Chapter 192

paramārthayogopadeśo nāma sargaḥ |
dvinavatyuttaraśatatamaḥ sargaḥ |
vasiṣṭhaḥ |
deśāddeśāntaraṃ dūraṃ prāptāyāḥ saṃvidaḥ kṣaṇāt |
yad rūpamamalaṃ madhye tad rūpaṃ paramātmanaḥ || 1 ||
[Analyze grammar]

gacchañchṛṇvan spṛśañjighrannunmiṣannimiṣan hasan |
nūnaṃ nirāmayatvāya nityametanmayo bhava || 2 ||
[Analyze grammar]

tata eva nirābhāsātsatyānnirvāsanaiṣaṇāt |
yathāsthitaṃ yathācāraṃ mā calāmaraśailavat || 3 ||
[Analyze grammar]

etad rūpamavidyāyāḥ prekṣitā yanna labhyate |
prekṣitā labhyate cetsā tadvidyaiva parā bhavet || 4 ||
[Analyze grammar]

avidyāsambhavāccetyacittve'sambhavataḥ kvacit |
cetyate kathamevātaśśāntireva baloditā || 5 ||
[Analyze grammar]

satyaṃ brahma jagaccaikaṃ sthitamekamanekavat |
sarvaṃ cāsarvavadbhāti śuddhaṃ cāśuddhavattatam || 6 ||
[Analyze grammar]

aśūnyaṃ śūnyamiva ca śūnyaṃ cāśūnyavatsphuṭam |
sphāramasphāramiva tadasphāraṃ sphārasannibham || 7 ||
[Analyze grammar]

avikāraṃ vikārīva samaṃ śāntamaśāntavat |
sadevāsadivādṛśyaṃ tadevātadivoditam || 8 ||
[Analyze grammar]

avibhāgaṃ vibhāgīva nirjāḍyaṃ jaḍavadgatam |
acetyaṃ cetyabhāvīva niraṃśaṃ sāṃśaśobhanam || 9 ||
[Analyze grammar]

anahaṃ sāhamiva tadanāśamapi nāśavat |
akalaṅkaṃ kalaṅkīva nirvedyaṃ vedyavāhi tat || 10 ||
[Analyze grammar]

āloki dhvāntaghanavannavavacca purātanam |
paramāṇorapi tanu garbhīkṛtajagadgaṇam || 11 ||
[Analyze grammar]

sarvātmakamapi vyaktaṃ dṛṣṭaṃ kṛcchreṇa bhūyasā |
ajālamapi jālāḍhyaṃ dāśeśavadanekadhā || 12 ||
[Analyze grammar]

nirmāyamapi māyāṃśumaṇḍalāmalabhāskaram |
brahma viddhi vidāṃ nāthamapāmiva mahodadhim || 13 ||
[Analyze grammar]

jagadratnamahākośaṃ tulāyāṃ tūlakāl laghu |
māyāmarīciśaśinamapi nekṣaṇagocaram || 14 ||
[Analyze grammar]

anantamapi niṣpāraṃ na ca kvacidapi sthitam |
ākāśe vanavinyāsanaganirmāṇatatparam || 15 ||
[Analyze grammar]

aṇīyasāmaṇīyastatsthaviṣṭhaṃ ca sthavīyasām |
garīyasāṃ gariṣṭhaṃ ca śreṣṭhaṃ ca śreyasāmapi || 16 ||
[Analyze grammar]

akartṛkarmakaraṇamakāraṇamakārakam |
antaśśūnyatayaivaitaccirāya paripūritam || 17 ||
[Analyze grammar]

jagatsamudgakamapi nityaṃ śūnyamaraṇyavat |
anantaśailakaṭhinamapyākāśalavānmṛdu || 18 ||
[Analyze grammar]

pratyekaṃ pratyahaṃ prāyaḥ purāṇaṃ pelavaṃ navam |
ālokamandhakārābhaṃ tamastvālokamātatam || 19 ||
[Analyze grammar]

pratyakṣamapi durlakṣyaṃ parokṣamapi cāgragam |
cidrūpameva ca jaḍaṃ jaḍameva cidātmakam || 20 ||
[Analyze grammar]

ahamevānahambhāvamanahaṃ cāhameva ca |
anyadeva tadevāhamahamevānyadeva tat || 21 ||
[Analyze grammar]

asya pūrṇārṇavasyāntarime tribhuvanormayaḥ |
sphuranta iva tiṣṭhanti svabhāvadravatātmakāḥ || 22 ||
[Analyze grammar]

bibharti sargamaṅgasthaṃ tuṣāramiva śuklatām |
bhāti sargastvanenaiva tuṣāreṇeva śuklatā || 23 ||
[Analyze grammar]

adeśakālāvayavo'pyeṣa devo divāniśam |
asajjagattanotīva yathā vāri taraṅgakam || 24 ||
[Analyze grammar]

etasminvikasantyetā vipulākāśakānane |
jagajjaraḍhamañjaryaḥ prasaratpattrapañcakāḥ || 25 ||
[Analyze grammar]

eṣa svapratibimbasya svayamālokanecchayā |
atyantanirmalākāraḥ svayaṃ makuratāṃ gataḥ || 26 ||
[Analyze grammar]

vyomavṛkṣaphalasyāsya svecchāccharddhaya ujjvalāḥ |
sargopalambhasusvādvyaścamatkurvanti saṃvidi || 27 ||
[Analyze grammar]

antastvena bahiṣṭvena nānānānātayātmani |
eṣa so'ntarbahirbhāti bhāvābhāvavibhāvayā || 28 ||
[Analyze grammar]

etadrūpā padārthaśrīretasminnetadicchayā |
camatkarotyetadarthaṃ jihveva svāsyakoṭare || 29 ||
[Analyze grammar]

asyāmbhaso dravatvaṃ yattadidaṃ jagaducyate |
saṃvitsvādūpalambhāṅgaṃ bhuvanāvartavṛttimat || 30 ||
[Analyze grammar]

śāmyatyatra padārthaśrīḥ sarvā yāmeva bhāsvati |
etasmādeva codeti svāloka iva tejasaḥ || 31 ||
[Analyze grammar]

idameṣa jagatsarvaṃ śuklatvaṃ tuhinaṃ yathā |
ata etāḥ pravartante vida indorivāṃśavaḥ || 32 ||
[Analyze grammar]

etasmādaṅgato raṅgājjagaccitramidaṃ sthitam |
viddhyabhāvavikārādi śāntametanmayaṃ tatam || 33 ||
[Analyze grammar]

asmādvarataroretāḥ svārūḍhādgaganāṅgane |
dṛśyaśākhāḥ pravartante jagajjālagulucchakāḥ || 34 ||
[Analyze grammar]

vyayodayavatī nūnamatra dṛśyataraṅgiṇī |
nānātānantakusumā vahatyavicalācale || 35 ||
[Analyze grammar]

asminvyomātmake raṅge bhuvanābhinayabhramaiḥ |
nṛtyatyaviratārambhaṃ cārairniyatinartakī || 36 ||
[Analyze grammar]

jagatkrīḍo mahākalpakalponmeṣanimeṣaṇaḥ |
vidānenādyate bhūyo janyate kālabālakaḥ || 37 ||
[Analyze grammar]

udyatsvapi jagatsveṣa śāntamevāvatiṣṭhate |
aniccha eva makuraḥ pratibimbagateṣviva || 38 ||
[Analyze grammar]

bhūtānāṃ vartamānānāṃ sargāṇāṃ sa bhaviṣyatām |
eṣo'kāraṇakaṃ bījamagānāmiva kānanam || 39 ||
[Analyze grammar]

asyonmeṣo jagallakṣmīrnimeṣaḥ pralayāgamaḥ |
anunmeṣanimeṣo'sāvātmanyevāvatiṣṭhate || 40 ||
[Analyze grammar]

udyantyamūni subahūni mahāmahāṃsi sargāgamapralayajanmadaśājaganti |
sarvāṇi tānyayamapārakharūpa eva praspandanāni marudeva yathāssva śāntam || 41 ||
[Analyze grammar]