Chapter 122

sattvasthalakṣaṇakathanaṃ nāma sargaḥ |
dvāviṃśatyuttaraśatatamaḥ sargaḥ |
vasiṣṭhaḥ |
bhavatāmādipuruṣa ikṣvākurnāma bhūpatiḥ |
ikṣvākuvaṃśaprabhavo yathā muktastathā śṛṇu || 1 ||
[Analyze grammar]

ikṣvākuriti vikhyāto bhūpo bhāskaravaṃśajaḥ |
āsītpatirmahīpānāṃ pitṝṇāmiva dharmarāṭ || 2 ||
[Analyze grammar]

himaśītasvabhāvo'pi padārthānantaraspṛśan |
madhyāhne sūryakāntādririva jvalati yo'riṣu || 3 ||
[Analyze grammar]

yamabandhutvamariṣu yena pāpāśayeṣu ca |
dīnāristrīdṛśā śyāmavapuṣā prakaṭīkṛtam || 4 ||
[Analyze grammar]

pratāpenārkavaṃśatvaṃ yenāriṣu vyatanyata |
somyatvaṃ tu suhṛdvipravadhūgurvādyabandhuṣu || 5 ||
[Analyze grammar]

yasyānanābjamāśritya lakṣmīrbhrūbhramarī sakhī |
amanyata harervakṣaḥ kṣapākusumapelavam || 6 ||
[Analyze grammar]

yasya śītalaśuklena yaśasā valitaṃ jagat |
karoti cakravākānāṃ pūrṇendūdayavibhramam || 7 ||
[Analyze grammar]

so'khaṇḍaśaktiprasaraṃ svārājyaṃ paripālayan |
kadācidekāntagato manasā samacintayat || 8 ||
[Analyze grammar]

jarāmaraṇasaṅkṣobhasukhaduḥkhabhramasthiteḥ |
asya dṛśyaprapañcasya ko hetuḥ syāditi svayam || 9 ||
[Analyze grammar]

jagato na vivedāsau kāraṇaṃ cintayannapi |
bālo'bhrastanitasyeva tenāsau paryatapyata || 10 ||
[Analyze grammar]

athaikadāpṛcchadasau brahmalokāgataṃ manum |
pūjitaṃ svasabhāsaṃsthaṃ bhagavantaṃ prajāpatim || 11 ||
[Analyze grammar]

ikṣvākuḥ |
saṃyojayati dhārṣṭyena bhagavanbhūritejasam |
bhavatprasāda evāyaṃ bhavantaṃ praṣṭumojasā || 12 ||
[Analyze grammar]

sphuratā hṛdaye nityaṃ dhūmaśyāmena tāpinā |
dahye'haṃ saṃśayenāntarvāḍaveneva vāridhiḥ || 13 ||
[Analyze grammar]

kutaḥ sargo'yamāyātaḥ kiṃsvarūpaśca kathyate |
kathaṃ keṣvavatiṣṭhante jarārtimaraṇāpadaḥ || 14 ||
[Analyze grammar]

ahaṃ kathaṃ vā viṣamādasmātsaṃsṛtivibhramāt |
vimucyeya ghanāstīrṇājjālādiva vihaṅgamaḥ || 15 ||
[Analyze grammar]

tvamevāsya prapañcasya jānāsi sakalā gatīḥ |
gambhīrasyātilolasya varuṇo'mbunidheriva || 16 ||
[Analyze grammar]

sandehavṛkṣaparaśurhārdadhvāntadivākaraḥ |
paramāmṛtaśītāṃśustvamekaḥ parameśvaraḥ || 17 ||
[Analyze grammar]

manuḥ |
aho nu cirakālena viveke pravikāsini |
vitatānarthavicchettā sāraḥ praśnastvayā kṛtaḥ || 18 ||
[Analyze grammar]

saṃsārāmbhodhitaraṇaṃ paraṃ viśramaṇaṃ dhiyaḥ |
dṛśyatṛṇyāmahāvātaṃ yathāpṛṣṭamidaṃ śṛṇu || 19 ||
[Analyze grammar]

yadidaṃ dṛśyate kiñcittannāsti nṛpa kiñcana |
rajjvāmiva bhujaṅgatvamasadevedamutthitam || 20 ||
[Analyze grammar]

yathā gandharvanagaraṃ yathā vārimatirmarau |
yathā śuktau rajatatā yathā dvitvaṃ sudhānidhau || 21 ||
[Analyze grammar]

sarvaṃ mithyāvabhāsātma sphuratīdamasanmayam |
pravilolojjvalālātalocanabhramacakravat || 22 ||
[Analyze grammar]

yattu no dṛśyate kiñcid yannakiñciditi smṛtam |
manaṣṣaṣṭhendriyātītaṃ yatkhādapi nakiñcana || 23 ||
[Analyze grammar]

avināśaṃ tadastīha tattadātmeti kathyate |
tattattatparamaṃ brahma tattatsadamalaṃ param || 24 ||
[Analyze grammar]

anantabhūtaparṇāyā jātāyā vyomakānane |
ṛkṣajālakapuṣpāyāḥ sargavallyāstu tad rasaḥ || 25 ||
[Analyze grammar]

tattaccinmātramābhānaṃ yatparisphurati svayam |
akṣubdhāmbhodhijalavattajjagajjālatāṃ gatam || 26 ||
[Analyze grammar]

evaṃ parātsamāyātā rājan sargaparamparāḥ |
tasminneva mahādarśe pratibimbamupāgatāḥ || 27 ||
[Analyze grammar]

tāḥ svabhāvasamutpannā bahvyaḥ sphuraṇaśaktayaḥ |
paścātkāraṇatāṃ yānti mitho jīvādināmabhiḥ || 28 ||
[Analyze grammar]

kāścidbrahmāṇḍatāṃ yānti kāścidgacchanti bhūtatām |
anyannānātvamitarā bhavatyevaṃ jagatsthitiḥ || 29 ||
[Analyze grammar]

gṛhītakalanā brāhmyaśśaktayaḥ svayameva hi |
saṅkalpya mitajīvatvamahaṃjñānātmikāḥ sthitāḥ || 30 ||
[Analyze grammar]

tāḥ kośakārakrimivatsvayaṃ gacchanti bandhanam |
prāptāḥ parimitaṃ rūpaṃ rañjanaṃ sphaṭikā iva || 31 ||
[Analyze grammar]

bandho na sambhavatyeva tāḥ svayaṃ bandhanaṃ gatāḥ |
mugdhā hi bhītyā paśyanti yakṣaṃ mātṛstaneṣvapi || 32 ||
[Analyze grammar]

svabhāvataḥ samutthāya niṣkāraṇamakāraṇam |
mithaḥ kāraṇatāṃ yānti brāhmyaḥ sphuraṇaśaktayaḥ || 33 ||
[Analyze grammar]

na bandho'sti na mokṣo'sti brahmaivāsti nirāmayam |
naikyamasti na ca dvitvaṃ saṃvidbhānaṃ vijṛmbhate || 34 ||
[Analyze grammar]

ekaṃ yathā sphurati vāri taraṅgabhaṅgairevaṃ parisphurati cittamakiñcidetat |
tvaṃ bandhamokṣakalane pravimucya dūre svastho bhavābhayatayodayasāra eva || 35 ||
[Analyze grammar]