Chapter 150

piṇḍadānanirṇayo nāma sargaḥ |
pañcāśaduttaraśatatamaḥ sargaḥ |
vasiṣṭhaḥ |
atraivodāharantīmamitihāsaṃ purātanam |
saṃvādaṃ daityanāthasya tathā devaguroḥ purā || 1 ||
[Analyze grammar]

atītaṣaṣṭhakalpasya pūrvamekādaśe manau |
caturyuge pañcadaśe tretāyāṃ vasudhātale || 2 ||
[Analyze grammar]

āsiddaityo balo nāma sākṣādbalamivoddhatam |
lasaddarpāvadalitadaityadānavarākṣasaḥ || 3 ||
[Analyze grammar]

utsāditāśeṣapuro bhuktāśeṣajanavrajaḥ |
ākrāntāśeṣabhuvano jitāśeṣasureśvaraḥ || 4 ||
[Analyze grammar]

trailokyaṃ tena nirjitya svīkṛtā vāsavasthitiḥ |
kṣuṇṇagrāmaṭikevaikā deśe'rājani dasyunā || 5 ||
[Analyze grammar]

śakraḥ saparivāro'sya bhṛtyatāmanujagmivān |
lokapālāpsarassiddhavidyādharagaṇaiḥ saha || 6 ||
[Analyze grammar]

sa pālayañjagadrājyaṃ hṛtvendratvaṃ śacīpateḥ |
yathāvadakhilaṃ samyagācāramanutasthivān || 7 ||
[Analyze grammar]

sa kadācitsabhāsaṃsthaḥ kathāprastāvataḥ kvacit |
naramṛtyukathāmadhye guruṃ papraccha vākpatim || 8 ||
[Analyze grammar]

balaḥ |
bhasmībhūtasya śāntasya punarāgamanaṃ kutaḥ |
paralokopalambhaśca śarīreṇa vinā kutaḥ || 9 ||
[Analyze grammar]

bṛhaspatiḥ |
mṛgatṛṣṇāmbuvaddeho jīvasya pratibhāsate |
asatyātmā svasaṃvitteḥ payasīva taraṅgakaḥ || 10 ||
[Analyze grammar]

na tattvato dahyate'sau jāyate na ca tattvataḥ |
na tattvataśca mriyate duḥkhaṃ cānubhavatyati || 11 ||
[Analyze grammar]

yādṛgbhāvo bhavatyeṣa jīvastatphalamaśnute |
nāsatyatvaṃ na satyatvaṃ kiñcidasyopayujyate || 12 ||
[Analyze grammar]

yayā kayācid yuktyaiva rājanbhāvanabhāvane |
vinivṛtte kva jīvatvaṃ bandhamokṣadṛśau kva ca || 13 ||
[Analyze grammar]

sadeho'haṃ hi jīvāmi ciramapyupalabhya ha |
cetatyahaṃ mṛto'smīti jīvaḥ svapna ivāvapuḥ || 14 ||
[Analyze grammar]

piṇḍadānādinā bhūyo bhāvitenāśu paśyati |
jāto'smīti tataḥ karmabhoktāsmīti ca cetati || 15 ||
[Analyze grammar]

iyaṃ mṛtirayaṃ vyādhiridaṃ maraṇamāgatam |
idaṃ jīvitametā me yonayaḥ sukhaduḥkhadāḥ || 16 ||
[Analyze grammar]

ityantaścetati pumāñjaladravavivṛttivat |
abhāvitaṃ bhāvitaṃ ca svacamatkārajaṃ ca tat || 17 ||
[Analyze grammar]

jīvitapratibhāso'tha maraṇapratibhāsanam |
anyatāpratibhāsāśca jīvasyaiva vyavasthitāḥ || 18 ||
[Analyze grammar]

na dehaḥ paramārthena vidyate na ca bhūtatā |
asadevedamābhāti sadiva bhramamātrakam || 19 ||
[Analyze grammar]

vedanaṃ viddhi saṃsāramavedanamasaṃsṛtim |
jīvo yādṛksaṃsṛtiḥ syāttādṛgeva ca cetati || 20 ||
[Analyze grammar]

etāvanmātrakaiveyaṃ yuktiruktā manīṣibhiḥ |
anubhūyata evaitatkimetāvati vibhramaḥ || 21 ||
[Analyze grammar]

jīve'ntarasti saṃsārastile tailamivābilam |
na saṃsārāntare jīvaḥ svapnādāviti dṛśyate || 22 ||
[Analyze grammar]

kaṭakatvaṃ suvarṇe'sti kaṭakatve na hematā |
avicāraṇayāstyetatprekṣayā neha vidyate || 23 ||
[Analyze grammar]

adhikaprekṣayā kaiścinna hemāpyanubhūyate |
ato na hema no jīvaḥ kaṭakatvaṃ ca nāṅga sat || 24 ||
[Analyze grammar]

yadantarasti tad rājannantarevānubhūyate |
manāgapyatra no bāhyasādhanādyupayujyate || 25 ||
[Analyze grammar]

mṛgatṛṣṇāmbu jīvādi tatsamāścānubhūtayaḥ |
vedanāvedanādyāstad yacchiṣṭaṃ tadavāggati || 26 ||
[Analyze grammar]

bhrama evodito mithyā bhramo mithyā vilīyate |
śeṣaṃ śāntamavāgyogyaṃ yattadasti na cāsti vā || 27 ||
[Analyze grammar]

ayaṃ mṛto'hamasmīti jīvo bhāvitabhāvanaḥ |
ajāto mriyate'nyatra jāto'smītyavagacchati || 28 ||
[Analyze grammar]

deśakālakriyādravyarāśīn svamananātmakān |
jīvako'nubhavatyantarjalaṃ dravarayāniva || 29 ||
[Analyze grammar]

pramāṇātītacidrūparūpatvājjīvako'pyasan |
tenānubhāvyānubhavau na santau nānubhāvakaḥ || 30 ||
[Analyze grammar]

asatyameva satyābhaṃ jīvaḥ svapratibhātmakam |
sabhūmyambaraśailārkaṃ vapuḥ paśyati vā na vā || 31 ||
[Analyze grammar]

jīvaḥ paśyati cedetattadanarthavijṛmbhaṇā |
na cetpaśyati cātmaiva tatparopaśamaśśivaḥ || 32 ||
[Analyze grammar]

nirastaśāstrārthavicāracāpalaṃ vilīnanānākulakāryagauravam |
asambhavatsānubhavodbhavabhramaṃ praśāntanirvāṇamaśeṣamīśvaraḥ || 33 ||
[Analyze grammar]