Chapter 224

vidyādharīśilāntaravarṇanaṃ nāma sargaḥ |
caturviṃśatyuttaradviśatatamaḥ sargaḥ |
vidyādharī |
yāvastaṃ sargamāgaccha prasādaḥ kriyatāṃ mune |
āścaryeṣūpapanneṣu mahānto hyatikautukāḥ || 1 ||
[Analyze grammar]

vasiṣṭhaḥ |
tayetyukte mayā sārdhaṃ gantumārabdhamambare |
vātyayā saurabheṇeva śūnye śūnyena śūnyayā || 2 ||
[Analyze grammar]

athāhaṃ dūramadhvānaṃ śūnyamullaṅghya nābhasam |
nābhasaṃ bhūtasañcāraṃ tayā sārdhamavāptavān || 3 ||
[Analyze grammar]

tamullaṅghya cireṇātra bhūtasañcāramāmbaram |
lokālokaśirovyoma prāpto'smi dhavalāmbudam || 4 ||
[Analyze grammar]

uttarāśenduśubhrābhrapīṭhānnirgatya tāṃ śilām |
ānīto'smi tayottuṅgāṃ taptakāñcanakalpitām || 5 ||
[Analyze grammar]

yāvatpaśyāmyahaṃ śubhrāṃ śilāmeva na tajjagat |
kaladhautamayīmuccairagnilokataṭīmiva || 6 ||
[Analyze grammar]

tadā mayoktā sā kāntā kva bhavatsargabhūriti |
kva candrārkāgnitārādi kva lokāntarasaptakam || 7 ||
[Analyze grammar]

kvārṇavākāśakakubhaḥ kvonmajjananimajjane |
kva mahāmbhodasambhāraḥ kva tārāmbaraḍambaram || 8 ||
[Analyze grammar]

kva śailaśikharaśreṇyaḥ kva mahārṇavabhūmikāḥ |
kva dvīpāvalayaḥ sapta kva taptakanakāvaniḥ || 9 ||
[Analyze grammar]

kva kāryakālakalanāḥ kva bhūtabhuvanabhramaḥ |
kva vidyādharagandharvāḥ kva narāmaradānavāḥ || 10 ||
[Analyze grammar]

kvarṣibhūpālamunayaḥ kva nayāpanayakramaḥ |
kva yāmāyāmayāminyaḥ kva svarganarakabhramaḥ || 11 ||
[Analyze grammar]

kva puṇyapāpakalanāḥ kva kalākālakelayaḥ |
kvāsurāmaravairāṇi kva dveṣasneharītayaḥ || 12 ||
[Analyze grammar]

vadatyevaṃ mayi vacaḥ sovāca varavarṇinī |
vismayākulamālokya śilāmalivilocanā || 13 ||
[Analyze grammar]

vidyādharī |
paśyāmyakhilamātmīyamahaṃ sargamihopale |
makurapratibimbasthapurānyapuravatpuraḥ || 14 ||
[Analyze grammar]

nityānubhava evātra darśane kāraṇaṃ mama |
tadabhāvo mune manye te kāraṇamadarśane || 15 ||
[Analyze grammar]

anyo'nyacirakālaikadvaitasaṅkathayānayā |
śuddhātivāhikaikātmyadehatā vismṛtāvayoḥ || 16 ||
[Analyze grammar]

mamātisucirābhyastamapi śyāmalatāmiva |
gataṃ nijaṃ jagadidaṃ yataḥ paśyāmi na sphuṭam || 17 ||
[Analyze grammar]

abhūd yatsvajagatpūrvamatiprakaṭameva me |
tatpaśyāmīdamādarśa iva bimbitamasphuṭam || 18 ||
[Analyze grammar]

ciravyarthotthayā nāthasaṅkathāvyathayā mithaḥ |
svāsthyaṃ vismṛtamātmīyamavadātatamaṃ tatam || 19 ||
[Analyze grammar]

yo'bhyāsaḥ prakacatyantaśśuddhacinnabhaso rasāt |
bhavettanmayamevāntarābālamiti lakṣyate || 20 ||
[Analyze grammar]

na tacchāstraṃ na sā siddhirna sa nyāyo na sā kalā |
astyanastamitodyogād yadabhyāsānna sidhyati || 21 ||
[Analyze grammar]

svajagatsantatābhyāsavaśato māṃ kathābhramaḥ |
nūnamākrāntavāneṣa dvayorhi balavāñjayī || 22 ||
[Analyze grammar]

iṣṭavastvarthināṃ tajjñasūpadiṣṭena karmaṇā |
paunaḥpuṇyena karaṇānnetaraccharaṇaṃ mune || 23 ||
[Analyze grammar]

ayamitthamihājñānabhramaḥ prauḍho'hamātmakaḥ |
śāmyati jñānacarcābhiḥ paśyābhyāsavijṛmbhitam || 24 ||
[Analyze grammar]

ajño'pi tajjñatāmeti śanaiśśailo'pi cūrṇyate |
ghuṇo'pyatti mahāvṛkṣaṃ paśyābhyāsavijṛmbhitam || 25 ||
[Analyze grammar]

ahaṃ śiṣyābalā bālā paśyāmi tvaṃ na paśyasi |
sarvajño'pi śilāsargaṃ paśyābhyāsavijṛmbhitam || 26 ||
[Analyze grammar]

itthaṃ nāma pariprauḍhā mithyājñānaviṣūcikā |
śāmyatyeva vicāreṇa paśyābhyāsavijṛmbhitam || 27 ||
[Analyze grammar]

abhyāsena kaṭudravyaṃ bhavatyabhimataṃ mune |
anyasmai rocate nimbaṃ tvanyasmai madhu rocate || 28 ||
[Analyze grammar]

abandhau ghanatāmeti naikaṭyābhyāsayogataḥ |
yātyanabhyāsato dūrātsneho bandhuṣu tānavam || 29 ||
[Analyze grammar]

ātivāhikadeho'yaṃ śuddhacidvyoma kevalam |
ādhibhautikatāmeti bhāvanābhyāsayogataḥ || 30 ||
[Analyze grammar]

ādhibhautikadeho'sau dhāraṇābhyāsabhāvanāt |
vihaṅgavatkhamabhyeti paśyābhyāsavijṛmbhitam || 31 ||
[Analyze grammar]

puṇyāni yānti vaiphalyaṃ vaiphalyaṃ yānti mātaraḥ |
bhāgyāni yānti vaiphalyaṃ nābhyāsastu kadācana || 32 ||
[Analyze grammar]

dussādhāḥ siddhimāyānti ripavo yānti mitratām |
viṣāṇyamṛtatāṃ yānti santatābhyāsayogataḥ || 33 ||
[Analyze grammar]

yenābhyāsaḥ parityakta iṣṭe vastuni so'dhamaḥ |
kadācinna tadāpnoti vandhyā svatanayaṃ yathā || 34 ||
[Analyze grammar]

yadatyabhimataṃ vastu svabhyāso na tadarjanāt |
tadyuktipūrvakaṃ tyājya ā mṛtyorjīvitaṃ yathā || 35 ||
[Analyze grammar]

iṣṭe vastuni nābhyāsaṃ yaḥ karoti narādhamaḥ |
so'niṣṭāniṣṭamāpnoti narakānnarakāntaram || 36 ||
[Analyze grammar]

taranti saritaṃ sphārāṃ saṃsārīṃ sārasevinaḥ |
ta evātmavicārākhyamabhyāsaṃ na tyajanti ye || 37 ||
[Analyze grammar]

abhyāsabhāso'bhimataṃ vastu prakaṭayantyalam |
prāpayanti ca nirvighnaṃ ghaṭaṃ dīpaprabhā yathā || 38 ||
[Analyze grammar]

yathā kalpadrumalatāḥ sucintāmaṇayo yathā |
phalanti śaradaścaitāstathaivābhyāsabhūmayaḥ || 39 ||
[Analyze grammar]

iṣṭavastu cirābhyāsabhāsvānbhāsayati prajāḥ |
tathendriyākhyāṃ dehorvyāṃ rātriṃ paśyanti no yathā || 40 ||
[Analyze grammar]

sarvasya jantujātasya sarvavastvavabhāsane |
sarvadaivaika evoccairjayatyabhyāsabhāskaraḥ || 41 ||
[Analyze grammar]

caturdaśavidhāyāstu bhūtajāterna kasyacit |
sidhyatyabhimataṃ vastu vinābhyāsamakṛtrimam || 42 ||
[Analyze grammar]

paunaḥpuṇyena karaṇamabhyāsa iti kathyate |
puruṣārthaḥ sa eveha tenāsti na vinā gatiḥ || 43 ||
[Analyze grammar]

dṛḍhābhyāsavidhānena yatnanāmnā svakarmaṇā |
nijavedanajenaiva siddhirbhavati nānyathā || 44 ||
[Analyze grammar]

abhyāsabhāsvati tapatyavanau vane ca vīrasya sidhyati na yanna tadasti kiñcit |
abhyāsato bhuvi bhayānyabhayībhavanti sarvāsu parvataguhāsvapi nirjanāsu || 45 ||
[Analyze grammar]