Chapter 114

cūḍālāprakaṭīkaraṇaṃ nāma sargaḥ |
caturdaśottaraśatatamaḥ sargaḥ |
vasiṣṭhaḥ |
tataḥ samudite sūrye vitamasyambare sthite |
samudgakādiva jaganmaṇāvasminvinirgate || 1 ||
[Analyze grammar]

vikasatyaruṇopānte cakṣuṣīvāmbujākare |
ācāreṣviva lokeṣu prasṛteṣvarkaraśmiṣu || 2 ||
[Analyze grammar]

dampatī tau samutthāya kṛtasandhyākramau sthitau |
pattrāsane mṛdusnigdhe kāntau kāñcanakandare || 3 ||
[Analyze grammar]

athotthāyātra cūḍālā ratnakumbhaṃ karasthitam || 4 ||
[Analyze grammar]

bhāryā bhartāramekānte svarājye'bhiṣiṣeca sā || 5 ||
[Analyze grammar]

saṅkalpopanate saiṃhe svabhiṣiktaṃ suviṣṭare |
sthitaṃ provāca tanvī sā cūḍālā devarūpiṇī || 6 ||
[Analyze grammar]

kevalaṃ maunamutsṛjya tejaśśāntamidaṃ prabho |
aṣṭānāṃ lokapālānāṃ tejāṃsyāhartumarhasi || 7 ||
[Analyze grammar]

cūḍālayeti sa prokto vane rājā śikhidhvajaḥ |
vadannevaṃ karomīti mahārājatvamāyayau || 8 ||
[Analyze grammar]

atha pratīhārapade tiṣṭhantīmāha māninīm |
mahādevīpade rājñi tvāṃ karomyabhiṣekinīm || 9 ||
[Analyze grammar]

ityuktvāsana āsthāpya mahādevīpade tadā |
abhiṣiktāṃ nṛpaḥ kṛtvā meghavāgāha tāṃ priyām || 10 ||
[Analyze grammar]

priye kamalapattrākṣi kṣaṇātsaṅkalpasambhavam |
mahāvibhavamuddāmaṃ sainyamāhartumarhasi || 11 ||
[Analyze grammar]

iti kāntavacaśśrutvā cūḍālā varavarṇinī |
sainyaṃ saṅkalpayāmāsa prāvṛḍghanamivodbhaṭam || 12 ||
[Analyze grammar]

sainyaṃ dadṛśatustattau vājivāraṇasaṅkulam |
patākāpūritākāśanīrandhrīkṛtakānanam || 13 ||
[Analyze grammar]

tūryāravadhvanacchailaguhaṃ gahanakoṭaram |
mattasāmantavalitaṃ vidravadvanavāraṇam || 14 ||
[Analyze grammar]

udyannādamahāsiṃhavidārakaraṇodbhaṭam |
vanebhamadaniṣṣyandagandhodgarjajjayadvipam || 15 ||
[Analyze grammar]

vimānarathasaṅghaṭṭacakracītkārapīvaram |
mauliratnaghanoddyotabhagnadhūlitamaḥpaṭam || 16 ||
[Analyze grammar]

tatra gandhadvipavare kṛtapārthivamandire |
rakṣite dṛptasāmantairārūḍhau nṛpadampatī || 17 ||
[Analyze grammar]

tataśśikhidhvajo rājā mahiṣyā samamiṣṭayā |
padātirathasambādhaṃ karṣannatibalo balam || 18 ||
[Analyze grammar]

cacālācalacālinyā senayā rabhasenayā |
bhinantyā tarasā śailānvātyayevāśu toyadān || 19 ||
[Analyze grammar]

tasmānmahendraśailendrāccalitaḥ sa mahīpatiḥ |
pathi paśyan girīndeśānnadīrgrāmān sajaṅgalān || 20 ||
[Analyze grammar]

darśayaṃśca priyāyāstamātmavṛttāntasañcayam |
prāpālpenaiva kālena svāṃ purīṃ svargaśobhanām || 21 ||
[Analyze grammar]

tatra te tasya sāmantāstadāgamanamādṛtāḥ |
vividurjayaśabdena nirjagmuścoditāśayāḥ || 22 ||
[Analyze grammar]

ekatāṃ samprayātena tāratūryaninādinā |
baladvayena tenāsau viveśa nagaraṃ nṛpaḥ || 23 ||
[Analyze grammar]

lājapuṣpāñjalivrātairāvṛṣṭaḥ paurayoṣitām |
vaṇiṅmārgagato'paśyatpuraṃ paramabhūṣitam || 24 ||
[Analyze grammar]

patākādhvajasambādhaṃ muktājālamanoramam |
nṛttagītaparastrīkaṃ svargaṃ bhūmāviva cyutam || 25 ||
[Analyze grammar]

praviśyātha gṛhaṃ taistaiḥ saṃyutaṃ nṛpamaṅgalaiḥ |
samyaksammānayāmāsa praṇataṃ prakṛtivrajam || 26 ||
[Analyze grammar]

purotsavaṃ bhṛśaṃ kṛtvā dinasaptakamuttamam |
akarod rājakāryāṇi mānitāntaḥpuro nṛpaḥ || 27 ||
[Analyze grammar]

daśavarṣasahasrāṇi rājyaṃ kṛtvā mahītale |
saha cūḍālayā rājā virato dehadhāraṇāt || 28 ||
[Analyze grammar]

dehamutsṛjya nirvāṇamasneha iva dīpakaḥ |
apunarjanmane rāma jagāmeti mahāmatiḥ || 29 ||
[Analyze grammar]

daśavarṣasahasrāṇi samadṛṣṭitayā tayā |
rājyaṃ tathānuśiṣyāsau nirvāṇapadamāptavān || 30 ||
[Analyze grammar]

vigatabhayaviṣādo mānamātsaryamuktaḥ prakṛtasahajakarmā saktanīrāgabuddhiḥ |
iti sa susamadṛṣṭirmṛtyumāryo'tha jitvā daśaśiśirasahasrāṇyekarājyaṃ cakāra || 31 ||
[Analyze grammar]

bhuktvā bhogānanantānbhuvi sakalamahī pālacūḍāmaṇitve sthitvā vai dīrghakālaṃ paramamṛtapadaṃ prāptavāṃstad yathaiṣaḥ |
evaṃ rāmāgataṃ tvaṃ prakṛtamanusaran kāryajātaṃ viśokastiṣṭhottiṣṭha svayatnātprasabhamanubhavanbhogamokṣāgryalakṣmīm || 32 ||
[Analyze grammar]