Chapter 176

jagajjālākāśasādharmyayogopadeśo nāma sargaḥ |
ṣaṭsaptatyuttaraśatatamaḥ sargaḥ |
rāmaḥ |
mune jīvasya yad rūpamākṛtigrahaṇaṃ tathā |
yathā ca paramārthatvaṃ sthānaṃ yaccāsya tadvada || 1 ||
[Analyze grammar]

vasiṣṭhaḥ |
svasaṅkalpāṅkacetyāṅkaṃ cidityaparanāmakam |
anantaṃ cetanākāśaṃ jīvaśabdena kathyate || 2 ||
[Analyze grammar]

na parāṇu na ca sthūlaṃ na śūnyaṃ na ca kiñcana |
cinmātraṃ svānubhūtyātma sarvagaṃ jīva ucyate || 3 ||
[Analyze grammar]

aṇīyasāmaṇīyāṃsaṃ sthaviṣṭhaṃ ca sthavīyasām |
nakiñcinmātrakaṃ caiva sarvaṃ jīvaṃ vidurbudhāḥ || 4 ||
[Analyze grammar]

yasya yasya padārthasya yo bhāvastena tatra tam |
sthitaṃ viddhi tadābhāsaṃ tadātmaikāntavedanāt || 5 ||
[Analyze grammar]

sa cetati yathā yatra yad yadāśu tadeva hi |
tathā tatra tadā rāma bhavatyanubhavātmakam || 6 ||
[Analyze grammar]

pavanasya yathā spandaścetyaṃ jīvasya vai tathā |
svasaṃvinmātranirṇeyaṃ nopadeśāmayakṣatam || 7 ||
[Analyze grammar]

yathaivāspandanādvātaḥ sannevaityasadātmatām |
tathaivācetanājjīvo jīvanneti parāṃ gatim || 8 ||
[Analyze grammar]

jīvaścidghanarūpatvādahamityeva cetanāt |
deśakālakriyādravyaśaktīrnirmāya tiṣṭhati || 9 ||
[Analyze grammar]

deśakālakriyādravyacarcitāṃ carcitāṃ svayam |
asatyāṃ satyavatsphārāṃ tāvanmātraśarīrakām || 10 ||
[Analyze grammar]

cetitāmasadākārāṃ prāleyaparamāṇutām |
paśyatyātmanyathātmatve svapne svamaraṇopamām || 11 ||
[Analyze grammar]

svapnasvāvayavānyatvasadṛśīṃ tāṃ vibhāvayan |
vismṛtya cetanīṃ sattāṃ tattāmevāśu gacchati || 12 ||
[Analyze grammar]

evaṃrūpo budhyamānaḥ procchūnatvamathātmani |
paśyatyāśu svamātmānaṃ candrabimbamiva drutam || 13 ||
[Analyze grammar]

ātmanyathendubimbātmanyasau saṃvittipañcakam |
kākatālīyavadbhinnamuditaṃ cetati svayam || 14 ||
[Analyze grammar]

pañcānāṃ saṃvidāṃ pañca bhinnānyaṅgānyasāvatha |
budhyate tāni tadrūparandhrāṇyanubhavatyapi || 15 ||
[Analyze grammar]

sa pañcāvayavaḥ paścād rājate puruṣo virāṭ |
anantākārasaṃvittiravyaktātmā nirāmayaḥ || 16 ||
[Analyze grammar]

manomayo'sāv uditaḥ parasmātprathamotthitaḥ |
ākāśaviśadaśśānto nityānantavibhāmayaḥ || 17 ||
[Analyze grammar]

sa cāpyapañcabhūtātmā pañcabhūtātmakopamaḥ |
virāḍātmaikapuruṣaḥ paramaḥ parameśvaraḥ || 18 ||
[Analyze grammar]

svayamevāśu bhavati svayameva vilīyate |
svayameva prasarati svayaṃ saṅkocameti ca || 19 ||
[Analyze grammar]

svasaṅkalpakṛtenāsau kalpaughena kṣaṇena vā |
yadṛcchayodeti punaḥ punarbhūtvopaśāmyati || 20 ||
[Analyze grammar]

manomātraikarūpātmā prakṛterdeha eṣa saḥ |
eṣa puryaṣṭakaṃ proktaḥ sarvasyaivātivāhikaḥ || 21 ||
[Analyze grammar]

sthūlaḥ sūkṣmo'mbarātmaiṣa vyakto'vyakto'ntavarjitaḥ |
sarvasya bahirantaśca nakiñcitkiñcideva ca || 22 ||
[Analyze grammar]

aṅgāni rāma tasyāṣṭau manaṣṣaṣṭhāni pañca ca |
sāhambhāvānīndriyāṇi bhāvābhāvamayāni ca || 23 ||
[Analyze grammar]

tena gītā ime vedāḥ saha śabdārthakalpanaiḥ |
niyatiḥ sthāpitā tena tathādyāpi yathā sthitā || 24 ||
[Analyze grammar]

anantamūrdhvaṃ mūrdhāsya tathādhaḥ pādayostalam |
aparākāśamudaramidaṃ brahmāṇḍamaṇḍalam || 25 ||
[Analyze grammar]

lokāntarāṇyanantāni pārśukāḥ kṣatajaṃ payaḥ |
māṃsapeśyaḥ kṣitidharāḥ saritaḥ santatāḥ sirāḥ || 26 ||
[Analyze grammar]

raktadhārā jaladhayo dvipānyevāntraveṣṭanam |
bāhavaḥ kakubhaḥ sphārāstārakā romasantatiḥ || 27 ||
[Analyze grammar]

pañcāśadanilaskandhā ekonāḥ prāṇavāyavaḥ |
mārtāṇḍamaṇḍalaṃ caṇḍaṃ pittaṃ jaṭharapāvakaḥ || 28 ||
[Analyze grammar]

śaśāṅkamaṇḍalaṃ jīvaśśleṣmā śukraṃ sitaṃ balam |
manaḥ saṅkalpakośātma sārātma paramāmṛtam || 29 ||
[Analyze grammar]

mūlaṃ śarīrakośasya bījaṃ karmadrumasya ca |
prasavaḥ sarvabhāvānāmindurānandakāraṇam || 30 ||
[Analyze grammar]

yadindumaṇḍalaṃ nāma sa samrāḍjīva ucyate |
śarīrakarmamanasāṃ bījaṃ mūlaṃ ca kāraṇam || 31 ||
[Analyze grammar]

asmādindunibhājjīvātprasaranti jagattraye |
jīvā manāṃsi karmāṇi sukhānyannāmṛtāni ca || 32 ||
[Analyze grammar]

virāja ete saṅkalpā brahmaviṣṇujinādayaḥ |
tasya cittacamatkārāḥ surāsuranabhaścarāḥ || 33 ||
[Analyze grammar]

citsvabhāvo budhyamānaḥ prāleyaparamāṇutām |
yadādau bhāvayatyāśu tadā tatraiva tiṣṭhati || 34 ||
[Analyze grammar]

tenaitadeva jīvasya sthānaṃ viddhi raghūdvaha |
pañcāvayavametattaccharīramanubhūyate || 35 ||
[Analyze grammar]

virāḍjīvāccandramaso jīvabhūtāni dehinām |
prasarantyannajātāni prāleyavisarātmanā || 36 ||
[Analyze grammar]

tānyeva dehideheṣu jīvā jīvanti jīviṣu |
manobhūtā viceṣṭante karma janmasu kāraṇam || 37 ||
[Analyze grammar]

evaṃ virāṭ sahasrāṇi mahākalpaśatāni ca |
gatānyatha bhaviṣyanti nānācārāṇi santi ca || 38 ||
[Analyze grammar]

sarvato'nubhavarūpayānayā sattayottamapadādabhinnayā |
antavarjitamahāṅgasaṅgayā tiṣṭhatīti puruṣaḥ paraṃ virāṭ || 39 ||
[Analyze grammar]