Chapter 190

satyāvabodhopadeśo nāma sargaḥ |
navatyuttaraśatatamaḥ sargaḥ |
vasiṣṭhaḥ |
svapauruṣeṇa svadhiyā satsaṅgamavikāsayā |
yadi nānīyate jñatvaṃ tadupāyo'sti netaraḥ || 1 ||
[Analyze grammar]

akalpitaṃ kalpitaṃ ca pratikalpanayā svayā |
tadevānyatvamādatte viṣatvamamṛtaṃ yathā || 2 ||
[Analyze grammar]

kalpanā cākalpanāntā muktatā tyaktakalpanam |
etacca bhogasantyāgapūrvaṃ sidhyati nānyathā || 3 ||
[Analyze grammar]

vacasā manasā cāntaśśabdārthāvavibhāvayan |
ya āste vardhate tasya kalpanopaśamaśśanaiḥ || 4 ||
[Analyze grammar]

varjayitvāhamityeva nāvidyāstītarātmikā |
śānte tvabhāvanādasminnānyo mokṣo'sti kaścana || 5 ||
[Analyze grammar]

ahambhāvamathādehaṃ kiñcicchrayasi naśyasi |
jagadādau ciraṃ tasmiṃstyakte śāmyasi sidhyasi || 6 ||
[Analyze grammar]

acetanādidaṃ sarvaṃ sadevāsadiva sthitam |
śāntaṃ yasyopalasyeva namastasmai mahātmane || 7 ||
[Analyze grammar]

acetanādidaṃ sarvamupalasyeva śāmyati |
śūnyākhyāntaḥ parālīnacittasyācittabhāvanāt || 8 ||
[Analyze grammar]

idamastvatha vā māstu cetitaṃ duḥkhavṛddhaye |
acetitaṃ sukhāyāntaracetanamacetanāt || 9 ||
[Analyze grammar]

dvau vyādhī dehino ghorāvayaṃ lokastathā paraḥ |
yābhyāṃ ghorāṇi duḥkhāni bhuṅkte sarvatra pīḍitaḥ || 10 ||
[Analyze grammar]

ihaloke yatante'jñā vyādhau bhogadurauṣadhaiḥ |
ājīvitaṃ yathāśakti cikitsā nāparāmaye || 11 ||
[Analyze grammar]

paralokamahāvyādhau prayatante cikitsitum |
śamasatsaṅgabodhādyairamṛtaiḥ puruṣottamāḥ || 12 ||
[Analyze grammar]

paralokacikitsāyāṃ sāvadhānā bhavanti ye |
mokṣamārgamahecchāyāṃ śamayuktyā jayanti te || 13 ||
[Analyze grammar]

ihaiva narakavyādheścikitsāṃ na karoti yaḥ |
gatvā nirauṣadhaṃ sthānaṃ sa rogī kiṃ kariṣyati || 14 ||
[Analyze grammar]

ihalokacikitsābhirjīvitaṃ yātu mā kṣayam |
ātmajñatauṣadhairajñāḥ paralokaścikitsyatām || 15 ||
[Analyze grammar]

āyurvāyucalatpattralambāmbukaṇabhaṅguram |
paralokamahāvyādhiryatnenāśu cikitsyatām || 16 ||
[Analyze grammar]

paralokamahāvyādhau yatnenāśu cikitsite |
dṛṣṭalokamayo vyādhiḥ svayamāśūpaśāmyati || 17 ||
[Analyze grammar]

saṃvinmātraṃ vidurjantuṃ tasya prasaraṇaṃ jagat |
paramāṇūdare'pyasti tacchailaśatavistaram || 18 ||
[Analyze grammar]

yatsaṃvidaḥ prasaraṇaṃ rūpālokamanāṃsi tat |
vyomanyevānubhūyante nātaḥ satyo jagadbhramaḥ || 19 ||
[Analyze grammar]

pralayeṣvapi dṛṣṭeṣu jagaddṛśyābhravibhramāḥ |
na naśyanti na jāyante bhrāntimātraikarūpiṇaḥ || 20 ||
[Analyze grammar]

bhogapaṅkārṇave magna ātmā nottāryate yadi |
svapauruṣacamatkṛtyā tadupāyo'sti netaraḥ || 21 ||
[Analyze grammar]

ajitātmā jano mūḍho rūḍho bhogaikakardame |
āpadāṃ pātratāmeti payasāmiva sāgaraḥ || 22 ||
[Analyze grammar]

jīvitasya yathā bālyaṃ dṛṣṭaṃ prathamakalpitam |
nirvāṇasya tathā bhogasantyāgo rāgaśāntidaḥ || 23 ||
[Analyze grammar]

tajjñasya jīvitanadī sakallolāpyasambhramā |
samaṃ vahati somyaiva citrasaṃstheva nīrasā || 24 ||
[Analyze grammar]

ajñajīvitanadyastu rasenātyantabhīṣaṇāḥ |
āvartāvṛttivikṣobhakallolāḥ sahavāhinaḥ || 25 ||
[Analyze grammar]

sargavegāḥ pravalganti saṃvitprasaraleśakāḥ |
dvicandrabālavetālamṛgāmbusvapnamohavat || 26 ||
[Analyze grammar]

saṃvidvāritaraṅgaughā bhānti sargāḥ sahasraśaḥ |
vicāritāstvasatyāste satyāstvanubhavabhramāt || 27 ||
[Analyze grammar]

jagantyākāśakośe'pi saṃvitprasaraṇabhramāt |
santīvāpyanubhūyante na tu satyāni tāni hi || 28 ||
[Analyze grammar]

saṃvidvikāsapayaso budbudaḥ sargavibhramaḥ |
ahamityādisadbhāvavikārākārarūpavān || 29 ||
[Analyze grammar]

saṃvinnirvāṇamajagatsaṃvidunmīlanaṃ jagat |
nāntarna bāhyaṃ nāsatyaṃ na satyaṃ sarvameva tat || 30 ||
[Analyze grammar]

cidrūpamajamavyaktamekamavyayamīśvaram |
svatvabhāvatvarahitaṃ brahma śāntātma khādapi || 31 ||
[Analyze grammar]

brahmaṇo nissvabhāvasya sargasaṃvedane svataḥ |
spandane pavanasyeva kāraṇaṃ nopayujyate || 32 ||
[Analyze grammar]

svapnānubhavavadbhānti brahmābdhau brahmavīcayaḥ |
sargatā vastutastvatra na svapno na ca sargatā || 33 ||
[Analyze grammar]

ekameva nirābhāsamacittvamajaḍaṃ samam |
na sannāsanna khaṃ nākhamidamadvayamavyayam || 34 ||
[Analyze grammar]

yathāsthitasyaiva sato yasyāsaṃvedanātmakam |
saṃvitpraśamanaṃ jātaṃ tamāhurmunisattamam || 35 ||
[Analyze grammar]

sato'pi mṛṇmayasyeva yasyāsaṃvedanātmakam |
sāhaṃ jagadvigalitaṃ tamāhurmunisattamam || 36 ||
[Analyze grammar]

yathā śāmyatyasaṅkalpātsaṅkalpanagaraṃ tathā |
vedanotthaṃ jagadahaṃ ceti śāmyatyavedanāt || 37 ||
[Analyze grammar]

svabhāvavarjaṃ śabdārthāḥ sarva eva sahetukāḥ |
svabhāvasya tu yo heturmuktestadanubhāvanam || 38 ||
[Analyze grammar]

na kasyacitpadārthasya svabhāvo'stīha kaścana |
mahācidambudravatāḥ sarvā evānubhūtayaḥ || 39 ||
[Analyze grammar]

mahācidanilaspandā etā evānubhūtayaḥ |
etāstā brahmagaganaśūnyatā iti budhyatām || 40 ||
[Analyze grammar]

vātaspandāvivābhinnau brahmasargau vibhinnatā |
tayostvasatyā svabhrānteḥ svapne svamaraṇopamā || 41 ||
[Analyze grammar]

bhrāntistu tāvattattvārthavicāro yāvadasphuṭaḥ |
vicāre tu sphuṭe bhrāntirbrahmatāmeva gacchati || 42 ||
[Analyze grammar]

bhrāntistvasatyāvastveva prekṣayāto na labhyate |
śaśaśṛṅgavadatyacchamato brahmaiva śiṣyate || 43 ||
[Analyze grammar]

anādimadhyāntamanantamacchaṃ samaṃ śivaṃ śāśvatamekameva |
sarvāṃ jarāmohavikārabhārabhrāntiṃ vimucyāmbarabhāvamehi || 44 ||
[Analyze grammar]