Chapter 161

dṛśyopaśamopadeśo nāma sargaḥ |
ekaṣaṣṭyuttaraśatatamaḥ sargaḥ |
vasiṣṭhaḥ |
sāhantādijagacchāntau bodhe saṃvitkalātmani |
dīpasaṃśāntisaṅkāśastyāgaḥ sidhyati nānyathā || 1 ||
[Analyze grammar]

na tyāgaḥ karmasantyāgo bodhastyāga iti smṛtaḥ |
ajagatpratibhaikātmā yo'nahantādiravyayaḥ || 2 ||
[Analyze grammar]

ayaṃ so'hamidaṃ tanme iti nissnehadīpavat |
śānte paramanirvāṇaṃ prabodhātmaiva śiṣyate || 3 ||
[Analyze grammar]

ayaṃ so'hamidaṃ tanme śāntamityeva yasya no |
na jñānaṃ tasya no śāntirna tyāgo na ca nirvṛtiḥ || 4 ||
[Analyze grammar]

mamedamayamevāhamityetāvati yaḥ kṣayaḥ |
bodhātmā śivaṃ śāntaṃ tu tasmādanyanna vidyate || 5 ||
[Analyze grammar]

ahamaṃśe citā kṣīṇe sarvameva kṣayaṃ gatam |
na kiñcicca kvacitkṣīṇaṃ nirvāṇaikaghanaṃ sthitam || 6 ||
[Analyze grammar]

ahaṃvidanahaṃvittvādeva śāmyatyavighnataḥ |
etāvanmātrasādhyeyaṃ kimeveyaṃ kadarthanā || 7 ||
[Analyze grammar]

ahaṃ nāhamiti bhrāntirna ca vittvādṛte'sti sā |
vittvaṃ cākāśaviśadamataḥ kvaiṣā bhramasthitiḥ || 8 ||
[Analyze grammar]

na bhramo bhramaṇaṃ naiva na bhrāntirbhramako'sti vā |
anālokanamevedamālokānnedamasti te || 9 ||
[Analyze grammar]

viddhi vinmātramevedamasadrūpopamaṃ tatam |
omalaṃ maunamāssvaivaṃ sarvaṃ nirvāṇamātrakam || 10 ||
[Analyze grammar]

yenaivāśu nimeṣeṇa tvahamityeva cetati |
tenaiva nāhamityeva cetitvāśu na śocyate || 11 ||
[Analyze grammar]

ahambhāvaṃ nañarthena nirvāpyārūḍhabāṇavat |
ajasramāsavakṣīvastiṣṭhāvaṣṭabdhatatpadaḥ || 12 ||
[Analyze grammar]

sanañarthāmahantāṃ tvaṃ cetannevamanāratam |
sarvabhāvairanārūḍho bhava tīrṇabhavārṇavaḥ || 13 ||
[Analyze grammar]

svabhāvamātrāvajaye svayaṃ yasya na vīratā |
tasyottamapadaprāptau paśorbrūhi kathaiva kā || 14 ||
[Analyze grammar]

ṣaḍvargo nirjitaḥ pūrvaṃ yenottamavidā svataḥ |
bhājanaṃ sa prakarṣāṇāṃ netaro naragardabhaḥ || 15 ||
[Analyze grammar]

yasya svāntarmanovṛttirjīyamānā jitātha vā |
viṣayaḥ sa vivekānāṃ sa pumāniti kathyate || 16 ||
[Analyze grammar]

artho dṛṣadivāmbhodhau yo ya āpatati tvayi |
tasmādeva palāyyāssva nāhamityeva bhāvanāt || 17 ||
[Analyze grammar]

nāhamasmīti buddhvāpi sopapattikamapyalam |
jñānājjño jñaptimātraṃ ca kimajña iva muhyasi || 18 ||
[Analyze grammar]

na jñe'hamarthatāstīha hemnīva kaṭakāditā |
bhrāntimātrādṛte sā ca śāmyatyasmaraṇena te || 19 ||
[Analyze grammar]

yo yo bhāva udetyantastvayi spanda ivānile |
nāhamasmīti cidvṛttyā tamanādhāratāṃ naya || 20 ||
[Analyze grammar]

lobho lajjā mado moho yenādāviti no jitāḥ |
nirarthakamanarthe'smin sa kimarthaṃ pravartate || 21 ||
[Analyze grammar]

ahantvaṃ pavane spanda iva yattvayi saṃsthitam |
paramātmani tannānyadetatspanda ivānile || 22 ||
[Analyze grammar]

asargasaṃvidā sargaḥ pare'stīti virājate |
sanniveśaviśeṣeṇa durartho'pi hi śobhate || 23 ||
[Analyze grammar]

paramātmā tu nodeti nāstaṃ yāti kadācana |
na cāsmādanyadastīti ko bhāvo'bhāva eva vā || 24 ||
[Analyze grammar]

paraṃ pare parāpūrṇaṃ śānte śāntaṃ śivaśśive |
ityevamātraṃ vitataṃ nāhaṃ na ca jaganna dhīḥ || 25 ||
[Analyze grammar]

anirvāṇaṃ vinirvāṇe śānte śāntaṃ śive śivam |
nirvāṇamapi nirvāṇe sanañarthaṃ na vāpi tat || 26 ||
[Analyze grammar]

śastrāghātāḥ prasahyante sahyante vyādhivedanāḥ |
nāhamityevamātrasya sahane kā kadarthanā || 27 ||
[Analyze grammar]

jagatpadārthasārthānāmahamityaṅkuro'kṣayaḥ |
tasminnirmūlatāṃ nīte jagannirmūlatāṃ gatam || 28 ||
[Analyze grammar]

bāṣpeṇevāhamarthena nissāreṇāpi sāravān |
śyāmalaḥ paramādarśastacchāntau samprasīdati || 29 ||
[Analyze grammar]

ahamarthaḥ pare vāyau spandastatpraśame tu tat |
anirdeśyamanābhāsamanantamajamavyayam || 30 ||
[Analyze grammar]

ahamarthaḥ puro dravyapratibimbakaraḥ pare |
ratne tadvilayādāste tadarāgamabimbanam || 31 ||
[Analyze grammar]

ahamarthaḥ puro dravyapratibimbapradaściti |
tacchāntau sā nirābhāsā paramā kevalāyate || 32 ||
[Analyze grammar]

ahamarthāmbude kṣīṇe paramārthaśarannabhaḥ |
parayānantayā lakṣmyā svacchayācchaṃ virājate || 33 ||
[Analyze grammar]

ahamarthamalonmuktamahantātāmramaṅga cet |
tadparaṃ paramābhāsaṃ sampannaṃ hemakāntimat || 34 ||
[Analyze grammar]

yathā nirabhidhārthaśrīrbhajatyavyapadeśyatām |
tathānahantāhanteyaṃ brahmatvamadhigacchati || 35 ||
[Analyze grammar]

satyahantve sthitaṃ brahma sanāmeva padārthavat |
śāntavatsadivāsadvattadvatsavyapadeśavat || 36 ||
[Analyze grammar]

ahamartho jagadbījaṃ yadi dagdhamabhāvanāt |
tadahaṃ tvaṃ jagadbandha ityādeḥ kalanaiva kā || 37 ||
[Analyze grammar]

sadbrahma śivamātmeti pare nāmakalaṅkitā |
udetyahantā kumbhatvādiva mṛddhātuvismṛtiḥ || 38 ||
[Analyze grammar]

ahamarthādiyaṃ bījātsattā viṣalatotthitā |
yasyāṃ jagantyanantāni phalānyāyānti yānti ca || 39 ||
[Analyze grammar]

sādridyūrvīnadīśeyaṃ rūpālokaiṣaṇādikā |
ahamarthasya maricabījasyāntaścamatkṛtiḥ || 40 ||
[Analyze grammar]

dyauḥ kṣamā vāyurākāśaṃ parvatāḥ sarito diśaḥ |
ityāmodo'hamarthograkusumasya vikāsinaḥ || 41 ||
[Analyze grammar]

ahamarthaḥ pravisṛtaḥ prakaṭīkurute jagat |
sadrūpālokamananaṃ pravṛtta iva vāsaraḥ || 42 ||
[Analyze grammar]

pravṛttena dinenābhā prakaṭīkriyate yathā |
asajjagadahantvena kṣaṇānnirmīyate tathā || 43 ||
[Analyze grammar]

ahamityarthadustailalavo brahmaṇi vāriṇi |
prasṛto yattadāśvetattrijagaccakrikaṃ sthitam || 44 ||
[Analyze grammar]

unmeṣamātreṇāhantā jagantyanubhavatyaho |
na nimeṣeṇa dṛgiva satyānītyapyasantyalam || 45 ||
[Analyze grammar]

ahamarthe pravisṛte saṃsāro hyanubhūyate |
nāntarlayaparikṣīṇe locanasyeva tārake || 46 ||
[Analyze grammar]

ahamaṃśe niraṃśatvaṃ nīte śāśvatasaṃvidā |
śāmyatīyamaśeṣeṇa saṃsāramṛgatṛṣṇikā || 47 ||
[Analyze grammar]

svasaṃvidbhāvanāmātrasādhye'sminvaravastuni |
siddhamātrātmani svairaṃ mā khedaṃ gaccha mā bhramīḥ || 48 ||
[Analyze grammar]

svayatnamātrasaṃsādhyādasahāyādisādhanāt |
anahaṃvedanānnānyacchreyaḥ paśyāmi te'nagha || 49 ||
[Analyze grammar]

vismṛtyāhantvamāssva pravisṛtavibhavo bhūṣitāśeṣaviśvo viṣvakśailāntarikṣakṣitijaladhimarunmārgarūpo'malātmā |
svasthaśśānto viśokaḥ karaṇamalakalāvarjito niṣprapañco nissañcāraścarātmā sakalamasakalaṃ ceti siddhāntasāraḥ || 50 ||
[Analyze grammar]