Chapter 209

viśrāntiyogopadeśo nāma sargaḥ |
navottaradviśatatamaḥ sargaḥ |
rāmaḥ |
bodho jagadivābhāti mune yena krameṇa he |
taṃ krameṇa kramaṃ brūhi bhūyo'bodhanivṛttaye || 1 ||
[Analyze grammar]

vasiṣṭhaḥ |
dakṣasyeva vimūḍhasya yaddṛṣṭau tatsvacetasi |
yanna dṛṣṭaṃ na taccitte bhavatyalpatarasmṛteḥ || 2 ||
[Analyze grammar]

bhavyaḥ paśyati śāstrārthameva pūrvāparānvitam |
na dṛṣṭiviṣayaṃ vastu yatpaśyati karoti tat || 3 ||
[Analyze grammar]

bhavyānuṣṭhānaniṣṭhaḥ sañchāstrārthaikamanā muniḥ |
bhūtvopadeśaṃ tvamimaṃ śṛṇu śravaṇabhūṣaṇam || 4 ||
[Analyze grammar]

iyaṃ dṛśyabharabhrāntirnanvavidyeti yocyate |
vastuto vidyate naiṣā tāpanadyāṃ yathā payaḥ || 5 ||
[Analyze grammar]

upadeśyopadeśārthamenāṃ maduparodhataḥ |
satyāmiva kṣaṇaṃ tāvadāśritya śrūyatāmidam || 6 ||
[Analyze grammar]

kuta eṣā kathaṃ ceti vikalpānanudāharan |
nedameṣā na cāstīti svayaṃ jñāsyasi bodhataḥ || 7 ||
[Analyze grammar]

yadidaṃ dṛśyate kiñcijjagatsthāvarajaṅgamam |
sarvaṃ sarvavikārāḍhyaṃ kalpānte tadvinaśyati || 8 ||
[Analyze grammar]

asya bhāgavibhāgātmā nāśo'vaśyamavāritaḥ |
bindunā bindunāmbhodheruddhṛtasyāsti hi kṣayaḥ || 9 ||
[Analyze grammar]

evaṃ sthite dravyanāśe brahmaṇastanmayatvataḥ |
nānantatvaṃ na cāstitvaṃ na caitatsambhavatyalam || 10 ||
[Analyze grammar]

madaśaktiriva jñānamiti nāsmāsu sidhyati |
dehāvajñānato'smākaṃ svapnavattanna tattvataḥ || 11 ||
[Analyze grammar]

naśyatyeti ca dṛśyaśrīḥ saivānyaiva navaiva vā |
itthaṃ bhavetsamucitaṃ kṛtaṃ śāstraṃ na cānyathā || 12 ||
[Analyze grammar]

saivaitītyasamullekhaṃ kathaṃ naṣṭasya sambhavaḥ |
tadrūpānyeti yuktaṃ syādanubhūtārthagā vayam || 13 ||
[Analyze grammar]

saiva vyomatayaivāsīdityasatsaiva sā katham |
tathaiva vyomasaṃsthā cennāśaṃ tarhi na sā gatā || 14 ||
[Analyze grammar]

kāryakāraṇayorekarūpataivaṃ yadā tadā |
kāryakāraṇatābhāvādaikyamevāsmadāgamaḥ || 15 ||
[Analyze grammar]

śūnyaṃ tvanupalambhatvaṃ yadgataṃ naṣṭameva tat |
anyastarhi bhavennāśaḥ kīdṛśaḥ kila kathyatām || 16 ||
[Analyze grammar]

naṣṭaṃ bhūyastadutpannamiti tatpratyayo'tra kaḥ |
naśyatyavaśyaṃ tenedaṃ punaranyatpravartate || 17 ||
[Analyze grammar]

madhyamadhyodyadutsedhaphalādyavayavaikikā |
ādāhaṃ bījasattāsti kāryakāraṇatā kutaḥ || 18 ||
[Analyze grammar]

deśakālakriyātmaikaṃ yathādṛṣṭamiha sthitam |
bījamevaikakamato na ghaṭaḥ paṭakāryakṛt || 19 ||
[Analyze grammar]

sarvadarśanaviśrānte nāmni bhedo na vastuni |
paramārthamaye tena vivādena kimatra naḥ || 20 ||
[Analyze grammar]

idaṃ śāntamanādyantaṃ tadrūpatvādvicārataḥ |
vyomābhaṃ bodhatāmātramanubhūtipramāṇataḥ || 21 ||
[Analyze grammar]

yathaitannānubhūtaṃ sad yathaitannānubhūyate |
yathaitatsiddhimāpnoti tadidaṃ kathyate kramāt || 22 ||
[Analyze grammar]

mahākalpānta unnaṣṭe sarvasmindṛśyamaṇḍale |
āmahādevaparyantaṃ samanobuddhikarmaṇi || 23 ||
[Analyze grammar]

vyomanyapi śamaṃ yāte kāle'pyakalitasthitau |
vāyāvapi kvāpi gate tejasyatyantamasthite || 24 ||
[Analyze grammar]

tamasyupagate dhvaṃsaṃ vāryādau suciraṃ kṣate |
alamantamanuprāpte sarvaśabdārthasañcaye || 25 ||
[Analyze grammar]

śiṣyate śāntabodhātma sadacchaṃ bodhyavarjitam |
anādinidhanaṃ bodhyaṃ kimapyamalamavyayam || 26 ||
[Analyze grammar]

avācyamanabhivyaktamatīndriyamanāmakam |
sarvabhūtātmakaṃ śūnyaṃ sadasacca paraṃ padam || 27 ||
[Analyze grammar]

tanna vāyurna cākāśaṃ na buddhyādi na śūnyakam |
na kiñcidatha sarvātma kimapyanyatparaṃ nabhaḥ || 28 ||
[Analyze grammar]

tadvidā tatpadasthena tanmuktenānubhūyate |
anyaiḥ kevalamāmnātairāgamaireva varṇyate || 29 ||
[Analyze grammar]

na kālo na tamo nātmā na sannāsanna deśadik |
na madhyametayornānto na bodho nāpyabodhitam || 30 ||
[Analyze grammar]

kimapyetadatyacchaṃ ca budhyate bodhapāragaiḥ |
śāntasaṃsāravisaraiḥ parāṃ bhūmimupāgataiḥ || 31 ||
[Analyze grammar]

pratiṣiddhā mayaite tu ye'rthāḥ sarve'tra te sthitāḥ |
asmadbuddhyāparicchedyāḥ somyāmbodherivormayaḥ || 32 ||
[Analyze grammar]

yathāsthitaṃ sthitāḥ sarve bhāvāstatra tathā yathā |
anutkīrṇā mahāstambhe vividhāḥ sālabhañjikāḥ || 33 ||
[Analyze grammar]

evaṃ tatra sthitāḥ sarve bhāvāstatra na ca sthitāḥ |
asarvātmaiva sarvātma tadetadatadeva ca || 34 ||
[Analyze grammar]

padaṃ yathaitatsarvātma sarvārthaparivarjitam |
yathāvattatprapaśyanti tatraikapariṇāminaḥ || 35 ||
[Analyze grammar]

sarvārthāstamaye jāte sarvārtharahitaṃ padam |
sarvārthaparipūrṇaṃ ca tadādyaṃ paridṛśyate || 36 ||
[Analyze grammar]

tava tāvanmahābuddhe sarvārthopaśamātmakam |
na samyagjñānamutpannaṃ saṃśayo'tra nidarśanam || 37 ||
[Analyze grammar]

yaḥ prabuddho nirābhāsaṃ paramābhāsamāgataḥ |
svasthāntaḥkaraṇaśśāntastaṃ svabhāvaṃ sa paśyati || 38 ||
[Analyze grammar]

ayaṃ tvamahamityādistrikālagajagadbhramaḥ |
tatrāsti hemapiṇḍe'ntariva rūpakajālakam || 39 ||
[Analyze grammar]

hemapiṇḍād yathā bhāṇḍajālaṃ nānupalabhyate |
tathā na labhyate bhinnaṃ paramārthaghanājjagat || 40 ||
[Analyze grammar]

sarvadaivāpi bhinnātmā svāṅgabhūtopalambhadṛk |
sajagaccājagaccaitaddhemevāṅgadarūpakam || 41 ||
[Analyze grammar]

riktaṃ deśādiśabdārthairdeśakālakriyātmakam |
yathāsthitamidaṃ tatra sarvamasti na cāsti ca || 42 ||
[Analyze grammar]

yathormyādi same toye citraṃ citrakṛdīhite |
bhāṇḍavṛndamayaḥpiṇḍe tathedaṃ brahmaṇi sthitam || 43 ||
[Analyze grammar]

yathaitadatra no bhinnaṃ nābhinnaṃ nāsti cāsti ca |
nityaṃ tanmayamevācchaṃ śānte śāntamidaṃ tathā || 44 ||
[Analyze grammar]

anikhātaiva bhātīyaṃ trijagatsālabhañjikā |
surasasyaiva dṛśyatvamitā brahmaṇi dāruṇi || 45 ||
[Analyze grammar]

nikhātā dṛśyatāṃ yānti stambhasthāḥ sālabhañjikāḥ |
akhātā eva bhāntyatra trijagatsālabhañjikāḥ || 46 ||
[Analyze grammar]

asminnakṣobhya evāntastaraṅgāḥ sṛṣṭidṛṣṭayaḥ |
sarasyatirase bhānti cidghanāmṛtavṛṣṭayaḥ || 47 ||
[Analyze grammar]

avibhāge vibhāgasthā akṣobhe kṣubhitā iva |
avibhātā vibhāntīva cidghane sṛṣṭivṛṣṭayaḥ || 48 ||
[Analyze grammar]

paramāṇau paramāṇāvatra saṃsāramaṇḍalam |
vibhāti bhāsurārambhairapi bhāti na kiñcana || 49 ||
[Analyze grammar]

ākāśakālapavanādipadārthajātamapyaṅgamaṅgarahitasya tadapyanaṅgam |
sarvātmakaṃ sakalabhāvavikāraśūnyamapyetadāhurajaraṃ paramātmatattvam || 50 ||
[Analyze grammar]