Chapter 239

pāṣāṇopākhyāne kālarātrivarṇanaṃ nāma sargaḥ |
ekonacatvariṃśaduttaradviśatatamaḥ sargaḥ |
rāmaḥ |
kimetadbhagavan sarvanāśe nṛtyati keva sā |
kiṃ śūrpahalakumbhādyaistasyāḥ sragdāmadhāraṇam || 1 ||
[Analyze grammar]

kiṃ naṣṭaṃ trijagadbhūyaḥ kiṃ kālyā dehasaṃsthitam |
parinṛtyati nirvāṇaṃ kathaṃ punarupāgatam || 2 ||
[Analyze grammar]

vasiṣṭhaḥ |
nāsau pumānna cāsau strī na tannṛttaṃ na tāv ubhau |
tathābhūte tathācāre ākṛtī na ca te tayoḥ || 3 ||
[Analyze grammar]

anādi cinmātranabho yattatkāraṇakāraṇam |
anantaṃ śāntamābhāsamātramātatamavyayam || 4 ||
[Analyze grammar]

śivaṃ tatsa śivaḥ sākṣāl lakṣyate bhairavākṛtiḥ |
tathāsthito jagacchāntau paramākāśa eva saḥ || 5 ||
[Analyze grammar]

cetanatvāttathābhūtaḥ svabhāvavibhavādṛte |
sthātuṃ na yujyate tasya yathā hemno nirākṛteḥ || 6 ||
[Analyze grammar]

kathamāstāṃ vada prājña cinmātraṃ cetanaṃ vinā |
kathamāstāṃ vada prājña maricaṃ tiktatāṃ vinā || 7 ||
[Analyze grammar]

kaṭakādi vinā hema kathamāstāṃ vilokyatām |
kathaṃ svabhāvena vinā padārthasya bhavetsthitiḥ || 8 ||
[Analyze grammar]

vinā tiṣṭhati mādhuryaṃ kathayekṣurasaḥ katham |
nirmādhuryaśca yaścekṣuraso na hi sa tadrasaḥ || 9 ||
[Analyze grammar]

acetanaṃ yaccinmātraṃ na taccinmātramucyate |
na ca cinmātranabhaso naṣṭaṃ kvacana yujyate || 10 ||
[Analyze grammar]

svasattāmātrakādanyatkiñcittasya na yujyate |
anyatvamurarīkartuṃ vyomāvaśyamasau kila || 11 ||
[Analyze grammar]

tasmāttasya yadakṣubdhaṃ sattāmātraṃ svamāsanam |
anādimadhyaparyantaṃ sarvaśaktimayātmakam || 12 ||
[Analyze grammar]

tadetattrijagatsargaḥ kalpānto vyoma bhūrdiśaḥ |
nāśa utpādanaṃ rāma virāmo bhāsanaṃ tamaḥ || 13 ||
[Analyze grammar]

jananaṃ maraṇaṃ māyā moho māndyamavastutā |
vastutā ca vivekaśca bandho mokṣaśśubhāśubhe || 14 ||
[Analyze grammar]

vidyāvidyā sadehatvaṃ videhatvaṃ kṣaṇaściram |
cañcalatvaṃ sthiratvaṃ ca tvaṃ cāhaṃ cetaracca tat || 15 ||
[Analyze grammar]

sadasaccātha sadasanmaurkhyaṃ pāṇḍityameva ca |
deśakālau kriyādravyakalanā kelikalpanam || 16 ||
[Analyze grammar]

rūpālokamanaskārakarmabuddhīndriyātmakam |
tejovāryanilākāśapṛthvyādikamidaṃ tatam || 17 ||
[Analyze grammar]

etatsarvamasau śuddhaścidākāśo nirāmayaḥ |
ajahadvyomatāmeva sarvātmaivaivamāsthitaḥ || 18 ||
[Analyze grammar]

etatsarvaṃ ca vimalaṃ khamevātra na saṃśayaḥ |
asmādananyatsvapnādrirdṛṣṭānto'trāvikhaṇḍitaḥ || 19 ||
[Analyze grammar]

cinmayaḥ paramākāśo ya eṣa kathito mayā |
eṣo'sau śiva ityukto bhavatyeṣa sanātanaḥ || 20 ||
[Analyze grammar]

sa eṣa harirityāste bhavatyeṣa pitāmahaḥ |
candro'rka indro varuṇo yamo vaiśravaṇo'nilaḥ || 21 ||
[Analyze grammar]

analo jalado'mbhodhirhyo'dya śvaścāsti nāsti ca |
ityete cinmayākāśakośaleśāḥ sphurantyalam || 22 ||
[Analyze grammar]

evaṃvidhābhiḥ sañjñābhirmudhābhāvanayedṛśāḥ |
svabhāvamātrabodhena bhavantyete tu tādṛśāḥ || 23 ||
[Analyze grammar]

abodho bodha ityevaṃ cidvyomaivātmani sthitam |
tasmādbhedodbhedamaikyaṃ nāstyeveti praśāmyatām || 24 ||
[Analyze grammar]

tāvattaraṅgatvamayaṃ karoti jīvaḥ svasaṃsāramahāsamudre |
yāvanna jānāti paraṃ svabhāvaṃ nirāmayaṃ tanmayatāmupetaḥ || 25 ||
[Analyze grammar]

jñāte tu śāntiṃ sa tathopayāti yathā na so'bdhirna taraṅgako'sau |
yathāsthitaṃ sarvamidaṃ ca śāntaṃ bhavatyanantaṃ parameva tasya || 26 ||
[Analyze grammar]