Chapter 127

mokṣasvarūpanirūpaṇaṃ nāma sargaḥ |
saptaviṃśatyuttaraśatatamaḥ sargaḥ |
manuḥ |
ātmanaivātmano lepaḥ ka iva syātkathaṃ kila |
ato nirlepa evātmā dvitīyasyātyasambhavāt || 1 ||
[Analyze grammar]

vāsanādivikalpo'sti vyatiriktaśca nātmanaḥ |
ātmaiva vāsanāśaktirjalameva yathormayaḥ || 2 ||
[Analyze grammar]

ātmā dehendriyatayā sphuradbhāvavikāritām |
dhatte'bhāvavikāro'pi taraṅgatvaṃ yathā payaḥ || 3 ||
[Analyze grammar]

avikāro'pi saṅkalpya vikārakalanāṃ mudhā |
vikārīva bhavatyuccaiḥ paśyatyuccairvijṛmbhitam || 4 ||
[Analyze grammar]

ātmano dṛśyate rājanyadvikāro'vikāriṇaḥ |
satyaṃ satyamasatyaṃ tatsvayametadvicāraya || 5 ||
[Analyze grammar]

kaṭakādi yathā hemno vivartādi tathātmanaḥ |
na vikāro'vikārasya sambhavatyavināśataḥ || 6 ||
[Analyze grammar]

na vikāro yathormitvaṃ vāra evaṃ jagaccitaḥ |
asatyālokanādbhrāntirdṛṣṭereva na vastunaḥ || 7 ||
[Analyze grammar]

yathāṅgadatvāddaṇḍatvaṃ gate hemni na śocyate |
mṛtamaṅgadahemeti na vikārādyapīti ca || 8 ||
[Analyze grammar]

tathāmbaratvātkuḍyatve sthite cidvyomni śocanam |
na yuktaṃ vyomasaṃvidvai mṛtā satyeva dhīmataḥ || 9 ||
[Analyze grammar]

dehasaṃvitkhasaṃvittvaṃ khasaṃviddehasaṃvidam |
yadi gacchati taddharṣaviṣādānāṃ ka āgamaḥ || 10 ||
[Analyze grammar]

pratyakcetanamābhāsaḥ saṃvidastīti niścaye |
bhāvānāṃ savikārāṇāṃ bhrāntijānāmabhāvanāt || 11 ||
[Analyze grammar]

balena svacamatkṛtyā nūnaṃ nīte cirodayam |
nirvāsanatve hṛdaye kuto jīvasya saṃsṛtiḥ || 12 ||
[Analyze grammar]

svasaṃvinmātravaicitryaṃ sādhye saṃsṛtisaṅkṣaye |
jantūnāṃ citramatyantaṃ yatsaṃrambha upasthitaḥ || 13 ||
[Analyze grammar]

saṃvinmātropaśamanaṃ jīvo yaḥ kurute balāt |
jaḍatvamavrajan svacchaḥ sa tīrṇo bhavasāgaram || 14 ||
[Analyze grammar]

saṃviccāpalajeyaṃ vaḥ saṃsṛtirbhavabandhanī |
śamaṃ tatpraśamādeti tasmāttatpraśamaṃ kuru || 15 ||
[Analyze grammar]

yaiva saṃvicchamaṃ yāti saiva buddhirvilīyate |
yaiva prāleyakaṇikā saiva tāpe vilīyate || 16 ||
[Analyze grammar]

na mriye na ca jīvāmi nāhaṃ sannāpyasanna kham |
ahaṃ nakiñcicciditi matvā jīvo na śocati || 17 ||
[Analyze grammar]

alepako'hamajaro nīrāgaśśāntavāsanaḥ |
nirmalo'smi cidākāśamiti matvā na śocati || 18 ||
[Analyze grammar]

ahamantādirahitaśśuddho buddho'jarāmaraḥ |
śāntaḥ samasamābhāsa iti matvā na śocati || 19 ||
[Analyze grammar]

jagatsarvapadārthānāṃ ciddīpo'haṃ prakāśanam |
ke te me janmamaraṇe iti matvā na śocati || 20 ||
[Analyze grammar]

tṛṇe'gnāvambare bhānau naranāgāmareṣu ca |
yaccidasmi tadeveti matvā ka iva śocati || 21 ||
[Analyze grammar]

tiryagūrdhvamadhastānme vyāpako mahimā citaḥ |
asyānantavilāsasya jñātveti ka iva kṣayī || 22 ||
[Analyze grammar]

upaśāntamahātāpāṃ parāṃ niṣṭhāmahaṃ gataḥ |
atha ko'yamahaṃ nāma mithyaiva pratyayoditaḥ || 23 ||
[Analyze grammar]

ajenātmā kila jñāto yadahaṃ buddha īśvaraḥ |
ātmanātmani viśrāntaṃ jaleneva jalārṇave || 24 ||
[Analyze grammar]

brahma brahmaiva sampannamakṣobhaṃ samatāṃ gatam |
jalamūrmivapustyaktvā svaṃ somyatvamivāgatam || 25 ||
[Analyze grammar]

nirahaṅkārarūpo'smi galito'smyasmi śāśvataḥ |
antaśśīto'smi śāmyāmi mṛgatṛṣṇeva prāvṛṣi || 26 ||
[Analyze grammar]

nirvṛto'smi cirāyaiva jāto'smyajavapurmahān |
iti jānanbhṛśaṃ jīvo baddho'pi na nibadhyate || 27 ||
[Analyze grammar]

na me bandho na me mokṣo nāhamasmi na cetarat |
yathābhūtārthadarśitvāditi paśyanna śocati || 28 ||
[Analyze grammar]

kurvato'pi na bandhāya karma tattvavido bhavet |
bhuñjāno'pi viṣaṃ tajjño na vinaśyati karhicit || 29 ||
[Analyze grammar]

prākśarīrakṛtaṃ karma mūlakāṣeṇa dahyate |
vartamānāvabodhena śuṣkaṃ tṛṇamivāgninā || 30 ||
[Analyze grammar]

baddhavāsanamartho yaḥ sevyate sukhayatyasau |
dadāti ca phalānīti svayamevānubhūyate || 31 ||
[Analyze grammar]

yatsukhāya tadevāśu vastu duḥkhāya nāśataḥ |
avinābhāviniṣṭhatvaṃ prasiddhaṃ sukhaduḥkhayoḥ || 32 ||
[Analyze grammar]

tanuvāsanamartho yaḥ sevyate vā vivāsanam |
nāsau sukhāya naivāto nāśātkālena duḥkhadaḥ || 33 ||
[Analyze grammar]

nirvāsanatayā spandaṃ kurvato'suptabālavat |
karmaṇo yoginastena te na karmaphalānvitāḥ || 34 ||
[Analyze grammar]

kṣīṇavāsanayā buddhyā karma yatkriyate'nagha |
tadbhṛṣṭabījavadbhūyo nāṅkuraṃ pravimuñcati || 35 ||
[Analyze grammar]

dehendriyādinā karma karaṇaughena kalpyate |
ekaḥ kartātra bhoktā vā ka ivāṅgopapadyate || 36 ||
[Analyze grammar]

anyaḥ paśyati bhuṅkte'nyaḥ paro'pyanubhavatyaṇuḥ |
anyasya sukhaduḥkhādi kasyaikasyātra kartṛtā || 37 ||
[Analyze grammar]

ātmā kartāpyakartāyamaudāsīnyena saṃsthitaḥ |
pratibimbeṣvivādarśo manaṣṣaṣṭhendriyātigaḥ || 38 ||
[Analyze grammar]

dehādayo jaḍāḥ sarve tasmādaṅga na kiñcana |
na kaścideva kurute sukṛteṣvapi karmasu || 39 ||
[Analyze grammar]

karma kurvatyapi prājñe tayāsaṃsaktayā dhiyā |
na kaścitkurute kiñciddehaḥ sphurati kevalam || 40 ||
[Analyze grammar]

tūṣṇīmapi sthito mūḍhaścintāsaṃsaktayā dhiyā |
karoti karma śailābhaṃ yad yugairapi na kṣayi || 41 ||
[Analyze grammar]

karmendriyāṇi saṃyamya ya āste manasā smaran |
indriyārthānvimūḍhātmā tasyānanteha kartṛtā || 42 ||
[Analyze grammar]

yastvindriyāṇi manasā niyamyārabhate'nagha |
karmendriyaiḥ karmayogamakartaiva sa mokṣabhāk || 43 ||
[Analyze grammar]

nirvāsanaṃ kṛtaṃ karma na kartāraṃ spṛśatyajam |
padmapattraṃ jalamiva nabhastalamivāmbudaḥ || 44 ||
[Analyze grammar]

phalāni nānudhāvanti yadā karmāṇyavāsanam |
tadā jīvaṃ na spṛśati karma janmaikakāraṇam || 45 ||
[Analyze grammar]

karmaṇo janmabījasya rasaḥ sarvatra vāsanā |
sā yadbhavā ca tasyaiva garbhe paśyati dehakam || 46 ||
[Analyze grammar]

jāyate tata evāśu kramādbhramati saṃsṛtau |
tasmādvāsanayaivāntarviyogaste'stu bhūtaye || 47 ||
[Analyze grammar]

bhāvanāḥ sarvabhāvebhyaḥ samutsṛjya samucchritaḥ |
śaśāṅkaśītalaḥ pūrṇo bhāsi bhāseva bhāskaraḥ || 48 ||
[Analyze grammar]

kriyamāṇā kṛtā karmatūlaśrīrdehaśalmaleḥ |
jñānānilasamuddhūtā vilayaṃ kvāpi gacchati || 49 ||
[Analyze grammar]

ātmajñatāṃ prayātasya tīrṇasya bhavasāgarāt |
icchato'pi samāyāti punarnājñatvamātmanaḥ || 50 ||
[Analyze grammar]

yathā dūragatotpattisthānaṃ rayavatī sarit |
na yātyevaṃ matirbuddhā punarmohaṃ na gacchati || 51 ||
[Analyze grammar]

sarvaiva hi kalā jantoranabhyāsena naśyati |
phaladāpi manojñāpi latevāsekavarjitā || 52 ||
[Analyze grammar]

eṣā jñānakalā tvantaḥ sakṛjjātā dine dine |
vṛddhimeti balādeva satāmapyuptaśālivat || 53 ||
[Analyze grammar]

yathā dadhyuddhṛtaṃ naiti punardadhnaikatāṃ ghṛtam |
tathā jñānoddhṛtā jñaptirnāyātyajñānatāṃ punaḥ || 54 ||
[Analyze grammar]

yathā parabhaṭavyūhaṃ vibhidyodeti sadbhaṭaḥ |
tathājñānaṃ vidāryāndhyamudeti jñānabhāskaraḥ || 55 ||
[Analyze grammar]

cidghanaṃ nirmalaṃ brahma śāntaṃ sarvamidaṃ tatam |
advaitaṃ dvaitavadbhāti nityamekamanāmayam || 56 ||
[Analyze grammar]

ekaḥ sphuratyakhilavastuṣu citsvarūpa ātmā paraḥ svajaladhiṣviva toyamaccham |
saṃśāntasaṅkalanabhūrikalāpamekaṃ sattāṃśamātramakhilaṃ jagadaṅga viddhi || 57 ||
[Analyze grammar]