Chapter 131

jīvanmuktacihnavicāro nāma sargaḥ |
ekatriṃśaduttaraśatatamaḥ sargaḥ |
vasiṣṭhaḥ |
bhūyaśśṛṇu mahābāho saṅgraheṇa vaco mama |
yadvacmi tava bodhāya mayūrasyeva vāridaḥ || 1 ||
[Analyze grammar]

tvadbodhanamupādeyamātmīyāttapaso mama |
abuddhapṛcchakā rāma ke raghūṇāṃ hi daiśikāḥ || 2 ||
[Analyze grammar]

janmāntaraśatābhyastaghanabhramaṇavihvalaḥ |
śṛṇu jīvan kathaṃ māyāpañjarātpravimucyate || 3 ||
[Analyze grammar]

kṛtāhambhāvanā saṃvijjīvādyabhidhayānvitā |
ahambhāvo'tra mithyaiva satyaṃ saṃvidudāhṛtā || 4 ||
[Analyze grammar]

yanmithyā tadbhramāyālpaṃ kālaṃ sphurati no ciram |
mohātmaśuktirupyādimṛgatṛṣṇādvicandravat || 5 ||
[Analyze grammar]

yanmithyā tatkṣayaṃ yāti yatsatyaṃ tanna naśyati |
ābālametajjagati prasiddhamaśanādivat || 6 ||
[Analyze grammar]

nāsato vidyate bhāvaḥ snigdhatvaṃ sikatāsviva |
sataśca dṛṣṭo nābhāvo bhekacūrṇādaṇorapi || 7 ||
[Analyze grammar]

yathā bhekarajo'lakṣyaṃ yāti prāvṛṣi bhekatām |
yatra yatra sthito jīvastathodeti na naśyati || 8 ||
[Analyze grammar]

kevalaṃ bhāvanāmātraṃ buddhyaivāsya pramārjaya |
ātmatvāyāṅga tāmrasya hematvāyeva kālatām || 9 ||
[Analyze grammar]

jagadbhāvāsthayā muktaḥ prayāti paramātmatām |
jīvo vimuktaṃ kālimnā tāmraṃ kanakatāmiva || 10 ||
[Analyze grammar]

sarveṣāmeva jīvānāṃ bhāvanā bhavabandhanī |
vāgureva vihaṅgānāmekāvaṣṭambhakāriṇī || 11 ||
[Analyze grammar]

ātmatattvādṛte nāsti madīyamahamityalam |
yuktito niścaye rūḍhe nūnaṃ galati bhāvanā || 12 ||
[Analyze grammar]

māṃsāsthyoghaśśavo dehaḥ khaṃ khamadrigaṇo jagat |
buddhyādayo vikalpāṃśāḥ ko'haṃ mama kathaṃ ca kim || 13 ||
[Analyze grammar]

saṃvido'nantaśuddhāyāḥ kilākalitacetasaḥ |
iyattopaśamaṃ yāti bhāvanāpralaye sati || 14 ||
[Analyze grammar]

samyagdarśanamevāsyā bhāvanāyā viśāmpate |
vināśaṃ viddhyanantābhaṃ yāminyā divasaṃ yathā || 15 ||
[Analyze grammar]

praśāntavāsano jīva ekatāṃ yāti cidghane |
ghṛte ghṛtaṃ jale toyaṃ kṣīre kṣīramivārpitam || 16 ||
[Analyze grammar]

atadātmā tadātmā ca jīvaḥ prasphuratīśvare |
jvālāyāṃ tu yathāloko yathā gandhalavaḥ kṣitau || 17 ||
[Analyze grammar]

yenaikatāṃ bhāvayati jīvastadbhavati kṣaṇāt |
yaccittastanmayo jantuḥ kenaitannānubhūyate || 18 ||
[Analyze grammar]

brahmabhāvanayā jīvo brahmatāmeti śāśvatīm |
amṛtaṃ bhāvyate yena so'mṛtībhavati svayam || 19 ||
[Analyze grammar]

abrahmabhāvanājjīvo dīnatāmetya naśyati |
viṣabhāvanayaivāṅga viṣībhavati mānavaḥ || 20 ||
[Analyze grammar]

ātmanaḥ saṃvido'cchasya saṃvedyakalanāmalam |
sampramārjyoditaḥ saṃvidātmā vyavaharānagha || 21 ||
[Analyze grammar]

rāmaḥ |
svedotthadaṃśayaukāntaṃ bhūtajātaṃ surādyapi |
kiṃ sarvameva karmotthamuta kiñcidvadeti me || 22 ||
[Analyze grammar]

vasiṣṭhaḥ |
caturdaśavidhasyāsya bhūtajātasya rāghava |
kiñcitsakāraṇaṃ jātaṃ prāktanairātmakarmabhiḥ || 23 ||
[Analyze grammar]

kiñcinniṣkāraṇaṃ jātaṃ kacanaṃ sumaṇeriva |
svabhāvato'dhunā karma kāraṇāttaṃ bhaviṣyati || 24 ||
[Analyze grammar]

rāmaḥ |
hārdāndhakāramārtāṇḍa saṃśayābdānilaprabho |
jagatāṃ bhūtajātasya jātasyātha bhaviṣyataḥ || 25 ||
[Analyze grammar]

kiṃ kathaṃ kāraṇāyātaṃ kiṃ kathaṃ cāpyakāraṇam |
jātaṃ vā jāyate vāpi kathaṃ vāpi janiṣyate || 26 ||
[Analyze grammar]

vasiṣṭhaḥ |
dikkālādyanavacchinnaṃ vyomnyavyomni ca saṃsthitam |
cidvyomānubhavaprāpyamāmodaḥ pavane yathā || 27 ||
[Analyze grammar]

kha ivārko'mbudavyāpto vaṭabīja ivāṅkuraḥ |
vāyau spanda ivālakṣyaṃ vyomnyavyomni ca cetanam || 28 ||
[Analyze grammar]

tatkvacinnityamacalaṃ śāntaṃ samasamasthiti |
brahmāṇḍapārāmbaravadanantamavikāri ca || 29 ||
[Analyze grammar]

kvacitsvabhāvajātspandātsphuratyagniriva tviṣā |
bhūtatanmātrabhāvena jagattāṃ samupeyuṣā || 30 ||
[Analyze grammar]

kvacitprākspandasampannabhūtatanmātrarañjanāt |
bhūtatvaṃ samupādatte hemāṅgadadaśāmiva || 31 ||
[Analyze grammar]

yathā sattvamupekṣya svaṃ śanairvipro durīhayā |
aṅgīkaroti śūdratvaṃ tathā jāḍyaṃ cidīśvaraḥ || 32 ||
[Analyze grammar]

bhūtāni dvividhānyevaṃ pratisargaṃ sphuranti hi |
adyacitspandajātāni ciracitspandajāni ca || 33 ||
[Analyze grammar]

tatra ye citsvabhāvotthaspandajāste hi jīvakāḥ |
niṣkāraṇaṃ samutpannā rucayaḥ sanmaṇeriva || 34 ||
[Analyze grammar]

sakāraṇatvamadhunā gantavyaṃ taiḥ svakarmabhiḥ |
daśāsu bandhamokṣāsu nāśe janmani karmaṇi || 35 ||
[Analyze grammar]

īśvarātsamupāgatya bhuktajanmāntarāstu ye |
jātā janmani teṣāṃ hi prāktanaṃ karmakāraṇam || 36 ||
[Analyze grammar]

adhunaiva hi sampannā ye jīvā brahmaṇaḥ padāt |
te hyakāraṇajanmāno bhaviṣyajjanmakāraṇam || 37 ||
[Analyze grammar]

kāryakāraṇabhāvo'yamīdṛśo jīvakarmaṇoḥ |
jīvo'kāraṇajaḥ puṇyo dhanyaḥ kāraṇajaḥ smṛtaḥ || 38 ||
[Analyze grammar]

kecitpuṇyāḥ prajāyante keciddhanyāśca jīvakāḥ |
puṇyā dhanyatvamāyānti na dhanyā yānti puṇyatām || 39 ||
[Analyze grammar]

dhanyāḥ puṇyatvamagatā eva kecidvimokṣaṇāḥ |
dhanyatvānmokṣiṇaḥ keciddhanyatvādapi netare || 40 ||
[Analyze grammar]

vīruttṛṇalatāgulmayaukakīṭakhagādayaḥ |
surāsuranarāhīndrapiśācāśīviṣādayaḥ || 41 ||
[Analyze grammar]

keciddhanyāḥ kecitpuṇyāḥ keciddhāsyanti puṇyatām |
puṇyatvānmokṣiṇaḥ keciddhanyatvādvā tato'pi no || 42 ||
[Analyze grammar]

yathā ratnasya kacanaṃ spandanaṃ pavanasya ca |
yathauṣṇyamanalādeśca cinmātrasya tathā jagat || 43 ||
[Analyze grammar]

asamyagdarśanotpannaṃ puṃstvaṃ sthāṇau yathoditam |
kṣīyate samyagālokāddvitvameva tathātmani || 44 ||
[Analyze grammar]

cinmātrasyātiśuddhasya nissaṅkalpoditātmanaḥ |
anantasya prakāśasya sarvagatvād raghūdvaha || 45 ||
[Analyze grammar]

khādeva jāyate kaścitkaścidvyomnyeva līyate |
jīvaḥ saṅkalpamātrātmā madhāviva jaradghanaḥ || 46 ||
[Analyze grammar]

ātmānaṃ samyagālokya yaḥ kha eva vilīyate |
na sa sandṛśyate bhūyo himaṃ tāpadrutaṃ yathā || 47 ||
[Analyze grammar]

yastvapaśyan svamātmānaṃ saspandaḥ kalanātmabhiḥ |
karmabhiḥ sa sphuratyuccairvilīno jāyate punaḥ || 48 ||
[Analyze grammar]

yaḥ saṅkalpaparispandaiḥ sthaulyameti jaḍātmakaḥ |
prāvṛṣīva payovāhaḥ kṣīṇakṣīṇo'pyudetyasau || 49 ||
[Analyze grammar]

ātmatvāṃśānvitamapi citsaṅkalpaṃ raghūdvaha |
dūrīkuru mahāsiddhyai viṣasiktamivāśanam || 50 ||
[Analyze grammar]

nirvikalpamanādyantamudāsīnamavasthitam |
sarvātmaikaṃ samuditaṃ cidvyoma bhava bhūtaye || 51 ||
[Analyze grammar]

akāraṇamupāyānti sarve jīvāḥ parātpadāt |
paścātkāraṇatāṃ yānti bandhamokṣadaśāsviha || 52 ||
[Analyze grammar]

saṅkalpitvaṃ hi bandhasya kāranaṃ tatparityaja |
mokṣastu nissaṅkalpatvaṃ tadabhyāsaṃ dhiyā kuru || 53 ||
[Analyze grammar]

akāraṇaṃ tvakaraṇātsarvakāraṇakāraṇāt |
yāvannimeṣamavyaktājjīvaḥ sampadyate śivāt || 54 ||
[Analyze grammar]

tāvannimeṣa evāsau yāti kāraṇatāṃ svayam |
saṃsṛtau svāsvavasthāsu vīciṣviva calajjalam || 55 ||
[Analyze grammar]

sāvadhāno bhavātastvaṃ grāhyagrāhakasaṅgame |
ajasrameva saṅkalpadaśāḥ pariharañchanaiḥ || 56 ||
[Analyze grammar]

mā bhava grāhyabhāvātmā grāhakātmā ca mā bhava |
bhāvanāmakhilāṃ tyaktvā yacchiṣṭaṃ tanmayo bhava || 57 ||
[Analyze grammar]

grāhyagrāhakasambandhasāvadhāno hyanāratam |
akurvanvāpi kurvanvā muktimevānudhāvati || 58 ||
[Analyze grammar]

grāhyagrāhakarūpātmā hyajño rāma kṣaṇaṃ prati |
navaṃ navamupāyāti bandhanaṃ bhāvanāvaśāt || 59 ||
[Analyze grammar]

grāhyagrāhakasambandhe rasabhāvanayā svayā |
nimeṣaṃ prati jīvasya bandho gacchati pīnatām || 60 ||
[Analyze grammar]

grāhyagrāhakasambandhe vinaiva rasabhāvanām |
nimeṣaṃ prati jīvo'yamātmatāmeti mokṣabhāk || 61 ||
[Analyze grammar]

ajasraṃ yaṃ yamevārthaṃ patatyakṣagaṇo'nagha |
badhyate tatra rāgeṇa tatrārāgeṇa mucyate || 62 ||
[Analyze grammar]

kiñcicced rocate tubhyaṃ tadbaddho'si bhavasthitau |
na kiñcid rocate te cettanmukto'si bhavasthiteḥ || 63 ||
[Analyze grammar]

asmātpadārthanicayātsahasthāvarajaṅgamāt |
tṛṇāderdevaparyantānmā kiñcittava rocatām || 64 ||
[Analyze grammar]

ratirnityamanarthārthamaratiśśreyase nṛṇām |
antavattvād ratirduḥkhairanantairyojayennaram || 65 ||
[Analyze grammar]

aratiḥ sanyadaśnāsi yatkaroṣi jahāsi yat |
na kartāsi na bhoktāsi tatra muktamatiśśamī || 66 ||
[Analyze grammar]

neha prajāyate kiñcinneha kiñcidvinaśyati |
sarvaṃ śāntaṃ nirālambaṃ cidvyomāmalamātatam || 67 ||
[Analyze grammar]

santo'tītaṃ na śocanti bhaviṣyaccintayanti no |
vartamānaṃ ca gṛhṇanti kramaprāptaṃ sadānagha || 68 ||
[Analyze grammar]

sphuranti jīvapuṣpāṇi jātāni brahmapādape |
tajjānyatanmayānīva phenā iva mahārṇave || 69 ||
[Analyze grammar]

anyo'nyapratibimbena cidarṇavataraṅgakāḥ |
ekātmakā api dvitvaṃ yānti jīvā jagatsthitau || 70 ||
[Analyze grammar]

dṛḍhabhāvanayā jīvo manastāmupagacchati |
śītātiśayataḥ svacchaṃ payaḥ pāṣāṇatāmiva || 71 ||
[Analyze grammar]

manasi grathitāḥ pāśāstṛṣṇāmohamadādayaḥ |
vāgurāyāmiva khagāḥ methyāmiva ca tarṇakāḥ || 72 ||
[Analyze grammar]

manasaiva mano rāma cchedanīyaṃ vijānatā |
vivekatīkṣṇenātaptamayaseva balādayaḥ || 73 ||
[Analyze grammar]

ananyadavikārādijanitaṃ svasvabhāvajam |
vaicitryaṃ śikhipiñchasya yathā bhāti tathātmanaḥ || 74 ||
[Analyze grammar]

nakiñcitkiñcidapyātmā satyākāro'pyasadvapuḥ |
ākāśādapyalakṣyo'sau jagadrūpo'pyarūpavān || 75 ||
[Analyze grammar]

sālambe'pi nirālambo nirvikāro vikāriṇi |
sābhāse'pi nirābhāso naśyatyarthe na naśyati || 76 ||
[Analyze grammar]

grāhyaṃ ca grāhakaṃ caiva grahaṇaṃ ca raghūdvaha |
yatra sattāmupagataṃ tattvaṃ tatra sthiro bhava || 77 ||
[Analyze grammar]

manasaiva manaśchinddhi saṃsārabhramaśāntaye |
kṣālayanti malenaiva malaṃ kṣālanakovidāḥ || 78 ||
[Analyze grammar]

amanastvaṃ prayātasya na bhūyaste bhavo bhavet |
mananaṃ hi bhavaṃ viddhi svapnād yattanna tatkṣayāt || 79 ||
[Analyze grammar]

sarvaṃ cinmātramātmaiva nāstyanyā kalaneti vā |
buddhvā na jāyase bhūyaḥ sati cāsati cetasi || 80 ||
[Analyze grammar]

sarvaṃ cinmātramātmaiva nāstyanyaditi yā matiḥ |
tattvaṃ tadviddhi paramamunmanastvamajanmane || 81 ||
[Analyze grammar]

sati citte'pyacittatvaṃ yadātmatvaikabhāvanāt |
tadacittatvamākāre sati vāsati mokṣadam || 82 ||
[Analyze grammar]

sarvaṃ ciditi bhāvena rāgadveṣadṛśoḥ kṣaye |
citte satyapyacittatve jāte bhūyobhavaḥ kutaḥ || 83 ||
[Analyze grammar]

sukhāśayaiti saṅkalpaṃ jīvo duḥkhaṃ tato vrajet |
jīvo hi yatate bhūtyai samprāpnotyāpadaṃ parām || 84 ||
[Analyze grammar]

mano vicāramāruhya mananānarthamujjhati |
yatkaroti vimūḍhātmā tenaitannaśyati svayam || 85 ||
[Analyze grammar]

vivekaṃ prāpya cetaḥ svān saṅkalpānnāśayatyalam |
pūrvaṃ hi svajanān hanti durjanaḥ prāpya sampadam || 86 ||
[Analyze grammar]

svajanāneva dahati durjanaḥ prathamotthitaḥ |
rūkṣaiścaṭacaṭāsphoṭairveṇūnveṇvanalo yathā || 87 ||
[Analyze grammar]

prasāraṇātpradṛśyante sṛṣṭayo'ntargatāścitaḥ |
kadarkakasya vividhā yathā varṇakapaṅktayaḥ || 88 ||
[Analyze grammar]

samastaśaktikacitamekātma brahma saṃvṛtam |
vivṛtaṃ bhāti nānātve yātrāsviva kadarkakam || 89 ||
[Analyze grammar]

cinmātrālokitaṃ cittaṃ karotīmāṃ jagatsthitim |
nṛpekṣitaḥ pratīhāraḥ sāmantaracanāmiva || 90 ||
[Analyze grammar]

cidrūṣitasya manasaḥ karma saṃsṛtināmakam |
rasāsiktasya bījasya pattrapuṣpaphalaṃ yathā || 91 ||
[Analyze grammar]

atyullasadvividhabhaṅguravastujātaiściccakracañcalatayā samudeti viśvam |
tasyaiva samprati nivāraya cañcalatvaṃ buddhveha satyamatha vā ghanatāṃ nayasva || 92 ||
[Analyze grammar]