Chapter 105

śikhidhvajaparamārthabodho nāma sargaḥ |
pañcottaraśatatamaḥ sargaḥ |
vasiṣṭhaḥ |
iti kumbhavaco rājā bhāvayaṃstadakṛtrimam |
sva evātmapade tasmin kṣaṇaṃ pariṇato'bhavat || 1 ||
[Analyze grammar]

babhūvāmīlitamanolocanaśśāntavāgabhīḥ |
śilātalādivotkīrṇo nisspandāvayavākṛtiḥ || 2 ||
[Analyze grammar]

tato muhūrtamātreṇa prabuddhaṃ sphāritekṣaṇam |
tamuvāca mahābāho cūḍālā kumbharūpiṇī || 3 ||
[Analyze grammar]

kumbhaḥ |
kaccidasminpade sphāre śuddhe mṛduni nirmale |
sutalpe nirvikalpānāṃ sukhaṃ viśrāntavānasi || 4 ||
[Analyze grammar]

kaccidantaḥ prabuddho'si kaccidbhrāntistvayojjhitā |
kaccijjñeyaṃ parijñātaṃ dṛṣṭaṃ draṣṭavyameva vā || 5 ||
[Analyze grammar]

śikhidhvajaḥ |
bhagavaṃstvatprasādena mahāvibhavabhūṣitā |
mahatī padavī dṛṣṭā sarvasyordhve sthitā mayā || 6 ||
[Analyze grammar]

satāṃ viditavedyānāmaho bata mahātmanām |
apūrvaikāmṛtamayaḥ saṅgaḥ sāraphalapradaḥ || 7 ||
[Analyze grammar]

janmanāpi mayā labdhaṃ yannāma na mahāmṛtam |
tadadya tvatsamāsaṅgātkṣaṇenāsāditaṃ svayam || 8 ||
[Analyze grammar]

anantamādyamamṛtametatkamalalocana |
kathaṃ nāsāditamabhūdetadātmapadaṃ mayā || 9 ||
[Analyze grammar]

kumbhaḥ |
manasyupaśamaṃ yāte tyaktabhogaiṣaṇe sthite |
kaṣāyapāke nirvṛtte sarvendriyagaṇasya ca || 10 ||
[Analyze grammar]

yānti cetasi viśrāntiṃ vimalā daiśikoktayaḥ |
yathā sitāṃśuke śuddhe bindavaḥ kuṅkumāmbhasaḥ || 11 ||
[Analyze grammar]

kaṣāyāṇāmanantānāṃ sambhṛtānāṃ śarīrake |
svavāsanāsvarūpāṇāmadya pākastavoditaḥ || 12 ||
[Analyze grammar]

dehānmalāni sarvāṇi kālena kamalekṣaṇa |
sādho vṛkṣātphalānīva pākena vigalantyadhaḥ || 13 ||
[Analyze grammar]

vāsanātmasu yāteṣu maleṣu vilayaṃ sakhe |
yadvakti gururantastadviśatīṣuryathā bile || 14 ||
[Analyze grammar]

kaṣāyapāke sampanne tvaṃ mayādya vibodhitaḥ |
tenādyaiva tavājñānakṣayo jāto mahāmate || 15 ||
[Analyze grammar]

adya pakvakaṣāyastvamadyaivājñānasaṅkṣayī |
adyaiva sopadeśyastvamadyaivāsi prabuddhavān || 16 ||
[Analyze grammar]

śubhāśubhānāṃ sarveṣāṃ karmaṇāmadya saṅkṣayaḥ |
satsaṅgavyapadeśena tava niṣpattimāgataḥ || 17 ||
[Analyze grammar]

yāvadasya dinasyaiṣa pūrvo bhāgo mahīpate |
tāvacceto hyahamiti tavājñānaṃ babhūva ha || 18 ||
[Analyze grammar]

idānīṃ madvacobodhāccetasi kṣayamāgate |
hṛdayātsamparityakte samprabuddho'si bhūpate || 19 ||
[Analyze grammar]

hṛdi yāvanmanassattā tāvadajñānasaṃsthitiḥ |
citte cittatayā tyakte jñānasyābhyudayo bhavet || 20 ||
[Analyze grammar]

dvitvaikatvadṛśau cittaṃ tadevājñānamucyate |
etayoryo layo dṛṣṭyostajjñānaṃ sā parā gatiḥ || 21 ||
[Analyze grammar]

prabuddho'si vimukto'si tyaktaṃ cittaṃ tvayā nṛpa |
sadeva sattayāttaṃ hi tvayā tyaktamasatpadam || 22 ||
[Analyze grammar]

vītaśoko nirāyāso nissaṅgo nityamātmavān |
mahodayo munirmaunī kharūpastiṣṭha nirmalaḥ || 23 ||
[Analyze grammar]

śikhidhvajaḥ |
evaṃ hi bhagavañjantormūrkhasyaivāsti cittabhūḥ |
na prabuddhasya tajjñasya cittamasti kila prabho || 24 ||
[Analyze grammar]

jīvanmuktāsta ete hi viharanti kathaṃ vada |
avidyamānamanaso yuṣmadādyāstathā narāḥ || 25 ||
[Analyze grammar]

iti me kathayāśeṣamanyaiśca vacanāṃśubhiḥ |
hārdaṃ tamo me nipuṇamevamprāyaiḥ pramārjaya || 26 ||
[Analyze grammar]

kumbhaḥ |
yathā vadasi dharmajña tattathaiva hi nānyathā |
cittaṃ hi jīvanmuktānāṃ nāstyaṅkura ivāśmanām || 27 ||
[Analyze grammar]

punarjananayogyā yā vāsanā ghanavāsanā |
sā proktā cittaśabdena na sā tajjñasya vidyate || 28 ||
[Analyze grammar]

yayā vāsanayā tajjñā viharantīha karmasu |
tāṃ tvaṃ sattvābhidhāṃ viddhi punarjananavarjitām || 29 ||
[Analyze grammar]

jīvanmuktā mahātmānaḥ sattvasthāḥ saṃyatendriyāḥ |
viharanti gatāsaṅgaṃ na cittasthāḥ kadācana || 30 ||
[Analyze grammar]

mūḍhaṃ cittaṃ cittamāhuḥ prabuddhaṃ sattvamucyate |
aprabuddhā hi cittasthāḥ sattvasthā hi mahādhiyaḥ || 31 ||
[Analyze grammar]

bhūyaḥ prajāyate cittaṃ sattvaṃ bhūyo na jāyate |
aprabuddhasya bandho'sti na prabuddhasya bhūpate || 32 ||
[Analyze grammar]

sattvavānasi sañjāto mahātyāgī sthito bhavān |
aśeṣeṇa tvayā tyaktaṃ cittamadyeti vedmyaham || 33 ||
[Analyze grammar]

samastavāsanāmukto rājan rājeva rājase |
ākāśasāmyamāyātaṃ manye tava mune manaḥ || 34 ||
[Analyze grammar]

śamaṃ prāpto'si paramaṃ śuddhaḥ samasamasthitiḥ |
mandarāhananonmukto yathā kṣīramahārṇavaḥ || 35 ||
[Analyze grammar]

parityaktā tvayā rājyādvāsanā tapasastathā |
kānanācca śarīrācca śubhāśubhaphalādapi || 36 ||
[Analyze grammar]

nirīho vigatāsaṅgastyaktacitto vivāsanaḥ |
sampannastvaṃ mahābāho mahātyāgipadaṃ gataḥ || 37 ||
[Analyze grammar]

ayaṃ sa hi mahātyāgaḥ sarvaṃ yatra samujjhitam |
svargāpavargacittādi tapodānaphalādyapi || 38 ||
[Analyze grammar]

prabuddhayeddhayā sādho dhiyā paramabodhayā |
tapo nāma kiyanmātraduḥkhakṣayakaraṃ bhavet || 39 ||
[Analyze grammar]

kṣayātiśayanirmuktaṃ yatsukhaṃ samatāmayam |
tatsattadvastu tatkiñcinna tu svargādi bhaṅguram || 40 ||
[Analyze grammar]

bhāvābhāvatulārūḍhaḥ sthitādhivyādhivedhitaḥ |
svargo nāma kimānandaḥ so'pi sandehamāsthitaḥ || 41 ||
[Analyze grammar]

aprāptasvārthasaṃsiddheḥ kriyākāṇḍaśśubho bhavet |
yena nāsāditaṃ hema rītiṃ kiṃ sa parityajet || 42 ||
[Analyze grammar]

cūḍālādisamāsaṅgādbhavejjñatvaṃ sukhena te |
tatkimarthamanarthe'sminnimagnastvaṃ tapomaye || 43 ||
[Analyze grammar]

āśramādivikalpāṃśasādhyasyāsya kukarmaṇaḥ |
ādyantau paśya sumate madhya eva ramasva mā || 44 ||
[Analyze grammar]

yata ete samāyātā yasminpariṇamanti ca |
taporūpā vikalpāṃśāstatra baddhapado bhava || 45 ||
[Analyze grammar]

cidvyomno nabhaso'pyacchātsarve bhāvāḥ samutthitāḥ |
tatraiva ca layaṃ yānti tatraivāssva ramasva ca || 46 ||
[Analyze grammar]

idaṃ kāryamidaṃ neti saṅkalpā brahmabindavaḥ |
bindūñchikhidhvaja tyaktvā pūrṇameghaṃ samāśraya || 47 ||
[Analyze grammar]

iṣṭaṃ me prārthayasveti yathaiva prārthyate sakhī |
striyā tathaiva na kathaṃ dayitaḥ prārthyate svayam || 48 ||
[Analyze grammar]

saṅkalparacitānetānbhāvānāpātabhāsurān |
na gṛhṇanti mahātmānaḥ prājñā jalaravīniva || 49 ||
[Analyze grammar]

svargamokṣādiphaladaṃ yatkiñcitsamameva tat |
tyaktvā samasamābhāso yo'syasāveva vai bhava || 50 ||
[Analyze grammar]

santaṃ sattvena nāśena naśyantaṃ vigataspṛhaḥ |
padārthaughamimaṃ gṛhṇaṃstiṣṭhāspanditacittabhūḥ || 51 ||
[Analyze grammar]

aparispandacittasya saṃsṛtirneha bādhate |
pauruṣaprabhavā sādho vipannītimato yathā || 52 ||
[Analyze grammar]

yāni yānīha duḥkhāni prasphuranti jagattraye |
cetaścāpalajānyeva tāni tāni mahīpate || 53 ||
[Analyze grammar]

sthiraṃ śāntaṃ gataspandaṃ yasya cittamacāpalam |
sa vibhuḥ sa mahānandī sāmrājyasya sa bhājanam || 54 ||
[Analyze grammar]

atha cetasi tattvajña spandāspandau tadekatām |
nītvā tiṣṭha yathākāmamaikyamāgatya śāśvatam || 55 ||
[Analyze grammar]

śikhidhvajaḥ |
kathamaikyavidhiṃ yātaḥ spandāspandāvimau vibho |
sarvasaṃśayavicchedakārinnetadvadāśu me || 56 ||
[Analyze grammar]

kumbhaḥ |
ekaṃ vastu jagatsarvaṃ cinmātraṃ vārivāmbudhiḥ |
tadeva spandate no vā śuddhaṃ vārīva vīcibhiḥ || 57 ||
[Analyze grammar]

brahma cinmātramamalaṃ satyamityādināmabhiḥ |
yadgītaṃ tadidaṃ mūḍhaḥ paśyatyaṅga jagattayā || 58 ||
[Analyze grammar]

nisspanda eva sarvasmin sarge tasmāddhi saṃsṛtiḥ |
parispando hi vīcyādistadaspandaṃ samaṃ param || 59 ||
[Analyze grammar]

citaḥ sa eva cetspandastathāspandaśca bhāvitaḥ |
ekarūpatayā nāma tattadapyacalaṃ śivam || 60 ||
[Analyze grammar]

sargaścitspandamātrātmā samyagdṛṣṭo vilīyate |
udetyasamyagdṛṣṭātmā rajjvāṃ sarpabhramo yathā || 61 ||
[Analyze grammar]

saspandā ciccidabhidhā nisspandā tviyamātatā |
turyātītapadārūḍhā vācā vaktuṃ na pāryate || 62 ||
[Analyze grammar]

śāstrasajjanasamparkasantatābhyāsayogataḥ |
kālenāmalatāṃ yāte cetasīndāvivodite || 63 ||
[Analyze grammar]

etatkevalamābhātaṃ svānubhūtigirātatam |
kathyate svānubhūtestu svayaṃ svaṃ rūpamātmanā || 64 ||
[Analyze grammar]

prāpto'si bhāvaṃ svamanādimadhyamatraiva tiṣṭheṣṭapade niviṣṭaḥ |
nīrūpanirbhedamahācidātmā jāto'si sādho khalu vītaśokaḥ || 65 ||
[Analyze grammar]