Chapter 163

vidyādharapraśno nāma sargaḥ |
triṣaṣṭyuttaraśatatamaḥ sargaḥ |
vidyādharaḥ |
yadudāramanāyāsaṃ kṣayātiśayavarjitam |
padaṃ pāvanamādyantarahitaṃ tadvadāśu me || 1 ||
[Analyze grammar]

etāvantamahaṃ kālaṃ supta āsaṃ jaḍātmakaḥ |
idānīṃ samprabuddho'smi prasādādātmano mune || 2 ||
[Analyze grammar]

manomahāmayottabdhaṃ lubdhamajñānavṛttiṣu |
māmuddhara durantehaṃ mohādahamiti sthitāt || 3 ||
[Analyze grammar]

śrīmatyapi patantyāśu śātanotkā durādhayaḥ |
guṇavatyagrapattre hi tuhinānīva paṅkaje || 4 ||
[Analyze grammar]

jāyante ca mriyante ca kevalaṃ jīrṇajantavaḥ |
na dharmāya na mokṣāya maṣakā iva paṅkaje || 5 ||
[Analyze grammar]

bhāvaistaireva taireva tucchalābhaviḍambanaiḥ |
cireṇa parikhinnāḥ smo vipralabdhāḥ punaḥ punaḥ || 6 ||
[Analyze grammar]

nāṇumapyavagacchāmi viśrāntiṃ śrāntamānasaḥ |
prabhramanbhogabhaṅgeṣu marubhūmiṣvivādhvagaḥ || 7 ||
[Analyze grammar]

āpātamadhurārambhā bhaṅgurā bhavahetavaḥ |
acireṇa vikāriṇyo bhīṣaṇā bhogabhūmayaḥ || 8 ||
[Analyze grammar]

mānāvamānaparayā durahaṅkārakāntayā |
na rame vāmayā tāta hatavidyādharaśriyā || 9 ||
[Analyze grammar]

dṛṣṭāścaitrarathodyānabhuvaḥ kusumakomalāḥ |
kalpavṛkṣalatādattasamastavibhavaśriyaḥ || 10 ||
[Analyze grammar]

vihṛtaṃ merukuñjeṣu vidyādharapureṣu ca |
vimānavaramālāsu vātaskandhasthalīṣu ca || 11 ||
[Analyze grammar]

viśrāntaṃ surasenāsu kāntābhujalatāsu ca |
hārihāravilāsāsu lokapālapurīṣu ca || 12 ||
[Analyze grammar]

na kiñciducitaṃ sādhu sarvamādhiviṣoṣmaṇā |
dagdhaṃ bhasmāyate tāta vijñātamadhunā mayā || 13 ||
[Analyze grammar]

rūpālokanalolena vanitānanagṛdhnunā |
sāvabhāsena doṣāya duḥkhaṃ nīto'smi cakṣuṣā || 14 ||
[Analyze grammar]

idaṃ guṇāvahaṃ nedamiti muktvā vikalpanam |
rūpamātrānusāritvādavastunyapi dhāvati || 15 ||
[Analyze grammar]

tāvadāyāti viratiṃ na śaṭhaṃ yāvadāpadam |
nānītavatparāṃ cetaḥ parānarthehitonmukham || 16 ||
[Analyze grammar]

ghrāṇametadanarthāya dhāvaccaivābhitaḥ sphuṭam |
na nivārayituṃ tāta śaknomīha hayaṃ yathā || 17 ||
[Analyze grammar]

gandhodakapraṇālena sukhaduḥkhānupātinā |
vairiṇevātidoṣeṣu ghrāṇenāsmi niyojitaḥ || 18 ||
[Analyze grammar]

ciraṃ rasanayā cāhamanayā nayahīnayā |
gardhagomāyugupteṣu duḥkhādriṣvalamāhataḥ || 19 ||
[Analyze grammar]

niṣeddhuṃ na ca śaknomi sparśalampaṭatāṃ tvacaḥ |
grīṣmakālasamiddhasya tāpamaṃśumato yathā || 20 ||
[Analyze grammar]

śubhaśabdarasārthinyo mune śravaṇaśaktayaḥ |
māṃ yojayanti viṣame tṛṇecchā hariṇaṃ yathā || 21 ||
[Analyze grammar]

praṇatāḥ priyakāriṇyaḥ prahvabhṛtyasamīritāḥ |
vādyageyaravonmiśrāśśubhaśabdaśriyaśśrutāḥ || 22 ||
[Analyze grammar]

śriyaḥ striyo diśaścaiva taṭyaścāmbhodhibhūbhṛtām |
dṛṣṭā vibhramahāriṇyaḥ prakvaṇanmaṇibhūṣaṇāḥ || 23 ||
[Analyze grammar]

ciramāsvāditāḥ svādu camatkāramanoramāḥ |
prahvakāntājanānītāṣṣaḍrasā guṇaśālinaḥ || 24 ||
[Analyze grammar]

kauśeyakāminīhārakusumāstaraṇānilāḥ |
nirvighnamabhitaḥ spṛṣṭā bhṛśamābhogabhūmiṣu || 25 ||
[Analyze grammar]

vadhūmukhauṣadhīpuṣpasamālambhanabhūmayaḥ |
anubhūtā mune gandhā mandānilasamīritāḥ || 26 ||
[Analyze grammar]

śrutaṃ dṛṣṭaṃ tathā spṛṣṭaṃ bhuktaṃ ghrātaṃ punaḥ punaḥ |
tatrāpi hi na tṛptāḥ smo dhigajñānavijṛmbhitaṃ || 27 ||
[Analyze grammar]

etāvanmātrasāre'smin saṃsāre vyastavigrahe |
saṃśuṣkavirase bhūyaḥ kiṃ bhajāmi vadāśu me || 28 ||
[Analyze grammar]

bhuktvā varṣasahasrāṇi durbhogapaṭalīmimām |
ābrahmastambaparyantaṃ na tṛptirupajāyate || 29 ||
[Analyze grammar]

sāmrājyaṃ suciraṃ kṛtvā tathā bhuktvā vadhūgaṇam |
bhaṅktvāpyarigaṇānuccaiḥ kimapūrvamavāpyate || 30 ||
[Analyze grammar]

yeṣāṃ dināśanaṃ nāsīd yairbhuktaṃ bhuvanatrayam |
te'pi te'pyacireṇaiva samaṃ bhasmatvamāgatāḥ || 31 ||
[Analyze grammar]

prāptena yena no bhūyaḥ prāptavyamavaśiṣyate |
tatprāptau yatnamātiṣṭhetkaṣṭayāpi hi ceṣṭayā || 32 ||
[Analyze grammar]

yena kāntāściraṃ bhuktā bhogāstasyeha jantubhiḥ |
dṛṣṭo na kasyacinmūrdhni tarurvyomaplavaśca vā || 33 ||
[Analyze grammar]

cirametāsu dūrāsu viṣayāraṇyarājiṣu |
indriyairvipralabdho'smi dhūrtabālairivārbhakaḥ || 34 ||
[Analyze grammar]

adya tvete parijñātā mayā svaviṣayārayaḥ |
kaṣṭā indriyanāmāno vañcayanti na māṃ punaḥ || 35 ||
[Analyze grammar]

saṃsāre jaṅgale śūnye mugdhaṃ naramṛgaṃ śaṭhāḥ |
āśvāsyāśvāsya nighnanti viṣayendriyalubdhakāḥ || 36 ||
[Analyze grammar]

viṣamāśāviṣairebhirviṣayendriyapannagaiḥ |
ye na daṣṭā na dṛṣṭāste dvitrā eva jagatyapi || 37 ||
[Analyze grammar]

bhogabhīmebhavalitāṃ tṛṣṇātaralavāgurām |
lobhograkaravālāḍhyāṃ kopakuntakulāṅkitām || 38 ||
[Analyze grammar]

dvandvajālarathavyāptāmahaṅkārānupālitām |
ceṣṭāturaṅgamākīrṇāṃ kāmakolāhalākulām || 39 ||
[Analyze grammar]

śarīrasīmāntagatāṃ durindriyapatākinīm |
ye jetumudyatāstāta ta eveha hi sadbhaṭāḥ || 40 ||
[Analyze grammar]

susādhyaḥ karaṭodbhedo mattairāvaṇadantinaḥ |
notpathapratipannānāṃ svendriyāṇāṃ vinigrahaḥ || 41 ||
[Analyze grammar]

pauruṣasya mahattvasya sattvasya mahataśśriyaḥ |
indriyākramaṇaṃ sādho sīmānto mahatāmiha || 42 ||
[Analyze grammar]

tāvaduttamatāmeti pumānapi divaukasām |
kṛpaṇairindriyairyāvanna svaireva nipīḍyate || 43 ||
[Analyze grammar]

yāvajjitendriyo jantustāvanmerurivonnataḥ |
jitaścedindriyairyāti tṛṇādapyapakṛṣṭatām || 44 ||
[Analyze grammar]

jitendriyā mahāsattvā ye ta eva narā bhuvi |
śeṣānahamimānmanye māṃsayantragaṇāṃścalān || 45 ||
[Analyze grammar]

manassenāpateḥ senāmimamindriyapañcakam |
jetuṃ cedasti me yatno jayāmi tadalaṃ mune || 46 ||
[Analyze grammar]

indriyottamarogāṇāṃ bhogāśāvarjanādṛte |
nauṣadhāni na tīrthāni na ca mantrāḥ praśāntaye || 47 ||
[Analyze grammar]

nīto'smi paramaṃ khedamabhidhāvadbhirindriyaiḥ |
eka eva mahāraṇye taskaraiḥ pathiko yathā || 48 ||
[Analyze grammar]

paṅkavantyaprasannāni madgudaurbhāgyavanti ca |
gandhiśevālatucchāni palvalānīndriyāṇi ca || 49 ||
[Analyze grammar]

duratikramaṇīyāni nīhāragahanāni ca |
jīvitānantajālāni jaṅgalānīndriyāṇi ca || 50 ||
[Analyze grammar]

paṅkajāni sarandhrāṇi sudurlakṣyaguṇāni ca |
granthimanti jaḍāṅgāni mṛṇālānīndriyāṇi ca || 51 ||
[Analyze grammar]

rūkṣāṇi ratnalubdhāni kallolavalitāni ca |
durgrahagrāhaghorāṇi kṣārāmbūnīndriyāṇi ca || 52 ||
[Analyze grammar]

bāndhavodvegadāyīni dehāntaraparāṇi ca |
karuṇākrandakārīṇi maraṇānīndriyāṇi ca || 53 ||
[Analyze grammar]

avivekiṣvamitrāṇi mitrāṇi ca vivekiṣu |
gahanātataśūnyāni kānanānīndriyāṇi ca || 54 ||
[Analyze grammar]

ghanāsphoṭānyasārāṇi malināni jaḍāni ca |
vidyutprakāśānyetāni mahābhrāṇīndriyāṇi ca || 55 ||
[Analyze grammar]

kṣudraprāṇigṛhītāni varjitāni kṛtātmabhiḥ |
rajastamo'bhibhūtāni svendriyāṇyavaṭāni ca || 56 ||
[Analyze grammar]

pātanaikāntadakṣāṇi doṣāśīviṣavanti ca |
rūkṣakaṇṭakalagnāni śvabhrāgrāṇīndriyāṇi ca || 57 ||
[Analyze grammar]

ātmambharīṇyanāryāṇi sāhasaikaratāni ca |
andhakāravikārīṇi rakṣāṃsi svendriyāṇi ca || 58 ||
[Analyze grammar]

antaśśūnyānyasārāṇi vakrāṇi granthimanti ca |
dahanaikāntayogyāni durdārūṇīndriyāṇi ca || 59 ||
[Analyze grammar]

ghanamohapratardāni duṣkūpagahanāni ca |
mahāvakaratucchāni kupurāṇīndriyāṇi ca || 60 ||
[Analyze grammar]

ananteṣu padārtheṣu karaṇāni ghaṭādiṣu |
sabhramāṇi sapaṅkāni cakrāṅgānīndriyāṇi ca || 61 ||
[Analyze grammar]

āpannimagnamimamevamakiñcanaṃ tvaṃ māmuddharoddharaṇaśīla dayodayena |
ye nāma kecana jagatsu jayanti santastatsaṅgamaṃ paramaśokaharaṃ vadanti || 62 ||
[Analyze grammar]