Chapter 128

paramārthayogopadeśo nāma sargaḥ |
aṣṭāviṃśatyuttaraśatatamaḥ sargaḥ |
manuḥ |
parasmātkāraṇādeko jīvaḥ prathamamutthitaḥ |
tasmājjīvakaṇā jātāḥ kaṇāstaptāyaso yathā || 1 ||
[Analyze grammar]

te devanāgagandharvavidyādharaśatābhidhāḥ |
sphurantyātmāmṛtāmbhodanirmalāmṛtabindavaḥ || 2 ||
[Analyze grammar]

svairasaṅkalpajālena valitā bandhamāgatāḥ |
svalālayeva tantutvaṃ gatayā kośakārakāḥ || 3 ||
[Analyze grammar]

svasaṅkalpena bhūtāni baddhānīti parasparam |
svatuṣeṇeva dhānyāni duḥkhānyanubhavantyataḥ || 4 ||
[Analyze grammar]

sa svasaṅkalpanatuṣo dahyate jñānavahninā |
yadā tadā bhavantyacchā navā muktākaṇā iva || 5 ||
[Analyze grammar]

bhūyo jagati jāyante na kadācana kecana |
te tatātmapadārūḍhā mūḍhatvāduddhṛtāśayāḥ || 6 ||
[Analyze grammar]

jagadvṛttāvavayavairmithaḥ kāraṇatāṃ gatam |
akāraṇaṃ jagadviddhi nāśotpattyoḥ svabhāvataḥ || 7 ||
[Analyze grammar]

yathāmbukumbheṣu nabho nārpitaṃ nāpyanarpitam |
tathātmā sarvadeheṣu na sthito nāpi cāsthitaḥ || 8 ||
[Analyze grammar]

sati kumbhe sati ca khe kumbhākāśābhidhā yathā |
satyātmani ca dehe ca dehasaṃvedanaṃ tathā || 9 ||
[Analyze grammar]

cetanācetanakalā nṛpa santi na kāścana |
kācidātmābhidhā sattā dehe sphurati kevalam || 10 ||
[Analyze grammar]

yathā dṛṅ nirmale vyomni ciranyastollasatyalam |
tathā sphurati dehābhā sattātmanyātmanāmikā || 11 ||
[Analyze grammar]

pūrvaṃ jīvāḥ svasaṅkalpairye jagatsusthitiṃ gatāḥ |
tatsaṅgādadya jīvatvaṃ yāntyanyā brahmaśaktayaḥ || 12 ||
[Analyze grammar]

yathā taskarasaṃsargādbadhyate'taskaro'pi hi |
tathā prāgjīvasaṃsargātprayātyātmakalā mitim || 13 ||
[Analyze grammar]

yāvatsvatā svadehādau tāvatsaṃsṛtibījatā |
yāvadviṣayabhogāśā jīvākhyā tāvadātmanaḥ || 14 ||
[Analyze grammar]

vivekavaśato jñatvājjāte dvaitaikyayoḥ kṣaye |
ātmā jīvatvamutsṛjya brahmatāmetyanāmayaḥ || 15 ||
[Analyze grammar]

jarājanmamṛtibhrānticakre bhramati mohitā |
vāsanātantubaddheyaṃ janatātāpabhāginī || 16 ||
[Analyze grammar]

na kasyacidahaṃ naiva kaścidevāhamīdṛśaḥ |
naiva kaścinmametyantarniścayāttyaja saṃsṛtim || 17 ||
[Analyze grammar]

sarvaṃ mamāhaṃ sarvasya caiveti dṛḍhaniścayāt |
tyaja saṃsṛtisaṃrambhaṃ svastho bhava bhavātigaḥ || 18 ||
[Analyze grammar]

ūrdhvādadhastvadhastācca punarūrdhvaṃ vrajaṃściram |
mā saṃsārāraghaṭṭasya cintārajjvāṃ ghaṭo bhava || 19 ||
[Analyze grammar]

idaṃ mamāhamasyeti vyavahāraghanabhramam |
ye mohātsanniṣevante te'dhastād yāntyadhaśśaṭhāḥ || 20 ||
[Analyze grammar]

asyāhameṣa me so'yamahamevammayātmani |
mohe buddhyā parityakte ūrdhvādūrdhvaṃ prayāsyajaḥ || 21 ||
[Analyze grammar]

mā sāgare śileva tvamadho'dho gaccha mohitaḥ |
kṣīrārṇavenduvadbodhādūrdhvādūrdhvataraṃ vraja || 22 ||
[Analyze grammar]

jalaphenavadutpannadhvaṃsitāmanubhāvayan |
vīruttṛṇalatāgulmagaṇanāṃ mā prapūraya || 23 ||
[Analyze grammar]

cittejo yaścidādityaḥ prasārayati sarvataḥ |
tena prakaṭitaṃ sārkacandratāraṃ jagadgṛham || 24 ||
[Analyze grammar]

tatprakāśaṃ svamātmānamavalambyāvilambitam |
āssva sampūritākāśaṃ dehādiṃ nṛpa paśya he || 25 ||
[Analyze grammar]

yathā tiṣṭhan svabhāvena sphaṭikaḥ kirati prabhāḥ |
tathā jaganti kirati ciddīptyā ciddivākaraḥ || 26 ||
[Analyze grammar]

yadātmanaiva vimalaṃ cittvena sphuraṇaṃ citaḥ |
tadidaṃ jagadābhogi sampannaṃ sphārasaṃvidaḥ || 27 ||
[Analyze grammar]

yadā brahma paraṃ brahma tatraiva brahma bṛṃhitam |
na tatra sambhavantyetā bhūtābhūtādikalpanāḥ || 28 ||
[Analyze grammar]

sarvaśaktitayā brahma cetastvādatiyātayā |
sattvaśaktyā sthitaṃ yatra jīvanmuktaṃ hi tatra tat || 29 ||
[Analyze grammar]

yatra brahmānantaśakticittaśaktyā vijṛmbhate |
viviktayā tatra narasuranāgāditāṃ gatam || 30 ||
[Analyze grammar]

bhrāntayā mūḍhayā yatra cittaśaktyā laye sthitam |
tatra tiryakpiśācādibhūtatāṃ samupāgatam || 31 ||
[Analyze grammar]

atyantamūḍhayā yatra suṣuptasamayā sthitam |
cittaśaktyā gataṃ tatra tarugulmatṛṇāditām || 32 ||
[Analyze grammar]

kṣīṇadehasahasrasya ciramūḍhasya cetasaḥ |
śilādyavayavaṃ viddhi kasyacitparvatasya vā || 33 ||
[Analyze grammar]

yathāmodena kusumaṃ mādhuryeṇa guḍo yathā |
vyāptaṃ saparvatākāśaṃ cittattvena jagattathā || 34 ||
[Analyze grammar]

kiñcitkṣubdhaṃ payaḥ kiñcitsomyarūpaṃ yathāmbudheḥ |
kiñcidaspandi kiñcicca spandirūpaṃ tathā citaḥ || 35 ||
[Analyze grammar]

yadaivaivaṃ cito rūpaṃ tataṃ buddhamakhaṇḍitam |
tadaiva tīrṇaḥ saṃsāraḥ parameśvaratāṃ gataiḥ || 36 ||
[Analyze grammar]

brahmendraviṣṇuvaruṇā yad yatkartuṃ samudyatāḥ |
tadahaṃ cidvapuḥ sarvaṃ karomītyeva bhāvayet || 37 ||
[Analyze grammar]

yeṣu yeṣu yathā yad yaddarśaneṣu nigadyate |
sarvamevāṅga tatsatyaṃ sarvameva hi sarvagam || 38 ||
[Analyze grammar]

yaṃ yaṃ deśaṃ videśaṃ vā kālaṃ vā kalanāṃ ca vā |
vetsi brahmaiva tatsarvaṃ yathecchasi tathā kuru || 39 ||
[Analyze grammar]

yad yadvibhāvyate rūpaṃ tattāmeti cidīśvaraḥ |
tāṃ tāmicchāṃ pūrayituṃ cintāmaṇivadātataḥ || 40 ||
[Analyze grammar]

yad yadvibhāvyate kiñcittattattena vivasvatā |
kriyate bhūṣyate samyag yojyate cānubhūyate || 41 ||
[Analyze grammar]

cinmātratvaṃ prayātasya tīrṇamṛtyoḥ svacetasaḥ |
yo bhavetparamānandaḥ kenāsāv upamīyate || 42 ||
[Analyze grammar]

sīmāntaḥ sarvaduḥkhānāṃ mṛtyureva jagattraye |
taṃ jitvā yaḥ parānandaḥ sa vaktuṃ kena pāryate || 43 ||
[Analyze grammar]

sarvāsāmeva dṛṣṭīnāṃ sarvāsāmeva sampadām |
parijñāya svamātmānamupari sthīyate ciram || 44 ||
[Analyze grammar]

apyanantā mahānto'pi vajrabhedakarā api |
śuddhaṃ khamiva bādhante tajjñaṃ doṣā na kecana || 45 ||
[Analyze grammar]

jarāmaraṇajanmādyāḥ samastā doṣadṛṣṭayaḥ |
ātmajñānaikaparyantā yathābdhyantāḥ saridrayāḥ || 46 ||
[Analyze grammar]

tāvatprakṛtirālolā yatate duḥkhasaṅkṣaye |
yāvatpaśyati nātmānaṃ tamālokyopaśāmyati || 47 ||
[Analyze grammar]

yathā puṣpaṃ samāsādya naśyanti śaraveṇavaḥ |
tathātmatvaṃ samāsādya manobuddhīndriyādayaḥ || 48 ||
[Analyze grammar]

sarvamādau jagacchūnyaṃ śūnyamante ca bhūpate |
ataśśūnyātmakaṃ hyetadviddhi madhye'pi śūnyakam || 49 ||
[Analyze grammar]

nāntaśśūnaṃ ca śūnyaṃ ca nācidrūpaṃ na cinmayam |
nātmarūpaṃ nānyarūpaṃ bhuvanaṃ bhāvayanbhava || 50 ||
[Analyze grammar]

etatsvarūpamāsādya prakṛtiḥ pariśāmyati |
svabhāvāccalitaṃ vastu kṣobhaṃ kṛtvā kva tiṣṭhatu || 51 ||
[Analyze grammar]

ajñānagranthinirbhedo mokṣa ityucyate'nagha |
na deśo mokṣanāmāsti na kālo netarā sthitiḥ || 52 ||
[Analyze grammar]

ahaṅkṛtervimohasya kṣayeṇeyaṃ vilīyate |
prakṛtirbhāvanānāmnī mokṣaḥ syādeṣa eva saḥ || 53 ||
[Analyze grammar]

eṣa eva śanairdehaṃ gālayitvopaśāmyati |
viveko viṣaye vācāṃ bhavatyabhavaniṃ gataḥ || 54 ||
[Analyze grammar]

yathābhūtamidaṃ jñātvā jāgataṃ vastuvibhramam |
bhāvayitvā yathājñānaṃ jñastiṣṭhati yathāsukham || 55 ||
[Analyze grammar]

praśāntaśāstrārthavicāracāpalo nivṛttanānārasakāvyakautukaḥ |
nirastaniśśeṣavikalpaviplavaḥ samaḥ sukhaṃ tiṣṭhasi śāśvatātmakaḥ || 56 ||
[Analyze grammar]