Chapter 218

jagadvṛndavarṇanaṃ nāma sargaḥ |
aṣṭādaśottaradviśatatamaḥ sargaḥ |
vasiṣṭhaḥ |
cidākāśāścidākāśe payasīva payorayāḥ |
cittvājjīvāḥ sphurantyete ye ta eva manāṃsi naḥ || 1 ||
[Analyze grammar]

viśadākāśarūpāṇi tānyeva ca manāṃsi naḥ |
jaganti tānyanantāni sampannānyabhitaḥ svayam || 2 ||
[Analyze grammar]

rāmaḥ |
sarvabhūtagaṇe mokṣaṃ mahākalpakṣaye gate |
punaḥ kasya kathaṃ sargasaṃvittirupajāyate || 3 ||
[Analyze grammar]

vasiṣṭhaḥ |
mahāpralayaparyante kṣitijalapavanahutāśākāśāśeṣavināśe ābrahmasthāvarānteṣu bhūteṣu muktau pariṇateṣu bhūyo yathedaṃ jagadanubhūyate tathā śṛṇu || 4 ||
[Analyze grammar]

avyapadeśyaṃ yatparamārthaghanaṃ brahma cinmātramityācakṣate munayaḥ tasya hṛdayamidaṃ jagat | tasmādavyatiriktameva | sa eva ca devaḥ | tadātmīyaṃ hṛdayaṃ svabhāvaṃ jagadityavagacchatīva | vinodenaiva na tu vāstavena rūpeṇa jagaditi kiñcidupalabhāmahe vicārayantaḥ || 5 ||
[Analyze grammar]

tasmātkimiva naśyati kimiva jāyate | yathā paramakāraṇamavināśi tathā taddhṛdayamavināśyeva | mahākalpādayaśca tadavayavā eva | aparijñānamātramatra kevalaṃ khedāyaiva | tadapi prekṣyamānaṃ na labhyate eva || 6 ||
[Analyze grammar]

tasmānna kasyacitkiñcitkadācinnaśyati kvacit |
na caiva jāyate brahma śāntaṃ dṛśyamajaṃ sthitam || 7 ||
[Analyze grammar]

ākāśaparamāṇusahasrāṃśamātre'pi yā śuddhā cinmātrasattā vidyate || 8 ||
[Analyze grammar]

vapurjagadidaṃ tasyā nanu nāma mahāciteḥ |
kathaṃ naśyatyanaṣṭāyāṃ tasyāṃ sā ca na naśyati || 9 ||
[Analyze grammar]

saṃvido hṛdayaṃ svapne yathā bhāti jagattayā |
vyomātmaiva tathaivādisargātprabhṛti bhāsate || 10 ||
[Analyze grammar]

cidvyomāvayavaḥ sargaḥ sargasyaitā daśāḥ kṣayāḥ |
udayāśceti khaṃ sarvaṃ kiṃ nāśi kimanāśi vā || 11 ||
[Analyze grammar]

eṣā hi paramasaṃvidacchedyādāhyāśoṣyākledyātadvidāmadṛśyā | tasyā yaddhṛdayaṃ tattadeva bhavati | yathāsau na jāyate na naśyati tathaitadantarvartī jagadādyanubhavo na jāyate na naśyatyeveti || 12 ||
[Analyze grammar]

kevalaṃ smaraṇavismaraṇavaśena svabhāvarūpeṇānubhavānanubhavau kalpayatīva || 13 ||
[Analyze grammar]

yad yad yadātmakaṃ tattvaṃ tadvināśaṃ vinākṣayi |
tasmādbrahmātmakaṃ dṛśyaṃ viddhi brahmavadakṣayam || 14 ||
[Analyze grammar]

mahāpralayāstadavayavā eva || 15 ||
[Analyze grammar]

cinmātre parame vyomni kuta eva bhavābhavau |
kuto bhāvavikārādiḥ kathaṃ vyomni nirākṛtau || 16 ||
[Analyze grammar]

mahākalpādayo bhāvā rāmaitāni jaganti ca |
brahmātmakatayaivāsmin saṃvidbrahmaṇi saṃsthitam || 17 ||
[Analyze grammar]

nirākṛtyacchacinmātraṃ dṛśyaṃ saṅkalpya tadvaśam |
yāti yenaiva ghaṭito yakṣastaṃ ghaṭṭayetkila || 18 ||
[Analyze grammar]

yathāvayavino vṛkṣasya viṭapaphalapallavapuṣpādayo'vayavāstathā paramārthaghanasyākāśādapyaccharūpasyāvyapadeśyasya pralayamahāpralayanāśodbhedābhāvabhāvasukhaduḥkhajananamaraṇasākāratvanirākāratvādayo'vayavāḥ | yathā cāsāvavayavyanāśo'vyapadeśyaśca tathaiva te iti || 19 ||
[Analyze grammar]

avayavāvayavinordṛśyayorvāpyadṛśyayoḥ |
ekātmanoreva sadā na bhedo'sti kadācana || 20 ||
[Analyze grammar]

te hi tasya svātmarūpādavyatiriktāḥ | yathā taroḥ kvacinmūlaṃ tathā paramārthaghanasya kvaciccittvam | kvacitsargastambhaḥ kvacil lokāntaraviṭapāḥ kvacidvyavasthāśākhāḥ kvacitpadārthapallavāḥ kvacitprakāśakusumaṃ kvacidandhakārakārṣṇyaṃ kvacinnabhaḥkoṭaraṃ kvacitpralayagulmāḥ kvacinmahāpralayagulphāḥ kvaciddhariharādigucchakāni kvacijjāḍyatvak | evamanākāraṃ vyomarūpameva aṃvidātmani brahmaṇi brahmasadṛśaṃ svabhāvādavyatiriktamevaitatsthitam || 21 ||
[Analyze grammar]

ito bhāva ito'bhāva itaḥ sarga itaḥ kṣayaḥ |
svabhāvamevānubhavaditi brahmācalaṃ sthitam || 22 ||
[Analyze grammar]

evammaye'pi parame brahmākāśe na rañjanāḥ |
kāścidevāṅga santīndubimbe viṣalatā yathā || 23 ||
[Analyze grammar]

nirmale paramākāśe kva bhāvābhāvarañjanāḥ |
kvādimadhyāntakalanāḥ kva lokāntaravibhramaḥ || 24 ||
[Analyze grammar]

aparijñānamevaikamatra doṣavadutthitam |
kevalaṃ tatparāvṛtya prekṣaṇātpariśāmyati || 25 ||
[Analyze grammar]

ajñānaṃ jñaptibodhena parāmṛṣṭaṃ praṇaśyati |
yenaivābhyutthitaṃ tena pavaneneva dīpakaḥ || 26 ||
[Analyze grammar]

ajñānaṃ samparijñātaṃ nāsīdeveti budhyate |
abandhamokṣaṃ brahmaiva sarvamityavagamyate || 27 ||
[Analyze grammar]

evambodhāddhi yo rāma mokṣa uktaḥ svasaṃvidā |
vicārayannālabhate nātra kaścana saṃśayaḥ || 28 ||
[Analyze grammar]

idaṃ jagajjālamanādyajātaṃ brahmetthamābhātamitīha dṛṣṭvā |
vicāradṛṣṭyāṣṭaguṇeśvaratvaṃ paśyaṃstṛṇaṃ svātmani jīva āste || 29 ||
[Analyze grammar]