Chapter 249

pāṣāṇopākhyāne tejaḥparamāṇujagadvarṇanaṃ nāma sargaḥ |
ekonapañcāśaduttaradviśatatamaḥ sargaḥ |
vasiṣṭhaḥ |
atha vātamayīṃ dhattvā jagatprekṣaṇakautukāt |
dhāraṇāṃ dhīrayā vṛttyā vātatāmahamāgataḥ || 1 ||
[Analyze grammar]

sampanno'smyanilo vallīlalanālokalāsakaḥ |
kamalotpalakundādijālakāmodapālakaḥ || 2 ||
[Analyze grammar]

śīkarotkaranīhārahelāharaṇatarṣulaḥ |
surataśrāntasarvāṅgasamāhlādanaharṣulaḥ || 3 ||
[Analyze grammar]

tṛṇagulmalatāvallīdalatāṇḍavapaṇḍitaḥ |
latauṣadhiphalollāsakusumāmodamaṇḍitaḥ || 4 ||
[Analyze grammar]

mṛdurmaṅgalakāleṣu lalanālakacālakaḥ |
bhīma utpātavāteṣu parṇavatprauḍhaparvataḥ || 5 ||
[Analyze grammar]

nandane kundamandāramakarandarajo'ruṇaḥ |
narake'ṅgārasambhāro bhuvi nīhārabhāsuraḥ || 6 ||
[Analyze grammar]

sāgare'saralāvartalekhānumitasarpaṇaḥ |
divi vāridasañcāramṛṣṭāmṛṣṭendudarpaṇaḥ || 7 ||
[Analyze grammar]

nakṣatrakṣatrasainyasya ratho raṃhovibṛṃhitaḥ |
trailokyasiddhasañcāravimānadharaṇehitaḥ || 8 ||
[Analyze grammar]

sahodara iva kṣipragāmitvādasya cetasaḥ |
anaṅgo'pi samastāṅgaḥ spandanānandacandanaḥ || 9 ||
[Analyze grammar]

tuṣāraśīkarāsārajarāromavijarjaraḥ |
āmodayauvanonmādo maunamārdavaśaiśavaḥ || 10 ||
[Analyze grammar]

nandanāmodamadhuro madhurodārasaṃsṛtiḥ |
cārucaitrarathonmukto hṛtakāntārataśramaḥ || 11 ||
[Analyze grammar]

ciraṃ gaṅgātaraṅgāṅgadolāndolanasaśramaḥ |
śramasvarūpajñatayā nivāritarataśramaḥ || 12 ||
[Analyze grammar]

puṣpabhāranatāḥ sparśairvasantavanitālatāḥ |
ciraṃ capalayaṃl loladalahastālilocanāḥ || 13 ||
[Analyze grammar]

ciraṃ bhuṅktvendubimbāṅgaṃ suptvā pūrṇābhratalpake |
vidhūya kamalānīkamapanītarataśramaḥ || 14 ||
[Analyze grammar]

samastarajasāmoko vyomagāmī turaṅgamaḥ |
āmodamadamātaṅgasamullāsamahāsuhṛt || 15 ||
[Analyze grammar]

dhārorṇāḍhyataḍicchṛṅgapayodapaśupālakaḥ |
tantuśśīkaramuktānāmarirgharmarajorujām || 16 ||
[Analyze grammar]

ākāśakusumāmodaḥ sarvaśabdasahodaraḥ |
nāḍīpraṇālīsalilaṃ bhūtāṅgopāṅganartakaḥ || 17 ||
[Analyze grammar]

marmakarmakaraikātmā hṛdguhāgehakesarī |
nityamekāntapathikaḥ sārathirjātavedasaḥ || 18 ||
[Analyze grammar]

āmodaratnaluṇṭhāko vimānanagarāvaniḥ |
dāhāndhakāraśītāṃśuśśaityendukṣīrasāgaraḥ || 19 ||
[Analyze grammar]

prāṇāpānakalārajjvā prāṇināṃ yantravāhakaḥ |
arirmitraṃ ca dīpānāṃ dvīpasañcaraṇe rataḥ || 20 ||
[Analyze grammar]

purogato'pyadṛśyātmā manorājyapuropamaḥ |
tālavṛntatile tailamālānaṃ spandadantinaḥ || 21 ||
[Analyze grammar]

ekakṣaṇalavenaiva valitākhilabhūdharaḥ |
varṇāvalitaraṅgāṇāṃ gaṅgāvāharavaikakṛt || 22 ||
[Analyze grammar]

śyāmāmbuvāharajasāṃ mahāvartakṛdambhasām |
dyunadīvāhavāryogho nabhonīlotpalālikaḥ || 23 ||
[Analyze grammar]

śarīrāveṣṭitonmuktapurāṇatṛṇacopanaḥ |
spandapadmavanādityaśśabdavarṣaikavāridaḥ || 24 ||
[Analyze grammar]

vyomakānanamātaṅgaśśarīragṛhagargaṭaḥ |
dhūlīkadambavipinamāśāliṅgananāyakaḥ || 25 ||
[Analyze grammar]

styānīkaraṇasaṃśoṣadhṛtispandanasaurabhaiḥ |
saśaityaiḥ karmabhiṣṣaḍbhiralabdhakṣaṇa ākṣayam || 26 ||
[Analyze grammar]

rasākarṣaṇasuvyagro nityaṃ bhrāteva tejasaḥ |
haraṇādānakartṝṇāmaṅgānāṃ viniyogakṛt || 27 ||
[Analyze grammar]

śarīranagare nāḍīmārgairgatinirargalaḥ |
rasabhāṇḍaparāvartādāyurmaṇimahāvaṇik || 28 ||
[Analyze grammar]

śarīranagarīnāśanirmāṇaikaparāyaṇaḥ |
rasakiṭṭakalādhātupṛthakkaraṇakovidaḥ || 29 ||
[Analyze grammar]

pratisūkṣmāṇukaṃ dehe tato dṛṣṭaṃ mayā jagat |
tatretthaṃrūpamārambhi sphuṭamābhogi susthiram || 30 ||
[Analyze grammar]

paramāṇuṃ prati tvatra prohyanta iva sargakāḥ |
na ca kiñcitkilohyante khākṛteḥ kimivohyate || 31 ||
[Analyze grammar]

sacandrārkānilāgnīndrayamavaiśravaṇeśvarāḥ |
sabrahmaharigandharvavidyādharamahoragāḥ || 32 ||
[Analyze grammar]

sasāgaragiridvīpadigantaramahārṇavāḥ |
salokāntaralokeśakriyākālakriyākramāḥ || 33 ||
[Analyze grammar]

sasvargabhūmipātālatalalokāntarāntarāḥ |
sabhāvābhāvavaidhuryajarāmaraṇasambhramāḥ || 34 ||
[Analyze grammar]

evaṃ nāma tadā rāma bhūtapañcakarūpiṇā |
mayā pravihṛtaṃ tatra trailokyanalinodare || 35 ||
[Analyze grammar]

rasaḥ pīto'nubhūtaśca kṣmājalānilatejasām |
mūlajāleṣu vṛkṣāṇāṃ prāṇināṃ ca satā mayā || 36 ||
[Analyze grammar]

rasāyanaghanāṅgeṣu candanadravaśobhiṣu |
luṭhitaṃ candrabimbeṣu tuṣāraśayaneṣviva || 37 ||
[Analyze grammar]

sarvartuvanajāleṣu nānāmodāni dikṣvalam |
bhuktāni puṣpajālāni procchiṣṭaṃ dadatālaye || 38 ||
[Analyze grammar]

natonnatāsu mṛdvīṣu svāstīrṇāsvambarājire |
suptaṃ śubhrābhramālāsu navanītasthalīṣviva || 39 ||
[Analyze grammar]

sumanaḥpattramṛduṣu līnaṃ lakṣmīvilāsiṣu |
surasiddhāṅganāṅgeṣu dūrāstasmaravāsanam || 40 ||
[Analyze grammar]

kṛtaḥ kumudakalhārakarāle nalinīvane |
komalaḥ kalahaṃsībhirlīlākalakalāravaḥ || 41 ||
[Analyze grammar]

saratsaritsirāsāramūlabhūmaṇḍalānvitāḥ |
aṅgeṣūḍhāḥ sphuradbhūtā lomālaya ivādrayaḥ || 42 ||
[Analyze grammar]

caturdiggrathitādīrghasaritsūtraiḥ samudrakaiḥ |
ādarśairiva viśrāntamaṅgeṣu pratibimbibhiḥ || 43 ||
[Analyze grammar]

bhūtasargeṇa vibhrāntaṃ siddhavidyādharādinā |
maddehe cetitenaiva makṣikāyaukarūpiṇā || 44 ||
[Analyze grammar]

matprasādena muditairlabdhamarkādibhirvapuḥ |
kṛṣṇaraktasitāpītaharitairhāritairiva || 45 ||
[Analyze grammar]

samudramudrayā saptadvīpasaptātmarūpayā |
saṃsthayā sthāpitā bhūmiḥ prakoṣṭhe valayopamā || 46 ||
[Analyze grammar]

vidyādharapurandhrīṇāṃ parāmṛṣṭāṅgayaṣṭinā |
adṛṣṭenaiva vihitaḥ pulakollāsa ātmanā || 47 ||
[Analyze grammar]

saritsirāsaratsārarasāni suṣirāṇi ca |
jagantyevāsthijālāni mamāsan saṃsthitāni ca || 48 ||
[Analyze grammar]

asaṅkhyairvyomamātaṅgaiścandrārkacalacāmaraiḥ |
uḍumbarāntarmaṣakairiva maddhṛdaye sthitam || 49 ||
[Analyze grammar]

mayā pātālapādena bhūtalodaradhāriṇā |
khamūrdhnāpi tadā rāma na tyaktā paramāṇutā || 50 ||
[Analyze grammar]

dikṣu sarvāsu sarvatra sarvadā sarvakāriṇā |
sarvātmanāpyasarveṇa śūnyarūpeṇa saṃsthitam || 51 ||
[Analyze grammar]

kiñcittvaṃ sadakiñcittvaṃ sākṛtitvaṃ nirākṛti |
anubhūtaṃ sajāḍyaṃ ca cetanatvamalaṃ mayā || 52 ||
[Analyze grammar]

mainākamugdhamīnasya sāgarasyāpyaṇuṃ prati |
santi sargasahasrāṇi svanubhūtānyatho mayā || 53 ||
[Analyze grammar]

jagantyaṅge mayoḍhāni gūḍhāni prakaṭāni ca |
pratibimbapurāṇīva makureṇājaḍātmanā || 54 ||
[Analyze grammar]

evaṃ jalānilāgnitvaṃ bhūmitvaṃ khātmanā satā |
kṛtaṃ citeva svapneṣu bata māyā vijṛmbhate || 55 ||
[Analyze grammar]

api tasyāmavasthāyāṃ jagantyākāśakośake |
mayā dṛṣṭānyasaṅkhyāni paramāṇukaṇaṃ prati || 56 ||
[Analyze grammar]

paramāṇuṃ prati vyoma paramāṇuṃ prati sthitam |
sargavṛndaṃ yathā svapne svapnāntarayutaṃ puram || 57 ||
[Analyze grammar]

khamevāhamabhūvaṃ bhūmaṇḍalaṃ dvīpakuṇḍalam |
sarvātmanāpi na vyāptaṃ kiñcanāpi mayā kvacit || 58 ||
[Analyze grammar]

samutpādayatāśeṣalatātarutṛṇāṅkurān |
bhūtalena rasākṛṣṭyā mayārtheneva jṛmbhitam || 59 ||
[Analyze grammar]

avadātatame śuddhabodhākāśamaye mayi |
jagallakṣāṇi tiṣṭhanti na tiṣṭhanti ca kānicit || 60 ||
[Analyze grammar]

citi cārucamatkāraṃ camatkurvanti yatsvataḥ |
svacamatkṛtayo'ntassthāstadetāḥ sṛṣṭidṛṣṭayaḥ || 61 ||
[Analyze grammar]

anubhūtaṃ kṛtaṃ dṛṣṭaṃ yāvatkvacana kiñcana |
paramārthacamatkārādṛte nehopalabhyate || 62 ||
[Analyze grammar]

pratyekaṃ viśvarūpātmā sarvakartā nirāmayaḥ |
prabuddhaśśuddhabodhātmā sarvaṃ brahmātmakaṃ yataḥ || 63 ||
[Analyze grammar]

sarvaḥ sarvatra sarvātmā sarvagaḥ sarvasaṃśrayaḥ |
etatprabuddhaviṣayamaprabuddhaṃ na vedmyaham || 64 ||
[Analyze grammar]

ākāśakośaviśadātmani citsvarūpe yeyaṃ svatā kacati sargaparampareti |
sāntastadeva kila tāpa ivāntarūṣmā bhedopalambha iti nāsti sadastyanantam || 65 ||
[Analyze grammar]