Chapter 148

pariṇativicārayogopadeśo nāma sargaḥ |
aṣṭacatvāriṃśaduttaraśatatamaḥ sargaḥ |
rāmaḥ |
bhagavanbhūmikāmadhyamaraṇoktiprasaṅgataḥ |
etaduktaṃ tvayā sāramidānīṃ tadudāhara || 1 ||
[Analyze grammar]

paralokagato yogī śubhasaṅkalpasaṃsṛtau |
bhogān surapure bhuktvā bhūyo bhavati kīdṛśaḥ || 2 ||
[Analyze grammar]

vasiṣṭhaḥ |
tataḥ sukṛtasambhāre duṣkṛte ca purākṛte |
bhogakṣaye parikṣīṇe jāyante yogino bhuvi || 3 ||
[Analyze grammar]

śucīnāṃ śrīmatāṃ gehe gupte guṇavatāṃ satām |
asatāṃ naiva paśyanti paiśunyābhimukhaṃ mukham || 4 ||
[Analyze grammar]

tatra prāgvāsanābhyastaṃ yogabhūmikramaṃ budhāḥ |
spṛṣṭvā paripatantyuccairuttaraṃ bhūmikākramam || 5 ||
[Analyze grammar]

tatrodvegamadaglānimohamātsaryavibhramaiḥ |
dūrojjhitāḥ pratiṣṭhante samaṃ somyā ivendavaḥ || 6 ||
[Analyze grammar]

asaṃsaktadhiyo dhīrā dhanyā dhavalabuddhayaḥ |
bhavanti bhavabhārasthāstṛtīyāṃ bhūmikāmitāḥ || 7 ||
[Analyze grammar]

jāgratsvapnasuṣuptāṃśaturyaturyātigābhidhā |
saptaprakārā brahmātmasatteyaṃ pāramātmikī || 8 ||
[Analyze grammar]

bhūmikātritayaṃ hyetad rāma jāgraditi sthitam |
tacca brāhmamavasthānamanyāsambhavasambhṛtam || 9 ||
[Analyze grammar]

bhūmikātritaye yogī sarvaṃ jāgradidaṃ sphuṭam |
paripaśyati saṃsāraṃ pṛthakkāryaśatākulam || 10 ||
[Analyze grammar]

ghaṭāditā ghaṭāṃśādau paṭāṃśādau paṭāditā |
vaṭāṃśādau vaṭāditvamavasthātrayasaṃsthitau || 11 ||
[Analyze grammar]

yathāvadbhedabuddhyedaṃ jagajjāgrati dṛśyate |
udeti yogayuktānāmatra kevalamāryatā || 12 ||
[Analyze grammar]

aparāmṛṣṭatattvasya yatpadārthaikabhāvanam |
amlānaṃ tadbhavejjāgradasadastu sadastu vā || 13 ||
[Analyze grammar]

kartavyamācaran kāryamakartavyamanācaran |
tiṣṭhati prakṛtācāro yaḥ sa ārya iti smṛtaḥ || 14 ||
[Analyze grammar]

yathācāraṃ yathāśāstraṃ yathācittaṃ yathāsthitam |
vyavahāramupādatte yaḥ sa ārya iti smṛtaḥ || 15 ||
[Analyze grammar]

prāptaṃ karmendriyairyāti nāprāptamabhivāñchati |
harṣāmarṣamadonmukto yaḥ sa ārya iti smṛtaḥ || 16 ||
[Analyze grammar]

prathamāyāmaṅkuritaṃ bhūmau vikasitaṃ tataḥ |
phalībhūtaṃ tṛtīyāyāmāryatvaṃ yogino bhavet || 17 ||
[Analyze grammar]

āryatāyāṃ mṛto yogī śubhasaṅkalpasambhṛtān |
bhogānbhuktvā kalpitāṃśca yogavāñjāyate punaḥ || 18 ||
[Analyze grammar]

rāmaḥ |
ādehaṃ bhāvitaṃ yatsyāttaddehānte'nubhūyate |
tanmuhūrte yugāvasthā kiṃ jīvenānubhūyate || 19 ||
[Analyze grammar]

vasiṣṭhaḥ |
yadidaṃ dṛśyate kiñcijjagatsthāvarajaṅgamam |
kālatrayavibhāgasthamādyantaparivarjitam || 20 ||
[Analyze grammar]

tadbrahmatilatailatvaṃ viddhi brahmavidāṃ vara |
yathā tile sthitaṃ tailaṃ tathedaṃ brahmaṇi sthitam || 21 ||
[Analyze grammar]

maraṇaṃ jīvitaṃ ceṣṭā jāḍyacittve sukhāsukhe |
itīdaṃ brahmaṇi brahma tile tailamiva sthitam || 22 ||
[Analyze grammar]

māyā jīvo manaścittamīhānīhā gatirjagat |
itīdaṃ brahmaṇi bṛhattile tailamiva sthitam || 23 ||
[Analyze grammar]

tilo'ntassaṃsthitaṃ tailaṃ yathānubhavati svayam |
tathānubhavati brahma svasminnevāntare jagat || 24 ||
[Analyze grammar]

cetatyantastilastailaṃ kvacitpūrvaṃ kvacitparam |
kvacidalpaṃ kvacidbhūri mlānaṃ śuddhaṃ kvacid yathā || 25 ||
[Analyze grammar]

cetatyantastathā brahma kvacijjāḍyaṃ kvaciccitim |
kvaciccittādi śailādi kvacidākāśatāṃ kvacit || 26 ||
[Analyze grammar]

kvacicchūnyaṃ kvacitspandaṃ kvacitkālaṃ kvaciddiśam |
kvacicchabdaṃ kvacicchāntaṃ kvacittanu kvacidghanam || 27 ||
[Analyze grammar]

tamastejaśśubhaṃ pāpamahaṃ tvaṃ tāni tatra tat |
deśaṃ tattvamatattvaṃ prāgadya sattvamasadbalam || 28 ||
[Analyze grammar]

evamekamanānaiva nānevāste paraṃ padam |
daṇḍacakralatākāraistaraṅgairambvivāmbhasi || 29 ||
[Analyze grammar]

evaṃ sarvātmani tate kvacitkiñcitprakāśate |
advitīyamanādyante dravatvamiva vāriṇi || 30 ||
[Analyze grammar]

tanmṛtiprasare rāma muhūrtaṃ jaḍatābhrame |
cirācirapratyayini praśnaste nopapadyate || 31 ||
[Analyze grammar]

pratibhātmani vistāre yad yathā pratibhāsate |
sa eva tattathā tena kimivātra vikalpyate || 32 ||
[Analyze grammar]

kiṃ dravaspandane vārimarutoriva no yathā |
tayostadātmakatayā yuktaḥ praśno bhavādṛśām || 33 ||
[Analyze grammar]

brahmātmani tathā sarge sargatāpratyaye kṛte |
kiṃ bhūḥ kiṃ khaṃ kimāśeti praśnaste rāma nocitaḥ || 34 ||
[Analyze grammar]

etasmācca padācchuddhāl luṭhitānāṃ bhavārṇave |
bhūtānāṃ sucirābhyastā vāsanaivātra kāraṇaṃ || 35 ||
[Analyze grammar]

yad yathā saṃvidābhyastaṃ śaityauṣṇyādi nijodayam |
asadeva dvicandrābhaṃ tatsvabhāvaṃ vidurbudhāḥ || 36 ||
[Analyze grammar]

svabhāvasya svabhāvaṃ svamabuddhvaiva bhramākulāḥ |
avikalpyaḥ svabhāvo na iti niścayinaḥ sthitāḥ || 37 ||
[Analyze grammar]

asambhavātpare tattve svatvabhāvadṛśoḥ pṛthak |
svabhāvo brahmaṇītyuktiramūlā na virājate || 38 ||
[Analyze grammar]

evameva pravartante iti bhāvā bhavā iva |
evameva nivartante ityavṛttiyutā iva || 39 ||
[Analyze grammar]

na jāyate na mriyate kvacitkiñcitkadācana |
sarvaṃ śāntamanirdeśyaṃ śailotkīrṇamivākṣayam || 40 ||
[Analyze grammar]

ghanavāsanayocchūne mohe ghanatarātmani |
muhūrta eva kalpatvaṃ duḥkhitvādanumīyate || 41 ||
[Analyze grammar]

yathā brahmaṇi brahmatvaṃ tathaivaitāstadātmikāḥ |
nāmaśabdārtharahitāḥ saṃsthitāḥ svānubhūtayaḥ || 42 ||
[Analyze grammar]

vāsanā dīrghaduḥkhāya prekṣitā sā na vidyate |
nāhamityeva saṃvittyā svayatnena vilīyate || 43 ||
[Analyze grammar]

ahantānubhavo duḥkhamanahantodayaḥ sukham |
dṛṣaddhṛdayatābhāvādalametadudeti te || 44 ||
[Analyze grammar]

paramaṃ maunamāśritya yathāsthitamavasthitaḥ |
akhaṇḍametadāpnoti naro nirvighnamuttamam || 45 ||
[Analyze grammar]

brahmābhidhānāsti śilātivistṛtā tasyāṃ trilokīcirasālabhañjikā |
sthitā bhavābhāvarayādikātmikā cittānvitācittakakāṣṭhamauninī || 46 ||
[Analyze grammar]