Chapter 14

athādhigantuṃ niṣadheśvaraṃ sā prasādanāmādriyatāmarāṇām |
yataḥ surāṇāṃ surabhirnṛṇāṃ tu sā vedhasāsṛjyata kāmadhenuḥ || 1 ||
[Analyze grammar]

pradakṣiṇaprakramaṇālavālavilepadhūpācaraṇāmbusekaiḥ |
iṣṭaṃ ca mṛṣṭaṃ ca phalaṃ suvānā devā hi kalpadrumakānanaṃ naḥ || 2 ||
[Analyze grammar]

śraddhāmayībhūya suparvaṇastānnanāma nāmagrahaṇāgrakaṃ sā |
sureṣu hi śraddadhatāṃ namasya sarvāṛthasiddhyaṅgamithaḥ samasyā || 3 ||
[Analyze grammar]

yattānnije sā hṛdi bhāvanāyā balena sākṣādakṛtākhilasthān |
abhūdabhīṣṭapratibhūḥ sa tasyā varaṃ hi dṛṣṭā dadate paraṃ te || 4 ||
[Analyze grammar]

sabhājanaṃ tatra sasarja teṣāṃ sabhājane paśyati vismite sā |
āmudyate yatsumanobhirevaṃ phalasya siddhau sumanobhireva || 5 ||
[Analyze grammar]

vaiśadyahṛdyairmradimābhirāmairāmodibhistānatha jātijātaiḥ |
ānarca gītyanvitaṣaṭpadaiḥ sā stavaprasūnastabakairnavīnaiḥ || 6 ||
[Analyze grammar]

hṛtpadmasadmanyadhivāsya buddhyā dadhyāvathaitāniyamekatānā |
suparvaṇāṃ hi sphuṭabhāvanā yā sā pūrvarūpaṃ phalabhāvanāyāḥ || 7 ||
[Analyze grammar]

bhaktyā tayaiva prasasāda tasyāstuṣṭaṃ svayaṃ devacatuṣṭayaṃ tataḥ |
svenānalasya sphuṭatāṃ yiyāsoḥ phūtkṛtyapekṣā kiyatī khalu syāt || 8 ||
[Analyze grammar]

prasādamāsādya suraiḥ kṛtaṃ sā sasmāra sārasvatasūktisṛṣṭeḥ |
devā hi nānyadvitaranti kiṃtu prasadya te sādhudhiyaṃ dadante || 9 ||
[Analyze grammar]

śeṣaṃ nalaṃ pratyamareṇa gāthā yā yā samarthā khalu yena yena |
tāṃ tāṃ tadanyena sahālagantīṃ tadā viśeṣaṃ pratisaṃdadhe sā || 10 ||
[Analyze grammar]

ekaikavṛtteḥ pratilokapālaṃ pativratātvaṃ jagṛhurdiśāṃ yāḥ |
veda sma gāthā militāstadāsāvāśā ivaikasya nalasya vaśyāḥ || 11 ||
[Analyze grammar]

yā pāśinaivāzanipāṇinaiva gāthā yamenaiva samāgninaiva |
tāmeva mene militāṃ nalasya saiṣā viśeṣāya tadā nalasya || 12 ||
[Analyze grammar]

niścitya śeṣaṃ tamasau nareśaṃ pramodamedasvitarāntarābhūt |
devyā girāṃ bhāvitabhaṅgirākhyaccittena cintārṇavayādaseyam || 13 ||
[Analyze grammar]

sā bhaṅgirasyāḥ khalu vāci kāpi yadbhāratī mūrtimatīyameva |
śliṣṭaṃ nigadyādṛta vāsavādīnviśiṣya me naiṣadhamapyavādīt || 14 ||
[Analyze grammar]

jagrantha seyaṃ madanugraheṇa vacaḥsrajaḥ spaṣṭayituṃ catasraḥ |
dve te nalaṃ lakṣayituṃ kṣamete mamaiva moho'yamaho mahīyān || 15 ||
[Analyze grammar]

śliṣyanti vāco yadamūramuṣyāḥ kavitvaśakteḥ khalu te vilāsāḥ |
bhūpālalīlāḥ kila lokapālāḥ samāviśanti vyatibhedino'pi || 16 ||
[Analyze grammar]

tyāgaṃ mahendrādicatuṣṭasya kimabhyanandatkramasūciasya |
kiṃ prerayāmāsa nale ca tanmāṃ sā sūktirasyā mama kaḥ pramohaḥ || 17 ||
[Analyze grammar]

parasya dārānkhalu manyamānairaspṛśyamānāmamarairdharitrīm |
bhaktyaiva bhartuścaraṇau dadhānāṃ nalasya tatkālamapaśyadeṣā || 18 ||
[Analyze grammar]

sureṣu nāpaśyadavaikṣatākṣṇornimeṣamurvībhṛti saṃmukhī sā |
iha tvamāgatya nale mileti saṃjñānadānādiva bhāṣamāṇam || 19 ||
[Analyze grammar]

nābuddha bālā vibudheṣu teṣu kṣodaṃ kṣiteraikṣata naiṣadhe tu |
patye sṛjantyāḥ parirambhamurvyāḥ saṃbhūtasaṃbhedamasaṃśayaṃ sā || 20 ||
[Analyze grammar]

svedaḥ svadehasya viyogatāpaṃ nirvāpayiṣyanniva saṃsisṛkṣoḥ |
hīrāṅkuraścāruṇi hemanīva nale tayāloki na daivateṣu || 21 ||
[Analyze grammar]

sureṣu mālāmamalāmapaśyannale tu bālā malinībhavantīm |
imāṃ kimāsādya nalo'dya mṛdvīṃ śraddhāsyate māmiti cintayeva || 22 ||
[Analyze grammar]

śriyaṃ bhajantāṃ kiyadasya devāśchāyā nalasyāsti tathāpi naiṣām |
itīrayantīva tayā niraikṣi sā naiṣadhe na tridaśeṣu teṣu || 23 ||
[Analyze grammar]

cihnairamībhirnalasaṃvidasyāḥ saṃvādamāpa prathamopajātā |
sā lakṣaṇavyaktibhireva devaprasādamāsāditamapyabodhi || 24 ||
[Analyze grammar]

nale nidhātuṃ varaṇasrajaṃ tāṃ smaraḥ sma rāmāṃ tvarayatyathainām |
apatrapā tāṃ niṣiṣedha tena dvayānurodhaṃ tulitaṃ dadhau sā || 25 ||
[Analyze grammar]

srajā samāliṅgayituṃ priyaṃ sā rasādadhattaiva bahuprayatnam |
stambhatrapābhyāmabhavattadīye spandastu mando'pi na pāṇipadme || 26 ||
[Analyze grammar]

tasyā hṛdi vrīḍamanobhavābhyāṃ dolāvilāsaṃ samavāpyamāne |
sthitaṃ dhṛtaiṇāṅkakulātapatre śṛṅgāramāliṅgadadhīśvaraśrīḥ || 27 ||
[Analyze grammar]

karaḥ srajā sajjatarastadīyaḥ priyonmukhaḥ sanvirarāma bhūyaḥ |
priyānanasyārdhapathaṃ yayau ca pratyāyayau cāticalaḥ kaṭākṣaḥ || 28 ||
[Analyze grammar]

tasyāḥ priyaṃ cittamupetameva prabhūbabhūvākṣi na tu prayātum |
satyaḥ kṛtaḥ spaṣṭamabhūttadānīṃ tayākṣṇi lajjeti janapravādaḥ || 29 ||
[Analyze grammar]

kathaṃ kathaṃcinniṣadheśbarasya kṛtvāsyapadmaṃ daravīkṣitaśri |
vāgdevatāyā vadanendubimbaṃ trapāvatī sākṛta sāmidṛṣṭam || 30 ||
[Analyze grammar]

ajānatīvedamavocadenāmākūtamasyāstadavetya devī |
bhāvastrapormipratisīrayā te na dīyate lakṣayituṃ mamāpi || 31 ||
[Analyze grammar]

devyāḥ śrutau neti nalārdhanāmni gṛhīta eva trapayā nipītā |
athāṅgulīraṅgulibhirmṛśantī dūraṃ sā namayāṃcakāra || 32 ||
[Analyze grammar]

kare vidhṛtyeśvarayā girāṃ sā pānthā pathīndrasya kṛtā vihasya |
vāmeti nāmaiva babhāja sārdhaṃ purandhrisādhāraṇasaṃvibhāgam || 33 ||
[Analyze grammar]

vihasya haste'tha vikṛṣya devī netuṃ prayātā'bhi mahendrametām |
bhramādiyaṃ dattamivāhidehe tataścamatkṛtya karaṃ cakarṣa || 34 ||
[Analyze grammar]

bhaimīṃ nirīkṣyābhimukhīṃ maghonaḥ svārājyalakṣmīrabhṛtābhyasūyām |
dṛṣṭvā tatastatparihāriṇīṃ tāṃ vrīḍaṃ biḍaujaḥpravaṇābhyapādi || 35 ||
[Analyze grammar]

tvattaḥ śrutaṃ neti nale mayātaḥ paraṃ vadasvetyuditātha devyā |
hīmanmathadvairatharaṅgabhūmī bhaimī dṛśā bhāṣitanaiṣadhābhūt || 36 ||
[Analyze grammar]

hasatsu bhaimīṃ diviṣatsu pāṇau pāṇim praṇīyāpsarasāṃ rasātsā |
āliṅgya nītvākṛta pānthadurgāṃ bhūpāladikpālakulādhvamadhyam || 37 ||
[Analyze grammar]

ādeśitāmapyavalokya mandaṃ mandaṃ nalasyaiva diśā calantīm |
bhūyaḥ surānardhapathādathāsau tāneva tāṃ netumanā nunoda || 38 ||
[Analyze grammar]

mukhābjamāvartanalolanālaṃ kṛtvālihūṃhūṃravalakṣyalakṣyam |
bhīmodbhavā tāṃ nunude'ṅkapālīṃ devyā navoḍheva dṛḍhāṃ vivoḍhuḥ || 39 ||
[Analyze grammar]

devī kathaṃcitkhalu tāmadevadrīcīṃ bhavantīṃ smitasiktasṛkkā |
āha sma māṃ pratyapi te punaḥ kā śaṅkā śaśāṅkādadhikāṣyabimbe || 40 ||
[Analyze grammar]

eṣāmakṛtvā caraṇapraṇāmameṣāmanujñāmanavāpya samyak |
suparvavaire tava vairaseniṃ varītumīhā kathamaucitīyam || 41 ||
[Analyze grammar]

itīrite viśvasitāṃ punastāmādāya pāṇau diviṣatsu devī |
kṛtvā praṇamrāṃ vadati sma sā tān bhakteyamarhatyadhunānukampām || 42 ||
[Analyze grammar]

yuṣmānvṛṇīte na bahūnsatīyaṃ śeṣāvamānācca bhavatsu naikam |
tadvaḥ sametānnṛpamenamaṃśānvarītumanviṣyati lokapālāḥ || 43 ||
[Analyze grammar]

bhaimyā srajaḥsañjanayā pathi prāksvayaṃvaraṃ saṃjanayāṃbabhūva |
saṃbhogamāliṅganayāsya vedhāḥ śeṣaṃ tu kaṃ hantumiyadyatadhve || 44 ||
[Analyze grammar]

varṇāśramācārapathātprajābhiḥ svābhiḥ sahaivāskhalate nalāya |
praseduṣo vedṛśavṛttabhaṅgyā ditsaiva kīrterbhuvamānayadvaḥ || 45 ||
[Analyze grammar]

iti śrute'syā vacasaiva hāsyātkṛtvā salāsyādharamāsyabimbam |
bhrūvibhramākūtakṛtābhyanujñeṣveteṣu tāṃ sātha nalāya ninye || 46 ||
[Analyze grammar]

mandākṣanispandatanormanobhūduṣpreramapyānayati sma tasyāḥ |
madhūkamālāmadhuraṃ karaṃ sā kaṇṭhopakaṇṭhaṃ vasudhāsudhāṃśoḥ || 47 ||
[Analyze grammar]

athābhilikhyeva samarpyamāṇāṃ rājiṃ nijasvīkaraṇākṣarāṇām |
dūrvāṅkurāḍhyāṃ nalakaṇṭhanāle vadhūrmadhūkasrajamutsasarja || 48 ||
[Analyze grammar]

tāṃ dūrvayā śyāmalayātivelaṃ śṛṅgārabhāṣaṃnibhayā suśobhām |
mālāṃ prasūnāyudhapāśabhāsaṃ kaṇṭhena bhūbhṛdbibharāṃbabhūva || 49 ||
[Analyze grammar]

dūrvāgrajāgratpulakāvaliṃ tāṃ nalāṅgamaṅgādbhṛśamullasantīm |
mānena manye namitānanā sā sāsūyamālokata puṣpamālām || 50 ||
[Analyze grammar]

kāpi pramodāsphuṭanirjihānavarṇeva yā maṅgalagītirāsām |
saivānanebhyaḥ purasundarīṇāmuccairulūludhvaniruccacāra || 51 ||
[Analyze grammar]

sā nirmale tasya madhūkamālā hṛdi sthitā ca pratibimbitā ca |
kiyatyamagnā kiyatī ca magnā puṣpeṣubāṇāliriva vyaloki || 52 ||
[Analyze grammar]

romāṇi sarvāṇyapi bālabhāvādvaraśriyaṃ vīkṣitumutsukāni |
tasyāstadā kaṇṭakitāṅgayaṣṭerudgrīvikādānamivānvabhūvan || 53 ||
[Analyze grammar]

romāṅkurairdanturitākhilāṅgī ramyādharā sā sutarāṃ vireje |
śaravyadaṇḍaiḥ śritamaṇḍanaśrīḥ smārī śaropāsanavedikeva || 54 ||
[Analyze grammar]

ceṣṭā vyaneśannikhilāstadāsyāḥ smareṣuvātairiva tā vidhūtāḥ |
abhyarthya nītāḥ kalinā muhūrtaṃ lābhāya tasya bahu ceṣṭituṃ vā || 55 ||
[Analyze grammar]

tannyastamālyaspṛśi yannalasya svedaṃ kare pañcaśaraścakāra |
bhaviṣyadudvāhamahotsavasya hastodakaṃ tajjanayāṃbabhūva || 56 ||
[Analyze grammar]

tūlena tasyāstulanā mṛdostatkamprā'stu sā manmathabāṇavātaiḥ |
citrīyitaṃ tattu nalo yaduccairabhūtsa bhūbhṛtpṛthuvepathustaiḥ || 57 ||
[Analyze grammar]

dṛśorapi nyastamivāsta rājñāṃ rāgāddṛgambupratibimbimālyam |
nṛpasya tatpītavatorivākṣṇoḥ prālambyamālambanayuktamantaḥ || 58 ||
[Analyze grammar]

stambhastathālambhitamāṃ nalena bhaimīkarasparśamudaḥ prasādaḥ |
kaṃdarpalakṣyīkaraṇārpitasya stambhasya dambhaṃ sa ciraṃ yathāpat || 59 ||
[Analyze grammar]

utsṛjya sāmrājyamivātha bhikṣāṃ tāruṇyamullaṅghya jarāmivārāt |
taṃ cārumākāramupekṣya yāntaṃ nijāṃ tanūmādadire digīśāḥ || 60 ||
[Analyze grammar]

māyānalatvaṃ tyajato nilīnaiḥ pūrvairahaṃpūrvikayā maghonaḥ |
bhīmodbhavāsāttvikabhāvaśobhā didṛkṣayevāvirabhāvi netraiḥ || 61 ||
[Analyze grammar]

gotrānukūlatvabhave vivāhe tatprātikūlyādiva gotraśatruḥ |
puraścakāra pravaraṃ varaṃ yamāyansakhāyaṃ dadṛśe tayā saḥ || 62 ||
[Analyze grammar]

svakāmasaṃmohamahāndhakāranirvāpamicchanniva dīpikābhiḥ |
udgatvarībhiśchuritaṃ vitene nijaṃ vapurvāyusakhaḥ śikhābhiḥ || 63 ||
[Analyze grammar]

patyau vṛte bhīmajayā na vahnāvahnā svamahnāya nijuhnuve yaḥ |
janādapatrapya sa hā sahāyastasya prakāśo'bhavadaprakāśaḥ || 64 ||
[Analyze grammar]

sadaṇḍamālaktakanetracaṇḍaṃ tamaḥkiraṃ kāyamadhatta kālaḥ |
tatkālamantaḥkaraṇaṃ nṛpāṇāmadhyāsituṃ kopa ivopanamraḥ || 65 ||
[Analyze grammar]

dṛggocaro'bhūdatha citraguptaḥ kāyastha uccairguṇa etadīyaḥ |
ūrdhvaṃ tu pattrasya maṣīda eko maṣerdadañcopari pattramanyaḥ || 66 ||
[Analyze grammar]

tasyāṃ manobandhavimocanasya kṛtasya tatkālamiva pracetāḥ |
pāśaṃ dadhānaḥ karabaddhavāsaṃ vibhurbabhāvāpyamavāpya deham || 67 ||
[Analyze grammar]

sahadvitīyaḥ striyamabhyupeyādevaṃ sa durbudhya nayopadeśam |
anyāṃ sabhāryaḥ kathamṛcchatīti jalādhipo'bhūdasahāya eva || 68 ||
[Analyze grammar]

devyāpi divyā'nu tanuḥ prakāśīkṛtā mudaścakrabhṛtaḥ sṛjantī |
anihnutaistāmavadhārya cihnaistadvāci bālā śithilādbhutābhūt || 69 ||
[Analyze grammar]

vilokake nāyakamelake'sminrūpānyatākautukadarśibhistaiḥ |
bādhā batendrādibhirindrajālavidyāvidāṃ vṛttivadhādvyadhāyi || 70 ||
[Analyze grammar]

vilokya tāvāptadurāpakāmau parasparapremarasābhirāmau |
atha prabhuḥ prītamanā babhāṣe jāmbūnadorvīdharasārvabhaumaḥ || 71 ||
[Analyze grammar]

vaidarbhi dattastava tāvadeṣa varo durāpaḥ pṛthivīśa eva |
dūtyaṃ tu yattvaṃ kṛtavānamāyaṃ nala prasādastvayi tanmamāyam || 72 ||
[Analyze grammar]

pratyakṣalakṣyāmavalambya mūrtiṃ hutāni yajñeṣu tavopabhokṣye |
saṃśerate'smābhiravīkṣya bhuktaṃ makhaṃ hi mantrādhikadevabhāve || 73 ||
[Analyze grammar]

bhavānapi tvaddayitāpi śeṣe sāyujyamāsādayataṃ śivābhyām |
pretyāsmi kīdṛgbhaviteti cintā saṃtāpamantastanute hi jantoḥ || 74 ||
[Analyze grammar]

tavopavārāṇasi nāmacihnaṃ vāsāya pāresi puraṃ purāsti |
nirvātumicchorapi tatra bhaimīsaṃbhogasaṃkocabhiyādhikāśi || 75 ||
[Analyze grammar]

dhūmāvaliśmaśru tataḥ suparvā mukhaṃ makhāsvādavidāṃ tamūce |
kāmaṃ madīkṣāmayakāmadhenoḥ payāyatāmabhyudayastvadīyaḥ || 76 ||
[Analyze grammar]

yā dāhapākaupayikī tanurme bhūyāttvadicchāvaśavartinī sā |
tayā parābhūtatanoranaṅgāttasyāḥ prabhuḥ sannadhikastvamedhi || 77 ||
[Analyze grammar]

astu tvayā sādhitamannamīnarasādi pīyūṣarasātiśāyi |
yadbhūpa vidmastava sūpakārakriyāsu kautūhalaśāli śīlam || 78 ||
[Analyze grammar]

vaivasvato'pi svata eva devastuṣṭastamācaṣṭa dharādhirājam |
varapradānāya tavāvadānaiściraṃ madīyā rasanoddhureyam || 79 ||
[Analyze grammar]

sarvāṇi śastrāṇi tavāṅgacakrairāvirbhavantu tvayi śatrujaitre |
avāpyamasmādadhikaṃ na kiṃcijjāgarti vīravratadīkṣitānām || 80 ||
[Analyze grammar]

kṛcchraṃ gatasyāpi daśāvipākaṃ dharmānna cetaḥ skhalatu tvadīyam |
amuñcataḥ puṇyamananyabhakteḥ svahastavāstavya iva trivargaḥ || 81 ||
[Analyze grammar]

smitāñcitāṃ vācamavocadenaṃ prasannacetā nṛpatiṃ pracetāḥ |
pradāya bhaimīmadhunā varau tu dadāmi tadyautakakautukena || 82 ||
[Analyze grammar]

yatrābhilāṣastava tatra deśe nanvastu dhanvanyapi tūrṇamarṇaḥ |
āpo vahantīha hi lokayātrāṃ yathā na bhūtāni tathā'parāṇi || 83 ||
[Analyze grammar]

prasāritāpaḥ śucibhānunāstu maruḥ samudratvamapi prapadya |
bhavanmanaskāralavodgamena kramelakānāṃ nilayaḥ pureva || 84 ||
[Analyze grammar]

amlānirāmodabharaśca divyaḥ puṣpeṣu bhūyādbhavadaṅgasaṅgāt |
dṛṣṭaṃ prasūnopamayā mayānyanna dharmaśarmobhayakarmaṭhaṃ yat || 85 ||
[Analyze grammar]

vāgdevatāpi smitapūrvamurvīsuparvarājaṃ rabhasādbabhāṣe |
tvatpreyasīsaṃmadamācarantyā matkiṃ na kiṃcidgrahaṇocitaṃ te || 86 ||
[Analyze grammar]

artho vinaivāṛthanayopasīdannālpo'pi dhīrairavadhīraṇīyaḥ |
mānyena manye vidhinā vitīrṇaḥ sa prītidāyo bahu mantumarhaḥ || 87 ||
[Analyze grammar]

avāmāvāmārdhe sakalamubhayākāraghaṭanāddvidhābhūtaṃ rūpaṃ bhagavadabhidheyaṃ bhavati yat |
tadantarmantraṃ me smaraharamayaṃ sendumamalaṃ nirākāraṃ śaśvajjapa narapate sidhyatu sate || 88 ||
[Analyze grammar]

sarvāṅgīṇarasāmṛtastimitayā vācā sa vācaspatiḥ sa svargīyamṛgīdṛśāmapi vaśīkārāya mārāyate |
yasmai yaḥ spṛhayatyanena sa tadevāpnoti iṃ bhūyasā yenāyaṃ hṛdaye sthitaḥ sukṛtinā amnmantracintāmaṇiḥ || 89 ||
[Analyze grammar]

puṣpairabhyarcya gandhādibhirapi subhagaiścāruhaṃsena māṃ cenniryāntīṃ mantramūrtiṃ japati mayi matiṃ nyasya mayyeva bhaktaḥ |
tatprāpte vatsarānte śirasi karamasau yasya kasyāpi dhatte so'pi ślokānakāṇḍe racayati rucirānkautukaṃ dṛśyamasyāḥ || 90 ||
[Analyze grammar]

guṇānāmāsthānīṃ nṛpatilakanārīti viditāṃ rasasphītāmantastava ca tava vṛtte ca kavituḥ |
bhavitrī vaidarbhīmadhikamadhikaṇṭhaṃ racayituṃ parīrambhakrīḍācaraṇaśaraṇāmanvahamaham || 91 ||
[Analyze grammar]

bhavadvṛttastoturmadupahitakaṇṭhasya kaviturmukhātpuṇyaiḥ ślokaistvayi ghanamudeyaṃ janamude |
tataḥ puṇyaślokaḥ kṣitibhuvanalokasya bhavitā bhavānākhyātaḥ sankalikaluṣahārī haririva || 92 ||
[Analyze grammar]

devī ca te ca jagadurjagaduttamāṅgaratnāya te kathaya kaṃ vitarāma kāmam |
kiṃcittvayā nahi pativratayā durāpaṃ bhasmāstu yastava bata vratalopamicchuḥ || 93 ||
[Analyze grammar]

kūṭakāyamapahāya no vapurbibhratastvamasi vīkṣya vismitā |
āptumākṛtimato manīṣitāṃ vidyayā hṛdi tavāpyudīyatām || 94 ||
[Analyze grammar]

itthaṃ vitīrya varamambaramāśrayatsu teṣu kṣaṇādudalasadvipulaḥ praṇādaḥ |
uttiṣṭhatāṃ parijanālapanairnṛpāṇāṃ svarvāsivṛndahatadundubhinādasāndraḥ || 95 ||
[Analyze grammar]

na doṣaṃ vidveṣādapi niravakāśaṃ guṇamaye vareṇa prāptāstre na samarasamārambasadṛśam |
jaguḥ puṇyaślokaṃ pratinṛpatayaḥ kiṃtu vidadhuḥ svaniśvāsairbhaimīhṛdayamudayannirbharadayam || 96 ||
[Analyze grammar]

bhūbhṛdbhirlambhitā'sau karuṇarasanadīmūrtimaddevatātvaṃ tātenābhyarthyayogyāḥsapadinijasakhīrdāpayāmāsatebhyaḥ |
vaidarbhyāste'pyalābhātkṛtagamanamanaḥprāṇavāñchāṃ vijaghnuḥ sakhyaḥ saṃśikṣya vidyāḥ satatadhṛtavayasyānukārābhirābhiḥ || 97 ||
[Analyze grammar]

ahaha saha maghonā śrīpratiṣṭhāsamāne nilayamabhi nale'tha svaṃ pratiṣṭhāsamāne |
apatadamarabharturmūrtibaddheva kīrtirgaladalimadhubāṣpā puṣpavṛṣṭirnabhastaḥ || 98 ||
[Analyze grammar]

svasyāmarairnṛpatimaṃśamamuṃ tyajadbhiraṃśacchidākadanameva tadādhyagāmi |
utkā sma paśyati nivṛtya nivṛtya yāntī vāgdevatapi nijavibhramadhāma bhaimīm || 99 ||
[Analyze grammar]

sānandaṃtanujāvivāhanamahe bhīmaḥ sa bhūmīpatirvaidarbhīniṣadheśvarau nṛpajanāniṣṭoktinirmṛṣṭaye |
svāni svāni dharādhipāśca śibirāṇyuddiśya yāntaḥ kramādeko dvau bahabaścakāra sṛjataḥ smātenire maṅgalam || 10 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
yātastasya caturdaśaḥ śaradijajyotsnācchasūktermahākāvye cāruṇi naiṣadhīyacarite sargo nisargojjvalaḥ || 101 ||
[Analyze grammar]