Chapter 191

satyārthopanyāsayogopadeśo nāma sargaḥ |
ekanavatyuttaraśatatamaḥ sargaḥ |
vasiṣṭhaḥ |
prāpteṣu sukhaduḥkheṣu yo naśyati sa naśyati |
yo na naśyatyanāśo'sāvalaṃ śāstropadeśanaiḥ || 1 ||
[Analyze grammar]

yasya vecchodayastasya santyavaśyaṃ sukhādayaḥ |
te cetsāmyāccikitsyante pūrvamicchaiva sohyatām || 2 ||
[Analyze grammar]

ahaṃ jagaditi bhrāntī na sta eva pare pade |
idaṃ śāntamanālambaṃ sarvaṃ nirvāṇamavyayam || 3 ||
[Analyze grammar]

ahaṃ brahma jagacceti śabdasandarbhavibhramaḥ |
sarvasmiñchānta ākāśe kena nāmopakalpitaḥ || 4 ||
[Analyze grammar]

nehāstyahaṃ na ca jaganna ca brahmādiśabdakāḥ |
śāntasyaikasya sarvatvātkartā bhokteha kaḥ kutaḥ || 5 ||
[Analyze grammar]

upadeśātiśāyitvātsarvāpahnava eva yaḥ |
kṛto'yaṃ sa ca satyātmā sa evehāvaśiṣyate || 6 ||
[Analyze grammar]

agrasthasiddhasañcāro jñāyate nāpi dāruṇaḥ |
yathaikapārśvasaṃsuptanarasvapnābhragarjitam || 7 ||
[Analyze grammar]

jñaptau nāsti yatastena siddhācāro na lakṣyate |
svabhāva iti sarveṇa jñaptistho hyanubhūyate || 8 ||
[Analyze grammar]

jñaptirapyātmabhūtaiva sarvaṃ bhāti hi tanmayam |
tasmātsāhaṃ jagatsarvamabhinnaṃ paramātmanaḥ || 9 ||
[Analyze grammar]

jñaptirjagattayā bhāti saṅkalpasvapnayoriva |
anānāvayavodeti jalamūrmitayā yathā || 10 ||
[Analyze grammar]

ekātmaivodayo jñapternānātāmiva vo gataḥ |
ajñānātsā tvavastutvātprekṣitā nopalabhyate || 11 ||
[Analyze grammar]

yathā svāvayavā eva sarvo hyavayavī bhavet |
nityānavayavaṃ śāntaṃ brahmaivedaṃ tathā jagat || 12 ||
[Analyze grammar]

bhāṇḍalakṣāṇi dhatte'ntaścidrūpakanakeṣṭakā |
yadeva sā cetayate jagadādīva vetti tat || 13 ||
[Analyze grammar]

brahmaiva kacatīvedaṃ sattayācchaṃ jagattayā |
cidrūpatvāddravātmatvāttaraṅgāditayāmbviva || 14 ||
[Analyze grammar]

yad yaccetayate'ntastajjagadādīva paśyati |
arūpamapi rūpaṃ svaṃ yanna cetayate na tat || 15 ||
[Analyze grammar]

cetanācetanatvoktī tasyeśatvātsvadehage |
upadeśārthamevokte na sadviṣayamarthataḥ || 16 ||
[Analyze grammar]

na jagatsanna caivāsadbhāsate cetanācciti |
acetanānna kacati ka ivātra graho hi naḥ || 17 ||
[Analyze grammar]

acetanaṃ cetanaṃ ca spandāspandavadātmanaḥ |
svāyatte na kadarthasthe svasthaṃ pāṣāṇavatsthite || 18 ||
[Analyze grammar]

yasyekṣitasya no sattā nādhāro na ca kāraṇam |
so'hamityeva vo yakṣo na jāne kuta utthitaḥ || 19 ||
[Analyze grammar]

yasyāhamiti yakṣasya sattaivāsti na satyataḥ |
aho nu citraṃ teneme bhavanto vivaśīkṛtāḥ || 20 ||
[Analyze grammar]

kākatālīyavadbhrāntamahaṃ brahmaṇi bhāsate |
svameva rūpaṃ dṛgbhrāntau keśoṇḍukamivāmbare || 21 ||
[Analyze grammar]

brahmaivāhaṃ jagaccātra kuto nāśasamudbhavau |
ato harṣaviṣādānāṃ kiṃ kveva kathamāspadam || 22 ||
[Analyze grammar]

sarveśvaratvādīśasya vibhātīdaṃ pracetitam |
acetitaṃ ca no bhāti tenācetitamastu te || 23 ||
[Analyze grammar]

kākatālīyavaccittvājjagadvadbhāti brahmakham |
svapnasaṅkalpapuravattattasmādbhidyate katham || 24 ||
[Analyze grammar]

yathormyādi jale vṛkṣe vā yathā sālabhañjikā |
yathā ghaṭādayo bhūmau tathā brahmaṇi sargatāḥ || 25 ||
[Analyze grammar]

anākṛtāvasaṃsthāne svacche yadanubhūyate |
tattadevāta uditaṃ kiṃ nāmāhaṃ jaganti kim || 26 ||
[Analyze grammar]

marutaḥ spandavaicitryaṃ sattayaiva yathā tathā |
brahmaṇo nissvabhāvasya jagadādyahamādi ca || 27 ||
[Analyze grammar]

yathābhre lakṣyate vṛkṣagajavājimṛgāditā |
asanniveśākṛtini sargāhantve tathā pare || 28 ||
[Analyze grammar]

sargo'vayavavadbhāti pare'navayave śive |
evaṃ tadupamaṃ viddhi kāryakāraṇavad yathā || 29 ||
[Analyze grammar]

ataśśāntamanāyāsaṃ nirupādhi gatabhramam |
jagato'sambhavādeva vyomavatsamamāsyatām || 30 ||
[Analyze grammar]

na bhavanto na ca vayaṃ na jaganti na khādayaḥ |
santi śāntamaśeṣeṇa brahmedaṃ nirbharaṃ sthitam || 31 ||
[Analyze grammar]

aśeṣeṣvaviśeṣeṣu śāntāśeṣaviśeṣatā |
satyā saivāhamityāśu tyaktvā mokṣāya bhāvyatām || 32 ||
[Analyze grammar]

vedanaṃ bandhanaṃ viddhi viddhi mokṣamavedanam |
yathāsthitaṃ yathācāraṃ bhava śāntamavedanam || 33 ||
[Analyze grammar]

draṣṭā na dṛśyatāṃ yāti citirnāyāti cetyatām |
cetyābhāvādajagati kaḥ kiṃ cetayatāṃ katham || 34 ||
[Analyze grammar]

draṣṭṛdṛśyadaśābhāvājjāgratyeva suṣuptavat |
śaradākāśakośābhamasattopamamāsyatām || 35 ||
[Analyze grammar]

tathaikaṃ brahma cidrūpe pavanaḥ spandane yathā |
atra cidbodhatā sargo mokṣo brahmaikabodhatā || 36 ||
[Analyze grammar]

citspando brahmamaruto yaḥ sa sarga iti smṛtaḥ |
nātra citspandanaṃ yatsyānnirvāṇaṃ tadudāhṛtam || 37 ||
[Analyze grammar]

bījamantaryathā vetti svaṃ rūpaṃ pallavādikam |
tathā mahācidantassthaṃ svaṃ rūpaṃ vetti sargatām || 38 ||
[Analyze grammar]

pattrādivedanādbījaṃ yathā pattrādi tiṣṭhati |
parā citsargasaṃvittestathā bhavati sargabhāḥ || 39 ||
[Analyze grammar]

yathā bhāvavikārābhāścitparā sargabhāstathā |
sarve bījādidṛṣṭāntāstadrūpā eva tanmayāḥ || 40 ||
[Analyze grammar]

nirvikāraṃ paraṃ brahmamayaṃ sarvamidaṃ jagat |
nirvikāramanādyantamevaṃ viddhi nirāmayam || 41 ||
[Analyze grammar]

nijasaṅkalpamātrātmā nijāsaṅkalpanātkṣayī |
dvaitādvaitavikāro'yaṃ saṅkalpanagaraṃ yathā || 42 ||
[Analyze grammar]

śūnyatvākāśayorbhedo yādṛśo'vagatastvayā |
bhedaṃ nirātmakaṃ viddhi tādṛśaṃ brahmasargayoḥ || 43 ||
[Analyze grammar]

mahācidrūpiṇī śāntā yā sattā brahmaṇaḥ parā |
khatā seyamahaṃ tvaṃ ca mā naro'smītyadho vraja || 44 ||
[Analyze grammar]

brahmaṇyasmiñjagadrūpe na kiñcidapi jāyate |
jātamapyatha naṣṭaṃ ca na naśyatyambuvīcivat || 45 ||
[Analyze grammar]

padārthaṃ brahmarūpeṇa brahmaivātmani tiṣṭhati |
avayavīvāvayave khe khaṃ vārīva vāriṇi || 46 ||
[Analyze grammar]

nimeṣārdhārdhabhāgena deśāddeśāntarasthitau |
yad rūpaṃ saṃvido madhye sa svabhāva upāsyatām || 47 ||
[Analyze grammar]

saṅkṣubdhamakṣubdhamiti dvirūpaṃ saṃvitsvarūpaṃ pravadanti santaḥ |
śreyaḥ paraṃ yena samīhase tvaṃ tadekaniṣṭho bhava māmatirbhūḥ || 48 ||
[Analyze grammar]