Chapter 6

dūtyāya daityāripateḥ pravṛtto dviṣāṃ niṣeddhā niṣādhapradhānam |
sa bhīmabhūmīpatirājadhānīṃ lakṣīcakārātha rathasya tasya || 1 ||
[Analyze grammar]

bhaimyā samaṃ nājagaṇadviyogaṃ sa dūtadharme sthiradhīradhīśaḥ |
payodhipāne munirantarāyaṃ durvāramapyaurvamivaurvaśeyaḥ || 2 ||
[Analyze grammar]

nalapraṇālīmiladambujākṣīsaṃvādapīyūṣapipāsavaste |
tadadhvavīkṣārthamivānimeṣā deśasya tasyābharaṇībabhūvuḥ || 3 ||
[Analyze grammar]

tāṃ kuṇḍinākhyāpadamātraguptāmindrasya bhūmeramarāvatīṃ saḥ |
manorathaḥ siddhimiva kṣaṇena rathastadīyaḥ puramāsasāda || 4 ||
[Analyze grammar]

bhaimīpadasparśakṛtārtharathyā seyaṃ purītyutkalikākulastām |
nṛpo nipīya kṣaṇamīkṣaṇābhyāṃ bhṛśaṃ niśaśvāsa suraiḥ kṣatāśaḥ || 5 ||
[Analyze grammar]

svidyatpramodāśrulavena vāmaṃ romāñcabhṛtpakṣmabhirasya cakṣuḥ |
anyatpunaḥ kampramapi sphurattvāttasyāḥ puraḥ prāpa navopabhogam || 6 ||
[Analyze grammar]

rathādasau sārathinā sanāthādrājāvatīryātha puraṃ viveśa |
nirgatya bimbādiva bhānavīyātsaudhākaraṃ maṇḍalamaṃśusaṅghaḥ || 7 ||
[Analyze grammar]

citraṃ tadā kuṇḍinaveśinaḥ ṣā nalasya mūrtirvavṛte na dṛśyā |
babhūva tañcitrataraṃ tathāpi viśvaikadṛśyaiva yadasya mūrtiḥ || 8 ||
[Analyze grammar]

janairvidagdhairbhavanaiśca mugdhaiḥ pade pade vismayakalpavallīm |
tāṃ gāhamānāsya ciraṃ nalasya dṛṣṭiryayau rājakulātithitvam || 9 ||
[Analyze grammar]

helāṃ dadhau rakṣijane'strisajje līnaścarāmīti hṛdā lalajje |
drakṣyāmi bhaimīmiti saṃtutoṣa dūtaṃ vicintya svamasau śuśoca || 10 ||
[Analyze grammar]

athopakāryāmamarendrakāryātkakṣāsu rakṣādhikṛtairadṛṣṭaḥ |
bhaimīṃ didṛkṣurbahudikṣu cakṣurdiśannasau tāmaviśadviśaṅkaḥ || 11 ||
[Analyze grammar]

ayaṃ ka ityanyanivārakāṇāṃ girā vibhurdvāri vibhujya kaṇṭham |
dṛśaṃ dadau vismayanistaraṅgāṃ sa laṅghitāyāmapi rājasiṃhaḥ || 12 ||
[Analyze grammar]

antaḥpurāntaḥ sa vilokya bālāṃ kāṃcitsamālabdhumasaṃvṛtorum |
nimīlitākṣaḥ parayā bhramantyā saṃghaṭṭamāsādya camaccakāra || 13 ||
[Analyze grammar]

anādisargasraji vānubhūtā citreṣu vā bhīmasutā nalena |
jāteva yadvā jitaśambarasya sā śāmbarīśilpamalakṣi dikṣu || 14 ||
[Analyze grammar]

alīkabhaimīsahadarśanānna tasyānyakanyāpsaraso rasāya |
bhaimībhramasyaiva tataḥ prasādādbhaimībhramastena na tāsvalambhi || 15 ||
[Analyze grammar]

bhaimīnirāśe hṛdi manmathena dattasvahastādvirahādvihastaḥ |
sa tāmalīkāmavalokya tatra kṣaṇādapaśyanvyaṣadadvibuddhaḥ || 16 ||
[Analyze grammar]

priyāṃ vikalpopahṛtāṃ sa yāvaddigīśasaṃdeśamajalpadalpam |
adṛśyavāgbhīṣitabhūribhīrurbhavo ravastāvadacetayattam || 17 ||
[Analyze grammar]

paśyansa tasminmarutādi tanvyāḥ stanau parispraṣṭumivāstavastrau |
akṣāntapakṣāntamṛgāṅkamāsyaṃ dadhāra tiryanvalitaṃ vilakṣaḥ || 18 ||
[Analyze grammar]

antaḥpure vistṛtavāguro'pi bālāvalīnāṃ valitairguṇaughaiḥ |
na kālasāraṃ hariṇaṃ tadakṣidvayaṃ prabhurbanddhumabhūnmanobhūḥ || 19 ||
[Analyze grammar]

dormūlamālokya kacaṃ rurutsostataḥ kucau tāvanulepayantyāḥ |
nābhīmathaiṣa ślathavāsaso'nu mimīla dikṣu kramakṛṣṭacakṣuḥ || 20 ||
[Analyze grammar]

mīlanna śeke'bhimukhāgatābhāṃ dhartuṃ nipīḍya stanasāntarābhyām |
svāṅgānyapeto vijagau sa paścātpumaṅgasaṅgotpulake punaste || 21 ||
[Analyze grammar]

nimīlanaspaṣṭavilokanābhyāṃ kadarthitastāḥ kalayankaṭākṣaiḥ |
sa rāgadarśīva bhṛśaṃ lalajje svataḥ satāṃ hrīḥ parato'tigurvī || 22 ||
[Analyze grammar]

romāñcitāṅgīmanu tatkaṭākṣairbhrāntena kāntena raternidiṣṭaḥ |
moghaḥ śaraughaḥ kusumāni nābhūttaddhairyapūjāṃ prati paryavasyan || 23 ||
[Analyze grammar]

hitvaiva vartmaikamiha bhramantyāḥ sparśaḥ striyāḥ sutyaja ityavetya |
catuṣpathasyābharaṇaṃ babhūva lokāvalokāya satāṃ sa dīpaḥ || 24 ||
[Analyze grammar]

udvartayantyā hṛdaye nipatya nṛpasya dṛṣṭirnyavṛtaddrutaiva |
viyogivairātkucayornakhāṅkairardhendulīlairgalahastiteva || 25 ||
[Analyze grammar]

tanvīmukhaṃ drāgadhigatya candraṃ viyoginastasya nimīlitābhyām |
dvayaṃ draḍhīyaḥ kṛtamīkṣaṇābhyāṃ tadindutā ca svasarojatā ca || 26 ||
[Analyze grammar]

catuṣpathe taṃ vinimīlitākṣaṃ caturdigetāḥ sukhamagrahīṣyan |
saṃghaṭṭya tasminbhṛśabhīnivṛttāstā eva tadvatrma na cedadāsyan || 27 ||
[Analyze grammar]

saṃghaṭṭayantyāstarasātmabhūṣāhīrāṅkuraprotadukūlahārī |
diśā nitambaṃ paridhāpya tanvyāstatpāpasaṃtāpamavāpa bhūpaḥ || 28 ||
[Analyze grammar]

hataḥ kayācitpathi kandukena saṃghaṭṭya bhinnaḥ karajaiḥ kayāpi |
kayācanāktaḥ kucakuṅkumena saṃbhuktakalpaḥ sa babhūva tābhiḥ || 29 ||
[Analyze grammar]

chāyāmayaḥ praikṣi kayāpi hāre nije sa gacchannatha nekṣyamāṇaḥ |
taccintayāntarniracāyi cāru svasyaiva tanvyā hṛdayaṃ praviṣṭaḥ || 30 ||
[Analyze grammar]

tacchāyasaundaryanipītadhairyāḥ pratyekamāliṅgadamū ratīśaḥ |
ratipratidvandvitamāsu nūnaṃ nāmūṣu nirṇītaratiḥ kathaṃcit || 31 ||
[Analyze grammar]

tasmādadṛśyādapi nātibibhyustacchāyarūpāhitamohalolāḥ |
manyanta evādṛtamanmathājñāḥ prāṇānapi svānsudṛśastṛṇāni || 32 ||
[Analyze grammar]

jāgarti tacchāyadṛśāṃ purā yaḥ spṛṣṭe ca tasminvisasarpa kampaḥ |
drute drutaṃ tatpadaśabdabhītyā svahastitaścārudṛśāṃ paraṃ saḥ || 33 ||
[Analyze grammar]

ullāsyatāṃ spṛṣṭanalāṅgamaṅgaṃ tāsāṃ nalacchāyapibāpi dṛṣṭiḥ |
aśmaiva ratyāstadanarti patyā chede'pyabodhaṃ yadaharṣi roma || 34 ||
[Analyze grammar]

yasminnalaspṛṣṭakametya hṛṣṭā bhūyo'pi taṃ deśamagānmṛgākṣī |
nipatya tatrāsya dharārajaḥsthe pāde prasīdeti śanairavādīt || 35 ||
[Analyze grammar]

bhramannamuṣyāmupakārikāyāmāyasya bhaimīvirahātkraśīyān |
asau muhuḥ saudhaparamparāṇāṃ vyadhatta viśrāntimadhityakāsu || 36 ||
[Analyze grammar]

ullikhya haṃsena dale nalinyāstasmai yathādarśi tathaiva bhaimī |
tenābhilikhyopahṛtasvahārā kasyā na dṛṣṭājani vismayāya || 37 ||
[Analyze grammar]

kaumāragandhīni nivārayantī vṛttāni romāvalivetracihnā |
sālikhya tenaikṣyata yauvanīyadvāḥsthāmavasthāṃ paricetukāmā || 38 ||
[Analyze grammar]

paśyāḥ puraṃdhrīḥ prati sāndracandrarajāḥkṛtakrīḍakumāracakre |
citrāṇi cakre dhvani cakravarticihnaṃ tadaṅghripratimāsu cakram || 39 ||
[Analyze grammar]

tāruṇyapuṇyāmavalokayantyoranyonyameṇekṣaṇayorabhikhyām |
madhye muhūrtaṃ sa babhūva gacchannākasmikācchādanavismayāya || 40 ||
[Analyze grammar]

puraḥsthitasya kvacidasya bhūpāratneṣu nāryaḥ pratibimbitāni |
vyomanyadṛśyeṣu nijānyapaśyanvismitya vismitya sahasrakṛtvaḥ || 41 ||
[Analyze grammar]

tasminviṣajyāṛdhapathāttapātaṃ tadaṅgarāgacchuritaṃ nirīkṣya |
vismeratāmāpuravismarantyaḥ kṣiptaṃ mithaḥ kandukamindumukhyaḥ || 42 ||
[Analyze grammar]

puṃsi svabhartṛvyatiriktabhūte bhūtvāpyanīkṣāniyamavratinyaḥ |
chāyāsu rūpaṃ bhuvi vīkṣya tasya phalaṃ dṛśorānaśire mahiṣyaḥ || 43 ||
[Analyze grammar]

vilokya tacchāyamatarki tābhiḥ patiṃ prati svaṃ vasudhāpi dhatte |
yathā vayaṃ kiṃ madanaṃ tathainaṃ trinetranetrānalakīlanīlam || 44 ||
[Analyze grammar]

rūpaṃ praticchāyikayopanītamāloki tābhiryadi nāma kāmam |
tathāpi nāloki tadasya rūpaṃ hāridrabhaṅgāya vitīrṇabhaṅgam || 45 ||
[Analyze grammar]

bhavannadṛśyaḥ pratibimbadehavyūhaṃ vitanvanmaṇikuṭṭimeṣu |
puraṃ parasya praviśanviyogī yogīva citraṃ sa rarāja rājā || 46 ||
[Analyze grammar]

pumānivāsparśi mayā vrajantyā chāyā mayā puṃsaḥ iva vyaloki |
bruvannivātarki mayāpi kaściditi sma sa straiṇagiraḥ śṛṇoti || 47 ||
[Analyze grammar]

ambāṃ praṇatyopanatā natāṅgī nalena bhaimī pathi yogamāpa |
sa bhrāntibhaimīṣu na tāṃ vyavikta sā taṃ ca nādṛśyatayā dadarśa || 48 ||
[Analyze grammar]

prasūprasādādhigatā prasūnamālā nalasyodbhramavīkṣitasya |
kṣiptāpi kaṇṭhāya tayopakaṇṭhaṃ sthitaṃ tamālambata satyameva || 49 ||
[Analyze grammar]

sragvāsanādṛṣṭajanaprasādaḥ satyeyamityadbhutamāpa bhūpaḥ |
kṣiptāmadṛśyatvamitāṃ ca mālāmālokya tāṃ vismayate sma bālā || 50 ||
[Analyze grammar]

anyonyamanyatravadīkṣamāṇo paraspareṇādhyuṣite'pi deśe |
aliṅgitālīkaparasparāntastathyaṃ mithastau pariṣasvajāte || 51 ||
[Analyze grammar]

sparśaṃ tamasyādhigatāpi bhaimī mene punarbhrāntimadarśanena |
nṛpaḥ sa paśyannapi tāmudītaḥ stambho na dhartuṃ sahasā śaśāka || 52 ||
[Analyze grammar]

sparśāṭiharṣādṛtasatyamatyā pravṛtya mithyāpratilabdhabādhau |
punarmithastathyamapi spṛśantau na śraddadhāte pathi tau vimugdhau || 53 ||
[Analyze grammar]

sarvatra saṃvādyamabādhamānau rūpaśriyātithyakaraṃ paraṃ tau |
na śekatuḥ kelirasādvirantumalīkamālokya parasparaṃ tu || 54 ||
[Analyze grammar]

parasparasparśarasormisekāttayoḥ kṣaṇaṃ cetasi vipralambhaḥ |
snehātidānādiva dīpikārcirnimiṣya kiṃcidviguṇaṃ didīpe || 55 ||
[Analyze grammar]

veśmāpa sā dhairyaviyogayogādbodhaṃ ca mohaṃ ca muhurdadhānā |
punaḥpunastatra puraḥ sa paśyanbabhrāma tāṃ subhruvamudbhrameṇa || 56 ||
[Analyze grammar]

padmyāṃ nṛpaḥ saṃcaramāṇa eṣa ciraṃ paribhramya kathaṃkathaṃcit |
vidarbharājaprabhavābhirāmaṃ prāsādamabhraṃkaṣamāsasāda || 57 ||
[Analyze grammar]

sakhīśatānāṃ sarasairvilāsaiḥ smarāvarodhabhramamāvahantīm |
vilokayāmāsa sabhāṃ sa bhaimyāstasya pratolīmaṇivedikāyām || 58 ||
[Analyze grammar]

kaṇṭhaḥ kimasyāḥ pikaveṇuvīṇāstisro jitāḥ sūcayati trirekhaḥ |
ityantarastūyata yatra kāpi nalena bālā kalamālapantī || 59 ||
[Analyze grammar]

etaṃ nalaṃ taṃ damayanti paśya tyajārtimityā likulaprabodhān |
śrutvā sa nārīkaravartisārīmukhātsvamāśaṅkata yatra dṛṣṭam || 60 ||
[Analyze grammar]

yatraikayālīkanalīkṛtālīkaṇṭhe mṛṣābhīmabhavībhavantyā |
taddṛkpathe dauhadikopanītā śālīnamādhāyi madhūkamālā || 61 ||
[Analyze grammar]

candrābhamābhraṃ tilakaṃ dadhānā tadvannijāsyendukṛtānubimbam |
sakhīmukhe candrasame sasarja candranavasthāmiva kāpi yatra || 62 ||
[Analyze grammar]

dalodare kāñcanaketakasya kṣaṇānmasībhāvukavarṇalekham |
tasyaiva yatra svamanaṅgalekhaṃ lilekha bhaimī nakhalekhinībhiḥ || 63 ||
[Analyze grammar]

vilekhituṃ bhīmabhuvo lipīṣu sakhyā'tivikhyātibhṛtāpi yatra |
aśāki līlākamalaṃ na pāṇirapāri karṇotpalamakṣi naiva || 64 ||
[Analyze grammar]

bhaimīmupāvīṇayadetya yatra kalipriyasya priyaśiṣyavargaḥ |
gandharvavadhvaḥ svaramadhvarīṇatatkaṇṭhanālaikadhurīṇavīṇaḥ || 65 ||
[Analyze grammar]

nāvā smaraḥ kiṃ harabhītigupte payodhare khelati kumbha eva |
ityardhacandrābhanakhāṅkacumbikucā sakhī yatra sakhībhirūce || 66 ||
[Analyze grammar]

smarāśugībhūya vidarbhasubhrūvakṣo yadakṣobhi khalu prasūnaiḥ |
srajaṃ sṛjantyā tadaśodhi teṣu yatraikayā sūciśikhāṃ nikhāya || 67 ||
[Analyze grammar]

yatrāvadattāmatibhīya bhaimī tyaja tyajedaṃ sakhi sāhasikyam |
tvameva kṛtvā madanāya datse bāṇānprasūnāni guṇena sajjān || 68 ||
[Analyze grammar]

ālikhya sakhyāḥ kucapattrabhaṅgīmadhye sumadhyā makarīṃ kareṇa |
yatrālapattāmidamāli yānaṃ manye tvadekāvalinākanadyāḥ || 69 ||
[Analyze grammar]

tāmeva sā yatra yagāda bhūyaḥ payodhiyādaḥ kucakumbhayoste |
seyaṃ sthitā tāvakahṛcchayāṅkapriyāstu vistārayaśaḥpraśastiḥ || 70 ||
[Analyze grammar]

śārīṃ carantīm sakhi mārayaitāmityakṣadāye kathite kayāpi |
yatra svaghātabhramabhīruśārīkākūtthasākūtahasaḥ sa jajñe || 71 ||
[Analyze grammar]

bhaimīsamīpe sa nirīkṣya yatra tāmbūlajāmbūnadahaṃsalakṣmīm |
kṛtapriyādūtyamahopakāramarālamohadraḍhimānamūhe || 72 ||
[Analyze grammar]

tasminniyaṃ seti sakhīsamāje nalasya saṃdehamatha vyudasyan |
apṛṣṭa eva sphuṭamācacakṣe sa ko'pi rūpātiśayaḥ svayaṃ tām || 73 ||
[Analyze grammar]

bhaimīvinodāya mudā sakhībhistadākṛtīnāṃ bhuvi kalpitānām |
nātarki madhye sphuṭamapyudītaṃ tasyānubimbaṃ maṇivedikāyām || 74 ||
[Analyze grammar]

hutāśakīnāśajaleśadūtīrnirākariṣṇoḥ kṛtakākuyāñcāḥ |
bhaimyā vacobhiḥ sa nijāṃ tadāśāṃ nyavartayaddūramapi prayātām || 75 ||
[Analyze grammar]

vijñaptimantaḥsabhayaḥ sa bhaimyā madhyesabhaṃ vāsavasambhalīyām |
saṃbhālayāmāsa bhṛśaṃ kṛśāśastadālivṛndairabhinandyamānām || 76 ||
[Analyze grammar]

lipirna daivī supaṭhā bhuvīti tubhyaṃ mayi preritavācikasya |
indrasya dūtyāṃ racaya prasādaṃ vijñāpayantyāmavadhānadānaiḥ || 77 ||
[Analyze grammar]

salīlamāliṅganayopapīḍamanāmayaṃ pṛcchati vāsavastvām |
śeṣastvadāśleṣakathāpanidraistadromabhiḥ saṃdidiśe bhavatyai || 78 ||
[Analyze grammar]

yaḥ preryamāṇo'pi hṛdā maghonastvadarthanāyāṃ hriyamāpadāgaḥ |
svayaṃvarasthānajuṣastvamasya badhāna kaṇṭhaṃ varaṇasrajāśu || 79 ||
[Analyze grammar]

nainaṃ tyaja kṣīradhimanthanādyairasyānujāyodgamitāmaraiḥ śrīḥ |
asmai vimathyekṣurasodamanyāṃ śrāmyantu notthāpayituṃ śriyaṃ te || 80 ||
[Analyze grammar]

lokasraji dyaurdivi cāditeyā apyāditeyeṣu mahānmahendraḥ |
kiṃkartumarthī yadi so'pi rāgājjāgarti kakṣā kimataḥ parāpi || 81 ||
[Analyze grammar]

padaṃ śatenāpa makhairyadindrastasmai sa te yācanacāṭukāraḥ |
kuru prasādaṃ tadalaṃkuruṣva svīkārakṛdbhrūnaṭanaśṛameṇa || 82 ||
[Analyze grammar]

mandākinīnandanayorvihāre deve dhave devari mādhave vā |
śreyaḥ śriyāṃ yātari yacca sakhyāṃ taccetasā bhāvini bhāvayasva || 83 ||
[Analyze grammar]

rajyasva rājye jagatāmitīndrādyācñāpratiṣṭhāṃ labhase tvameva |
laghūkṛtasvaṃ baliyācanena tatprāptaye vāmanamāmananti || 84 ||
[Analyze grammar]

yāneva devānnamasi trikālaṃ na tatkṛtaghnīkṛtiraucitī te |
prasīda tānapyanṛṇānvidhātuṃ patiṣyatastvatpadayostrisaṃdhyam || 85 ||
[Analyze grammar]

ityuktavatyā nihitādareṇa bhaimyā gṛhītā maghavatprasādaḥ |
srakpārijātasya ṛte nalāśāṃ vāsairaśeṣāmapupūradāśām || 86 ||
[Analyze grammar]

ārye vicāryālamiheti kāpi yogyaṃ sakhi syāditi kācanāyi |
oṃkāra evottaramastu vastu maṅgalyamatreti ca kāpyavocat || 87 ||
[Analyze grammar]

anāśravā vaḥ kimahaṃ kadāpi vaktuṃ viśeṣaḥ paramasti śeṣaḥ |
ītīrite bhīmajayā na dūtīmāliṅgadālīśca mudāmiyattā || 88 ||
[Analyze grammar]

bhaimīṃ ca dūtyaṃ ca na kiṃcidāpamiti svayaṃ bhāvayato nalasya |
ālokamātrādyadi tanmukhendorabhūnna bhinnaṃ hṛdayāravindam || 89 ||
[Analyze grammar]

īṣatsmitakṣālitasṛkvabhāgā dṛksaṃjñayā vāritatattadāliḥ |
srajā namaskṛtya tayaiva śakraṃ tāṃ bhīmabhūruttarayāṃcakāra || 90 ||
[Analyze grammar]

stutau maghonastyaja sāhasikyaṃ vaktuṃ kiyattaṃ yadi veda vedaḥ |
mṛṣottaraṃ sākṣiṇi hṛtsu nṝpāmajñātṛvijñāpi mamāpi tasmin || 91 ||
[Analyze grammar]

ājñāṃ tadīyāmanu kasya nāma nakārapāruṣyamupaitu jihvā |
prahvā tu tāṃ mūrdhni vidhāya mālāṃ bālāparādhyāmi viśeṣavāgbhiḥ || 92 ||
[Analyze grammar]

tapaḥphalatvena hareḥ kṛpeyamimaṃ tapasyeva janaṃ niyuṅkte |
bhavatyupāyaṃ prati hi pravṛttāvupeyamādhuryamadhairyasarji || 93 ||
[Analyze grammar]

śuśrūṣitāhe tadahaṃ tameva patiṃ mude'pi vratasaṃpade'pi |
viśeṣaleśoya'madevadehamaṃśāgataṃ tu kṣitibhṛttayeha || 94 ||
[Analyze grammar]

aśrauṣamindrādariṇīrgiraste satīvratātipratilomatīvrāḥ |
svaṃ prāgahaṃ prādiṣi nāmarāya kiṃnāma tasmai manasā narāya || 95 ||
[Analyze grammar]

tasminvimṛśyaiva vṛte hṛdaiṣā maindrī dayā māmanutāpikābhūt |
nirvātukāmaṃ bhavasaṃbhavānāṃ dhīraṃ sukhānāmavadhīraṇeva || 96 ||
[Analyze grammar]

varṣeṣu yadbhāratamāryudhuryāḥ stuvanti gārhasthyamivāśrameṣu |
tatrāsmi patyurvarivasyayeha śarmormikirmīritadharmalipsuḥ || 97 ||
[Analyze grammar]

svarge satāṃ śarma paraṃ na dharmā bhavanti bhūmāviha tacca te ca |
śakyā makhenāpi mudo'marāṇāṃ kathaṃ vihāya trayamekamīhe || 98 ||
[Analyze grammar]

sādhorapi svaḥ khalu gāmitādho gamī sa tu svargamitaḥ prayāṇe |
ityāyatī cintayato hṛdi dve dvayorudarkaḥ kimu śarkare na || 99 ||
[Analyze grammar]

prakṣīṇa evāyuṣi karmakṛṣṭe narānna tiṣṭhatyupatiṣṭhate yaḥ |
bubhukṣate nākamapathyakalpaṃ dhīrastamāpātasukhonmukhaṃ kaḥ || 10 ||
[Analyze grammar]

itīndradūtyāḥ prativācamardhe pratyuhya saiṣābhidadhe vayasyāḥ |
kiṃcidvivakṣollasadoṣṭhalakṣmījitāpanidraddalapaṅkajāsyāḥ || 101 ||
[Analyze grammar]

anādidhāvisvaparamparāyā hetusrajaḥ srotasi veśvare vā |
āyattadhīreṣa janastadāryāḥ kimīdṛśaḥ paryanuyogayogyaḥ || 102 ||
[Analyze grammar]

nityaṃ niyatyā paravatyaśeṣe kaḥ saṃvidāno'pyanuyogayogyaḥ |
acetanā sā ca na vācamarhedvaktā tu vaktraśramakarma bhuṅkte || 103 ||
[Analyze grammar]

kramelakaṃ nindati komalecchuḥ kramelakaḥ kaṇṭakalampaṭastam |
prītau tayoriṣṭabhujoḥ samāyāṃ madhyasthatā naikataropahāsaḥ || 104 ||
[Analyze grammar]

guṇā haranto'pi harernaraṃ me na rocamānaṃ parihāpayanti |
na lokamālokayathāpavargāttrivargamarvāñcamamuñcamānam || 105 ||
[Analyze grammar]

ākīṭamākaiṭabhavairi tulyaḥ svābhīṣṭalābhātkṛtakṛtyabhāvaḥ |
bhinnaspṛhāṇāṃ prati cārthamarthaṃ dviṣṭatvamiṣṭatvamapavyavastham || 106 ||
[Analyze grammar]

adhvāgrajāgrannibhṛtāpadandhurbandhuryadi syātpratibandhumarhaḥ |
joṣaṃ janaḥ kāryavidastu vastu pracchayā nijecchā padavīṃ mudastu || 107 ||
[Analyze grammar]

itthaṃ pratīpoktimatiṃ sakhīnāṃ vilupya pāṇḍityabalena bālā |
api śrutasvarpatimantrisūktiṃ dūtīṃ babhāṣe'dbhutalolamaulim || 108 ||
[Analyze grammar]

paretabharturmanaseva dūtīṃ nabhasvatevānilasakhyabhājaḥ |
trisrotasevāmbupatestadāśu sthirāsthamāyātavatīṃ nirāstham || 109 ||
[Analyze grammar]

bhūyo'rthamenaṃ yadi māṃ tvamāttha tadā padāvālabhase maghonaḥ |
satīvrataistīvramimaṃ tu mantumantarvaraṃ vajriṇi mārjitāsmi || 110 ||
[Analyze grammar]

itthaṃ punarvāgavakāśanāśānmahendradūtyāmapayātavatyām |
viveśa lolaṃ hṛdayaṃ nalasya jīvaḥ punaḥ kṣībamiva prabodhaḥ || 111 ||
[Analyze grammar]

śravaṇapuṭayugena svena sādhūpanītaṃ digadhipakṛpayāptādīdṛśaḥ saṃvidhān alabhata madhu bālā rāgavāgutthamitthaṃ niṣadhajanapadendraḥ pātumānandasāndram || 112 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śṛīhīraḥ suṣuve jitendriyacayaṃ mamalladevī ca yam |
ṣaṣṭhaḥ khaṇḍanakhaṇḍato'pi sahajātkṣodakṣame tanmahākāvye'yaṃ vyagalannalasya carite sargo nisargojjvalaḥ || 113 ||
[Analyze grammar]