Chapter 153

cittābhāvapratipādanaṃ nāma sargaḥ |
tripañcāśaduttaraśatatamaḥ sargaḥ |
vasiṣṭhaḥ |
bhūmikātritayābhyāsādajñāne kṣayamāgate |
samyagjñānodaye citte pūrṇacandrodayopame || 1 ||
[Analyze grammar]

nirvibhāgamanādyantaṃ yogino yuktacetasaḥ |
samaṃ sarvaṃ prapaśyanti caturthīṃ bhūmikāmitāḥ || 2 ||
[Analyze grammar]

advaite sthairyamāyāte dvaite ca praśamaṃ gate |
paśyanti svapnaval lokaṃ caturthīṃ bhūmikāmitāḥ || 3 ||
[Analyze grammar]

bhede tvaprasṛtaprajñā abhede śāntabuddhayaḥ |
īṣaccheṣavido bhānti caturthīṃ bhūmikāmitāḥ || 4 ||
[Analyze grammar]

īṣaccheṣātivilayā ardhasuptābhasaṃvidaḥ |
bālakā iva ceṣṭante caturthīṃ bhūmikāmitāḥ || 5 ||
[Analyze grammar]

bhūbhṛtāmiva kāṭhinyamarkaraśmighanopamam |
paśyanti kalpanāṃśātma caturthīṃ bhūmikāmitāḥ || 6 ||
[Analyze grammar]

īpsitānīpsitānarthairjagadduḥkhe nimajjati |
tanmanāgapi nopaiti caturthīṃ bhūmikāmitaḥ || 7 ||
[Analyze grammar]

bhūmikātritayaṃ yāvattāvajjāgraditi sthitam |
caturthīṃ bhūmikāṃ prāpya svapnābhaṃ dṛśyate jagat || 8 ||
[Analyze grammar]

uttamapratibimbābhamavyavasthiti bhaṅguram |
dṛśyaṃ draṣṭā na jānāti caturthīṃ bhūmikāmitaḥ || 9 ||
[Analyze grammar]

rāmaḥ |
jāgratsvapnasuṣuptānāṃ yathāvadbrūhi lakṣaṇam |
turyasya turyātītasya mune yadi na khidyase || 10 ||
[Analyze grammar]

vasiṣṭhaḥ |
aparāmṛṣṭatattvasya yatpadārthaikabhāvanam |
amlānaṃ tadbhavejjāgradasadastu sadastu vā || 11 ||
[Analyze grammar]

bhāvinyā kṣaṇavidhvaṃsadhiyānutphullarūpayā |
asatyapratyayatayā yuktaṃ garbhaniṣaṇṇayā || 12 ||
[Analyze grammar]

jāgradevānubhūtaṃ yadasatyaṃ satyameva vā |
mlānamābilabuddhitvātsvapnamāhustamuttamāḥ || 13 ||
[Analyze grammar]

jāgratsvapnānubhavayoravaśyambhāvinoḥ punaḥ |
kamapyastamayaḥ kālaṃ yastamāhuḥ suṣuptakam || 14 ||
[Analyze grammar]

buddhatvācchāntabhedaṃ yadajāgratsvapnamakṣayam |
asuṣuptaṃ sthitaṃ svacchaṃ tatturyamiti kathyate || 15 ||
[Analyze grammar]

yatparāmṛṣṭatattvānāmapadārthavibhāvanam |
avasthātrayanirmuktaṃ tatturīyamiti sthitam || 16 ||
[Analyze grammar]

etaddaśātrayaṃ pūrvaṃ sarveṇaivānubhūyate |
jīvanmuktādṛte tveṣā turyāvasthā na labhyate || 17 ||
[Analyze grammar]

samyagjñānavataivāntaravasthātritayakṣaye |
cidākāśātmanācchena turyāvasthānubhūyate || 18 ||
[Analyze grammar]

videhamuktairyāvasthā turyātītānubhūyate |
turyasthiticirābhyāsairna vāggocarameti sā || 19 ||
[Analyze grammar]

na jīvanmuktaviṣayā turyātītadaśā yataḥ |
tato'syāḥ kathanaṃ nāsti brahmatvāditaratkvacit || 20 ||
[Analyze grammar]

na svapnasuptatājāgratkāraṇaṃ kāryakovida |
jāgratsvapnasuṣuptānāṃ parameva hi tiṣṭhati || 21 ||
[Analyze grammar]

jāgratsvapnatvamāyāti buddhiśyāmalatāvaśāt |
svapnaśca jāgradbhavati buddhinirmalatodayāt || 22 ||
[Analyze grammar]

ghanamohatayā jāgradapi yāti suṣuptatām |
svapnaścāpi tathaivaiṣa svabhāvo rāma saṃsṛteḥ || 23 ||
[Analyze grammar]

nidrālorapyanidrālo rāghavaitaddaśātrayam |
bhavatyā turyasamprāpteḥ kramānno tulyakālataḥ || 24 ||
[Analyze grammar]

turyāvasthasya cābhyāsādavasthātritayaṃ śanaiḥ |
śāmyati prauḍharūpāyāṃ śaradīva ghanabhramaḥ || 25 ||
[Analyze grammar]

turyāvasthāsthito bhūyo nāvasthātrayameti hi |
jīvannapi ciraṃ bhṛṣṭaṃ bījamaṅkuratāmiva || 26 ||
[Analyze grammar]

bhāsurākāramaskandhastambhaśākhādalādikam |
chāyāvṛkṣaṃ jagadvetti caturthīṃ bhūmikāmitaḥ || 27 ||
[Analyze grammar]

arthaśūnyasamārambhaṃ dṛśyamānamasanmayam |
bāleneva kṛtaṃ paṅkājjñaḥ paśyati jagattrayam || 28 ||
[Analyze grammar]

nānevaitāmanānāttāṃ taraṅgaracanāmiva |
nirvāsanāṃ spandamayīṃ jñaḥ paśyati jagatsthitim || 29 ||
[Analyze grammar]

adṛṣṭamitarācāraṃ śrutaṃ dūre kṣaṇakṣayam |
ajño deśamivāpūrvaṃ tajjñaḥ sarvaṃ prapaśyati || 30 ||
[Analyze grammar]

ajihvasvapnakathanaṃ bhāvanānubhavopamam |
bhramābhramātraṃ vibhrāntaṃ jñaḥ paśyati jagattrayam || 31 ||
[Analyze grammar]

nīhārasadṛśaṃ dūrāddṛśyamānabṛhadvapuḥ |
nakiñcinnipuṇāloke jñaḥ paśyati jagattrayam || 32 ||
[Analyze grammar]

śaradabhrasamaṃ sphāramāmṛṣṭaṃ sannakiñcana |
nakāryakāri śūnyātma jñaḥ paśyati jagattrayam || 33 ||
[Analyze grammar]

parāmarśāsahānekarāganirmitamaṇḍalam |
barhibarhasamākāraṃ jñaḥ paśyati jagattrayam || 34 ||
[Analyze grammar]

avidyamānaṃ bhramadaṃ prekṣitaṃ praśamaṃ gatam |
trastabālakayakṣābhaṃ jñaḥ paśyati jagattrayam || 35 ||
[Analyze grammar]

vistīrṇamapyanākrāntadeśaṃ paśyati sargakam |
ākhyāyikārambhamiva caturthīṃ bhūmikāmitaḥ || 36 ||
[Analyze grammar]

aspṛṣṭadeśakālāṃśamasatyamiva satyavat |
mahāravaṃ maunamayaṃ mahārambhamapakriyam || 37 ||
[Analyze grammar]

sthūlaṃ karmendriyālabhyaṃ jagatpaśyatyasadvapuḥ |
saṅkalpasainyasaṅkāśaṃ caturthīṃ bhūmikāmitaḥ || 38 ||
[Analyze grammar]

cittabhittigataṃ bhāvi citratantramiva sthitam |
paśyatyasargakaṃ sarvaṃ caturthīṃ bhūmikāmitaḥ || 39 ||
[Analyze grammar]

indrajālajalādarśapratibimbamivāsthitam |
sargaṃ sadānubhavati caturthīṃ bhūmikāmitaḥ || 40 ||
[Analyze grammar]

dravyabhāvakriyehānāmajñatvānmūkatāṃ gataḥ |
durdeśamiva vikrīto jñaḥ paśyati jagattrayam || 41 ||
[Analyze grammar]

atyantāpūrvasaṃsthānaṃ deśāntaramivālpadhīḥ |
aśūnyaṃ śūnyamevāti jñaḥ paśyati jagattrayam || 42 ||
[Analyze grammar]

anūḍhamuhyamānātma sthiraṃ calamasacca sat |
saridbimbasthapuravajjñaḥ paśyati jagattrayam || 43 ||
[Analyze grammar]

pratibimbitamambhodhāviva nirmajjadeva vā |
calite śapharaspandājjñaḥ paśyati jagattrayam || 44 ||
[Analyze grammar]

jātyandharūpānubhavamiva nāsanna sanmayam |
andhaprāgdṛṣṭarūpābhaṃ jñaḥ paśyati jagattrayam || 45 ||
[Analyze grammar]

masṛṇaikamahābhittau saṅkalpollikhitātmakam |
citrasainyamivābhāti jagajjñaṃ pratyarodhakam || 46 ||
[Analyze grammar]

ākāśabhittilikhitamalabdhamapi vāyunā |
cittacitrakṛtaścitraṃ jñaḥ paśyati jagattrayam || 47 ||
[Analyze grammar]

dṛśye patatyadṛśye'pi parayatnāvabodhitaḥ |
bahirdraṣṭaiva nāntarjño hṛdayenāparājitaḥ || 48 ||
[Analyze grammar]