Chapter 123

ikṣvākūpadeśe sargāvabhāsanaṃ nāma sargaḥ |
trayoviṃśatyuttaraśatatamaḥ sargaḥ |
manuḥ |
saṅkalponmukhatāṃ yātāḥ satyāścinmātrasaṃvidaḥ |
āpastaraṅgatvamiva yānti bhūmipa jīvatām || 1 ||
[Analyze grammar]

te jīvāḥ saṃsarantīha saṃsāre pūrvamutthite |
svakarmakaraṇāddeheṣvabjeṣviva madhuvratāḥ || 2 ||
[Analyze grammar]

sarvātmāpi paraṃ brahma kurvadeva karoti no |
jananiṣṭhāni divasakarmāṇīva divākaraḥ || 3 ||
[Analyze grammar]

calatyacetanamayo yathāyaskāntasannidhau |
tathā sphurati sargo'yaṃ svasthite paramātmani || 4 ||
[Analyze grammar]

svaparispandajo vāri yathāvartaḥ pravartate |
tathāyaṃ cinmaye jīve dehaḥ sampadyate svayam || 5 ||
[Analyze grammar]

yathālātaparispandāddhemacakraṃ pradṛśyate |
evaṃ svacetanaspandāddeho'yamavalokyate || 6 ||
[Analyze grammar]

yathā nadanadībhedādbahutvaṃ kalpyate'mbhasaḥ |
evamākārabhedena nānātvaṃ paramātmanaḥ || 7 ||
[Analyze grammar]

sukhaduḥkhadaśāmoho manasyevāsti nātmani |
keyūrakaṭakāditvaṃ saṅkalpe'sti na hemani || 8 ||
[Analyze grammar]

mūḍhe jīve manaścittamityādikalanaṃ viduḥ |
yathābhūtārthatattvajñe sattvametadudāhṛtam || 9 ||
[Analyze grammar]

dehādanantaraṃ sattvaṃ vyomatāmeti kevalam |
na jarāmaraṇārtīnāṃ bhūyo bhavati kāraṇam || 10 ||
[Analyze grammar]

yathāsphuratsphuradiva pratibimbaṃ girerbhavet |
tathākartaiva karteva lakṣyate cetanastanau || 11 ||
[Analyze grammar]

śārīreṣu vilāseṣu somya evāśayeśvaraḥ |
pratibimbaṃ vikāreṣu mukhasyevānuvartate || 12 ||
[Analyze grammar]

yathārkaścañcalo vāri dṛśyate na tu cañcalaḥ |
tathātmā cañcalo dehe dṛśyate na tu cañcalaḥ || 13 ||
[Analyze grammar]

yathā ghaṭeṣu naṣṭeṣu ghaṭākāśaṃ na naśyati |
tathā naṣṭeṣu deheṣu nātmā naśyati kasyacit || 14 ||
[Analyze grammar]

rūpālokamanaskārarahito'rthānurañjanam |
yathāmalo maṇirdhatte dhatte dehaṃ tatheśvaraḥ || 15 ||
[Analyze grammar]

rūpālokamanaskāraiḥ kiṃ vā madhurasastarum |
yathollāsayati proccaistathā ciddṛśyamaṇḍalam || 16 ||
[Analyze grammar]

trailokyavartini yathā madhuradravyasañcaye |
sthitaṃ mādhuryamakhile tathātmā vastujālake || 17 ||
[Analyze grammar]

yathārko gacchato yāti jantostiṣṭhati tiṣṭhataḥ |
mithyaiva na tu satyena tathātmā vapuṣāmiha || 18 ||
[Analyze grammar]

pratibimbavināśeṣu yathā na makurādayaḥ |
naśyanti tadvaddehasya nāśe nātmā vinaśyati || 19 ||
[Analyze grammar]

aṅgārādiṣu dagdheṣu yathā hema na dahyate |
tathā deheṣu naṣṭeṣu cinmātraṃ na vinaśyati || 20 ||
[Analyze grammar]

adṛśyo dṛśyate rāhurgṛhītena yathendunā |
tathānubhavamātrātmā cetyenātmāvalokyate || 21 ||
[Analyze grammar]

yadvatprakaṭatāmeti pratibimbārhatā maṇau |
pratibimbena tadvadvai cittvaṃ cetyena cetyate || 22 ||
[Analyze grammar]

saṅkalpajālamuktāyāścito yatsvasthamāsthitam |
kṣayātiśayanirmuktaṃ tadviddhi paramaṃ padam || 23 ||
[Analyze grammar]

sattvasthe buddhitattve'ntaḥ svayamātmopalabhyate |
ādarśe malamukte hi pratibimbaṃ pravartate || 24 ||
[Analyze grammar]

na śāstrairnāpi guruṇā dṛśyate parameśvaraḥ |
dṛśyate svayamevātmā svayā sattvasthayā dhiyā || 25 ||
[Analyze grammar]

ime dehādayaḥ sarve bhāvāḥ prakṛtirūpiṇaḥ |
nāpyasanto na santo'pi bhramamātrādṛte'nagha || 26 ||
[Analyze grammar]

pathikāḥ pathi dṛśyante rāgadveṣavimuktayā |
yathā dhiyā tathaivaite draṣṭavyāḥ svendriyādayaḥ || 27 ||
[Analyze grammar]

eteṣu nādaraḥ kāryaḥ satā naivāvadhīraṇam |
padārthamātratāniṣṭhāstiṣṭhantvete yathāsthitam || 28 ||
[Analyze grammar]

yadasti tanmayenaiva bhavitavyaṃ vijānatā |
ātmaiva jagatāmasti na dehādyarthajālakam || 29 ||
[Analyze grammar]

padārthajātaṃ dehādi vidā santyajya dūrataḥ |
āśītalāntaḥkaraṇo nityamātmamayo bhava || 30 ||
[Analyze grammar]

ātmaiva hyātmano bandhurātmanyātmaiva vidyate |
ātmātmanaivāhriyate sarvātmātmānubhūtitaḥ || 31 ||
[Analyze grammar]

yathā jalādṛte nāsti samudratvaṃ mahāmbudheḥ |
ātmatattvādṛte nāsti jagattvaṃ jagatastathā || 32 ||
[Analyze grammar]

yathārkaḥ kumbhalakṣeṣu tathātmā dehapaṅktiṣu |
nāstameti na codeti naṣṭānaṣṭāsu tāsvasau || 33 ||
[Analyze grammar]

anātmadhīḥ kvacidapi śuktau rajatatā yathā |
yodetyanagha mithyā sā sarvagatvādihātmanaḥ || 34 ||
[Analyze grammar]

deho'hamiti yā buddhiḥ sā saṃsāranibandhanī |
dehaduḥkhānupātitvādasāratvācca vastunaḥ || 35 ||
[Analyze grammar]

nakiñcinmātrarūpo'smi yathaite gaganādayaḥ |
iti yā śāśvatī buddhiḥ sā na saṃsārabandhanī || 36 ||
[Analyze grammar]

yathā vimalatoyāntarbahirantaśca bhānujam |
tejastiṣṭhati sarvatra tathātmā sarvavastuṣu || 37 ||
[Analyze grammar]

bhittau nabhasi pātāle puro dūre ca saṃsthitaḥ |
ātmā triṣvapi kāleṣu nāsau naśyati karhicit || 38 ||
[Analyze grammar]

chedādīnāmagamyaṃ khaṃ yathaivātmā tathaiva hi |
etāvanmātrako bhedo yaccinmātrātmatātmani || 39 ||
[Analyze grammar]

sanniveśāṃśavaicitryaṃ yathā hemno'ṅgadāditā |
ātmanastadatadrūpaṃ tathaiva jagadāditā || 40 ||
[Analyze grammar]

saritāmāsamudrāntaṃ yathaivāmbu vivartate |
utpannadhvaṃsinājasraṃ taraṅgaughena vāriṇi || 41 ||
[Analyze grammar]

ātmanyātmasamullāsastathaivāyaṃ vilokyate |
nānāpadārthajālena vināśābdhiṃ pradhāvatā || 42 ||
[Analyze grammar]

vināśavāḍavākrāntaṃ bhīmaṃ kālamahārṇavam |
jagajjālataraṅgiṇyo yānti sargataraṅgakāḥ || 43 ||
[Analyze grammar]

tasyāpyadyāpyapūrṇasya yaḥ pātā kālavāridheḥ |
tamātmānaṃ mahāgastyaṃ rājanbhāvaya vindhyavat || 44 ||
[Analyze grammar]

śāstrasaṃvyavahārārthaṃ saṃsārocchedanodyataiḥ |
ātmādikāḥ kṛtāḥ sañjñā vāgatītasya vastunaḥ || 45 ||
[Analyze grammar]

na rajjvāmasti sarpatvaṃ tanmithyā kaḥ prapaśyati |
nātmano'sti kvacidbandho mā mohādbhāvayāṅga tam || 46 ||
[Analyze grammar]

mohastadbhāvanāmātramāhurmohaharā narāḥ |
tameva bhāvanātyāgāttyaktvā vijvaratāṃ vraja || 47 ||
[Analyze grammar]

eṣa evāndhakāro'sāvetadeva paraṃ malam |
prāgabaddhasya bandhena saṅkalpo yaḥ kilātmanaḥ || 48 ||
[Analyze grammar]

anātmanyātmatāmasmindehādau dṛśyajālake |
tyaktvā sattvamupārūḍho gūḍhastiṣṭha yathāsukham || 49 ||
[Analyze grammar]

kucakoṭarasaṃsuptaṃ vismṛtya jananī sutam |
yathā roditi putrārthaṃ tathātmārthamayaṃ janaḥ || 50 ||
[Analyze grammar]

ajarāmaramātmānamabuddhvā pariroditi |
hā hato'hamanātho'haṃ naṣṭo'smīti jano mudhā || 51 ||
[Analyze grammar]

deśakālakriyābhede dehasthe maraṇābhidhe |
loko'nuśocatyātmānamaho nu khalu mūḍhatā || 52 ||
[Analyze grammar]

deśakālakriyābhedaṃ yadi deho'nudhāvati |
tadanāderanāśasya kimasyāgatamātmanaḥ || 53 ||
[Analyze grammar]

anyadbhuktaṃ vāntamanyadidaṃ tad yajjanavrajaiḥ |
dehasya nāśino nāśe ātmanāśo'nuśocyate || 54 ||
[Analyze grammar]

dehātmanormahīpāla savikārāvikārayoḥ |
suvarṇabhasmopamayoḥ sambandhaḥ ka ivaitayoḥ || 55 ||
[Analyze grammar]

nānākāravikārākhyaiḥ svavilāsairananyagaiḥ |
līlayaiva svamātmānamātmāyaṃ gopayan sthitaḥ || 56 ||
[Analyze grammar]

sarganirmāṇasaṃhārairmithaḥ kāraṇatāṃ gataiḥ |
akāraṇasvabhāvena vitsphuratyātmanātmani || 57 ||
[Analyze grammar]

krīḍatyātmā śiśuriva saṅkalpairlīlayombhitaiḥ |
tṛṇairmaṇimivātmānaṃ svacchamācchādya cañcalaiḥ || 58 ||
[Analyze grammar]

spandaprabhāṃ cidādityaḥ prasāryālokakāriṇīm |
jagaddināni racayanna kadācana khidyate || 59 ||
[Analyze grammar]

spandamātrātmaciddhātordeha eva jagatkramaḥ |
sanniveśo'pyabhinnātmā padārthasyeva saṃsthitaḥ || 60 ||
[Analyze grammar]

spandamātrātsvabhāvena citkaroti jagatkriyām |
saṃharatyaparispandādvārvīciracanāmiva || 61 ||
[Analyze grammar]

padārthānavibhāgena paśyanbuddhyādivarjitaḥ |
cinmātrabālo ramate sargakrīḍanakaiḥ svayam || 62 ||
[Analyze grammar]

bālaḥ krīḍanake jātaratiśśocati tatkṣaye |
svarūpe vismṛte yadvattadvadātmeha saṃsṛtau || 63 ||
[Analyze grammar]

nisspandāspandasaṃvitteḥ svayaṃ sā smaraṇena cit |
vittvamasyā viduḥ spandaṃ yadi vedyonmukhaṃ ca tat || 64 ||
[Analyze grammar]

aspandā spandavidbhrāntyā cidvismṛtyaiva śocati |
jhagityaspandanāmānaṃ mokṣametyopaśāmyati || 65 ||
[Analyze grammar]

nijamaspandanaṃ turyaṃ jāgratsvapnasuṣuptakaiḥ |
ācchādya śocati mudhā tadakṛtvā na śocati || 66 ||
[Analyze grammar]

jagajjālāya citspandā manobuddhīndriyādayaḥ |
samudyanti jalaspandā ivormyoghakaṇādayaḥ || 67 ||
[Analyze grammar]

saṅkalpanaṃ hi citspando'spando'saṅkalpanaṃ smṛtam |
brahmāsaṅkalpanaṃ viddhi nakiñcidiva yacca tat || 68 ||
[Analyze grammar]

yathā vāri parispandānnānākāraṃ vilokyate |
tadadvitīyamevaivaṃ cidbrahma paribṛṃhitam || 69 ||
[Analyze grammar]

cito'spandastvasaṅkalpastatturyaṃ brahma tadbhavet |
taṃ mokṣamāhustasmiṃstvaṃ nṛpa baddhapado bhava || 70 ||
[Analyze grammar]

saṅkalpena vihīnaścetspanda eva citernṛpa |
sā tadaspandanā citsyātsaṅkalpaḥ spanda ucyate || 71 ||
[Analyze grammar]

saṃsthāpya saṅkalpavikalpamuktaṃ cittattvamātmanyupaśāntaśaṅkaḥ |
spande'pyapaspandacidīśvarātmā svasthaḥ sukhī rājyamidaṃ praśādhi || 72 ||
[Analyze grammar]