Chapter 227

sargāntaraprāptirnāma sargaḥ |
saptaviṃśatyuttaradviśatatamaḥ sargaḥ |
anyajagadbrahmā |
adyāhaṃ cinmayākāśastvanyākāśamayīṃ sthitim |
parāṃ grahītumicchāmi tenehopasthitaḥ kṣayaḥ || 1 ||
[Analyze grammar]

mahāpralayakāle'smiṃstyaktumeṣā mayādhunā |
munīndra nūnamārabdhā tena vairasyamāgatā || 2 ||
[Analyze grammar]

ākāśatvād yadādyāyaṃ parākāśo bhavāmyaham |
tadā mahāpralayatā vāsanāyāśca saṅkṣayaḥ || 3 ||
[Analyze grammar]

tenaiṣā virasībhūtā manmārgamabhidhāvati |
nānugacchati ko nāma nirmātāramudāradhīḥ || 4 ||
[Analyze grammar]

ihādyāyaṃ kalerantaścaturyugaviparyayaḥ |
prajāmanvindradevānāmadyaivānto'yamāgataḥ || 5 ||
[Analyze grammar]

adyaiva cāyaṃ kalpānto mahākalpānta eva ca |
mamāyaṃ vāsanānto'dya dehavyomānta eva ca || 6 ||
[Analyze grammar]

teneyaṃ vāsanā brahman kṣayaṃ gantuṃ samudyatā |
kveva padmākarāśoṣe gandhalekhāvatiṣṭhatām || 7 ||
[Analyze grammar]

yathā jalābdhilekhāyā jāyate laharī calā |
vāsanāyāstathaivecchā mudhodetyapakāraṇam || 8 ||
[Analyze grammar]

ābhimānikadehāyā vāsanāyāḥ svabhāvataḥ |
asyā ātmāvalokecchā svayamevopajāyate || 9 ||
[Analyze grammar]

ātmatattvaṃ tvapaśyantyā dhāraṇābhyāsayogataḥ |
dṛṣṭo'nayā bhavatsargo vargavyagrānirargalaḥ || 10 ||
[Analyze grammar]

anayāmbarasañcāraparayādriśiraśśilā |
dṛṣṭā svajagadādhārabhūtāsmākaṃ tu khātmikā || 11 ||
[Analyze grammar]

etadasmajjagad yatra taddṛṣattvajjagadgirau |
asmajjagatpadārtheṣu santyanyāni jagantyapi || 12 ||
[Analyze grammar]

vayaṃ tāni na paśyāmo bhedadṛṣṭau sthitā ime |
bodhaikatāṃ gatāstvāśu paśyāmastāni vīkṣaṇāt || 13 ||
[Analyze grammar]

ghaṭe paṭe vaṭe kuḍye khe'nile'mbhasi tejasi |
jaganti santi sarvatra śilāyāmiva sarvadā || 14 ||
[Analyze grammar]

jagannāma mudhābhrāntiḥ kila svapnapuropamā |
mithyaiveyaṃ kva nāmāsau cidrūpāstyatha nāsti vā || 15 ||
[Analyze grammar]

parijñātā satī yeṣāṃ saiṣā cinnabhasaikatām |
gatā te na vimuhyanti śiṣṭāstu bhramabhājanam || 16 ||
[Analyze grammar]

athānyadhāraṇābhyāsātsvavirāgavaśoditam |
sādhayantyārthamātmīyaṃ dṛṣṭastvamanayā mune || 17 ||
[Analyze grammar]

iti māyeva duṣpārā cicchaktiḥ parijṛmbhate |
iyamādyantarahitā brāhmī śaktiranāmayā || 18 ||
[Analyze grammar]

pravartante nivartante neha kāryāṇi kānicit |
dravyakālakriyoddyotā citistapati kevalam || 19 ||
[Analyze grammar]

deśakālakriyādravyamanobuddhyādikaṃ tvidam |
cicchilāṅgakamevaikaṃ viddhyanastamayodayam || 20 ||
[Analyze grammar]

cideveyaṃ śilākāramiva tiṣṭhati bibhratī |
aṅgamasyā jagajjālaṃ marutaḥ spandanaṃ yathā || 21 ||
[Analyze grammar]

vijñānaghanamātmānaṃ jagadityavabudhyate |
anādyantāpi sādyantaṃ cittvādatigatāpi cit || 22 ||
[Analyze grammar]

cicchileyamanādyantā sādyantāsmīti bodhataḥ |
sākārāpi nirākārā jagadaṅgeti saṃsthitā || 23 ||
[Analyze grammar]

yadvatsvapne cideva svaṃ rūpaṃ vyomaiva pattanam |
vetti tadvadiyaṃ vetti pāṣāṇaṃ jagadaṅgakam || 24 ||
[Analyze grammar]

na sarantīha sarito na cakraṃ parivartate |
nārthāḥ pariṇamantyantaḥ kacatyetaccidambaram || 25 ||
[Analyze grammar]

na mahākalpakalpāntasaṃvidaḥ saṃvidambare |
sambhavanti pṛthagrūpāḥ payasīva payo'ntaram || 26 ||
[Analyze grammar]

jaganti santyeva na santi śānte cidambare sarvagataikamūrtau |
nabho'ntarāṇīva mahānabho'ntaścetsanti tattāni parāmbarāṇi || 27 ||
[Analyze grammar]

vasiṣṭha tadgaccha mune jagatsvaṃ tvaṃ vāsane samprati śāntimehi |
buddhyādirūpāṇi paraṃ vrajantu vayaṃ bṛhadbrahmapadaṃ vrajāmaḥ || 28 ||
[Analyze grammar]