Chapter 22

upāsya sāṃdhyaṃ vidhimantimāśārāgeṇa kāntādharacumbicetāḥ |
avāptavānsaptamabhūmibhāge bhaimīdharaṃ saudhamasau dharendraḥ || 1 ||
[Analyze grammar]

pratyudvrajantyā priyayā vimuktaṃ paryaṅkamaṅkasthitasajjaśayyam |
adhyāsya tāmapyadhivāsya so'yaṃ saṃdhyāmupaślokayati sma sāyam || 2 ||
[Analyze grammar]

vilokanenānugṛhāṇa tāvaddiśaṃ jalānāmadhipasya dārān |
akṣāli lākṣāpayaseva yeyamapūri paṅkairiva kuṅkumasya || 3 ||
[Analyze grammar]

uccaistarādambaraśailamauleścyuto ravirgairikagaṇḍaśailaḥ |
tasyaiva pātena vicūrṇitasya saṃdhyārajorājirihojjihīte || 4 ||
[Analyze grammar]

astādricūḍālayapakkaṇālicchekasya kiṃ kukkuṭapeṭakasya |
yāmāntakūjollasitaiḥ śikhaughairdigvāruṇī drāgaruṇīkṛteyam || 5 ||
[Analyze grammar]

paśya drutāstaṃgatasūryaniryatkarāvalīhaiṅgulavetrayātra |
niṣidhyamānāhani saṃdhyayāpi rātripratīhārapade'dhikāram || 6 ||
[Analyze grammar]

mahānaṭaḥ kiṃ nu sabhānurāge saṃdhyāya saṃdhyāṃ kunaṭīmapīśām |
tanoti tanvāviyatāpi tāraśreṇisrajā sāṃpratamaṅga hāram || 7 ||
[Analyze grammar]

bhūṣāsthidāmnastruṭitasya nāṭyātpaśyoḍukoṭīkapaṭaṃ vahadbhiḥ |
digmaṇḍalaṃ maṇḍayatīha khaṇḍaiḥ sāyaṃnaṭastārakarāṭkirīṭaḥ || 8 ||
[Analyze grammar]

kālaḥ kirātaḥ sphuṭapadmakasya vadhaṃ vyadhādyasya dinadvipasya |
tasyeva saṃdhyā rucirāsradhārā tārāśca kumbhasthalamauktikāni || 9 ||
[Analyze grammar]

saṃdhyāsarāgaḥ kakubho vibhāgaḥ śivāvivāhe vibhunāyameva |
digvāsasā pūrvamavaimi puṣpasindūrikāparvaṇi paryadhāyi || 10 ||
[Analyze grammar]

satīmumāmudvahatā ca puṣpasindūrikāṛthaṃ vasane sunetre |
diśau dvisaṃdhīmabhi rāgaśobhe digvāsasobhe kimalambhiṣātām || 11 ||
[Analyze grammar]

ādāya daṇḍaṃ sakalāsu dikṣu yo'yaṃ paribhrāmyati bhānubhikṣuḥ |
abdhau nimajjanniva tāpaso'yaṃ saṃdhyābhrakāṣāyamadhatta sāyam || 12 ||
[Analyze grammar]

astācale'sminnikaṣopalābhe saṃdhyākaṣollekhaparīkṣito yaḥ |
vikrīya taṃ helihiraṇyapiṇḍaṃ tārāvarāṭāniyamādita dyauḥ || 13 ||
[Analyze grammar]

pacelimaṃ dāḍimamarkabimbamuttārya saṃdhyā tvagivojjhitāsya |
tārāmayaṃ bījabhujādasīyaṃ kālena niṣṭhyūtamivāsthiyūtham || 14 ||
[Analyze grammar]

tārātatirbījamivādamādamiyaṃ niraṣṭhevi yadasthiyūtham |
tanniṣkulākṛtya raviṃ tvageṣā saṃdhyojjhitā pākimadāḍimaṃ vā || 15 ||
[Analyze grammar]

saṃdhyāvaśeṣe dhṛtatāṇḍavasya caṇḍīpateḥ patpatanābhighātāt |
kailāsaśailasphaṭikāśmakhaṇḍairamaṇḍi paśyotpatayālubhirdyauḥ || 16 ||
[Analyze grammar]

itthaṃ hriyā varṇanajanmaneva saṃdhyāmapakrāntavatīṃ pratītya |
tārātamodanturamantarikṣaṃ nirīkṣamāṇaḥ sa punarbabhāṣe || 17 ||
[Analyze grammar]

rāmeṣumarmavraṇanārtivegādratnākaraḥ prāgayamutpapāta |
grāhaughakirmīritamīnakambu nabho na bhoḥ kāmaśarāsanabhru || 18 ||
[Analyze grammar]

mohāya devāpsarasāṃ vimuktāstārāḥ śarāḥ puṣpaśareṇa śaṅke |
pañcāsyavatpañcaśarasya nāmni prapañcavācī khalu pañcaśabdaḥ || 19 ||
[Analyze grammar]

nabhonadīkūlakulāyacakrīkulasya naktaṃ virahākulasya |
dṛśorapāṃ santi pṛṣanti tārāḥ patanti tatsaṃkramaṇāni dhārāḥ || 20 ||
[Analyze grammar]

amūni manye'maranirjhariṇyā yādāṃsi godhā makaraḥ kulīraḥ |
tatpūrakhelatsurabhītidūro magnānyadhaḥ spaṣṭamitaḥ pratīmaḥ || 21 ||
[Analyze grammar]

smarasya kambuḥ kimayaṃ cakāsti divi trilokījayavādanīyaḥ |
kasyāparasyoḍumayaiḥ prasūnairvāditraśaktirghaṭate bhaṭasya || 22 ||
[Analyze grammar]

kiṃ yoginīyaṃ rajanī ratīśaṃ yājījivatpadmamamūmuhacca |
yogarddhimasyā mahatīmalagnamidaṃ vadatyambaracumbi kambu || 23 ||
[Analyze grammar]

prabodhakāle'hani bādhitāni tārāḥ khapuṣpāṇi nidarśayantī |
niśā ha śūnyādhvani yoginīyaṃ mṛṣā jagaddṛṣṭamapi sphuṭābham || 24 ||
[Analyze grammar]

eṇaḥ smareṇāṅkamayaḥ sapatrākṛto bhavadbhrūyugadhanvanā yaḥ |
mukhe tavendau lasatā sa tārā puṣpālibāṇānugato gato'yam || 25 ||
[Analyze grammar]

lokāśrayo maṇḍapamādisṛṣṭibrahmāṇḍamābhātyanukāṣṭhamasya |
svakāntireṇūtkaravāntimanti ghuṇavraṇadvāranibhāni bhāni || 26 ||
[Analyze grammar]

śacīsapatnyāṃ diśi paśya bhaimī śakrebhadānadravanirjharasya |
poplūyate vāsarasetunāśāducchṛṅkhalaḥ pūra ivāndhakāraḥ || 27 ||
[Analyze grammar]

rāmāliromāvalidigvigāhi dhvāntāyate vāhanamantakasya |
yadvīkṣya dūrādiva bibhyataḥ svānaśvāngṛhītvāpasṛto vivasvān || 28 ||
[Analyze grammar]

pakvaṃ mahākālaphalaṃ kilāsītpratyaggireḥ sānuni bhānubimbam |
bhinnasya tasyaiva dṛṣannipātādbījāni jānāmitamāṃ tamāṃsi || 29 ||
[Analyze grammar]

patyurgirīṇāmayaśaḥ sumerupradakṣiṇādbhāsvadanādṛtasya |
diśastamaścaitrarathānyanāmapatracchaṭāyā mṛganābhiśebhi || 30 ||
[Analyze grammar]

ūrdhvaṃ dhṛtaṃ vyoma sahasraraśmerdivā sahasreṇa karairivāsīt |
patattadevāṃśumatā vinedaṃ nediṣṭhatāmeti kutastamisram || 31 ||
[Analyze grammar]

ūrdhvārpitanyubjakaṭāhakalpe yadvyomni dīpena dinādhipena |
nyadhāyi tadbhūmamiladgurutvaṃ bhūmau tamaḥ kajjalamaskhalatkim || 32 ||
[Analyze grammar]

dhvāntaiṇanābhyā śitināmbareṇa diśaḥ śaraiḥ sūnaśarasya tāraiḥ |
mandākṣalakṣyā niśi māmanindau serṣyā bhavāyāntyabhisārikābhāḥ || 33 ||
[Analyze grammar]

bhāsvanmayīṃ mīlayato dṛśaṃ drāṅmithomiladvyañcalamādipuṃsaḥ |
ācakṣmahe tanvi tamāṃsi pakṣma śyāmatvalakṣmīvijitendulakṣma || 34 ||
[Analyze grammar]

vivasvatānāyiṣateva miśrāḥ svagosahasreṇa samaṃ janānām |
gāvo'pi netrāparanāmadheyāstenedamāndhyaṃ khalu nāndhakāraiḥ || 35 ||
[Analyze grammar]

dhvāntasya vāmoru vicāraṇāyāṃ vaiśeṣikaṃ cāru mataṃ mataṃ me |
aulūkamāhuḥ khalu darśanaṃ tatkṣamaṃ tamastattvanirūpaṇāya || 36 ||
[Analyze grammar]

mlānispṛśaḥ sparśaniṣedhabhūmeḥ seyaṃ triśaṅkoriva saṃpadasya |
na kiṃcidanyatprati kauśikīye dṛśau vihāya priyamātanoti || 37 ||
[Analyze grammar]

mūrdhābhiṣiktaḥ khalu yo grahāṇāṃ tadbhāsamāskandata ṛkṣaśobham |
divāndhakāraṃ sphuṭalabdharūpamālokatālokamulūkalokaḥ || 38 ||
[Analyze grammar]

dine mama dveṣiṇi kīdṛgeṣāṃ pracāra ityākalanāya cārīḥ |
chāyā vidhāya prativastulagnāḥ prāveśayatpraṣṭumivāndhakāraḥ || 39 ||
[Analyze grammar]

dhvāntasya tena kriyamāṇayetthaṃ dviṣāḥ śaśī varṇanayā'tha ruṣṭaḥ |
udyannupāśloki japāruṇaśrīrnarādhipenānunayecchayeva || 40 ||
[Analyze grammar]

paśyanvṛto'pyeṣa nimeṣamadreradhityakābhūmitiraskariṇyā |
pravarṣati preyasi candrikāmiścakoracañcūculukapraminduḥ || 41 ||
[Analyze grammar]

dhvānte drumāntānabhisārikāstvaṃ śaṅkasva saṅketaniketamāptāḥ |
chāyācchalādujjhitanīlacelā jyotsnānukūlaiścaritā dukūlaiḥ || 42 ||
[Analyze grammar]

tvadāsyalakṣmīmukuraṃ cakoraiḥ svakaumudīmādayamānamindum |
dṛśā niśendīvaracārubhāsā piboru rambhātarupīvaroru || 43 ||
[Analyze grammar]

asaṃśayaṃ sāgarabhāgudasthātpṛthvīdharādeva mathaḥ purāyam |
amuṣya yasmādadhunāpi sindhau sthitasya śailādudayaṃ pratīmaḥ || 44 ||
[Analyze grammar]

nijānujenātithitāmupetaḥ prācīpatervāhanavāraṇena |
sindūrasāndre kimakāri mūrdhni tenāruṇaśrīrayamujjihīte || 45 ||
[Analyze grammar]

yatprītimadbhirvadanaiḥ svasāmyādacumbi nākādhipanāyikānām |
tatastadīyādharayāvayogādudeti bimbāruṇabimba eṣaḥ || 46 ||
[Analyze grammar]

vilomitāṅkotkiraṇāddurūhadṛgādinā dṛśyavilocanādi |
vidhirvidhatte vidhunā vadhūnāṃ kimānanaṃ kāñcanasañcakena || 47 ||
[Analyze grammar]

anena vedhā viparītarūpavinirmitāṅkotkiraṇāṅgakena |
tvadānanaṃ dṛśyadṛgādyalakṣyadṛgādinaivākṛta sañcakena || 48 ||
[Analyze grammar]

asyāḥ surādhīśadiśaḥ purāsīdyadambaraṃ pītamidaṃ rajanyā |
candrāṃśucūrṇavyaticumbitena tenādhunā nūnamalohitāyi || 49 ||
[Analyze grammar]

tānīva gatvā pitṛlokamenamarañjayanyāni sa jāmadagnyaḥ |
chittvā śirostrāṇi sahasrabāhorvisrāṇi viśrāṇitavānpitṛbhyaḥ || 50 ||
[Analyze grammar]

akarṇanāsastrapate mukhaṃ te paśyanna sītāsyamivābhirāmam |
raktosravarṣī bata lakṣmaṇābhibhūtaḥ śaśī śūrpaṇakhāmukhābhaḥ || 51 ||
[Analyze grammar]

ādatta dīpraṃ maṇimambarasya dattvā yadasmai khalu sāyadhūrtaḥ |
rajyattuṣāradyutikūṭahema tatpāṇḍu jātaṃ rajataṃ kṣaṇena || 52 ||
[Analyze grammar]

bālena naktaṃsamayena muktaṃ raupyaṃ lasadbimbamivendubimbam |
bhramikramādujjhitapaṭṭasūtranetrāvṛtiṃ muñcati śoṇimānam || 53 ||
[Analyze grammar]

tārākṣarairyāmasite kaṭhinyā niśālikhadvyomni tamaḥpraśastim |
vilupya tāmalpayato'ruṇe'pi jātaḥ kare pāṇḍurimā himāṃśoḥ || 54 ||
[Analyze grammar]

sito yadātraiṣa tadānyadeśe cakāsti rajyacchavirujjihānaḥ |
taditthametasya nidheḥ kalānāṃ ko veda vā rāgavirāgatattvam || 55 ||
[Analyze grammar]

kaśmīrajai raśmibhiraupasaṃdhyairmṛṣṭaṃ dhṛtadhvāntakuraṅganābhi |
candrāṃśunā candanacāruṇāṅgaṃ kramātsamālambhi digaṅganābhiḥ || 56 ||
[Analyze grammar]

vidhistuṣārartudināni kartaṃkartaṃ vinirmāti tadantabhittaiḥ |
jyotsnīrnacettatpratimā imā vā kathaṃ kathaṃ tāni ca vāmanāni || 57 ||
[Analyze grammar]

ityuktiśeṣe sa vadhūṃ babhāṣe sūktiśrutāsaktinibaddhamaunām |
mukhābhyasūyānuśayādivendau keyaṃ tava preyasi mūkamudrā || 58 ||
[Analyze grammar]

śṛṅgārabhṛṅgārasudhākareṇa varṇasrajānūpaya karṇakūpau |
tvaccāruvāṇīrasaveṇitīraṃ tṛṇānukāraḥ khalu koṣakāraḥ || 59 ||
[Analyze grammar]

atraiva vāṇīmadhunā tavāpi śrotuṃ samīhe madhunaḥ sanābhim |
iti priyapreritayā tayātha prastotumārambhi śaśipraśastiḥ || 60 ||
[Analyze grammar]

pūraṃ vidhurvardhayituṃ payodheḥ śaṅke'yameṇāṅkamaṇiṃ kiyanti |
payāṃsi dogdhi priyaviprayogasaśokakokīnayane kiyanti || 61 ||
[Analyze grammar]

jyotsnāmayaṃ rātrikalindakanyāpūrānukāre'pasṛte'ndhakāre |
parisphurannirmaladīptidīpaṃ vyaktāyate saikatamantarīpam || 62 ||
[Analyze grammar]

hāsatviṣaivākhilakairavāṇāṃ viśvaṃ viśaṅke'jani dughdamugdham |
yato divā baddhamukheṣu teṣu sthite'pi candre na tathā cakāsti || 63 ||
[Analyze grammar]

mṛtyuṃjayasyaiṣa vasañjaṭāyāṃ na kṣīyate tadbhayadūramṛtyuḥ |
na vardhate ca svasudhāptajīvasragmuṇḍarāhūdbhavabhīratīva || 64 ||
[Analyze grammar]

tviṣaṃ cakorāya sudhāṃ surāya kalāmapi svāvayavaṃ harāya |
dadajjayatyeṣa samastamasya kalpadrumabhrāturathālpametat || 65 ||
[Analyze grammar]

aṅkeṇanābherviṣakṛṣṇakaṇṭhaḥ sudhāptaśuddhaḥ kaṭabhasmapāṇḍuḥ |
arhannapīndornijamaulidhānānmṛḍaḥ kalāmarhati ṣoḍaśīṃ na || 66 ||
[Analyze grammar]

puṣpāyudhasyāsthibhirardhadagdhaiḥ sitāsitaśrīraghaṭi dvijendraḥ |
smarāriṇā mūrdhani yaddhṛto'pi tanoti tattauṣṭikapauṣṭikāni || 67 ||
[Analyze grammar]

mṛgasya lobhātkhalu siṃhikāyāḥ sūnurmṛgāṅkaṃ kavalīkaroti |
svasyāpi dānādamumaṅkasuptaṃ nojjhanmudā tena ca mucyate'yam || 68 ||
[Analyze grammar]

sudhābhujo yatparipīya tucchametaṃ vitanvanti tadarhameva |
purā nipīyāsya pitāpi sindhurakāri tucchaḥ kalaśodbhavena || 69 ||
[Analyze grammar]

caturdigantīṃ paripūrayantī jyotsnaiva kṛtsnā surasindhubandhuḥ |
kṣīrodapūrodaravāsahārdavairasyametasya nirasyatīyam || 70 ||
[Analyze grammar]

putrī vidhostāṇḍavikāstu sindhoraśyā cakorasya dṛśorvayasyā |
tathāpi seyaṃ kumudasya kāpi bravīti nāmaiva hi kaumudīti || 71 ||
[Analyze grammar]

jyotsnāpayaḥkṣmātaṭavāstuvastucchāyāchalacchidradharā dharāyām |
śubhrāṃśuśubhrāṃśakarāḥ kalaṅkanīlaprabhāmiśravibhā vibhānti || 72 ||
[Analyze grammar]

kiyānyathānena viyadvibhāgastamonirāsādviśadīkṛtoyam |
adbhistathā lāvaṇasaindhavībhirullāsitābhiḥ śitirapyakāri || 73 ||
[Analyze grammar]

guṇau payodhernijakāraṇasya na hānivṛddhī kathametu candraḥ |
cireṇa so'yaṃ bhajate tu yatte na nityamambhodhirivātra citram || 74 ||
[Analyze grammar]

ādarśadṛśyatvamapi śrito'yamādarśadṛśyāṃ na bibharti mūrtim |
trinetrabhūrapyayamatrinetrādutpādamāsādayati sma citram || 75 ||
[Analyze grammar]

ijyeva devavrajabhojyaṛddhiḥ śuddhā sudhādīdhitimaṇḍalīyam |
hiṃsāṃ yathā saiva tathāṅgameṣā kalaṅkamekaṃ malinaṃ bibharti || 76 ||
[Analyze grammar]

ekaḥ pipāsuḥ pravahānilasya cyuto rathādvāhanaraṅkureṣaḥ |
astyambare'nambuni lelihāsyaḥ pibannamuṣyāmṛtabinduvṛndam || 77 ||
[Analyze grammar]

asmiñśiśau na sthita eva raṅkuryūni priyābhirvihitopadāyam |
āraṇyasaṃdeśa ivauṣadhībhiraṅke sa śaṅke vidhunā nyadhāyi || 78 ||
[Analyze grammar]

asyaiva sevārthamupāgatānāmāsvādayanpallavamoṣadhīnām |
dhayannamuṣyaiva sudhājalāni sukhaṃ vasatyeṣa kalaṅkaraṅkuḥ || 79 ||
[Analyze grammar]

rudreṣuvidrāvitamārtamārāttārāmṛgaṃ vyomani vīkṣya bibhyat |
manye'yamanyaḥ śaraṇaṃ viveśa matveśacūḍāmaṇimindumeṇaḥ || 80 ||
[Analyze grammar]

pṛṣṭhe'pi kiṃ tiṣṭhati nātha raṅkurvidhoraṅka iveti śaṅkā |
tattvāya tiṣṭhasva mukhe sva evaṃ yaddvairathe pṛṣṭhamapaśyadasya || 81 ||
[Analyze grammar]

uttānamevāsya valakṣakukṣiṃ devasya yuktiḥ śaśamaṅkamāha |
tenādhikaṃ devagaveṣvapi syāṃ śraddhāluruttānagatau śṛutāyām || 82 ||
[Analyze grammar]

dūrasthitairvastuni raktanīle vilokyate kevalanīlimā yat |
śaśasya tiṣṭhannapi pṛṣṭhalomnāṃ tannaḥ parokṣaḥ khalu rāgabhāgaḥ || 83 ||
[Analyze grammar]

bhaṅktuṃ prabhurvyākaraṇasya darpaṃ padaprayogādhvani loka eṣaḥ |
śaśo yadasyāsti śaśī tato'yamevaṃ mṛgo'syāsti mṛgīti noktaḥ || 84 ||
[Analyze grammar]

yāvantaminduṃ pratipatprasūte prāsāvi tāvānayamabdhināpi |
tatkālamīśena dhṛtasya mūrdhni vidhoraṇīyastvamihāsti liṅgam || 85 ||
[Analyze grammar]

āropyate cediha ketakatvamindau dalākārakalākalāpe |
tatsaṃvadatyaṅkamṛgasya nābhikastūrikrā saurabhavāsanābhiḥ || 86 ||
[Analyze grammar]

āsīdyathājyautiṣameṣa golaḥ śaśī samakṣaṃ cipiṭastatho'bhūt |
svarbhānudaṃṣṭrāyugayantrakṛṣṭapīyūṣapiṇyākadaśāvaśeṣaḥ || 87 ||
[Analyze grammar]

asāvasāmyādvitanoḥ sakhā no karpūraminduḥ khalu tasya mitram |
dagdhau hi tau dvāvapi pūrvarūpādyadvīryavattāmadhikāṃ dadhāte || 88 ||
[Analyze grammar]

sthāne vidhorvā madanasya sakhyaṃ sa śaṃbhunetre jvalati pralīnaḥ |
ayaṃ layaṃ gacchati darśabhāji bhāsvanmaye cakṣuṣi cādipuṃsaḥ || 89 ||
[Analyze grammar]

netrāravindatvamagānmṛgāṅkaḥ purā purāṇasya yadeṣa puṃsaḥ |
asyāṅka evāyamagāttadānīṃ kanīnikendindirasundaratvam || 90 ||
[Analyze grammar]

devena tenaiṣa ca kāśyapiśca sāmyaṃ samīkṣyobhayapakṣabhājau |
dvijādhirājau hariṇāśritau ca yuktaṃ niyuktau nayanakriyāyām || 91 ||
[Analyze grammar]

yairanvamāyi jvalanastuṣāre sarojinīdāhavikārahetoḥ |
tadīyadhūmaughatayā himāṃśau śaṅke kalaṅko'pi samarthitastaiḥ || 92 ||
[Analyze grammar]

svedasya dhārābhirivāpagābhirvyāptā jagadbhārapariśramārtā |
chāyāpadeśādvasudhā nimajjya sudhāmbudhāvujjhati khedamatra || 93 ||
[Analyze grammar]

mamānumaivaṃ bahukālanīlīnipātanīlaḥ khalu hemaśailaḥ |
indorjagacchāyamaye pratīke pīto'pi bhāgaḥ pratibimbitaḥ syāt || 94 ||
[Analyze grammar]

māvāpadunnidrasarojapūjā śriyaṃ śaśī padmanimīlitejāḥ |
akṣidvayenaiva nijāṅkaraṅkoralaṃkṛtastāmayameti manye || 95 ||
[Analyze grammar]

ya eṣa jāgarti śaśaḥ śaśāṅke budho vidhatte ka ivātra citram |
antaḥ kilaitatpituramburāśerāsītturaṅgo'pi mataṅgajo'pi || 96 ||
[Analyze grammar]

gaure priye bhātitamāṃ tamisrā jyautsnī ca nīle dayitā yadasmin |
śobhāptilobhādubhayostayorvā sitāsitāṃ mūrtimayaṃ bibharti || 97 ||
[Analyze grammar]

varṣātapānāvaraṇaṃ cirāya kāṣṭhaughamālambya samutthiteṣu |
bāleṣu tārākavakeṣvihaikaṃ vikasvarībhūtamavaimi candram || 98 ||
[Analyze grammar]

dināvasāne taraṇerakasmānnimajjanādviśvavilocanāni |
asya prasādāduḍupasya naktaṃ tamovipaddvīpavatīṃ taranti || 99 ||
[Analyze grammar]

kiṃ nākṣṇi no'pi kṣaṇiko'ṇuko'yaṃ bhānasti tejomayabindurinduḥ |
atrestu netre ghaṭate yadāsīnmāsena nāśī mahato mahīyān || 10 ||
[Analyze grammar]

trātuṃ patiṃ nauṣadhayaḥ svaśaktyā mantreṇa viprāḥ kṣayiṇaṃ na śekuḥ |
enaṃ payodhirmaṇibhirna putraṃ sudhā prabhāvairna nijāśrayaṃ vā || 101 ||
[Analyze grammar]

mṛṣā niśānāthamahaḥ sudhā vā haredasau vā na jarāvināśau |
pītvā kathaṃ nāparathā cakorā vidhormarīcīnajarāmarāḥ syuḥ || 102 ||
[Analyze grammar]

vāṇībhirābhiḥ paripattrimābhirnarendramānandajaḍaṃ cakāra |
muhūrtamāścaryarasena bhaimī haimīva vṛṣṭiḥ stimitaṃ ca taṃ sā || 103 ||
[Analyze grammar]

ito mukhādvāgiyamāvirāsītpīyūṣadhārāmadhureti jalpan |
acumbadasyāḥ sa mukhendubimbaṃ saṃvāvadūkaśriyamambujānām || 104 ||
[Analyze grammar]

priyeṇa sātha priyamevamuktā vidarbhabhūmīpativaṃśamuktā |
smitāṃśujālaṃ vitatāra tārā divaḥ sphurantīva kṛtāvatārā || 105 ||
[Analyze grammar]

svavarṇanā na svayamarhatīti niyujya māṃ tvanmukhamindurūpam |
sthāne'tyudāste śaśinaḥ praśastau dharāturāsāhamiti sma sāha || 106 ||
[Analyze grammar]

tayeritaḥ prāṇasamaḥ sumukhyā giraṃ parīhāsarasotkirāṃ saḥ |
bhūlokasāraḥ smitavāk tuṣārabhānuṃ bhaṇiṣyansubhagāṃ babhāṇa || 107 ||
[Analyze grammar]

tavānane jātacarīṃ nipīya gītiṃ tadākarṇanalolupo'yam |
hātuṃ nu jātu spṛhayatyavaimi vidhuṃ mṛgastvadvadanabhrameṇa || 108 ||
[Analyze grammar]

indorbhrameṇopagamāya yogye jihvā tavāsye vidhuvāstumantam |
gītyā mṛgaṃ karṣatu bhantsyatā kiṃ pāśībabhūve śravaṇadvayena || 109 ||
[Analyze grammar]

āpyāyanādvā rucibhiḥ sudhāṃśoḥ śaityāttamaḥkānanajanmano vā |
yāvanniśāyāmatha gharmaduḥsthastāvadvrajatyahni na śabdapānthaḥ || 110 ||
[Analyze grammar]

dūre'pi tattāvakagānapānāllabdhāvadhiḥ svādurasopabhoge |
avajñayaiva kṣipati kṣapāyāḥ patiḥ khalu svānyamṛtāni bhāsaḥ || 111 ||
[Analyze grammar]

asminna vismāpayate'yamasmāṃścakṣurbabhūvaiṣa yadādipuṃsaḥ |
tadatrinetrāduditasya tanvi kulānurūpaṃ kila rūpamasya || 112 ||
[Analyze grammar]

ābhirmṛgendrodari kaumudībhiḥ kṣīrasya dhārābhiriva kṣāṇena |
akṣāli nīlī rucirambarasthā tamomayīyaṃ rajanīrajakyā || 113 ||
[Analyze grammar]

payomucāṃ mecakimānamuccairuccāṭayāmāsa ṛtuḥ śaradyā |
apāri vāmoru tayāpi kiṃcinna proñchituṃ lāñchanakālimāṣya || 114 ||
[Analyze grammar]

ekādaśaikādaśarudramaulīnastaṃ yato yānti kalāḥ kimasya |
praviśya śeṣāstu bhavanti pañcapañceṣutūṇīmiṣavo'rdhacandrāḥ || 115 ||
[Analyze grammar]

nirantaratvena nidhāya tanvi tārāsahasrāṇi yadi kriyeta |
sudhāṃśuranyaḥ sa kalaṅkamuktastadā tvadāsyaśriyamāśrayeta || 116 ||
[Analyze grammar]

yatpadmamāditsu tavānanīyāṃ kuraṅgalakṣmā ca mṛgākṣi lakṣmīm |
ekārthalipsākṛta eṣa śaṅke śaśāṅkapaṅkeruhayorvirodhaḥ || 117 ||
[Analyze grammar]

labdhaṃ na lekhaprabhuṇāpi pātuṃ pītvā mukhendoradharāmṛtaṃ te |
nipīya devairvighasīkṛtāyāṃ ghṛṇāṃ vidhorasya dadhe sudhāyām || 118 ||
[Analyze grammar]

enaṃ sa bibhradvidhumuttamāṅge girīndraputrīpatiroṣadhīśam |
aśnāti ghoraṃ viṣamabdhijanma dhatte bhuñaṅgaṃ ca vimuktaśaṅkaḥ || 119 ||
[Analyze grammar]

nāsya dvijendrasya babhūva paśya dārānguroryātavato'pi pātaḥ |
pravṛttayo'pyātmamayaprakāśānnahanti na hyantimadehamāptān || 120 ||
[Analyze grammar]

svadhākṛtaṃ yattanayaiḥ pitṛbhyaḥ śraddhāpavitraṃ tilacitramambhaḥ |
candraṃ pitṛsthānatayopatasthe tadaṅkarociḥkhacitā sudhaiva || 121 ||
[Analyze grammar]

paśyoccasaudhasthitisaukhyalakṣye tvatkelikulyāmbuni bimbamindoḥ |
ciraṃ nimajjyeha sataḥ priyasya bhrameṇa yaccumbati rājahaṃsī || 122 ||
[Analyze grammar]

sauvargavargairamṛtaṃ nipīya kṛto'hni tucchaḥ śaśalāñchano'yam |
pūrṇo'mṛtānāṃ niśi te'tra nadyāṃ magnaḥ punaḥ syātpratimācchalena || 123 ||
[Analyze grammar]

samaṃ samete śaśinaḥ kareṇa prasūnapāṇāviha kairaviṇyāḥ |
vivāhalīlāmanayorivāha madhucchalatyāgajalābhiṣekaḥ || 124 ||
[Analyze grammar]

vikāsinīlāyatapuṣpanetrā mṛgīyamindīvariṇī vanasthā |
vilokate kāntamihopariṣṭānmṛgaṃ tavaiṣānanacandrabhājam || 125 ||
[Analyze grammar]

tapasyatāmambuni kairavāṇāṃ samādhibhaṅge vibudhāṅganāyāḥ |
avaimi rātreramatādharoṣṭhaṃ mukhaṃ mayūkhasmitacārucandram || 126 ||
[Analyze grammar]

alpāṅkapaṅkā vidhumaṇḍalīyaṃ pīyūṣānīrā sarasī smarasya |
pānātsudhānāmajale'pyamṛtyuṃ cihnaṃ bibhartyatrabhavaṃ sa mīnam || 127 ||
[Analyze grammar]

tārāsthibhūṣā śaśijahnujābhṛccandrāṃśupāṃśucchuritadyutirdyauḥ |
chāyāpathacchadmaphaṇīndrahārā svaṃ mūrtimāha sphuṭamaṣṭamūrteḥ || 128 ||
[Analyze grammar]

ekaiva tārā munilocanasya jātā kilaitajjanakasya tasya |
tātādhikā saṃpadabhūdiyaṃ tu saptānvitā viṃśatirasya yattāḥ || 129 ||
[Analyze grammar]

mṛgākṣi yanmaṇḍalametadindoḥ smarasya tatpāṇḍuramātapatram |
yaḥ pūrṇimānantaramasya bhaṅgaḥ sa cchattrabhaṅgaḥ khalu manmathasya || 130 ||
[Analyze grammar]

daśānanenāpi jaganti jitvā yo'yaṃ purāpāri na jātu jetum |
mlānirvidhormānini saṃgateyaṃ tasya tvadekānananirjitasya || 131 ||
[Analyze grammar]

dṛṣṭo nijāṃ tāvadiyantyahāni jayannayaṃ pūrvadaśāṃ śaśāṅkaḥ |
pūrṇastvadāsyena tulāṃ gataścedanantaraṃ drakṣyasi bhaṅgamasya || 132 ||
[Analyze grammar]

kṣattrāṇi rāmaḥ paribhūya rāmātkṣattrādyathābhajyata sa dvijendraḥ |
tathaiva padmānabhibhūya sarvāṃstvadvaktrapadmātparibhūtimeti || 133 ||
[Analyze grammar]

antaḥ salakṣmīkriyate sudhāṃśo rūpeṇa paśye hariṇena paśya |
ityeṣa bhaimīmadadarśadasya kadācidantaṃ sa kadācidantaḥ || 134 ||
[Analyze grammar]

sāgarānmunivilocanodarādyaddvayādajani tena kiṃ dvijaḥ |
evameva ca bhavannayaṃ dvijaḥ paryavasyati vidhuḥ kimatrijaḥ || 135 ||
[Analyze grammar]

tārāvihārabhuvi candramayīṃ cakāra yanmaṇḍalīṃ himabhuvaṃ mṛganābhivāsam |
tenaiva tanvi sukṛtena mate jinasya svarlokalokatilakatvamavāpa dhātā || 136 ||
[Analyze grammar]

induṃ mukhādbahutṛṇaṃ tava yadgṛṇanti nainaṃ mṛgastyajati tanmṛgatṛṣṇayeva |
atyeti mohamahimā na himāṃśubimbalakṣmīviḍambimukhi vittiṣu pāśavīṣu || 137 ||
[Analyze grammar]

svarbhānunā prasabhapānavibhīṣikābhirduḥkhākṛtainamavadhūya sudhāsudhāṃśum |
svaṃ nihnute śitimacihnamamuṣya rāgaistāmbūlatāmramavalambya tavādharoṣṭham || 138 ||
[Analyze grammar]

haryakṣībhavataḥ kuraṅgamudare prakṣipya yadvā śaśaṃ jātasphītatanoramuṣya haritā sūtasya patnyā hareḥ |
bhaṅgastvadvadanāmbujādajani yatpadmāttadekākinaḥ syādekaḥ punarasya sa pratibhaṭo yaḥ siṃhikāyāḥ sutaḥ || 139 ||
[Analyze grammar]

yatpūjāṃ nayanadvayotpalamayīṃ vedhā vyadhātpadmabhūrvākpārīṇaruciḥ sa cenmukhamayaṃ padmaḥ priye tāvakam |
kaḥ śītāṃśurasau tadā makhamṛgavyādhottamāṅgasthalasthāsnusvastaṭinītaṭāvanivanīvānīravāsī bakaḥ || 140 ||
[Analyze grammar]

jātaṃ śātakratavyāṃ hariti viharataḥ kākatālīyamasyāmaśyāmatvaikamatyasthitasakalakalānirmiternirmalasya |
indorindīvarābhaṃ balavijayigajagrāmaṇīgaṇḍapiṇḍadvandvāpādānadānadravalavalaganādaṅkamaṅke viśaṅke || 141 ||
[Analyze grammar]

aṃśaṃ ṣoḍakṣamāmananti rajanībhartuḥ kalāṃ vṛttayatnyenaṃ pañcadaśaiva tāḥ pratipadādyārākavardhiṣṇavaḥ |
yā śeṣā punaruddhṛtā tithimṛte sā kiṃ harālaṃkṛtistasyāḥ sthānabilaṃ kalaṅkamiha kiṃ paśyāmi saśyāmikam || 142 ||
[Analyze grammar]

jyotsnāmādayate cakoraśiśunā drāghīyasī locane lipsurmūlamivopajīvitumitaḥ saṃtaparṇātmīkṛtāt |
aṅke raṅkumayaṃ karoti ca parispraṣṭuṃ tadevādṛtastvadvattraṃ nayanaśriyāpyanadhikaṃ mugdhe vidhitsurvidhuḥ || 143 ||
[Analyze grammar]

lāvaṇyena tavāsyameva bahunā tatpātramātraspṛśā candraḥ proñchanalabdhatārdhamalinenārambhi śeṣeṇa tu |
nirmāya dvayametadapsu vidhinā pāṇī khalu kṣālitau talleśairadhunāpi nīranilayairambhojamārabhyate || 144 ||
[Analyze grammar]

lāvaṇyena tavākhilena vadanaṃ tatpātramātraspṛśā candraḥ proñchanalabdhatārdhamalinenārambhi śeṣeṇa yaḥ |
tallekhāpi śikhāmaṇiḥ suṣamayāhaṃkṛtya śabhorabhūdabjaṃ tasya padaṃ yadaspṛśadataḥ padmaṃ ca sanna śriyāḥ || 145 ||
[Analyze grammar]

sapīteḥ saṃprīterajani rajanīśaḥ pariṣadā parītastārāṇāṃ dinamaṇimaṇigrāvamaṇikaḥ |
priye paśyotprekṣākavibhirabhidhānāya suśakaḥ sudhāmabhyuddhartuṃ dhṛtaśaśakanīlāśmacaṣakaḥ || 146 ||
[Analyze grammar]

āsyaṃ śītamayūkhamaṇḍalaguṇānākṛṣya te nirmitaṃ śaṅke sundari śarvarīparivṛḍhastenaiṣa doṣākaraḥ |
ādāyendumṛgādapīha nihite paśyāmi sāraṃ dṛśau tvadvaktre sati vā vidhau dhṛtimayaṃ dadhyādanandhaḥ kutaḥ || 147 ||
[Analyze grammar]

śucirucimuḍugaṇamagaṇanamamumatikalayasi kṛśatanu na gaganataṭamanu |
pratiniśaśaśitalavigaladamṛtabhṛtaravirathahayacayakhurabilakulamiva || 148 ||
[Analyze grammar]

upanatamuḍupuṣpajātamāste bhavatu janaḥ paricārakastavāyam |
tilatilakitaparpaṭābhaminduṃ vitara nivedyamupāssva pañcabāṇam || 149 ||
[Analyze grammar]

svarbhānuprativārapāraṇamiladdantaughayantrodbhavaśvabhrālīpatayāludīdhitisudhāsārastuṣāradyutiḥ |
puṣpeṣvāsanatatpriyāpariṇayānandābhiṣekotsave devaḥ prāptasahasradhārakalaśaśrīrastu nastuṣṭaye || 150 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
dvāviṃśo navasāhasāṅkacarite campūkṛto'yaṃ mahākāvye tasya kṛtau nalīyacarite sargo nisargojjvalaḥ || 151 ||
[Analyze grammar]

yathā yūnastadvatparamaramaṇīyāpi ramaṇī kumārāṇāmantaḥkaraṇaharaṇaṃ naiva kurute |
maduktiścedantarmadayati sudhībhūya sudhiyaḥ kimasyā nāma syādarasapuruṣānādarabharaiḥ || 152 ||
[Analyze grammar]

diśi diśi girigrāvāṇaḥ svāṃ vamantu sarasvatīṃ tulayatu mithastāmāpātasphuraddhvaniḍambarām |
sa paramaparaḥ kṣīrodanvānyadīyamudīyate mathituramṛtaṃ khedacchedi pramodanamodanam || 153 ||
[Analyze grammar]

granthagranthiriha kvacitkvacidapi nyāsi prayatnānmayā prājñaṃmanyamanā haṭhena paṭhitī māsminkhalaḥ khelatu |
śraddhārāddhaguruślathīkṛtadṛḍhagranthiḥ samāsādayatvetatkāvyarasormimajjanasukhavyāsajjanaṃ sajjanaḥ || 154 ||
[Analyze grammar]

tāmbūladvayamāsanaṃ ca labhate yaḥ kānyakubjeśvarādyaḥ sākṣātkurute samādhiṣu paraṃ brahma pramodārṇavam |
yatkāvyaṃ madhuvarṣi dharṣitaparāstarkeṣu yasyoktayaḥ śrīśrīharṣakaveḥ kṛtiḥ kṛtimude tasyābhyudīyādiyam || 155 ||
[Analyze grammar]