Chapter 237

vāsanābhāvapratipādanaṃ nāma sargaḥ |
saptatriṃśaduttaradviśatatamaḥ sargaḥ |
vasiṣṭhaḥ |
iti te sarva āyātā brahmalokanivāsinaḥ |
adṛśyatāmeva gatā dīpāḥ kṣīṇadaśā iva || 1 ||
[Analyze grammar]

atha te dvādaśādityā brahmaṇi brahmatāṃ gate |
jagadvadbrahmalokaṃ tamadahanbhāsurārciṣaḥ || 2 ||
[Analyze grammar]

vairiñcanagaraṃ dagdhvā dhyānaṃ kṛtvā viriñcavat |
te'pi nirvāṇamājagmurnissnehadaśadīpavat || 3 ||
[Analyze grammar]

tata ekārṇavāpūro viriñcanagarāntaram |
rātrau bhuvamiva dhvāntaṃ pūrayāmāsa sūrmimān || 4 ||
[Analyze grammar]

ābrahmalokamabhavajjagadāpūrṇamarṇasā |
tulyaṃ rasaikapūrṇena pakvadrākṣāphalena tat || 5 ||
[Analyze grammar]

tata ūrmigirivrātavegairāvalitākhilaiḥ |
vicchinnāḥ kalpajaladā jala eva vililyire || 6 ||
[Analyze grammar]

etasminnantare tatra dṛṣṭavānahamambarāt |
yāvadabhyutthitaṃ bhīmaṃ bhūtaṃ kiñcinnabho'ntarāt || 7 ||
[Analyze grammar]

kalpāntajaladākāraṃ kṛṣṇamāpūritāmbaram |
ākalpaṃ sambhṛtaṃ naiśaṃ dehenevotthitaṃ tamaḥ || 8 ||
[Analyze grammar]

taruṇādityalakṣāṇāṃ teja ābhāsuraṃ dadhat |
ādityatrayasaṅkāśaiḥ sthiravidyuttrayolbaṇaiḥ || 9 ||
[Analyze grammar]

netrairābhāsuramukhaṃ jvālāpuñjān samudgirat |
pañcānanaṃ daśabhujaṃ trinetraṃ śūlapāṇikam || 10 ||
[Analyze grammar]

amāntamantamukte'pi vyomnīva vitatākṛtim |
khamivāsivaraśyāmaṃ dehamādāya saṃsthitam || 11 ||
[Analyze grammar]

sthitamekārṇavāpūrṇādbrahmāṇḍādbahirambare |
vyomeva hastapādādisanniveśena lakṣitam || 12 ||
[Analyze grammar]

ghoṇānilaparāvṛttividhutaikamahārṇavam |
govindamiva dordaṇḍakṣobhitakṣīrasāgaram || 13 ||
[Analyze grammar]

kalpārṇavajalāpūraṃ puṃstveneva samutthitam |
mūrtiyuktamahaṅkāramakāraṇakamāgatam || 14 ||
[Analyze grammar]

kulācalabṛhadvṛndamivoḍḍayanaḍambaraiḥ |
pakṣaughairutthitaṃ vyoma samastamabhipūrayat || 15 ||
[Analyze grammar]

tatastriśūlanayanairmayā rudro'yamityasau |
dūrādeva parijñāya parameśo namaskṛtaḥ || 16 ||
[Analyze grammar]

rāmaḥ |
kiṃ sa tādṛgvidho rudraḥ kiṃ kṛṣṇaḥ kiṃ mahākṛtiḥ |
kiṃ pañcavadanaḥ kasmāddaśabāhuḥ kva tiṣṭhati || 17 ||
[Analyze grammar]

kiṃ trinetraḥ kimugrātmā kimekaḥ kiṃprayojanaḥ |
keneritaḥ kimakarotkvāyāsīdvada me mune || 18 ||
[Analyze grammar]

vasiṣṭhaḥ |
kākutstha rudranāmāsāvahaṅkārastathotthitaḥ |
viṣamaikābhimānātmā mūrtirasyāmalaṃ nabhaḥ || 19 ||
[Analyze grammar]

vyomākṛtiḥ sa bhagavānvyomavarṇāmalo mahān |
cidvyomamātrasāratvādākāśātmā sa ucyate || 20 ||
[Analyze grammar]

sarvabhūtātmabhūtatvātsarvagatvānmahākṛtiḥ |
yāni tasyānuṣaktāni pañcajñānendriyāṇyalam || 21 ||
[Analyze grammar]

tāni tasya mukhānyāhustapadrūpāṇi sarvataḥ |
karmendriyāṇi viṣayāste hi tasya bhujā daśa || 22 ||
[Analyze grammar]

sarvabhūtabharaiḥ sārdhaṃ brahmaṇā parameyuṣā |
yadāsau samparityaktastadāsau mūrtimāgataḥ || 23 ||
[Analyze grammar]

sa cākāśaikarūpātmā nāsti tasya hi sākṛtiḥ |
tathā dṛśyata evāsau bhrāntimātraṃ na mūrtimān || 24 ||
[Analyze grammar]

cidākāśagate sphāre bhūtākāśe sa tiṣṭhati |
dehe ca sarvabhūtānāṃ nityaṃ vāyuriveśvaraḥ || 25 ||
[Analyze grammar]

sarvabhūtaparityaktastasmin kāle khamūrtimān |
kṣobhametya kṣaṇaṃ kṣīṇaḥ paramāṃ śāntimeṣyati || 26 ||
[Analyze grammar]

ye guṇā ye trayaḥ kālāścittāhaṅkārabuddhayaḥ |
praṇavasya ca ye varṇā ye ca vedāstathā trayaḥ || 27 ||
[Analyze grammar]

rudrasya tasya te netrasanniveśena saṃsthitāḥ |
triśūlaṃ tena trailokyaṃ gṛhītaṃ karakoṭare || 28 ||
[Analyze grammar]

yasmāttadvyatirekeṇa sarvabhūtagaṇeṣvapi |
anyanna vidyate kiñciddehātmaiva tataḥ sthitaḥ || 29 ||
[Analyze grammar]

sargasattopalambhātmā svabhāvo'sya prayojanam |
īritaśśivarūpeṇa cinmātrākāśarūpiṇā || 30 ||
[Analyze grammar]

tenaiva ca nigīrṇaḥ sanparamāṃ śāntimeṣyati |
nirmalākāśarūpātmā kṛṣṇa ityeṣa īśvaraḥ || 31 ||
[Analyze grammar]

kṛtvākalpaṃ jagatsarvaṃ tatpītvaikārṇavaṃ tadā |
samprayāti parāṃ śāntimabhūyassannivṛttaye || 32 ||
[Analyze grammar]

anantaraṃ mayā dṛṣṭastatrāsau yāvadudyamāt |
pravṛttaḥ prāṇavegena tamākraṣṭuṃ mahārṇavam || 33 ||
[Analyze grammar]

atha tasya mukhaṃ sphāraṃ jvālāmālākulāntaram |
prāṇakṛṣṭo mahāmbhodhirvāḍavāgnimivāviśat || 34 ||
[Analyze grammar]

sa eva vāḍavo bhūtvā vahnirākalpamarṇave |
ahaṅkāraḥ pibatyambu rudraḥ sarvaṃ tu tattadā || 35 ||
[Analyze grammar]

pātālamiva pānīyaṃ sarpo bilamiva kṣaṇāt |
caṇḍavāyurivākāśamaviśattanmukhaṃ javāt || 36 ||
[Analyze grammar]

samudetyāpibad rudraḥ sa muhūrtena tatpayaḥ |
kṛṣṇāṅgo'rka iva dhvāntaṃ satsamparka ivāguṇam || 37 ||
[Analyze grammar]

ābrahmalokapātālaṃ śāntaṃ śūnyamathābhavat |
rajodhūmānilāmbhodabhūtamuktaṃ samaṃ nabhaḥ || 38 ||
[Analyze grammar]

kevalaṃ tatra dṛśyante catvāro vyomanirmalāḥ |
ime padārthā nisspandāśśṛṇu tān raghunandana || 39 ||
[Analyze grammar]

ekastāvadasau madhye rudraḥ kṛṣṇāmbarākṛtiḥ |
nirādhāraḥ sthito vyomni nisspando'mbhodhibimbavat || 40 ||
[Analyze grammar]

dvitīyo'vasthito dūre pṛthvyākāśatalopamaḥ |
bhāgo brahmāṇḍasadanasyādhaḥ pātālasaptakāt || 41 ||
[Analyze grammar]

pātālabhūtaladivāṃ saśailendradivaukasām |
vyāptiḥ pārthivabhāgena paṅkamātrātmanā manāk || 42 ||
[Analyze grammar]

tṛtīyo'tra padārtho'bhūdūrdhvaṃ brahmāṇḍabhāgabhūḥ |
dṛṣṭikṣayātsa dūratvāl lakṣyate gaganāsitaḥ || 43 ||
[Analyze grammar]

dūraviśliṣṭayormadhyaṃ yattadbrahmāṇḍakhaṇḍayoḥ |
tadākāśamanādyantaṃ brahma nirmalamātatam || 44 ||
[Analyze grammar]

caturtho'sau padārthastu tadā saṃlakṣito mayā |
catuṣṭayādṛte nānyadetasmādeva kiñcana || 45 ||
[Analyze grammar]

rāmaḥ |
bahiḥ kiṃ vidyate brahmanbrahmasadmakavāṭataḥ |
kāstatrāvaraṇā brūhi kiyatyaḥ saṃsthitāḥ katham || 46 ||
[Analyze grammar]

vasiṣṭhaḥ |
brahmāṇḍakhaṇḍayoḥ pāre tato daśaguṇaṃ jalam |
sandhyākāśamanantaṃ taṃ varjayitvātataṃ sthitam || 47 ||
[Analyze grammar]

tatastathaiva jvālātma tejo daśaguṇaṃ sthitam |
tatastathaiva pavanaḥ pāvano nirmalaḥ sthitaḥ || 48 ||
[Analyze grammar]

tatastathaiva vimalaṃ nabho daśaguṇaṃ sthitam |
tataḥ paramamatyacchaṃ brahmākāśamanantakam || 49 ||
[Analyze grammar]

anyatrānyatra tasyātha dṛṣṭayo'nyāstathaiva khe |
kacantyasaṅkhyā dūrasthā mitho'dṛṣṭātmasṛṣṭayaḥ || 50 ||
[Analyze grammar]

rāmaḥ |
ūrdhve brahmāṇḍakhaṇḍasya tasyādhastānmunīśvara |
tajjalādi mahākāraṃ kva kathaṃ kena dhāryate || 51 ||
[Analyze grammar]

vasiṣṭhaḥ |
sa pārthivaḥ padārthānāṃ sthitaḥ kaḍḍhakaratnavat |
bhāgāstameva dhāvanti te sutā mātaraṃ yathā || 52 ||
[Analyze grammar]

ato yadeva nedīyo brahmāṇḍākhyaṃ mahīvapuḥ |
tatpadārthāḥ pradhāvanti tṛṣitāḥ salilaṃ yathā || 53 ||
[Analyze grammar]

avalambya tadevātaḥ saṃsthitāste jalādayaḥ |
na sthitiṃ pravimuñcanti svāṃ yathāvayavā iva || 54 ||
[Analyze grammar]

rāmaḥ |
brahmanbrahmāṇḍakhaṇḍe te tiṣṭhataḥ kathamucyatām |
kimākṛtī dhṛte kena kathaṃ vā parinaśyataḥ || 55 ||
[Analyze grammar]

vasiṣṭhaḥ |
adhṛtaṃ dhṛtamevoccairapataccaiva vā patat |
anākṛtyeva sākāraṃ jagatsvapnapuraṃ yathā || 56 ||
[Analyze grammar]

kimasya nāma patati kiṃ vā kenāsya dhāryate |
yathā saṃvittikacanaṃ tathaitadavatiṣṭhate || 57 ||
[Analyze grammar]

yathā keśoṇḍukaṃ vyomni yathā vyomani śūnyatā |
yathā vā pavane spando jagaccidgagane tathā || 58 ||
[Analyze grammar]

citau saṅkalpanagaraṃ brahmāṇḍākhyaṃ jagadgṛham |
khe khamevātyanākāramatyākāramiva sthitam || 59 ||
[Analyze grammar]

pātasaṃvitsamudbhūtaṃ patadāste divāniśam |
utpatantyā vidodbhūtamutpataccaiva tiṣṭhati || 60 ||
[Analyze grammar]

sthitisaṃvitsamudbhūtaṃ sthitamāste divāniśam |
gacchantyā saṃvidodbhūtaṃ gacchadāste divāniśam || 61 ||
[Analyze grammar]

eti nāśavidā nāśaṃ mahākalpādivedanaiḥ |
jāyate janmasaṃvittyā vyomni sargādivedanaiḥ || 62 ||
[Analyze grammar]

ābhāti mauktikagaṇaśśaradambarāntardṛṣṭāvasatya udito'pyatisatyarūpaḥ |
bhrāntyā yathā nabhasi visphuratāṃ tathaiṣāṃ saṅkhyāṃ vidhātumiha ko jagatāṃ samarthaḥ || 63 ||
[Analyze grammar]