Chapter 223

vidyādharījanmavyavahārakathanaṃ nāma sargaḥ |
trayoviṃśatyuttaradviśatatamaḥ sargaḥ |
vasiṣṭhaḥ |
athetyuktavatī pṛṣṭā sā mayā kalpitāsanā |
saṅkalpitāsanenāśu sthitena nabhasi sthitā || 1 ||
[Analyze grammar]

kathaṃ śilodare bāle tvadvidhānāṃ bhavetsthitiḥ |
kathaṃ sañcalanaṃ tatra kimarthaṃ tatra vāspadam || 2 ||
[Analyze grammar]

vidyādharī |
mune yathedaṃ bhavatāṃ jagatsphāraṃ virājate |
tathāsmākaṃ jagattatra sargasaṃhārayuksthitam || 3 ||
[Analyze grammar]

yathehemāstathā tatra trailokyasthitayaḥ sthitāḥ |
vahanti saritaḥ sphārā nivasantyambare'marāḥ || 4 ||
[Analyze grammar]

sphuranti nāgāḥ pātāle tiṣṭhantyātmani parvatāḥ |
āpaśchalacchalāyante vahanti vyomni vāyavaḥ || 5 ||
[Analyze grammar]

arṇavā arṇasā bhānti yāntyantaṃ śanakaiḥ prajāḥ |
bhūtānyajasraṃ jāyante mriyante'virataṃ tathā || 6 ||
[Analyze grammar]

vānti vātā vahantyāpo bhānti cābhānti khe surāḥ |
tiṣṭhantyagāḥ samudyanti grahāḥ pānti mahīṃ nṛpāḥ || 7 ||
[Analyze grammar]

devāsuramanuṣyāṇāṃ vyavahāraparamparāḥ |
lolāḥ pravṛttā ākalpamāsamudramivāpagāḥ || 8 ||
[Analyze grammar]

dinapadmāni bhūlokasarasyākalpamānabhaḥ |
lolābhrālīni phullāni mīlitonmīlitānyalam || 9 ||
[Analyze grammar]

candraścarcāṃ caturdikkaṃ candanenātmatejasā |
racayan rātrirohiṇyostamo hantyapi hṛdgatam || 10 ||
[Analyze grammar]

svadaśāsvādanaratā vātayantrapracāritā |
rodassadmani sūryākhyā dīpyate divi dīpikā || 11 ||
[Analyze grammar]

brahmasaṅkalpito'ruddho vātasañcāravāribhiḥ |
khe'niśaṃ cakramṛkṣāṇāṃ ghuṇāvarto vivartate || 12 ||
[Analyze grammar]

bhūtataṇḍulamā sṛṣṭeḥ pinaṣṭi dhruvakīlakaḥ |
niyatyā cālito rodaḥkavāṭo'mbhodaghargharaḥ || 13 ||
[Analyze grammar]

dvīpābdhiśailairbhūpīṭhaṃ vimānanagarairnabhaḥ |
daityadānavanāgaughaiḥ pūrṇaṃ pātālamaṇḍalam || 14 ||
[Analyze grammar]

kuṇḍalaṃ trijagallakṣmyā nīlaṃ ākāśamaṇḍalam |
sthitaṃ cañcalamācāracañcalāyāḥ sphuranmaṇi || 15 ||
[Analyze grammar]

buddhyādirahitāṃ spandasaṃvidaṃ vāyavīmiva |
sthāvaraṃ jaṅgamaṃ caiva sūkṣmāmādāya jāyate || 16 ||
[Analyze grammar]

munirmaunairdharā vārbhirmārutaiḥ kapicāpalam |
ākāśairavakāśitvaṃ tejobhirbhāsanaṃ śritam || 17 ||
[Analyze grammar]

vṛksorvyabdhyadrikhanṝṇāṃ prāṇino'ntaḥ sphurantyalam |
mṛtijanmonmukhāḥ kīṭasurāsurajalaukasaḥ || 18 ||
[Analyze grammar]

sasurāsuragandharvāḥ kālaḥ kalayate prajāḥ |
dorbhiḥ kalpayugābdaiśśvaśśvaḥ paśūniva pālakaḥ || 19 ||
[Analyze grammar]

anantavipulāgādhagambhīre kālasāgare |
utpatyotpatya līyante ṛtvāvartavivṛttayaḥ || 20 ||
[Analyze grammar]

caturdaśavidhā vātavellitā bhūtapāṃsavaḥ |
nāśākāśe vilīyante śaradambhodalīlayā || 21 ||
[Analyze grammar]

bhuvanaṃ bodhayantī dyauścandrārkakaracāmaraiḥ |
sthitākāśāṃśukākalpaṃ tārakotkaraśekharā || 22 ||
[Analyze grammar]

sthitāḥ pavanabhūkampameghatāpasahiṣṇavaḥ |
svaṃ pradeśamanujjhantyaḥ kakubhaḥ stambhitā iva || 23 ||
[Analyze grammar]

utpātameghanirhrādabhūmikampagrahagrahaiḥ |
ajñātairapi vijñātairbhūtānāṃ jñāyate gatiḥ || 24 ||
[Analyze grammar]

saptānāṃ jalamabdhīnāmaurvāgniḥ pibati jvalan |
lokāntarāṇāmākalpaṃ kālo bhūtagaṇaṃ yathā || 25 ||
[Analyze grammar]

pātālamāviśati yāti nabho vilaṅghya diṅmaṇḍalaṃ bhramati bhūtagaṇaḥ samantāt |
paryeti parvatamahārṇavamaṇḍalāni dvīpāntarāṇi ca marutsaraṇakrameṇa || 26 ||
[Analyze grammar]