Chapter 238

bhrāntimātratvapratipādanaṃ nāma sargaḥ |
aṣṭātriṃśaduttaradviśatatamaḥ sargaḥ |
vasiṣṭhaḥ |
atha rāghava rudraṃ taṃ tadā tasminmahāmbare |
pravṛttaṃ nartituṃ mattamapaśyaṃ vitatākṛtim || 1 ||
[Analyze grammar]

vyomevākṛtimāpannamajahadvyāpitāṃ nijām |
mahākāraṃ ghanaśyāmaṃ daśāśāparipūrakam || 2 ||
[Analyze grammar]

arkenduvahninayanaṃ caladdaśadigambaram |
ghanadīrghaprabhājālamālānaṃ śyāmalatviṣām || 3 ||
[Analyze grammar]

vāḍavāgnidṛśaṃ lolabhujormibharabhāsuram |
ekārṇavārṇo drāgdehabandheneva samutthitam || 4 ||
[Analyze grammar]

paśyāmyanantaramahaṃ yāvattasya śarīrataḥ |
chāyeva pariniryāti nartanānuvidhāyinī || 5 ||
[Analyze grammar]

sūryeṣvavidyamāneṣu mahātamasi manthare |
sthite kathamiyaṃ chāyā bhavediti matirmama || 6 ||
[Analyze grammar]

yāvadvicārayāmyāśu tāvattasya tadā puraḥ |
sā sthitā parinṛtyantī viśīrṇā strī trilocanā || 7 ||
[Analyze grammar]

kṛṣṇā kṛśā sirālāṅgī jarjarā vikṛtākṛtiḥ |
jvālākulānalālolavanasambhāraśekharā || 8 ||
[Analyze grammar]

bhinnāñjanatamaśśyāmā yāminīvākṛtiṃ gatā |
tamaśśrīrdehayukteva sākārevāmbaradyutiḥ || 9 ||
[Analyze grammar]

atidīrghā karālāsyā nabho mātumivodyatā |
dīrghajānubhujabhrāntyā mātukāmeva diṅmukham || 10 ||
[Analyze grammar]

kṛśā bahūpavāseva parinimnamahāhanuḥ |
kajjalaśyāmalā meghamāleva pavanākulā || 11 ||
[Analyze grammar]

kṛśāśaktā yadotthātuṃ sudīrghā vidhinā tadā |
grathiteva sirārūpairdāmabhirdairghyaśālibhiḥ || 12 ||
[Analyze grammar]

tathā nāma sudīrghā sā yathā tasyāśśiraḥkhuram |
mayā dṛṣṭaṃ prayatnena cirordhvādhogamāgamaiḥ || 13 ||
[Analyze grammar]

ārdrāntratantrīgrathitaśiraḥkhurakarotkarā |
amūlā sūtravalitā kaṇṭakānāmiva sthalī || 14 ||
[Analyze grammar]

viśvarūpā yamārkādiśiraḥkamalajālakaiḥ |
kṛtamālāmalālokavāntavahnimayācalā || 15 ||
[Analyze grammar]

pralambakarṇā lulitanāsā nṛśirakuṇḍalā |
śuṣkatumbīlatāṣṭhīvā dīrghalolāsitastanī || 16 ||
[Analyze grammar]

kumārabarhipiñchaughabrāhmamūrdhajamaṇḍalaiḥ |
lāñchitoccasurādhīśaśiraḥkhaṭvāṅgamaṇḍalā || 17 ||
[Analyze grammar]

dantendumālāvimaloddyotapītatamo'rṇavā |
kṛṣṇoccairdhūmalekheva vṛttāvartavivartinī || 18 ||
[Analyze grammar]

śuṣkatumbīlatevoccairākāśatarusaṃśritā |
vilolāvayavāṣṭhīvā vātaiḥ paṭapaṭāravā || 19 ||
[Analyze grammar]

bṛhattaraṅgordhvabhujā śyāmalollāsaśālinī |
ekārṇavormimāleva nṛttāvartavivartinī || 20 ||
[Analyze grammar]

kṣaṇamekabhujākārā kṣaṇaṃ bahubhujākulā |
anantograbhujā kṣipraṃ jagannartanamaṇḍapā || 21 ||
[Analyze grammar]

kṣipramekamukhākārā kṣipraṃ bahumukhākṛtiḥ |
anantogramukhī kṣipraṃ nirmukhī vāpi ca kṣaṇam || 22 ||
[Analyze grammar]

ekapādānvitā kṣipraṃ kṣipraṃ pādaśatānvitā |
kṣaṇaṃ cānantapādāḍhyā niṣpādākāriṇī kṣaṇam || 23 ||
[Analyze grammar]

kālarātririyaṃ seti mayānumitadehikā |
kālī bhagavatī seyamiti nirṇītasañcarā || 24 ||
[Analyze grammar]

jvālāpūrṇāraghaṭṭhograkhātābhanayanatrayā |
jvaladvarendranīlādrisānūpamalalāṭabhūḥ || 25 ||
[Analyze grammar]

lokālokendranīlāgraśvabhrabhīmahanudvayā |
vātaskandhaguṇaprotatārāmuktākalāpinī || 26 ||
[Analyze grammar]

indranīlādritulyorutoraṇocce prabhāsure |
viśrāntakācaśailābhabhagabhīṣaṇavāyasā || 27 ||
[Analyze grammar]

nṛtyadbhujalatāpuṣpairnakhaśubhrābhramaṇḍalaiḥ |
pūrṇacandraśatānīva bhramayantī nabhastale || 28 ||
[Analyze grammar]

bhramadbhirvyāptadikcakrā bhujaiḥ kalpāmbudairiva |
varṣadbhiḥ pāṇijaprāntatārālekhābṛhatprabhāḥ || 29 ||
[Analyze grammar]

nakhapuṣpāṅgulīvallījālairbhrāntabhujadrumaiḥ |
kṛṣṇaiḥ kānanitāśeṣagaganāgrogramūrtibhiḥ || 30 ||
[Analyze grammar]

tamālatālatanmūlamavadagdhaṃ mahānalaiḥ |
viḍambayantī calitaṃ jaṅghāsaṅghena copatā || 31 ||
[Analyze grammar]

apyanante mahāvyomni pāraṃ prāptaiśśiroruhaiḥ |
kurvāṇevātataṃ vāsavanaṃ timiradantinaḥ || 32 ||
[Analyze grammar]

uhyante meravo yena tena niśśvāsavāyunā |
ghanaghuṅghumadigvaktragaganogrāṅgaghoṣiṇā || 33 ||
[Analyze grammar]

ghanamārutaghūtkāraiḥ kṣveḍāgeyaṃ pragāyatā |
niyatānunayeneva valitāsyānuvṛttinā || 34 ||
[Analyze grammar]

tato nṛttavaśāveśādvardhamānaśarīriṇī |
mayā dṛṣṭāvadhānena gaganābhogapūriṇī || 35 ||
[Analyze grammar]

yāvattayā dhṛtā dehe helāvalanasāravā |
mālā malayakailāsasahyamandaramerubhiḥ || 36 ||
[Analyze grammar]

āsaṃstasyā yugāntābhramālikāḥ paṭṭapaṭṭikāḥ |
ādarśamaṇḍalānyagre trīṇi lokāntarāṇi ca || 37 ||
[Analyze grammar]

karṇayorhimavanmerū rupyakāñcanaputrike |
brahmāṇḍaghurghurairmālā mahatī kaṭimekhalā || 38 ||
[Analyze grammar]

srajaḥ kulācalaiśśṛṅgavanapattanagucchakāḥ |
taratpuravaradvīpagrāmapelavapallavāḥ || 39 ||
[Analyze grammar]

asyā aṅgeṣu dṛṣṭāni purāṇi nagarāṇi ca |
ṛtavaśca trayo lokā māsāhorātramālikāḥ || 40 ||
[Analyze grammar]

muktālatādikaṃ nadyaḥ kālindītripathādikāḥ |
dharmādharmāv ubhau karṇabhūṣaṇe cānyakarṇayoḥ || 41 ||
[Analyze grammar]

stanāstasyāstu catvāraḥ sravaddharmapayolavāḥ |
vedāḥ sakalaśāstrārthacatussaṃsthānacūcukāḥ || 42 ||
[Analyze grammar]

triśūlaiḥ paṭṭisaiḥ prāsaiśśaraśaktyṛṣṭimudgaraiḥ |
niryadāyudhajālāni sragdāmāni bibharti sā || 43 ||
[Analyze grammar]

caturdaśavidhā bhūtajātayo yāḥ surādikāḥ |
tasyāśśarīraśāyinyastā lomāvalayaḥ sthitāḥ || 44 ||
[Analyze grammar]

tasyāśca nagaragrāmagirayo dehaśāyinaḥ |
nṛtyantyāḥ saha nṛtyanti punarjanmamudeva te || 45 ||
[Analyze grammar]

jaṅgamātmakamevaitajjagadasthāvaraṃ tadā |
nṛtyatīti mayā jñātaṃ paraloke sukhaṃ sthitam || 46 ||
[Analyze grammar]

nigīrṇaṃ jagadaṅgasthaṃ kṛtvā tṛptimupāgatā |
parinṛtyati sā mattā jagajjīrṇāhicātakī || 47 ||
[Analyze grammar]

ādarśapratibimbasthamivābhātyakhilaṃ jagat |
tasyā vapuṣi vistīrṇe kharūpiṇi kharūpadhṛt || 48 ||
[Analyze grammar]

tajjagannartanaṃ cāru taddehādarśasaṃsthitam |
ciraṃ mayā tadā dṛṣṭamavinaṣṭaṃ purassthitam || 49 ||
[Analyze grammar]

vivalattārakājālaṃ bhramatparvatamaṇḍalam |
maṣakavyūhavadvātavyādhūtāmaradānavam || 50 ||
[Analyze grammar]

saṅgrāmonmuktacakrābhadvīpārṇavavṛtāmbaram |
helāvivalanāvartaprauḍhaśailadharātṛṇam || 51 ||
[Analyze grammar]

nīlameghāṃśukāvṛttivātaghuṅghumitāmbaram |
kāṣṭhādryasthipurāsphoṭapaṭatpaṭapaṭāravam || 52 ||
[Analyze grammar]

jagatpadārthairvyāmiśrairamiśrairmakure yathā |
vyāptamābhogibhāṅkarairaṅgai raṅgabhramaistathā || 53 ||
[Analyze grammar]

merurnṛtyati loloccakulācalabṛhadbhujaḥ |
bhramadabhrapaṭāṭopo namattarutanūruhaḥ || 54 ||
[Analyze grammar]

atyajantaḥ samudrāḥ svaṃ maryādāmudraṇaṃ drutāḥ |
bhūmernabhastalaṃ yānti nabhaso yānti bhūtalam || 55 ||
[Analyze grammar]

purāṇi ghargharārāvairdṛśyante luṭhitānyadhaḥ |
sagṛhāṭṭālavāstavyaṃ na ca kiñcil luṭhatyadhaḥ || 56 ||
[Analyze grammar]

tasyāṃ bhramantyāṃ caturaṃ candrārkā dinarātrayaḥ |
nakhāgralekhālokāntarbhānti kāñcanasūtravat || 57 ||
[Analyze grammar]

vibhānti vṛṣṭayastasyā gharmārtijalajālikāḥ |
iva nīhārahāriṇyo līlāvāridavāsasaḥ || 58 ||
[Analyze grammar]

khameva tasyāḥ sampannaṃ kavarīmaṇḍalaṃ bṛhat |
pātālaṃ caraṇā bhūmirudaraṃ bāhavo diśaḥ || 59 ||
[Analyze grammar]

dvīpābdhayo'ntrāvalayaḥ pārśukāḥ sarvaparvatāḥ |
prāṇāpānāvalīdolāḥ pavanaskandhaśālikāḥ || 60 ||
[Analyze grammar]

tadānubhūtaṃ nṛtyantyāstasyā vapuṣi vistṛte |
himavanmerusahyādyairdolāndolanamadribhiḥ || 61 ||
[Analyze grammar]

taradadriguṇāśchātā valayantyā tayā srajaḥ |
punaḥ kalpānta ārabdha iva tāṇḍavahelayā || 62 ||
[Analyze grammar]

surāsuroragānīkaromaśograśarīrikā |
nisspandaṃ sthātumaśakannāsau bhramitacakravat || 63 ||
[Analyze grammar]

nānāvibhavavijñānayajñayajñopavītinī |
sā sarantī nabhasyāsīdghanaghūtkāraghoṣiṇī || 64 ||
[Analyze grammar]

tatra bhūtalamākāśamākāśamapi bhūtalam |
pratikṛtya bhavatyantarna ca kiñcidvivartate || 65 ||
[Analyze grammar]

bṛhannāsāguhāgehanirgatā ghanaghuṅghumāḥ |
tatrogrā vāyavo vānti ghanaghūtkārakāriṇaḥ || 66 ||
[Analyze grammar]

nabhaḥ karaśataistasyāścaturāvartanartibhiḥ |
bhāti caṇḍāniloddhūtairākīrṇamiva pallavaiḥ || 67 ||
[Analyze grammar]

tadaṅgagajagadvastujātabhramaṇasambhramāt |
dṛṣṭirdhīrāpi mohe me sannā seneva saṅgare || 68 ||
[Analyze grammar]

prohyante yantravacchailā nipatanti nabhaścarāḥ |
luṭhantyamaragehāni cale taddehadarpaṇe || 69 ||
[Analyze grammar]

meravaḥ parṇavadvyūḍhā malayāḥ pallavā iva |
himādrayo himakaṇā ivorvyo'bdalatā iva || 70 ||
[Analyze grammar]

sahyā mahyāmiva khagā vindhyā vidyādharā iva |
ṛkṣavanto bhramanto'ntarāsan haṃsā ivāmbare || 71 ||
[Analyze grammar]

dvīpānyapi tṛṇānīva samudrā valayā iva |
suralokālayāḥ padmā āsaṃstaddehavāriṇi || 72 ||
[Analyze grammar]

viśadākāśasaṅkāśe svapnāñjanapuropame |
aṅge tasyā bṛhajjaṅghe piṇḍādarśasamatviṣi || 73 ||
[Analyze grammar]

vindhyo nṛtyati kāñcanācalavane sahyaśca mahyāṃ giriḥ kailāso malayo mahendraśikhare krauñcācale mandaraḥ |
gokarṇo gaganāṅgane vasumatī vidyādharāṇāṃ pure sarvā jaṅgamatāṃ gatā vanabhuvastasyāśśarīre tadā || 74 ||
[Analyze grammar]

abdhirnṛtyati parvate girirapi proccairnabhaḥkoṭare vyomāpīndudivākararkṣavalitaṃ bhūmeradhastādgatam |
sadvīpācalapattano vanagaṇaḥ protkīrṇapuṣpo divi vyālolaṃ jagadambudhāviva tṛṇaṃ dikcakrake bhrāmyati || 75 ||
[Analyze grammar]

vyomni bhramanti girayo'mbudhayo digantalokāntarāṇi purapattanamaṇḍalāni |
nadyaḥ sarāṃsi makurāntaraśeṣabaddhavātāvakīrṇatṛṇaparṇagaṇakrameṇa || 76 ||
[Analyze grammar]

matsyāścaranti ca marau varavāriṇīva vyomni sthirāṇi nagarāṇi bhuvīva bhānti |
khe bhūradho gaganamakṣayavārivāhamutpātavātaparivṛttagiristhitaṃ tat || 77 ||
[Analyze grammar]

ṛkṣotkaro bhramati dīpasahasrayantracakrabhrameṇa maṇivarṣaṇameghacāruḥ |
antarbahiśca cakitaiḥ praṇayena muktaṃ vidyādharāmaragaṇairiva puṣpavarṣam || 78 ||
[Analyze grammar]

saṃhārasarganicayā dinarātribhāge bindūpamā rajanayo divasotkarāśca |
kṛṣṇāḥ sitāśca parito'malaśuklakṛṣṇasvādarśamaṇḍalavadākulamullasanti || 79 ||
[Analyze grammar]

ratnāni bhāskaraniśākaramaṇḍalāni tārotkarāstaralakāntibhṛtaśca hārāḥ |
svacchāmbarāṇi valitāni mahāmbarāṇi kurvantyanāratamanalpamalātalekhāḥ || 80 ||
[Analyze grammar]

kalpāntakālaviluṭhattrijaganmaṇīni vyāvartanairjhagitijātajhaṇajjhaṇāni |
tejāṃsi santatatayordhvamadhaśca yānti nānāvidhāni guṇavanti vibhūṣaṇāni || 81 ||
[Analyze grammar]

saṅgrāmamattabhaṭakhaḍgamarīcivīciśyāmāyamānasakalātapavāsarāṇām |
vyāvṛttibhirviluṭhatāmapi susthirāṇāmākarṇyate kalakalo janamaṇḍalānām || 82 ||
[Analyze grammar]

brahmendraviṣṇuharavahniravīndupūrvā devāsurāḥ parivivṛttibhirāpatantaḥ |
anyo'nyameva vividhā upayānti yānti vātāvadhūtamaṣakāśanivibhrameṇa || 83 ||
[Analyze grammar]

saṃhārasargasukhaduḥkhabhavābhavehānīhāniṣedhavidhijanmamṛtibhramādyāḥ |
sārdhaṃ pṛthakca vilasanti sadaiva sarve vyāmiśratāmupagatā api tatra bhāvāḥ || 84 ||
[Analyze grammar]

bhāvodbhavasthitivipatkaraṇabhramāṇāṃ saṃhārasargabhuvanāvanivibhramāṇām |
mithyaiva khe prakacatāṃ khaśarīrakāṇāṃ saṃlakṣyate'tra na manāgapi nāma saṅkhyā || 85 ||
[Analyze grammar]

utpātaśāntimaraṇotsavayuddhasāmyavidveṣarāgabhayaviśvasanādi tatra |
ekatra kośa iva ratnacayo vibhāti nānārasāpratighasargaparamparaṃ tat || 86 ||
[Analyze grammar]

tasyāścidambaramaye vapuṣi svabhāvabhūtāḥ sphuṭānubhavabhāvajagadvyavasthāḥ |
sargakṣayā malinadṛkkalitāmbarasthakeśoṇḍukasphuraṇavatparitaḥ sphuranti || 87 ||
[Analyze grammar]

jagatsaṅksubdhamakṣubdhaṃ dṛśyate'sthitisaṃsthiti |
sañcālyamānamakurapratibimba iva sthitam || 88 ||
[Analyze grammar]

nṛttasthapūtā apyantarjagadarthāḥ pratikṣaṇam |
sthitiṃ tyajanti gṛhṇanti bālasaṅkalpasargavat || 89 ||
[Analyze grammar]

kriyāśaktiśarīre'ntaḥ pūyamānā anāratam |
rāśībhūya viśīryante jaganmudgakaṇotkarāḥ || 90 ||
[Analyze grammar]

kṣaṇamālakṣyate kiñcinna kiñcidapi sā kṣaṇam |
kṣaṇamaṅguṣṭhamātraiva kṣaṇamākāśapūriṇī || 91 ||
[Analyze grammar]

yasmātsā kalanā devī saṃvicchaktirjaganmayī |
anantā paramākāśakośaśuddhaśarīriṇī || 92 ||
[Analyze grammar]

kālatrayasthitajagattritayāmbarāṅgī citsā tathā kacati tena tathāsthitena |
rūpeṇa citrakṛdudāramanassthacitrasaṃsārajālasadṛśena kacajjavena || 93 ||
[Analyze grammar]

sargātmakaṃ vapuranekacidātmakatvātsaṃśāntakhaikavapurekavidātmakatvāt |
ekaṃ nimeṣaṇasamunmiṣitaikarūpaṃ sā bibhratī vapuranantamanādi bhāti || 94 ||
[Analyze grammar]

tasyāṃ vibhāti tadanantaśilātmakośalekhābjacakraracanādivadeva dṛśyam |
vyomātmakaṃ gaganamātraśarīravatyāṃ cittvāddravājjaladhikośa ivormilekhāḥ || 95 ||
[Analyze grammar]

mahatī bhairavī devī nṛtyataḥ pūritāmbarā |
tasya kalpāntarudrasya sā puro bhairavākṛteḥ || 96 ||
[Analyze grammar]

sirāmarmāśritogrāgnidagdhasthāṇuvanāvaniḥ |
kalpāntavātavyādhūtā vanamāleva nṛtyati || 97 ||
[Analyze grammar]

kuṇālolūkhalabṛsīhalaśūrpakaraṇḍakaiḥ |
musulodañcanasthālīkumbhasragdāmadhāriṇī || 98 ||
[Analyze grammar]

evaṃvidhānāṃ sragdāmajālānāṃ kusumotkaram |
kirantī saṃsṛjantī ca nṛttakṣubdhākṣayaṃ tatam || 99 ||
[Analyze grammar]

vandyamānastayā so'pi tathaivākāśabhairavaḥ |
tathaiva vitatākārastadoccaiḥ parinṛtyati || 100 ||
[Analyze grammar]

ḍimbaṃ ḍimbaṃ kuḍimbaṃ paca mana ḍuha mā jham prajham praṃ prajham praṃ tṛllaṃ tṛllaṃ tṛtṛllaṃ tṛkhalu khalumayaṃ khaṅkhamaṃ khaṅkhamaṅkham |
guṃ haṃ guṃ haṃ tu guṃ haṃ guḍulaḍuḍumuḍaṃ ḍāḍimāḍiṃ ḍuḍeti nṛtyantī śabdavādyaiḥ pralayapitṛvane śreyase vo'stu kālī || 101 ||
[Analyze grammar]

baddhvā khaṭvāṅgaśṛṅge kapilamurujaṭāmaṇḍalaṃ padmayoneḥ kṛtvā daityottamāṅgaiḥ srajamurasi śiraśśekharaṃ tārkṣyapakṣaiḥ |
pūrṇaṃ raktāsavānāṃ yamamahiṣamahāśṛṅgamādāya pāṇau pāyādvo vandyamānaḥ pralayamuditayā bhairavaḥ kālarātryā || 102 ||
[Analyze grammar]