Chapter 199

svarūpaviśrāntyarthamupadeśakaraṇaṃ nāma sargaḥ |
ekonadviśatatamaḥ sargaḥ |
vasiṣṭhaḥ |
cittavatkacanaṃ śānte yattattasmānna bhidyate |
avyākṛtāmalatayā kvātaḥ sargādisambhavaḥ || 1 ||
[Analyze grammar]

cittadīpe gate yānti bhrāntivadbhānti khe sthite |
rūpālokamanaskārāḥ saṃvidambudravormayaḥ || 2 ||
[Analyze grammar]

nirastakāraṇāpekṣaṃ marutaḥ spandanaṃ yathā |
yathā visaraṇaṃ bhāsastathā jagadidaṃ pare || 3 ||
[Analyze grammar]

dravatvamiva kīlāle śūnyatvamiva cāmbare |
spandanaṃ marutīvedaṃ kimapyātmamayaṃ pare || 4 ||
[Analyze grammar]

mahāciti mahākāśe yadidaṃ bhāsate jagat |
taccittvameva kacati nirmalatvaṃ maṇāviva || 5 ||
[Analyze grammar]

yathā dravatvaṃ payasi yathā śūnyatvamambare |
yathā praspandanaṃ vāyau mahāciti tathā jagat || 6 ||
[Analyze grammar]

vetti vāyuryathā spandaṃ tathā vetti jagaccitiḥ |
na dvaitaikyādibhedānāṃ manāgapyatra sambhavaḥ || 7 ||
[Analyze grammar]

avivekavivekābhyāṃ bhāsuraṃ bhaṅguraṃ jagat |
bodhe sadevāsadrūpamabhāsuramabhaṅguram || 8 ||
[Analyze grammar]

jñaptimātrādṛte śuddhādādimadhyāntavarjitāt |
nānyadastīti nirṇītaṃ mahācinmātrarūpiṇaḥ || 9 ||
[Analyze grammar]

tatkasyacicchivaṃ śāntaṃ kasyacidbrahma śāśvatam |
kasyacicchūnyatāmātraṃ kasyacijjñaptimātrakam || 10 ||
[Analyze grammar]

tadanantātma cidrūpaṃ cetyatāmeva bhāvayat |
svasaṃsthameva jñeyatvamavagacchati cintayā || 11 ||
[Analyze grammar]

nāsti sattāṃ vinā vāyoryathā spandeṣu kāraṇam |
tathā mahācito'cchāyāḥ sargasaṃvittivṛttiṣu || 12 ||
[Analyze grammar]

nityaṃ sattvamasattvaṃ vā heturanyānapekṣaṇāt |
ityatrārthe'bhaviṣyatsaddvitvaikatvāstitāvaśāt || 13 ||
[Analyze grammar]

ko'tra kalpayitā dvitvamekatvaṃ vā mahāmbare |
viṣvagviśvamapāraikā paramākāśakośatā || 14 ||
[Analyze grammar]

yathā spandāniladvitvaśabda eva na vāstavaḥ |
viśvaviśveśvaradvitvaṃ tathaivāsanmayātmakam || 15 ||
[Analyze grammar]

sadevāsambhavaddvitvaṃ mahācinmātrakaṃ tu yat |
viśvābhāsaṃ tadevedaṃ na viśvaṃ sanna viśvatā || 16 ||
[Analyze grammar]

deśakālādisattvena kadāciddhemni satyatā |
kaṭakatvasya bhinnasya viśvasya na tathā pare || 17 ||
[Analyze grammar]

dvitvaikyāsambhave cātra kāryakāraṇatā kutaḥ |
syāccettatkalpanāmātramevaitannānyavastutā || 18 ||
[Analyze grammar]

śūnyatā nabhasīvātra dravatvamiva vāmbhasi |
khe khatevāpyabhinnaiva kilāsti jagadāditā || 19 ||
[Analyze grammar]

yadrūpaṃ brahma tadrūpaṃ jagatkvātra dvitaikate |
yadrūpaṃ vyoma tadrūpameva śūnyaṃ kilākhilam || 20 ||
[Analyze grammar]

ekātmani tate svacche cinmātre sarvarūpiṇi |
śilāputrakasenāyāṃ pāṣāṇatva iva sthite || 21 ||
[Analyze grammar]

kāryakāraṇavaicitryaṃ kathaṃ sambhavati kva vā |
kathamavyomatā vyomni dvitīyāsambhavādbhavet || 22 ||
[Analyze grammar]

pratibhātmaiva bhārūpo bhāti sargo mahāciti |
putrikevopalotkīrṇā tanmayatvāttadātmakaḥ || 23 ||
[Analyze grammar]

sādhoryathāsthitasyaivaṃ buddhvā viśvaṃ pralīyate |
kāṣṭhamaunadaśābhāsaṃ tatsāramavaśiṣyate || 24 ||
[Analyze grammar]

yathā nimīlitākṣasya rūpālokamanobhramaḥ |
svapne jāgratyanagrastho'pyasannevāsti bhāvanāt || 25 ||
[Analyze grammar]

bhāvanopaśamaṃ kṛtvā śilībhūya yathāsthitam |
aśilībhūtamevāntaḥ svabhāve samamāsyatām || 26 ||
[Analyze grammar]

svavivekopahāreṇa yathāprāptārthapūjanaiḥ |
bodhāya pūjyatāṃ buddhyā svo bhāvaḥ parameśvaraḥ || 27 ||
[Analyze grammar]

vivekapūjitaḥ svātmā sadyaḥ sthānavarapradaḥ |
rudropendrādipūjātra jarattṛṇalavāyate || 28 ||
[Analyze grammar]

vicāraśamasatsaṅgabalipuṣpaikapūjitaḥ |
sadyo mokṣakaraḥ sādhoḥ svātmaiva parameśvaraḥ || 29 ||
[Analyze grammar]

satyālokanamātraikapūjito'nuttamārthadaḥ |
yatrāstyātmeśvarastatra mūḍhaḥ ko'nyaṃ samāśrayet || 30 ||
[Analyze grammar]

satsaṅgaśamasantoṣavivekaiḥ pūjitātmanaḥ |
śirīṣakusumāyante śastrāhiviṣavahnayaḥ || 31 ||
[Analyze grammar]

devārcanatapastīrthadānānyatikṛtānyapi |
bhasmāyante nirarthatvādavivekahatātmanām || 32 ||
[Analyze grammar]

etānyapi vivekena kriyante saphalāni cet |
viveka eva tatkasmātsphuṭamantarna sādhyate || 33 ||
[Analyze grammar]

yathābhūtārthavijñānādvāsanoparame pade |
yatno vivekaśabdākhyo bhavatyātmaprasādataḥ || 34 ||
[Analyze grammar]

tathā tathā viveko'ntarvṛddhiṃ neyaśśamāmṛtaiḥ |
yathā yathā punaśśoṣamupayāti na vibhramaiḥ || 35 ||
[Analyze grammar]

dehasattāmanādṛtya yathābhūtārthadarśanāt |
lajjāṃ bhayaṃ viṣāderṣye sukhaṃ duḥkhaṃ tyajetsamam || 36 ||
[Analyze grammar]

jagadādi śarīrādi nāstyevādau kuto'dya tat |
kāryaṃ cetkāraṇasyaitattathāpi brahmamātrakam || 37 ||
[Analyze grammar]

pratibhāmātramevācchaṃ na tu jñaptirghaṭādivat |
jñānātmikaiva pratibhā jñaptirevākhilaṃ tataḥ || 38 ||
[Analyze grammar]

jñaptirapyātmatattvaśrīḥ parijñātāpi śāmyati |
jñeyābhāve tvanirvācyā śiṣyate śāśvataṃ śivam || 39 ||
[Analyze grammar]

aśarīrādyaviśvātma sarvaṃ śāntamidaṃ tatam |
jñānajñeyajñaptimātraṃ dṛṣanmaunamavasthitam || 40 ||
[Analyze grammar]

śāntāntaḥkaraṇāḥ svacchāśśilāputrakakośavat |
calantaścācalantaśca jñarūpā eva tiṣṭhata || 41 ||
[Analyze grammar]

ajñeyajñatvasadrūpāḥ sadasatsārarūpiṇaḥ |
ākāśakośaviśadā bhavatābhavabhūmayaḥ || 42 ||
[Analyze grammar]

yathāsthitaṃ ca tiṣṭhanto gacchantaśca yathāgatam |
yathāprāptaikakarmāṇaḥ sampadyante budhāḥ param || 43 ||
[Analyze grammar]

atha vā sarvasantyāgaśāntāntaḥkaraṇojjvalāḥ |
ekānteṣveva tiṣṭhanti citrakarmārpitā iva || 44 ||
[Analyze grammar]

saṅkalpaśāntau saṅkalpapuravatsarvadākhilam |
svapnavacca prabuddhasya sadevāstaṅgataṃ jagat || 45 ||
[Analyze grammar]

sanetrarūpānubhavaṃ jātito'ndha ivāgamaiḥ |
nirvāṇaṃ varṇayannajñastāmyatyantarna śāmyati || 46 ||
[Analyze grammar]

kalpanāṃśopadeśena loko'vidyāmayātmanā |
yena kenacidajñatvātkṛtārtho'smīti manyate || 47 ||
[Analyze grammar]

akṛtārthaḥ kṛtārthatvaṃ jānanmaurkhyavimohitaḥ |
vijñāsyatyakṛtārthatvaṃ kṣaṇāntarakadarthanaiḥ || 48 ||
[Analyze grammar]

upāyaṃ kalpanātmānamanupāyaṃ vidurbudhāḥ |
duḥkhadatvānnimeṣeṇa bhāvābhāvaiṣaṇabhramaiḥ || 49 ||
[Analyze grammar]

jagadbhramaṃ parijñāya yadavāsanamāsitam |
virasāśeṣaviṣayaṃ taddhi nirvāṇamucyate || 50 ||
[Analyze grammar]

ākhyāyikārthapratibhānarūpamacetyacidvāribharadravātmā |
avedyavidrūpamaśeṣamacchaṃ paśyanvinirvāmi jagatsvarūpam || 51 ||
[Analyze grammar]

jātyandharūpānubhavānurūpaṃ yadāgamairbuddhamabodharūpam |
adhaspadīkṛtya tadantarasminbodhe nipatyānubhave bhavābhūḥ || 52 ||
[Analyze grammar]