Chapter 107

śikhidhvajasamādhānaṃ nāma sargaḥ |
saptottaraśatatamaḥ sargaḥ |
vasiṣṭhaḥ |
nirvikalpasamādhānātkāṣṭhakuḍyopamaḥ sthitaḥ |
evaṃ śikhidhvajo rāma cūḍālāmadhunā śṛṇu || 1 ||
[Analyze grammar]

śikhidhvajaṃ taṃ bhartāraṃ kumbhaveṣena tena sā |
prabodhyāntardhimāgatya tatāra tarasā nabhaḥ || 2 ||
[Analyze grammar]

devaputrākṛtiṃ vyomni jahau māyāvinirmitām |
vidagdhamugdhamākāraṃ straiṇaṃ jagrāha sundaram || 3 ||
[Analyze grammar]

nabhasā svapuraṃ prāpya viveśāntaḥpuraṃ kṣaṇāt |
dṛśyā babhūva lokasya nṛpakarma cakāra sā || 4 ||
[Analyze grammar]

vāsaratritayenāpi punarambarametya sā |
babhūva kumbho yogena śikhidhvajavanaṃ yayau || 5 ||
[Analyze grammar]

tathā tatraiva taṃ bhūpamapaśyadvanabhūmigā |
nirvikalpasamādhisthaṃ samutkīrṇamiva drumāt || 6 ||
[Analyze grammar]

aho nu khalu bho diṣṭyā viśrānto'yamihātmani |
sthitaḥ svasthaḥ samaśśānta ityuvāca puraḥ prabhoḥ || 7 ||
[Analyze grammar]

tadenaṃ tāvadetasmādbodhayāmi parātpadāt |
idānīmeva kiṃ dehatyāgameṣa karoti vai || 8 ||
[Analyze grammar]

kañcitkālaṃ sphuritveha rājyena vipinena vā |
samameva gamiṣyāvastyaktadehāvimau śamam || 9 ||
[Analyze grammar]

tad yāvadeṣo vicalaṃ pariṇāmaṃ na gacchati |
anenābhyāsayogena tāvadābodhayāmyaham || 10 ||
[Analyze grammar]

iti sañcintya cūḍālā siṃhanādaṃ cakāra sā |
bhūyo bhūyaḥ prabhoragre vanecarabhayapradam || 11 ||
[Analyze grammar]

na cacāla śilevādrau yadā nādena tena saḥ |
bhūyo bhūyaḥ kṛtenāpi tadā sā taṃ vyacālayat || 12 ||
[Analyze grammar]

cālitaḥ pātito'pyeṣa yadā na bubudhe nṛpaḥ |
tadā sañcintayāmāsa cūḍālā kumbharūpiṇī || 13 ||
[Analyze grammar]

aho pariṇataḥ sādhuḥ svapade bhagavānayam |
tadenaṃ hi kayā yuktyā sāmprataṃ bodhayāmyaham || 14 ||
[Analyze grammar]

atha vainaṃ mahātmānaṃ kimarthaṃ bodhayāmyaham |
videhaṃ bodhamāsādya tiṣṭhatveṣa yathāsukham || 15 ||
[Analyze grammar]

ahamapyaṅganādehamimaṃ tyaktvā paraṃ padam |
apunarjananāyaiva gacchāmīha hi kiṃ mama || 16 ||
[Analyze grammar]

iti sañcintya dehaṃ svaṃ tyaktumabhyudyatā satī |
punaḥ sañcintayāmāsa cūḍālā sā mahāsatī || 17 ||
[Analyze grammar]

ālokayāmi vai tāvadenaṃ dehaṃ mahīpateḥ |
yadyasya sattvaśeṣo'sti bodhabījaṃ hṛdantare || 18 ||
[Analyze grammar]

tatkālenaiṣa bhagavān samprabodhamupaiṣyati |
mūlakośarasālīnaṃ puṣpajālaṃ madhāviva || 19 ||
[Analyze grammar]

tadeha viharañjīvanmukta eko bhavatyayam |
maiko bhavatveṣa iti manye gacchāmi no śamam || 20 ||
[Analyze grammar]

iti sañcintya cūḍālā sparśena nayanena ca |
patimālokya sāśaṅkamuvāca varavarṇinī || 21 ||
[Analyze grammar]

astyeva sattvaśeṣo'sya hṛdi sambodhakāraṇam |
kāyo'yamagaladrūpo nemaṃ dehaṃ tyajāmyaham || 22 ||
[Analyze grammar]

rāmaḥ |
bhṛśaṃ saṃśāntacittasya kāṣṭhaloṣṭasamasthiteḥ |
sattvaśeṣaḥ kathaṃ brahmañjñāyate dhyānaśālinaḥ || 23 ||
[Analyze grammar]

vasiṣṭhaḥ |
prabodhakāraṇaṃ yasya durlakṣyāṇuvapurhṛdi |
vidyate sattvaśeṣo'ntarbīje puṣpaphalaṃ yathā || 24 ||
[Analyze grammar]

cittaspandavimuktasya tasyāspanditasaccitaḥ |
dvitvaikatvavihīnasya samasyācalasaṃsthiteḥ || 25 ||
[Analyze grammar]

kāyaḥ samasamābhogo na glāyati na hṛṣyati |
nāstameti na codeti samamevāvatiṣṭhate || 26 ||
[Analyze grammar]

dvitvaikatvādiyuktasya yasya praspandate manaḥ |
tasya deho'nyatāmeti nāspandasya kadācana || 27 ||
[Analyze grammar]

cittaspando hi sarveṣāṃ kāraṇaṃ jagataḥ sthiteḥ |
rāma bhāvavikārāṇāṃ kusumānāṃ yathā madhuḥ || 28 ||
[Analyze grammar]

yasminpraspandate dehe cittaṃ sa hi muhurmuhuḥ |
harṣaglapanasammohavaśameti raghūdvaha || 29 ||
[Analyze grammar]

citte praśamamāyāte kāyo yaḥ sattvavān sthitaḥ |
bādhate nāmbarasyeva tasya bhāvavikārabhūḥ || 30 ||
[Analyze grammar]

vīcyādi na yathodeti samāyā jalasantateḥ |
tathā na dṛśyate doṣaḥ samāyāḥ sattvasaṃsthiteḥ || 31 ||
[Analyze grammar]

sattvasyānupalambho'sti nānyaḥ svopaśamādṛte |
yāvadbhāvi samaṃ sattvaṃ kālācchāmyati kevalam || 32 ||
[Analyze grammar]

dehe yasmiṃstu no cittaṃ nāpi sattvaṃ ca vidyate |
sa tāpahimavad rāma pañcatvena vilīyate || 33 ||
[Analyze grammar]

śikhidhvajasya deho'sau niścitaṃ cetasojjhitaḥ |
sattvāṃśena ca saṃyuktastena na mlānibhājanam || 34 ||
[Analyze grammar]

taṃ tathābhūtamālokya bharturdehaṃ varāṅganā |
anujjhitavatī dehaṃ cintayāmāsa satvaram || 35 ||
[Analyze grammar]

cittattvaṃ sarvagaṃ śuddhaṃ praviśyābodhayāmyaham |
bhaviṣyadbodhanaṃ kāntameṣa tatra hi saṃsthitaḥ || 36 ||
[Analyze grammar]

na bodhayāmi yadyenaṃ cirāttadbudhyate svayam |
kimihaikāvatiṣṭhe'hamityenaṃ bodhayāmyaham || 37 ||
[Analyze grammar]

iti sañcintya cūḍālā dehaṃ kāraṇapañjaram |
santyajya prāpa cittattve sthitimādyantavarjite || 38 ||
[Analyze grammar]

tatra sā cetanaspandaṃ kṛtvā sattvavataḥ prabhoḥ |
svaṃ viveśa punardehaṃ khānnīḍamiva pakṣiṇī || 39 ||
[Analyze grammar]

kumbhākṛtirathotthāya niviṣṭā kusumasthale |
sāma gātuṃ pravṛttā sā bhramarīvṛndasasvanā || 40 ||
[Analyze grammar]

taṃ sāmasvanamākarṇya citsattvaguṇaśālinaḥ |
bubudhe bhūpaterdehe vasanta iva padminī || 41 ||
[Analyze grammar]

dṛśaṃ vikāsayāmāsa tāṃ tadārka ivābjinīm |
gṛhītasattvasampattiśśikhidhvajamahīpatiḥ || 42 ||
[Analyze grammar]

apaśyatkumbhamagrasthaṃ sāmagāyanatatparam |
pareṇa vapuṣā yuktaṃ sāmavedamivāparam || 43 ||
[Analyze grammar]

aho bata vayaṃ dhanyāḥ punaḥ prāpto muneḥ sutaḥ |
ityevodāharan rājā kumbhāya kusumaṃ dadau || 44 ||
[Analyze grammar]

diṣṭyā sthitāḥ smo bhagavaṃstava cetasi pāvane |
ke nāma na mahāsattvāḥ prasādeṣvaṅga hi sthirāḥ || 45 ||
[Analyze grammar]

asmatpavitrīkaraṇamekamāgamakāraṇam |
tava pāpāpahaṃ brūhi dvitīyaṃ kataradbhavet || 46 ||
[Analyze grammar]

kumbhaḥ |
yataḥ prabhṛti yāto'smi tvatsakāśādarindama |
tataḥ prabhṛti ceto me tvayaiveha samaṃ sthitam || 47 ||
[Analyze grammar]

na rame svargaraṅgeṣu devodyāneṣu cānagha |
merumandarakūṭeṣu kailāsakuhareṣu ca || 48 ||
[Analyze grammar]

tvatsaṅgameva vāñchāmi subhagācārapeśalam |
amṛtasyandasaṅkāśaṃ madhumāsamiva drumaḥ || 49 ||
[Analyze grammar]

tasmādeveha tiṣṭhāmi samīpe tava sāmpratam |
abhīṣṭaṃ yad yadevāṅga ramyāṇāṃ dhuri tatsthitam || 50 ||
[Analyze grammar]

tvādṛśo bandhurāptaśca suhṛnmitraṃ sakhā tathā |
viśvāsyaścaiva śiṣyaśca manye jagati nāsti me || 51 ||
[Analyze grammar]

śikhidhvajaḥ |
aho nu phalitaṃ puṇyapādapairnaḥ kulācale |
yadbhavānapyasaṅgo'pi vāñchatyasmatsamāgamam || 52 ||
[Analyze grammar]

idaṃ vanamime vṛkṣā bhṛtyo'yamahamādṛtaḥ |
rocate cenna te svargastadiha sthīyatāṃ prabho || 53 ||
[Analyze grammar]

bhavadvitīrṇayā yogayuktyā viśrāntavānaham |
yathā sādho tathā manye svarge viśramaṇaṃ kutaḥ || 54 ||
[Analyze grammar]

tāmeva svasthitiṃ svacchāmavalambya prakāśinīm |
vihareha yathākāmaṃ svarge bhūmitale'tha vā || 55 ||
[Analyze grammar]

kumbhaḥ |
pare pade mahānande kaccidviśrāntavānasi |
idaṃ bhedamayaṃ duḥkhaṃ kaccitsantyaktavānasi || 56 ||
[Analyze grammar]

kaccidāpātaramyebhyaḥ saṅkalpebhyo ratirbhṛśam |
nirmūlatāṃ gatā rājannoghatīralateva te || 57 ||
[Analyze grammar]

heyādeyadaśātītaṃ śāntaṃ samasamasthiti |
yathāprāpteṣvanudvegi kaccittava manaḥ sthitam || 58 ||
[Analyze grammar]

śikhidhvajaḥ |
tvatprasādena bhagavandṛṣṭā dṛśyātigā gatiḥ |
prāptaḥ saṃsārasīmānto labdho labdhavyaniścayaḥ || 59 ||
[Analyze grammar]

cirāyāticireṇaiva viśrāntāḥ smo nirāmayāḥ |
labdhaṃ labdhavyamakhilaṃ tṛptāḥ smaściramakṣatāḥ || 60 ||
[Analyze grammar]

nopadeṣṭavyamasmākaṃ kiñcidapyupayujyate |
sarvatraivātitṛptāḥ smaḥ saṃsthitāḥ smo gatajvaram || 61 ||
[Analyze grammar]

jñātamajñātamaprāptaṃ samprāptaṃ tyaktamāśritam |
tvattvaṃ paratvaṃ mattvaṃ me khasyevāsti na kiñcana || 62 ||
[Analyze grammar]

nissaṃsṛtirvigatamohabhayābhirāmo nityoditaḥ samasamāśayasarvasomyaḥ |
sarvātmakaḥ sakalasaṅkalanāvimukta ākāśakośaviśadaśśamamāsthito'smi || 63 ||
[Analyze grammar]