Chapter 12

priyāhriyālambya vilambamāvilā vilāsinaḥ kuṇḍinamaṇḍanāyitam |
samājamājagmuratho rathottamāstamā samudrādapare'pare nṛpāḥ || 1 ||
[Analyze grammar]

tataḥ sa bhaimyā vavṛte vṛte nṛpairviniḥśvasadbhiḥ sadasi svayaṃvaraḥ |
cirāgataistarkitatadvirāgitaiḥ sphuradbhirānandamahārṇavairnavaiḥ || 2 ||
[Analyze grammar]

calatpadastatpadayantraṇeṅgitasphuṭāśayāmāsayati sma rājake |
śṛamaṃ gatā yānagatāvapīyamityudīrya dhuryaḥ kapaṭājjanīṃ janaḥ || 3 ||
[Analyze grammar]

nṛpānupakramya vibhūṣitāsanānsanātanī sā suṣuve sarasvatī |
vihāramārabhya sarasvatīḥ sudhāsaraḥsvatīvārdratanūranūtthitāḥ || 4 ||
[Analyze grammar]

vṛṇīṣva varṇena suvarṇaketakīprasūnavarṇādṛtuparṇamādṛtam |
nijāmayodhyāmapi pāvanīmayaṃ bhavanmayo dhyāyati nāvanīpatiḥ || 5 ||
[Analyze grammar]

na pīyatāṃ nāma cakorajihvayā kathaṃcidetanmukhacandracandrikā |
imāṃ kimācāmayase na cakṣuṣī ciraṃ cakorasya bhavanmukhaspṛśī || 6 ||
[Analyze grammar]

apāṃ vihāre tava hāravibhramaṃ karotu nīre pṛṣadutkarastaran |
kaṭhorapīnoccakucadvayītaṭatruṭyattaraḥ sāravasāravormijaḥ || 7 ||
[Analyze grammar]

akhāni sindhuḥ samapūri gaṅgayā kule kilāsya prasabhaṃ sa bhantsyate |
vilaṅghyate cāsya yaśaḥśatairaho satāṃ mahatsaṃmukhadhāvi pauruṣam || 8 ||
[Analyze grammar]

etadyaśaḥkṣīradhipūragāhi patatyagādhe vacanaṃ kavīnām |
etadguṇānāṃ gaṇanāṅkapātaḥ pratyarthikīrtīḥ khaṭikāḥ kṣiṇoti || 9 ||
[Analyze grammar]

bhāsvadvaṃśakarīratāṃ dadhadayaṃ vīraḥ kathaṃ kathyatāmadhyuṣṭāpi hi koṭirasya samare romāṇi sattvāṅkurāḥ |
nītaḥ saṃyati bandibhiḥ śrutipathaṃ yannāmavarṇāvalīmantraḥ stambhayati pratikṣitibhṛtāṃ dostambhakumbhīnasān || 10 ||
[Analyze grammar]

tādṛgdīrghaviriñcivāsaravidhau jānāmi yatkartṛtāṃ śaṅke yatpratibimbamambudhipayaḥpūrodare vāḍavaḥ |
vyomavyāpivipakṣarājakayaśastārāḥ parābhāvukaḥ kāsāmasya na sa pratāpatapanaḥ pāraṃ girāṃ gāhate || 11 ||
[Analyze grammar]

dveṣyākīrtikalindaśailasutayā nadyāsya yaddordvayī kīrtiśreṇimayī samāgamamagādgaṅgā raṇaprāṅgaṇe |
tattasminvinimajjya bāhujabhaṭairārambhi rambhāparīrambhānandaniketanandanavanakrīḍādarāḍambaraḥ || 12 ||
[Analyze grammar]

iti śrutisvāditatadguṇastutiḥ sarasvatīvāṅmayavismayotthayā |
śirastiraḥkampanayaiva bhīmajā na taṃ manoranvayamanvamanyata || 13 ||
[Analyze grammar]

yuvāntaraṃ sā vacasāmadhīśvarā svarāmṛtanyakkṛtamattakokilā |
śaśaṃsa saṃsaktakaraiva taddiśā niśāpatijñātimukhīmimāṃ prati || 14 ||
[Analyze grammar]

na pāṇḍyabhūmaṇḍanameṇalocane vilocanenāpi nṛpaṃ pipāsasi |
śaśiprakāśānanamenamīkṣituṃ taraṅgayāpāṅgadiśā dṛśostviṣaḥ || 15 ||
[Analyze grammar]

bhuvi bhramitvānavalambamambare vihartumabhyāsaparamparāparā |
aho mahāvaṃśamamuṃ samāśritā sakautukaṃ nṛtyati kīrtinartakī || 16 ||
[Analyze grammar]

ito bhiyā bhūpatibhirvanaṃ vanādaṭadbhiruccairaṭavītvamīyuṣī |
nijāpi sāvāpi cirātpunaḥ purī punaḥ svamadhyāsi vilāsamandiram || 17 ||
[Analyze grammar]

āsīdāsīmabhūmīvalayamalayajālepanepathyakīrtiḥ saptākūpārapārīsadanajanaghanodgītacāpapratāpaḥ |
vīrādasmātparaḥ kaḥ padayugayugapatpātibhūpātibhūyaścūḍāratnoḍupatnīkaraparicaraṇāmandanandannakhenduḥ || 18 ||
[Analyze grammar]

bhaṅgākīrtimaṣīmalīmasatamapratyarthisenābhaṭaśreṇītindukakānaneṣu vilasatyasya pratāpānalaḥ |
tasmādutpatitāḥ sphuranti jagadutsaṅge sphuliṅgāḥ sphuṭaṃ bhālodbhūtabhavākṣibhānuhutabhugjambhāridambholayaḥ || 19 ||
[Analyze grammar]

etaddantibalairvilokya nikhilāmāliṅgitāṅgīṃ bhuvaṃ saṅgrāmāṅgaṇasīmni jaṅgamagiristomabhramādhāyibhiḥ |
pṛthvīndraḥ pṛthuretadugrasamaraprekṣopanamrāmaraśreṇīmadhyacaraḥ punaḥ kṣitidharakṣepāya dhatte dhiyam || 20 ||
[Analyze grammar]

śaśaṃsa dāsīṅgitavidvidarbhajāmito nanu svāmini paśya kautukam |
yadeṣa saudhāgranaṭe paṭāñcale cale'pi kākasya padārpaṇagrahaḥ || 21 ||
[Analyze grammar]

tatastadaprastutabhāṣitotthitaiḥ sadastadaśveti hasaiḥ sadaḥsadām |
sphuṭājani mlānirato'sya bhūpateḥ site hi jāyeta śiteḥ sulakṣyatā || 22 ||
[Analyze grammar]

tato'nu devyā jagade mahendrabhūpuraṃdaraṃ sā jagadekavandyayā |
tadārjavāvarjitatarjanīkayā janī kayācitparacitsvarūpayā || 23 ||
[Analyze grammar]

svayaṃvarodvāhamahe vṛṇīṣva he mahendraśailasya mahendramāgatam |
kaliṅgajānāṃ svakucadvayaśriyā kaliṃ gajānāṃ śṛṇu tatra kumbhayoḥ || 24 ||
[Analyze grammar]

ayaṃ kilāyāt itīripauravāgbhayādayādasya ripurvṛthā vanam |
śrutāṣṭadutsvāpagirastadakṣārāḥ paṭhadbhiratrāsi śukairvane'pi saḥ || 25 ||
[Analyze grammar]

itastrasadvidrutabhūbhṛdujjhitā priyātha dṛṣṭā vanamānavījanaiḥ |
śaśaṃsa pṛṣṭādbhutamātmadeśajaṃ śaśitviṣaḥ śītalaśīlatāṃ kila || 26 ||
[Analyze grammar]

ito'pi kiṃ vīrayase na kurvato nṛpāndhanurbāṇaguṇairvaśaṃvadān |
guṇena śuddhena vidhāya nirbharaṃ tamenamurvīvalayorvaśī vaśam || 27 ||
[Analyze grammar]

etadbhītārinārī giribilavigaladvāsarā niḥsarantī svakrīḍāhaṃsamohagrahilaśiśubhṛśaprārthitonnidracandrā |
ākrandadbhūri yattannayanajalamilaccandrahaṃsānubimbapratyāsattiprahṛṣyattanayavihasitairāśvasīnnyaśvasīcca || 28 ||
[Analyze grammar]

asmindigvijayodyate patirayaṃ me stāditi dhyāyinī kampaṃ sāttvikabhāvamañcati ripukṣoṇīndradārā dharā |
asyaivābhimukhaṃ nipatya samare yāsyadbhirūrdhvaṃ nijaḥ panthā bhāsvati dṛśyate bilamayaḥ pratyarthibhiḥ pāṛthivaiḥ || 29 ||
[Analyze grammar]

vidrāṇe raṇacatvarādarigaṇe traste samaste punaḥ kopātko'pi nivartate yadi bhaṭaḥ kīrtyā jagatyudbhaṭaḥ |
āgacchannapi saṃmukhaṃ vimukhatāmevādhigacchatyasau drāgetacchurikārayeṇa ṭhaṇiti cchinnāpasarpacchirāḥ || 30 ||
[Analyze grammar]

tatastadurvīndraguṇādbhutādiva svavaktrapadme'ṅgulināladāyinī |
vidhīyatāmānanamudraṇeti sā jagāda vaidagdhyamayeṅgitaiva tām || 31 ||
[Analyze grammar]

anantaraṃ tāmavadannṛpāntaraṃ tadadhvadṛktārataraṅgaraṅgaṇā |
tṛṇībhavatpuṣpaśaraṃ sarasvatī svatīvratejaḥparibhūtabhūtalam || 32 ||
[Analyze grammar]

tadeva kiṃ na kriyate nu kā kṣatiryadeṣa taddūtamukhena kāṅkṣati |
prasīda kāñcīmayamācchinattu te prasahya kāñcīpurabhūpuraṃdaraḥ || 33 ||
[Analyze grammar]

mayi sthitirnamratayaiva labhyate digeva tu stabdhatayā vilaṅghyate |
itīva cāpaṃ dadhadāśugaṃ kṣipannayaṃ nayaṃ samyagupādiśaddviṣām || 34 ||
[Analyze grammar]

adaḥsamitsaṃmukhavīrayauvatatruṭadbhujākambumṛṇālahāriṇī |
dviṣadgaṇastraiṇadṛgambunirjhare yaśomarālāvalirasya khelati || 35 ||
[Analyze grammar]

sindūradyutimugdhamūrdhani dhṛtaskandhāvadhriśyāmike vyomāntaspṛśi sindhure'sya samarārambhoddhure dhāvati |
jānīmo nu yadi pradoṣatimiravyāmiśrasaṃdhyādhiyevāstaṃ yānti samastabāhujabhujātejaḥsahasrāṃśavaḥ || 36 ||
[Analyze grammar]

hitvā daityariporuraḥ svabhavanaṃ śūnyatvadoṣasphuṭāsīdanmarkaṭakīṭakṛtrimasitacchattrībhavatkaustubham |
ujjhitvā nijasadma padmamapi tadvyaktāvanaddhīkṛtaṃ lūtātantubhirantaradya bhujayoḥ śrīrasya viśrāmyati || 37 ||
[Analyze grammar]

sindhorjaitramayaṃ pavitramasṛjattatkīrtipūrtādbhutaṃ yatra snānti jaganti santi kavayaḥ kevā na vācaṃyamāḥ |
yadbinduśriyamindurañcati jalaṃ cāviśya dṛśyetaro yasyāsau jaladevatāsphaṭikabhūrjāgarti yāgeśvaraḥ || 38 ||
[Analyze grammar]

antaḥsaṃtoṣabāṣpaiḥ sthagayati na dṛśastābhirākarṇayiṣyannaṅge nānastiromā racayati pulakaśreṇimānandakandām |
na kṣoṇībhaṅgabhīruḥ kalayati ca śiraḥkampanaṃ tanna vidmaḥ śṛṇvannetasya kīrtīḥ kathamuragapatiḥ prītimāviṣkaroti || 39 ||
[Analyze grammar]

ācūḍāgramamajjayajjayapaṭuryacchalyadaṇḍānayaṃ saṃrambhe ripurājakuñjaraghaṭākumbhasthaleṣu sthirān |
sā sevāsya pṛthuḥ prasīdati tayā nāsmai kutastvatkucaspardhāgardhiṣu teṣu tāndhṛtavate daṇḍānpradaṇḍānapi || 40 ||
[Analyze grammar]

smitaśriyā sṛkkaṇi līyamānayāvitīrṇayā tadguṇaśarmaṇeva sā |
upāhasatkīrtyamahattvameva taṃ girāṃ hi pāre niṣadhendravaibhavam || 41 ||
[Analyze grammar]

nijākṣilakṣmīhasitaiṇaśāvakāmasāvabhāṇīdaparaṃ paraṃtapam |
puraiva taddigvalanaśriyāṃ bhuvā bhruvā vinirdiśya sabhāsabhājitam || 42 ||
[Analyze grammar]

kṛpā nṛpāṇāmupari kvacinna te natena hā hā śirasā rasādṛśām |
bhavantu tāvattava locanāñcalā nipeyanepālanṛpālapālayaḥ || 43 ||
[Analyze grammar]

ṛjutvamaunaśrutipāragāmitā yadīyametatparameva hiṃsitum |
atīva viśvāsavidhāyi ceṣṭitaṃ bahurmahānasya sa dāmbhikaḥ || 44 ||
[Analyze grammar]

śaraḥ ripūnavāpyāpi gato'vakīrṇitāmayaṃ na yāvajjanarañjanavratī |
bhṛśaṃ viraktānapi raktavattarānnikṛttya yattānasṛjāsṛjadyudhi || 45 ||
[Analyze grammar]

patatyetattejohutabhuji kadācidyadi tadā pataṅgaḥ syādaṅgīkṛtatamapataṅgāpadudayaḥ |
yaśo'muṣyevopārjayitumasamarthena vidhinā kathaṃcitkṣīrāmbhonidhirapi kṛtastatpratinidhiḥ || 46 ||
[Analyze grammar]

yāvatpaulastyavāstūbhavadubhayaharillomalekhottarīye setuprāleyaśailau carati narapatestāvadetasya kīrtiḥ |
yāvatprākpratyagāśāparivṛḍhanagarārambhaṇastambhamudrāvadrī saṃdhyāpatākāruciracitaśikhāśoṇaśobhāvubhau ca || 47 ||
[Analyze grammar]

yuddhvā cāmimukhaṃ raṇasya caraṇasyaivādasīyasya vā buddhvā'ntaḥ svaparāntaraṃ nipatatāmunmucya bāṇāvalīḥ |
chinnaṃ vāvanatībhavannijabhiyaḥ khinnaṃ bhareṇātha vā rājñānena haṭhādviloṭhitamabhūdbhūmāvarīṇāṃ śiraḥ || 48 ||
[Analyze grammar]

na tūṇāduddhāre na guṇaghaṭane nāśrutiśikhaṃ samākṛṣṭau dṛṣṭirna viyati na lakṣye na ca bhuvi |
nṛṇāṃ paśyatyasya kvacana viśikhānkiṃ tu patitadviṣadvakṣaḥśvabhrairanumitirasūngocarayati || 49 ||
[Analyze grammar]

damasvasuścittamavetya hāsikā jagāda devīṃ kiyadasya vakṣyasi |
bhaṇa prabhūte jagati sthite guṇairihāpyate saṃkaṭavāsayātanā || 50 ||
[Analyze grammar]

bravīti dāsīha kimapyasaṃgataṃ tato'pi nīceyamati pragalbhate |
aho sabhā sādhuritīriṇaḥ krudhā nyaṣedhadetatkṣitipānugāñjanaḥ || 51 ||
[Analyze grammar]

athānyamuddiśya nṛpaṃ kṛpāmayī mukhena taddiṅmukhasaṃmukhena sā |
damasvasāraṃ vadati sma devatā girāmilābhūvadatismaraśriyam || 52 ||
[Analyze grammar]

vilocanendīvaravāsavāsitaiḥ sitairapāṅgādhvagacandrikāñcalaiḥ |
trapāmapākṛtya nibhānnibhālaya kṣitikṣitiṃ mālayamālayaṃ rucaḥ || 53 ||
[Analyze grammar]

imaṃ parityajya paraṃ raṇādariḥ svameva bhagnaḥ śaraṇaṃ mudhāviśat |
na vetti yattrātumitaḥ kṛtasmayo na durgayā śailabhuvāpi śakyate || 54 ||
[Analyze grammar]

anena rājñārthiṣu durbhagīkṛto bhavanghanadhvānajaratnameduraḥ |
tathā vidūrādriradūratāṃ gamī yathā sa gāmī tava keliśailatām || 55 ||
[Analyze grammar]

namrapratyarthipṛthvīpatimukhakamalamlānatābhṛṅgajātacchāyāntaḥpātacandrāyitacaraṇanakhaśreṇiraiṇeyanetre |
dṛptāriprāṇavātāmṛtarasalaharībhūripānena pīnaṃ bhūlokasyaiṣa bhartā bhujabhujagayugaṃ sāṃyugīnaṃ bibharti || 56 ||
[Analyze grammar]

adhyāhāraḥ smaraharaśiraścandraśeṣasya śeṣasyāherbhūyaḥ phaṇasamucitaḥ kāyayaṣṭīnikāyaḥ |
dugdhāmbhodhermuniculakanatrāsanāśābhyupāyaḥ kāyavyūhaḥ kva jagati na jāgartyadaḥkīrtipūraḥ || 57 ||
[Analyze grammar]

rājñāmasya śatena kiṃ kalayato hetiṃ śataghnīṃ kṛtaṃ lakṣairlakṣabhido daśaiva jayataḥ padmāni padmairalam |
kartuṃ sarvaparicchidaḥ kimapi no śakyaṃ parārdhena vā tatsaṃkhyāpagamaṃ vināsti na gatiḥ kācidbataitaddviṣām || 58 ||
[Analyze grammar]

vayasyayākūtavidā damasvasuḥ smitaṃ vitatyābhidadhe'tha bhāratī |
itaḥ pareṣāmapi paśya yācatāṃ bhavanmukhena svanivedanatvarām || 59 ||
[Analyze grammar]

kṛtātra devī vacanādhikāriṇī tvamuttaraṃdāsi dadāsi kāsatī |
itīriṇastannṛpapāripārśvikānsvabhartureva bhrukuṭirnyavartayat || 60 ||
[Analyze grammar]

dharādhirājaṃ nijagāda bhāratī tadunmukheṣadvalitāṅgasūcitam |
damasvasāraṃ prati sāravattaraṃ kulena śīlena ca rājasūcitam || 61 ||
[Analyze grammar]

kutaḥ kṛtaivaṃ varalokamāgataṃ prati pratijñā'navalokanāya te |
apīyamenaṃ mithilāpuraṃdaraṃ nipīya dṛṣṭiḥ śithilāstu te varam || 62 ||
[Analyze grammar]

na pāhi pāhīti yadabravīramuṃ mamauṣṭha tenaivamabhūditi krudhā |
raṇakṣitāvasya virodhimūrdhabhirvidaśya dantairnijamoṣṭhamāsyate || 63 ||
[Analyze grammar]

bhuje'pasarpatyapi dakṣiṇe guṇaṃ saheṣuṇādāya puraḥprasarpiṇe |
dhanuḥ parīrambhamivāsya saṃmadānmahāhave vāmabāhave || 64 ||
[Analyze grammar]

asyorvīramaṇasya pāṛvaṇavidhudvairājyasajjaṃ yaśaḥ sarvāṅgojjvalaśarvaparvatasitaśrīgarvanirvāsi yat |
tatkambupratibimbitaṃ kimu śaratparjanyarājiśriyaḥ paryāyaḥ kimu dugdhasindhupayasāṃ sarvānuvādaḥ kimu || 65 ||
[Analyze grammar]

nistriṃśatruṭitārivāraṇaghaṭākumbhāstikūṭāvaṭasthānasthāyukamauktikotkarakiraḥ kairasya nāyaṃ karaḥ |
unnītaścaturaṅgasainyasamaratvaṅgatturaṃgakṣurākṣuṇṇāsu kṣitiṣu kṣipanniva yaśaḥ kṣoṇījabījavrajam || 66 ||
[Analyze grammar]

arthibhraṃśabahūbhavatphalabharavyājena kubjāyitaḥ satyasminnatidānabhāji kathamapyāstāṃ sa kalpadrumaḥ |
āste nirvyayaratnasaṃpadudayodagraḥ kathaṃ yācakaśreṇīvarjanaduryaśonibiḍitavrīḍastu ratnācalaḥ || 67 ||
[Analyze grammar]

sṛjāmi kiṃ vighnamidaṃnṛpastutāvitīṅgitaiḥ pṛcchati tāṃ sakhījane |
smitāya vaktraṃ yadavakrayadvadhūstadeva vaimukhyamalakṣi tannṛpe || 68 ||
[Analyze grammar]

dṛśāsya nirdiśya nareśvarāntaraṃ madhusvarā vaktumadhīśvarā girām |
anūpayāmāsa vidarbhajāśrutī nijāsyacandrasya sudhābhiruktibhiḥ || 69 ||
[Analyze grammar]

sa kāmarūpādhipa eṣa hā tvayā na kāmarūpādhika īkṣyate'pi yaḥ |
tvamasya sā yogyatamāsi vallabhā sudurlabhā yatpratimallabhā parā || 70 ||
[Analyze grammar]

akarṇadhārāśugasaṃbhṛśāṅgatāṃ gatairaritreṇa vināsya vairibhiḥ |
vidhāya yāvattaraṇerbhidāmaho nimajjya tīrṇaḥ samare bhavāṛṇavaḥ || 71 ||
[Analyze grammar]

yadasya bhūlokabhujo bhujoṣmabhistapartureva kriyate'riveśmani |
prapāṃ na tatrārivadhūstapasvinī dadātu netrotpalavāsibhirjalaiḥ || 72 ||
[Analyze grammar]

etaddattāsighātasravadasṛgasuhṛdvaṃśasārdrendhanaitaddoruddāmapratāpajvaladanalamiladbhūmadhūmabhramāya |
etaddigjaitrayātrāsamasamarabharaṃ paśyataḥ kasya nāsīdetannāsīravājivrajakhurajarajorājirājisthalīṣu || 73 ||
[Analyze grammar]

kṣīrodanvadapāḥ pramathya mathitādeśe'marairnirmite svākramyaṃ sṛjatastadasya yaśasaḥ kṣīrodasiṃhāsanam |
keṣāṃ nājani vā janena jagatāmetatkavitvāmṛtasrotaḥprotapipāsukarṇakalasībhājābhiṣekotsavaḥ || 74 ||
[Analyze grammar]

sabhiti patinipātākarṇanadrāgadīrṇapratinṛpatimṛgākṣīlakṣavakṣaḥśilāsu |
racitalipirivorastāḍanavyastahastaprakharanakharaṭaṅkairasya kīrtipraśastiḥ || 75 ||
[Analyze grammar]

vidhāya tāmbūlapuṭīṃ karāṅkagāṃ babhāṇa tāmbūlakaraṅkavāhinī |
damasvasurbhāvamavetya bhāratīṃ nayānayā vaktrapariśramaṃ śamam || 76 ||
[Analyze grammar]

samunmukhīkṛtya babhāra bhāratī ratīśakalpe'nyanṛpe nijaṃ bhujam |
tatastrasadbālapṛṣadvilocanāṃ śaśaṃsa saṃsajjanarañjanīṃ janīm || 77 ||
[Analyze grammar]

ayaṃ guṇaughairanurajyadutkalo bhavanmukhālokarasotkalocanaḥ |
spṛśantu rūpāmṛtavāpi nanvamuṃ tavāpidṛktārataraṅgabhaṅgayaḥ || 78 ||
[Analyze grammar]

anena sarvārthikṛtārthatākṛtāhṛtārthinau kāmagavīsuradrumau |
mithaḥ payaḥsecanapallavāśane pradāya dānavyasanaṃ samāpnutaḥ || 79 ||
[Analyze grammar]

nṛpaḥ karābhyāmudatolayannije nṛpānayaṃ yānpatataḥ padadvaye |
tadīyacūḍākuruvindaraśmibhiḥ sphuṭeyametatkarapādarañjanā || 80 ||
[Analyze grammar]

yatkasyāmapi bhānumānna kakubhi sthemānamālambate jātaṃ yaddhanakānanaikaśaraṇaprāptena dāvāgninā |
eṣaitadbhujatejasā vijitayostāvattayoraucitī dhiktaṃ vāḍavamambhasi dviṣi bhiyā yena praviṣṭaṃ punaḥ || 81 ||
[Analyze grammar]

amuṣyorvībhartuḥ prasṛmaracamūsindhurabhavairavaimi prārabdhe vamathubhiravaśyāyasamaye |
na kampantāmantaḥ pratinṛpabhaṭā mlāyatu na tadvadhūvaktrāmbhojaṃ bhavatu na sa teṣāṃ kudivasaḥ || 82 ||
[Analyze grammar]

ātmanyasya samucchritīkṛtaguṇasyāhotarāmaucitī yadgāṭrāntaravarjanādajanayadbhūjānireṣa dviṣām |
bhūyo'haṃ kriyate sma yena ca hṛdā skandho na yaścānamattanmarmāṇi dalaṃdalaṃ samidalaṃkarmīṇabāṇavrajaḥ || 83 ||
[Analyze grammar]

dūraṃ gauraguṇairahaṃkṛtibhṛtāṃ jaitrāṅkakāre caratyetaddoryaśasi prayāti kumudaṃ bibhyanna nidrāṃ niśi |
dhammille tava mallikāsumanasāṃ mālyaṃ bhiyā līyate pīyūṣasravakaitavāddhṛtadaraḥ śītadyutiḥ svidyati || 84 ||
[Analyze grammar]

etadgandhagajastṛṣāmbhasi bhṛśaṃ kaṇṭhāntamajjattanuḥ phenaiḥ pāṇḍuritaḥ svadikkarijayakrīḍāyaśaḥspardhibhiḥ |
dantadvandvajalānubimbanacaturdantaḥ karāmbhovamivyājādabhramuvallabhena virahaṃ nirvāpayatyambudheḥ || 85 ||
[Analyze grammar]

athaitadurvīpativarṇanādbhutaṃ nyamīladāsvādayituṃ hṛdīva sā |
madhusrajā naiṣadhanāmajāpinī sphuṭībhavaddhyānapuraḥsphurannalā || 86 ||
[Analyze grammar]

praśaṃsituṃ saṃsadupāntarañjinaṃ śriyā jayantaṃ jagatīśvaraṃ jinam |
giraḥ pratastāra purāvadeva tā dināntasaṃdhyāsamayasya devatā || 87 ||
[Analyze grammar]

tathādhikuryā rucire cirepsitā yathotsukaḥ samprati saṃpratīcchati |
apāṅgaraṅgasthalalāsyalampaṭāḥ kaṭākṣadhārāstva kīkaṭādhipaḥ || 88 ||
[Analyze grammar]

idaṃyaśāṃsi dviṣataḥ sudhārucaḥ kimaṅkametaddviṣātaḥ kimānanam |
yaśobhirasyākhilalokadhāvibhirvibhīṣitā dhāvati tāmasī masī || 89 ||
[Analyze grammar]

idaṃnṛpaprārthibhirujjhito'rthibhirmaṇipraroheṇa vivṛdhya rohaṇaḥ |
kiyaddinairambaramāvariṣyate mudhā munirvindhyamarundha bhūdharam || 90 ||
[Analyze grammar]

bhūśakrasya yaśāṃsi vikramabhareṇopāṛjitāni kramādetasya stumahe mahemaradanaspardhīni kairakṣaraiḥ |
limpadbhiḥ kṛtakaṃ kṛto'pi rajataṃ rājñāṃ yaśaḥpāradairasya svarṇagiriḥ pratāpadahanaiḥ svarṇaṃ punarnirmitaḥ || 91 ||
[Analyze grammar]

yadbhartuḥ kurute'bhiṣeṇanamayaṃ śakro bhuvaḥ sā dhruvaṃ daigdāhairiva bhasmabhirmaghavatā vṛṣṭairdhṛtoddhūlanā |
śaṃbhormā bata sāṃdhivelanaṭanaṃ bhāji vrataṃ drāgiti kṣoṇī nṛtyati mūrtiraṣṭavapuṣo'sṛgvṛṣṭisaṃdhyādhiyā || 92 ||
[Analyze grammar]

prāgetadvapurāmukhendu sṛjataḥ sraṣṭuḥ samastastviṣāṃ kośaḥ śoṣamagādagādhajagatīśilpe'pyanalpāyitaḥ |
niśśeṣadyutimaṇḍalavyayavaśādīṣalabhaireṣa vā śeṣaḥ keśamayaḥ kimandhatamasastobhaistato nirmitaḥ || 93 ||
[Analyze grammar]

tattaddigjaitrayātroddhuraturagakhurāgroddhatairandhakāraṃ nirvāṇāripratāpānalajamiva sṛjatyeṣa rājā rajobhiḥ |
bhūgolacchāyamāyāmayagaṇitavidunneyakāyo'bhiyābhūdetatkīrtipratānairvidhubhiriva yudhe rāhurāhūyamānaḥ || 94 ||
[Analyze grammar]

āste dāmadorīyāmiyamudaradarīṃ yāvalambya trilokī saṃmātuṃ śaknuvanti prathimabharavaśādatra naitadyaśāṃsi |
tāmenāṃ pūrayitvā niraguriva madhudhvaṃsinaḥ pāṇḍupadmacchadmāpannānitānidvipadaśanasanābhīni nābhīpathena || 95 ||
[Analyze grammar]

asyāsirbhujagaḥ svakośasuṣirākṛṣṭaḥ sphuratkṛṣṇimā kamponmīladarālalīlavalanasteṣāṃ bhiye bhūbhujām |
saṅgrāmeṣu nijāṅgulīmayamahāsiddhāṣadhīvīrudhaḥ parvāsye viniveśya jāṅgulikatā yairnāma nālambitā || 96 ||
[Analyze grammar]

yaḥ pṛṣṭhaṃ yudhi darśayatyaribhaṭaśreṇīṣu yo vakratāmasminneva bibharti yañca kirati kūradhvaniṃ niṣṭhuraḥ |
doṣaṃ tasya tathāvidhasya bhajataścāpasya gṛhṇanguṇaṃ vikhyātaḥ sphuṭameka eṣa nṛpatiḥ sīmā guṇagrāhiṇām || 97 ||
[Analyze grammar]

asyāriprakaraḥ śaraśca nṛpateḥ saṃkhye patantāvubhau sītkāraṃ ca na saṃmukhau racayataḥ kampaṃ ca na prāpnutaḥ |
tadyuktaṃ na punarnivṛttirubhayorjāgarti yanmuktayorekastatra bhinatti mitramaparaścāmitramityadbhutam || 98 ||
[Analyze grammar]

dhūlībhirdivamandhayanbadhirayannāśāḥ khurāṇāṃ ravairvātaṃ saṃyati khañjayañjavajavaistotṝnguṇairmūkayan |
dharmārādhanasaṃniyuktajagatā rājñāmunādhiṣṭhitaḥ sāndrotphālamiṣādvigāyati padā spraṣṭuṃ turaṃgo'pi gām || 99 ||
[Analyze grammar]

etenotkṛttakaṇṭhapratisubhaṭanaṭārabdhanāṭyādbhutānāṃ kaṣṭaṃ draṣṭaiva nābhūdbhuvi samarasamālokilokāspade'pi |
aśvairasvairavegaiḥ kṛtakhurakhuralīmaṅkṣuvikṣudyamānakṣmāpṛṣṭhottiṣṭhadandhaṃkaraṇaraṇadhurāreṇudhārāndhakārāt || 10 ||
[Analyze grammar]

unmīlallīlanīlotpaladaladalanāmodamedasvipūrakroḍakrīḍaddvijālīgarududitamarutsphālavācālavīciḥ |
etenākhāni śākhānivahanavaharitparṇapūrṇadrumālīvyālīḍhopāntaśāntavyathapathikadṛśāṃ dattarāgastaḍāgaḥ || 101 ||
[Analyze grammar]

vṛddho vārdhirasau taraṅgavalibhaṃ bibhradvapuḥ pāṇḍuraṃ haṃsālīpalitena yaṣṭikalitastāvadvayorbaṃhimā |
bibhraccandrikayā ca kaṃ vikacayā yogyasphuratsaṃgataṃ sthāne snānavidhāyidhārmikaśironatyāpi nityādṛtaḥ || 102 ||
[Analyze grammar]

tasminnetena yūnā saha vihara payaḥkelivelāsu bāle nālenāstu tvadakṣipratiphalanabhidā tatra nīlotpalānām |
tatpāthodevatānāṃ viśatu tava tanucchāyamevādhikāre tatphullāmbhojarājye bhavatu ca bhavadīyānanasyābhiṣekaḥ || 103 ||
[Analyze grammar]

etatkīrtivivartadhautanikhilatrailokyanirvāsitairviśrāntiḥ kalitā kathāsu jagatāṃ śyāmaiḥ samagrairapi |
jajñe kīrtimayādaho bhayabharairasmādakīrtiḥ punaḥ sāyannāsya kathāpathe'pi malinacchāyā babandha sthitim || 104 ||
[Analyze grammar]

athāvadadbhīmasuteṅgitātsakhī janairakīrtiryadi vāsya neṣyate |
mayāpi sā tatkhalu neṣyate paraṃ sabhāśravaḥpūratamālavallitām || 105 ||
[Analyze grammar]

asya kṣoṇipateḥ parāṛdhaparayā lakṣīkṛtāḥ saṃkhyayā prajñācakṣuravekṣyamāṇatimiraprakhyāḥ kilākīrtayaḥ |
gīyante svaramaṣṭamaṃ kalayatā jātena vandhyodarānmūkānāṃ prakareṇa kūrmaramaṇīdugdhodadhe rodhasi || 106 ||
[Analyze grammar]

tadakṣaraiḥ sasmitavismitānanāṃ nipīya tāmīkṣaṇabhaṅgibhiḥ sabhām |
ihāsya hāsyaṃ kimabhūnnaveti taṃ vidarbhajā bhūpamapi nyabhālayat || 107 ||
[Analyze grammar]

nalānyavīkṣāṃ vidadhe damasvasuḥ kanīnikāgaḥ khalu nīlimālayaḥ |
cakāra sevāṃ śuciraktatocitāṃ milannapāṅgaḥ savidhe tu naiṣadhe || 108 ||
[Analyze grammar]

dṛśā nalasya śruticumbineṣuṇā kare'pi cakracchalanamrakārmukaḥ |
smaraḥ parāṅgairanukalpya dhanvitāṃ janīmanaṅgaḥ svayamārdayattataḥ || 109 ||
[Analyze grammar]

utkaṇṭakā vilasadujjvalapatrarājirāmodabhāganaparāgatarā'tigaurī |
rudrakrudhastadarikāmadhiyā nale sā vāsārthitāmadhṛta kāñcanaketakī vā || 1110 ||
[Analyze grammar]

tannālīkanale caletaramanāḥ sāmyānmanāgapyabhūdapyagre caturaḥ sthitānna caturā pātuṃ dṛśā naiṣadhān |
ānandāmbunidhau nimajjya nitarāṃ dūraṃ gatā tattalālaṃkārībhavanājjanāya dadatī pātālakanyābhramam || 111 ||
[Analyze grammar]

sarvasvaṃ cetasastāṃ nṛpatirapi dṛśe prītidāyaṃ pradāya prāpattaddṛṣṭimiṣṭātithimamaradurāpāmapāṅgottaraṅgam |
ānandāndhyena vandhyānakṛta tadaparākūtapātānsa ratyāḥ patyā pīyūṣadhārāvalanaviracitenāśugenāśu līḍhaḥ || 112 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
tasya dvādaśa eṣa mātṛcaraṇāmbhojālimaulermahākāvye'yaṃ vyagalannalasya carite sargo nisargojjvalaḥ || 113 ||
[Analyze grammar]