || 33 ||
[Analyze grammar]

adharottaradhāreṇa jajñe tadvarṇasaṃkaram |
yetra kṣatrātsamabhavanbrāhmaṇyāścaiva yonitaḥ || 34 ||
[Analyze grammar]

pūrveṇaiva tu sādharmyādvaidharmāste prakīrtitāḥ |
madhyamo hyeṣa sūtasya dharmaḥ kṣetropajīvinaḥ || 35 ||
[Analyze grammar]

purāṇeṣvadhikāro me vihito brāhmaṇairiha |
dṛṣṭvā dharmamahaṃ pṛṣṭo bhavadbhirbrahmavādibhiḥ || 36 ||
[Analyze grammar]

tasmātsamyagbhuvi brūyāṃ purāṇamṛṣipūjitam |
pitṝṇāṃ mānasī kanyā vāsavaṃ samapadyata || 37 ||
[Analyze grammar]

apadhyātā ca pitṛbhirmatsyagarbhe babhūva sā |
araṇīva hutāśasya nimittaṃ puṇyajanmanaḥ || 38 ||
[Analyze grammar]

tasyāṃ babhūva pūtātmā maharṣistu parāśarāt |
tasmai bhagavate kṛtvā namaḥ satyāya vedhase || 39 ||
[Analyze grammar]

puruṣāya purāṇāya brahmavākyānuvartine |
mānavacchadmarūpāya viṣṇave śaṃsitātmane || 40 ||
[Analyze grammar]

jātamātraṃ ca yaṃ veda upatasthe sasaṃgrahaḥ |
matimaṃthānamāvidhya yenāsau śrutisāgarāt || 41 ||
[Analyze grammar]

prakāśo janito loke mahābhārata caṃdramāḥ |
bhārataṃ bhānumānviṣṇuryadi na syuramī trayaḥ || 42 ||
[Analyze grammar]

tato'jñānatamoṃdhasya kāvasthā jagato bhavet |
kṛṣṇadvaipāyanaṃ vyāsaṃ viddhi nārāyaṇaṃ prabhum || 43 ||
[Analyze grammar]

ko hyanyaḥ puṃḍarīkākṣānmahābhāratakṛdbhavet |
tasmādahamupāśrauṣaṃ purāṇaṃ brahmavādinaḥ || 44 ||
[Analyze grammar]

sarvajñātsarvalokeṣu pūjitāddīptatejasaḥ |
purāṇaṃ sarvaśāstrāṇāṃ prathamaṃ brahmaṇā smṛtam || 45 ||
[Analyze grammar]

uttamaṃ sarvalokānāṃ sarvajñānopapādakam |
trivargasādhanaṃ puṇyaṃ śatakoṭipravistaram || 46 ||
[Analyze grammar]

niḥśeṣeṣu ca lokeṣu vājirūpeṇa keśavaḥ |
brahmaṇastu samādeśādvedānāhṛtavānasau || 47 ||
[Analyze grammar]

aṃgāni caturo vedānpurāṇanyāyavistaram |
asureṇākhilaṃ śāstramapahṛtyātmasātkṛtam || 48 ||
[Analyze grammar]

matsyarūpeṇājahāra kalpādāvudakārṇave |
aśeṣametadavadadudakāṃtargato vibhuḥ || 49 ||
[Analyze grammar]

śrutvā jagāda ca munīnprativedāṃścaturmukhaḥ |
pravṛttissarvaśāstrāṇāṃ purāṇasyābhavattadā || 50 ||
[Analyze grammar]

kālenāgrahaṇaṃ dṛṣṭvā purāṇasya tadā vibhuḥ |
vyāsarūpastadā brahmā saṃgrahārthaṃ yuge yuge || 51 ||
[Analyze grammar]

caturlakṣapramāṇena dvāpare dvāpare jagau |
tadāṣṭādaśadhā kṛtvā bhūlokesminprakāśitaṃ || 52 ||
[Analyze grammar]

adyāpi devalokeṣu śatakoṭipravistaram |
tadevātra caturlakṣaṃ saṃkṣepeṇa niveśitam || 53 ||
[Analyze grammar]

pravakṣyāmi mahāpuṇyaṃ purāṇaṃ pādmasañjñitam |
sahasraṃ pañcapañcāśatpaṃcakhaṇḍaissamanvitam || 54 ||
[Analyze grammar]

tatrādau sṛṣṭikhaṇḍaṃ syādbhūmikhaṇḍaṃ tataḥ param |
svargakhaṇḍaṃ tataḥ paścāttataḥ pātālakhaṇḍakam || 55 ||
[Analyze grammar]

pañcamaṃ ca tataḥ khyātamuttaraṃ khaṇḍamuttamam |
etadeva mahāpadmamudbhūtaṃ yanmayaṃ jagat || 56 ||
[Analyze grammar]

tadvṛttāntāśrayaṃ yasmātpādmamityucyate tataḥ |
etatpurāṇamamalaṃ viṣṇumāhātmyanirmalam || 57 ||
[Analyze grammar]

devadevo hariryadvai brahmaṇe proktavānpurā |
brahmaṇābhihitaṃ pūrvaṃ yāvanmātraṃ marīcaye || 58 ||
[Analyze grammar]

etadeva ca vai brahmā pādmaṃ loke jagāda vai |
sarvabhūtāśrayaṃ tacca pādmamityucyate budhaiḥ || 59 ||
[Analyze grammar]

pādmaṃ tatpaṃcapaṃcāśatsahasrāṇīha paṭhyate |
paṃcabhiḥ parvabhiḥ proktaṃ saṃkṣepādvyāsakāritāt || 60 ||
[Analyze grammar]

pauṣkaraṃ prathamaṃ parva yatrotpannaḥ svayaṃ virāṭ |
dvitīyaṃ tīrthaparva syātsarvagrahagaṇāśrayam || 61 ||
[Analyze grammar]

tṛtīyaparvagrahaṇā rājāno bhūridakṣiṇāḥ |
vaṃśānucaritaṃ caiva caturthe parikīrtitam || 62 ||
[Analyze grammar]

paṃcame mokṣatatvaṃ ca sarvatatvaṃ nigadyate |
pauṣkare navadhā sṛṣṭiḥ sarveṣāṃ brahmakāritā || 63 ||
[Analyze grammar]

devatānāṃ munīnāṃ ca pitṛsargastathāparaḥ |
dvitīye parvatāścaiva dvīpāḥ sapta sasāgarāḥ || 64 ||
[Analyze grammar]

tṛtīye rudrasargastu dakṣaśāpastathaiva ca |
caturthe saṃbhavo rājñāṃ sarvavaṃśānukīrttanam || 65 ||
[Analyze grammar]

antyepavargasaṃsthānaṃ mokṣaśāstrānukīrttanam |
sarvametatpurāṇe'smitkathayiṣyāmi vo dvijāḥ || 66 ||
[Analyze grammar]

idaṃ pavitraṃ yaśaso nidhānamidaṃ pitṝṇāmativallabhaṃ syāt idaṃ ca devasya sukhāya nityamidaṃ mahāpātakabhicca puṃsām || 67 ||
[Analyze grammar]