Chapter 204

sāmyāvabodho nāma sargaḥ |
caturuttaradviśatatamaḥ sargaḥ |
vasiṣṭhaḥ |
saṃsārabhārasuśrāntaḥ saṅkaṭeṣu luṭhattanuḥ |
yo'bhivāñchati viśrāntiṃ tasya kramamimaṃ śṛṇu || 1 ||
[Analyze grammar]

pūrvaṃ vivekakaṇikā yadāsya hṛdi jāyate |
saṃsāranirvedamayī kāraṇādvāpyakāraṇāt || 2 ||
[Analyze grammar]

tadāśrayati sacchāyān sādhūnunnatiśālinaḥ |
adhvaśramaharāṃstāpatapto mārgatarūniva || 3 ||
[Analyze grammar]

dūre pariharatyajñānyajñayūpānivādhvagaḥ |
snānadānatapoyajñān karoti vibudhānugaḥ || 4 ||
[Analyze grammar]

peśalaṃ cānurūpaṃ ca vyavahāramakṛtrimam |
lokyamāhlādanaṃ dhatte candrabimbamivāmṛtam || 5 ||
[Analyze grammar]

paraprajñānugo bhāvaḥ parārthaparipūrakaḥ |
pavitrakarmarasikaḥ ko'pi somyaḥ pravartate || 6 ||
[Analyze grammar]

navanītasthalīvācchā snigdhā mṛdvī manoharā |
janaṃ sukhayati svādvī tadīyā navasaṅgatiḥ || 7 ||
[Analyze grammar]

śītalāni pavitrāṇi caritāni vivekinaḥ |
indorivāṃśujālāni janaṃ śītalayantyalam || 8 ||
[Analyze grammar]

na tathodyānaṣaṇḍeṣu puṣpaprakarahāriṣu |
viśramyate vītabhayaṃ yathā sādhusamāgame || 9 ||
[Analyze grammar]

mandākinīpayāṃsīva saṅgatāni vivekinām |
prakṣālayanti pāpāni prayacchanti viśuddhatām || 10 ||
[Analyze grammar]

vivekiṣu virakteṣu saṃsārottaraṇārthiṣu |
janaśśītalatāmeti himahāragṛheṣviva || 11 ||
[Analyze grammar]

nanu nāgaratodārā yā vivekini vidyate |
suragandharvakanyāsu sā navāsu na vidyate || 12 ||
[Analyze grammar]

prajñā prasādamāyāti kramāducitakarmaṇaḥ |
antaḥ karoti śāstrārthamarthaṃ makurabhūriva || 13 ||
[Analyze grammar]

satprajñonnatimāyāti śāstrārtharasaśālinī |
vivekinī vilāsena kadalīva mahāvane || 14 ||
[Analyze grammar]

antarevāśu vahati sarvārthānpratibimbitān |
ādarśavadaśeṣeṇa prajñā nairmalyaśālinī || 15 ||
[Analyze grammar]

sādhusaṅgamaśuddhātmā śāstrārthaparimārjitaḥ |
prājño bhātyuddhṛtaṃ vahneragniśaucamivāṃśukam || 16 ||
[Analyze grammar]

kacatkāñcanakāntena vimalālokakāriṇā |
bhuvanaṃ bhāskareṇeva bhāti sādhuḥ svacetasā || 17 ||
[Analyze grammar]

tathānugacchati prājñaśśāstrasādhusamāgamau |
yathātyantānuṣaṅgeṇa tāvevāśu bhavatyayam || 18 ||
[Analyze grammar]

kramātsajjanatāmetya śāstrārthabharabhāvitaḥ |
bhāti bhogānadhaḥ kurvanpañjarādiva nirgataḥ || 19 ||
[Analyze grammar]

bhogābhigamadaurbhāgyaṃ dinānudinamujjhatā |
tena tatkulamābhāti tārācakramivendunā || 20 ||
[Analyze grammar]

abhogakṛpaṇā kāpi navaivāsya pravartate |
mukhe kāntirapūrvaiva candre rāhau mṛte yathā || 21 ||
[Analyze grammar]

tṛṇīkṛtatrijagatāṃ mahatāmabhidheyatām |
sa yāti kalpaviṭapī nabhasīva divaukasām || 22 ||
[Analyze grammar]

bhogānāṃ dveṣaṇenāntarlajjamāno manasvyapi |
bhogānāmanyasampattyā paramaṃ parituṣyati || 23 ||
[Analyze grammar]

svā evopahasatyantastaraṇī taralakriyāḥ |
khedasmeramukho jātīrjātismara ivādhamāḥ || 24 ||
[Analyze grammar]

atha taṃ draṣṭumāyānti sauhārdenaiva sādhavaḥ |
bhūmāvivoditaṃ candraṃ vismayotphullalocanāḥ || 25 ||
[Analyze grammar]

nityānādṛtabhogo'sau tamapyucitayā dhiyā |
prāptamapyucitārambhaṃ bhogaṃ na bahu manyate || 26 ||
[Analyze grammar]

pūrvaṃ saṃsṛtivairasyamantarevoditātmanaḥ |
jāyate jīrṇajāḍyasya pākādiva śarattaroḥ || 27 ||
[Analyze grammar]

tataḥ sajjanasamparkamudarkaśreyase svayam |
karoti svasthatāgṛdhnurbhiṣagāśrayaṇaṃ yathā || 28 ||
[Analyze grammar]

tenodāramatirbhūtvā śāstrārtheṣu nimajjati |
mahānmahāprasanneṣu sarassviva mahāgajaḥ || 29 ||
[Analyze grammar]

sajjano hi samuttārya vipadbhyo nikaṭasthitam |
niyojayati sampatsu svālokeṣviva bhāskaraḥ || 30 ||
[Analyze grammar]

parasvādānaviratiḥ pūrvameva pravartate |
vivekino nijārtheṣu santoṣaścopajāyate || 31 ||
[Analyze grammar]

parasvādānavirataḥ santoṣāmṛtanirbharaḥ |
vivekī kramaśaḥ svārthānapyupekṣitumicchati || 32 ||
[Analyze grammar]

dadāti kaṇapiṇyākaśākānyapi hi yācate |
tenaivābhyāsayogena svamāṃsāni dadātyasau || 33 ||
[Analyze grammar]

nūnaṃ viralacintānāṃ vivekamanudhāvatām |
maurkhyaṃ laghutvamāyāti dhāvatāmiva goṣpadam || 34 ||
[Analyze grammar]

parārthādānaviratiṃ pūrvamabhyasya yatnataḥ |
āhartavyā vivekena tataḥ svārtheṣvaraktatā || 35 ||
[Analyze grammar]

tato bhoganirāsena saha svārthanirākṛtiḥ |
paramāyai svaviśrāntyai kriyate kṛtibhiḥ kramāt || 36 ||
[Analyze grammar]

na tādṛśaṃ jagatyasti duḥkhaṃ narakakoṭiṣu |
yādṛśaṃ yāvadāyuṣkamarthopārjanaśāsanam || 37 ||
[Analyze grammar]

āsane śayane yāne gamane ramaṇe'rjane |
āḍhyāścintāparā eva na tu mūḍhā vidanti tām || 38 ||
[Analyze grammar]

nanvarthā vitatānarthāḥ sampadaḥ santatāpadaḥ |
bhogā bhavamahārogā viparītena bhāvitāḥ || 39 ||
[Analyze grammar]

tāvannāyāti vaivaśyaṃ cintāviṣavijṛmbhaṇaiḥ |
yāvadarthamahānartho na kadarthārthamarthyate || 40 ||
[Analyze grammar]

anuttamasukhaṃ yasmai cirāya parirocate |
jarattṛṇaśikhādṛṣṭyā so'rthaṃ paśyatu śāmyatu || 41 ||
[Analyze grammar]

bhūribhāvavikārāṇāṃ jarāmaraṇakarmaṇām |
dainyadaurātmyadāhānāmarthaḥ sārthapatiḥ smṛtaḥ || 42 ||
[Analyze grammar]

asmiñjagati jantūnāṃ jarāmaraṇaśālinām |
ajarāmaratāṃ kartuṃ santoṣo'sti rasāyanam || 43 ||
[Analyze grammar]

vasanto nandanodyānamindurapsarasaḥ smaraḥ |
ityekataḥ samuditaṃ santoṣāmṛtamekataḥ || 44 ||
[Analyze grammar]

sarasaḥ prāvṛṣevāntaḥ santoṣeṇaiti pūrṇatām |
gambhīrāṃ śītalāṃ hṛdyāṃ prasannāṃ rasaśālinīm || 45 ||
[Analyze grammar]

sādhurojasvitāmetya santoṣeṇa virājate |
supuṣpitavarākāro vasanteneva pādapaḥ || 46 ||
[Analyze grammar]

pādapātaparāmarśapiṣṭakīṭavadīhate |
dīnaprakṛtirarthārthī duḥkhādduḥkhāntaraṃ vrajan || 47 ||
[Analyze grammar]

kallolavikalāḥ kṣubdhasamudrapatitā iva |
nāpnuvanti sthitiṃ svasthāṃ vikṛtākṛtayo'rthinaḥ || 48 ||
[Analyze grammar]

sampadaḥ pramadāścaiva taraṅgotsaṅgabhaṅgurāḥ |
kastāsvahiphaṇacchattracchāyāsu ramate budhaḥ || 49 ||
[Analyze grammar]

arthopārjanarakṣāṇāṃ jānannapi kadarthanām |
yaḥ karoti spṛhāṃ mūḍho nṛpaśustaṃ na saṃspṛśet || 50 ||
[Analyze grammar]

manaso bāhyamārambhamāntaraṃ ca lunāti yaḥ |
samaṃ vaitṛṣṇyadātreṇa tasya kṣetraṃ prakāśate || 51 ||
[Analyze grammar]

jagattvamajñasambuddhaṃ jño vidannasadeva yat |
satīva tatra sphurati tadanabhyāsajṛmbhitam || 52 ||
[Analyze grammar]

saṃsāranirvedavaśādupetya satsaṅgamaṃ śāstramupetya tena |
śāstrārthabhāvena nirasya bhogānvaitṛṣṇyadārḍhyātparamārthameti || 53 ||
[Analyze grammar]